🔥 اكرام توبتي 🔥 ( الدارجة المغربية ) تيما مبارك

الاجزاء 187 188

✳ الجزء 187 ✳

   ♥اكــــــــــــرام تــوبــــــــــــتي♥

         🔥 شرف اكرام 🔥

🌸تيما مبارك🌸

شدات دوك الوراق هبطاتهم البيتها و عاد طلعات شمرات على دراعها و زادت اي حاجة متعلقة بلمياء بدات تجمعهم في الشبكة

كاين لي معيعجبوش تصرفها غيرة منها و انما اكرام عارفة شرف منساش مراتو و دليل نطق اسمها و عارفة انه كي دير واجبو تجاهها ولكن هي تفكيرها كتعاونو كتوقف معاه في هذه اللحظة حيت طالمة البيت مسدود راه شرف ساد على راسو معاها

هذه الشي داير كيف الحرجة في اليد الا معالجتيهاش كتنفخ و تعفن ليك و تقدر توصل بيك انك تبطر ديك اليد في خطرة و هذه الشي لي واقع لشرف اكرام هي العلاج ديالو و طالمة قبلات تكون مراتو على سنة الله و رسوله عندها الحق في كل حاجة في حياتو بافيت تعاونو باش تداوي ديك الجرحة يمكن الوراق بينو ليها مجموعة من الطرقان و بينها طريق وحدة خداتها يا ربحة يا دبحة

البيت منين خلاتو اكرام معتخرج حتى تخرج لمياء من عقلو و ترجع تستوطن فيه هي حيت لمياء هي لي ختارت تمشي و تخليك كون بقات معاه و متبعاتش داكشي لي قال ليها عقلها و صارحات شرف بكلشي مكانتش عتكون اكرام هنا نهائيا

تصرف اكرام في محلو و هذا هو الحل الوحيد ليها باش تعالج شرف يغوت يدگدگ يهرس ينطح راسو مع الحيط ولكن لي فراسها في راسها و هذه الشي لي دارت عارفاه معيدوزش بالساهل و اكرام هنا كتمتل المرأة المغربية لي بافيت تحافظ على عائلتها الصغيرة و توقف معاهم في هذه المحنة و البلية كيف سماتها اكرام حتى يحلها سيدي ربي

نادية الفوق في السطح كتسمع شي حاجة كتجر نزلات عند اكرام تخلعات و حلات عينيها على جهدهم مشات جراتها و سدات الباب مخرجاها

نادية:اويلي اش كديري
اكرام:كنجمع داكشي لي معندنا بيه غراض
نادية(كاتندب):اويلي ا بنتي اويلي راه شرف لي سادو الا جا و لقا البيت مشي كيف خان يغوت عليا و ميخليش

اكرام:اصلا سباب هذه البلا كولو هو هذه الببيت ا خالتي لا بيني و بين شرف لا بيني و بين راسو
نادية:لا ا بنتي لا شرف تبدل تبدل والله حتى  تبدل و تهدن نحمدو الله انه رجع كيف كان

اكرام:رجع كيف كان علاش كيفاش كان ا خالتي اااه كيفاش شرف مرجعش كيف كان شرف باقي كيف ما هو شرف متبدلش شرررف باقي هو هو من غادا يقدر يسكر الا تفكر مراتو و انا عارفة و متأكدة مزيان ان شرف نهار يحن المراتو و يدخل لهذه لبيت عيرجع يسكر من جديد و حتى وحدة فينا معتقدر تمنعو ا خالتي

(مسحات عينيها و نطقات):خالتي لمياء ساكنة معانا في الدار عارفة ساكنة معانا ماماتتش شرف باقي مخليها ساكنة هنا هي ماتت الله يرحمها ولكن شرف مخليها عايشة دليل تصرفاتو و حركاتو و انطباعاتو باقين هما هما
(حطات يديها على صدرها):انا مرة كيفي كيف اي وحدة و عارفة راجلي ولو شهر و نص داز على زواجنا ولكن عارفة شنو كاين في قلب داري اخالتي الا بقا هذه البيت مسدود عضيعي في ولدك و مستحيل ترجعي تلقاي شرف مزال كي دور بيك الا قدر الله تلقايه تحت تراب