🔱 السفاح العاشق 🔱
💥 الفصل الثاني : بارت 119 💥
سنمار : حرت معاك و الله ... و شنو تفسير هادشي الي كدير !
رئبال : ماشي بالضرورة تعرف ... و من الأحسن خليك بعيد
سنمار : لبنت كطلب فيا بغات تمشي فحالها ... بتصرفك هذا غتخليها تحقد عليك كثر
رئبال : مكيهمش بشنو كتحس ... و منين ترجع الشوف و ترجع كيف كانت ... ديك الساع غنخليها
سنمار : غريب هادشي عندك ... لهاد الدرجة كيهمك أنها ترجع كيف كانت و ترجع لبنت الي كانت عليها قبل الحادث ... هادشي فات تحمل المسؤولية على الي وقع
رئبال : كتحلل كثر من لقياس " شاف فيه " و فين عمرك تناقشتي معيا فشي قرار و لا تدخلتي
سنمار : حينت عمرني شفتك كتصرف بحال هاكة ... علاش هي بالذات ... شنو السبب الحقيقي وراء إصرارك ... منين تجاوبني ديك الساع غنرجع اللور
رئبال : " ضار و تقابل معاه " يكفي أني عارف ... السؤوال المهم هو لاش جاي و جايب معاك لاخرى بحجة عندك تصوير
سنمار : " حك على راسو " عرفناك هنا و جينا لعندك ... و سمارا صديقتنا أولا !
رئبال : صديقتك نتا و نتا مسؤول على أي تصرف غديرو ... حينت عندي الي شاغل بالي مناقصانيش دراما العيالات
سنمار : ماشي مقصح معها فمعاملتك ... متلومهاش على تصرفاتها ... راك عارف كتبغيك
رئبال : " قرب عندو " متلعبش هاد الدور ... نتا كتبغيها و هي كتبغي واحد آخر ... و باغي تكون الشخص الأفضل و ترجع اللور
سنمار : مغاديش نبزز عليها راسي
رئبال : " حط يدو على كتف سنمار " ذوقك فالعيالات بحال ذوقك فاللباس
ابتاسم ليه رئبال بطرف شفايفو و تحرك ... سنمار بقا واقف كيشوف فيه ... صغر عنيه كيتذكر آخر جملة قال ليه ... أكيد مكانتش مجاملة ... نزل عنيه كيشوف فشنو لابس ...
سنمار : و مال طريقتي فاللبس فيها الضوء على ديالك
چالسة جولان و زينب فالغرفة ... بجوجات ساكتين صبرات زينب حتى عيات و هي تسولها ...
زينب : شنو دابة ... غنرجعو فحالنا و ترجعي تسدي عليك باب بيتك و دوزي حياتك كلها هكاك
جولان : زينب مافيا الي يهضر
زينب : " وقفات " أنا فيا ... كانت عندي ختي صغر مني بعامين ... ماتت فكسيدة و يالاه عندها 12 سنة ... كنت معها فاش خبطاتها الطونوبيل و مولاها هرب بلا رحمة ... شهورا و أنا مزال تحت تأثير الصدمة ... و دازو سنوات و حالتي زادت تكفسات ... بعدت على كلشي ... كرهت أي حاجة ضايرة بيا ... مابغيت نقرا مابغيت صحابات ... و كنت ديما كنبعد على الناس ... حينت منين مكدخلي حد لحياتك مكتعطيهش فرصة يخليك و تجرحي ... كنت مرتاحة بوحدي ... او هادشي الي ظنيت ... لكن لداخل كنت كنموت من الوحدة ... مرضت و تأزمت ...
و فاش بعدت الناس عليا كان خطأ كبير ... حاولت نغير من راسي و نخلي للأشخاص الي كنهمهم يتقربو مني ... عامين و حنا كنقراو مع بعض ... كنت كنشوف فيك اي حاجة تمنيت نكون عليها ... ديك البنت المرحة الطيبة الي كلشي كيبغيها ... و نهار وقع ليك داك المشكيل شفت كيف تغيرتي و مابغيتش تدوزي من الي مريت منو ... هادشي علاش تقربت منك و حاولت نساعدك ... و كان أحسن قرار اتاخدتو ... رجعنا صحابات و خواتات ... و فرحت ملي شفتك رجعتي وقفتي على رجليك ... شحال ساهل تستسلم لكن انك تحاربي خاصك قوة ...
و اليوم كنشوف نفس الشيء ... كنشوف جولان الي استسلمات بسهولة و باغة دفع الناس الي كيهتمو بيها بعيد ... مايمكنش نبقا ساكتة و انا كنشوفك هاكة اجولان
جولان : " تغرغرو عنيها " نتي أكثر وحدة غتكون حاسة بيا ... و عارفة علاش تصرفت هاكة
زينب : " قربات چلسات جنبها و عنقاتها " عارفة عااارفة
تحل لباب و هي دخل سمارا ... وقفات كتشوف فيهم مربعة يديها ... دارت زينب شافتها ...
سمارا : اوووه شحال كيوت ... سوري كنت دايزة و سمعت حديثكم بالصدفة ... تأثرت الصراحة
زينب : خاصاك شي حاجة ؟
سمارا : بغيت غير نفهم واحد الحاجة ... على حساب مافهمت من إلياس ... رئبال جابكم لهنا باش دير هي العملية و ترجع تشوف ... لكن هي رافضة و مصرة على قرارها ... جاني لفضول نعرف علاش رافضة ... عارفة بلي رئبال شفق عليك و محمل راسو مسؤولية الي وقع ... علاش مصعبها ... ديري العملية و كلا يرجع منين جا
زينب : و نتي أختي شنو دخلك فالموضوع
سمارا : " هزات حاجبها " كان خاص نقول هادشي منين حتى حد مابغا يقولو ... ماشي شفتي رئبال مصر يساعدك تزيدي فيه ... هو هاكة داير ... كينفذ شنو ما بغا بلاما تمشي بعيد ... نصيحة مني قبلي المساعدة و رجعي لحياتك ... بهاد الحالة مغتنفعي راسك و لا الي ضايرين بيك ... شوفي غير صحاب الإحتياجات الخاصة ... واخة أهلهم كيبغيوهم لدرجة كبيرة كيبقو عبء عليهم طول حياتهم ... و صعيب تلقاي شريك حياتك و نتي هاكة
زينب : ماشي تلاقينا شي جوج مرات ... هذا مايعنيش عندك الحق دخلي فالشبوق الي ماليك
سمارا : " ضحكات " بحال هاد المصطلحات مكنفهمش ليهم
زينب : " وقفات " أوكي أنا نجي نفهم ختي
بغات تمشي ليها زينب و هي تشد فيها جولان ...
جولان : ممكن تخرجي ... وحدة فمقامك مخصهاش تعاطى مع بحالنا
سمارا : أكيد غنخرج ... تصبحو على خير
خرجات سمارا و ردخات لباب ... يالاه بغات ضور مع الكولوار و هي تساطح مع رئبال ...
🌸 يتبع 🌸
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
