☠ السفاح العاشق ☠
🔥 بارت 43 🔥
توجهات جولان للمكتب الي دخلات ليه قبل ... بدات كتقلب ملقاتش المسؤولة ... رجعات خرجات و بقات غادة جاية ... شوية بانو ليها لكليان كيدخلو ... ماعرفات شنو دير ... فينما كان جاي عندها شي كليان كتضور راسها تشوف بعيد و لا تقلب الطريق ... بقات مقنتة فواحد الزاوية ...
و كتراقب شي مساعدات خدامين مع لكليان ... هي معطاوها حتا تعليمات سو ماعرفات كيف تصرف و لا شنو دير بالظبط ... و قررات تبقا بعيدة لا تزبلها من اليوم الأول ... حسات برجليها ضروها فالصباط ... واخة مكانش عالي لكن مع الوقفة ... ضروها صباعها فيه ... رجعات لفين غيرات حوايجها ...
هزات صاكها جبدات منو كونڤيرسة جابتها معها ... على حساب منين تكون راجعة للدار ... عرفات متقدرش تبقا بيه النهار كامل ... حيدات الصباط لقات رجليها حمرين و منفوخين ... و هادشي دوزات غير ساعتين ... بقات كتفكر فهادوك الي خدامين فهادشي ديما و طول اليوم ...
حنا كيبان لينا مكيديرو والو غير واقفين ... لكن الحاجة مكتعرف بحقها حتا كتجربها ... مسدات صباعها شوية و لبسات لكونڤيرسة لبيضة ... قررات تبقا چالسة فالمكتب حتا تجي المسؤولة و تسولها ... دازت شي خمس دقايق و هو يصوني لفيكس ... بان ليها فوق المكتب هزاتو و جاوبات ...
جولان : آلو شكون معيا ؟
........ : عجباتك الجلسة ... تبغي نسيفط ليك شي كاس ديال لعصير
جولان : ش شكون نتيااا ؟
........ : " بصوت مرتفع " فدوى المسؤوووولة ... و نوضي تهزي و نتي نشرتي رجليك
جولان : " كتلفت فجنابها " باش عرفتيني ناشرة رجليا ؟
فدوى : لكاااميرا ... و تقلعي طلعي عندي لهناااا
جولان : آه لكاميرا ههه ... فين نجي عندك ؟
فدوى : لفوووق ... طلعي و دوري على ليمن كاين باب المخزن تماك ... دخلي عاوني لبنات و ستفو الكراطن الي تماااك
جولان : آاه و واخة ... هاني جاية .. و واش
فدوى : " قطعات "
جولان : هادي مالها ... بغيت نسولها على نضاضري فين دارتهم ... و دغيا قطهات ليا فوجهي ... باينة غنعاني مع هاد لعقروشة
حطات التيليفون و هي تبتاسم فاش شافتهم فوق لمكتب ...
جولان : " هزاتهم " من قبيلة و نتوما هنا ... گاع مشفتكم
دارتهم و خرجات ... طلعات فالدرج كتزرب ... وصلات للطابق الثاني و تمات غادة ... حتا تفكرات بلي قالت ليها ضوري على ليمن ... قلبات الضورة و غادة كتقلب فين كاين هاد المخزن ...
چالس فوق الفوطوي ... متكطي بظهرو و داير رجل على رجل ... كان فمكان مخصص غير للزبناء ل VIP ... بيما انو جا استاغلو الفرصة و بغاوه ياخد من لبراند ... حينت لا لبس منها هو غتكون استفادة ليهم ... واقف بهاء جنبو ...
و لمساعدة هازة مجموعة من ربطات العنق كتعرضهم قدامو ... كان كيشوف جهتها حتا لمح من بعيد ... نفس لبنت الي كانت لتحت ... غادة و جاية ... لفت انتباهو شنو لابسة فرجليها مع الزي و النضارات الي دايرة ...
المساعدة : موسيو ... موسيو العثماني ... واش نجمعهم ليك ؟
رئبال : " شاف فيها " بهاء
بهاء : وي ميستر
رئبال : خود ليك شي وحدة ... ماشي هادو الألوان الي كتلبس
بهاء : آه
رئبال : " وقف " عنداك تنسا متخلص
تحرك رئبال و بقات المساعدة متبعا ليه العين ... خافت تكون زبلاتها و لا دارت شي تصرف ... لأنو مخدا حتا حاجة ... قرب عندها بهاء ...
بهاء : جمعي ليا هادو
المساعدة : " تنفسات الصعداء " اوكي موسيو
مشات كتجري قداتهم ليه و مدات ليه لبوشيطة و راسمة على وجها ابتسامة بلهاء ... بهاء بدورو رجل وسيم ... عندو 35 سنة و مهتم بمظهرو ... ديما لباسو أنيق و كلاص ... منظبط فالخدمة بشكل كبير و لهادا هو مساعد رئبال الشخصي ... إضافة لكونو مدير أعمال سنمار و إلياس ...
هاد الجوج استثناء ماشي كباقي الفنانين و عارضي الأزياء الي تحت آسم شركة رئبال ... لأنهم عندهم منادجرز مختالفين ... رئبال بنفسو عينو يهتم بجداويل اعمالهم و كلما كيخصهم ... برهن على إخلاصو و تفانيه فالعمل هاد السنوات ... و رجع شخص قريب من الدراري بثلاثة ... لكن تصرفاتو محسوبين مع رئبال و مكيتعداش حدودو ...
جمع التخنزيرة حينت بانت ليه تحلات ... مد ليها لكارط خلصات و رداتها ليه ... هبط و خرج من المتجر ... حل لباب طلع و شاف فرئبال الي جالس اللور ...
بهاء : فين ؟
رئبال : للشركة
ديمارا بهاء اللوطو و تحرك ... دور رئبال وجهو ناحية المتجر ... كيشوف فالطابق الثاني الي كولو زاج ... غير فاتوه دار نضاراتو و رجع راسو اللور ...
🍁 يتبع 🍁
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
