☠ السفاح العاشق ☠
🔥 بارت 96 🔥
الحاجة : آخر مرة نسمعك كتقولي هاد الهضرة ... يوقع الي وقع متفكريش تخلي والديك و تزيدي ... كانو غالطين وقفي فوجهم قنعيهم ... و لكن باش تهربي ... هادا جبن منك و ظلم فحقهم ... كيبقاو والديك و باغين غير مصلحتك
جولان : " تلفتات عند الحاج لقاتو حادر راسو و تحت عنيه كيبري " ماقصدتش ... سمحوليا
الحاجة : " حطات يدها على خد جولان " سمحيليا ابنتي ... مكانش عليا نمد عليك يدي
جولان : " عنقاتها " مانقدرش اجدة منقدرش ... بابا واخة صعيب عمرني فكرت يدير فيا هاكة
الجدة : غادي نقنعوه متخافيش
🍂🍂 في الصباح حلات جولان عنيها و ناضت ... توجهات للحمام غسلات وجها ... شافت عنيها منفوخين ... رجعات ليلة لبارح للدار و ماقدراتش تنعس ... حتا صبح الحال عاد سدات عنيها شوية ... استاعدات باش تمشي للخدمة ... احتمال كبير ان اليوم يكون آخر يوم ليها فالشركة ... لبسات عليها و هبطات ... خرجات بكري باش متلقاش مع باها ...
خدات طاكسي و فالدخلة تلاقات بزينب ... الي غير شافت جولان حسات بلي شي حاجة واقعة معها ... طلعات معها للمكتب مابغاتش تفارقها حتا تعرف شنو بيها ... دخلو لمكتب جولان و هي تمطر عليها زينب بالأسئلة ... عاودات ليها جولان كلشي ... چلسات زينب فوق الفوطوي و شافت فيها ...
زينب : ميمكنش يبزز عليك ... كتبقاي بنتو الوحيدة ... تلقايه غير كان معصب ... عطيه وقت و غيتراجع
جولان : بابا و عارفاه
زينب : و شكون هاد خينا الي باغي يزوجك بيه ؟
جولان : ولد صاحبو
زينب : آش هاد الخرا ... منين خرج حتا هو
جولان : مابغيتش يتجبد ليك الصداع بسبابي ... غير نزلي لبوست ديالك ازينب
زينب : " ناضت " فاستراحة الغدا غنطلع عندك ... خليك متفائلة
كيف خرجات زينب حطات جولان يدها تحت ذقنها ... كتفكر فشنو غادي دير ... متأملة ان باها يتراجع على قرارو منين يهضر معاه الحاج ... سمعات لفيكس كيصوني و هي تجاوب ... هزات داكشي الي طلب منها تجيبو و توجهات لمكتبو ... دقات و دخلات ...
جولان : " حطات الأوراق فوق المكتب "
رئبال هز عنيه شاف فيها ... بانت ليه حادرة راسها كتشوف فلرض .. نطق بصوتو الخشن ...
رئبال : غدا الإجتماع السنوي للكتاب و المؤلفين فالشركة ... ضروري تحضري ليه
جولان : " هزات راسها " أنا غنحضر ؟
رئبال : " كيشوف فيها و حس بيها شي حاجة " جات دعوة باسمك ... مابغاش تحضري ؟
جولان : لا ماشي هكاك " بحزن " بغيت
رئبال : الإجتماع غيكون فأوطيل ***** فلعشية ... غدا بلاما تجي للشركة توجهي لتماك مباشرة
جولان : أوكي ... شكرا موسيو
ضارت خارجة بغات تسد لباب و هي تشوف فجهة المكتب ... بان ليها رئبال كيشوف فيها و يدو على لحيتو ... سدات لباب و رجعات لمكتبها ... جمعات النفس و طلقاتها ... لو جا هادشي فضروف أخرى كانت غطير من الفرحة ... لكن هي مزال ماعرفات حتا مصيرها شنو ... واش غتكمل و لا لا ... واش غتقدر تحضر لهاد الإجتماع السنوي إلي حلمها تكون فيه مع الأشخاص الي كتعتابرهم قدوتها ...
فلعشية و هي راجعة للدار مكرهاتش تزيد تطوال الطريق و متوصلش ... يالاه هبطات من الطاكسي صونا ليها الفون ... كانت زينب جاوباتها ...
زينب : أمندرا ؟
جولان : مزال مادخلت
زينب : يكون خير ... غدا غتحضري للإجتماع ؟
جولان : مزال ماعرفتش
زينب : ضروري تحضري ... كيكون مرة فالعام اصاحبتي ... فخبارك كاينة حفلة أخرى فنفس الأوطيل ... ديال عيد زواج والدين إحدى العارضات الي خدامين فالشركة ... و صاحبتك معروضة ... واحد الصحافية صاحبتها عرضاتني ... قالو الحفلة حصرية و غيحضر ليها غير شكون و شكون
جولان : مزيان ... فوجي مع راسك
زينب : غنفوجو أنا وياك ... الإجتماع غيسالي بكري و غنجي نجرك ... فين غتجينا الفرصة نحضرو لحفلة بحال هادي ... و حفلة تنكرية مزال ... كنشوفو هادشي غا فالأفلام ... غدا نساو علينا كلشي و نفوجو بجوجات
جولان : حتا نشوف ... غنقطع وصلت للدار
زينب : Good luck ... Fighting 💪
جولان : Thank you
حلات جولان لباب و دخلات ... شافت جهة الصالة بان ليها باها جالس و من ملامحو باين معصب ... لمحها و هو ينوض ... مع وصل لعندها نزل عليها بصفعة حتا ضار وجها ... جات حفيضة كتجري وقفات قدامها و هزات عليه صبعها ...
حفيضة : آخر مرة تحط عليها يديك ... الناس كيتناقشو بالهداوة ... ماشي بالعصى
إبراهيم : عجبك داكشي الي دارت ... مشات تشكي على الجيران ... حتا جا الحاج كيصبن فيا ... هو مارباش حتا بنتو ... دارت الي قاليها راسها و هربات خلاتهم سيرة كل واحد فالحومة ... يجي يوريني كيف نتعامل مع بنتي
حفيضة : الراجل مقال حتا حاجة عيب ... علاش تجبد سيرة بنتو ... زعما كان بحال الأب ليك ... و تدخل غير من معزتو لجولان
إبراهيم : قراري مغاديش نتراجع عليه " شاف فجولان من ورا حفيضة " طلعي لبيتك و ماشي غا الخدمة حتا الخروج ممنوع ... باش نشوف هاد العناد ديالك فين غيوصل
شافت فيه حفيضة بخيبة أمل ... جرات بنتها و طلعو لفوق ... بغات تلمس الجرحة الي جنب فمها و هي تبعد جولان ...
جولان : بغيت نبقا بوحدي
سدات لباب و تكات عليه ... زيرات على شفايفها مانعة الدمعة تنزل ... شافت جهة المكتب و هي تمشي بسرعة ... هزات لبيسي و خبطاتو مع لرض بكل جهدها ...
🍁 توقعاتكم 🍁
أنت تقرأ
السفاح العاشق
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
