الكبيره ٢ بقلم / لولو_محمد

الحلقه ١١٤

((((((( الكبيره ٢ ))))))
#لولو_محمد
الحلقه ١١٤
فى اللجنه عند عمران
ظابط و اتنين عساكر يدخلوا
الظابط / عمران مختار الزيني فى اللجنه دى
عمران يحط القلم و ياخد نفس و ينفخ و يقوم يقف
الظابط / اتفضل معانا
عمران / عيني حاضر
عمران يروح معاهم و المراقب ياخد الورقه عمران و هو ماشي يشوف على مصدوم عمران يبتسم و يكمل مشي
.................................
فى فيلا كارمن
حاتم / اه طبعا روحت له البيت و اتكلمت مع والدته ... بصراحه ست محترمه جدا ... و شرحت لهم الموقف و نهينا الموضوع الحمد لله
كارمن / انا قولت انه مجرد سوء تفاهم و هيعدى
حاتم / هو ما كانش فى حتى سوء تفاهم منهم لله بقي الناس الفاضيه اللى ما وراهاش غير اللت و العجن و تأليف الحوارات ... صحيح بابا اتكلم مع اونكل على النهرده بخصوص موضوعى  انا و مهره
مهره تنتبه
حاتم / اكيد مش هنتعدى الأصول دا برده ابو العروسه و لازم  يحضر الاتفاق من أوله و يبقي فى الصوره و لا ايه يا مهره
مهره تبص لكارمن و ترجع تبص لاخواتها
كارمن/ و قالك ايه بقي
حاتم / ما قالش حاجه طلب بس انى احطها فى عنيا و دى اكيد مش محتاجه وصايه
صوفيا / طبعا دا انت هتاخد الغاليه بتاعتنا
مهره تبتسم بمجامله و تسيب المكان و تمشي
كارمن / شوفوا اتكسفت ازاى
كارمن تضحك
حاتم / احنا عاوزين ننجز فى الموضوع ده انا مش هفضل فى مصر كتير و مش بحب بقي العلاقات اللى بتبقي عن بعد دى مش بقتنع بيها بصراحه
كارمن / قولى بس الاول انت بجد عملت ايه عند عمران و ما تقولش بقي الكلمتين الحلوين اللى قولتهم قدام مهره انا مش غريبه عنك انا عرفاك كويس
حاتم / هو زى ما قولت لحضرتك اتكلمنا بكل زوق و احترام و مشيت
كارمن/ حاتم !!
حاتم / فى ايه يا طنط هو انا معقول هروح اتخانق مع الناس فى بيتهم برده انا بفهم فى الأصول
صوفيا / امال اتخانقت معاه بره
كارمن / صوفيا
صوفيا / عن اذنكوا
صوفيا تقوم تجرى على جوه
بياتريس / ما كانش المفروض تتكلمي قدامها على فكره
حاتم / ايه ده هو فى حاجه و لا ايه
كارمن / ابدا طبعا ايه الكلام ده ... بس انت عارفها حساسه قد ايه و هو برده وقف جنبى لما تعبت و تعب معايا جامد
حاتم / لا كدا بقي اخليهم يخفوا عليه شويه عشان خاطرها
بياتريس بحماس و فضول / ليه و انت كنت عملت ايه
حاتم يبتسم و يتعدل فى كرسيه
حاتم / قرصه ودن صغيره
........................
فى شقه عمران
هند / كنت عارفه و عشان كدا منعتك امبارح تعمل اى حاجه عشان هو ده اللى كان عاوزه من الاول
عمران/ و عمله يعني سكوتى كان زى عدمه
تليفون عمران يرن
عمران / دا بابا ... السلام عليكم  ... لا انا تمام ما حصلش حاجه ... ايوه ما انا عارف كان فاضل اخر سؤال بس ... لا مش مضايق قدر الله و ما شاء فعل ما كنتش ناوى ابقي معيد يعني و أفضل هنا ... اهى شهاده و لا اكتر
هند / هى ايه اللى شهاده و لا اكتر هات التليفون ده
هند تاخد الموبايل
هند / ايوه يا مختار  ... هو ده اللى ما تخافيش و كله تحت السيطره برده الواد يتسحب من وسط الامتحان كدا ... هو ايه اللى ما اقلقش ... مختار ... لا طبعا بثق فيك بس الواد ده حاطت ابنى فى دماغه ... ماشي يا مختار ... ماشي ... حاضر ... حاضر و الله ما تقلقش... فى حفظ الله
هند تقفل و ترجع الموبايل لعمران
هند / اما نشوف اخرتها فاضل ماده انا داخله اغرف لك
عمران يبتسم هند تتنهد و تروح المطبخ
.......................
فى اوضه صوفيا
بياتريس تدخل تلاقى صوفيا قاعده واخده جنب و مضايقه
بياتريس / يا كيوتى
صوفيا / مش نقصاكى على فكره
بياتريس/ كدا !! و انا اللى كنت جايه اطمنك على حبيب القلب
صوفيا تتعدل
بياتريس / ما تخافيش عليه زى القرد نقص بس كام درجه فى الامتحان النهرده آخرهم ينزلوا التقدير بتاعه شويه بس هينجح و يعدى
صوفيا / الحمد لله
بياتريس / المهم بقي يتلم و ما يلعبش مع الاسد تانى مع انى بصراحه مش هكدب عليكي هموت على راوند تو اوى
صوفيا / عمران ما عملش حاجه تمام هى اللى  راميه نفسها عليه و عايشه فى دور المسكينه الخرسه اللى علاطول محتاجه حد ينقذها و يساعدها اووووف عليها امتى نخلص بقي
بياتريس / انا بالنسبالى هى مش فارقه معايا كل اللى يهمنى مامى مبسوطه و الشركه فى ايدي انما انتى بقي كرهك ليها نفسي أفهمه
صوفيا / انا ما بكرههاش بالعكس انا حاولت ابقي اخت ليها و صاحبتها بس هى كدا تربيه شوارع و هتفضل كدا طول عمرها طماعه و عاوزه تاخد كل حاجه لنفسها
بياتريس/ و هى شاطره فى ده بصراحه
صوفيا/ انتى بتقولى ايه
بياتريس / دخلت البيت هنا و فى مفيش بابا كان حرفيا متفرغ لها و بيحبها اكتر مننا و ادبست فى حوار .. عمران رمى نفسه تحت رجليها عشان يخرجها منه دا حتى حاتم شركس ... قاعدتين تلاته و قرر يخليها مسيز شركس ... مع انى كنت فاكره ان كبيره يصاحبها يومين تلاته و يرميها زى غيرها بس واضح ان ليها اسلوبها
صوفيا / تعرفى تطلعى بره
بياتريس / اه ... انا هروح لمهره اقول لها على اللى حاتم عمله
صوفيا / انتى اتجننتي ما هى اكيد هتقوله و ساعتها هيمسكوا فى بعض
بياتريس / ما هو اكيد كان هيعرف
صوفيا / بس تكون اخر ماده عدت
بياتريس / و انتى فاكره ان حاتم هيسكت على كدا بجد زى ما قال انتى طيبه اوى
صوفيا / انا هتكلم معاه و هينهى اللعبه دى دلوقت
بياتريس / جود لاك
بياتريس تطلع بره
.....................
فى اوضه مهره
مهره بتكلم عمران فيديو كول بلغه الاشاره
عمران / ما اكيد كان لازم يبقي ليه رد فعل مش هيسكت يعني
مهره / بس ماما بتدافع عنه جدا و بتقول ان كل الكلام ده كدب و انها عرفاه من و هو صغير و انه مش كدا خالص
عمران / بتحبيه ؟
مهره / مش كل حاجه حب
عمران / مفيش جواز من غير حب
مهره / ماما و بابا حبوا بعض كانت ايه النتيجه
عمران / ما حصلش لو كانوا حبوا بعض كانوا حبوكى
عمران يبص الناحيه التانيه و يرجع يبص لها
عمران / انا اسف ما قصدتش كدا انا اقصد كانوا اتمسكوا ببعض اكتر ... مهره انا عاوز اتكلم معاكى فى حاجه كنت ماجلها لانى كنت حاسس ان التوقيت مش مناسب بس انا الظروف واضح انها ضدى و مع ان املى فى ربنا كبير بس حاسس ان ... مش عارف ... مهره انا
مهره تقفل المكالمه و ترتبك عمران يتصل تانى مهره تكنسل توصلها رساله واتس تفتحها
عمران / انا بحبك و هاجى انا و ماما نتكلم مع مامتك باذن الله
مهره مش عارفه تفرح و لا تزعل و ايديها بترتعش و عنيها مليانه دموع توصلها رساله تانيه
عمران / كل ما كنت أحاول اكلمك فى الموضوع أو اقرر اخد خطوه كان يحصل حاجه
توصل  رساله تانيه
عمران / كنت عاوز اتقدم و انتى واقفه على رجلك 
مهره تبتسم توصل رساله
عمران / خدى وقتك فى التفكير و صلى استخاره و اى كان قرارك انا هحترمه و هفضل جنبك لو احتاجتى اى حاجه فى اى وقت ... فى حفظ الله
مهره تاخد الموبايل فى حضنها و ما تعلقش و تقوم تجرى على اوضه كارمن
.........................
فى جنينه الزنايته
جابر بيركن العربيه و ينزل منها و باين عليه الارهاق يقابل قاسم
قاسم / ايه يا عم مالك جاى منين كدا
جابر / الشمس النهرده جباره ربنا قنا نار جهنم مش ممكن اتشويت
قاسم/ اجمد كدا امال
جابر / هستاذنك ادخل اغير و اخد دش فى السريع لحسن الهدمه نتنت عليا من العرق
قاسم / بقولك يا جابر كنت عاوز منك حاجه كدا لو مش هتقل عليك
جابر / و لا تتقل براحتك يا ابن عمى اؤمر
قاسم/ كنت عاوز رقم احلام اختك يعني اتكلم معاها و كدا
جابر ملامحه تقلب و لسه هيفقد اعصابه
جابر / ايه !! اااه اه اسف معلش للحظه نسيت انك خطيبها تمام حاضر هبعتهولك حاضر
قاسم/ لا دا انت الشمس عملت معاك الصح
جابر / و الغلط اقسم بالله
قاسم / طب روح يلا ارتاح لك شويه
جابر / تسلم و الله عن اذنك
جابر اول ما يدخل البيت قبل ما يقفل الباب يسمع صوت نجاه
نجاه / جابر
جابر يفتح الباب و يسند عليه
نجاه / عاوزه انزل مصر
جابر / هو مش الكبير قال لا
نجاه / لازم انزل يا جابر شوفت عملوا ايه فى عمران
جابر / و هو عمران مستنيكى يعني يا نجاه اهدى يا ماما
نجاه / يعني مش هتيجي معايا دا آخر كلام عندك
جابر / الكبير قال لا
نجاه / لو جيت معايا هيغير رايه
جابر / و السيرك اللى هيفتح و الإنفاق ايه يا نجاه
نجاه / و عمران و مهره
جابر / خالى سافر هو و يونس و معاهم رجاله ما تقلقيش
نجاه / شكرا
جابر / العفو
نجاه / خليك فاكر
جابر يبتسم و هو مش قادر
جابر / اقسم بالله ما قادر اقف
نجاه/ ليه مالك سلامتك
جابر / ضغط شغل ادعيلي اللحق أنجز
نجاه / باذن الله هتلحق انا متاكده ... اقدر اساعدك فى حاجه ؟
جابر / لقمه حلوه من ايديكى لو مش هضايقك
نجاه / حالا على ما تغير اكون جبتهالك
جابر/ تسلمى
نجاه تهز راسها و تمشي جابر يدخل و يقفل الباب
......................
فى اوضه كارمن
كارمن / ازاى تجرؤي ازاى
مهره تيجي تكتب
كارمن / هو مش كفايا اللى حصل مش كفايا كل اللى حصل ... عمران ده تقطعي معاه حالا فاهمه و لا لا
مهره تبص لكارمن بحزن
كارمن / انا مش قادره أصدق بجد مش قادره اصدق ... دى جت و قالت لك و انتى اكدتى لها أن ما فيش بينكوا اى حاجه انتى شجعتيها
مهره تكتب/ ما كانش فى حاجه
كارمن / امال دلوقت حلى فى عينك لما اختك اتعلقت بيه؟
مهره تهز راسها لا
كارمن / لا انتى و لا هى ... عمران ده هيخرج من حياتنا نهائى و هحاول استعجل فرحك على حاتم
مهره تمسك ايد كارمن
كارمن / انا مش هشوف بناتى بيخسروا بعض عشان عيل بيتسلى..  و لا انتى ما تعرفيش انه كان بيخرج مع اختك و يتقابلوا فى كافيهات و يوصلها لحد البيت
مهره تتفاجئ
كارمن / هى ما حكتلكيش ؟!
مهره تهز راسها لا
كارمن / انا هقعد مع الأمن من سكات و اجيب ليكي كاميرات المراقبه و هو بيوصلها و هصور لك سجل المكالمات اللى بينهم ... عمران ده مش كويس ... و اكيد هلاقي طريقه أخرجه بيها من حياه اختك من غير ما تكرهك ..  كان المفروض تعمليله بلوك فى وقتها مش تيجي تقوليلى الكلام الفاضي ده ... انا تعبت بجد مش عارفه اعمل ايه كل ما اجى اظبطها من ناحيه تبوظ من التانيه... انا تعبت بجد
كارمن تقعد على كرسي و تسند راسها بين ايديها و مهره متبعاها بحزن صوفيا تدخل فى ايدها بوكيه ورد
صوفيا / هو الجمدان ده ما لوش اخر و لا ايه ... مالكوا فى ايه
كارمن تقوم تقف
كارمن / الله ... لمين الورد الحلو ده
صوفيا / هو فى غيرها ... حاتم بعته و معاه كارت و المرادى كاتب مش سايبه فاضي
كارمن / وريني كاتب ايه .. ما بعرفش اكتب كلام حلو بس ما هانش علي امشي و انتى مضايقه  ... احسن من ما مفيش
صوفيا تضحك
صوفيا / كفايا انه فكر فيها ... انا بحب الورد اوى ... بس مالكوا بجد ... فى حاجه حصلت و لا ايه
كارمن / ابدا مفيش اى حاجه حصلت ... و لا ايه يا مهره
صوفيا تبص لمهره مهره تسيب الاوضه و تمشي
صوفيا / هو ايه اللى حصل
كارمن / مفيش ... روحى صالحيها و اهتمي بيها خديها و اخرجوا اعملوا شوبينج اقعدوا فى مكان اى حاجه المهم تبقوا سوا
صوفيا / طب افهم طيب
كارمن / ما حصلش حاجه انا بس عوزاكى تقربى منها زياده الفتره دى
صوفيا / اشمعن
كارمن / ما تسمعى الكلام و انتى ساكته هو محدش  بيريح خالص
صوفيا تتصدم و تمشي كارمن تناديها
كارمن / صوفى
صوفيا تبص لها
كارمن / عاوزين ننجز فى موضوع الجوازه دى خلينا نخلص
صوفيا تمشي كارمن تنفخ
كارمن / و اخرتها معاكى يا بنت على انتى
..........................
فى بيت جابر
نجاه شايله صينيه تسندها بايد و تخبط ما حدش يفتح تخبط تانى و مستتقله الصينيه تمد ايدها فى جيبها و تطلع المفتاح و تفتح الباب و تدخل تحط الصينيه
نجاه / يا جابر  .. جابر بيه ... انت يا عم
صوت جابر / ثوانى كنت فى الحمام
نجاه/ براحتك الاكل تحت خلص و انزل كل انا ماشيه
صوت جابر / تسلمى
نجاه تطلع بره تلاقي عباده بيركن عربيته تقفل الباب
عباده / تعالى
نجاه تروح له يحضنها
عباده / وحشتيني اوى النهرده
نجاه / دا انت راضي عنى بقي
عباده / علاطول راضي عنك
عباده يبص
عباده / ايه ده ... هو جابر هنا !!
نجاه / اه فوق لسه راجع من شويه
عباده / و انتى كنتى معاه جوه
نجاه / لا انا دخلت الاكل و سبته تحت و مشيت
عباده / اممم و هو كان جوه
نجاه / كان فوق ... خبطت ما فتحش دخلت حطيت الصينيه و مشيت
عباده / و ما بعتيهاش مع احلام او حد من الغفر ليه
نجاه / هو طلبها منى
عباده / انتوا بتحطونى فى المواقف دى ليه هو انا ما بصعبش عليكوا
نجاه / ايه بس يا سيد الناس
عباده/ شايفه السرايا الحلوه دى
نجاه / اه
عباده / اسبرنتك الحلو بقي حواليها لحد ما ادخل اتشطف و افوق لك
نجاه / بس
عباده / انتى مش بتطالبى بالمساواه اللى يسرى عليه يسرى عليه يا قلب ابوكى
نجاه / بس المرادى ظلم
عباده / المساواه فى الظلم عدل ... اجرى
نجاه تلوى بوزها و تروح تجرى
عباده / شاطره ... اسرع بقي
عباده يفضل واقف لحد ما نجاه تظهر تانى يناديها
عباده / تعالى
نجاه تروح له
عباده / هاتى المفتاح
نجاه تديهوله
عباده/ انا واثق فيكي جدا و واثق فى جابر اكتر من نفسي ... بس ما ينفعش نسيب فرصه لاى حد و خصوصا الشيطان
نجاه / براحتك
عباده / مش شرط يكون شيطانك او شيطانه ممكن يكون شيطان اى حد هيشوفك و انتى خارجه من جوه و هو جوه اى كان السبب اى كان الوقت اى كان اى حاجه
نجاه / ما اعترضتش ... عن اذنك
عباده/ رايحه فين
نجاه / هكمل جرى
عباده / امممم ... ماشي روحى
نجاه تجرى عباده يروح يفتح البيت يلاقي جابر قاعد بياكل يشوفه يتفاجئ
عباده / كنت متوقع حد تانى و لا ايه
جابر يقوم يقف
جابر / لا ما كنتش متوقع حد اصلا اتفضل تعال
عباده / لا سلام على طعام اقعد كمل اكلك ..  اه كنت هنسي ...دا مفتاحك اللى كان مع نجاه خليه معاك احسن
جابر / ليه !!
عباده / كدا احسن للكل
جابر يبص الناحيه التانيه
عباده / انت عارف انى ما اتمنالهاش غيرك و ان لو بايدى كنت جوزتهالك امبارح قبل النهرده
جابر / بس هى اللى رفضانى عارف
عباده / هى مش رفضاك ... هى بس مش عارفه لسه انها ما تقدرش تعيش من غيرك
جابر يبتسم بسخريه
عباده / جرب و انت تشوف
جابر / ما انا مش عارف ما حاولت اول ما جت كلمتنى
عباده / شوفت جت كلمتك ما قدرتش
جابر / يا سلام و ايه اللى اتغير اتجوزنا يعني
عباده / دى مش مشكلتى انا دى مشكلتك انت
جابر / شكرا
عباده / كمل اكلك
جابر / شبعت
عباده/ كمل اكلك عشان ما تبقاش هى بتتعاقب بره على الفاضي
جابر يروح يبص يلاقيها بتجرى
جابر / بس دا ظلم هى ما عملتش حاجه
عباده / و لا انت كنت عملت لما اتعاقبت ... لا لحظه كنت عملت ... و هى كمان دلوقت عملت و بعدين يا حنين هتكون احن عليها منى مثلا
جابر / شكرا ... شكرا ... اقفل الباب وراك ... و لا سيبه مش فارقه
جابر يروح يجرى مع نجاه و عباده متابع و مبتسم
عباده/ عيل خفيف اوى ... هيبقي الكبير ازاى ده
تليفون عباده يرن خديجه
عباده / قلب الكبير ... طب اهدى بس اهدى و الله ما فى حاجه... يا خديجه ما تصغرينيش بقي ... حاضر ... قولت حاضر ... لا كلو الا زعلك ... قلبى انا
عباده يقفل و يطلع بره يلاقيهم بيجروا جنب بعض و بيضحكوا يدارى و يتابعهم و هو مبتسم
...........................
فى مول
صوفيا / الدريس ده خطير قيسيه انا متاكده انه هيطلع واو عليكي
مهره تبتسم و تاخده
صوفيا / قيسيه لحد ما اشوف لك كذا حاجه كمان تنقى بينهم
مهره تدخل البروفا و صوفيا تنقى كذا حاجه حاتم يدخل المحل يشوف صوفيا يروح لها
حاتم / اقدر اساعد حضرتك فى حاجه
صوفيا تبص يضحكوا
صوفيا / تصدق انك مجرم ... بتغير فى البروفا
حاتم / طب انتى مطوله معانا يعني و لا ايه ؟
صوفيا / مشيت ... خد اديها دول تقيسهم
حاتم / تمام
صوفيا تمشي و حاتم يروح يحط اللبس على استاند و يروح ينقي فستان و يفرده مهره تطلع من البروفا تدور على صوفيا حاتم يشوفها يقطع التيكت بتاع الفستان و يروح لها
حاتم / جالها تليفون مهم و مشيت
مهره تتفاجئ
حاتم / مش دى رده الفعل اللى كنت اتمنى اشوفها ... خدى قيسي عاوز اشوفه عليكي
مهره ما تاخدوش و تروح للبروفا و تقفل الباب حاتم يفتحه مهره تبرق له
حاتم / قيسي ده عاوز اشوفه عليكي
مهره تطلع الموبايل و تكتب حاتم يسحب منها الموبايل
حاتم / قيسيه انا مستنى
مهره تبص له باستغراب يروح ناحيه الكاشير و يديله التيكت و يحاسب يبص لها متابعاه يشاور لها بايده يلا مهره تدخل و تقفل البروفا
....................
فى شقه عمران
هند / انت عارف انه هيكررها تانى فى اخر ماده و مش بعيد يجوا بدرى المرادى ما يلحقش يحل
مختار / ما عنه ما حل هو انتى بجد مصدقه اننا مستقبلنا واقف على الورقه دى جرا ايه يا هند مالك
هند / بس دا تعبه يا مختار
مختار / ممكن لو سمحتى نتكلم فى المهم
هند / اتفضل
مختار / حضرتك يا باشمهندس يا محترم بعد ما اخدت الخطوه دى من دماغك تقدر تقولى استفدت ايه
عمران / ما طبيعي كنت هاخدها
مختار/ من غير ما ترجع لى
عمران يبص الناحيه التانيه
مختار / المشكله ان دى مش اول مره تتصرف من غير ما ترجع لى و لا نسيت ... انا مقدر انك كبرت و بقيت راجل بس اكيد مش هتكبر عليا يا عمران
عمران / اكيد لا طبعا بس حضرتك ليك قانون و بتلتزم بيه و القانون ده بيكتفنى
هند / دا كلام يونس ده
عمران / دا كلامى انا على فكره
هند / انت عملت ايه
عمران / سألت عن حاتم مش اكتر و طلع شكى فى محله
مختار/ و انت بقي فاكر اننا ما عمناش كدا فعلا من قبل حتى ما انت تطلب منه
عمران يبص الناحيه التانيه
مختار / اللبس هنروح نتكلم مع ابوها
هند / اللى انتوا ضاربينوا !!
مختار / ادعي لنا ما نضربوش تانى ... يلا اللبس
.....................
فى الشارع قدام المول
مهره بتحاول تطلب عربيه حاتم يديها شنطه المحل اللى فيها الفستان
حاتم/ انا مش فاهم انتى مكبره الموضوع كدا ليه انا خطيبك على فكره
مهره تبص له و تتنهد
حاتم/ دا انتى شكلك زعلانه منى اوى
مهره تفتح النوت و تكتب حاتم يحط ايده مهره تتعصب
حاتم / نقعد فى مكان و نتكلم احسن مش قدام الناس ... هيفتكرونى بعاكسك و نتخانق بقي و نروح القسم ... احنا كبار على الهبل ده ... لو سمحتى
مهره تنفخ و تشاور له يتفضل حاتم يبص حواليه
حاتم / المكان ده شكله هادى تعالى نقعد هناك شويه
مهره تروح حاتم يفتح لها الباب تدخل يسحب لها الكرسي تبص له يعدلهولها تقعد و يروح يقعد
حاتم / انا مقدر ان فى ناس ما بتحبش المفاجأت بس ... مش لدرجه رد الفعل دى
مهره تطلع الموبايل و تكتب
مهره / انت ليك دخل باللى حصل مع عمران النهرده فى الامتحان
حاتم / ايوه
مهره تتفاجئ من بجاحته
حاتم / قل ادبه و كان لازم يتربى و يحمد ربنا انى ما دخلتش امه فى الموضوع مع ان فى الحقيقه كانت تستاهل
مهره تيجي تقوم حاتم يمسكها من ايدها يقعدها تبص له بصدمه
حاتم / عيب كدا احنا مش صغيرين و بعدين ايه مالك هو انتى مش المفروض اللى بينك و بينه كان تمثيل و فايك عشان تخرجى من المصحه و لا فى حاجه انا ما اعرفهاش
مهره تبص الناحيه التانيه
حاتم / انا روحت لحد عنده بكل أدب و زوق و قولت له انى ناوى اتقدم لك و ان كان فى فى نيته اى حاجه ناحيتك انا ما باخدش حاجه حد
مهره تكتب حاتم يحط ايده على الشاشه تسحب الموبايل
حاتم/ كل اللى عمله انه حاول يشوه صورتى و سمعتى بكلام فاضي زيه هو عاوز ايه يعني
مهره تورى حاتم اللى كتبته
حاتم / انا اعرفه من سنين قبل حتى المصحه ... جميل و عشان كدا اكتفيت بقرصه الودن و سحبوه فى نص الوقت بس الماده الجايه مش هيحضرها اصلا لو ما اتلمش عنى و دا مش اخرى
مهره بتكتب
مهره / انت بتعمل كدا ليه
حاتم / عشانك
مهره تعوج بقها ايه !!
حاتم / اه عشانك عشان انا ما بحبش حد يقرب من حاجتى
مهره تكتب/ دى تانى مره توصفنى بحاجه انا مش حاجه
حاتم / احلى حاجه
مهره تيجي تقوم حاتم يمسكها تانى
حاتم / دى تانى مره التالته هنزعل مع بعض و انا زعلى وحش
مهره تكتب الوايتر يدخل
حاتم / اتنين ليمون
مهره تورى حاتم اللى كتبته
مهره / انا ما بحبش الأسلوب ده
حاتم / حلو اوى نقعد و نتفق تعرفى اللى بحبه و اعرف اللى بتحبيه و نوصل لنقطه فى النص نرتاح احنا الاتنين عندها
مهره تكتب / انت ليه بتتكلم كان احنا الاتنين خلاص مخطوبين بجد و انا وافقت
حاتم / من حقك ترفضي طبعا و انا مش هزعل ... منك انتى
مهره تستغرب
حاتم / مفيش حاجه بتتاخد غصب خصوصا الجواز بس انا مش هقدر اساعد ناس ما بتحبنيش مش هقدر اعمل اعتبار لناس مش عوزانى فى حياتها
مهره تكتب / انا مش فاهمه انت تقصد ايه
حاتم / هو امك ما قالتلكيش على الشيكات اللى مضياها و لا ايه
مهره تتصدم
حاتم / امممم مبلغ مش كبير بس ما اعتقدش هتقدر تسده بسهوله
مهره تكتب / انت بتبتذنى !!
حاتم / اخص عليكي و انا وش كدا برده ... لو كنت عاوز ابتذك كان أسهل بالنسبالى حاجات تانيه كتير ... اولهم اللى انتى محموقه عليه ده ... لسه فاضل له ماده سهل اوى ما يحضرهاش و اعتقد ان دى حاجه هتقربنى اوى من باباكى انا اسمع انه ما بيطيقوش لا هو و لا اهله
مهره تلم نفسها و تهدى
حاتم / كنت متأكد انك عاقله
مهره تبص له الوايتر يحط الليمون
حاتم / روقى دمك
مهره تبص الناحيه التانيه
حاتم / انا مش بحب أكرر كلامى مرتين على فكره
مهره تبص له و بتعانى انها تدارى غضبها حاتم يبتسم
حاتم / تحبى اطلب لك حاجه تانيه يمكن ما بتحبيش الليمون
مهره تاخد الكبايه و تشرب
حاتم / لما تروحى قيسي الدريس و اتصورى و ابعتيلى صورتك بيه ... و يا ريت تلبسي معاه الكوليه اللى كنت جايبهولك
مهره تبص الناحيه التانيه
حاتم / انا بنام بدرى يعني اخرك الساعه اتناشر اتفقنا
مهره تبص له يبتسم تشرب و هى ساكته
........................