الكبيره ٢ بقلم / لولو_محمد

الحلقه الاولى

(((((( الكبيره ٢ ))))))
#لولو_محمد
الحلقه الاولى
فى اوضه نجاه 
  نجاه تتفزع تقعد على السرير تفوجئ بنفسها ايدها مربوطه فى عمود السرير تفضل تشدها ما تقدرش تبص على نفسها لابسه فستان قصير احمر تتخض و ترتبك تبص حواليها فى كاميرات فى السقف
صوت جوزيف / صح النوم  كل ده ايه مش واخد عليكي كدا
نجاه ما تردش و يبان عليها التعب تمسك دماغها
جوزيف / هيروح هيروح ما تقلقيش دا من المخدر عادى  ما تحطيش فى دماغك بقولك انتى ما كنتيش بتلبسي احمر كتير ليه دا لايق جدا مع الاندرتون بتاعتك انتوا الاتنين هوت
نجاه تحاول تقف رجليها ما تشيلها و تقع و ايدها لسه متعلقه فى السرير
جوزيف / ما قولتلك تاثير المخدر لسه ما راحش و بعدين مستعجله على ايه انتى موراكيش حاجه
نجاه / ما تيجي كدا توريني نفسك بدل ما انت مستخبى ورا الميكروفون كدا
جوزيف / برده برده ما بتتعلميش يا بنتى انا جبتك من وسط اهلك اثبتلك ازاى ان تحديكي ليا مش فى صالحك
نجاه تفضل تحاول تقوم و تقاوم و تقع تانى
جوزيف / شوفتى بقي انى جنتل مان و ما رضيتش اواجهك غير لما تفوقى خالص
نجاه/ اميره فين و عملت فيهآ ايه
جوزيف / اميره اه .. لا ما عملتش انتوا اللى عملتوا مش انا و بالمناسبه هى ما اسمهاش اميره اسمها امايا ... تقدرى تعتبريها اختى الصغيره
نجاه / انت كداب
نجاه تقوم تقف و تمسك فى عمود السرير و تفضل تشده ما تقدرش
جوزيف / ما تحاوليش انتى جامده اه بس دا حديد يا قلبي هتفرهدى نفسك على الفاضي ... صحيح مدى ايدك تحت المخده فى حاجه لازم تشوفيها
نجاه تبص للكاميره
نجاه / فين هدومى
جوزيف / اخر مره شوفتها كان جابر بيلمها من الشارع ... الصور اللى تحت المخده نسخه من الفيديو اللى راح لبابا ... هو لسه عايش للاسف بس ما تقلقيش الوضع ده مش هيطول كتير انا شغال على الموضوع ده
نجاه تبص للكاميرا و تمد ايدها تحت المخده تلاقى صور لوشها نايمه على صدر راجل حضنها تبص للكاميره و تصرخ
نجاه / يا ابن الكلب دا انا هقتلك انت و كل اللى ساعدك
نجاه تخبط ايدها المربوطه فى الحيطه ورا السرير
جوزيف / انا مقدر غضبك بس انا ما عملتش حاجه ما كناش متفقين عليها انتى عارفه كويس انى هعمل كدا
نجاه تفضل تخبط ايدها لحد ما ابهامها يتخلع من مكانه تبدا تخرج الكلبش من ايدها و هى بتتالم
جوزيف / انتى بتعملى ايه ... حقيقي واو
نجاه تعدل صابعها و ترجعه مكانه و هى بتتالم تروح ناحيه الباب تحاول تفتحه تلاقيه مقفول بالمفتاح تفضل تحاول تشد فيه مش بيفتح
جوزيف / يا بنتى مفيش فايده اهدى طريق الخروج الوحيد الباب ده و انا وراه و جدعنه منى مش هدخلك بفستانك الاحمر ده بس لو عاوزانى دا هيكون كرم اخلاق كبير منك اوى بصراحه كفايا تطلبى بس ما اوعدكيش انى هكون 
نجاه ترمى المرتبه فى الارض و تشد ملل السرير ترميها فى الارض و تشد السرير تحت الكاميرات
جوزيف / انتى بتعملى ايه
نجاه تطلع فوق السرير و تمسك مله و تخبط الكاميرات تكسرها
جوزيف / لو كسرتى الكاميره التانيه هضطر ادخل و انتى عارفه انى ما اتربتش هتزعلى
نجاه تكسر الكاميره التانيه
جوزيف / هخصم تمنهم من مصروفك على فكره
نجاه / مش قولت جاى انت فين بقي و لا مستنى تلم صحابك يساعدوك
صمت نجاه تاخد مله و تروح ناحيه الباب و تفضل واقفه وراه و جوزيف واقف وراه الناحيه التانيه و الصمت سيد الموقف
.............................
فى اسكندريه
رجاله الزنايته يسيطروا على الموقف و باقي الرجاله يحاولوا يرجعوا للانشات الزنايته ما يدوهمش فرصه و يقتلوهم لانش يتحرك فى البحر راجل يدخل شايل ار بى جاى يضرب اللانش يفجره فى وسط المايه
رجل ١ / الحكومه هتيجي فى اى وقت يا رجاله ما تسيبوش اى اثر
راجل ٢ يدخل يجرى
راجل ٢ / ما حدش يلمس حاجه ما حدش يلمس حاجه
رجل ١ / انت بتقول ايه يا فواز
فواز / الكبير ... الكبير يا عرفه الكبير تعيش انت و نايل بيقولك ما تحركوش حاجه
عرفه يرمى سلاحه و يجرى على السرايا يلاقي الشافعى راقد فى الارض سايح فى دمه يصرخ 
عرفه / خالى
عرفه يحاول يجرى على خاله زياد يمنعه
زياد / وحد الله وحد الله
راجل ٣  / لو فى حد مصاب مننا اللحقوه لو منهم ما تسموش عليه يلا يا رجاله
راجل ٤ / اى حد معاه سلاح مش مرخص يخفيه و يختفى هو كمان يلا مفيش وقت الحكومه جايه
زياد يجيله نوتفيكايشن على الموبايل
زياد / الحكومه على اول الطريق
الرجاله كلها تتحرك بسرعه تنفذ اللى اتقال
عرفه / ادارى انت يا زياد انت كمان انت ما ينفعش تخرج من السرايا و لا يتجاب اسمك فى اى حاجه
زياد يهز راسه و يلم حاجته من على الارض بسرعه و يدخل السرايا جرى
...........................
فى وسط البلد
مختار و محمد راقدين على الارض مش قادرين يتحركوا من الانفجار و بيتالموا رجاله تدخل و راجل عينه تيجي فى عين مختار مختار يبص على سلاحه منطور بعيد يبص فى عين اللى هيقتله و لسه التانى هيضربه بالنار صوت طلقه و الرجاله كلها يقعوا ميتين مختار يبص يلاقى مغاورى و الجوارحه سيطروا على الموقف
مغاورى / هو انا هفضل طول عمرى انقذكوا كدا
مغاورى يقوم مختار
مختار / هو انت هتفضل طول عمرك تيجي متأخر كدا تلم الفكه
الاتنين يضحكوا و محمد لسه راقد فى الارض و الوجع باين عليه مختار يروح يضربه فى رجله
مختار / ابقي قول ما شاء الله يا فقر كنت هتجيب اجلنا
محمد يتالم
محمد / بالراحه بالراحه مش قادر و الله ما قادر جسمى كله واجعنى و مش قادر اتحرك
مختار ينزل على رجليه
مختار / فين بالظبط بيوجعك
محمد / كلى كلى مش قادر
مختار / تمام ما تتحركش اهدى خالص و هننقلك المستشفي نطمن عليك هناك
محمد يهز راسه
محمد / شاكر فين
مختار ينتبه و يبص لمغاورى و الاتنين يبصوا حواليهم
.................
فى تركيا
صابر بيتكلم فى التليفون فى جنب و ملامحه باين عليها الضيق و الغضب عمران يروحله مهره تاخد بالها و تتابعهم من بعيد
صابر / و انت مستنى اذنى انك تدخل انا مش عايز واحد من ولاد الكلب دول يطلع منها عايش انت فاهم و لا لا
عمران / فى ايه ... حاجه حصلت ؟
صابر / هجموا على البلد
عمران بصوت عالى / ايه !!!
صابر / اهدى هتفضحنا
مهره تجرى عليهم اكرم يجرى وراها
مهره / فى اخبار حد قالكوا حاجه طلبوا الفديه
صابر / يا ريت ما حدش عبرنا دول البلد عندنا
اكرم / الله يعينهم طبعا هيتجننوا
صابر / فوق ما تتخيلوا ... هم هيفضلوا محنطينكوا هنا كتير
مهره / انا مش هقدر اسيبكوا ابدا
اكرم / اعتقد ان المسابقه كلها هتتلغى و كل بلد هتسحب الوفد بتاعها
مهره / بس احنا مستحيل نرجع ناقصين عشان خاطرى مش هقدر اروح الا اما اطمن عليها
اكرم / انا ما اعترضتش بس احنا ضيوف هنا لو قالولنا امشوا
عمران / لو دا حصل انا هتابع اكرم بيه باى جديد ما تقلقيش
اكرم / كدا كدا يا قلبي وجودنا مش هيعملها اى حاجه احنا لا شوفنا حاجه و لا نعرف حاجه بالعكس وجودك خطر عليكي ما حدش عارف كان ممكن تكونى مكانها
مهره / بالظبط بالظبط انا كنت واقفه مكانها قبلها بثانيه كنت مكانها بالظبط
اكرم / لا حول و لا قوه الا بالله ... انا للاسف عازرك
مهره / لو معطلاك ارجع و انا هرجع مع باقي الفريق
اكرم / بطلى هبل انا عمرى ما اسيبك ابدا و كمان فى بلد غريب ليه لقيكي فى الشارع اهدى بس و ان شاء الله هنلاقيها اهدى
مهره تهز راسها و عمران كل شويه يبص لصابر صابر هادى و عمران مش على بعضه
.....................
قدام الشركه
دياب  واقع على وشه ما بيتحركش منصور يخرج من الشركه و فى ايده رشاش يموت كل اللى واقفين و يجرى على اخوه يقلبه يلاقيه مش قادر يشق قميصه لابس تحتيه قميص واقى
منصور / امال مستموتلنا ليه يا جزمه نشفت دمى
دياب / ااااه صدرى اطبق مش قادر اخد نفسي
منصور / طب قوم معايا ساعدنى ادخلك جوه احنا كدا مكشوفين عربيه شاهين تدخل و ينزل منها يشد دياب مع منصور على العربيه
شاهين / خير انصاب و لا ايه
دياب ما يرضاش يركب
دياب / وفاء وفاء فى الشركه هرجع الشركه انا كويس انا هرجع الشركه
شاهين يسند دياب يدخلوا وفاء واقفه ورا الباب
منصور/ ايه اللى نزلك من فوق
وفاء/ انت كويس؟
دياب / كويس كويس ما تقلقيش انا تمام ... الدنيا هديت مش سامع ضرب نار و لا اى فرقعه
شاهين / جيبنا بوزهم فى الارض يا ابن عمتى و دلوقت بنعد فى الجثث
دياب / وفاء ... اطلعى اطمنى على الناس بتوع تركيا لحد ما نطلع وراكى دقيقه بس اخد نفسي
وفاء تطلع تجرى و دياب يفك القميص الواقى مكان الطلقه معلم فى صدره
منصور / دا احسن خامه فى السوق ازاى خرمته كدا
دياب / ما عشان احسن خامه أنا لسه عايش غير كدا كان زمان الطلقه خرمتنى انا شخصيا و عدت من الناحيه التانيه
شاهين / تف من بقك الحمد لله قدر و لطف
منصور / خليك جنبه يا شاهين ... هطلع اشغل السيستم تانى و اطمن على باقي الجماعه
شاهين / ما تقلقش انا جنبه
منصور يطلع يجرى
شاهين / اجيبلك مايه و لا حاجه
دياب يهز راسه لا بتعب
............................
على اول البلد
الناس تطلع تجرى تساعد اللى واقعين على الارض يلاقوا  شاكر و امين ما بيتحركوش واحد يجس نبض امين و يزعق
الراجل / اسعاف هنا بسرعه ... حج امين ... حج امين ... يا جدعان بسرعه الراجل هيروح مننا
اتنين رجاله يدخلوا يجروا
راجل ١ / انت لسه هتستني الاسعاف شيل معايا يا جدع اسند قبالى
الاتنين رجاله يسندوا امين و يسحبوه الراجل التالت يروح يجس شاكر
..........................
فى شقه جابر   
جابر مربوط فى كرسي و بيصرخ  فى الراجل  قدامه بيتكلم فى التليفون
جابر / فكنى بقي خلى عندك دم فكنى
الراجل يقفل المكالمه و يروح يفك جابر
الراجل / سي صابر بيقولك انهم هجموا على البلد هجمه جامده اوى و فى اصابات ياما دا غير اللى راحوا و الكبير فى المستشفي
جابر يقف مصدوم
الراجل / بيقولك لو شايف ان ده وقت مناسب تقتل نفسك فبكيفك بس لو مكانك تروح تحط ايدك فى ايده و تاخدوا تاركوا
الراجل يحط مسدس فى ايد جابر
الراجل / كدا كدا الساعه خلصت
جابر يبص على المسدس و دمعه تنزل من عينه يمسحها
الراجل/ هم لسه فى النادى بيحققوا معاهم اكيد هيحتاجوا اقوالك فكر هتقولهم ايه و كنت فين طول الساعه اللى فاتت
جابر يهز رأسه
.....................
فى المستشفي
عباده  يجى يخرج من المستشفي يبص علي كميه الناس المحمين فى المستشفي و الاصابات اللى حواليه خطوته تبطئ يشوف عربيه اسعاف داخله و ينزل منها بسرعه المسعفين و على الترولى طفل صغير و امه بتجرى جنبه و هى منهاره الدكاتره تطلع تجرى تستقبل الحاله عربيه الاسعاف يركب فيها اتنين تانين و تجرى راجل يدخل يجرى
الراجل / ما شوفتش ابنى يا كبير
عباده / ما شوفتوش لا
الراجل يدخل يجرى و عباده واقف مكانه مصدوم من المنظر و مش قادر يفكر سلاحه يقع من ايده بنت صغيره قاعده على حجر امها اللى منهاره من العياط و تعدد تسيب امها و تجرى تشيل المسدس و تحطه فى ايد عباده عباده يبصلها
البنت / امسك يا كبير سلاحك وقع منك
عباده يبص للسلاح و يبص للبنت و يبص للست و يوطى على البنت
عباده / خليكي فى حضن امك يا حبيبتي ما تفارقيهاش
البنت تهز راسها و تجرى تحضن امها
غفير يدخل بيجرى يدى موبايل لعباده
الغفير / ايوه قدامى اهو ثانيه واحده ... اتفضل يا كبير سي مختار بيطمن عليك
مختار / كويس انك فوقت انت لسه فى المستشفي صح محتاجين نجمع صفوفنا تانى وقع مننا ياما انا راكب الاسعاف و جايلك ما تقلقش فارس و كارم بخير انا اطمنت عليهم بنفسي
عباده / و شاكر و محمد
مختار / ان شاء الله يبقوا بخير خليك عندك و ساعد الناس على قد ما تقدر على ما اجى
عربيه اسعاف توصل عباده يدى الموبايل للغفير و يجرى يساعد فى نقل الحاله لجوه
..........................
فى اوضه نجاه
نجاه واقفه ورا الباب و جوزيف واقف الناحيه التانيه ماسك كاميره حراريه و محدد مكانها بالظبط
جوزيف / التكنولوجيا دى غيرت العالم ... شوفى انا بيني و بينك ايه و مع كدا شايفك ... مش هتقدرى تفضلى واقفه متخشبه كدا كتير اكيد هتتحركى
نجاه / هتفضل قافل عليا لحد امتى يعني انا مورايش حاجه
جوزيف / اكيد هتجوعى او تعطشي او تحتاجى الحمام
نجاه / و ان حصل هيفرق فى ايه
جوزيف / متاكده؟
نجاه / و ان فتحت الباب و لا سبته هتفرق فى ايه برده .. انت بس بتاخر معاد موتك للوقت اللى مكتوبلك مش اكتر
جوزيف / كلنا هنموت يا قلبي الموت مش حاجه وحشه فى حاجات اوحش بكتير
نجاه / افتح الباب و انا اوريهالك
جوزيف / بفستانك الاحمر انا كدا هشوفك
نجاه / مش هتفرق ما انا كدا كدا هخزقهالك قبل ما اقتلك
جوزيف / و ان ما قدرتيش ... انا عاوز اعترفلك بحاجه ... الصور دى عشان خاطر ابوكى و جابر مش اكتر و الكام واحد بتوع السيرفر انما انتى لسه شريفه زى ما انتى
نجاه / الشرف مش بنقطه دم يا اهبل الشرف دا حاجه انت ما تعرفهاش و لا سمعت عنها فلا انت و لا الاطخن منك هتقدروا تاخدوها منى
جوزيف / برده بتستفزينى ادخل اثبتلك إنك غبيه و حماره... انا بقولك كدا لسببين
نجاه / مش فارق معايا اعرف .. افتح الباب
جوزيف / الاول انى اثبتلك انى باقي عليكي و بحترمك و مش عاوز اعمل حاجه غصب عنك او اجبرك على حاجه
نجاه / اهرى مع نفسك بقي ... انت عبيط ما انت حابسني اهو يعني  جابرنى
جوزيف / التانى انك تعرفى ان معادلكيش مكان تروحيله تانى
نجاه / عندى لو فاكر انهم هيتخلوا عنى غلطان انت بس اديتهم مبرر اقوى انهم يتجمعوا و يقتلوك
جوزيف / الباقي منهم
صمت
جوزيف / انا اقدر انسف اللى باقي منهم بصاروخ ناحيه المستشفي اصل انا بعتلهم كام هديه كدا و قاموا بالواجب معاهم ابوكى نفسه كان راقد مش عارف متمسك بالدنيا ليه قولتله موت نفسك و انا ارجعها لا هو و لا جابر رضيو عشان تعرفى انهم مش بيحبوكى قدى
نجاه تروح تجيب الملل و تحط مله على جنب السرير و تحط فوقيها باقي الملل و تروح الناحيه التانيه تنط عليها المله تتكسر نجاه تاخد المله المكسوره و تروح تخبط الباب بالناحيه المدببه
جوزيف / دا باب مصفح كل اللى بتعمليه انك بتفرهدى نفسك
نجاه / افتح الزفت ده بقولك
جوزيف / طب قولى بليز
نجاه / بليز افتح يلا
جوزيف / واو حقيقي واو دا انتى مستبيعه انتى حتى ما تعرفيش كام واحد ورا الباب ما تعرفيش نوع السلاح اللى معانا انتى ما عكيش غير فستانك ... صحيح ايه رايك فيه زوقى على فكره
نجاه تخبط الباب تانى بكل قوتها
نجاه / دا انت مستفز ابن كلب افتح
نجاه تروح تقعد بعيد فى ركن و هى بتغلى و تفرك
....................
فى النادى فى تركيا
الكل قاعد و صابر بيكلم المترجم اللى بيترجم للشرطه
صابر / احنا بقالنا كتير قاعدين لو خلصوا التحقيق نقدر على الاقل نرجع الفندق احنا معانا حريم و خايفين يدخلوا الحمام حتى بعد اللى حصل
المترجم / Çok bekledik, soruşturma biterse en azından otele dönebiliriz, haremimiz var ve olanlardan sonra bile tuvalete gitmeye korkuyor.
الظابط / Özür dilerim ama oradaki işlemleri tamamlamak için karakola gitmemiz gerekiyor, sonra otele ya da istediğiniz yere gidebilirsiniz.
المترجم / بيعتزرلك بيقول هنروح القسم الاول نكمل الاجراءات بعدها روح مكان ما تحب فندق او غيره
صابر يهز راسه و يرجع لمهره
صابر / هنروح القسم و بعدين نرجع الفندق
اكرم / دلوقت و لا لسه شويه
تليفون صابر يرن جابر
صابر / ثوانى دا جابر ... السلام عليكم انت فين
جابر / فى القسم جيت على هنا على طول
صابر / قولتلهم ايه
جابر / قولتلهم انى مشيت ورا العربيه لحد ما راحت فى الزحمه و اديتهم مواصفات العربيات و ارقامهم
صابر / و انت عامل ايه
جابر / الظابط بيقول هتيجوا على هنا و منعنى اجيلكوا
صابر / خليك احنا كدا كدا جينلك
جابر / حد شاف همام
صابر / لا و ما بيردش على تليفونى بس ما اعتقدش انه رجع هو هنا لسه
جابر / بس اكيد عرف ان ابوه مات ممكن يكون رجع
صابر / هنعرف هنعرف كل حاجه اكيد اهدى انت بس لحد ما نجيلك
صابر يقفل
مهره / فى جديد
صابر / جابر فى القسم ما عرفش يحصلهم راح بلغ بنمره العربيه و الحكومه تتصرف بقي
اكرم / الحمد لله انه بخير ادينا على الاقل اطمنا على واحد
مهره تروح تقعد جنب عمران
مهره / هو انتوا ليكوا اعداء فى اى حته يعني هم ما طلبوش فيديه صح ؟؟ دلوقت ممكن يكون فى سبب تانى ؟ خصوصا اللى فهمته انها اخدت طلقه فى ضهرها قبل كدا
عمران / كانت حادثه
مهره / انا اسفه انا كنت بحاول بس افكر معاك بصوت عالى
عمران / انا حقيقي اسف بس انا اللى مش قادر افكر و لا اتكلم و لا اتعامل مع اى حد حتى ارجوكى سامحيني
مهره / مقدره... عن اذنك
مهره تيجي تقوم
عمران / مهره انا اسف ... ارجوكي ما تزعليش منى
مهره / ربنا يرجعها بالسلامه انا عمرى ما هزعل من اى رد فعل منكوا ربنا يعينكوا على اللى انتوا فيه ... كلكوا .. عن اذنك
مهره تروح تقف جنب اكرم و عمران متابعهم يتنهد و يبص فى الارض
.......................
فى المستشفي
ناصر يدخل بيجرى يشوف عبد الله بيتكلم مع دكتور فى ملف ناصر يجرى عليه
ناصر / شاكر فى انهى اوضه شاكر عامل ايه انا عاوز اروحله
عبد الله / اهدى اهدى شاكر كويس ارتجاج بسيط و هيبقي زى الفل باذن الله
ناصر / و محمد
عبد الله / عنده شويه كدمات غير كدا زى القرد اوضه ربعميه و سبعه اطلعلهم
ناصر يجرى و يرجع تانى
ناصر / و ابويا و عمى عباده و عمى امين عاملين ايه
عبد الله / عباده و مختار ما فيهمش حاجه و بيلفوا على الناس يشوفوا اللى ناقصهم و امين للاسف حصله نزيف بس باذن الله هيبقى كويس امشي بقي انا مش فاضيلك
ناصر / انا اسف
ناصر يمشي ممرضه تدخل بتجرى
الممرضه/ اللحقنا يا دكتور عبد الله
عبد الله / خير
الممرضه / الاستاذ بدر نواس  حصلتله مضاعفات و بيعملوله دى سي شوك
عبد الله / ازاى دا كانت حالته مستقره ازاى
عبد الله يجرى و الممرضه تجرى وراه
...........................
فى سرايا الزنايته
رحمه / طب سيبونى اروح اشوفه ان شالله اموت حتى
هند / اتهدى فى جنبك مش ناقصينك
رحمه تروح تعيط فى جنب
خديجه / احنا هنفضل حاطين ايدينا على خدنا كدا و قاعدين مستنين الأخبار هنفضل قاعدين كدا و خلاص
فاطمه / كدا احسن للكل يا خديجه
خديجه/ احسن ليكوا مش ليا احسن ليكوا انتوا
فاتن تمسك ايد خديجه
فاتن / هترجع يا خديجه ما تخافيش مش هيرجعوا من غيرها عمرهم ما هيرجعوا من غيرها
خديجه / يبقي عمرهم ما هيرجعوا
فاطمه / تفى من بقك راجعه باذن الله راجعه دا ايه الهم ده ... رحمه طلعيني اوضتى ... راجعه باذنك يا رب راجعه
فاطمه تقوم رحمه تسندها و هى بتعيط و تمسح دموعها
فاطمه / بتعيطي على ايه انتى كمان انتى مش كلمتيه و طمنك انه زى الفل ما تهدى احنا اللى فينا مكفينا
هند تمسك ايد خديجه التانيه
هند / نجاه مش هتروح بلاش كدا اذا كنت انا رجعت هى بقي هتعمل فيهم ايه
خديجه تبص لهند
هند / هترجع ما تخافيش هترجع باذن الله هترجع
هند الدموع تنزل منها غصب عنها خديجه تعيط فى صمت
خديجه / لا اله الا انت سبحانك انى كنت من الظالمين لا اله الا انت سبحانك انى كنت من الظالمين يارب زى ما خرجت يونس من بطن الحوت ردلى بنتى سالمه غانمه مرفوعه الراس يا رب لا اله الا انت سبحانك انى كنت من الظالمين لا اله الا انت سبحانك انى كنت من الظالمين لا اله الا انت سبحانك انى كنت من الظالمين
هند / لا اله الا انت سبحانك انى كنت من الظالمين
فاتن / لا اله الا انت سبحانك انى كنت من الظالمين
خديجه/ لا اله إلا انت انى كنت من الظالمين
............................
فى اوضه نجاه
نجاه قاعده فى الركن بتنفخ و جوزيف قاعد على كرسي بيتفرج على الشاشه و الخيال الحرارى لنجاه قاعد قدامه
نجاه / ماشي ... انت تكسب واحد صفر ليك اخرتها ايه بقي
جوزيف / واحد صفر بس
نجاه / مليون صفر ايه اللى هيحصل بعد كدا ما انت قولتها مسيرى اجوع هتموتنى من الجوع يعني انت عملت كل ده عشان اموت من الجوع فى الاخر انت عاوزنى عايشه صح
جوزيف يقوم يروح ناحيه الباب و يقعد فى الارض و يسند ضهره على الباب
جوزيف / كدا نتكلم ... انتى هنا ليه بس قبل ما اقولك اسمحيلى استعرض انا عملت ايه عشان اجيبك هنا
نجاه / مش عاوزه اعرف انا هنا خلاص خلينا ننجز انا زهقت ايه دى طريقه تعذيب جديده تقتلوا المخطوف بالملل
جوزيف / من فضلك قدرى المجهود دا سنين من عمرى ما بعملش حاجه غير انى اخططلك و اصبر و ارتب انتى لو عرفتى انا كنت جواكوا ازاى و قدرت اعمل ايه نظرتك للدنيا كلها هتتغير
نجاه / اميره
جوزيف / امايا
نجاه / كل ده كان كدب كل ده تمثيل
جوزيف / امايا حاشت عنك كتير هى بتحبك بجد و دى نقطه ضعفها الوحيده
نجاه / انا مضايقه من انى بكلم نفسي كدا ما تفتح الباب و تخلينا نتكلم وش لوش هى فين
جوزيف / مش هفتح الباب دلوقت انا عاوزك عايشه و انتى مستحيل تستسلمى بالسهوله دى
نجاه / وعد هسمعك افتح الباب
جوزيف / احلفى
نجاه / و الله
جوزيف / ههههههههههههه و الله ايه
نجاه / ما تفتح بقي ضيقت خلقى ... طب انا عاوزه اروح الحمام
جوزيف / اعمليها فى اى مكان الاوضه واسعه و انتى كسرتى الكاميرات
نجاه / ليه حابس كلبه ما تحترم نفسك بقي
جوزيف/ كويس ان ميمو مش هنا كانت زعلت منك اوى و لا لا كانت هتعديلك صحيح الخطه ما كانتش انى اتصور معاكى بنفسي بس هى منعت اى حد تانى يقربلك
نجاه / ههههههههههه و يا ترى دا ما اوحالاكش باى حاجه 
جوزيف / انها بتثق فيا انى مش هاذيكي و لا استغلك
نجاه / يعني مش انها مش شيفاك راجل تؤ تؤ بتثق فيك تمام تمام
صمت
نجاه / اخبار الواوا ايه خفت و لا لسه
جوزيف يبتسم
نجاه / ما تفتح اعملك واحده تانيه
جوزيف / بايه ؟
نجاه / ياما فى الجراب يا حاوى افتح و اوعدك هبهرك
جوزيف / صدقيني الباب ده محطوط لمصلحتك انتى
نجاه / طب هعمل معاك اتفاق وعد والله هنفذ وعدى
جوزيف / سامعك
نجاه / افتح و ادخل و خليهم يقفلوا الباب وراهم خلينا انا و انت لوحدنا كدا و نشوف الدنيا هتودينا لفين
جوزيف / انا و انتى و الشيطان تالتنا
نجاه / و فستانى الاحمر القصير اللى انت نقيته على زوقك
جوزيف / اووووف طب ارفض العرض ده ازاى دلوقت
نجاه / انا بعيد عن الباب افتح و ادخل
جوزيف / موافق
جوزيف يقوم يقف و يمسك اوكره الباب بايده و نجاه عينها على الاوكره من جوه تقوم تقف و ملامحها كلها جد و تحدى
.......................