🔥 اكرام توبتي 🔥 ( الدارجة المغربية ) تيما مبارك

الاجزاء 179 180

✳ الجزء 179 ✳

   ♥اكــــــــــــرام تــوبــــــــــــتي♥

         🔥 شرف اكرام 🔥

🌸تيما مبارك🌸

الجو كان ناشط في دار شرف و باين انه تجاوز الموضوع ولكن في دار فؤاد كان مخنزر فيهم هما كي ياكلو مهبطين راسهم التحت مقادرينش يهزوه فيهم الكبيرة كتفطر و تشوف فيهم و تبسم من تحت التحت سمعاتهم لبارح باش كانو كي ياكلوها ناض جمع الوقفة و خرج و هما عاد تنفسو

مينا:مدي مدي معاك الكوفيتير
ايناس:هاكي اري ديك الزبدة
مينا:مرحبا بيك ا ميمتي هاكي خودي
عيشة:الله يا بنتي تقولي ما كليتي العصى لبارح
نزهة(ضحكات):مباينش عليهم
مينا:راه لحمنا زراق
الكبيرة:درتو علاش
مينا:بيني و بينك ا ميمتي مبردش ليك قلبك
الكبيرة:راه كانت عتجي فيا و راجل ختك و مو
مينا(خرجات عينيها):واااايلييي
الكبيرة:اوا لطف الله
عيشة:فكرتيني في اكرام تكون كلاتها حتى هي كون كانت هنا
نزهة:لبارح سمعت شي غوت عندهم في الدار
مينا:عنداك يكون حط عليها يديه

سمعت صوني في الباب ناضت بالزربة نزلات كتشوف اكرام و شمس و نادية جاو سلمو عليهم و طلعو الفوق سلمو على الكبيرة حيدات نيقابها و جلسات كي شوفو فيها

اكرام:مالكم
مينا:ضربك
اكرام:شكون
عيشة:شرف
نادية(ضحكات):لا كلاتها هبة مشي هي
اكرام:كانت عتجي فيا انا
عيشة:كيفاش
اكرام:جراتني معاهم حتى شبطها عاد گرات ليه
نزهة:سمحو ليا مدرتو فيها ما يصلاح
اكرام:هذه علماتني ا خالتي حق الله
نادية:عودي تردي البال ا اكرام راك وليتي مرات راجل
اكرام:والله ا خالتي ما كنت عارفة
مينا(شافت في نادية):حق يتقال اكرام بغات تحيدو لينا حنا لي مبغيناش
عيشة:نادية باسم الله زيدي ا اكرام
اكرام:عنخرج انا و شرف
نادية: الكرعين طابو
اكرام:اه طابو منين رجعو نتعشاو بيهم
نادية:فيها خير
اكرام(كتشرب من اتاي):كيف دوزها عمي لبارح
ايناس(وراتها فخضها):ها انتيي اااااااء

كانت نزهة شبطاتها و خلاتهم كي ضحكو عليها اكرام ضحكات:عبر عليكم
مينا:سعداتك مضربكش
اكرام:اودي خليها على الله لبارح منضر ديالو كان كي خلع بصح منين كي تعصب كي ولي واحد اخر
نادية:عمرك ما شفتيه معصب
اكرام(تفكرات نهار المضاربة و تنهدات مخبية داكشي):لا هذه اول مرة
نادية:خاصك تولفي عليه ولدي نفسو في نيفو مكيبغي حد يقولها خايبة في عائلتو و منين عرف اش درتو معجبوش الحال صبر صبر
عيشة:عندها الحق كبري عقلك و شوفي مصلاحة راجلك الله يرضي عليك هو لي عيدوم ليك
اكرام:فين ادم
نزهة:ولا مكيتفارقش مع فؤاد في المحال شفتو صباح خارج منين سولتو قال ليا المدراسة و منها عيدوز عند فؤاد
اكرام:خليه يشرب الحرفة شوية

شافت تيلي ديالها كي صوني لقات شرف شافت فيهم:انا مشيت
نادية:غادا
اكرام(كتلبس عليها):اه ا خالتي شموستي يالله نمشيو خليتكم على خير

تحنات هزاتها و هي كتضحك نزلو التحت مداتها ليه و سدات الباب زادو بجوج حدا حدا و كي دويو و شمس حاتة على باها و تبسم✳ الجزء 180 ✳

   ♥اكــــــــــــرام تــوبــــــــــــتي♥

         🔥 شرف اكرام 🔥

🌸تيما مبارك🌸

غادا جنبو مرة مرة كي دويو حتى تفكرات و هزات راسها فيه و هو شاد شمس من يديها حتى وصلو راس الشارع باش يشدو طاكسي

اكرام: شرف
شرف:نعام ا فقيهتي

اكرام تبسمات حتى تغمضو عينيها من كلمة فقيتي اما هو شاف في عويناتها و اكثر حاجة لي ولا كي فهمها غير بيهم حيت حفظهم في جميع حالاتها او نقولو الا حالة وحدة نضرة الانكسار و الخدلان لي معمرو شافها فيهم شافهم باش كتكون معصبة باش كتكون فرحانة باش كتبتاسم باش كتكون حشمانة في كل حالاتها كي عرفها اش باغا غير من عينيها و دابا زادت نضرة لي معمرو فكر انه شي نهار تشوف فيه بيها هي نضرة الحب دور وجهو لشمس و تبسم من التحت التحت حتى كتملات كلامها

اكرام:اشنو درتي مع ديك لي جات تغوت في الحومة
شرف:وقتو ا اكرام
اكرام:بغيت نعرف
شرف:صمت
اكرام:عافاك

شرف شاف فينا شنو عيقول ليها شدها في دريبة منين شافها في الفيديو ديال البرهوش و بقا عليها بتصرفيق و الركالي حتى كانت الروح عتطلعها هو براسو مقالها الحد و مناويش يقولها راه عصى مها مزيان و هرسها گاع و فوق هذه الشي داها السبيطار كأنه مدار والو و حتى انها منين فاقت مقادات تقول والو بجوج اسباب خايفة عليه تاني سبب خافت منو يعني بجوج شادها الخوف يعني بالدارجة مجرد ما يقول ليها هلكت مها عصا مزيان عتقول ليه ستقويتي عليها و عتبدا في المحاضرات ديالها و كيفاش عيرح ليها بلي هي سباب باش وقع ليها داكشي

شرف عارف مزيان ان اكرام عتغصب عليه و عتعاتبو و تقدر هذه اللحظة ترجع بحالها الدار و متبقاش تدوي معاه و ان وعدو ليها انه يبعد على طريق الحرام موفاش بيه او نقولو انه اصلا مواعدهاش من ناحية يبعد على الحرام انما يصونها و يحميها و هذه لي مرداتش ليها البال اكرام دور وجهو و تبسم ليها ابتسامة زائفة نقدرو نقولو كي طمنها

شرف:مدرت معاها والو ا اكرام من داك الشي لي دارت في الحومة راها خافت
اكرام:صافي واخا و بالنسبة هداك لي تعرض ليا و بغا يشوهني
شرف:واش هذا وقتو خلي بعدة غير نرجعو الدار خلي خرجتنا تدوز على خير
اكرام؛صافي واخا علاش تعصبتي عليا
شرف:غير الله يحظر السلامة و صافي ها طاكسي زيدي يالله

تبسمات و زادت طلعات و جلسات في حجرها شمس و كتشوف في طريق و تبسم هو مد يديه لشيفور الطاكسي عطاه 20 درهم و رد ليه الصرف و كي شوف في الطريق شحال هذه ما خرج شحال هذه ما تسرا و شاف الدنيا كيف دايرة عاماين كان عاطيها غير القرعة و الكاس الگارو

دور راسو كي شوف شمس كتمد يديها و توري اكرام الطريق تنهد من اعماقو كي عاتب لمياء في نفسو انها مشات و خلات بنتها بين يدين وحدة أخرى لي تهزها في بلاصتها هز يديه و حطها على عنق بنتو و هي كتهربها و كتضحك