☠ السفاح العاشق ☠
🔥 بارت 67 🔥
هبط و دخل متاجه لفين قال ليه السائق ... غادي فالكولوار و هي تبان ليه لاحبيبة چالسة و واقف جنبها بهاء ... قرب لعندهم كيف شافتو وقفات و جات لعندو ... عنقاتو بقوة و الدموع فعنيها ... حط يدو على راسها و لاخرى على ظهرها ...
خلاها حتا هدات عاد بعدها ... شافت فيه بحزن و نطقات ...
لاحبيبة : الله يرحمهم أولدي
رئبال : " شاف فبهاء " بغيت نشوفهم
مشا بهاء بسرعة هضر مع الأشخاص المسؤولين ... رجع و ديك الساع خلاو رئبال يدخل للمشرحة ... حل ليه لفرملي لباب دخل و تبعو رئبال ... كان المكان بارد و كيبعت القشعريرة من الجو الي فيه ... حل الفرملي الصندوق الأول و خرج لبياص عاد حل الي جنبو ... كانو جثتين مغطيين برداء بيض ... تقدم رئبال و شاف فالفرملي الي انساحب دغيا ...
حط يدو على الغطاء الأول حيدو و هو يبان وجه إمرأة فالأربعينيات ... وجها شاحب و خالي من الحياة ... بقا كيشوف فيها شحال عاد حيد لغطاء للشخص الي جنبها ... كان رجل فأواخر الخمسينيات ... وقف كيتأمل جثتهم بتمعن و بدون أي تعبير على وجهو ... حاس بشعور غريب داخلو ...
واخة مبانش عليه الحزن و مادرف حتا دمعة ... على الأب و الأم ديالو بالتبني ... لكن الفراغ الي داخلو زاد كبر ... لبارح كانو حيين و اليوم فجأة ماتو فحادث سير ... ببساطة مشاو ... ماقدر يتذكر حتا آخر مرة شافهم ... يمكن سنة فاش رجع للمغرب آخر مرة ... علاقتو بيهم كانت مختلفة لكن هادا لا يعني أنو مكانش يعزهم ... كيبقاو الأشخاص الي وفرو ليهم منزل و سقف ...
عطاوه من حبهم على قدر الإمكان ... و حتا هو كان كيبغيهم بطريقتو ...
رجع الغطاء عليهم و خرج ... رجع هو و لاحبيبة لڤيلا ديال العائلة ... و بهاء الي كان لمساعد ديال العثماني ... تكلف بالاجراءات و بلغوه غيتسلمو الجثتين فالغد ليه ... مرت مراسم الدفن و حضرو أغلب أفراد العائلة ... رئبال كان فأغلب الوقت فغرفتو ... و بعد أيام فقط رجع لندن ... خدا لماستر فإدارة الأعمال و رجع فاش اتاصل بيه المحامي ...
خبرو أن حضورو فقراءة الوصية ضروري ... و تماك كانت المفاجأة فاش تكتب أغلب ممتلكات مصطفى العثماني الإبن البكر للعائلة ... لإبنو الوحيد رئبال العثماني ... كانت صدمة كبيرة لباقي أفراد العائلة ... و رغم محاولتهم ماقدرو يديرو حتا حاجة ... تسلم رئبال رئاسة الشركة و لقلة خبرتو الكل توقع أنو غيفشل ... لكنهم كانو غافلين على مدى ذكاءو و السبب الي خلا مصطفى يخلي ليه كلشي فيدو ...
و بهاء الي كان جنب مصطفى رجع المساعد ديالو الأيمن ... كيف تولى رئبال رئاسة الشركة ... تغيرو حوايج كثيرة فحياتو ... و منها اليوم الي رجع لڤيلا و لقا لاحبيبة فانتظارو ... دخل و طلبات منو يرافقها لغرفتها ... بقا واقف كيشوف فيها حتا جبدات شي حاجة من المجر ... قربات عندو و مداتها ليه ...
لاحبيبة : كنت مترددة واش نعطيها ليك او لا ... رغم الضروف و كلشي ... من حقك تحتافظ بشي حاجة كتخص أمك " بحزن " أمك الحقيقية
شاف فداكشي الي هازة ... كانت مذكرة صغيرة ... خداها من عندها و كان حاكم الشدة و مزير عليها بيدو ... شافت نضراتو و تحسرات على حالو ... قربات و دوزات يدها على شعرو ... حاجة وحدة الي كتمنى هو يحضى بالسلام ... و تكون هادي آخر المآسي الي يتعرض ليها ... رغم كلشي لاحبيبة هي الوحيدة الي كتشوف الحزن وراء نضراتو الجامدة ...
باس ليها على راسها و طلع لغرفتو ... جلس فالضلمة مقابل مع البالكون و فتح المذكرة ... دوز صباعو على وراقها الي تغير لونهم ... و هو كيتامل خط الأم ديالو الي جابتو لهاد العالم ... عاقل عليها مزيان و على تفاصيل وجها ... لون شعرها ... ابتسامتها الباهتة ... وجها الحزين أغلب الوقت ... متذكر كل تفصيل فيها ... كانت إحساسو اتجاهها متناقض ... حب و كره فنفس الوقت ... عتاب و تعاطف ...
لكن بعد هاد الليلة تغير كلشي ... فور ماقرا شنو كانت تحط الأم ديالو ... و تخوي قلبها فمذكراتها اليومية ... من أيام مراهقتها و علاقتها بوالديها ... للقاءها بجابر و ماوقع بعدها ... لحتا اليوم الأخير الي كتبات فيها قبل موتها منتاحرة ...
لاحبيبة فاش شافتو محمل اللومة على الأم ديالو على الي وقع و تركها ليه بديك الطريقة ... و لحبها لرباب رغم الي دازت منو ... كان هدفها انو يعرف جزء من الحقيقة و يعذر تصرفها نوعا ما ... لكنها مكانتش ضاربة الحسبة أن الحقيقة فيقات وحش داخل رئبال ... الكره و الحقد كبر داخلو اتجاه الأب ديالو و كل الأشخاص الي وصلو الأم ديالو لديك الحالة ... و على الي وقع ليه بعد مماتها ... و هنا بدات مرحلة أخرى فحياتو ...
مرو الأيام و الشهور و بالظبط سنة ... جالس فمقصورة رجال الأعمال ... لابس بدلة سوداء مع حذاء باهض الثمن ... كان باين أنو فهاد المدة وقعو تغيرات كثيرة ... و هادشي انعاكس على طريقة لباسو و الهيبة الي ولات محيطة بيه ...
حطات الطائرة فمدينة واشنطن ... خرج من المطار و خدا السيارة الي جابو ليه ... اتاجه للمنزل الي أجر ... كانت إقامتو طويلة هاد المرة لذلك قرر ياخد دار بعيدة على المدينة و جو الأوطيلات ... و يبدا داكشي الي خطط ليه من نهار عرف شنو قلب حياتهم ... و دمر فتاة فمقتبل العمر حتا وضعات حد لحياتها ...
🍁 يتبع 🍁
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
