السفاح العاشق

بارت 30

ﻓﻲ ﺍﻟﺼﺒﺎﺡ ﺣﻼﺕ ﺟﻮﻻﻥ ﻋﻨﻴﻬﺎ ﻭ ﻧﺎﺿﺖ ... ﺗﻮﺟﻬﺎﺕ ﻟﻠﺤﻤﺎﻡ ﻏﺴﻼﺕ ﻭﺟﻬﺎ ... ﺷﺎﻓﺖ ﻋﻨﻴﻬﺎ ﻣﻨﻔﻮﺧﻴﻦ ... ﺭﺟﻌﺎﺕ ﻟﻴﻠﺔ ﻟﺒﺎﺭﺡ ﻟﻠﺪﺍﺭ ﻭ ﻣﺎﻗﺪﺭﺍﺗﺶ ﺗﻨﻌﺲ ... ﺣﺘﺎ ﺻﺒﺢ ﺍﻟﺤﺎﻝ ﻋﺎﺩ ﺳﺪﺍﺕ ﻋﻨﻴﻬﺎ ﺷﻮﻳﺔ ... ﺍﺳﺘﺎﻋﺪﺍﺕ ﺑﺎﺵ ﺗﻤﺸﻲ ﻟﻠﺨﺪﻣﺔ ... ﺍﺣﺘﻤﺎﻝ ﻛﺒﻴﺮ ﺍﻥ ﺍﻟﻴﻮﻡ ﻳﻜﻮﻥ ﺁﺧﺮ ﻳﻮﻡ ﻟﻴﻬﺎ ﻓﺎﻟﺸﺮﻛﺔ ... ﻟﺒﺴﺎﺕ ﻋﻠﻴﻬﺎ ﻭ ﻫﺒﻄﺎﺕ ... ﺧﺮﺟﺎﺕ ﺑﻜﺮﻱ ﺑﺎﺵ ﻣﺘﻠﻘﺎﺵ ﻣﻊ ﺑﺎﻫﺎ ...
ﺧﺪﺍﺕ ﻃﺎﻛﺴﻲ ﻭ ﻓﺎﻟﺪﺧﻠﺔ ﺗﻼﻗﺎﺕ ﺑﺰﻳﻨﺐ ... ﺍﻟﻲ ﻏﻴﺮ ﺷﺎﻓﺖ ﺟﻮﻻﻥ ﺣﺴﺎﺕ ﺑﻠﻲ ﺷﻲ ﺣﺎﺟﺔ ﻭﺍﻗﻌﺔ ﻣﻌﻬﺎ ... ﻃﻠﻌﺎﺕ ﻣﻌﻬﺎ ﻟﻠﻤﻜﺘﺐ ﻣﺎﺑﻐﺎﺗﺶ ﺗﻔﺎﺭﻗﻬﺎ ﺣﺘﺎ ﺗﻌﺮﻑ ﺷﻨﻮ ﺑﻴﻬﺎ ... ﺩﺧﻠﻮ ﻟﻤﻜﺘﺐ ﺟﻮﻻﻥ ﻭ ﻫﻲ ﺗﻤﻄﺮ ﻋﻠﻴﻬﺎ ﺯﻳﻨﺐ ﺑﺎﻷﺳﺌﻠﺔ ... ﻋﺎﻭﺩﺍﺕ ﻟﻴﻬﺎ ﺟﻮﻻﻥ ﻛﻠﺸﻲ ... ﭼﻠﺴﺎﺕ ﺯﻳﻨﺐ ﻓﻮﻕ ﺍﻟﻔﻮﻃﻮﻱ ﻭ ﺷﺎﻓﺖ ﻓﻴﻬﺎ ...
ﺯﻳﻨﺐ : ﻣﻴﻤﻜﻨﺶ ﻳﺒﺰﺯ ﻋﻠﻴﻚ ... ﻛﺘﺒﻘﺎﻱ ﺑﻨﺘﻮ ﺍﻟﻮﺣﻴﺪﺓ ... ﺗﻠﻘﺎﻳﻪ ﻏﻴﺮ ﻛﺎﻥ ﻣﻌﺼﺐ ... ﻋﻄﻴﻪ ﻭﻗﺖ ﻭ ﻏﻴﺘﺮﺍﺟﻊ
ﺟﻮﻻﻥ : ﺑﺎﺑﺎ ﻭ ﻋﺎﺭﻓﺎﻩ
ﺯﻳﻨﺐ : ﻭ ﺷﻜﻮﻥ ﻫﺎﺩ ﺧﻴﻨﺎ ﺍﻟﻲ ﺑﺎﻏﻲ ﻳﺰﻭﺟﻚ ﺑﻴﻪ ؟
ﺟﻮﻻﻥ : ﻭﻟﺪ ﺻﺎﺣﺒﻮ
ﺯﻳﻨﺐ : ﺁﺵ ﻫﺎﺩ ﺍﻟﺨﺮﺍ ... ﻣﻨﻴﻦ ﺧﺮﺝ ﺣﺘﺎ ﻫﻮ
ﺟﻮﻻﻥ : ﻣﺎﺑﻐﻴﺘﺶ ﻳﺘﺠﺒﺪ ﻟﻴﻚ ﺍﻟﺼﺪﺍﻉ ﺑﺴﺒﺎﺑﻲ ... ﻏﻴﺮ ﻧﺰﻟﻲ ﻟﺒﻮﺳﺖ ﺩﻳﺎﻟﻚ ﺍﺯﻳﻨﺐ
ﺯﻳﻨﺐ : " ﻧﺎﺿﺖ " ﻓﺎﺳﺘﺮﺍﺣﺔ ﺍﻟﻐﺪﺍ ﻏﻨﻄﻠﻊ ﻋﻨﺪﻙ ... ﺧﻠﻴﻚ ﻣﺘﻔﺎﺋﻠﺔ
ﻛﻴﻒ ﺧﺮﺟﺎﺕ ﺯﻳﻨﺐ ﺣﻄﺎﺕ ﺟﻮﻻﻥ ﻳﺪﻫﺎ ﺗﺤﺖ ﺫﻗﻨﻬﺎ ... ﻛﺘﻔﻜﺮ ﻓﺸﻨﻮ ﻏﺎﺩﻱ ﺩﻳﺮ ... ﻣﺘﺄﻣﻠﺔ ﺍﻥ ﺑﺎﻫﺎ ﻳﺘﺮﺍﺟﻊ ﻋﻠﻰ ﻗﺮﺍﺭﻭ ﻣﻨﻴﻦ ﻳﻬﻀﺮ ﻣﻌﺎﻩ ﺍﻟﺤﺎﺝ ... ﺳﻤﻌﺎﺕ ﻟﻔﻴﻜﺲ ﻛﻴﺼﻮﻧﻲ ﻭ ﻫﻲ ﺗﺠﺎﻭﺏ ... ﻫﺰﺍﺕ ﺩﺍﻛﺸﻲ ﺍﻟﻲ ﻃﻠﺐ ﻣﻨﻬﺎ ﺗﺠﻴﺒﻮ ﻭ ﺗﻮﺟﻬﺎﺕ ﻟﻤﻜﺘﺒﻮ ... ﺩﻗﺎﺕ ﻭ ﺩﺧﻼﺕ ...
ﺟﻮﻻﻥ : " ﺣﻄﺎﺕ ﺍﻷﻭﺭﺍﻕ ﻓﻮﻕ ﺍﻟﻤﻜﺘﺐ "
ﺭﺋﺒﺎﻝ ﻫﺰ ﻋﻨﻴﻪ ﺷﺎﻑ ﻓﻴﻬﺎ ... ﺑﺎﻧﺖ ﻟﻴﻪ ﺣﺎﺩﺭﺓ ﺭﺍﺳﻬﺎ ﻛﺘﺸﻮﻑ ﻓﻠﺮﺽ .. ﻧﻄﻖ ﺑﺼﻮﺗﻮ ﺍﻟﺨﺸﻦ ...
ﺭﺋﺒﺎﻝ : ﻏﺪﺍ ﺍﻹﺟﺘﻤﺎﻉ ﺍﻟﺴﻨﻮﻱ ﻟﻠﻜﺘﺎﺏ ﻭ ﺍﻟﻤﺆﻟﻔﻴﻦ ﻓﺎﻟﺸﺮﻛﺔ ... ﺿﺮﻭﺭﻱ ﺗﺤﻀﺮﻱ ﻟﻴﻪ
ﺟﻮﻻﻥ : " ﻫﺰﺍﺕ ﺭﺍﺳﻬﺎ " ﺃﻧﺎ ﻏﻨﺤﻀﺮ ؟
ﺭﺋﺒﺎﻝ : " ﻛﻴﺸﻮﻑ ﻓﻴﻬﺎ ﻭ ﺣﺲ ﺑﻴﻬﺎ ﺷﻲ ﺣﺎﺟﺔ " ﺟﺎﺕ ﺩﻋﻮﺓ ﺑﺎﺳﻤﻚ ... ﻣﺎﺑﻐﺎﺵ ﺗﺤﻀﺮﻱ ؟
ﺟﻮﻻﻥ : ﻻ ﻣﺎﺷﻲ ﻫﻜﺎﻙ " ﺑﺤﺰﻥ " ﺑﻐﻴﺖ
ﺭﺋﺒﺎﻝ : ﺍﻹﺟﺘﻤﺎﻉ ﻏﻴﻜﻮﻥ ﻓﺄﻭﻃﻴﻞ ***** ﻓﻠﻌﺸﻴﺔ ... ﻏﺪﺍ ﺑﻼﻣﺎ ﺗﺠﻲ ﻟﻠﺸﺮﻛﺔ ﺗﻮﺟﻬﻲ ﻟﺘﻤﺎﻙ ﻣﺒﺎﺷﺮﺓ
ﺟﻮﻻﻥ : ﺃﻭﻛﻲ ... ﺷﻜﺮﺍ ﻣﻮﺳﻴﻮ
ﺿﺎﺭﺕ ﺧﺎﺭﺟﺔ ﺑﻐﺎﺕ ﺗﺴﺪ ﻟﺒﺎﺏ ﻭ ﻫﻲ ﺗﺸﻮﻑ ﻓﺠﻬﺔ ﺍﻟﻤﻜﺘﺐ ... ﺑﺎﻥ ﻟﻴﻬﺎ ﺭﺋﺒﺎﻝ ﻛﻴﺸﻮﻑ ﻓﻴﻬﺎ ﻭ ﻳﺪﻭ ﻋﻠﻰ ﻟﺤﻴﺘﻮ ... ﺳﺪﺍﺕ ﻟﺒﺎﺏ ﻭ ﺭﺟﻌﺎﺕ ﻟﻤﻜﺘﺒﻬﺎ ... ﺟﻤﻌﺎﺕ ﺍﻟﻨﻔﺲ ﻭ ﻃﻠﻘﺎﺗﻬﺎ ... ﻟﻮ ﺟﺎ ﻫﺎﺩﺷﻲ ﻓﻀﺮﻭﻑ ﺃﺧﺮﻯ ﻛﺎﻧﺖ ﻏﻄﻴﺮ ﻣﻦ ﺍﻟﻔﺮﺣﺔ ... ﻟﻜﻦ ﻫﻲ ﻣﺰﺍﻝ ﻣﺎﻋﺮﻓﺎﺕ ﺣﺘﺎ ﻣﺼﻴﺮﻫﺎ ﺷﻨﻮ ... ﻭﺍﺵ ﻏﺘﻜﻤﻞ ﻭ ﻻ ﻻ ... ﻭﺍﺵ ﻏﺘﻘﺪﺭ ﺗﺤﻀﺮ ﻟﻬﺎﺩ ﺍﻹﺟﺘﻤﺎﻉ ﺍﻟﺴﻨﻮﻱ ﺇﻟﻲ ﺣﻠﻤﻬﺎ ﺗﻜﻮﻥ ﻓﻴﻪ ﻣﻊ ﺍﻷﺷﺨﺎﺹ ﺍﻟﻲ ﻛﺘﻌﺘﺎﺑﺮﻫﻢ ﻗﺪﻭﺗﻬﺎ ...
ﻓﻠﻌﺸﻴﺔ ﻭ ﻫﻲ ﺭﺍﺟﻌﺔ ﻟﻠﺪﺍﺭ ﻣﻜﺮﻫﺎﺗﺶ ﺗﺰﻳﺪ ﺗﻄﻮﺍﻝ ﺍﻟﻄﺮﻳﻖ ﻭ ﻣﺘﻮﺻﻠﺶ ... ﻳﺎﻻﻩ ﻫﺒﻄﺎﺕ ﻣﻦ ﺍﻟﻄﺎﻛﺴﻲ ﺻﻮﻧﺎ ﻟﻴﻬﺎ ﺍﻟﻔﻮﻥ ... ﻛﺎﻧﺖ ﺯﻳﻨﺐ ﺟﺎﻭﺑﺎﺗﻬﺎ ...
ﺯﻳﻨﺐ : ﺃﻣﻨﺪﺭﺍ ؟
ﺟﻮﻻﻥ : ﻣﺰﺍﻝ ﻣﺎﺩﺧﻠﺖ
ﺯﻳﻨﺐ : ﻳﻜﻮﻥ ﺧﻴﺮ ... ﻏﺪﺍ ﻏﺘﺤﻀﺮﻱ ﻟﻺﺟﺘﻤﺎﻉ ؟
ﺟﻮﻻﻥ : ﻣﺰﺍﻝ ﻣﺎﻋﺮﻓﺘﺶ
ﺯﻳﻨﺐ : ﺿﺮﻭﺭﻱ ﺗﺤﻀﺮﻱ ... ﻛﻴﻜﻮﻥ ﻣﺮﺓ ﻓﺎﻟﻌﺎﻡ ﺍﺻﺎﺣﺒﺘﻲ ... ﻓﺨﺒﺎﺭﻙ ﻛﺎﻳﻨﺔ ﺣﻔﻠﺔ ﺃﺧﺮﻯ ﻓﻨﻔﺲ ﺍﻷﻭﻃﻴﻞ ... ﺩﻳﺎﻝ ﻋﻴﺪ ﺯﻭﺍﺝ ﻭﺍﻟﺪﻳﻦ ﺇﺣﺪﻯ ﺍﻟﻌﺎﺭﺿﺎﺕ ﺍﻟﻲ ﺧﺪﺍﻣﻴﻦ ﻓﺎﻟﺸﺮﻛﺔ ... ﻭ ﺻﺎﺣﺒﺘﻚ ﻣﻌﺮﻭﺿﺔ ... ﻭﺍﺣﺪ ﺍﻟﺼﺤﺎﻓﻴﺔ ﺻﺎﺣﺒﺘﻬﺎ ﻋﺮﺿﺎﺗﻨﻲ ... ﻗﺎﻟﻮ ﺍﻟﺤﻔﻠﺔ ﺣﺼﺮﻳﺔ ﻭ ﻏﻴﺤﻀﺮ ﻟﻴﻬﺎ ﻏﻴﺮ ﺷﻜﻮﻥ ﻭ ﺷﻜﻮﻥ
ﺟﻮﻻﻥ : ﻣﺰﻳﺎﻥ ... ﻓﻮﺟﻲ ﻣﻊ ﺭﺍﺳﻚ
ﺯﻳﻨﺐ : ﻏﻨﻔﻮﺟﻮ ﺃﻧﺎ ﻭﻳﺎﻙ ... ﺍﻹﺟﺘﻤﺎﻉ ﻏﻴﺴﺎﻟﻲ ﺑﻜﺮﻱ ﻭ ﻏﻨﺠﻲ ﻧﺠﺮﻙ ... ﻓﻴﻦ ﻏﺘﺠﻴﻨﺎ ﺍﻟﻔﺮﺻﺔ ﻧﺤﻀﺮﻭ ﻟﺤﻔﻠﺔ ﺑﺤﺎﻝ ﻫﺎﺩﻱ ... ﻭ ﺣﻔﻠﺔ ﺗﻨﻜﺮﻳﺔ ﻣﺰﺍﻝ ... ﻛﻨﺸﻮﻓﻮ ﻫﺎﺩﺷﻲ ﻏﺎ ﻓﺎﻷﻓﻼﻡ ... ﻏﺪﺍ ﻧﺴﺎﻭ ﻋﻠﻴﻨﺎ ﻛﻠﺸﻲ ﻭ ﻧﻔﻮﺟﻮ ﺑﺠﻮﺟﺎﺕ
ﺟﻮﻻﻥ : ﺣﺘﺎ ﻧﺸﻮﻑ ... ﻏﻨﻘﻄﻊ ﻭﺻﻠﺖ ﻟﻠﺪﺍﺭ
ﺯﻳﻨﺐ : Good luck ...  💪
ﺟﻮﻻﻥ :Thank you