☠ السفاح العاشق ☠
🔥 بارت 69 🔥
وقف فالوسط و بخفة حط يدو على خصرها جرها عندو ... حطات يدها على كتفو و هزات راسها فيه ... بداو كيتحركو تحت نغمات الموسيقى حتا تكلم ...
رئبال : راجلك مزال مجاش ؟
ياسمين : " بصدمة " مغربي ؟
رئبال : امم
ياسمين : اوه ... و باش عرفتي انا مغربية ؟
رئبال : ميمكنش نطلب منك ترقصي معيا و انا مكنعرفكش
ياسمين : كتعرفني ! امم شنو كتعرف عليا ؟
رئبال : كلشي
ياسمين : كلشي ههه مايمكنش
رئبال : " كيشوف فعنيها مباشرة " عنيك كيقولو بزااف
ياسمين : حاسة بحال الى كتغزل بيا
رئبال : لا ... فهمتيني غلط
ياسمين : " تحرجات " أوكي ... أكيد واحد شاب بحالك مغاديش يتغزل بوحدة فسني
رئبال : " وقف و قرب وجهو عندها " ماشي هادا هو السبب
ياسمين : و شنو ؟
رئبال : " همس حدا وذنها " راجلك جا
دارت و هو يبان ليها جابر داخل ... رجعات دارت عندو لقاتو غبر من حداها ... بقات كتقلب عليه بين الناس و مكاينش حسو كأنو اختفى ... وقف حداها جابر ...
جابر : علامن كتقلبي ؟
ياسمين : " دارت عندو " حتا حد ... دابة عاد جاي
جابر : منين ساليت راه جيت
ياسمين : " و عنيها كيقلبو عليه " ديك الساع دير بناقص و متجيش ... مخليني بوحدي الي جات تسول فيناهوا راجلك ... عارف خاصهم غا فاش يشدو الحتيت
جابر : نتي لا كتهمك هضرة الناس ... انا ماعندي سوق فيها
خلاها و مشا عند شي رجال من معارفو ... رجعات عند صاحبتها مجمعين لكن عقلها غير مع الشاب الي رقصات معاه ... عنيه و الطريقة باش كان كيهضر ... بقات شاغلة بالها طيلة الحفل ...
بعد يومين كانت ياسمين فأحد الفنادق ... كان عشاء بين عضوات الجمعية ... كل وحدة كتاكل بتأني و شياكة و مشاركين الحديث ... حسات بخيال داز من حداها و الريحة الي شمات جاتها مألوفة ... دورات وجها بان ليها شخص لابس بدلة سوداء غادي ... بقات متبعاه حتا خرج من باب المطعم ...
رجعات لحديثها معاهم و فجأة تذكرات الشخص الي رقصات معاه ... معرفاتش علاش كيجي فبالها ... و هي معارفة حتا اسمو او وجهو بالكامل ... كيف كملو العشاء قررو يتوجهو لأحد الملاهي ... داكشي الي كان ... شدو طبلة VIP و طلبو مشروبات ... لبعض منهم ناضو يرقصو و لاخرين بقاو چالسين ...
ناضت ياسمين متاجهة للطواليت ... لقاتو مشغول و بقات واقفة فالكولوار ... حلات صاكها جبدات سيجارة ... يالاه كتقلب على البريكة ... و هي تمد يد هازة بريكة فضية شعلات ليها الگارو ... هزات عنيها شافت فوجهو ... كان لابس سبرور سروال أسود مع هودي فنفس اللون و داير القب ...
كان كيبان غير نصف وجهو ... هز راسو و قدرات تشوفو ... بقات كتحقق فعنيه كأنها فايتة شايفاهم ... لكن فاش سمعات صوتو تأكدات ...
رئبال : تلاقينا من جديد
ياسمين : نتا هو الي
رئبال : وي
ياسمين : " بابتسامة " كتبان مختالف بهاد اللبس
رئبال : كنرتاح فهادو أكثر
ياسمين : شنو كدير هنا ؟
رئبال : جيت نشوفك
ياسمين : هههه ... ياكما كنتي تابعني ؟
رئبال : ممكن
بغات تهضر و هي تشوف البنت الي كانت لداخل خرجات ... دارت عندو ...
رئبال : غير دخلي غادي نتسناك هنا
ياسمين : أوكي
دخلات حطات صاكها جنب المراية ... حلات باب الطواليت و هي تحس بشي حد من وراها ... ضارت لقاتو هو ...
ياسمين : " بتوثر " شفتك دخلتي لطواليت العيالات ... ماتمشيش غالط ... انا مرا مزوجة و عندي ولد يكون قدك ... داكشي الي و
قبل ما تكمل حط يدو الي فيها الليگات كحلين على فمها ... و حكمها من عنقها باليد لاخرى ... خرجات عنيها و بدا الخوف يسري معها ... خاصة فاش شافت النضرة الملتهبة فعنيه ... مشا داك البرود الي كان فرئبال ... دفعها لداخل و حاصرها مع الحيط ...
رئبال : كنت باغي نلعب معاك شوية قبل ماتموتي ... لكن ماقدرتش باقي نستحمل نشوفك كتنفسي ... الحاجة الأخيرة الي غتسمعي هي ... ولد رباب غادي ياخد حقها منك و من أمثالك
كيف كمل كلامو دورها حتا ولا ضهرها ملاصق مع صدرو ... كانت كتحاول تفك من قبضتو لكن ماقدراتش ... شافتو تحدر هز لغطاء ديال لشاص و هما يهبطو دموعها من الهلع ... شدها من شعرها و هبطها على ركابيها ... غطس ليها راسها فلاشاص و ورك ... بدات كتركل بيديها و رجليها ...
لكنو بقا مزير عليها بقوة ... بداو حركاتها كيتباءطو و يديها فشلو ... ثواني فقط قبل ما توقف على الحركة ... و يديها طاحو جنب مدليين ... طلق منها و دفع لباب ... وقف فالخارج كيشوف فيها ... حذاءها مليوح جنب و لاخر باقي فرجلها ... راسها مغطوس فالمرحاض ... انها تموت غارقة فماء المرحاض أقل ماتستاهل بالنسبة ليه ...
ابتاسم بجنب و هو راضي على المنضر الي كيشوف ... لاح القب على راسو حتا تغطا نصف فوجهو ... حل لباب كان المكان خالي ... سدو دار يديه فجيابو و تم خارج ... بقات الشارة الي علق فالبواني ديال لباب بأن الطواليت غير مشغل كتحرك يمين شمال ...
🍁 يتبع 🍁
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
