🔱 السفاح العاشق 🔱
💥 الفصل الثاني : بارت 138 💥
حط يدو على يديها الي ضايرين على عنقو و بعدهم ... شاف السنسلة ديال الجاكيط محلولة و سدها حتى غبرات فيها ... دار ليها بعنيه متخافيش طفا الضوء و خرج ... طلع مع الدرج بخطوات هادئة ... شاف فالباب الي مفتوح و خارج منو الضو ... قرب و دفعو بيدو ...
عنيه مشاو مباشرة للناموسية الي كانت مقربلة ... زير على فكو و تم داخل ... كيف وصل لوسط الغرفة سمع لحس ... مع ضار بان ليه خليل جاي مندافع ناحيتو ... ضرب خليل بيدو جهة كرش رئبال ... الي بسرعة تحاشى الدقة و هز رجلو ضرب ليه يدو ... حتى تلاح الموس من يدو لرض ... بقاو لجوج واقفين كيشوف بغل فبعض ...
خليل كان مجروح فجبهتو و جهة عنقو و عامر دم ... لكن الإبتسامة محيداتش من على وجهو ... شاف فيه رئبال بحدة ...
خليل : كنت عارفك غتجي ... كن غير تعطلتي شوية غتلقاني قضيت الغرض و ديك الساع غنعطيها ليك بالخاطر
رئبال : بنت لا حول ليها دارت فيك هاد الحالة ... حشم على راسك شوية
خليل : ماتمشيش غالط ... راه عزيز عليا نخليهم يلعبو ... و لا ضربات و جرحات كنستمتع أكثر ... شفتك من لبالكون و كنت متوقع مغاديش تمشي بهاد السهولة ... ديك النزعة و الغرور الي فيك ... كيخليوك ضروري ماترد حقك ... هاحنا تلاقينا و أخيرا
رئبال : عند بالك درتي شي إنجاز فاش استقويتي على بنت ... و لا حينت موالف تاخد الحاجة بزز و بالعصا ... و ثبت رجولتك عليهم ... الرجولة الي خديتي من تربية باك
خليل : " ابتاسم " جايب خباري " اتاجه للطبلة " هو سمعتي لهيه شايعة ... لكن القح**** الي كنضرب كيعجبهوم الحال ... و قلت يمكن گاع النسا هاكة ماتلومنيش
عمر جوج كيسان و تم جاي عند رئبال ... وقف مقابل معاه و مد ليه كاس ... بقا كيشوف فيه رئبال و مخداهش من عندو ... شربو خليل دقة وحدة و لاحو وراه ...
خليل : لكن الواليد علاش كتجبدو فهادشي ... و لا محروق حينت تخلى عليك حتى وليتي سايكو
رئبال : " بسخرية " نتا الي رباك راك طلعتي طبيعي ... و لا هادي غا تربية مك
خليل كان باغي يستافز رئبال فالأول ... صدق رئبال الي ظغط ليه على الوثر الحساس ... كيف سمع سيرة مو و هو يفقد أعصابو ... زير بيدو على الكاس الي هاز ... و فلحظة مفاجأة ضرب بيه رئبال جنب راسو حتى تهرس ... و فهاد اللحظة تحرك رئبال ... جمع قبضة يدو و عطا لخليل لفكو حتى رجع باللور ...
نطر رئبال طرف الزاجة الي بقا ليه فجنب جبهتو ... و بدا كيعطي لخليل فاللكمات ... لكن خليل مكانش من العاگزين ... حتى هو كيقاوم و يوجه ليه لكمات ... بجوج كيتقاتلو كأنهم فحلبة المصارعة ... طاح خليل فلرض و نزل عليه رئبال كيضرب و يعاود ... شافو بدا كيسد و يحل فعنيه و هو يتوقف ...
خليل : " دفل الدم من فمو " علاش وقفتي هههه
رئبال : " هاز قبضة يدو " هاد المقاتلة ديال الرجال ... و نتا بزاف عليك الرجلة ... و جات مامساليش ليك ... لمرة الجاية منين نتلقاو غتشوف الجحيم بعنيك محلولين
بغا رئبال ينوض عليه و هو يسمع شنو قال ...
خليل : " كيضحك " تستاحق هادشي الي خديت عليها ... عرفتي ريحتها باقة فنيفي ... لدابة كنشمها
زير رئبال على سنانو ... بان ليه الموس فلرض هزو و يالاه بغا ينزل عليه سمعها غوتات ... ضور وجهو و هي تبان ليه جولان واقفة عند لباب ... دارت ليه براسها لا مضربوش ... بقا كيشوف فيها و رجع تلفت عند خليل ... الي راسم ابتسامة و فمو عااامر دم ... رئبال دار فيه شي شوفات قبل ما ينزل عليه لفخضو ...
غزس ليه الموس حتى غوت خليل ... رجع نطرو رئبال بطريقة خلات الضرر أكبر من الطعنة ... ناض عليه و رجع ليه الإبتسامة ...
رئبال : هادي سوڤونير ... لا باغي تعيش رجع منين جيتي ... حينت نهار نتلقاو من جديد ... واحد فينا الي غيبقا عايش
لاح ليه الموس حداه و تم خارج ... كيف وصل عند جولان بانت ليه مخرجة عنيها ... شافها كلها كترعد و عنيها مغرغرين و ماليهم الخوف ... بغا يشد فيها و هي تبعد خطوة اللور ... حسات بركابيها غيخويو بيها لو مشداتش فالحيط ... بانت ليه هكاك و هو يقرب و هزها بين يديه ... هبط مع الدروج و خرج من الڤيلا ... حل باب اللوطو و حطها دار ليها الحزام و هي غير صاقلة ... ضار ركب و خرج من تماك مكسيري ...
بعد مدة كان قدام الڤيلا ... حل ليه العساس و دخل ... هبط و دار حل ليها لباب ... تحدر خشا يديه تحت رجليها و من ورا ظهرها ... هزها و تم داخل بيها لڤيلا ...
كانت لاحبيبة و سنمار و إلياس جالسين فالصالة ... حتى بان ليهم رئبال داخل و هاز بين يديه جولان ... وقفو كاملين كيشوفو فيه متاجه للدروج ... ضارت حبيبة عند الدراري و سولات ...
حبيبة : شنو واقع ... شكون ديك الي هاز رئبال ؟
إلياس : واقلة جولان ... نطلع نشوف فين لقاها
سنمار : " شدو " فين غادي ... خليه حتى يهبط و يشرح لينا
حبيبة : شكون جولان ؟؟
إلياس : عروسة ولدك هههه
سنمار : " خنزر فيه " وقت الضحك دابة
إلياس : سموحات ... نسيت راسي ثاني ... نمشي نعلم ... لمهم
خرج إلياس للجردة و جبد لفون ... اتاصل بزينب الي جاوبات فالحين ...
زينب : أولووو ... شي خبار على جولان ؟
إلياس : مزال مانعستي ؟
زينب : و هضررر ... واش سمعتو عليها شي حاجة
إلياس : لقاها داك سيحت الليل و جابها لڤيلا ... قلت ليك غيلقاها
زينب : عطيني العنوان نجي دابة
إلياس : مريضة فمخك ... غادي تجي لهاد لخلا بوحدك و فهاد الوقيتة !!
🌸 يتبع 🌸
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
