🔥 اكرام توبتي 🔥 ( الدارجة المغربية ) تيما مبارك

الاجزاء 181 182

✳ الجزء 181 ✳

   ♥اكــــــــــــرام تــوبــــــــــــتي♥

         🔥 شرف اكرام 🔥

🌸تيما مبارك🌸

في الدار كانت دخلات البيت و سدات عليها هزات تيلي و صونات لحمزة لي كان يالله وقف قدام باب الدار و دخل مو و خالتو و بنتها و هما مهلوكين شاف نمرتها قطع عليها و مينا عقدات غوباشتها كيفاش قطع عليها هذا عاود حطات تيلي حداها و جلسات كتحك يديها مخنزرة

اما حمزة دخل الداخل معاهم و جلس مقابل معاهم و رقية شادة في كرشها لي هلكاتها: هلكاتني بنت الحرام دعوة بيها الله
حمزة:معرفتكم واش انتوما ولا هي
ضاوية:وا شكاين شي واحد يرضى ضرر لراسو
يوسف:الله اعلم
حمزة:انا خارج
رقية:غادي عندها تاني ياك
حمزة:والله ما رد عليك ا مي بالله

رقية:كون كنت مك كون درتي بحسابي و ديني بنت القاع و الباع و شمعة فيها دراع مديش ليا وحدة لي شرف ختها كامل زطمو عليه الناس و داها داك صاحبك و سترها

حرك راسو بلا حولة و خرج من تما ركب في لوطو و هز تيلي دوز ليها الخط و هي تجاوب:فينك ا حمزة من صباح و انا نعيط ليك
حمزة:تلاقايني في راس الدرب

قطع عليها و هي ستغربات من تعامل ديالو معاها لبسات غير جلابتها و دارت شال على راسها و نزلات كتسلت على عيشة سدات الباب بشوية و مشات حتى راس الدرب التاني لقاتو واقف شاف فيها و مشات وقفات عليه

مينا:سلام
حمزة:وعليكم السلام
مينا:كيف بقات ماماك
حمزة:نسولك و جاوبيني بصرحة
مينا:شنو
حمزة:انت لي درتي ليهم الدوا ياك
مينا(كتشوف فيه)
حمزة:متشوفيش فيا هكدا ا مينا دوي و دافعي على راسك
مينا:جاي تلومني انا دابا
حمزة(مسح على وجهو):مينا انت معارفاش اش درتي راه شنو ما وقع في هذه الدنيا كتبقا مي منبغيش شي واحد لي يضرها جاوبيني و قولي ليا لا مشي انا واخا انا عارف لي كاين
مينا(تبسمات و دورات وجها و عاد شافت فيه): اه انا غير رتاح
حمزة:علاااش درتي هكدا علاااش ياك قلت ليك انا لي عنحل كلشي ا مينا
مينا:انت عارف والو و معارفش اش سمعت من خالتك لي خلاني نجن و منفكرش واش انا تنعتني ببنت الق ***

رداتها من فمها و هو دوا؛غير حيت قالتها عليك نوضي انت عاقبيهم ب3
مينا:اه
حمزة:المرة مقهورة من ناحية بنتها لي خليتها نهار خطبتها فرحانة و ختاريتك انت في الاخير ديري لعب البراهش بحال هكذا كيفاش بغيتيني نتعايشو على هذه الشي
مينا:بلاتي بلاتي قلتي لعب البراهش ياك
حمزة:ااااه لعب البراهش

مينا(تعصبات و تفركعات عليه ديال المعقول): لا ا سيدي اصلا كلشي باين من نهار الاول قلت ليك مديرش هكدا و انت لا خاصني نربي مي خاصني نوريها انا مشي لعبة جاي تخطب مخبي من الناس بحال الا واخد وحدة نعستي معاها الا كان شي واحد لاعب لعب البراهش هو انت مشي انا ا حمزة و انت عارفني كيف دايرة نهار الاول كترد دقتي في الواحد ولو يعايرني غير بكلمة و من هذه الشي كامل ا سيدي الا كنت انا كنبان ليك برهوشة و جاي قاصدني فالله يعاون و يربحك بديك بنت خالتك هي لي تليق ليك حيت مشي برهوشة كيفي