الكبيره ٢ بقلم / لولو_محمد

الحلقه ١٢٣

(((((((( الكبيره ٢))))))
لولو_محمد
الحلقه ١٢٣
دياب / تفتكر حوار انهم يخلوها الكبيره ده لسه وارد ؟
جابر يبص لدياب
دياب / دا مهما كان حلمها
جابر / نجاه مش خاينه يا دياب
دياب / انا ما قولتش انها خاينه ... بس هم عارفين نقطه ضعفها و بيضربوا صح ... اصل اشمعن نجاه بس اللى الحوار يكون معاها
جابر / يونس بيقول فى بينهم عهد يحموا بعض
دياب / دى مشكله ... اصل نجاه عمرها ما هتخلف وعدها و لا ايه ؟!
جابر / دى تانى مره يا دياب التالته رد فعلى مش هيعجبك
دياب/ حاول تفهم كلامى من غير عصبيه انا ما قولتش حاجه انا بفكر معاك بصوت عالى عشان نفرد كل الاحتمالات على الترابيزه
البوابه تتفتح و جوزيف يدخل
دياب / و ادى كرسي جديد هينضاف الترابيزه ... خير جاى ليه ده السعادى ؟!
الكل يبص على جوزيف نجاه تسحب نفسها و تدخل السرايا و يونس و جابر متابعينا
دياب / ايه الاخبار  ؟! عرفت امايا اتكلمت مع نجاه فى ايه ؟!
جوزيف / اه عرفت و عرفت كمان نجاه ردت عليها و قالت ايه؟
دياب و جابر يبصوا لبعض
دياب / هى نجاه ردت عليها ؟!!
.......................
جوزيف يستغرب
جابر / هم لسه بيتكلموا فى الموضوع جوه احنا اصلا ما عندناش اى تفاصيل
دياب/ هدخل اشوف وصلوا لايه
دياب يدخل
جوزيف / الموضوع مش محتاج كل الهرى ده للاسف دا امر واقع
جابر / ما بحبش الكلمه دى
جوزيف / مش مهم تحبها ... دى حقيقه و لازم تتعايشوا معاها... انت شوفت جزء بسيط من اللى هى تقدر تعمله... الكلاب دى مرحله اولى بعدها فى رجاله و سلاح ما تستهونش بعدوك و اعرف امتى تطاطى للريح لحد ما تعدى ... ما تسمحش لغرورك يكسرك يا جابر ... الا و انا بنصحك ليه اصلا ما تعمل اللى تعمله انا مالى
جابر / لا ما هو مالك فعلا و لا هى امايا دى ما تخصكش ... و لا انت فاكر اللى حصل ده هيعدى كدا و خلاص
جوزيف / مش فاهم قصدك
جابر / هاخدها و احميها و ابدعها و فى الاخر كنت زيك زينا ما شوفناش كرامات يعني
جوزيف / معاك حق طبعا ... ايه رايك تعملها كلاكيت تانى مره و تاخد نجاه و تنزل و خلينا نشوف هتطلعوا اتنين زى ما نزلتوا و فعلا انا ما كانش ليا لازمه وسطكوا و لا هيبقي فى كلام تانى... الله اعلم
جابر / انا مش قادر ابص فى وشك من ساعتها
جوزيف يديله ضهره
جوزيف / بص فى قفايا انا حلو من كل الجهات
مختار يطلع من جوه
مختار / جابر ... تعال
جابر يروح لمختار مختار يحيي جوزيف
مختار / استنانى شويه انا عايزك
جوزيف / انا جاى لك اصلا
مختار و جابر يدخلوا شاهين و منصور يروحوا ناحيه السرايا شاهين يبص لجوزيف جوزيف يبتسم بسخريه و يبص الناحيه التانيه
...............
فى اوضه عباده
عباده / بمزاجك هو
نجاه / انا قولت هحاول ما قولتش ان ده هيحصل و بعدين لو فى طريقه تنهى الحرب دى من غير دم ليه لا
جابر / فى ... اننا نسيب لها الجمل بما حمل
عباده / على جثتى
جابر / ما لهاش حل يا نجاه يا احنا يا هى
مختار / لو فى امل
دياب / ما هى التانيه نفسها رفضت و قالت قدامكوا فرصه يومين للهجمه التانيه
شاهين / انا بقول نماين شويه و نسايس و قال يعني نجاه قدرت تقنعكوا و كدا
نجاه / دا بالظبط اللى قولته
عباده / دا طريق ما فيهوش رجوع يوم ما رجلها هتتحط فى البلد مش هنقدر نخلص منها و لا بالطبل البلدى
مختار / ما بحبش دايما اكون الطرف التانى ... بس هى هنا فعلا ... وسطينا
شاهين يرتبك / از ... ازاى يعنى
مختار / السيرك و اللى تحتيه ... اتحفر امتى و ازاى ما اعرفش
منصور / مفيش طريقه نخلى البوليس هو اللى يرخم عليهم بيها ... بلاغ كدا ان فى حاجه مش تمام فى السيرك
دياب / امايا نفسها
منصور / ازاى
دياب / هى مش امايا دى مخطوفه و احنا كنا عاملين محضر و جت لينا جثه و ناصر اتعرف عليها
منصور / قصدك نبلغ ان امايا جوه
دياب / اميره... اميره جوه و مخطوفه و هم بقي يدخلوا يقلبوا المكان فوقانى تحتانى ... و اكيد هيطلعوا على الاقل بواحده من شبيهاتها ان ما كانتش هى و ساعتها بقي تبقي تبرر فى محضر رسمي
مختار / كلنا عارفين ان ليها ايدين فى القسم
منصور / سوشيال ميديا زى ما قلبنا الدنيا عليها وقتها هنفتح الملف القديم مش هتقدر ترفع عينها و هتدفن روحها
نجاه / ما هى مدفونه فعلا ... و اللى بره كلابها... هنعمل ايه مع الكلاب
مختار / انا هتكلم مع شاكر لو يعرف رشاشات او حاجه و حاول يا منصور تبعت تجيب كام بدله كدا من بتوع مدربين الكلاب دول
منصور / فى يومين ؟!!!
مختار / اللى تقدر عليه اعمله  ... شوف هتقدر تعمل ايه فى موضوع اميره ده ... خليها تولع
منصور يهز راسه
مغاورى / يعني برده انا هعمل ايه
عباده / اللى يعرف رجاله ثقه يجيبهم
نجاه / لحد امتى
عباده / لحد ما نلاقي حل تانى و ما تقوليش اديها فرصه ... كفايا الفرصه اللى بلتيني بيها قبل كدا
نجاه / عن اذنكم
نجاه تسيب المكان و تمشي
مختار / احب افكرك ان همام هياخد السليم من رجالته يامنوا الطريق لقاسم و الجماعه
مغاورى / ما يرجعوا طيران و هم هناك يستقبلوهم و ان كان على العربيات نبقي تبعتهم مع سواقين من اهل البلد
جابر / هكلمه فى الحكايه دى ... بس برده الناس دول ليهم اهل حتى اللى اتصابوا منهم امبارح لازم يرجعوا
مختار / احنا محتاجين نفكر بره الصندوق
عباده / خلوا بس كل واحد فينا يبدأ يتحرك و باذن الله بالليل لينا قاعده تانيه
مختار / تمام ... هقوم اشوف يونس ... حاول تتكلم بالراحه مع نجاه
عباده / خليك فى حالك
مختار يضرب كف على كف و يمشي
مغاورى / لو مش هيضايقك يا عباده انا عاوز اتكلم مع نجاه شويه فى اللى حصل
عباده / و اضايق ليه ما هى بنتك اتكلم بس ادى دقنى ان كلامك فرق معاها فى حاجه ... انا مش عارف هى جايبه الدماغ دى منين
مغاورى/ افندم !!
عباده / بقولك ايه انا تعبان مش فايق لمناهده ... جابر ... شوف الاكل اخباره ايه بطنى هتوجعنى من كتر القهوه
جابر / حالا
.........................
فى الشيلتر
صابر يدخل يشوف شاكر بيفضي شكاير دراى فود لكلاب بلدى كتير فى المكان
صابر / احن قلب فى الكوكب
شاكر يبص له و يضحك و يكمل شغل
صابر / و الله واحد غيرك بعد اللى حصل كان هيبقاله اقل حاجه موقف تانى خالص
شاكر / دول فى الاول و الاخر حيوانات لا بتفهم و لا بتفكر زى ما هتعلمها هتتصرف ... الميزه الوحيده انها وفيه يعني عمرها ما هتعض الايد اللى اكلتها ابدا
صابر / يعني هتقدر تروض الكلاب اللى جوه ؟
شاكر / يقوموا بس بالسلامه و نشوف ... فيهم كلبين حالتهم صعبه بس باذن الله خير
صابر / طب ما ترحمهم ما دام
شاكر / و ليه اقطع الامل ما يمكن ربنا يكتب ليهم حاجه تانيه قرار الموت الرحيم ده اخر حاجه خالص لما تفقد الأمل فى العلاج و تكون جربت كل حاجه دى ارواح و هنتحاسب عليها
صابر / مش بقولك احن قلب فى الكوكب ... سمعت ان نجاه دخلت السيرك و اتكلموا و مفاوضات و بتاع و هم دلوقت بيتناقشوا هيعملوا ايه
شاكر / مفاوضات !! احنا بتوع مفاوضات !! احنا بتوع نهد المعبد على دماغنا و دماغ اللى جابونا و لا ننخش ابدا
صابر / شامم ريحه مش حلوه
شاكر يتنهد
شاكر / الحرب دى اخرتها ايه ؟
صابر/ هنساوى وش امهم فى التراب
شاكر / ربنا يوفقك
شاكر يروح يجيب شكاره تانيه و يفتحها
صابر  / انت من امتى فاقد الأمل بالشكل ده
شاكر / انا !! ابدا ... انا بس حزين على الوضع ... ليه كل ده اصلا و على ايه
صابر / ما تسالهم هم ... عاوزنا نعمل ايه يعني نكبر دماغنا و نسيبهم ياخدوا مننا البلد كدا من غير اى مقاومه حتى ؟
شاكر / ما قولتش كدا بس بقول ان الحرب دى مش بتاعتنا احنا
صابر / قصدك الحكومه... و الله ما عارف اقول ايه
شاكر / ما تقولش ما فيش كلام يتقال ... امر واقع و اتفرض علينا نعيشه
صابر / بس احنا قده باذن الله
شاكر / سيبك انت حاسك رايق ... خير فى حاجه و لا ايه ؟
صابر/ فيك من يكتم السر
شاكر / عيب يا جدع خير قول و فرحنى
صابر / عريس الهنا ربنا كرمه بحته كلب ابن حلال انما ايه عظمه
شاكر يضحك
صابر/ اقسم بالله لو شوفت الكلب ده لأبوسه من بقه
شاكر / يع ايه القرف ده مش للدرجادى يا عم
صابر / هو انا اعرفه اصلا و لا حتى لو شوفته هعرفه ... يلا اللهم لا شماته
شاكر / لا واضح
صابر / لا يا عم مش انا ... دا انا حتى صاحب واجب و بعت له بوكيه ورد على المستشفي
شاكر / يا كياد يا ابن ال ... انت مين ياله انا ما كنتش اعرف عنك كدا
صابر / سيبك انت ... انا فرحان  ... فرحان اوى
شاكر / اللهم لا شماته اه
صابر / اللهم لا شماته ... اللهم لا شماته
شاكر / لا حول و لا قوه الا بالله ... كنت عاقل يا ابنى و الله
صابر / شاكر !!!! اللهم لا شماته
شاكر يضحك و يسيب صابر و يمشي
........................
فى شقه احلام
همام / بس ملمومه باذن الله
قاسم / ملمومه ازاى دا الحكايه كدا طلعت اكبر بكتير من اللى كنا فاكرين اننا جايين عشانه
همام / انت كدا كدا بره الحكايه خد عروستك و عيش لك يومين بإذن الله ربنا يكون فرجها و حليناها
قاسم / و هى دى حكايه تتحل فى يومين يا همام
همام / هو اكل و لا بحلقه ما تخليك فى اللى انت فيه
جرس الباب يرن
قاسم / ثوانى
قاسم يروح يفتح يلاقي نجاه و جابر و مازن قاسم يشيل مازن
قاسم / اهلا اهلا ايه النور ده اتفضلوا
جابر و نجاه يدخلوا يقعدوا
جابر / يا ريت ما نكونش جينا فى وقت مش مناسب
قاسم / مش مناسب ايه يا راجل ما تقولش كدا همام جه رخم من قبلك
همام / سامعك على فكره
قاسم / هخاف و لا ايه مازن موجود و هيحمينى ... مش كدا يا سيد الرجاله
مازن / احلام فين
قاسم ينزل مازن على الارض
قاسم / اتفرجوا الا ما عبرني... احلام جوه يا سيدي ادخل لها
مازن يجرى على جوه
قاسم/ همام كان لسه بيحكي عن اللى حصل امبارح
جابر / مش عاوز اتكلم او افتكر الموضوع من اصله
نجاه تبص لجابر
همام / بصراحه كانت حركه جريئه موت
جابر / قول مجنونه متهوره دى مش جرئه دا انتحار
احلام تطلع شايله مازن و تدخل تسلم
احلام / ازيكوا عاملين ايه
جابر / ايه يا عم الجمال ده ما الجواز بيحلى اهو امال الناس مسوئين سمعته ليه
نجاه / بقولك ايه يا لولو خلينا نسيب الرجاله تاخد راحتها و خلينا ندخل احنا جوه
احلام / تمام اسبقيني و انا هضايف جابر و احصلك
قاسم / لا ما تقلقيش انا موجود و هظبط الاداء
احلام / طب ما تنساناش فى الأداء بتاعك
قاسم/ عيب عليك يا وحش دا انت الأصل
احلام تبتسم و تاخد نجاه و مازن و يدخلوا جوه
جابر / سمعت انا ان كان فى اختراعات و سندوتشات
همام / انت داخل على طمع بقي
جابر / تصدق و تؤمن بايه
الاتنين / لا اله الا الله
جابر / انا ما عارف احط بق مايه حتى فى بطنى من ساعه الفجريه ... لحد دلوقت مش قادر اتلم على اعصابي .. للحظه تخيلت انى مش هشوفها تانى
قاسم/ لا حول و لا قوه الا بالله
جابر / المشكله انها متغيره من ساعه ما رجعت ... كلنا متغيرين بس هى اكتر او ... مش قادره تخبى مثلا
همام / هو الموضوع مرعب اوى كدا زى ما قالوا
جابر / تقدر تقول كان استعراض عضلات على خفيف ... بتقولك الكلاب دى متدربه تهاجم الرجاله بس
قاسم / ما ده خبر حلو
جابر / انت متخيل لو كميه الكلاب دى أطلقت فى البلد هيحصل ايه ... مش هيتبقي فى البلد دى شنب يدافع عنها
همام / مستهون بينا اوى يا ابن عمى ... لعلمك بقي انا لسه جاى من المستشفي و معظم الناس اللى اتصابت جاهزين ينزلوا خدمه من بكره
جابر / و انت هتنزلهم ؟
همام / هنزلهم طبعا بس هحطهم فى أماكن تانيه اهدى شويه لحد يومين العلاج ما يخلصوا ... و بعدين لو كل مجموعه شالت واحد مصاب و لا اتنين مش هيضلعوهم هيشيلوا بعض المهم الدنيا تفضل ماشيه من غير ما حد يحس بحاجه
جابر يبتسم بسخريه
قاسم / عملناها كتير على فكره
جابر / الكبار مش هيقبلوا بالكلام ده هيقولوا مجازفه بالمصاب و بالمجموعه لانه هيبقي حلقه ضعيفه و حمل عليهم
همام / دا لو راقد انما دى شويه جروح و عضات ديتها ايه يعني ... كام غرزه على كام حقنه مش حوار يعني
جابر / انت عضك كلب قبل كدا
همام / اه مره و انا صغير عضنى كلب فى رجلى بس انا ما سكتلوش أديت له بالرجل التانيه فى وش امه
جابر يضحك
همام / ايه يا عم عاوزنى اسكت له و لا ايه
جابر / المهم انك بخير
همام/ على راى ابويا الله يرحمه اللى ما يموتكش يخليك اقوى
جابر / دا نيتشه ... فريدريك نيتشه
همام / لا و ربنا ابويا
قاسم/ ما تجادلش ... اسمعها منى ما تحاولش معاه دا غبى
جابر يضحك
………………………
فى اوضه احلام
نجاه / يا شيخه اتقى الله
احلام / يا نجاه انتى مش فاهمه حاجه
نجاه / ما انا مش شايفه مشكله للبوز ده الا لو هرمونات و بصراحه بعد اللى حكيتيه ما فيش اى حاجه تانيه ممكن تعدل الهرمونات و المزاج بصراحه
احلام / انتى قليله الأدب
نجاه / و انا قولت ايه !!
احلام / هو وعدنى
نجاه / وعدك بايه هى الحاجات دى فيها وعود يعني عاوزه تقنعيني ان ينفع تبقي نايمه جنبه حته الكنافه بالمانجا دى و ينام عادى ... اقسم بالله كنت شكيت فيه
احلام / قولت لك قليله الأدب
نجاه / يووووه اه انا قليله الادب ما تحكيليش حاجه تانى ... دا انتى نكد
احلام / يعني بجد ما ليش حق اضايق
نجاه / انتى اتكلمتى معاه ؟ قولتيله اللى مضايقك ده ؟!
احلام / اكيد لا طبعا ... ما اقدرش اتكلم معاه فى حاجه زى دى
نجاه / و قادره تتكلمى معايا انا !!! انتى عبيطه دا جوزك
احلام / ايوه بس ما اعرفوش
نجاه / و عمرك ما هتعرفيه طول ما بتحطى حواجز بينكوا ... بت الواد لقطه و ما فيهوش غلطه سمى الله و دوسي
احلام / امال انا خايفه ليه يا نجاه
نجاه / انتى مش خايفه منه انتى خايفه من اللى مستنيكي هناك
احلام / هبقي لوحدى يا نجاه
نجاه / ايه !! احنا بكليكه يا بت بكليكه نبقي عندك
احلام تهز راسها و تتنهد
نجاه / احكيلى بقي موضوع المساج ده حلو زى ما بنسمع يعني و لا عجن
احلام / اقسم بالله انتى ما اتربيتي و انا الغلطانه انى حكيت لك اى حاجه اصلا
نجاه / جدعه ما تحكيش حاجه تانيه يا نكدو
احلام / حلو
نجاه/ هو ايه
احلام / المساج كان حلو
نجاه / انتى اللى بتحكى اهو
احلام / مش اختى
نجاه / ربنا يسعدك
احلام / عقبالك
نجاه / ما تقفلنيش بقي هو مازن راح فين صحيح
احلام / هيكون فين يعني و بعدين انا مش فاهمه انتى ليه غبيه اوى كدا ما يمكن يطلع بيعمل مساج حلو
نجاه / انا برده اللى قليله الادب
احلام / ما هو هيبقي جوزك يخربيت غبائك
نجاه / خلاصه الكلام ما تسبيش حاجه فى قلبك هاتى قاسم كدا و اقعدوا اتكلموا و قوليله انت ليه عملت كدا مع انى مش مقتنعه غير انك اوفر بس لما تسمعى منه و تفضي اللى جواكى اول بأول اريح لك
قاسم يحمحم على الباب شايل مازن بقه ملحوس شيكولاته
قاسم / اسف على المقاطعه بس البيه بيقول انك اذنتي له ياكل شيكولاته
احلام تقوم تشيل منه مازن
احلام / ايه المنظر ده هى دى اللى واحده بس
مازن يضحك
قاسم/ هو انتى حددتى و انتى بتقولى واحده بس كنتى تقصدي شيكولاته واحده و لا علبه واحده ؟!
احلام تبص لقاسم بطرف عينها و نجاه بتضحك
......................
فى الجنينه الورانيه
عباده قاعد على المرجيحة مهره تدخل تشوفه تقف و تيجي ترجع عباده يناديها و يقف
عباده / تعالى ... انا كنت كدا كدا داخل
مهره تروح ناحيته
عباده / الجو جميل النهرده ايه رايك لو ... خرجتي و غيرتى جو
مهره تهز راسها لا و تبص فى الارض
عباده / براحتك ... لو غيرتى رايك فى اى وقت انا جوه مش خارج النهرده
مهره تهز راسها اه
عباده / عن اذنك
عباده يتمشي يشوف هند خارجه من السرايا فى ايدها صينيه متقسمه مكسرات و مقرمشات يمد ايده ياخد حبه
عباده / رايحه لمهره ؟
هند / حابسه نفسها فى الاوضه قولت اخرجها تفك
عباده / خير ما عملتى
هند / ادعي لها يا عباده انا قلقانه من سكوتها اوى من ساعه ما رجعت و هى غريبه خايفه تفضل كاتمه جواها يجرا لها حاجه
عباده / ما تخافيش عليها هى قويه و هتعدى منها ... و بعدين فاكره لما راحت ركبت الخيل ... كانت قافله برده و لما راحت للمكان اللى بتحبه و بترتاح فيه خرجت اللى جواها ... انا قولت لها تخرج بس هى رافضه
هند / تخرج فين دا انا قلبى واكلنى على العيال اللى بره
عباده / عيال ايه يا ام شاكر دول رجاله ما تصغريناش بقي
هند / مهما كبروا هيفضلوا فى عيني العيال اللى كنت بجرى وراهم عشان اغير ليهم البامبرز
عباده يضحك
هند / شكلك مرهق انت كمان روح ارتاح لك شويه
عباده / و هى فيها راحه يا ام شاكر
عباده يبتسم بسخريه
عباده / روحى لمهره ما تسبيهاش لوحدها
عباده يدخل و هند تروح تقعد جنب مهره و تحط الصينيه فى النص
..........................
فى اوضه ناصر
ناصر بيتكلم فى التليفون
ناصر / اه بكره المغرب كويس ... نروح نصبح على الجماعه و ننقط و نلف شويه نتفسح و نروح نلم حاجتنا عشان نسافر تانى يوم الفجريه كدا
نور / هو انا المفروض انقطهم بكام ؟
ناصر/ انا كدا كدا هنقط فمتشغليش بالك انتى بالحوار ده
نور / ايوه بس انت هتنقط عن نفسك مش عنى و لا عن اهلى
ناصر / اصل الحاجات دى ملهاش عندنا مقياس عادى اللى تقدر عليه أو على حسب يعني لو هو منقطك قبل كدا كدا يعني ... بصي احنا ما عندناش الحساسيات دى عادى يعني ما تشغليش بالك بيها انا و انتى واحد
نور / يعني اقول لماما ايه دلوقت مش عاوزه شكلنا يبقي وحش
ناصر / شكلك زى القمر ما تشغليش بالك انتى... هو انتى ما بتثقيش فيا خالص
نور / طب ممكن نجيب حاجه و احنا رايحين طيب طبق شيكولاته مثلا يكون فخم كدا أو حاجه
ناصر / اؤمرى و انا انفذ
نور / مش عارفه انا عملت ايه حلو فى حياتى عشان ربنا يرزقنى بواحد زيك
ناصر / اكيد حاجه حلوه اوى
نور / يا رخم
الاتنين يضحكوا
نور / تمام هنخرج نروح فين بقي
.........................
فى عربيه جابر
جابر سايق و نجاه راكبه ورا و جنبها مازن
نجاه / هو احنا لازم نروح
جابر/ لا تحبى تروحى فين ؟
نجاه / اى حته عاوزه اتمشى فى البلد شويه
جابر / مفيش مشكله بس مش هتنزلى من العربيه
نجاه / تمام
جابر يسوق
مازن / هو احنا مش هنروح الملاهي زى ما وعدتونى
نجاه / هنروح طبعا بس لما عموا جابر يرتب الدنيا
مازن / ما نروح دلوقت و خلاص
نجاه / و هتنبسط لوحدك استنى نجيب باقي صحابك معاك
مازن / ماشي
جابر/ الا انت اتصاحبت على مين فى السرايا يا مازن صحيح
مازن / اتصاحبت على أحمد و منيره
جابر / بس !! من وسط العيال دول كلهم اتصاحبت على دول بس
مازن / ايوه
جابر / طب و ما حاولتش تتعرف على عيال اكتر
مازن / لا مش فاضي
نجاه تستغرب
نجاه / ليه وراك ايه
مازن / بلعب مع احلام او مع منيره
جابر / و احمد جه متأخر و لا ايه
مازن / لا بيلعب معانا
جابر / شامم ريحه مش عجبانى
مازن / و الله العظيم ما انا
جابر و نجاه يضحكوا
نجاه / المهم يعني منيره حلوه كدا زى احلام
جابر / احم
مازن / اه و بتحب الشيكولاته زيي
جابر / ما هى الحاجات المشتركه دى اللى بتجيبنا الارض تعرف ... من فتره كدا كنت بحب اللعب مع بنت برده
مازن / اسمها ايه
جابر / نوجه
نجاه تتنهد
جابر / كنا بنحب نفس الحاجات برده ... بنحبها لدرجه اننا لما كبرنا بقينا بنتنافس عليها ... فزعلت و بطلت تلعب معايا
مازن / كنت اديتها لها
جابر / انت شايف كدا
مازن / بابا بيقول الراجل لازم يكبر دماغه و ما يخليش الست تزعل
نجاه / ابوك راجل محترم
جابر / طب لو الحاجه دى مش بتاعتى ينفع اديهالها يا مازن
مازن / لا مش بتاعتك هتديها لها ازاى يعني كدا تبقي حرامى
جابر / و الله الواد ده متربي خمس مرات
مازن / يعني ايه ؟
جابر / يعني نروح نجيب شيكولاته تدي منها حته لمنيره
نجاه / يا بختك يا منيره
جابر / لا ما انا كنت ناوى انا اللى اديكي
نجاه / انت مش ملاحظ ان معانا طفل
جابر / طفل مين دا سيد الرجاله ده مش كدا يا مازن
مازن / الزنايته كلهم رجاله
جابر / حصل ...قولها
مازن / الزنايته كلهم رجاله يا نجاه
نجاه / انت رهيب
جابر يضحك و هو سايق
..............................
فى اوضه عمران
هند / ما فيش جديد و حاله الصمت و السرحان بتزيد و اللقمة على القد
عمران / مش الفرح عدى ... من بكره نرجع للدكتور تانى
هند / عمك عباده بيقول تطلع الجبل تركب خيل هتفك شويه
عمران / تمام بس هو الدنيا امان دلوقت ؟
هند / ما اعرفش دى مش شغلتى انا دى شغلانتكوا انتوا
عمران / هرتب الموضوع و ربنا يقدم اللى فيه الخير
هند / هو انت ما بتكلمهاش خالص ؟
عمران / بحاول اديها مساحه خصوصا انها ... هى بتقول انى ممكن اعايرها بعدين
هند / ايه الهبل ده
عمران / شوفتى
هند / هبقي اتكلم معاها
عمران/ انا شايف اننا نديها مساحه شويه نصبر و ما نضغطش عليها باذن الله هتبقي احسن
هند / كنت فاكره كدا بس هى حرفيا كل يوم اسوء حتى الفرح قبل الفرح غير بعده بكتير ما اعرفش بقي حد قال ليها حاجه و لا عمل حاجه بس هى بتقول لا
عمران / نور كانت ضايقتها مره
هند/ و الموضوع ده خلص اعتقد
عمران / بس وارد يتكرر طول ما نور مش فاهمه حاجه وارد يتكرر
هند / و احنا ناويين نفهمها و لا ايه ؟
عمران / اهى دى نقطه محيرانى هو احنا هنقدر نخبى لحد امتى
هند / لحد ما ربنا يريد و بعدين احنا مش بنخبى احنا بنقول المعلومه فى وقتها و كل اللى حصل ده ما يخصش حد نحكى عنه ليه لما يجد جديد نبقي نتكلم
عمران / هينفع ؟
هند / ما حدش له حاجه عندنا و كل واحد فينا ليه ظروفه سبها لله
عمران يهز راسه هند تطبطب عليه
هند / كلمها يا عمران ... كلمها يا حبيبي
..........................
فى اوضه حاتم
راجل واقف قدامه حاتم يحدف له ظرف الراجل يفتحه يشوف فيه صور مهره و عمران و ورقه فيها بيانات حاتم يشاور له يمشي الراجل يهز راسه و يمشي ثوانى و ابوه يدخل
الراجل / انت ناوى على ايه
حاتم يشاور له يسكت و يباصي له ورقه و قلم
حاتم / هصفى شغلى هنا و اسافر مش سلق بيض هو
حاتم يكتب " مش هعمل حاجه و مش هتحرك من مكانى ما تخافش"
الراجل/ يا ابنى الناس دول احنا مش قدهم
حاتم / عارف انك وعدتهم انى هسافر و انا ما قولتش لا هسافر ... بس ما ينفعش ارمى تعبى طول الفتره اللى فاتت كله فى الارض يومين تلاته بس و هخلص كل حاجه و اسافر و الله
الراجل / و تضمن انهم يسكتوا على اليومين دول ؟
حاتم / هو انا بعمل حاجه دا انا بدير الشغل كله من اوضتى
الراجل / حاتم
حاتم / بابا هو انا عمرى كسرت لك كلمه قبل كدا
الراجل / و انت من امتى ريحتنى
حاتم / امال مضايق من ايه بقي المرادى
الراجل ينفخ و يسيب المكان و يمشي و حاتم بيضحك
.........................