حلقة 97
🔸️مريم تحكي:
حليت الباب شوية و خرجت...من غير ما نعمل حس نزل من الكرهبة مصدوم...سكرت الباب قبل ما يوصل ليا...لفيت روحي اكثر...و قربت منو...وصل عندي مروهج يحكي
حسام:هبللت يااخي...فاش تعمل ؟
انا:توحشتك
حسام:الصبر يا ربي...هاني قتلك باش نجيك صباح نورمال تخرجلي في الليل و بالحالة هاذي...تحب تمرض أكثر ياخي ؟
انا:مانيش باش نمرض...امااان...ياخي باش تبقى تحاسب فيا ؟
حسام:باهي...هيا معايا توا
أنا:باهي
نفخ بالقاوي...مش عاجبو...نعرف روحي نزلت على غفلة...اما معادش نجم نصبر عليه...حتى هوما 3 ايام على بعضهم...لا حضنتو و لا شميت ريحتو...و نعرف كان يجي غدوة...باش يكون بابا حاضر بيناتنا...و مستحيل نجم نحكي معاه زوز كلمات على بعضهم شدني من يدي...يمشي فيا للكرهبة...حل الباب يحكي
حسام:أركب...تو نشوفو اخرتها معاك
انا:حسااام
حسام:هيااا مريم
كبست على كرشي و ركبت...لتوا الوجيعة مخفت حتى طرف...سكر الباب...و خلط عليا...ركب بجنبي يحكي
حسام:شنية هذا لي عملتو ؟
أنا:باش تحاسبني توا ؟
حسام:مريم...يااا عمري افهمني أمانك...جييت جيست باش نطمن عليك و كهو...أما مش تنزل ليا في الجو هذا و إنتي لتوا لا هزيت صحتك...و تحبني نسكت و منحاسبكش زادة
أنا:هذا كفوويا...على خاطر توحشتك...و حبيت نشوفك
تنهد بالقاوي...عدا يديه زوز على شعرو...و دور راسو غزرلي يحكي
حسام:باهي إيجا عندي تراه
قربت منو من غير ما نخمم مرتين...حطيت راسي على صدرو...و كبست عليه بيديا زوز...عدا يدو على شعري يحكي
حسام:شنية تحس في روحك ؟
أنا:أحسن
حسام:سي أحمد وينو ؟
انا:راقد
حسام:صار
انا:مممم بعد ما ياخو دواه...معادش يقوم
حسام:هههههه و انتي خرجت باش تقابلني
أنا:الحق عليا...مشى في بالي لأنت توحشتني زادة
حسام:بربي...و كيفاه متحبنيش نتوحشك يا فرخة
أنا:مش ظاهر هكا
حسام:كيفاه تحبني نثبتلك ؟
انا:مش لازم...نحب نرجع...منجمش نقعد أكثر...لتوا نحس في بدني مدقدق
حسام:على كيفك ياخي ؟
انا:شقصدك ؟
خدم الكرهبة...و كبس عالفيتاس...هزيت راسي...غزرتلو مستغربة نحكي
انا:حسام فاش تعمل ياخي ؟
حسام:مدامك توحشتني خليك معايا ليلة
أنا:أنت باز هبلت على روحك...كان يفيق بابا...شنية نقولو ؟
حسام:مش على أساس ماهوش باش يفيق قبل صباح و بزيادة راجلك راني عزيزتي
أنا:باهي سي راجلي وين باش تهزني توا ؟
حسام:لدارنا
بلعت الكلام لي كنت باش نقولو...برشا أحداث تعدات لمخي...و أكثر شي آخر ليلة عديناها مع بعضنا غديكا عاودت حطيت راسي على صدرو...من غير ما نقول حتى كلمة اخرى...معادش نحب نخمم في اللي باش يصير...مدامني باش نكون بجنبو...باش نكون مليحة...و هذا لي نحب عليه انا توا...نحب نحس بقربو ليا و كهو و رغم الدنيا برد...محسيتش بيها...حتى الوجيعة لي في بدني...معادش حسيت بيها بين يديه...مديت يدي شوية...نعدي في صوابعي على خدو...نازلة بيهم لرقبتو كبس على يدي...باسني منها...و نزلها يحكي
حسام:يزي عزيزتي
انا:شنية عملت ؟
حسام:مريم ناوية تجلطني إنتي ؟
أنا:لطف عليك عزيزي
حسام:ملا أركح...عدنا باش نوصلو...مش وقتهم الفازات متاعك هذوما
انا:باهي من غير ما تتغشش عليا توا
باسني من راسي...من غير ما يزيد كلمة أخرى...حسيت بيه مش قد بعضو...نزلت يدي...و سكرت عينيا...كمل يسوق عالساكت...محسيتش بالثنية كيفاه وصلنا...كبس على شعري يحكي
حسام:هيا عزيزتي
انا:وصلنا ؟
حسام:مممم
هزيت روحي شوية تعدلت في قعدتي...تبسم ندرا كيف و نزل حلي الباب...يحكي
حسام:تفضل
مديت يدي حطيتها في يدو و نزلت من الكرهبة...دخلنا لدار بالزربة...الطقس بارد عاللخر...لتوا مش مستوعبة لقاعد يصير...طيش كبوطو عالفوتاي...و قرب يشعل في الشوفاج...عديت عينيا عالصالة داخلة بعضها...هزيت حاجبي مستغربة نحكي
انا:حسام شنية صاير هوني ياخي ؟
حسام:شنية ؟
انا:ريت حالة صالة ياخي ؟
حسام:اه...إيه ريتها
انا:شنية لي صار ؟
حسام:إيجا اقعد ساعة
قرب مني شدني من يدي...قعدني و قعد بجنبي يحكي
حسام:محمد تعدا بفترة خايبة يومين لتالي...مستحيل كنت نجم نخليه وحدو
انا:شنية لي صار ؟
حسام:الطفلة لي كان يحبها
انا:ريم ؟
حسام:مممم
انا:شبيها ؟
حسام:قبل ما تموت كانت حبلة من صاحبو
حطيت يدي على فمي مصدومة من اللي سمعتو
سيبلي يدي و تكا لتالي...خذيت نفس نحكي
أنا:كيفاه عرف ؟
حسام:نهارت لي باش نخرجو من الكلينيك...تلقى باختها غديكا...و عرف كلشي بالصدفة
انا:معناها تأكد لهو ظلمك في الحكاية ؟
هزلي براسو ايه...من غير ما يقول كلمة أخرى...تكيت عليه...و مديت يدي حطيتها على خدو نحكي
انا:المهم هو عرف الحقيقة في الاخير
حسام:يكفي أنو عرف
هزيت راسي شوية...خطفت بوسة من شفايفو و تبسمت بالوقت نحكي
انا:باهي...منحبش نشوفك في الحالة هاذي
بعدلي خصلات شعري لتالي...و غزرلي ندرا كيف يحكي
حسام:مدامك بجنبي...مرتاح عاللخر
أنا:تعرف لأنت محسوب خاطفني توا ؟
حسام:بربي ؟
أنا:مممم
حسام:قتلك اهبطلي انا ؟
أنا:كنت جيست باش
حسام:شنية ؟
أنا:حتى شي
حسام:توا ظهرلك تحشم ؟
أنا:حساام يززي اماانك
حسام:هههههه بااهي بااهي
أنا:جعت
حسام:تواا ؟
أنا:ممم توا
حسام:عزيزتي تقريبا نص ليل راهو...منين باش نطلبلك توا
أنا:حضرلي أنت
حسام:أنا ؟
انا:شبيك تفجعت ؟
حسام:عزيزتي أسمعني...مزلت مريضة...مانيش باش نخاطر و نحضرلك حاجة تاكلها بيدي
انا:حساام أماانك
حسام:باهي...إرتاح إنتي...تو نشوف اذا فما شي نحضرو
خطف بوسة من شفايفي...و هز روحو داخل بعضو تبسمت على حالتو و تكيت لتالي..نتذكر في آخر حديث دار بيناتنا هوني...للحظة تذكرت بيت فرح...قلبي خض بالقاوي...منعرفش كيفاه هزيت روحي...و طلعت...حليت حزام كبوطي لي حسيتو كبس عليا...كل خطوة نعملها بالجهد...منعرفش كيفاه وصلت الفوق...خذيت نفس و قربت بخطوات رزينة...كبست عالبواني...و حليت الباب شوية شوية...و مع هزت راسي...دهشت و فمي تحل مش مصدقة الحالة لهي فيها...متوقعتش نلقاها مقلوبة بالطريقة هاذي...كل قطعة وين...حتى سريرها الصغرون طايح عالارض...المفروض بنتي قاعدة تكبر هوني...باش تدخل في سابع...حتى بعد الشهور هذوما لي تعداو مزلت نحلم بيها و بقربها...مزلت عايشة في نفس الحلمة متاع العادة...و مهما حاولت منجمتش ننساها...و ننسى إني هزيت بنتي...في نهار من نهارات...قربت شوية...و نزلت عالأرض رغم الوجيعة...لي في جنبي و كرشي كبست عالسرير بيديا زوز...و هزيتو من الأرض...هزيت الفرش لي طاح منو...و عدلتو...و دمعة سخونة نزلت من عيني و غرقت في وسط الفرش...منعرفش شنية لي حسيتو بالظبط...أما نفس اللحظة لي ودعت فيها بنتي تعدات بين عينيا مرة أخرى...كبست بيديا زوز على حرف السرير...و هزيت راسي نغزرلو واقف في الباب يغزرلي من غير حتى كلمة...دقايق قليلة لخصت لي كنا نعيشو فيه زوز...نزل هز اللعبة لي عند ساقيه...و قرب مني...حطها داخل السرير و جبدني من يدي...حضني بالقاوي...من غير ما يقول حتى كلمة...كبست بيديا زوز على جنابو و لزيت روحي ليه اكثر...حتى انا بحاجتو.. بحاجتو هو و كهو...غرست وجهي في صدرو وين دموعي زادت أكثر...مد يدو شوية...هزلي راسي يحكي
حسام:يزززي مريم...قتلك أكثر من مرة معادش نحب نشوفك في الحالة هاذي...نعرف أنو صعيب برشا...تنسى لي صار...أما على خاطري حاول...حاول تنسى و عاوني ننسى أنا زادة...منجمش نتعدا لي صار وحدي...حتى البيت هاذي ليا شهور محطيتش ساقي فيها...حتى ساعات نسمع صوت بنتي و هي تبكي هوني...أما منجمتش ندخل...مكانتش عندي جرأة كافية باش نعاود ندخل لهوني من اخر مرة
خذيت نفس بالجهد...نحس في روحي تعبت عاللخر كبست على جنابو نحكي
انا:ع..علاش عملت هكا في البيت ؟
حسام:منعرفش...منعرفش مريم...كنت نفركس على حاجة تخلي القهرة لي داخلي تنقص...أما بالعكس...كل مرة نغزرلك و إنتي تبكي على بنتنا قاعدة تزيد أكثر...و منظنش باش يجي نهار و تنجم تسامحني على لي صار الكل...و حتى انا منجمش نسامح روحي زادة
هزيت يدي زوز...كبست على وجهو...نزلتو عندي شوية و قربت منو أكثر...خطفت بوسة من شفايفو نحكي
أنا:أنت ما عندك حتى ذنب حسام...معادش تقول الكلام هذا مرة أخرى...يكفي لانت قاعد تتبدل على خاطري يكفي لأنت قاعد تعمل في المستحيل باش تقنع بابا...أنا يكفيني هذا الكل...مانيش باش ننسى بنتي...أما يمكن البيت هاذي تكون متاع صغير آخر...صغيرنا إحنا
هزلي براسو ايه...و تنهد...تنهيدة قوية...لخصت الوجيعة لي يحس فيها...للحظة ندمت إني جيت هوني و فتحت جرح ليه شهور...حتى انا نحس في روحي تخنقت جبدت روحي شوية...و هزيت راسي غزرتلو نحكي
انا:هيا إيجا
عدا عينيه عالبيت...و عاود غزرلي...قرب مني...حط يدو على خدي يحكي
حسام:سامحني مرة أخرى
انا:يززي حسام...كان جيت نعرف أنو باش يصير هكا مكنتش باش ندخل لهوني جملة...معادش تحس بالذنب من جيهتنا أمانك
حسام:باهي يا روحي إيجا
سبقتو بخطوة...خرجت قبلو...طفى الضو و سكر الباب ملامح وجهو باقي جامدة...كيما أول لحظة دخل فيها للبيت...حطيت يدي على صدري نرد في نفس...قرب مني يحكي
حسام:لباس ماهو ؟
هزيتلو براسي ايه...ضيق عينيه و قرب مني...يحكي
حسام:وينها الفونتولين متاعك ؟
انا:م..ماهيش عندي
قرب مني أكثر...هزني في حملتو...دخلني لبيتو...حطني عالسرير...و نحالي كبوطي يحكي
حسام:حاول تاخو نفس و ما تخمم في حتى شي..هاني معاك انا توا
هزيتلو براسي إيه...و تسطحت لتالي...قعد بجنبي يهدي فيا...حط يدو على شعري يحكي
حسام:ملا قتلي تحبنا نجيبو صغير آخر
أنا:شبيك تغزرلي هكا ؟
حسام:قاعد نخمم في كلامك عزيزتي
انا:مش توا
حسام:شنية لي مش توا ؟
انا:حسااام...يزززي أماانك
قربلي أكثر...حصرني بيديه...و غزرلي ندرا كيف يحكي
حسام:منغيضكش...تقريب عام و نص...و انا شايح عزيزتي
أنا:ش..شقصدك ؟
حسام:نقصد لانا معادش نجم نصبر اكثر من هكا
أنا:مش أنا سبب
حسام:نعرف...أما متحسش روحك عاقبتني فوق اللازم ؟
انا:م..مانيش نعاقب فيك أما
حسام:شنية ؟
انا:ن..نحب ليلتي معاك...تكون أحسن من ليلة عرسنا و كهو
كبس على جنبي...و دور يدو على ظهري...حضني بالقاوي...يحكي
حسام:نوعدك يا روحي...كلشي باش يكون أحسن من قبل...باش نخليك تنسى كلشي خايب عشتو معايا...اكا ليلة
كبست عليه بيديا زوز...قبل ليلة هذيكا كلشي كان مليح كيما توا بالظبط...كلشي وليت نخافو...اني نخسرو في اي لحظة...و لا هو يبعد عليا...و لا بابا ياقف في علاقتنا مرة اخرى..كبست على شعرو من تالي...ننفي في الأفكار لي هدت على مخي...باسني من رقبتي...و جبد روحو شوية يحكي
حسام:مش على أساس صغرونتي جاعت
انا:أنت نسيتني في اللي كنت باش نعملو
حسام:بربي ؟
انا:مممم
حسام:هههههههه متخافش يا عمري...مانيش باش نعملك شي توا...أما مبعد نعرف كيفاه نصفي حسابي معاك
انا:حسااام...تهدد فيا ياخي
حسام:باهي باهي...ابقى هوني تو نرجعلك
انا:باهي
خطف بوسة من شفايفي...و هز روحو خرج...تكيت لتالي...و تنهدت بالقاوي...مش مصدقة اني جيت معاه لهوني..حتى تليفوني خليتو في البيت...غمضت عينيا بالقاوي...نخمم شنوة مزال يصير فينا اكثر...و في زهرة...و بنتها ريحان لي لتوا مريتهاش و مهزيتهاش في حضني..مسخفتني اختي و عشيرتي...لي فرقوها على بنتها...نعرف الإحساس هذاكا بالقدا...و يمكن باش نظطر نعيش بيه حياتي الكل زادة...حليت عينيا...على شفايفو لي تحطت على خشمي...ضحكت بالوقت نحدي
أنا:هاك رجعت فيسع
حسام:شرايك ؟
نزلت راسي نغزر لصحن الغلة...شخت عالفازة...هزيت راسي غزرتلو نحكي
انا:شنية هذا عزيزي ؟
حسام:المهم أنك تشبع يا روحي
انا:بالغلة ؟
حسام:تعدي روحها...قتلك منحبش نحضرلك حاجة تمشيش تمرض أكثر جرايري
أنا:حبي لهدرجة...متنجمش تحضر حاجة خفيفة
حسام:تفرك فيهم عليا ؟
أنا:تي لا...أما عالحسبة هاذي...مستحيل نجمو نعيشو وحدنا
حسام:صااار يا فرخة...ملا إنتي توكلت عليا
هزيتلو براسي إيه...و شديت صحن من يدو...عجبتني التشكيلة لي عملها...باسني من خدي و هز روحو وقف ضيقت عينيا نحكي
انا:وين ماشي ؟
حسام:ناخو دوش و نرجعلك
انا:توا ؟
حسام:مممم علاه تحب دوش انتي زادة ؟
هزيتلو براسي لا...نحا مريولو...طيشو عالفوتاي يحكي
حسام:متأكدة ؟
هزيتلو براسي ايه...فرد وقت نعدي في عينيا على بدنو ضيق عينيه يحكي
حسام:وين ضاع صوتك ؟
أنا:اه..برا دوش على روحك
حسام:متحبش تجي معايا ؟
انا:حسااام يزززي أماانك
حسام:باااهي على راحتك
قحرتلو و نزلت راسي لصحن..جبد دبشو من القارد روب و دخل لبيت البانو...تنهدت براحة...و لا مرة توقعت إني باش نعاود ندخل لدار هاذي مرة أخرى...بعد اللي تعدا علينا الكل...يمكن الحاجة الوحيدة لي تخليني مرتاحة أنو أنا صدقت لي هو ممسهاش...و ما صار بينهم حتى شي...نعرف لي مستحيل يعمل حاجة هكا...يمكن سوء تفاهم قبل دمرنا...أما لي متأكدة منو توا...إني مع حسام لي عرفتو قبل...مش لي عشت معاه الفترة هذيكا حطيت الصحن من يدي...و غطست في الفرش...وسط ريحتو البنينة..حسيت بيه كي قرب مني...تسطح بجنبي قربت منو اكثر...دخلت في حملتو...كبس عليا بيديه زوز يحكي
حسام:شنية تحس في روحك توا ؟
انا:مرتاحة
حسام:باش ترقد من توا ؟
انا:لا نحب نبقى عندك و كهو
حسام:باهي يا روحي
باسني من راسي...و كبس عليا اكثر...غمضت عينيا من غير ما نخمم في حتى شي اخر...كلشي نحب عليه..إني نعيش كل لحظة تجمعني بيه و معاه...و كهو
أنت تقرأ
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
