☠ السفاح العاشق ☠
🔥 بارت 39 🔥
جولان : على هاد لفضيحة الي درتي ليا ... غنعرفك على الزمر
وئام : تفووو مسمومة ... خفتيه يتعرف عليا و يقلب عليك
جولان : جمعي راسك ... لا نشطب بيك الدريبة بداك السالف الي فرحانة بيه
وئام : و غا ضحكنا معاك ... مال مك ... آش هاد الحساسية لأوڤر
جولان : ضحكي معيا فكلشي الا زهير
وئام : هاي هاي ... باغة ديري تاعت الي لقا حبابو يقلب على صحابو ... ياك الصفريطة !
جولان : " لاحت عليها دراعها " باغة نرجع ليك الضكك الي ضحكتي عليا قبيلة ... أما نتي راك الحب و الكبدة و الگانصة ... نتي هي كلشي
وئام : " غاديين معانقين " عارفاك كتبتيني ... وا عاودي ليا بعدا شنو دوتو ... فين مشيتو ؟
جولان : تلاقينا فكافي حدا لافاك ... بحال الى حس مكنعرفش لقناتي ههه ... كن دار معيا بلاصة أخرى كنت غنتشوه
وئام : و أنا شنو كندير الى منفعتك ... أوى شنو درتو فاش هضرتو ؟
جولان : " بابتسامة " اعتارف ليا بلي كنعجبو
وئام : عليها غا كتفرنسي " سكتات " باااسك ؟
جولان : " وقفات " لواه زمرني ... و شتي لبسالات
وئام : هههه باغة نتأكد ... راه كاين إلي خفيف ... يدير ليك خفا زربا
جولان : شكون أنا ؟
وئام : الصفريطة ... زعما بغيت نقول جولان
جولان : و تربية من ؟
وئام : لا حفيضة
جولان : إوا الله يرضي عليك متنسيهاش
وئام : و لكن أجولان ... الحب بعد المرات كيخلينا
جولان : " قاطعاتها " ممتافقاش معاك
.......... : جولاااان
جولان : " تلفتات " جدة
وئام : " بصوت منخفض " نتي منين جداك ... بغيت غا نعرف علاش كتقولي ليها جدة و هي مكتجيكش
جولان : و نتي شغلك ... سيري لداركم
وئام : سري انا الي واقفة معاااك ... حتا ترجعي ترغبي فيا مرة أخرى
جولان : " غادة " نتي راك الحوووووب
مشات جولان كتجري عند الشخص الي عيط عليها ... كانت إمرأة عجوز لابسة جلابة و دايرة لفولار ... وصلات عندها جولان و سلمات عليها ...
الجدة : كيدايرة ماماك ابنتي ؟
جولان : بخير الحمد لله ... نتي آش خبارك ... و كيداير جدي لباس عليه
الجدة : راه فالقهوة مع صحابو ... مجموعين فيها غا صحاب التقاعد و الي معندو شغل ههه
جولان : حتا بابا كيظل فيها هههه
الجدة : مالك غبرتي ... شحال هادا مجيتي تچلسي معنا
جولان : غير مع لقراية و الله ... كنظل فلافاك و كنجي مسخسخة ... الصراحة توحشت الجلسة معاك نتي و الحاج
الجدة : هي لا جيتي نيت دابة ... تعشاي معنا و نقصرو شوية
جولان : واخة ... نمشي نقولها لماما و نرجع
🍂🍂🍂🍂؛
واقفة فالكوزينة جنب الخدامة و كتقول ليها شنو دير ... مسندة على لعكاز ديالها و رادة لبال لكل تفصيل ... شافت الخدامة كتمسح جنب الصحن بصباعها و هي تهز العكاز و نغزاتها بيه ...
الخدامة : آااي " شافت فيها " شنو درت ثاني ... الالة حبيبة
حبيبة : هزي لپاپيي مسحي بيه ... و نتي كتمسحي ليا بمكافشك المعفونة ... عرفتي ولدي يشوف آثار صباعك فالطبسيل ... غتلقاي راسك فالزنقة ... لمعگازة لاخرى
الخدامة : سمحي ليا مباقيش نعاود ... هانا غنمسح بلپاپي كوني غير على خاطرك ... كن سعفتيني سيري چلسي ارتاحي ... أنا غنكمل هادشي
حبيبة : احياني أنا الي عارفاك ... غا نتفاوت تبداي تخرمزي ليا ... راه خايفة عليك ... عارفة إلى رئبال يلقا حاجة قد هاكة ماشي هي هاديك ... غيجري عليك و انا كتبقاي فيا غا يتيمة ... و لكن تقول واش تحشمي على عراضك ... العگز دار فيك مابغا ... فأياماتي كنت نطيب و نخمل الڤيلا كلها فنهار واحد
الخدامة : عارفة ألالة عارفة ... قلتيها ليا ما مرة ما جوج ... واش ولى فيك الزهايمر !!
....... : جدة
تلفتو بجوج عند الصوت ... بان ليهم رئبال واقف عند باب الكوزينة ...
🍁 يتبع 🍁
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
