🔥 اكرام توبتي 🔥 ( الدارجة المغربية ) تيما مبارك

الاجزاء 201 و 202

✳ الجزء 201 ✳

   ♥اكــــــــــــرام تــوبــــــــــــتي♥

         🔥 شرف اكرام 🔥

🌸تيما مبارك🌸

الخطبة كلشي كان مجموع و العونيات كتسمع غناهم لفين و فين كانت اكرام في الكوزينة مع العائلة لي كي تسخرو حتى هما شوية هما يسمعو صوت الدقايقية جايين من راس الدرب كي غنيو و عماتو و خوالاتو كي صليو على نبي مكانوش بزاف غير القراب

رقية كانت واقفة حدا راجلها و بنتها حداها مكانش باين عليها أنها راضية على هذه الزواج ولكن خاصها تجي مع ولدها و الا معتكونش العاقبة على خير

وقفو في الباب و خرجات عيشة و نزهة و فؤاد و شرف وقفو برا و مكانوش غير هما حتى ايناس خرجات و زادو كي شطحو الوسط مع العائلة كانو الطيافر محطوطين و تور على قدو عند الباب و الورد هازة حمزة من عينيه باين انه فرحان حيت عيخطب البنت لي باغي و كبر بيها

في البيت كانت مينا كتسمع الدقايقية كي غنيو و يعاودو على مينا و حمزة و مكاين غير الله يعطيك صحيحتك حتى دخلو الداخل و طلعو الصالة فين كاين العيالات و زادو كي ضربو و الكاميرة خدامة كتوتق حتى سلاو و عطاوهم العشاء ديالهم و مشاو بحالهم و دخلو العيالات رجعات الموسيقى

جلسات رقية و غوتو على مينا غير خرجات شافتها كانت زوينة و كتفتن طايح عليها سر الخلعة قربات عندها و لسمو على بعضيتهم كيف العقربة و الافعى بالدارجة و جلسات حداها مكرهييين و شي مباين لشي ولكن حاجة وحدة رقية هازة رويشاتها و مينا كذلك اكرام هازة حتى هي شمس و دور معاها و ضحك و شمس قالت ليك كتشطح و نادية مقابلة معاهم و تبسم

فعلا كنشوفو الفرق شاسع و هنا مثال بين العدوزة الحنونة و العدوزة المشرارة الله ينجينا و ينجيكم منها فرقو الحلوة و الاتاي على الناس و من موراها طبسيل ديال الفاكية حتى كي سمعو فؤاد طلع و قال ليهم وصل وقت تركاب الخواتم مينا و حمزة خاصهم يدخلو بجوج ناضت دخلات البيت و لبسات قفطانها و اكرام لبسات عليها نقابها من الفوق خرجات مع ختها و العيالات كي صليو على النبي دخلات هي و حمزة و جابت ايناس صينية ديال الحليب و التمر و فيها دبالج الدهب و و سنسلة تقيلة حتى هي ركبو الخواتم و لبسها الدهب ديالها مع تصاور مجموعين شرف وقف من مور مراتو و دور يديه عليها و شمس كتبعدها عليه

عيشة(قربات الاكرام):فين دهبك انت مدرتي والو من غير خاتمك
شرف(دور راسو شاف فيها و حشم)
اكرام:مخبياه لدواير الزمان ا مي
عيشة:واخا ديري غير دبيليج تباني حتى انت على الحساد
اكرام:مبغيتش انت عارفة دغيا كتشد فيا العين

هزات يديها عليها و مشات شرف باس راسها و زاد ضمها ليه و نطق:كتامني بالعين
اكرام:العين علينا حق و مدكورة في القران
شرف:وعد عليا نرجعو ليك كامل
اكرام:راحتك هي الاهم

تبسم ليها و زاد هبط مع فؤاد و حمزة خلاهم مجموعين غير العيالات تما فرقو الطارطة على النساء و هبطو لرجال و دازت ديك السلة مخيرة عندهم حتى تعشاو و كلها شد دارو✳ الجزء 202 ✳

   ♥اكــــــــــــرام تــوبــــــــــــتي♥

         🔥 شرف اكرام 🔥

🌸تيما مبارك🌸

مالين الدار مكانوش تعشاو ديك الساعة حتى مشاو تجمعو في الصالة بعد ما الطيابات نقو الدنيا و سيقوها و عدلوها لي كان عيمشي راه مشا في ليل شدو طريق حيت لي جاو غير قلالين مشي بزاف غير لي عندهم لوطو بالدارجة

كانو مجموعين في الصالة كاملين حتى من نادية و هبة و شرف معاهم جماعين و كي ضحكو خالقينها اما مينا كانت في البيت حيت عيات حتى سمعاتهم و خرجات ميمكنش ضيع هذه اللمة

نزهة:ناري البنات انا بقات فيا غير رقية عتبخ الددددم
ايناس:خليها تستاهل
عيشة:المهم حظرات مع ولدها
نادية:تلقاهم غير بزز باش جابها حمزة ياك ا مينا
مينا:معرفتش ا خالتي ولكن كنضن اه
ادم(شاف في اكرام):بغيتك تراجعي معايا دروس ديال الاقتصاد و المالية و عندي امتحان في الاحصاء
اكرام(دوزات على شعرو):فوقاش عندك
ادم:نهار 27 في الشهر
اكرام:غدا العشية جيب الكتوبة ديالك و اجي عندي
ايناس:علاش متجيش اللهنا
عيشة:راها مشي ديال راسها

هبة (نغزات نادية):جاني الجوع
نادية: داك الدجاج فين درتيه
هبة:في مسارني
نادية:عنمشيو الدار و ديري ليك بيضة
اكرام(شافت في شرف):كتاكل الدوارة
شرف(هز براسو):اه
اكرام:فيك الجوع ياك
شرف:هانية
فؤاد:مكليناش بزاف
مينا:حتى واحد ما كلا انا عاد تحلات ليا الشهية
اكرام(مدات شمس لشرف و ناضت تنگر):اوا بااااز مومو صغيرو نمدو ليك لفمك
مينا:مالي نكدب عليك

حركات راسها:نوضي زيدي قدامي ايناس تحركي
مينا:غير سيري انت قاضية الغراض
اكرام(خنزرات كتجمع الطبلة):شفتك تيقتي راسك عروسة نوضي تگعدي حتى تمشي لدارك و عاد أجي ضايفة اختي ادم هبط طلع المونضة يالله
ادم:وووو
اكرام:عتنوض ولا عنجي نرگع حسك تما
عيشة:نوض ا شلاهبي اااحياني عليك حتى نكونو بوحدنا و نوريك

ناض كي تركل و هبط اما البنات طلعو السطح و دارو الدوارة تسخن و الدغميرة الدجاج حتى هي على عافية مهيييلة هبطت طبسيل الدوارة مرة مرة اكرام تقول ليهم كولو و قيصو حتى كلاو و ناضت قلات 3 الفرارج حطاتهم و جلسات و اللحم حتى هو المهم دار الكبيرة كيف قالت نادية منين سلاو ناضو مشاو بحالهم واخا شدوهم لكن شرف مابغاش جيت اصلا دار مقابلين