🔱 السفاح العاشق 🔱
💥 الفصل الثاني : بارت 179 💥
رئبال : نسيت ما سولتك
جولان : على آش ؟
رئبال : الصداق ... فكراتني الحاجة فاش رجعت ... شنو باغة فالصداق ؟
جولان : م ماعرفتش
رئبال : لا بغيتي شي حاجة قوليها ... أنا ماعنديش معرفة بهادشي
جولان : حتى أنا ماعرفتش
رئبال : شنو الحاجة الي باغية و تمنيتي تحصلي عليها
جولان : " بدون تفكير " ثاندر " حطات يدها على فمها مصدومة من شنو قالت "
رئبال : بغيتي ثاندر ؟
جولان : لا لا ماقصدتش هادشي ... غير جا فبالي
رئبال : يعني مابغتيهش
جولان : هااا ... !!!
رئبال : ثاندر رجع ملكك " سكت شوية و كمل " و مولاه مابغيتيهش !
جولان : آا ... ب بونوي
لاحت الفون جنبها و حطات يديها على حناكها كتقيس فيهم ... جرات الغطا على راسها و كضرب برجليها فرحانة لأقصى درجة ... ركلات لبيسي برجلها حتى طاح من فوق الناموسية ... سمعاتو حيدات عليها الغطا ... و ناضت هزاتو حطاتو فوق المكتب ... حلات النافدة و تكات بيديها على لحاشية ... كتعض فشفتها حتى كتعيا و طلق ابتسامتها ...
يامن واقف مع الدراري فالجهة لاخرى ... هز عنيه و هي تبان ليه ... شاف كيف فرحانة زاد ضرو قلبو ... بقا حاضيها حتى سدات النافدة و دخلات ...
🍂 شافت الكل ملهي شي كيشطح شي مجمع ... هزات لفون ديالها من فوق الطبلة و خرجات ... بانت ليها سيارتو قدام القاعة ... قربات و طلعات ...
زينب : شكون سلطك عليا ... ماخلتيني حتى ندوز العرس فراحتي
إلياس : " كيطلعها و يهبطها " جا معاك البلدي
زينب : و طلقني ... لاش جاي ؟
إلياس : بغيت نشوفك
زينب : صافي هادشي لاش جاي ... و هانتا شفتيني ... ممكن نرجع فين كنت
إلياس : " جرها " آجي فين غادية ... واش عدوك أنا ... فينما ندير محاولة نقرب منك نتي كتبعدي
زينب : نهار تكون جدي ا إلياس و متبقاش الي شفتيها تكركر ليها و تبوس هادي و هادي ... ديك الساع نشوفو
إلياس : شكون هادي الي بست !!
زينب : راه كنشوفك مع لبنات فالشركة و دوك العارضات
إلياس : عادي موالف كنسلم عليهم بالوجه ... " ابتاسم " غرتي
زينب : ماشي غرت ... و لكن احتراما ليا خاص تبدل فتعاملك مع لاخرين ... واش تبغي تشوفني كنتسالم بالوجه مع الموضفين و نضحك مع هذا و هذا
إلياس : " هز حاجبو " هي بغيتي نخيابو
زينب : اوى حتى انا منبغيش ... عارف لحد الساعة مزال ماقلت لجولان الي هي اقرب وحدة ليا على علاقتنا ... حينت انا مزال مامتأكداش واش واخد هادشي بجدية و لا مرحلة و غدوز ... و لا كنت باردة و واخدة حذري حينت مبغاش نتآذى فالأخير
إلياس : لدابة باقي شاكة فنوايا اتجاهك ... شنو ندير باش تأكدي " شد فيدها " أنا كنتسنى غير رئبال و جولان يتزوجو و ديك الساع غنجي لداركم
زينب : أنا ماقلتش هادشي باش نضغط عليك
إلياس : عارف ... " حط يدو على خدها " و انا مستاعد نغير من عاداتي باش نكون معاك ... نهار عرفتك لقيت معنى أخر للحياة ... من غير اللعب و تضياع الوقت ... كنت كناخد كلشي ضحك ... عشت طفولة خايبة و نهار لقيت الفلوس بين يديا ... درت كلشي باش نسى و لقيت راسي كنضيع من جهة أخرى ... وقتما هضر معيا رئبال و لا سنمار كنتجاهل كلامهم ... و حينت عارف ديما غنلقاهم فجنبي ماهتميتش ... لكن دابة بغيت نتغير ... باغي نعيش حياة عادية ... خاصة فاش لقيت البنت الي باغي نرتابط بيها و ندير عائلة الي مالقيتش و انا صغير
زينب بقات غير كتشوف فيه ... عمرو هضر بهاد الجدية و لمسات فكلامو حزن ... قربات عندو و عنقاتو ... دور يديه على خصرها و زير عليها ... بقاو مدة معانقين عاد بعدات ... شافت فيه و ابتاسمات ...
زينب : خاص نمشي
إلياس : بقاي شوية
زينب : " كتشوا " خاص نمشي ضروري
إلياس : " شد فيدها " مالكي ؟
زينب : و طلق خاص نمشي ... چلست نشرب فالمونادة و من قبيلة و انا حابسة واحد البولة
إلياس : ههههههه غتحمقيني " جرها خطف قبلة خفيفة من فمها "
زينب : " خرجات فيه عنيها " ناري على ولد لحرام ... بغاني نطلقها فالتكشيطة و أنا غير كرياها
نزلات عليه بيدها على كتفو ... حلات لباب و خرجات كتزرب بطالونها ... بقا كيضحك و يدوز يدو على صدرو ... عاد ديمارا و زاد ...
🍁🍁 يوم جديد ...
فاقت جولان على أشعة الشمس الي تسلات لغرفتها ... ناضت متحمسة و فرحانة جبدات شنو غتلبس لخدمة حطاتهم فوق سريرها ... عاد توجهات لحمام غسلات وجها و هبطات باش تفطر ... چلسات جنب مها كتاكل و ساهية حتى سولاتها حفيضة ...
حفيضة : مزال ابنتي متافقتو على الصداق ؟
جولان : " بإحراج " سولني لبارح ... قلت ليه بغيت العاود ديالو و عطاه ليا " عظات على لسانها "
حفيضة : ههههه ... هبيلة
جولان : الصراحة مابغيتش فلوس
حفيضة : هو خاصاك شحال من حاجة ... و لكن ماعليش
جولان : ماما أنا مابغيت والو ... و حتى العرس مكنفكرش نديرو
حفيضة : و لكن ضروري نديرو شي حاجة ... واخة نعيطو غير على الجيران و الناس الي كنعرفو
إبراهيم : " واقف عند لباب " و باش غاديري و هي مشادة حتى ريال
🌸 يتبع 🌸
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
