🔥 اكرام توبتي 🔥 ( الدارجة المغربية ) تيما مبارك

الاجزاء 312 313 314

✳ الجزء 312 ✳

   ♥اكــــــــــــرام تــوبــــــــــــتي♥

         🔥 شرف اكرام 🔥

🌸تيما مبارك🌸

خرجات من البيت هازة في يدها ايزار باش تغطي الگصرية كسكسو و هي تلاقا مع صامد و شرف في الباب واقفين دور راسو شاف فيها كانت نيت دايرة نيقابها تبسم ليها و هبط عينيه و هو اصلا معرفش علاش ولكن لي باين ان لباس اكرام و طبعها اخر مرة باش تلاقاو فرضات عليه يحتارمها بزز منو

في المقابل شرف لي تبسم من المنضر و عجبو نيت تقدم صامد و حط ليهم الفاكية و الالعاب لي شرى لشمس فوق الطبلة و منساش حتى اكرام خدا ليها كوزينة صغيرة و فردي و راه لشرف

صامد:معرفت واش حاملة بولد او بنت ولكن شريتهم بجوج
اكرام(شافت في شرف لي شار ليها تشدهم): شكرا بزاف عدبتي راسك
هبة:ها انت اختي دار ليك الفال لتويميين

حشماتها بنت الحرام هربات من حداها الكوزينة و خلاتهم كي ضحكو غوتات لشرف جا هز الگصرية و هبط هو و صامد و تلاو العيالات لور اكرام شادة شمس هذه المدة لي دوزاتو معاها في الدار كانت تحفضها القرأن و الحمد لله من خلالو بدات الهضرة تسگد ليها و بدأت تخرج الكلام واخا مخربق ولكن راه مزيانة منين بدأت تدوي نازلة و مكاين غير الفضائح

شمس:ماما الو اداااب
اكرام(شافت صامد لي دار عندها):علاش مالو ا ماما
شمس(هزات كتيفاتها)
شرف(خرج البرا و تسناهم حتى خرجات):دوي مع شمس ا اكرام
اكرام:مالو نخلي بنتي تكدب
(شافت في شمس):ماما هذه الشي ما نقولوش صافي منين نمشيو عند عمووو فؤاد عنلعبو صافي واخا ا ماما
شمس:واحااا
نادية:معمرها ما دوات نهار لي دوات كتبدا بالفضايح
اكرام:خليها ا خالتي صرحة راحة
نادية:عندك الحق

حلات ليهم عيشة و سلمات عليهم و دخلو خدات من عندهم الگصرية و دخلاتها الكوزينة و حطاتها و اكرام طلعات الفوق نيشان و حيدات نقابها و جلسات حدا مينا و سلمى بعد ما سلمات

اكرام:كيف غادا مع الحمالة
مينا:شوية الحمد لله و انت
اكرام:انا مزالة كنتوحم شوفي انت
مينا:غير سكتي لي ضاربني على عصير ليمون
اكرام:مزيان تيزدي فيطامينات
مينا:علاش كتوحمي
اكرام:على راجلي هذه الساعة
مينا(خيبات سيفتها):شلااااا علاش كتوحمي
اكرام:مالو كيف جاك بسلامة
مينا:اممم زين زين نمس لاخر
أكرام:راجل ختك هذاك حتارميه
مينا:خليتو ليك اختي والله

دورات وجها:سلمى مبقا ليك والو 8 ايام تكوني في دار المسيو
سلمى(حشمات):اااه
اكرام:الله يسر ليك اختي
رقية:اميييين ياااربييي كيف غادا مع الحمالة
اكرام:الحمد لله
الكبيرة:باين عليك مرتاحة الله يخليك ديما مرتاحة ابنتي
اكرام:امييين ا ميمتي

سمعو صداع في الواسطة التحت ناضت اكرام طل لقات ايناس و شمس مقاتلين على المونكة لي جاب ليها صامد شمس تغوت و تقول ليها ديالي و ايناس تقول ليها والله ما تديها ديالي هبطات نزهة هزات البنت و فؤاد ناض خرج من الصالة عندها مخنزر و شاف فيها