سموا الله وصلوا على الحبيب ومتنسوش اخواننا من الدعاء
متنسوش الڤوت⭐ لو حابين الرواية❤
ـــــــــــــــــــــــــــــــــــــــــــــــــــــــــــــــ
ذهاب وعودة، إياب وذهاب وتردد وثبات، حياتنا تتأرجح بين تلك الفئات، لا يوجد شخص راكد ولا أحد فى ثبات! كلنا على سلالم إما نصعدها أو ننزلها درجات..
أحضرت رقية العلاج لكريم وعادت إلى المقهى تمرر عينيها حتى وجدت طاولتهم كان منزلق على مقعده فاردًا ساقيه واحدة فوق الأخرى باسترخاء عاقدًا ذراعيه ورأسه مرتاح على ظهر المقعد وفوقها منشفة بيضاء ملمومة على شكل كيس كبير مملوء بالثلج، تأملته للحظات ثم تحركت تجاهه وهي تضحك بدا وكأنه يستجم على الشاطئ ربما، رفعت الكيس عن وجهه وانحنت فوقه من الخلف تناظره بأعين تحبه، ربتت بخفة فوق الكدمة بمنديل ورقي تجففها من الرطوبة ثم فتحت أنبوبة العلاج وبدأت تدهن النتوء بلا كلمات، تأوه قليلاً فنظرت له بقليل من الاستنكار وهمست:
ده بجد؟
فابتسم وتمتم:
لأ طبعا بتدلع عليكي!
ابتسمت بنعومة وردت:
اتدلع براحتك يا كيم
أمسك كفها واعتدل يُجلِسُها أمامه ثم تكلم:
سِت قلب كيم...اقعدي.. الأكل فاضله شوية ويجهز..
نظرت للكدمة التي أخذت تتضاءل قليلاً وفركت يديها حرجًا ثم غمغمت بصوت يسمعه:
أنا آسفة اني نكدت عليك وبأڤور بردود فعلى
تبسم يرمق وجهها بتساؤل يحاول أن يتذكر ما تقصده ثم رد يلاطف كفها:
وفيها إيه لما تأڤوري؟ أوقات بلاقي نَفَسي فى الأڤورة، لما بضحك وقت النكد ولما بتحرك وأنا مكسح وتعبان ولما بعافر وأنا المفروض أكتئب وأقفل على نفسي، الأڤورة أوقات بتكون حلوة... فأڤوري زي ما أنتي عايزة... على قلبي زي العسل... يا عسلي..
ابتسمت وطأطأت وجهها بتورد خفيف على وجنتيها وهمست:
وآسفة إني ضحكت مقدرتش أمسك نفسي!
رد ضاحكًا:
إذا كان أنا نفسي ضحكت وبعدين أنا المفروض أشكر البرغوت ده أإنه خلاكي تبطلى عياط وتضحكي، قال عنيكي الحلوة دي متعيطش... أومال أنا أعمل إيه لما هو يقول كدة!
هز كتفيه بغيظ ثم نظر لوجهها الباسم وسألها:
بس أنتي أحسن دلوقتي؟ عايزة تحكيلي حاسة بأيه؟
بادلته النظرات وكأنها تسأل بعينيها سؤال لم تنطقه لكنه تسلل لخاطره بدون همسات منها، مال على ذراع مقعده وسند ذقنه على كفه ونطق الإجابة همسًا:
لو مسمعتكيش هسمع مين؟
زمت شفتيها بامتنان وأعينها منحنية تبتسم ثم نطقت تؤكد بهز سبابتها له:
بس أنا مش هحكي الكلام اللى قالتهولى فريدة ها؟
أنت تقرأ
شــــظايـــا ثــمينـــة 《النسخة العامية 》
Fantasyرقية فين يا أمي؟ رقية حصلها ايه؟ -رقية مين يا بني اللى تقصدها وتعرفها منين بس؟ --يا أمي متخبيش عليا اللى حصل! رقية حصلها إيه؟ هي فين؟ لو لسة زعلانه انا مستعد ابوس على راسها بس تسامحني. -يا بني انا والله ما بكدب، انا مش عارفة مين اللى انت تقصدها بالظ...
