☠ السفاح العاشق ☠
🔥 بارت 22 🔥
جولان : 💬 عرفتي شكون جالس حدايا ... زهير ابنت الهم ... جالس فالكرسي الي جنبي ... ياك هو عندو لماستر شنو كيدير عندنا هنا ... ناري كنشم ريحتو الصگعة ... غزالة بحالوووو
وئام كانت فالكوزينة كتغسل لماعن ... سمعات الفون مسحات يديها و هزاتو قرات لميساج كضحك عليها ... و جاوباتها ...
وئام : 💬 زهير حبيبك جالس حدااك ههه ... و بالي اصاحبتي آش كتسناي ... هادي فرصة لا تعوض ... هانتي هاه ... مد يدك حركيه حتا يشوف فيك ... و قولي ليه ... سمح ليا عندي اعتراف ليك ... خويا زهير انا كنبغيك و نموت عليك ... 3 سنين هادي و انا مشروطة فيك ... وقتما شفتك كنسها فجمالك الرباني ... لعار لما تصاحب معيا هههه
جولان وصلها لميساج قراتو و هي طلع ليها القنديشة جوباتها فالحين ...
جولان : 💬 باغة ندعي فيك و نغرق ليك و لكن حتا تكوني حدايا ... دابة خفت تخرج شي حاجة من فمي و نتشوه مع الدري ... كتفلاي عليا لمك ... حتا باقي نعاود ليك شي حاجة ... أتفووو عليك
دارت جولان لفون سيلونص و خشاتو فجيبها ... تلفتات بشوية بلاما تعيق و هي تلقاه طار ... دارت كلها بان ليها زهير واقف مع لبروف كيهضر معاه ... شوية سلم عليه و خرج ... بقات متبعة ليه لعين حتا غبر ... رجعات كتشوف قدامها و عقلها معاه ... غير بدا الدرس ساست كلشي و رجعات مركزة ...
🍂🍂🍂🍂🍂؛
في مكتب ضخم لأحد أكبر الشركات فمجال الترفيه ... مكتب شاسع عملي غالبين عليه الألوان الغامقة ... الجو فيه بارد نوعا ما ... تحل لباب و دخل رجل فأواخر الثلاثينيات ... هاز معاه ملف فيدو ... شاف الكرسي خاوي و دور عنيه ... حتا كيبان ليه جالس فالصوفة و هاز طابليت فيدو ... قرب بشوية و هضر بحدر ...
الماندجر : موسيو العثماني ... جبت ليك داكشي الي وصتيني عليه
هز راسو شاف فالماندجر و رجع كيشوف فالطابليت ...
........ : حطو فوق المكتب
الماندجر : اوكي موسيو
مشا حط الملف و ضار خارج بكل هدوء ... كيف حل لباب و هو يتصادف مع سنمار ...
سنمار : بهاء تكلم ليهم ... بغاوك فالاستوديو ... خليت القربالة نايضة تماك
بهاء : " دوز يدو على وجهو " إلياس عوتاني
سنمار : " كيضحك " باش عرفتي هو ههه
بهاء : شكون من غيرو ... هاد المرة غنوصلها للمدير
سنمار : واش اسحاب ليك هادشي مكيوصلش ليه ... راه حتا هو ميك عليه ... حتا نهار يطلع ليه الدم و يجري علينا كاملين ههه
بهاء : نمشي نشوفو قبل ما يصدق مهرس لينا لمتريال عوتاني
مشا بهاء كيزرب فخطاويه ... دفع سنمار لباب و دخل للمكتب ... اتاجه لعندو و وقف مربع يديه ...
سنمار : رئبال ... زعما موسيو العثماني ههه
رئبال : " حط طابليت و وقف تقابل معاه " خاصاك شي حاجة ؟
سنمار : جيت غانشوفك ... توحشتك الصراحة ... يومين هادي و نتا غابر علينا
رئبال : شنو واقع مع إلياس ؟
سنمار : " حط يدو على كتفو " مرة مرة كتجيه ديك الي مكتعلمش ... خليتو منوضها مع المصور ... كن بقيت حداهم غنجمعهم بجوج ... شنو بان ليك نمشيو نتغداو
رئبال : عيط ليه يمشي معنا
سنمار : زعما بغينا الهدوء " جبد لفون " ماعرفتش كيفاش حتا صابر ليه على هبالو ... كن زيرتي معاه من الأول ... غيدير عقلو و يتبث
رئبال : " قرب عندو كيشوف فعنيه بنضرة غامضة " نهار يدير علاش نيت... غنجري عليه فمرة ... دابة مخليه على خاطرو حينت كيلعب ... و لكن غير يقودها يلقا راسو على برا
سنمار : كتهدد بواحد لبرود كيخلع ههه ... شتي تهضر معاه مرة وحدة يتجامع
ضار رئبال عطاه بالظهر و اتاجه للمكتب ... هز الڤيست من فوق الكرسي و لبسها على التيشورت لكحل الي لابس ... البدلة كلها فاللون الأسود حتا الحذاء الي كيلمع ... خرج و سنمار تابعو هاز الفون كيهضر مع إلياس يخلط عليهم ... هبطو فالمصعد و خرجو من الشركة ...
توجهو لسياراتهم عاد غيركبو و هو يخرج إلياس ... شير ليه سنمار و طلع فسيارتو ... تحركات سيارة رئبال من وراها اللوطو ديال سنمار عاد إلياس تابعهم من اللور ...
🍁 يتبع 🍁
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
