شاركيني لو مشينا دروب الهنا واعذريني لو لقيتي بدروبي عنا

البارت التاسع عشر

🌻🍃🌻🍃🌻
🍃🌻🍃🌻
🌻🍃🌻
🍃🌻
🌻 19 ..

📚 😍 📃
📖 روايـــــــــــــة ✍🏼
{  شاركيني لو مشينا دروب الهنا وأعذريني لو لقيتي بدروبي عنا  }

📖🖌 @storykaligi 🌻🍃

بمجلس الرِجال - ابو ثنيان واخوه ابو يحيى
ابو يحيى بهمس : ولدك وينه ! وراه ما يجي لو سألو عنه وش نقول
ابو ثنيان بفشِلة من ولده وهو يشوف ثنيان يسولف بهدوء مع فياض وابناء عمه : ماعليك بيِجي !
ابو يحيى : وبنتي لمتى بتظل محجوزة ؟ متى بتجون يا
يوسف
ابو ثنيان وهو يمسح وجهه : تشوف الوضع مناسب يا علي ! اصبر لا مشوا نتكلم عن هالموضوع وهجام الحين يجي !
ابو ثنيان وقف وهو يخرج بعد ما أشر لـ ثنيان بالخروج
وخرج خلفه ثنيان وهو يوقف بهدوء : سم يبه ؟
ابو ثنيان بعصبية : دّق على اسود الوجه اخوك شوف وينه ينشدون عنه وانا ماعندي جواب
ثنيان بتهدأة : ماعليه يبه الحين اشوفه ، وبعدين هجام من يومه يكره طاري بيت جدي واعمامي وانت خابِر الموضوع وراه تجبره يجي !
ابو ثنيان وهو يناظر ثنيان بحدة : غصب عنه يحبهم ويجي ورجله فوق راسه وغصّب عنه يتزوج بنت عمه ماهي مجبورة تنتظر حضرة جنابه يفكر
خرج فيّاض على انفعال اخوه ونطق بهدوء : وش اللي صابك يا يوسف ! اهدأ صوتك واصل لعندهم
ابتعد ابو ثنيان عنهم بغضب من هجام ومن ضغط اخوه عليه وتنهد فياض مع تزفيره ثنيان : هجام مارح يجي وابوي عارف !
فياض : خلاص انا اتصل عليه واشوفه
ثنيان بتسرع : لا لا انا اتصل واشوفه خلاص
رفع فياض حاجبه وهو يشوف ثنيان يبتسم للرجل اللي دخل وهو يرد السلام ويبتعد من رد هجام ..

هجام ابتعد عن الخيمة وهو يشوف ثنيان يتصل : نعم؟
ثنيان بغضب : هجام تترك اللي بيدك الحين وتجي بيت جدي !
هجام بغضب : مانيب جاي ! ماني مجبور تفهم يا ثنيان ماني مجبور
ثنيان وهو يكتم غضبه : مجبور هالمرة مجبور ورجلك فوق راسك هجام وربي ان ما وصلت خلال ساعه بس ! لاذبّحك ! كفاية فضايح خلاص
هجام بصراخ : لا تسوي دور الاخ الكبير علي ! مانيب جاي ولو جيت ورب الكعبة يا ثنيان احرق البيت باللي فيه وفوقها بنت عمك الـ ** !!
صرخ ثنيان فيه من شتيمته للي من صلبّه وركض فياض بذهول من شتم ثنيان لهجام بدون احساس وسحب فياض الجوال من يد ثنيان وهو يرمقه بنظره غضب
فياض والشرار خارج من عينه : تف عليك وعلى اخوك بتذبحون اخوي بهواشكم انتم
ثنيان بغضب : هاته انا اربيه لو ماهو متربّي
فياض مسكه من ياقته : تشك بتربية ابوك  ؟
ثنيان رمقه بنظره وهو يشتت انظاره ، دفّه عنه وابتعد ياخذ انفاسه ورجع فياض الجوال لاذنه وهو ينطق بصرامة : لو ماجيت يا هجام والحين والله لأشرب من دمّك واعفنَك بالسجون وحزتها ما بهتم انك ولد اخوي !
سكرّ بوجهه وهو يرمق ثنيان بغضب وتقدّم له : ما اسمّعك تنطق بكلامك هذا مرة ثانية والا انا بنفسي اعرف كيف اخليك تفّهم
ثنيان بغضب : تدري لو ما انك عمي ؟ كان لعبت بخرايط وجهك
لكّمه فياض بحده وهو يمسك ياقته قبل يختل توازنه : انتبه لكلامك يا ولد يوسف انتبه له لا تتركني انا العب بخرايط وجهك
ابعده وهو ينفّض ثوبه ببرود : حرام العب بخرايط وجهك وتخاف امك عليك
ابتعد فياض عنه وهو مقهور من نفسه ، الاثنين شرار ولو غضبوا ينسون نفسهم ويتحاربون وكأنهم اعداء !
رُغم ذلك يحبون بعض ويحترمون انفسهم تجاه بعض
خرج ثنيان وهو يزفّر ، هو وفياض ما وصلوا لهالمرحلة من الغضب الا من عملّهم ! والاثنين عارفِين وفاهمين بعضهم وبدون اعتذار يرجعون مثل السمنة ع العسل

.
عِند هتّان ,
ما تحب الاختلاط للي معاها بالسكِن وحتى هي تجهل الجواب ! تستحي وكثير وتحس انها كثيرة عليهم وثقيلة ومكتفيّة بـ نجد وكم زميلة في الجامعة بس رغُم الاربع سنين الماضية كانت تسولف معهم بشكل سطحي مما ادى الى نفورهم ظناً انها مغرورة وما تشوفهم شي
جلست وبحضنّها صحن الاندومي ، اجواء خاصة وروقان خاص ولأول مرة تعتمد على نفسها من دون " نجد "
ولأول مرة تجلس لحالها بدون فِعل شي ! اختارت احد الافلام وجلست وهي تشوفِه وتاكل
.

رفعت نجد نظرها لامها اللي سألوها عن طِيف واللي حسب اقوال ابوها انه قال للجميع انها سافرت تدرس ماجستير ونطقت بهدوء عكس انغماسها وخجلها وصوتها اللي نادر ينسمع بالمجلس : اختي بأمريكا تدرّس
ام احمد " احد الحُضور " بمزح : بعُمرها لازم زواج ولا رح تتركِيها بحضنك يا نُورة " ام ثنيان "
الجدة بجمود : وماهي كل بنت جاها عُمر الزواج نعرسها صعبة تتحصل رِجال بهالزمان
ابتسمت نجد بخفوت من كلام جدتها ورجعت لانغماسها من بدو يتناقشون حول الموضوع
مُلاذ جلِست جنب بشرى ونطقت بهدوء : عمي فياض يبيك بالمطبخ
بُشرى عقّدت حاجبها : فيه شي ؟

🌻📚 @storykaligi 🌻📚🖋
🍃🌻
🌻🍃🌻
🍃🌻🍃🌻
🌻🍃🌻🍃🌻