အာဏာရှင်ငရဲမင်းကြီးနှင့် သူ၏အချစ်ကလေး (၁)

63. Profound Art

Please scroll down for Zawgyi

အပိုင်း ၆၃။ သိမ်မွေ့နက်နဲသော ပညာရပ်

နန်ကုန်းလီက ကံဆိုးမှုနတ်ဘုရားနောက် တစ်ပတ်နှစ်ပတ်လောက် လိုက်ပြီးတဲ့အခါမှာတော့ နောက်ဆုံး သူအရူးအလုပ်ခံလိုက်ရမှန်း သိသွားတယ်။

သူလိုက်တာကို ခံနေရတဲ့တစ်ယောက်က သူ့ကို အသင်းခန်းမထဲကနေ ဖြားယောင်းခေါ်ထုတ်ချင်နေခဲ့တာ အရှင်းကြီးပဲ။ သူမရှိတုန်း အသင်းမှာ တစ်ခုခုတော့ ဖြစ်သွားပြီဖြစ်ရမယ်။ နန်ကုန်းလီက ဒီလို ရိုးရှင်းတဲ့ လှည့်ကွက်ထဲ သူ့ကိုယ်သူ ကျဆင်းသွားခဲ့မိမှန်း မယုံနိုင် ဖြစ်နေရတယ်။

ဒါတောင်မှ ဘုရင်မင်းကြီးရဲ့ အသိအမှတ်ပြုမှုကို ရရှိထားတဲ့ နန်ကုန်းလီက ဒုက္ခပေးသူအစစ်ဟာ အမွှေဇယား ကြီးကြီးမားမား လုပ်လိမ့်မှာမဟုတ်ဘူးဆိုတဲ့ ခံစားချက် ရှိနေတယ်။

သူ့အမြင်အရ သူ့ကို အပြင်ခေါ်ထုတ်ချင်သူက ထိခိုက်လိုစိတ် မရှိဘဲ သူ့ကို ခန်းမအပြင်ဘက်ကို မျှားခေါ်ချင်ရုံသာဖြစ်တယ်။

အပြင်မှာစောင့်ပြီး ခြုံခိုတိုက်တာတွေ ပူးပေါင်းတိုက်ခိုက်တာတွေ ဘာမှမရှိဘူးဆိုကတည်းက ဒါဟာ ယာယီအစီအစဉ်ချလိုက်ရတာ ဖြစ်ပုံရတယ်။

နန်ကုန်းလီက သဲလွန်စ အနည်းငယ်အရ အနီးစပ်ဆုံး မှန်အောင် မှန်းနိုင်သွားတာကို ဖုန့်ရှီ မသိပေ။

ကံကောင်းတာက ဒါက ယာယီအစီအစဉ်ပဲဖြစ်တယ်၊ ဒါ့ကြောင့် နန်ကုန်းလီက နက်နက် တူးဆွဖော်ထုတ်လို့ မရနိုင်တော့ပေ။

ကံဆိုးမှုနတ်ဘုရားက ပုန်းတဲ့နေရာမှာ တော်တယ်၊ အဲ့လိုမှမဟုတ်ရင် နှစ်ပေါင်းတစ်သောင်းလောက် ကြာအောင် သူ ကြီးထွားလာနိုင်ခဲ့မှာမဟုတ်ဘူးလေ။ အဲ့တာကြောင့် သူ ခဏလောက် နန်ကုန်းလီနဲ့ ကြောင်နဲ့ကြွက် ကစားပွဲ ကစားပြီးတဲ့အခါမှာ ဖုန့်ရှီထံ ချက်ချင်း ပြန်သွားလိုက်တယ်။ တချိန်တည်းမှာပဲ စာအုပ်နတ်ဘုရားကလည်း သူလုပ်ရမယ့်အလုပ် ပြီးမြောက်သွားတဲ့အတွက် ပြန်လာတယ်။

သူတို့သုံးယောက် အချိန်အနည်းငယ်ကြာ ခေါင်းချင်းဆိုင် ဆွေးနွေးပြီးတဲ့အခါမှာတော့ ဆီလျော်တဲ့ ဖြေရှင်းချက်တစ်ခု ချမှတ်သဘောတူလိုက်ကြတယ်။ အဲ့နောက် သူတို့က အားလုံးကို လျို့ဝှက်စွာ လုပ်ကိုင်ပြီးပြီဆိုတဲ့ ယူဆချက်နဲ့ ကောင်းကင်ထွတ်ထိပ်နန်းတော်ဆီ ပြန်ပြေးသွားကြတယ်။