🔥 اكرام توبتي 🔥 ( الدارجة المغربية ) تيما مبارك

الجزء 15 و 16

🌙 رمضان كريم  🌙

        ✳ الجزء 15 ✳

   ♥اكــــــــــــرام تــوبــــــــــــتي♥

         🔥 شرف اكرام 🔥

🌸تيما مبارك🌸

منين دخلات نادية و هي تشكر في اكرام و تعاود و هذه الشي عصبو دخل البيت هز فوطة و خرج مشا الدوش ضربها ليك بتدويشة و خرج من تما بدل عليه الحالة و قاد حالتو و مشا البلاصتو هز تيليفونو

نادية:لاين اولدي
شرف:القهوة
نادية(فرحات):عتحلها من جديد ياك
شرف:لا
نادية:كيفاش لا
شرف:عنبيعها
(طول شوفة في الدار):و حتى هذه الدار عنبيعها و نمشيو لجيهة اخرى

نادية صدمها صدمة حياتها دار دارو مقالتش لا كانو كارينها من هذا شحال حتى خدم في ديك القهوة غير سرباي و بفلوس التدويرة بدا كي جمع منها شحال و هو ولد 18 العام حتى شراها لمو و سكنو فيها مجموعين و مول القهوة رهنها من عندو و حتى هي مع الوقت شراها غير حتى لهنا لهنا و هذه الخير لي كان كي تقاتل على قبلو ولا باغي يبيعو ناضت عندو و الفقصة الدنيا و دين تجمعات فيها و غوتات

نادية:واش باغي تحمقني واش باغي طرطق ليا المرارة ااااه علاش باغي تبيعها مالك اش خاصك بخيرك و خميرك القهوة كترزق منها الله عاماين و هي مسدودة على قبل من دوي

(كدفعو و تغوت):على قبل من دوي عقبلها هي لي نتاحرات و خلاتك شاف حالتك في المراية تعطيك الخبار حالتك مبقيتيش دايها فيها لي وقف حداك يهرب منك بريحة الشراب لي عاطية منك الدوش مبقيتيش كدوش مرة في الشهر علاش غدي تبيعها على قبل الشرااااااب دوي الشرااااب

شرف كي لبس السبرديلة و هي كتغوت مرارتها عطرطق معاه و هو ممسوقش لحالتها شمس منين شافت جداتها كتغوت بدات كتبكي صداعهم درو في راسو كمل و خرج عينيه حومر كي حكهم حتى راس الدرب جبد الساروت و بدا كي فتح الكاراج و طلع الريدو كي دور راسو كتبان ليه نزهة واقفة في الحانوت لي مقابل معاهم ولكن في الجيهة التانية و على جنب ليمن رجع دخل و كي شوف في القهوة و يحك نيفو بالغبرة حتى كي سمع شي واحد كي غوت ليه

***:سي شرف
شرف(دار كان):معاد مرحبا ا خويا زيد
معاد:لاباس عليك هاني
شرف:بيخير الحمد لله زيد زيد

زاد دخل معاه كي دور راسو في القهوة و هو يشوف فيه:هذه هي القهوة
شرف:اييه
معاد؛نشوف ليك السيد لي باغي يشري من عندك
شرف:الموقع مزيان و حتى القهوة مزالة مزيانة دابا نصيفط لي يسيقها و تشوف عتولي كتشعل
معاد:الله اودي راه كلشي قدام عيني ولكن قول ليا علاش باغي تبيعها
شرف(كي قاد الكرسي):عوال نخوي المدينة
معاد(خرج عينيه):الله اكبااااار علاش ياك شي باس ما كاين
شرف:طلعات ليا هذه المدينة و هذه الحومة في راسي ا خويا معاد والله
معاد:و فين عوال تمشي
شرف:اي مدينة أخرى ارض ربي واسعة و كبيرة
معاد:كنقول انك تفكر ا خويا شرف قبل ما تقرر هذه الشي
شرف:عارف هذه الشي و مكرهتكش تشوف ليا حتى لي يشري من عندي الدار يجي يشوفها و نتفاهمو على تمان و متخافش راه بحلاوتك
معاد:الله اودي المهم نخليك
شرف(خرج معاه و جبد گارو):الله يعاون

مشا بحالو معاد همزة و جابها ليه الله اما شرف رجع سد القهوة و جلس على الحافة ديالها كي كمي و سوط🌙 رمضان كريم  🌙

        ✳ الجزء 16 ✳

   ♥اكــــــــــــرام تــوبــــــــــــتي♥

         🔥 شرف اكرام 🔥

🌸تيما مبارك🌸

واقفة في المحال ديالها الجديد كتشوف فيه فرحانة و مقاداها فرحة و اخيرا عتهنى من كرى كتشوف فيه كان كبير و متيسع و عاطي العين من البعيد سرحات عينيها كدور من قنت القنت

عيشة:المحال غزاااال ا بنتي
اكرام:اييييه هذه شي لي كنت باغيا ا مي
نزهة:اوا راه خاصو شوية الخدمة
اكرام:من غادا نجي نقشر ليه الحيوط و نقادو و نصبغو و نسيقو يرجع كي شعل
نزهة:الصباغ ضريبه على حساب عمك هو يجيبو ليك كوني هانية

اكرام(تبسمات من تحت نيقابها ولكن عيونها تسدو و هذه الشي باين انها فرحانة):الحمد لله اللهم لك الحمد فيما اعطيت
عيشة:يالله بنتي نخرجو

خرجات و نزهة مدات ليها السوارت:بصحة ا بنتي الله يدخلو عليك بالرزق ياربي
اكرام:امين اخالتي
عيشة:اوا شنو عديري
اكرام(سدات المحال و خشات الساروت في الصاك):عنمشي معاك الفاس ا مي

عيشة:علاش انا تجيب ليك كلشي حتى لهنا
اكرام:فيها باس تمشي و نجمع حوايجي و الناس نعيط ليهم باش يجيو يديو العباياتهم راه كاين لي دافع ليا العربون يالله نصفي
عيشة: عندك الحق

نزهة:شفتي ا عيشة اش درتي اختي كون قلتيها ليهم كون فكو شحال من حاجة و تهناو
اكرام:الخير فيما ختاره الله ا خالتي مشي مشكل

دازو من خدا شرف نزهة تبسمات و هو هز براسو و زادو كي تحتو و يدويو هو كي كمي حتى جا عندو صاحبو جلس حداه خدا ليه الكارو

***:صاحبنا خرج من الحبس
شرف(كي حك عينيه):مزيان
***:شرف راه عتمشي على مو الحبس غير هكداك راه قاطع يديه من رحمة سيدي ربي
شرف(زفر بالجهد):كتعرف شي واحد كي بيع مضى مزيانة ا منير
منير:ايه كاين
شرف:مزيان ضبر ليا عليها حيت قريب عطيح  روح هنا في الحومة

ناض نفض حوايجو و زاد منير كي شوف فيه عيضيع راسو على قبل واحد مكيسواش تنهد و مشى حتى هو بحالو

وصل شرف الدار ديالهم و دخل كي شوف مو جالسة و مهمومة على حصرتها طلع بحالو البيت و تلاح يكمل نعاسو باش يولي يشد ليل من اول و جديد ولكن شكون خلاك متعاشات العشية حتى كي سمع زديح ديال الكورة و دراري كي غوتو في الحومة ناض صاخط معاجبو حال جل شرجم و غوت

شرف:و الله ينعل طواسل مكم ا ولاد *** متخليو حد ينعس في خاطرو دي عليا ديك الكورة ولا عنجي نفس مك انت و ياها تحررررككككككك

واحد من دوك البراهش ضحك و غوت: وااااااا سكاااااااايريييييي

شرف مرضات دار خارج كي جري نزل في الدروج و حل الباب بجهد مشا قاصد داك الدري نيشان عطاه جوج تمرميقات

شرف:عاود اش گلتي
البرهوش:الله يرحم باك معمري نعاود معمري نعاود والله سمح ليا
شرف(عودو بوحدة اخرى):تعاودها نخلي دار بوك سير بحالك خزيت

رماه على الارض وري ناض خايف كي بكي و دراري كلشي غبر من الحومة مع عيدور كي شوف اكرام و ختها واقفين حدا باب الدار كي شوفو هذه الفضيحة لي واقعة حرك راسو مخنزر و رجع دخل بحالو ساد الباب بالجهد