ကမ္ဘာ့ပျက်ကပ်ကြားက ဆေးခန်းလေး [MM Translation] Completed

အခန်း(၁၄၂)

အခန်း (၁၄၂)

" ဝုန်း...ဝုန်း...ဝုန်း..."

ဗုံးကြဲလေယာဉ်က တစ်ခေါက် ဗုံးကြဲသွားပြီးနောက် နောက်ထပ်တစ်ခါ ပြန်ကွေ့လာကာ ခဲယမ်းများ ကုန်သည်အထိ ထပ်မံ ဗုံးကြဲတော့သည်။

စခန်းက မီးလောင်တိုက်သွင်းခံရသလို ဖြစ်သွားသည့်အတွက် သက်ရှိတစ်ယောက်မှ မကျန်ရှိတော့ပေ။

လေထဲတွင် ဗုံးကြဲလေယာဉ်များ ရည်ရွယ်ချက်မရှိ ဝဲပျံနေသည့်အချိန် လေယာဉ်ပျံများက ရုတ်တရက် တိုက်ခိုက်လိုက်သောကြောင့် ဗုံးကြဲလေယာဉ်များ တစ်စင်းပြီး တစ်စင်း ပျက်စီးသွားစေသည်။ ထို့နောက် ကျန်ရှိနေသော လေယာဉ်များက အချင်းချင်း ပြန်ပစ်ကာ လေထဲတွင် တိုက်မိသွားကြပြီး ကောင်းကင်တွင် ကြီးမားသော ပေါက်ကွဲမှုကြီးတစ်ခု ဖြစ်ပေါ်သွားသည်။

အလယ်ပိုင်းဧရာမမြို့တော်က ကမောက်ကမ ဖြစ်ကာ ရှုပ်ထွေးနေသည်။ ကားရှိပါက ကားထဲသို့ အလျင်အမြန် မောင်းကာ သွားရမည်။ ကားမရှိပါက ကားရှာပြီး ကားကို လုယူနိုင်သည်။ အရမ်းနောက်ကျသွားပါက ထွက်ပြေးဖို့ပင် အခွင့်အရေး ရတော့မည် မဟုတ်ပေ။

အလယ်ပိုင်းဧရာမမြို့တော်တွင် အသက်ရှင်ကျန်ရစ်သူ အများအပြားရှိသည်ကို ဗိုလ်ချုပ်တို့အားလုံး သိသည်။ ထို့ကြောင့် သူတို့ အကုန်လုံးကို အချိန်တိုအတွင်း ပြောင်းရွှေ့ဖို့ဆိုတာ မဖြစ်နိုင်ပေ။ ထွက်သွားဖို့ မစောင့်နိုင်တော့သည့် အသက်ရှင်ကျန်ရစ်သူများအပြင် အလယ်ပိုင်းဧရာမမြို့တော်တွင် ပုန်းခိုနိုင်သည့် ကံကောင်းသူတချို့လည်း ရှိသည်။ သူတို့က အမှောင်ထဲတွင် ပုန်းအောင်းပြီး အလယ်ပိုင်းဧရာမမြို့တော်မှ ထွက်မသွားချင်ကြပေ။ အပြင်ထွက်သွားလျှင် သေမည်ဟု တွေးထားသည့်အတွက် ထွက်မသွားဖို့ တင်းခံနေကြသည်။

နောက်ဆုတ်ဖို့ အသင့်ပြင်ပြီးသားသူများက သူတို့ကို စောင့်ဖို့ အချိန်မရှိသလို ဖျောင်းဖျဖို့လည်း အချိန်မရှိပေ။ ထွက်သွားဖို့၊ မသွားဖို့နှင့် သေမလား၊ နေမလားဆိုတာက သူတို့၏ ရွေးချယ်ပိုင်ခွင့် ဖြစ်သည်။ စစ်တပ်နှင့်အတူ နောက်ဆုတ်သွားလျှင်ပင် သူတို့ အသက်ရှင်လျက် ထွက်သွားဖို့ မဖြစ်နိုင်ပေ။ ဧရာမမြို့ကြီးတစ်ခု တည်ဆောက်ဖို့က ပိုပြီး အန္တရာယ်များသည်။