☠ السفاح العاشق ☠
🔥 بارت 77 🔥
بدات كتجمع أغراضها طلعاتهم للطابق الأخير ... دخلات للمكتب لقاتو خواوه ... حطات داكشي ديالها و جلسات كتخمم حتا جا بهاء ... و بدا كيشرح ليها شنو خاصها دير ...
مر أسبوع و هي مرافقة بهاء فكل خطوة ... عرفات طبيعة خدمتو الي مكانتش ساهلة نهائيا ... كانت تشوف رئبال مرة مرة لكن أغلب الوقت كانت فالمكتب ... واخة بهاء كان يوريها شنو دير الا و حسات بتعاملو العدائي معها ... خاصة فاش كتكون غير هي وياه ... حاولات تفهم تصرفو اتجاهها ... فهي كتبقا الشخص الي خدا ليه مكانو بعد هاد السنوات كلها ...
اليوم فاقت بكري كيف العادة ... رجعات كتمشي للشركة يوميا و كظل فيها ماشي بحال قبل ... و شرحات لولديها بلي خدات منصب آخر و غيتزادها فالصالير ... كان خبر مفرح ليهم ... أنها غتكون موضفة رسمية فالشركة ... لأن الكتابة فيها تخبطات ... ماشي ديما غتقدر تنشر و تضمن نجاح كتبها ...
بعدما فطرات طلعات جولان لغرفتها ... لبسات عليها سروال أسود مع تريكو فلبلو و جاكيط دنيم ... سرحات شعرها بلبلاك و دارت مايكاپ خفيف ... هزات لي لونتي قداتهم ... واخة مولفاتش تلبسهم مي ماعندهاش خيار ... مها سولاتها عليهم قالت ليها تهرسو ليها ... بقات واقفة كتفكر شنو تلبس فرجليها ... حتا كانت غتهز السبرديلة ولات هزات الصباط ...
هاد الأيام رجعات تلبسو بعض المرات ... واخة مكترتاحش فالكعب العالي ... لكن مسألة هاد التغيير و لخدمة الجديدة فرضات عليها تلبس بحال هاكة ... و اليوم غتبدا الخدمة مع رئبال بوحدها ... غير كتفكرها لحمها كيكوش عليها ... بسبب شخصيتو الغامضة معارفة كيف تصرف قدامو ... ساست راسها من هاد الأفكار السلبية هزات صاكها و خرجات ...
بان ليها الحاج خارج من الدار ... مشات عندو سلمات عليه ...
جولان : صباح لخير جدي
الحاج : صباح النور بنتي جولان ... كيف دايرة مع شي خدمة ؟
جولان : هاحنا ... توحشت أيام لقراية الصراحة ... واخة كنت كنتشكا ههه ... نخليك خاص نمشي ... حتا نرجع و نجي نچلس معاكم شوية
الحاج : واخة ابنتي ... الله يسهل عليك و ردي بالك
جولان : " و هي غادة " أوكي بااااي
وصلات للشركة و طلعات لمكتبها الجديد ... دخلات حطات صاكها و چلسات ... بدات كضور عنيها فالمكتب حتا قفزها صوت لفيكس ... هزاتو جاوبات ...
رئبال : جيبي ليا الملفات ديال اجتماع لبارح
جولان : " سمعات صوتو و وقفات " أا ... آه واخة
قطع و هي تنوض كتقلب على لملفات ... ماخلات فين قلبات ملقاتهمش ... و ماقدراتش تتاصل ببهاء تسولو من اليوم الأول ... أكيد غيسمعها خل وذنيها ... تفكرات ماقلباتش فالمجورة ... حلات الفوقاني و هي تلقاهم ... تنفسات براحة و خرجات مسرعة ... يالاه غدق فالباب و هي تلاقى بإلياس ...
إلياس : " بإبتسامة " صباح النور
جولان : صباح النور
إلياس : صباح زين هادا ... غبرتي من الشركة حتا توحشناك
جولان : سمحليا
دازت من حداه حلات لباب و دخلات ... بان ليها رئبال جالس فالكرسي و ضاير جهة النافذة ... قربات حطات الملفات ...
جولان : هاهو داكشي الي طلبتي مني
ضار رئبال شاف فيها و شاف فإلياس الي متكي عند لباب ... مربع يديه و متبع ليها العين ...
رئبال : ممكن تمشي
ضارت خارجة كيف قربات عند إلياس و هو يغمزها ... خنزرات فيه و حدرات راسها ... سد لباب كيضحك و جلس مقابل مع رئبال ...
إلياس : صدرتي بهاء و خدمتي بلاصتو هاد لمشيشة ... صدقتي مامختالف علينا فوالو هههه
رئبال : سمعتي شنو قلت ديك المرة ياك
إلياس : مالك مفسد اللحظات ... خلينا نجربو شي حاجة مختالفة هاد المرة
رئبال : " حل الملف كيقرا فيه "
إلياس : شحال ممل ... نوض نشوف فين نتلها " ناض خارج " بحال والو نعرضها على الغدا ... عجباتني الصراحة
جا إلياس يضور لقا رئبال من وراه ... يالاه بغا يهضر و هو يجمعو رئبال بنص جا مشبح فلرض ... تحدر عندو رئبال و هضر بنبرة تحذيرية ...
رئبال : بغيتي فاش تلهى غنديرو ليك نيت ... قلب عليها أحسن ليك ... ضحكك بسال
إلياس : فهتك غا رولاااكس ... أنا غا ضاحك أصلا باينة فيها بنت دارهم ... و حنا هاد النوع مكنطرفوش بيه
رئبال : " وقف " هانتا فهمتي ... و نوض خليني نخدم
ألياس : " وقف شاد فظهرو " و كن تهرست من شي قنت ... نتا و شركتك الي غتخسرو ... ضحكنا معاك ندمتينا ... نخرج حسن ليا انا الي جاي عندك
خرج إلياس غادي فالكولوار ... تفكر كيف حذرو رئبال من أنو يقرب ليها و ابتاسم ... دخل للمصعد كيصفر و اتاجه للأستوديو ...
مر اليوم طويل على جولان ... واخة مبقاش رئبال عيط عليها ... لكن الخدمة كانت كثيرة و عاد مزال كتأقلم ... كيف وصل وقت المغادرة ... هزات صاكها و خرجات ... وصلات لمكتبو دقات و دخلات ...
جولان : موسيو العثماني محتاجني فشي حاجة ؟
رئبال : " وقف كيلبس فالڤيست " لا ممكن تمشي
سدات جولان لباب و مشات كتزرب للمصعد ... عرفاتو خارج و مابغاتش تهبط هي وياه ... وركات على الزر تحل و دخلات كتضغط عليه باش يتسد دغيا ... يالاه لباب كيتسد و هو يحبس ... غير شافتو داخل و داير فيها شي شوفات حدرات راسها ... بان ليها حذاءو عند رجليها ... هزات راسها لقاتو واقف على مقربة منها ...
🍁 يتبع 🍁
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
