အာဏာရှင်ငရဲမင်းကြီးနှင့် သူ၏အချစ်ကလေး (၁)

97. Assumptions and the Answer

အပိုင်း ၉၇။ မှန်းဆချက်နဲ့ အဖြေ

သူ့ရဲ့ ကြီးမားတဲ့ ထီးထီးကြီးတည်ရှိမှုနဲ့အတူ တိတ်ဆိတ်နန်းတော်ခန်းမဟာ အဝေးက ကြည့်လိုက်ရင်တောင် အလွန်ကို အဟန့်အထည် ရှိပုံပေါ်နေသည်။

နန်းတော်ထဲ လျောက်လှမ်းဝင်ရောက်သွားတဲ့အချိန်မှာတော့ သူဟာ သေးငယ်တဲ့ သက်ရှိတစ်ယောက်သာဖြစ်တယ်လို့ Carendra ဝိုးတဝါး ခံစားလိုက်ရသည်။ နန်းတော်တစ်ခုလုံး ဩဇာအရှိန်အဝါတို့ လွှမ်းခြုံနေကာ သူ့ခြေထောက်တွေ အခြေမခိုင် ဖြစ်သွားရ၏။ အကျိုးဆက်အနေနဲ့ သူခြေလှမ်ဆယ်လှမ်းလောက် လှမ်းဖို့ကိုတောင်မှ တော်တော် ရုန်းကန်လိုက်ရတော့သည်။

"ဒါဆို၊ မင်းက Carendra ပေါ့။"

ကြည်လင်အေးစက်တဲ့အသံတစ်သံက ရုတ်တရက် ထွက်ပေါ်လာပြီး Carendra ရဲ့ နားထဲ လှိုင်းသေးလေးတွေ မွှေနေသည့်အလား ဝင်ရောက်သွားပြီးနောက် နန်းတော်တစ်ခုလုံး ပြန်ပြီး တိတ်ဆိတ်သွားပြန်တော့သည်။

Carendra လန့်သွားရကာ ခေါင်း ချက်ချင်းပဲ မော့လိုက်၏။ သူ့အရှေ့မှာ ရှိနေတာက အဖြူရောင်ပုံရိပ်တစ်ခု၊ အဝတ်ဖြူဝတ်ထားတဲ့လူတစ်ဦးက အခု ခပ်မတ်မတ်ထိုင်နေကာ ဘာကိုမှ လုပ်မနေပေမဲ့ အဲ့သူမှာရှိနေတဲ့ မွေးရာပါ အဟိတ်အဟန့်ရှိတဲ့ဟန်ကို ခံစားသိရှိနိုင်နေသည်။ နောက်တစက္ကန့်အကြာမှာတော့ ဘုရင်ကြီးက Carendra ကို သူ့ရဲ့ သိမ်မွေ့ပြီး လျို့ဝှက်ဆန်းကျယ်တဲ့ အရှိန်အဝါတို့နဲ့ ချက်ချင်း ဦးညွှတ်သွားစေတော့၏။

အဲ့သူရဲ့နဖူးပေါ်က ကျောက်မျက်က တစ်လက်လက်တောက်ပနေသည်။ သူ့ရဲ့နက်မှောင်တဲ့မျက်လုံးအစုံက တည်ငြိမ်မှုနဲ့ပြည့်နေကာ သူ့ရဲ့ ခန့်ညားလှပတဲ့မျက်နှာကလည်း လောကကြီးထဲက တစ်ဦးတည်းသော မသေမျိုး နတ်ဘုရားအရှင်အလား မြင့်မြတ်ပြီး အလေးအမြတ်ထားလောက်ဖွယ်ဟန် ပေါ်နေသည်။ သူ့ရဲ့ မျက်နှာပေါ်က အမူအယာက အားလုံးကို ဥပက္ခောရှုထားပုံ ရှိနေသော်လည်း တကိုယ်လုံးသွင်ပြင်ကတော့ ဆွဲဆောင်ညှို့ငင်နေသည်ပင်။ အဲ့မှာ လောကကြီးကနေ ကင်းကွာကာ တစ်ကိုယ်တည်း ထိုင်နေသူကတော့ တခြားသူမဟုတ်ဘဲ Carendra တစ်သက်လုံး လေးစားခဲ့ရတဲ့ ငရဲမင်းကြီးဖြစ်သည်။