☠ السفاح العاشق ☠
🔥 بارت 32 🔥
جولان : " فخاطرها : ويلي على شوهتي فضحت راسي ... سدي فمك اللقوة و انساحبي قبل ما تزبليها " خاص نمشي
زهير : اوكي ... تهلاي فراسك
جولان : شكرا
قالتها و مشات مسرعة ناحية لباب ... كتلعن فراسها على الكلخ الي كيهبط عليها قدامو ... بقا زهير متبعها بعنيه حتا دخلات ... خشا الفون فجيب الجاكيط و توجه لعند لگارديان ...
كيف دخلات مع لباب و هي توقف كتستوعب شنو وقع ... كيفاش الشخص الي كانت معجبة بيه لمدة ثلاث سنوات ... عارف اسمها و طلب رقمها ... زعما يكون أخيرا لاحضها و لا الي وقع ليها خلاه يلفت انتباهو لجهتها ... زعما تكون عجباتو و الا علاش طلب رقمها ...
حولات متسابقش الأحداث لكن فرحتها كانت لا توصف ... جبدات لفون سيفطات ميساج لوئام صاحبتها و توجهات للصالة ... مكرهاتش تجري عندها فالحين و تعاود ليها كلشي بالتفصيل ... جاها بحال الحلم هادشي ... ماشي حينت عمرها اختابرات شعور انو يكون شي حد مهتم بيها عاطفيا ... لكن يكون هاد الشخص هو نفسو لكراش ديالها ...
الي كانت تكتافي أنها تشوفو من بعيد فقط ... و هاهو اليوم جا عندها و خدا رقمها بطريقة لبقة ... و صدق عارف حتا اسمها ... دوزات دوك الحصص و مقدراش تركز نهائيا ... رجعات فحالها فالعشية ... و قبل ما دوز للدار مشات عند وئام ... وقفات قدام لباب صونات ... و هزات راسها كتعيط ...
جولان : وئاااااام ... وئاااااااام
وئام : " طلات من الشرجم " انعااام ... مالناااا
جولان : هبطي عندي
وئام : مامسالياش كنصبغ ضفاري
جولان : هبطي لمك ... شكون أهم انا و لا ضفارك ... تخرگيهم هبطييييي
وئام : اففف ... هاهيا نازلة
تحل لباب و خرجات وئام ... لابسة تيشورت كحل مع كولون مزير و طالقة شعرها ... هي من النوع الي واخة تكون فالدار ضروري تهتم براسها ... ديما مقادة وجها و شعرها ... لأنها كتعشق المجال الي كيتعلق بالمايكاپ و تصفيف الشعر ... وقفات عند لباب هازة يدها و كتسوط على ضفارها الي صابغة بالحمر ...
وئام : آشكاين الصفريطة
جولان : " بحماس " جي عندي للدار ... عندي أخبار زوينة
وئام : " هزات حاجب " كتعلق بزهير ديالك ؟
جولان : " كتحرك راسها " آه آه
وئام : نفختي ليا راسي بيه ... شنو وقع ... شافيك هاد لمرة لمدة خمس ثواني ؟
جولان : " هزات يدها و هبطات ليها على راسها " و الله القزمة و متجمعي عليا حتا نتف ختي ... هاني مشيت ... متجيش و ديك الساع نتفاهمو ...
توجهات جولان للدار ... حلات بالسوارت الي عندها و دخلات ... بان ليها باها فالصالة ..
مشات سلمات عليه بدون ماتقول حتا كلمة ... و حتا هو اكتفى مد ليها يدو و مقال والو ... مشات لكوزينة بانت ليها حفيضة كتغسل لماعن ... قربات جولان و عنقاتها من اللور ...
حفيضة : " قفزات " خلعتيني يعطيك متاكلي
جولان : ههههه ... خلعتك و لا اسحاب ليك سي ابراهيم
حفيضة : " هبطات يدها ليعاتها من فخضها "
جولان : آااااي ... مامااااا هئ
حفيضة : باش نوريك الضحك الباسل
جولان : " كتحك ففخضها " اححح كتوزوز ... بغينا غا نضحكوك
حفيضة : آري نشوف
جولان : صافي عوجتيها ... لا باقي ضحكت معاك احفيضة عكري ليا
حفيضة : حفييييضة !!
جولان : " كترجع باللور " زعما لواليدة هههه ... هاني طلعت لبيتي الوالييييدة ... غتجي عندي الرعدة من دابة شوية ... سخني ليا غدايا عافاااك
حفيضة : درت التقلية ؟
جولان : لااااااا اعق ... علاش درتيها و عارفاني مكنكلهاااااش
حفيضة : " دارت يد فوق يد " علاه مكتاكليهاش ؟
جولان : " كتغبن " 21 سنة و انا عايشة معاك و معرفاش بلي كنكره شي حاجة سميتها التقلية ... ماماااا
حفيضة : " جبدات من التخميلة لبسطام " هاكي سيري خودي شنو بغيتي ... الله يرد بيك ... گاع الي فيها المنفعة متاكليها
جولان : " لمعو عنيها " ممكن ناخد بيتزااا ؟
حفيضة : هادشي علاش كتحومي " عطاتها لفلوس " سيري دغيا متعطليش ... راك عارفة باك
جولان : " باستها فخدها " لا مغاديش نتعطل
🍁 يتبع 🍁
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
