الكبيره ٢ بقلم / لولو_محمد

الحلقه ٣٨

((((((( الكبيره ٢ ))))))))
#لولو_محمد
الحلقه ٣٨
جابر / دا انت فاجر يا اخى .. فى ثانيه قلبت الترابيزه .. دى كانت جايه تتخانق معاك فجاه بقت هى المتهمه و بتدافع عن نفسها
جوزيف / دا على اساس انى كنت عارف انها جيالى فسبقت مثلا و لا عديت بالصدفه شوفتك زى ما انت برده كنت معدى صدفه و شوفتنى الفرق بينا يا شيخ جابر انى جديد و لسه بتعلم فلما دخلت الاوضه و انا بهزر لا كنت اعرف الحلال و لا العيب و كانت نيتي بريئه انت بقي داخل هنا ليه
جابر / بديها اللبن ... فارس نايم اعمل ايه يعني
نجاه / ممكن ننهى الموضوع ده ... بجد مش فايقه لكلامكوا ده
جوزيف / انا اصلا خلصت اللى عندى
جوزيف يسيب الاوضه و يمشي عمران يدخل
عمران / هو فى حاجه و لا ايه
جابر / لا مفيش حاجه ما تقلقش نفسك
عمران / اخبار كارم ايه
جابر / لسه مفيش جديد
عمران يهز راسه و يمشي
نجاه / انت عارف انه بيتكلم صح مش كدا
جابر يتنهد و يمشي و يقفل الباب وراه نجاه تبص لكارم بحزن و تروح الحمام تتوضي
…………………………..
فى اوضه منصور
منصور واخد ياسمينا فى حضنه و ساكت و باصص للسقف فجاه يقوم يقعد
ياسمينا / رايح فين
منصور / مش رايح ... هروح فين يعني
ياسمينا / امال قمت ليه
منصور / مخنوق و صدرى طابق على نفسي قولت اقوم اقعد
ياسمينا / افتحلك الشباك او اعملك حاجه تشربها ؟
منصور يهز راسه لا ياسمينا تحضنه من ضهره
ياسمينا / بيقولوا الفيديو متفبرك و شاهين برئ و ده فخ منهم
منصور يهز راسه اه
ياسمينا / طب مالك بقي
منصور ساكت ياسمينا تسيبه و تروح تقعد جنبه
ياسمينا / على فكره انا مش باكسه و لا تنحه انا موجوعه زيي زيك ... انا اتفتح جوايا جرح كنت فاكره انه اتنسي ... انا دلوقت ابنى فاهم الكلام و انا مش هقدر اكون حاجه بيتعاير بيها لو مخبى عنى حاجه
منصور / ما عاش و لا كان اللى يستجرى يقول عليكى حرف انتى ست الستات كلها
ياسمينا / انت مش هتكون كدا على فيديو متركب انت جاتلك صور ليا متركبه و كنت عادى كان فى ايه فى الفيديو يا منصور؟
منصور / انتى ما كنتيش ظاهره خالص ... كان شاهين بيريل مش اكتر
ياسمينا / ايوه بس
منصور / القبضه جوايا انا ... انا مش عاوز ... عارفه لما يبقي فى تراكمات كتير ... لما تبقي حاسه ان فى حاجه بس الكل بيكدبك بس قلبك بيقولك عكس كلامهم
ياسمينا / صدق قلبك
منصور / اهو ده بقي اللى تاعبنى ... ان قلبي بيقولى ان الواد ده وراه بلوه سوده ... بس متكتف مش عارف امسك عليه حاجه ... كل حاجه بتقولى ان عينه فيكي و دا حارقنى ... بس مش عارف امسك عليه حاجه و مش قادر اعمله حاجه
ياسمينا / اروح الفتره دى بيتنا عند ابيه ؟
منصور / دا الحل من وجهه نظرك يعني
ياسمينا / لحد ما الدنيا تهدى شويه
منصور / و انا ما اقدرش اجيبلك بيت لوحدك يعنى فيلا بحالها من بابها لوحدك
ياسمينا / انا حامل و اكيد عبده و الحمل و البيت هيبقوا تقال عليا يا منصور مش هقدر لوحدى
منصور يتنهد و يقوم يروح يوارب الشيش ياسمينا تروح تقف الناحيه التانيه
ياسمينا / طب ممكن بدل وقفتك اللى ما لهاش لازمه دى و مدى فرصه لشيطانك يخنقك تروح دلوقت تتوضي و تصلى ركعتين يمكن ربنا يهدى سرك و ينور بصيرتك ... اللى انت فيه ده لا هيقدم و لا ياخر انا كمان نفسيتي زى الزفت و طول اليوم و انت بره كنت منهاره من العياط بس هديت لما انت جيت و اتماسكت عشانك فلو سمحت ... يا سيدي مش هقولك عشانى عشان انا سترك و غطاك و طبيعي تكون على طبيعتك قدامى بس عشان خاطر ابنك ..  دا عيل صغير مش فاهم حاجه غير ان فى مشكله كبيره ... عشان نفسيتي و البيبي اللى فى بطنى يا منصور من فضلك
منصور يتنهد و يروح الحمام ياسمينا بصوت عالى
ياسمينا / شكرا
ياسمينا تروح تقعد على السرير و تتنهد
........................
على السطح عند نجاه
نجاه واقفه سرحانه فى الملكوت عند السور
////////////////
نجاه / كل ده معاهم ضدنا ... بى كاى و ميكروروبتس و نانو روبوتس و فيروسات و مخدرات و درونز و فلوس و رجاله و امكانيات و حكومات و مجلس و تنظيم و غيرهم و غيرهم ... هنواجه كل دول ازاى ؟؟؟ هندافع عن نفسنا ازاى ؟؟؟ دول ممكن يخلونا نموت بعض من غير ما يوسخوا ايديهم و لا ينزلوا نقطه دم واحده ... طب ليه ما عملوش ده ؟؟؟ ليه صحيح!! الحرب مش متكافئه مستنين ايه ... ايه اللى مانعهم عننا ... اللى يخليه يجندنى اكون فى صفه يقدر يحقنى او يقدر يخلى اهلى يموتوا بعض و ما يفضلش غيرى انا و العيال او يقدر يعمل الف حاجه ... ساكتين ليه ... مستنين ايه ... نغفل ؟! مش محتاجين احنا بكل طاقتنا مش هنقدر نقف لهم ... معاهم العلم و الفلوس ... الحرب ما عادتش راجل لراجل و لا العضلات تساوى فيها بصله ... امال ايه اللى يساوى ... احنا مش قدهم ... احنا مش قدهم
نجاه تقعد فى الارض و تسند ضهرها على السور و الخوف و الحزن ماليها
نجاه / كان ممكن اخويا يموت النهرده كان ممكن يقتلوا بعض ... لو عليا مش فارق معايا حياتى بس ... كان ممكن اضطر اقتل واحد عشان احمى التانى كنت واقفه قصاد اخويا ... كان ممكن يقتلنى ... طب لو اتكرر ... لو كنت قدام خيارين ما لهمش تالت يا اقتله يا يقتلنى هعمل ايه ؟؟ هقتل اخويا ... هعيش ازاى بعديه ... طب هو مش فى وعيه انا ايه ... هسيبه يقتلنى و يقتلهم بعدى و اسكت ... طب البى كاى و اهو مهما طال وجعه له اخر ده نهايته ايه ... دا فى ثانيه واقفين هنا و فجاه اتحقن وسطينا ما حسيناش الاعراض ظهرت ما حسيناش برده
////////////////
نجاه تغمض عنيها و تستسلم و فجاه تفتح تلاقى جوزيف واقف قدامها يشوفها يلف و يجي ينزل تناديه
نجاه / يونس
نجاه تقف و تروحله و هو واقف باين انه مضايق
جوزيف / اولا انا كنت مخنوق و قولت اطلع اجرب طريقتك فى الصلاه يمكن المرادى اهدى عشان ما اولعش فيكوا واحد واحد و انتى اولهم
نجاه / مش هتقدر
جوزيف / يااااااه
نجاه / اصل انا كمان زيك مخنوقه و الدنيا اسودت فى وشي فطلعت اصلى و افضفض مع ربنا
جوزيف / و ارتاحتى
نجاه / دلوقت ارتحت ... سبحان اللى طلعك هنا السعادى ... اصل الدنيا دى ما فيهاش صدف محسوبه بالشعره
جوزيف / و ايه بقي اللى ريحك يمكن يريحنى
نجاه / قولى الاول ... انا كنت صح لما وثقت فيك و جبتك وسط اهلى
جوزيف / اهلك ما كانوش بعيد عن ايدي انا عملت حاجات كتير قبل كدا و كان فى ايدي اعمل لو اللى حصل النهرده نساكى انا اقدر افكرك
نجاه / انا ممكن اسامح فى اى حاجه غير اهلى و ناسي ممكن استحمل يتعمل فيا اللى ما يعمل و لا يتلمسش منهم شعره
جوزيف / شاكه فيا ؟
نجاه / لا انا بس بقولك عشان تقولهم ... مش انت لسه بتقدر تتواصل معاهم ؟
جوزيف / اقدر ... و انتى كمان تقدرى
نجاه / اقدر اروح لهم ؟؟
جوزيف / متاكده ان ده اللى انتى عوزاه؟
نجاه/ ايوه متاكده قولى دلوقت هتوديني و لا لا
جوزيف / لا ... انا ما اقدرش اوديكي بس تقدرى تطلبى منهم يجوا ... بس افتكرى ... ما بيجوش بخير ... بيجى فى رجليهم دمار و دم و حرب
نجاه / ازاى ؟ ازاى اخليهم يجوا
جوزيف / ادخلى المصفوفه ... السوشيال ميديا و النت و الموبايلات اللى مش محميه قولى اللى انتى عوزاه هيوصلهم ... هم مراقبين كل حاجه ... اقولك حاجه
جوزيف يشاور فوق على نقطه بعيده بتلمع نجاه تبص و مش فاهمه
جوزيف / ده قمر صناعى مع الوقت هتتعلمى الفرق بينه و بين النجوم النجم ليه نوره لكن القمر الصناعى بيعكس نور الشمس على اللواح الطاقه الشمسيه اللى عليه فالنور هتلاقيه بيضوى مش ثابت ما علينا هم فى كل مكان بيراقبوا كل حاجه كل حركه و كل صغيره و كبيره موبايلك لابك اى حاجه متوصله بالانترنت حتى لو مامنه جهازك ممكن تقفى تتكلمى مع حد جهازه مش متامن يسمعوا صوتك يحددوا مكانك و يعرفوا بتقولى ايه من مجرد بصمه صوتك
نجاه / يعني كل اللى محتاجاه عشان اتواصل معاهم انى اتكلم
جوزيف / ايوه
نجاه / تمام شكرا
نجاه تيجي تنزل جوزيف يمنعها
جوزيف / كلامنا ما خلصش
نجاه/ انت عارف انا عاوزه اتواصل معاهم ليه
جوزيف / مش فارق معايا اعرف بس فارق معايا تعرفى حاجه
نجاه / ايه
جوزيف / احنا مش هنقدر عليهم ... بس انا هقف معاكى للاخر ما تجيش وقتها تلوميني اتفقنا
نجاه / انا مش خايفه منهم تعرف ليه ؟
جوزيف / عشان انتى نجاه بنت عباده الزينى
نجاه تتفاجئ من الرد و تبتسم و تلم نفسها
نجاه / يعني ما كانش ده اللى فى بالى دلوقت بس دا برده صح بس فى حاجه تانيه
جوزيف ما يقدرش ما يبتسمش
نجاه / انهم بالرغم من ان معاهم كل حاجه ... كل حاجه حرفيا و مع كدا بيتلودوا كدا قصادنا عارف ليه
جوزيف / ليه
نجاه / عشان احنا معانا ربنا معانا الحق
جوزيف / اقولك انا بقي حاجه
نجاه / هتقول بقول كلام اهبل و بنضحك بيه على نفسنا عشان احنا سوذج و كدا صح انا حافظه كل اللى هتقوله دا كلام الناس اللى مش مؤمنه ... تعرف تعرف انا هقولك حاجه انت لو كنت طلعت ثانيه ثانيه واحده بس بدرى كنت هتلاقيني منهاره بس انت طلعت فى معادك مظبوط طلعت بعد ما ربنا طمن قلبي و نور بصيرتى ... انا كنت مرعوبه كنت خلاص فقدت ثقتى فى نفسي و فى اهلى بس لما فكرت انا فكرت فى اللى حصل احنا حرفيا و لا حاجه جنبهم هم يقدروا يحقنونا كلنا بالبى كاى او النانو روبوتس دى او بالمهلوسات دى و يخلونا نفتح النار على بعض و ما تقولش ما عندهمش كميه كفايا لا عندهم بس هم مش هيعملوا كدا مش هيقدروا يعملوا كدا اقولك حاجه انا هقولك احنا كدا كدا هنموت كلنا صح ؟
جوزيف / صح
نجاه / بس هنموت فى المكان و الزمان و بالطريقه اللى ربنا كاتبهالى مش بمزاج المجلس و شويه الفاضيين اللى شغالين فيه ... يا عم اللى يخليهم يقعدوا طول الوقت يتسنطوا على مخاليق ربنا كانوا اشتغلوا و انتجوا و سيطروا على الدنيا بحالها برده بس بمجهودهم مش ببلطجتهم و قله ادبهم و اقصاء المنافسين
جوزيف / اقولك انا بقي حاجه
نجاه / سمعاك
جوزيف / انتى لو كنتى قولتى الكلام ده نفسه ليا زمان كنت ضحكت عليكي و عندت و عورتلك اتنين تلاته و لا موتلك كام واحد عند مش اكتر و مش هنكر ان لسه فى جزء منى مش مقتنع بحرف من اللى قولتيه بس فى جزء ... حتى لو صغير ..  بس موجود ... مصدق كل حرف .. جزء نفسه يهدى و يرتاح و يرمى كل همومه و مشاكله و قرفه على شماعه او على
نجاه / مش كدا مش كدا ... يرمى حموله على الوحيد اللى يقدر يحلها فعلا انت ممكن تكون مزنوق فى مبلغ و تتزل لمخاليق ربنا و برده ما حدش يساعدك و ممكن تطلب من ربنا يبعتلك هو اللى يديك او يرزقك من حيث لا تحتسب و انت بعزه نفسك يا ابنى انت مشكلتك انك قافل عقلك و قلبك عن الحقيقه ... الحقيقه ان فى للكون ده خالق واحد عمله بمنتهى التناغم و التناسب بدقه يعجز اى حد عن تفسيرها اللى خلق الكون ده مش هيقدر يحللك مشاكلك مش هيقدر يبعد عنك كيد شويه بشر زيك ... انت لسه بتفكر فى اللى عشته زمان صح ؟
جوزيف يبتسم بصمت
نجاه / ممكن اسالك سؤال
جوزيف / اتفضلى
نجاه / لما تبص حواليك مين اقوى و اذكى و اسرع واحد فى البيت ده
جوزيف / انا
نجاه / تفتكر انت لو ما كنتش عشت كل اللى عشته مش كان زمانك خايب زينا
نجاه تبتسم بخبث جوزيف يبتسم اوى
جوزيف/ اعترفلك بحاجه ؟
نجاه / قول و انا مسمحاك
جوزيف / مسمحانى !! امشي يا بت امشي دا انتى قفيله
نجاه / ايه !! مش كنت هتعترف انك كنت عارف ان كارم اتحقن بالمخدرات دى ؟
جوزيف / ما كنتش اعرف ما كنتش مركز وقتها كنا بنتكلم و ما جاش فى بالى انا لو عملت حاجه هقول هخاف منكوا مثلا دا ايه الغباء ده
نجاه / ما تتخلقش عليا
جوزيف / ما بتخلقش انتى اللى مستفزه
نجاه / ماشي هعديها قول كنت هتعترف بايه
جوزيف / لا يا اختى ما تعديهاش مش عاوزك تعديها
نجاه / خلاص بقي ايه شغل القمص و العيال الصغيره ده خلاص خلاص قول
جوزيف / ما عدتش فى المود خلاص انزلى يلا و انا هصلى الركعتين اللى كنت طالع لهم اما نشوف اخرتها
نجاه تبتسم
نجاه/ انت هتصلى و انت عارف انهم بيراقبوك ؟؟ مش خايف منهم ؟
جوزيف / اخاف و انا معايا نجاه بنت عباده الزيني برده دا تبقي عيبه فى حقك
نجاه تبصله بطرف عينها و تنزل و هو متابعها و مبتسم
...................
فى شقه ناصر
ناصر خارج من الحمام بينشف شعره تليفونه يرن نور يبتسم و يرد
ناصر / السلام عليكم ازيك يارب تكونى بخير
نور / معلش خليني افهم بس الجزئيه دى عشان انا بجد مش قادره ابطل تفكير
ناصر / اتفضلى
نور / حضرتك جتلى تقولى ان حياتك و حياه اولادك فى خطر و انك انت و خطيبتك كان فى بينكوا تجاوزات وصلت لحد ال
ناصر / فى حاجات المفروض الواحد ما يقولهاش بس نوعيه الحيوانات اللى مضطر اتعامل معاهم هتخلى اول حاجه يعملوها انهم يقولولك باللى انا عملته و انا صغير من سنين و توبت عنه و لعلمك انا اطبق عليا شرع الله يعني الحوار انتهى
نور / اتجلدت !!!
ناصر / مش فخور بس تانى بقولك تعرفى منى احسن ما تعرفى من بره ابدا علاقه حلال على نور و لعلمك انا مش هقبل بخطوبه هيبقي كتب كتاب على طول انا بتعلم من اخطائى مهما الواحد كان متدين مهما كان بيتقى ربنا الشيطان مش هيسيبه الا اما يغلط درجه الغلط بقي بتختلف من واحد للتانى بس انا مش ناوى اغلط انا مش غبى انى اغلط نفس الغلط مرتين
نور / انت بتعوض بيا اللى هى عملته فيك ؟
ناصر / انا ضيعت سنين من عمرى برفض كل الفرص الممتازه انى اكمل حياتى عشان ضميرى و احساسي بالذنب ناحيتها و الحمد لله طلعت برئ من ذنبها اللحق اعيش حياتى بقي دا اخويا الصغير متجوز و مخلف و انا قاعد بطولى فى شقه طول بعرض محتاس بطولى
نور / بس انتوا بلدكوا بعيد اوى
ناصر / كان زمان دلوقت طياره تنقلك او تنقل ليكي اهلك الموضوع بسيط ... عندنا فى السرايا مش هتحسي بفراغ لحظه عشان العيله عندنا كبيره و امى ست بتتقى ربنا و مرات اخويا بنت غلبانه و عاوزه تعيش و كل خالاتى و عماتى و بناتهم طيبين و جدعان احنا مش بيت عيله من اللى عندكوا فى مصر
نور / يعنى كمان الجواز هيبقي فى بيت عيله
ناصر / ليكي جناحك بحمامك يا بنت الناس تفرشيه على كيف كيفك و تطلعى و تدخلى فيه وقت ما يعجبك و ما حدش مستني منك حاجه احنا كبارات البلد يعني لا هتعزقى فى غيط و لا هتحلبى بهيمه و الخبيز ما عادش زى زمان دلوقت الحريم بتتجمع و يجوا يساعدوا حبيتي تلعبى معاهم اهلا و سهلا ما حبيتيش منابك محفوظ بس اهم حاجه ..  انتى اه ما حدش هيجبرك تعملى حاجه بس فى نفس الوقت ما حدش هيقبل منك اى كلمه تقليل من اللى بيتعمل او اللى بيعملوا اللى بيتعمل و قال على راى المثل يا نحله لا تقرصينى و لا محتاج منك عسل ... بيتهيالى كلامى واضح يا بنت الاصول
نور / انا الكلام ده كله موترنى انا اصلا كنت متوتره خلقه من ترددك المستمر مره تقرب و مره تبعد
ناصر / و جيتلك لحد بابك اقولك ليه كنت متردد خلاص يا بنت الناس فتره و راحت ربنا لا يعيدها و لا يكتبها على حد
نور / بس انا كان نفسي اكمل دراستى و اشتغل
ناصر / و ماله دا حتى الايد البطاله نجسه بس اللى اوله شرط اخره نور ... بيتك ثم بيتك ثم بيتك غير كدا اعملى اللى على كيفك و الفلوس ما تحمليش همها مصروف ايدك ماشي كل شهر اشتغلتى او لا و كل طلباتك من الالف للياء انتى بس تاشرى فالجنيه اللى هيطلعلك يخصك لا يتصرف عليكى و لا على بيتي و عيالي
نور / انا ما بتكلمش عن الفلوس انا بتكلم عن كريرى و مستقبلى
ناصر / و انا ما اعترضتش انا امى مهندسه زراعيه زيها زى ابويا بالظبط كانوا دفعه واحده برده ما قالهاش اقعدى فى البيت بس احنا شغلنا وقتها اربعه فى عين العدوا فوق روس بعض
نور / ايوه بس انا مش زيها
ناصر / صح ... انا امى فعلا ما لهاش زيي و ظلم انى اقارنك بيها او اطلب منك تبقي زيها انا بس بفهمك ان كونك ست بيت دا ما يقلش منك كل السرايا تعليم عالى مرات عمى دكتوره صيدلانيه معاها الماجستير و الدكتوراه عادى جدا و لما هتقعدى معاها هتعرفى انها فاهمه اوى اوى كمان احسن من احسن دكتور فى الجامعه عندنا بس هى برده اختارت بيتها و جوزها انتى بكيفك اختارى كاريرك اللى بتقولى عليه ده و انا متاكد انك بت جدعه و هتقدرى توفقى
نور / ما انت ما تعجزنيش و تقولى وفقى انت لو مش عاوزنى اشتغل هتقرفنى لحد ما اقعد
ناصر / يا ست البنات انا صعيدي يعني لو مش عاوزك تشتغلى مش هتخطيها و مش بالكلام و المناهده  ... بالامر ... و انا مش فارق معايا غير انى ادخل بيتي الاقي لقمه حلوه و فرشه مترتبه و دى حاجات هتلاقى اللى يشيلها عنك او يساعدك فيها بس من ايدك انتى اكيد هيبقي ليها طعم تانى و بعدين احنا سبقنا اوى فى الكلام ... انتى فى المبدا موافقه عليا ؟؟ اجيب اهلى ؟
نور / مش عارفه
ناصر / انتى بتتكلمى فى شغلك و كاريرك و انى اقعدك منهم و انتى اصلا ما وافقتيش على المبدا ازاى
نور / ملخبطه
ناصر / تمام ... نقطه بقي و من اول السطر ... تهدى خالص كدا و تتوضي و تصلى ركعتين استخاره... عارفه بتتصلى ازاى و لا اعلمك
نور / عارفه انا عارفه ديني كويس
ناصر / طبعا... امال انا اخترتك ليه ... المهم اقعدى خدى و ادى مع نفسك و انا مستني منك تليفون نجيب اهلى و نيجي نقعد و نتكلم فى التفاصيل و بعدين نرتبلكوا زياره تيجوا تقضوا عندنا يومين تتفسحوا و تتفرجوا على البلد و الناس و تشوفوا دنيتكوا ايه ... على فكره احنا مش ارياف احنا شوارعنا انضف من شوارع مصر ذات نفسيها ... تشوفيها اوروبا
نور / ربنا يقدم اللى فيه الخير
ناصر / و نعم بالله هستنى تليفونك ... فى حفظ الله يا ست البنات
ناصر يقفل و يبتسم و هو بيفكر و حاطت طرف الموبايل على بقه التليفون يرن رقم خاص يستغرب و يرد
امايا / وحشتني
ناصر يتصدم و لسانه يتلجم
......................
فى اوضه نجاه
كارم مربوط و نايم فى السرير يبدا يفوق مفيش حد يستغرب و يحاول يفك نفسه فارس نايم فى الارض يحس بيه يقوم يجرى عليه
فارس / ايه ده انت فوقت 
كارم / هو فى ايه انتوا رابطيني كدا ليه
فارس / طمنى الاول انت تمام و لا لسه الجنونه شغاله افكك و هتبقي عاقل و لا لسه الهلاوس شغاله
كارم / هلاوس ايه ياض انت فكنى بدل ما اقوملك
فارس / لا تبقي لسه شغاله و انا مش ممكن افكك ابدا الا اما اطمن ان السم الهارى ده خرج خالص من جسمك
كارم / انت عبيط و لا انت ايه حكايتك بالظبط انت بتقول ايه و سم ايه و هلاوس ايه يمين بالله اما فكتنى قبل ما اعد لتلاته
فارس / ان شالله تعد لحد ميه انت مش فاكر انت عملت ايه و لا ايه ... انت صحيح مش فاكر و لا بتستهبلنى يمين بالله ما هيحوشنى حد عنك ادينا اهو لوحدنا و انت عارفنى غبى المره اللى فاتت خدتنى على خوانه المرادى فايقلك
كارم / اللهم طولك يا روح انت مبلبع ايه على المسا يا هباب البرك انت ما تتكلم عدل و لا تفكنى و لا اقولك ناديلى ياض حد كبير بيفهم بدل شغل العيال اللى يفقع ده ... يا نجاه يا جابر يا جابر
فارس / ولا انت مش فاكر بصحيح انت عملت ايه
كارم / هكدب ليه يا جزمه يا حلوف انت فكنى يا حيوان عاوز اخش الحمام فكنى بدل ما اطلع العفاريت الزرق على جتتك و اوريك الوش الغبى بتاعى يا اغبى اخواتك فكنى بدل ما اقوم اعضك
فارس / لا مجنون و تعملها ... على العموم انا خبيت كل السلاح اللى فى الاوضه يعني مامن الدنيا بس هفكك عشان انت اخويا و حبيبي لكن اقسم بالله هتقل منى هقل منك انا بقولك اهو
كارم/ دا انا هعمل من فخادك بوفتيك يا لتات يا جزمه انت هعملها على روحى فك
فارس / بفك اهو بفك ... رابطينها بزمه اوى تقولوش هتطير
كارم / يمين بالله لو فلتت مننى لاندمكوا يا بهايم
فارس يكتم الضحك و يفك كارم يجرى على الحمام يشوف الباب مضروب فيه نار يبص لكارم بصدمه
كارم / ايه ده !!
فارس / عمايلك يا خويا جنونتك اللى خلتنا نربط بالشكل ده كنت هتموتنى انا و اختك
كارم يبص على مكان الطلقه و مش مصدق
............................
فى المطبخ
نجاه واقفه بتحضر فطار جابر يقف على الباب و يخبط تبصله
نجاه / صباح الخير ... عشر دقايق و الفطار يكون جاهز تلحقوا تاكلوا قبل الصلاه
جابر / ما اتكلمناش فى حوار امبارح
نجاه / انهى حوار فيهم امبارح كان يوم ... تصدقنى لو قولتلك انى بقالى كدا يومين ما دوقتش النوم انا تعبانه جدا ... نفسي انام اوى يا جابر نفسي افرد جسمي على السرير و انام من غير تفكير
جابر / طب ما تطلعى ترتاحى خدى نص حبايه و نامى
نجاه / مش عاوزه الكلام ده مش عاوزه منوم و لا مهدئ ... عاوزه انام عادى زى الناس ... كتير عليا يعني
جابر/ طب قوليلى اقدر اعمل ايه و انا اعمل
نجاه / مش عارفه اطمن بس على كارم و هقفل على نفسي الاوضه و الستاير و هقفل الموبايل و اللى هيخبط على باب الاوضه
جوزيف يدخل يبصلهم يروح يفتح التلاجه ياخد ازازه ميه و تفاحه و يسند على الرخامه و ياكل و يبصلهم ساكتين
جوزيف / سكتوا ليه كنتوا بتقولوا حاجه ما ينفعش اسمعها
نجاه / انا جهزت الفطار
جوزيف / اخوكى فاق فوق دفيله لبن و ساندوتشين انا داخل انام
جوزيف يعدى من جنب جابر و يخبطه فى كتفه جابر يكتم جواه و ما يردش بس متابعه بعينه جوزيف يقفل الباب
جابر / هقتله و الله العظيم هيجي عليا وقت و مش هقدر و هنفجر فيه و اقتله
نجاه/ انت الكبير ... حقك عليا انا هشدهولك
جابر / و انا مستنيكي بقي تجيبيلى حقى
نجاه / قليله انا و لا ايه
جابر / خلينى اساعدك ... خلينا نطلع نطمن على كارم عشان تنامى و ترتاحى شويه
نجاه / انا لسه غاليه اللبن صبله كبايه و انا هعمل الساندوتشات
......................
فى اوضه ياسمينا
الباب يخبط ياسمينا تقوم تحط على راسها طرحه و تروح تفتح تلاقى وفاء مراه شاهين تفتح الباب
ياسمينا / ازيك يا وفاء اتفضلى
وفاء / انا هسالك سؤال واحد و امشي
ياسمينا / اتفضلى
وفاء / انتى عمرك شوفتى من شاهين حاجه وحشه اه او لا
ياسمينا / تقصدى الفيديو؟
وفاء / انا اتحملت حاجات كتير اوى معاه و كنت ساكته عشان بيتي و راضيه عشان ابنى بس مش هستحمل حاجه زى دى
ياسمينا / طب ادخلى اقعدى تعالى
وفاء / ردى عليا ابوس ايدك جوزى بيبصلك ؟
ياسمينا / يا وفاء انا لو شاهين بيبصلى منصور هيسكت و يعديها يعني استهدى بالله يا بنتى و اهدى
وفاء / خالتى سماح بتقول الفيديو متركب و انا ما كنتش مستنيه منها اى رد تانى ما هى عمرها ما هتغلطه تعرفى لو حقيقي هيبقي عشان انا مقصره و مش مكفياه انما شاهين ده ملاك ما بيغلطش
ياسمينا / كل الامهات كدا
وفاء / خالتى ماجده مش كدا لا منصور و لا دياب يجرؤوا يجوا عليكوا و حقكوا محفوظ قدام الكل و ما تزعليش منى انا اهلى مش قليلين يعني لو عشان انتى مسنوده من الزنايته انا مسنوده من السوالمه كلهم
ياسمينا / و هو مين بس قدر يدوسلك على طرف
وفاء / جوزى ... قوليلى بالله عليكي جوزى عمره حاول يحط ايده عليكي او بصلك بعينه
ياسمينا تتنهد
وفاء / اقسم بالله اللى هتقوليه عمره ما هيطلع بره بس انا مش هقدر اكمل معاه بعد كدا تعرفى لو خانى مع واحده غريبه مش هتوجعنى قد انه يبصلك انتى ... انتى مراه اخوه و اللى زي ده ما يتامنلوش
ياسمينا / الخيانه ما بتتجزاش يا وفاء
وفاء / لا بتتجزا ... انو يخونى دى حاجه ترجعلى اسامح فيها او لا لكن انه يخونى مع واحده متجوزه و من ابن عمه كمان و عايشه معاه فى بيت واحد دا يبقي واحد قليل الاصل
ياسمينا / انا ما فيش بيني و بينه اى حاجه انتى كلامك
وفاء / حقك عليا انا ما اقصدكيش انا عارفاكى كويس و اشهدلك انك ما يطلعش منك العيبه بس الحريم النهرده كانوا بيتكلموا فى المطبخ ... ما كانوش عارفين انى على الباب و سامعه قالوا ان دا مش اول موقف بينكوا و ان الموضوع اتكرر كتير منهم مره فضحتيه و غطى على الموضوع انه ضربك على وشك و منصور ردله القلم
ياسمينا / الموضوع ما كانش كدا خالص يا بنتى اهدى ابوس ايدك انا هفهمك
وفاء / انا مش عاوزه افهم انا عاوزه اطمن ... قوليلى الحقيقه ابوس ايدك انا هتجنن
ياسمينا / ما حصلش ... جوزك ده اخويا الصغير و المواقف اللى حصلت دى كانت سوء تفاهم لكن عمرها ما وصلت للهبل اللى بيتقال ده و منصور اكدلى ان الفيديو مفبرك و انهم بيحاولوا يوقعوه و يجندوه ... يا وفاء يا حبيبتي شاهين جوزك بيمر باختبار كبير من كل اللى حواليه و محتاجلك... يا وفاء الناس عمرها ما هتبطل كلام و اول ما العجل بيقع بتكتر سكاكينه و انتى اكيد عارفه حاجه زى دى
وفاء / يعني عمره ما حاول او حتى لمح
ياسمينا / و تفتكرى لو حصلت هتعدى كدا بالساهل يا بنتى ما تسمحيش للشيطان يخرب عليكي حياتك ..  جوزك بيحبك هو صغير و طايش شويه بس انتى كمان صغيره و مش عارفه تحتويه
وفاء / انتى كمان هتجيبي اللوم عليا انا قصرت فى ايه دا كلو على يدك
ياسمينا / يا قلبي ما اقصدش
وفاء / انا استحملت تقليل منى عمرى ما كنت اتخيل انى اسكت عليه انا بنت ناس يا ياسمينا انا من عيله
ياسمينا / انتى ست الكل بس البيوت ياما بيحصل فيها هو انتى فاكره ان منصور ما بيطلعش منه حركات يعني ..  دا احنا كان فاضلنا تكه و نعمل لبعض محاضر عدم تعرض بس واحده واحده الدنيا بتمشي و بنطبع على بعض
وفاء/ احنا بقالنا سنين
ياسمينا/ ما انتوا بداتوا صغيرين اوى برده يا حبيبتي
وفاء / يعنى شاهين برئ ؟
ياسمينا / اقسم بالله منصور اكدلى انه برئ و الفيديو متفبرك
وفاء / امال ما رجعش بيته ليه
ياسمينا / مش عارفه بس هو ما طولش يعني اكيد باذن الله راجع اكيد فى حاجه بتحصل تفتكرى عمى مغاورى هيبقي هادى و ينام فى سريره عادى كدا لو ابنه
وفاء تقعد على السرير
وفاء / انا تعبت اقسم بالله تعبت
ياسمينا / يا حبيبتي اهدى ... اقولك حاجه تعالى انا و انتى ننزل نعملنا كبايتين هوتشوكليت و نشربهم سوا فى الجنينه انا و انتى لوحدنا اكيد الكل لما يشوفونا سوا هيتخرسوا خالص ..  يا عبيطه دا انتى قمر و تهبلى اجدعها راجل انتى بس اللى مستعجله و واخده الدنيا على أعصابك
وفاء تبص لياسمينا بحزن
ياسمينا / استنى انا عندى هنا كيس مارشميلو من المستورد مخبياه من الواد بودى نحطه على وش الهوتشكوليت و ندلع نفسنا و الله يا وفاء ما فى حاجه مستاهله زعلك ده و بعدين يا عبيطه اللى عند ربنا ما بيروحش و اللى هيجي عليكي النهرده بكره ربنا يوريكي حقك فيه اضعاف و انا بقولك اهو
وفاء تحضن ياسمينا و تعيط ياسمينا تطبطب عليها
ياسمينا / باذن الله هتلاقيه راجع مرفوع الراس قريب اوى اهدى يا قلب اختك اهدى ما تعمليش فى نفسك كدا اهدى
............................
فى شقه نسمه
جرس الباب بيضرب و نسمه بتصلى ام عبده تطلع من اوضتها
ام عبده / دا ايه الغلب ده يعني حبكت الصلاه دلوقت يا اختى ايه مش سامعه الباب و بعدين انتى بتصلى ايه اصلا ما طبعا قعدالى على المدعوق النت و سايبه الصلاه هو احنا الخراب مسكنا من شويه
جرس الباب يضرب تانى
ام عبده / جايه جايه سرعه اما تسرعك جايه
ام عبده تروح تفتح تلاقى ام نسمه
ام عبده / اهلا
ام نسمه / اهلا بك يا اختى امال فين نسمه
نسمه تخلص صلاه و تلم السجاده
نسمه/ انا هنا ياما اتفضلى
ام عبده / يا سبحان الله لحقت الصلاه تخلص ... دا احنا صحيح فى زمن العجايب
ام نسمه / جرا ايه يا ام عبده هتفضلى ساده الباب بجسمك كدا مش هتفوتيني و لا ايه
ام عبده / لا ازاى دا احنا ولاد اصول برده و انتى مهما كنتى ضيفه و تتشالي على الراس اتفضلى اتفضلى
ام نسمه تدخل و تروح تقعد
ام عبده / اعملى لامك شاى يا نسمه و لا نجيب لك تتغدى احسن
ام نسمه / لا شبعانه تسلمى تعالى يا نسمه اقعدى عوزاكى فى موضوع و كويس ان حماتك هنا اهو برده ناخد بشورتها
ام عبده / خير مش بعاده يعني
ام نسمه / هو صحيح الحج غازى اتفق على بيع محصول الارض بتاعكوا و قبض العربون امبارح !!
ام عبده تبص لنسمه و ترتبك و تسكت
ام عبده / انتى عرفتى منين الكلام ده
ام نسمه / من الراجل اللى اشترى الحج فخرانى ابو عطوه قاله انه اشترى المحصول و بسعر قليل جدا كمان
ام عبده / و الله احنا كحريم ما بندخلش فى حوارات الرجاله و اكيد لما ربنا يعدى الايام اللى ما يعلم بيها غيره دى على خير هنقعد و نتحاسب و اللى عند ولاد الجزار بيزيد ما بيقلش
ام نسمه / طبعا يا اختى بيزيد بس المال السايب بيعلم السرقه و محصول عيله الجزار طول عمره بينضرب بيه المثل انه نمره واحد و ان التجار بيقطعوا بعض عليه لاعلى سعر يقوم لما عبد الهادى الله يرحمه و يبشبش الطوبه اللى تحت راسه يموت ما يفوتش يومين و يتباع محصوله لسنتين قدام بسعر اقل من سعر السنه اللى فاتت دا يرضي مين ده يا ناس هى الفلوس دى مش فلوس ولاد عبده اولى بيها برده
ام عبده / انا هتكلم مع ابو محمود و افهم منه الدنيا قبل ما اديكي رد و بعدين ما تقلقيش نفسك انتى يا اختى فى الاول و الاخر احنا جزارين فى بعضينا
ام نسمه / و انا ما اتكلمتش بس دا حق بنتى و عيالها و ان حد يعني اعوذ بالله فكر يستكردها و لا يستضعفها و يقول دى بت وحدانيه ما لهاش لا ضهر و لا سند
ام عبده / يا اختى الضهر و السند ده ما كانلهاش طول السنين اللى فاتت الا ضهر و سند ابنى الله يرحمه و اللى كلكوا بلا استثنا كنتوا بتحاولوا بكل طاقتكوا تكبشوا من خيره و عزه على حس بنتكوا ايه فاكره انه عشان مات هتبقي دى مسمار جحا اللى تنطولنا بيه... بصي يا حجه من الاخر كدا الارض ارض ولاد الجزار و المحصول محصولنا نصرفه على كيف كيفنا انما على راى اللى قال يا داخل بين البصله و قشرتها انتى عارفه الباقي
ام نسمه / خلصتى ... طب اسمعى بقي الكلمتين دول ... احنا من يوم ما سلمناكوا بنتنا عمرنا شوفى عمرنا ما مدينا ايدنا و خدنا منكوا مليم احمر و كل الحوارات اللى حصلت كان السبب فيها المرحوم رعد اولا و انتى من وراه ثانيا و سكتنا و قولنا عشان البت تعيش و جوزها شايلها و ما دام الراجل كويس نبلعله الظلط و دا بالنسبه للى فات بالنسبه للى جاى نسمه كانت مرات ابنك و ام اولاده و ابنك الله يرحمه و البت عشان بنت اصول عايشه تحت طوعك تخدمك لكن ليها حقوق و مش هتتنازل عنها حقوقها و حقوق عيالها و انتوا جزارين فى بعض ما اختلفناش بس مش يوم ما هتسنوا السكاكين هتسنوها على بنتى
ام عبده / نورتى يا ام نسمه ابقي كرريها يا اختى
ام نسمه / قومى يا نسمه اعملى الشاى انا هستناكى فى اوضتك عوزاكى فى كلمتين
ام عبده / انتى بتكسرى كلامى
ام نسمه / اهدى يا ام عبده انتى لسه يا اختى دافنه اتنين اهدى لتحصليهم ... انا جوه فى اوضتك بلعب مع العيال هاتى الشاى و حصلينى
ام نسمه تدخل الاوضه و نسمه واقفه ساكته ام عبده تروح لها
ام عبده / و ربى اللى عمرى ما بحلف بيه كدب ابدا ان ما مشيتى امك من هنا
نسمه / ما اقدرش ... دى امى ... زى حضرتك بالظبط تاكلوا بعض لكن ما اقدرش اجى على حد على حساب التانى
ام عبده / مشيها بدل ما انادى النسوان يجيبوها من شعرها و يرموها بره بيتي
نسمه / ما حدش هيقدر يقرب من امى ... الميت له حرمه الناس تقول علينا ايه ما صبرناش جتته تبرد و كلنا فى بعض هى كدا كدا ما بتطولش هتاخد واجبها و تمشي بس بالادب عشان دى امى و مش هقبل ان حد يقل منها زى ما انا ما بقبلش ان حد يقل منك
ام عبده / و انتوا تقدروا تقلوا منى و لا تدوسولى على طرف و لا تكونى يا بت فاكره انك ورثتى بجد و حسك هيعلا عليا فى البيت ده
نسمه / اعملك معانا شاى ياما
ام عبده / تطفحوه بالسم الهارى
ام عبده تدخل اوضتها و ترزع الباب نسمه تبص لصوره عبد الهادى
نسمه / انا صابره لجل خاطرك انما كدا كتير
............................