🔥 اكرام توبتي 🔥 ( الدارجة المغربية ) تيما مبارك

الاجزاء 213 214

✳ الجزء 213 ✳

   ♥اكــــــــــــرام تــوبــــــــــــتي♥

         🔥 شرف اكرام 🔥

🌸تيما مبارك🌸

عند شرف مجات فين توصل العشية حتى كانو سلاو كلشي و الدار مسيقة و مجموعة على حقها و طريقها خرج من البيت لابس قندورة في البيض مطرزة بالسقلي و مشا هز شمس في يديه لي لبساتها اكرام كسيوة حد الركبة و طلقات ليها شعيرها و دارت ليها مقيبطات و دايرة سكادور ديالها في ضهرها حيت عيديها معاه يشوف القهوة يفتحها الا جا غير 10 ولا 15 الواحد هذه العشية راه مزيان

اكرام(كتقاد ليه الكول ديالو):رد ليها البال و متخليهاش بوحدها شد ليها في يديها مزيان ولا بقا هازها حسن نيت
شرف:واخا
اكرام:متشريش ليها الحلوة تمشي تقيا راها وأكلة خود ليها غير شي حاجة تلاها فيها
شرف:واخا و انت
اكرام:مالي أنا
شرف:معتمشيش لداركم
اكرام:لااا مشي دابا جايين عندهم عائلة حمزة بلا ما نزيد نتقلهم
نادية:حتى الغدا و نمشيو ا اولدي
شرف:فيها خير
اكرام(تبعاتو لباب):شرف
شرف:اش نسيتي تاني
اكرام:و متنساش فاش تكون جاي جيب معاك المناضة

دارت ليه ابتسامة عريضة هو مسايرها حتى باس راسها قدامهم مكبر بيها و خرج كي حرك راسو بلا حولة اصلا القهوة كان حلها منعم عيمشي غير يطل و شوف اش خاص و يدور معاهم هذه العشية يالله سد الباب كي شوف ادم خارج من الدار لابس ليك تيشورت بيض و السروال جنس و صبادري بيضة و كي حسب الفلوس حيت عيخرج مع دراري غير شافو مشا سلم عليه

شرف:مبروك عيدك
ادم:شكرا
شرف:مطل ما تقول نمشي نشوف ختي كيف دايرة في دار رجلها
ادم(خنزر):كون كنا كنتحتارمو انا و ختي ا راجل ختي كنت نجي عندكم
شرف(عقد غوباشتو):ياك لاباس
ادم:اكرام مقالت ليك والو
شرف:اش
ادم:سمع ا خويا انا مشي كيف اكرام ختك نهار لي جيت تراجع معايا ختي الامتحانات جرات عليا من الدار و عايراتني و عايرات ختي قدامي و كان عندي جهد و كبير على اكرام والله ما نخليها عندك في الدار
شرف:هبة
ادم: اييه هي مبغيتش نقولها لمي ولا لمينا و انت كتعرف ختي كيف دايرة و مبغيتيش نوض المشاكل بينك و بين اكرام
شرف(مسح على وجهو و تنهد):مسحها فيا ا ادم معمرها تعاود

هز ليه براسو و جبد 20 درهم مدها لشمس باسها و زاد الرأس الحومة يتلاقا مع الدراري يمشيو يدورو اما هو تعصب بالبيان و عاد عرف علاش علاقتهم تكسرات حتى وحدة ما ترضى خوها يتجرى عليه من الدار و هذه الشي غير ادم هضر اما الا عرف انها طيحات معاها بالكلام و جرحاتها راه نهارها ما يطلع فيه الشمس

زاد القهوة و هو مخنزر سلم على الدراري و الناس التانيين لي تما جالسين و بقا معاهم شمس مكاينش لي ميعطيهاش واخا غير 5 دراهم بقا معاهم شوية و وصاهم مع 10 يسدو و يمشيو بحالهم حتى العادات مع 12 عاد يحلو دوز بنتو الحديقة و جلسها على لوطو لي تما كي دورها و هي كتضحك فرحانة بزاف بقا من هذه الهادي شرا ليها گلاص و زادو رجعو الدار مع 8 العشية خدا الموناضة و رجع كضرب شمس برجليها في الباب و تغوت بماما و تضحك