☠ السفاح العاشق ☠
🔥 بارت 80 🔥
يوم جديد ... چالسة فمكتبها و خدامة فشي وراق ... وصل وقت الغدا ناضت هزات الملفات الي خاص تدوزهم للمدير ... و خرجات من المكتب ... غادة فالكولوار و كتدندن ... لمحات رئبال جاي من بعيد و معاه بهاء ...
كانت إحدى المنضفات جاية من غرفة الاستراحة ... عند الضورة تساطحات مع رئبال ... طلقات السطل الي هازة و تخوا على حذاء رئبال ... جولان كتشوف من بعيد شهقات فبلاصتها ... بينما المسؤولة على التنضيف كانت كترجف بالخلعة ... جات تكلم و تعتاذر على الخطأ الغير مقصود ...
جاتها صفعة من عند بهاء حتا دخلات فالحيط ... شدات فخدها عنيها عامرين دموع و حدرات راسها ... جولان ماقدراتش تصبر و مشات عندها كتجري ... وقفات بينها و بين بهاء كأنها حامياها منو و شافت فيه بحقد ...
جولان : راه ماقصداتش ... ماشي دارتها بلعاني
خنزرات فيه و شافت ناحية رئبال الي كان ساكت ... أكيد كن ما تدخل بهاء كان غيدير هو نفس الشيء ... عزات عليها المرا ... ماشي ذنبها أنها غير عاملة التنضيف و جات فالوقت و المكان لغير مناسب ... جراتها معها و مشاو فاتجاه مكتبها ...
رئبال بقا واقف كيشوف فيها غادة بيها معنقها بيد ... ضار عند بهاء شاف فيه و اتاجه لمكتبو ... لاخر خلط عليه ... كيف سد لباب جاتو لكمة لوجه ... وقف مسمر فبلاصتو ... آخر حاجة توقعها يتلقى لكمة من عند رئبال ... حط يدو على نيفو الي دايز بالدم و حدر راسو ...
رئبال : داكشي الي فالكولوار نتا الي غتنضفو ... و منين ترجع لبوسطها غتمشي تعتاذر منها ... و آخر مرة نشوفك كتمد يدك على شي مرا ... كيفما بغات تكون ... تفاهمنا
بهاء : وي
رئبال : خرج
خرج بهاء و هبط لتحت ... توجه للطواليت طلق لما كيغسل فنيفو و عاض على سنانو ... آخر حاجة بغا هو يغلط مع رئبال ... تسرعو و انغعالو الزايد مؤخرا خلاه يتصرف بدون تفكير ... من نهار جات جولان للشركة حاس بلي كلشي غادي ضدو ... غير تذكرها و كيفاش وقفات فوجهو زاد صعر ... كل المشاكل الي طاح فيهم بسببها ... رجع للمكتب ديالو و دوز اتصال ...
جولان بعدما خرجات من عندها المرا ... مشات تغدا و هي راجعة للشركة ... كيف دخلات لمحات بهاء من بعيد ... قلبات وجها و طلعات فالمصعد ... دايزة من حدا مكتب رئبال و تذكرات خاصها تجيب ليه شي وراق ... و هي آخر حاجة بغات تشوف هاد الساعة هي وجهو ...
كيفاش حتا قابل على تصرف بهاء ... بحالو بحال عاملة التنضيف هما بجوج موضفين عندو ... علاش يدير التمييز ... هزات الملفات و اتاجهات لعندو ... دقات و دخلات ... بان ليها كيهضر فالفون ... قربات حطات داكشي فوق المكتب و ضارت خارجة حتا وقفها صوتو ...
رئبال : تسناي
جولان : " ضارت " وي
حط لفون و وقف قرب عندها ...
رئبال : آخر مرة تدخلي فشي حاجة مكتعنيكش
جولان : " عقدات حواجبها " واخة يكون مابغة يكون ... مايمدش يدو على مرا
رئبال : " بنبرة جدية " سمعتي شنو قلت ... خليك فشؤونك و متبقايش تدخلي فشي حاجة بعيدة عليك
جولان : أوكي
قالتها بعصبية و تمات خارجة ... حتى حسات بيدو جراتها ...
رئبال : واش قلت ليك خرجي !
جولان : " هزات عنيها فيه " محتاج شي حاجة
رئبال : " طلق منها " لا خرجي
خرجات كتزرب فخطاويها ... غادة كتمتم و تسب فخاطرها ... صونا ليها لفون جبداتو و جاوبات ...
زينب : لحماااارة
جولان : " كتغبن " زينب
زينب : مالكي ؟
جولان : آش بيني و بين شي مساعدة ... هادشي ماشي ديالي ... بغيت شي بيت نسد على راسي أنا و لبيسي ديالي و لماكلة ... آش دخلني لشي شركة
زينب : لمك تشكاي ... شكون بحالك خدمتي قبل حتا متخرجي ... عطينا غا شوية من زهرك ... شوفي أنا ها الإجازة شداها كنضور بيها شكون داها فيا ... اسحاب ليك ساهلة تلقاي خدمة فهاد لبلاد ... أنا منك نحمد الله ليل و نهار
جولان : آجي فبلاصتي و غتشوفي ... عرفتي على مدير كيف داير ... متفهمي فيه حتا لعبة ... كيتقلب غير بوحدو ... و لماندجر كيكرهني من عند الله ... محال واش نطول فهاد الشركة
زينب : صبري اصاحبتي ... لا فلتات ليك هادي من بين يديك مشيتي خلا ... خلي بعدا غير حتا تجمعي شوية ديال لفلوس و خرجي كملي لكتابة و طلقي كتابك الثاني
جولان : هاني صابرة ... حتا نشوف فين غيخرج ليا هادشي
زينب : و هكاك نبغيك ... الويكاند نتلقاو ... من نهار خدمتي مابقينا شفناك
جولان : أوكي مشات ... الغدا على حسابي
زينب : بزز منك المساعدة الشخصية هههه
جولان : ههههه باي
قطعات جولان و دارت باش تسد لباب ... و هي تخرج عنيها فيه ... بدات تولول فخاطرها و كتحاول تذكر شنو قالت عليه ... من إمتا و هو واقف هنا ... يكون سمع كلشي ... صافي اليوم ترجع بطالية بحال صاحبتها ...
🍁 يتبع 🍁
أنت تقرأ
السفاح العاشق
Детектив / Триллерرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
