🔱 السفاح العاشق 🔱
💥 الفصل الثاني : بارت 170 💥
شي حد حاكمها من اللور و جارها ... مخرجة عنيها و كتجبد باش تفلت ... كيف رخا يدو شوية و هي طير عليه بعضة ... طلق منها ضارت شافتو و هي تجنن ...
زينب : اععع ... اش هاد فهايل التبرهيش ... خرجتيها مني
إلياس : " شاد فيدو " مجعوورة على شوية كنتي غاطيري ليا الجلدة
زينب : و نتا الي خالعني ... اسحاب ليا شي واحد سايكو ... غيجرني يغتاصبني فهاد الخلا
إلياس : اش من خلا ... هادي راه ملكية خاصة
زينب : " خرجات عنيها " ه ه هادشي ديال المدير !
إلياس : ههه آه ديالو ... و علاش كتقولي ليه المدير
زينب : و باش غنعيط عليه مثلا ... راه المدير ديالي
إلياس : عيطي عليه بسميتو
زينب : باش يجري عليا ... النهار الاول فالشركة فرضو علينا نعيطو للناس الي فوق منا برسمية ... واسعاك مول الشي
الياس : نتي هانية ... راك صاحبة خطيبتو ... و حبيبة صاحبو " غمزها "
زينب : لعمى " حطات يدها على صدرها " اففف قلبي باقي كيجري
إلياس : " قرب عندها " انسمع
زينب : غنحيد هاد سبرديلة الي فيها 5 سنتيم ديال العلو ... و نزل عليك بيها
إلياس : " كيضحك " قزمة ... حتى السبرديلة لابسها عالية
زينب : و نتا طويل كيف عنق بلارج بلا فايدة
إلياس : " هز التريكو حتى بانو لي زابدو " و هادو لمك
زينب : طزز ... نجوع راسي ثلثيام يوليو عندي
إلياس : استسلم ... معاك نتي كيتقداو ليا ... تقولي عندك مجلد ديال ردان الهضرة ... متخليهاش فيك
زينب : زينب هادي و أجرك على الله ... فينما جتيني تلقاني
إلياس : سعدات رئبال دا البراءة و التباتة
ميقات فيه و تمات غادة حتى جرها ...
إلياس : فين غادية ؟
زينب : عند جولان
إلياس : اجي لهنا ... جولان مسالية ليك " لاح دراعو على كتفها " خلينا نتمشاو شويا
جولان جالسة تهضر مع ثاندر گاع ماحسات بزينب امتا خرجات ... دخل رئبال للمستودع كيتمشى بخطوات ثابتة ... وقف على مقربة منها كيشوف فيها كضحك حتى كيتسدو عنيها ... خاشي يديه فجيابو و واقف بهبة ... الحصان صهل و بدا كيتحرك بزاف ... ماعرفاتش شنو بيه ... دارت تشوف زينب و هو يبان ليها واقف ... دورات عنيها فالمكان لقات غير هي وياه و زينب ماليها آثر ... فين مشات و امتى الله اعلم ...
آخر حاجة بغات هي تبقى هي وياه الراس فالراس ... خاصة من بعد الي وقع بيناتهم ... قرب رئبال بهدوء و وقف جنبها ...
رئبال : كيسولو عليك
جولان : " مكتشوفش فيه " آه من قبيلة و انا هنا ... خاص نمشي
تمات غادة كتزرب فمشيتها ... خرجات كتقلب على زينب مبانتش ليها ... الشمس غربات و بدا كيظلام الحال ... وقفات كتلفت هنا و لهيه ... تلفات ماعرفات شنو دير ... حدرات راسها و رجعات كتغبن ... بان ليها رئبال باقي واقف فين خلاتو ...
جولان : و واش مغاديش ترجع لڤيلا
ضار عندها و تم جاي قاصدها ... غير قرب و هي تبعد لا إراديا ... شاف فيها هاز حاجبو و فاتها ... تبعاتو كتفقص فداخلها ... تمو راجعين من الممر الي كيدي لڤيلا ... غاديين جنب بعض فصمت ... كيف دخلو بانت ليها زينب مع إلياس فالجردة ... مشات كتزرب لعندهم سلمات على إلياس بالزربة و جرات زينب دخلو للداخل ... وصل رئبال عند الياس و هو يتكرشخ بالضحك ...
إلياس : مال البنت مخلوعة ... و هاربة بحال الى تابعها بوعو ههه ... شنو درتي ليها ؟
رئبال : " عطاه لقرفادتو " كيفاش بلانك نتا
إلياس : مع زينب ... هاد المرة الأمور مختالفة
رئبال : تآذيها ضبر لراسك " طلق منو و تم داخل "
إلياس : " تابعو " عمرك شتي شي حد كيآذي القليب ديالو
رئبال : " ضار شاف فيه "
إلياس : اوكي زدت فيه شوية ... لمود تعناب كيتأكتيڤا بوحدو منين كنشوف ديك المشرارة
دخلو لداخل لقاو الكل مجموع على طبلة العشاء ... جلس رئبال فمكانو و كان إبراهيم فراس الطبلة من الجهة لاخرى مقابل معاه ... جولان چالسة جنب لاحبيبة الي كرسيها جنب رئبال ... مها جنبها من الجهة لاخرى و مقابلة معها زينب الي جا إلياس جنبها ... بداو الآكل الي كان كيف شي وليمة ... الطبلة عامرة أكلات مغربية داكشي دسم و كاين لي سالاد بالنسبة الي مكايكلش داكشي ... قربات لاحبيبة طبسيل الي فيه البسطيلة ...
قطعات منها و حطات ليها ... داقتها و هي تبدا فمدح حفيضة ... جولان غير كتشوا كتحماق على لبسطيلة و ماقدراتش تهز ... ما ارتاحت حتى حطات ليها لاحبيبة مورسو ... كلات منها كتبنن و غافلة على الأعين الي مركزين عليها ... حفيضة لاحظات رئبال كيشوف فجولان ... ابتاسمات و شافت عند لحاجة ...
حفيضة : قطعي لحفيدك الحاجة حتى هو
لاحبيبة : ماكياكلش الحلا
مزال ماكملاتها شافت رئبال ماد ليها صحنو ... تعجبات لأن عمرو قرب لبحال هاد الآكل ... اغلب الوقت اكلو صحي ... مدات ليه لاحبيبة و جولان حاضياه حتى شافتو ذاق منها ... غير شاف فيها و هي تضور عنيها ... كملو عشاهم و ناضو للصالة مقصرين بالقهوة ... بقات جولان كتشوا حابسة بولة و مابغاتش تنوض ... شافت رئبال مكاينش قالت غيكون لفوق فبيتو ...
خرجات كتزرب و تلوي فرجليها ... دخلات لطواليت قضات حاجتها غسلات يديها و تمات راجعة ... شافت جهة الدروج بان ليها نازل ... ماعرفات شنو دير حلات أقرب باب و دخلات ... سداتو و حطات يدها على صدرها الي كيطلع و يهبط ... ضورات وجها شافت راسها وسط المكتب و هي تخرج عنيها ... و زاد عليها الزايد فاش سمعات خطوات كيقربو ... رجعات باللور حتا ضربات فشي حاجة ... نزلات عنيها بان ليها كادر مقلوب طايح ...
هزاتو باش ترجعو فوق المكتب ... كيف قلباتو و هي تشوكا ...
جولان : ر ر رباب ... !
🌸 توقعاتكم 🌸
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
