☠ السفاح العاشق ☠
🔥 بارت 78 🔥
بدات كترمش عنيها بسرعة و كتبلع ريقها ... شاف التوثر الزايد الي ركبها و هو يتكلم ...
رئبال : مغاديش تكحزي
جولان : آه سمحليا
جات ترجع خطوة للوراء و هي تلوا ليها رجليها ... فقدات توازنها و مالقات فاش تشد ... لاحت يدها شدات فيه من لڤيست ديالو ... سدات عنيها كتحمد الله مجابتش شي ربحة قدامو ... غا طلعات معها فمن معلقة فهاد اللحظة و هي ضور بيها الدنيا ... حلات عنيها بشوية ... شافت يدها وحدة شادة فالڤيست و لاخرى فالتيشورت من لكول ...
منزلاه ليه حتا بان جزء من صدرو ... طلعات فيه عنيها كتشوف فيه ببراءة و قربات طلقها فسروالها ... اليوم يجري على جد باباها مافيهاش ... طلقات من التيشورت خلاتو مكمش ... بغات تبعد و مكرهاتش يتحل المصعد ... ضربها بجرية ماتوقف حتال دارهم ... لكن سوء حظها موقفش هنا ... كيف وقفات مقادة تسمعات طراق ... طرطق الكعب فاش تلوات ليها رجلها ...
هاد لمرة قالت غير طيح و لا تعاود لفضيحة الي دارت ... سدات عنيها و محسات غير بيد دارت على خصرها و منعاتها طيح ... قلبها بدا كيضرب بسرعة رهيبة و جسمها ملاصق مع جسمو ... ريحتو هي كل ما كتستنشق فهاد اللحظة ... حسات بالإحراج و مقدراتش تحل عنيها ... شوية حسات بيه سحب يدو حلات عنيها و هي تلقاه اختفى و باب المصعد محلول ...
هزات يدها بدات تنش على راسها ... سندات على لحديدة و حيدات الصباط من رجلها ... بان ليها الكعب مدلي و هي تغبن ...
جولان : الله ينعلك ... مبان ليك تهرس حتا لهاد اللحظة ... تفو على موقف تحطيت فيه ... ماتبغيه لعدووك ... و دابة كيف غندير نتمشا بهاد الزمر
حيدات لكعب و رجعات لبسات الصباط ... خرجات كتعرج بيه ... جاب الله مكانتش الشركة عامرة ... غادة جنب الطريق و كطلب تلقا شي طاكسي قريب ... ميمكنش تمشا بهاد الحالة ... وقفات جنب الشانطي شوية بانت ليها سيارة كحلا دايزة حتا وقفات حداها ... نزل الزاجة و هو يبان ليها رئبال داخل السيارة ...
رئبال : " كيشوف قدامو "طلعي
جولان : لا بلاش ... غنمشي نشد طاكسي
رئبال : " تلفت عندها " بديك الحالة ... طلعي
حلات لباب و ركبات ... تحرك رئبال غاديين فصمت ... ماقدرات تحرك راسها هاكة و لا هاك ... حسات بحال الي مربوطة ... هي مولفة الحركة بزاف و لكن مع الي وقع فالمصعد ... حتا النفس كتاخدو بالحساب ... حسات بالسيارة توقفات ... هزات راسها بان ليها واقف عند راس دربهم ... تعجبات كيفاش حتا عرف فين ساكنة ...حسات براسها مكلخة فهاد اللحظة ... أكيد عرف من السيڤي ديالها ...
جولان : شكرا
حلات لباب و هبطات غادة جنب الطريق ... يالاه بغا يتحرك رئبال و هو يلمح مرا كبيرة فالعمر جات عند جولان ... بقا كيشوووف فالمرا و كيف عنقاتها جولان ... ديك النضرة الحادة الي فعنيه اختفت للحظة و هو كيشوفهم كيضحكو مع بعض ... غير بعدو و هو يكسيري مغادر المكان ...
جولان : لا راه غنتقل عليك أجدة
الحاجة : و غير سندي عليا مال راسك قاصح ... راه واخة شرفت باقة صحيحة ههه
جولان : " عنقاتها بدراعها و باستها من خدها " ماشرفتي والو ... باقة صغيرة و زوييينة
الحاجة : ديما كترفعي ليا المعنويات الشوطينة ... آه شكون هاداك الي وصلك ؟
جولان : المدير ديالي
الحاجة : زوين ؟
جولان : " عوجات شفايفها " خايب و غامض و و مانعرف ليه داك بنادم كيف داير ... غير التفكير فيه كيضرني فراسي
الحاجة : يعني كتفكري فيه
جولان : و لا ماشي من ديك الناحية ... أصلا مايمكنش نتعجب بيه و هو مستحييييل يشوف فوحدة بحالي
الحاجة : علاه مالك ... محضوض هادا الي غيديك ... قلبك صافي و حنينة ... كتبغي لخير لناس قبل راسك ... و مربية أحسن تربية " حطات يدها على خد جولان " نتي فخر لوالديك ... و نعم الإبنة
شافت جولان الدموع فعنين الحاجة و هي تعنقها بقوة ...
جولان : توحشتي بنتك
الحاجة : " زيرات عليها " بزاااف ... وقتما شفتك كنتفكرها ... أصلا عمرها مشات من بالي أنا و باها ... من نهار اختفت و حياتنا توقفات " بحرقة " تحرقت فبنتي و لحد الساعة كنتمنا شي نهار نحل لباب و نلقاها واقفة قدامي ... بغيت غير نشوفها و نعنقها واخة لمرة وحدة
جولان نزلو دموعها على حالة الحاجة ... الي كلماتها كلهم ألم و حرقة على بنتها رباب ... رافقاتها للدار و دخلات چلسات مع الحاجة حتا هدات شوية ... كيف جا الحاج سلمات عليه و رجعات للدار ... طلعات لبيتها بدلات حوايجها و هبطات جلسات مع والديها فالصالة تعشاو مجموعين عاد طلعات نعسات ...
🍂🍂 في الغابة خارج المدينة ... كانو مجموعة من الشباب كيتمشاو ... هازين قراعي ديال الشراب و الجوانات ... صوت ضحكهم و صراخهم كيتسمع منين و منين ... جوج فيهم كانو كيتمازحو ... واحد فيهم عتر لاخر جا مسرح فلرض ... هاداك الي طيحو هرب خلط على لاخرين ...
لاخر بغا ينوض و هو يحط يدو على شي حاجة ملسة ... هزها كان تليفون من نوع آيفون ... بقا كيقلب فيه لقا فيه خدش صغير من لتحت فالشاشة ... وقف كيضحك و مشا كيجري عند صحابو ...
........ : و تسناااو أولاد الكلب " كيوريهم الفون " شوفو شنو لقيييت ... باينة باقي خدام غير مديشارجي ... الواليدة دعات معيا هاد النهار حتا طحت على هاد الهمزة
🍁 توقعاتكم 🍁
أنت تقرأ
السفاح العاشق
Детектив / Триллерرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
