السفاح العاشق

الجزء 117

🔱 السفاح العاشق 🔱
💥 الفصل الثاني : بارت 117 💥

وقف عليهم سنمار ... هزات سمارا عنيها شافت فيه و ابتاسمات ... سمارا : سنماااار جيتي
سنمار : ماشي كترتي من الشراب
سمارا : " شافت فالكاس " لااا ... هذا يالاه الكاس الثاني ههه ... فين هو إلياس
إلياس : " وقف جنب سنمار " هاهو ... ديرو لينا بلاصة وسطكم
سمارا : بطبيعة الحال ... چلسو السهرة عاد بدات
إلياس بدون تردد مشا چلس بين البنات ... و حتى هما عجبهم الحال ... سنمار حيد الجاكيط ديالو دارها ليها على فخاضها و چلس جنبها كيشوف قدامو ...
سمارا : " مالت عليه " فين سافر رئبال ؟
سنمار : " ضار عندها " مشا لبرلين
سمارا : لاش ... الخدمة ؟
سنمار : مقال ليا والو
سمارا : كنعيط عليه مكيجاوبش ... علاش كيدير ليا هاكة ؟
سنمار : " نطر ليها الكاس " باركة عليك ... يالاه نوصلك للدار
سمارا : لاااا ... لا مشيت غنبقى نفكر فيه و هو گاع محاس بيا ... عرفتي شنو هو تكون كتبغي شي حد و هو محااااسش بيك " كتميل فعنيها "
سنمار : " لايح يدو من ورا ظهرها و كيشوف فيها " علاش متنسايهش
سمارا : ماقدرتش " حطات راسها على كتفو " حتى فاش رفضني و دازت خمس سنين ماقدرتش نساه ... سمحت فكرامتي و جيت على قبلو ... لكن رئبال مصر على يخلي الكل بعاد عليه ... و إلي مريحني شوية هو انو مبعد حتى على لبنات

إلياس : هههههه ... من نيتك
سمارا : " تلفتات عندو " شنو الي ضحكك ؟
إلياس : هو صحيح رئبال مبعد على العلاقات ... لكن هذا مكيعنيش أنو چالس بلاش ... راه كيبقا راجل
سمارا : شنو كتقصد ؟
سنمار : جمع فمك شوية و دخل سوق ك** ... لاش كتحنقز بحال الزواق
إلياس : و السيدة مشات غالطة ... قلت نورها
سمارا : إلياس شنو عنيتي بهضرتك ؟
إلياس : السي رئبال مدوز شلااا علاقات عابرة ... بمفهوم عندو بزاف ديال الصديقات Female friends with benefits ... مكتربطو بيهم حتى حاجة من غير سيكس ... كيقضيو الغرض و كلا كيرجع لحياتو الطبيعية بلا وعود او ارتباطات
سمارا : " بحرقة " لكن أنا عمري شفتو مع شي وحدة
إلياس : كتعرفي رئبال ... حركاتو غير متوقعة ... و حتى حد مكيعرف فين كيجي و لا فين كيمشي ... داير بحال الظل ... أنا و سنمار تصادفنا مع وحدة خارجة من الجناح ديالو واحد المرة ... كانت قرطااااسة و محترفة " غمزها " عندو الذوق
سمارا : " مزيرة على الفوطوي بيدها " عادي ... كيدوز وقتو ببنات الليل ... شكون هذا الي مدرهاش
إلياس : و واحد المعلومة أخرى
سنمار : كترثر بحال عيالات السوق ... جمع فمك خلاااص
إلياس : خليها تعرف هههه ... بقات فيا طاحت فجبل الجليد
سمارا : وااا هضررر
إلياس : رئبال عمرو باس شي بنت لمرا ... كي**** لكن مكيبوسش هههه ... كاين شي كائن اغرب منو !
سنمار : خويتي المزيودة ... يالاه نوض تقااااود لدارك
إلياس : " وقف " هاهو غادي
هز إلياس الفون ديالو من فوق الطبلة ... غمز لوحدة من الي كانو چالسين معاه و ناضت تبعاتو ... بقات سمارا ساهية كتفكر فهادشي الي سمعات ... هي عارفة بلي عمرو ارتابط بشي وحدة ... حتى فأيام الجامعة مكانش كيعمر مع لبنات ... هادشي كان مريحها و عاطيها أمل أنها ممكن تكون أول وحدة تكسر داك الجدار الي داير بينو و بين جنس حواء ...
ماتصدماتش من أنو عندو علاقات عابرة ... لكن كانت تفضل متعرفش بيهم ... عمرات ليها كاس آخر و بدات ترشف منو ... سنمار بقا حاضيها غير بانت ليه كترات ... نوضها و خرجها من تماك وصلها لدارها ...

🍁🍁🍁؛
مستلقي فسريرو و داير يدو تحت راسو ... حط يدو على صدرو و تذكر فاش دفعاتو بيديها ... علاش قبلها فديك اللحظة هو براسو معارفش ... يمكن أول مرة ميحللش الحاجة قبل ما يديرها ... فقط تبع هاد الإحساس الغريب الي جا من الداخل ... و تصرف بدون تفكير ...
ناض من السرير و مشا لخزانة ... خدا كاس عمرو و اتاجه لبالكون ... وقف خاشي يد فجيب السروال و الثانية هاز بيها الكاس ... رشف منو و تلفت جهة البيت فين ناعسين البنات ... شاف الضو باقي شاعل ... تنهد و شرب الكاس فدقة ... رجع دخل حل لباب و هبط لتحت ... مشا للمكتب و خدا الوراق الي سيفط ليه بهاء فالفاكس ... چلس خدام فيهم حتى قرب يصبح الحال ... عاد طلع لبيتو دوش تكيطم و خرج ...

مرو يومين و جولان مخرجاتش من لبيت ... زينب ماعرفات شنو بيها ... غير چالسة فالبالكون معظم الوقت ... منين مابقاتش كتهبط ولات الخدامة كطلع ليهم الآكل لبيت ... و رئبال مبقاو شافوه ...
واقفة زينب كتسرح فشعرها ... بانت ليها جولان چالسة فالبالكون فوق الفوطوي ... هادي حالتها هاد اليومين ... كتبقا ساهية غير بوحدها و كأن شي حاجة شاغلة بالها ... حطات زينب البلاك و خرجات ... هبطات لتحت و مشات لكوزينة عند الخدامة ... بغات تسولها على مكان رئبال ...
هاد الأخير الي كان واقف بسيارتو كيتسنا البوابة تحل ... تلفت و هو يلمح سيارة جاية من بعيد ...

🌸 يتبع 🌸