الكبيره ٢ بقلم / لولو_محمد

الحلقه ١٤١

(((((( الكبيره ٢)))))))
#لولو_محمد
الحلقه ١٤١
صابر / انتى عامله ايه ؟
نسمه / هعمل ايه يعني ؟! العادى ... كل اللى بفكر فيه دلوقت انى اروح لعيالى ... تعرف بفكر بجد اخدهم و اعيش فى مصر هنا و لا فى اى حته بعيد عن البلد ... بس على راى المثل قولت للنكد انا رايح اتفسح قالى وراك وراك هو انا مكسح
صابر يضحك
نسمه / انا مش عاوزه عيالى يبقوا ضعاف زيي عوزاهم يعرفوا يدافعوا عن نفسهم بس ما عنديش فكره هعلمهم دا ازاى
صابر / بس انتى عمرك ما كنتى ضعيفه يا نسمه
نسمه / اكشف نظر
صابر / احنا ما بنختارش اهالينا فاكره لما قولتلك كان نفسي ابقي ظابط
نسمه / بس تنسيقك ما جابش فبقيت دكتور
نسمه تضحك صابر مش بيضحك
صابر / بقيت نسخه من ابويا كبير مطاريد الجبل
نسمه / ابوك ما كانش وحش ظروف و اتفرضت عليه و كان راجل يتحلف بيه و ينضرب بيه المثل
صابر / اقولك حاجه
نسمه تبص له بانتباه
صابر / انا عندى استعداد اقعد وشي فى وشك نتكلم كدا العمر كله بس انا مش هقدر أكرر نفس الغلط مرتين ... عدتك فاضل فيها ايام هخلص فيهم الحوارات اللى فيها و اجى اطلبك من ابوكى
نسمه / مش هيوافق ... هو اصلا كل اللى بيعمله ده سواء جوازتى من عبده الله يرحمه و لا حتى فيراس او غيره كل ده بس عشان ما نكنش لبعض
صابر يقوم و يلم حاجته
...........................
صابر/ روحى بالسلامه لعيالك و لما اجى اتقدم لك
نسمه / دا ابويا يا صابر
صابر يبتسم و يروح يفتح لها الباب تبص له و تقوم تروح ناحيه العربيه يسبقها و يفتح لها باب العربيه
نسمه / دا ابويا يا صابر
صابر / خد بالك منها ... هستنى تليفونك لما توصلها تطمنى
نسمه تركب العربيه صابر يقفل الباب
..........................
فى اوضه شاكر
نهى تدخل
نهى / صباح الخير انا بجد اسفه جدا راحت عليا نومه و انا قاعده بس الحمد لله محمود اللى ماسك الدور اللى تحت ستر عليا و خد مكانى ... قولى بقي عامل ايه النهرده
شاكر مبتسم من غير رد فعل نهى تدخل تغير المحلول
نهى / انا خدت الرقم اللى انت عاوز تكلمه من محمود و اتصلت بيه و بلغتهم انك هنا و زمانهم فى الطريق ... انا خدت بالى انك صعيدى بس ما كنتش اعرف ان بلدكوا بعيده اوى كدا بس هو قالى ان فى راجل اسمه فاروق هيجي يقعد معاك و يشوف طلباتك لحد ما هو يوصل
شاكر / هو مين ؟
نهى / الباشمهندس مختار مش هو مشكورا ملانى البيانات بتاعتك ما طلعتش سر حربى يعني و لا حاجه زى ما كنت عامل
شاكر / هتدونى منوم تانى امتى ؟
نهى / لا ما تقلقش انت مش بتاخد منوم و لا حاجه انت هتخلص المحلول ده و تروح تعمل ام ار اى رنين يعني
شاكر / مش عارف أودى جمايلكوا فين
نهى / لما تقوم بالسلامه ابقي افتكرنى بالحلاوة
شاكر / يا خبر ابيض و من غير ما اقوم كدا كدا هتاخديها ... هو ينفع تتصلى ببابا تانى استعجل عم فاروق
نهى / عنيا
نهى تطلع الموبايل و توريله الرقم و تتصل
نهى / بيرن احطه على ودنك و لا افتح الاسبيكر
شاكر / افتحى عادى
نهى تفتح الاسبيكر
مختار / الو ايوه يا نهى يا بنتى خير فى جديد و لا حاجه انا فى الطريق اهو
نهى / خير يا حج ما تقلقش دا بس الدكتور شاكر فاق و كان عاوز يكلم حضرتك
مختار / اديهونى
نهى / مع حضرتك
شاكر / ازيك يا بابا
مختار / الحمد لله يا حبيبي قلقتنا عليك مش عاوزك تقلق عمك فاروق بس هيركب نسمه القطر و هيجيلك على طول و انا كدا كدا فى الطريق
شاكر / هتيجي لوحدك ؟
مختار/ للاسف الدنيا فى البلد مش احسن حاجه فاه هاجى لوحدى
شاكر / مفيش مشكله بس انا كنت عاوز من حضرتك طلب
مختار / اؤمر يا حبيبي
شاكر / هو انت كلمت الجماعه بخصوص البنت اللى طلبت منك اتجوزها و حددت معاد زى ما اتفقنا و لا لا
صمت
شاكر / لو كنت اتكلمت يا ريت تعتزر لهم و لو ما كنتش خلاص انسي الموضوع
مختار / ممكن ما تفكرش فى الحاجات دى دلوقت بكره تخف و تبقي زى الفل
شاكر يضحك نهى تتوتر و تلم نفسها
شاكر / ما تتاخرش يا بابا ... اقفلى يا نهى ... عندكوا صوت امى و لا ابويا بس ... عاوز اكلم صابر اطمن عليه عندكوا صوته هو كمان ؟ ... طب عندكوا صوتى صح ... بصي اعمليلى بقي رساله موحده كدا انى بخير و ابعتيها للكل ... انتوا عسل اوى انتوا بجد مش طبيعين هتستفيدوا ايه يعني من كل ده بجد مش فاهم
نهى / انا مش فاهمه انت بتقول ايه ؟
شاكر / لا فاهمه كويس... الا هى الدكتوره اريج فين ؟ كان المفروض تدخل عليا ممرضه تانيه قال يعني ممرضه شيفت الصبح و كدا
نهى واقفه مرتبكه
شاكر / طلعى حقنه المنوم من جيبك و نيميني لحد ما تلاقي دخله تانيه يمكن تظبط معايا
نهى / عن اذنك
نهى تطلع بره و شاكر بيضحك
.........................
فى مضيفه الزنايته
راجل قاعد قدام عباده
الراجل / يا كبير الموضوع منتهى احنا لو نعرف ان القصه كدا كنا متنا فى اماكنا انما احنا وثقنا فيه و هو باعنا و صغرنا قدام الخلق احنا ما حدش فينا عارف يرفع راسه وسط الناس
عباده/ كل حاجه هتتصلح و كل اللى حصل
الراجل / احنا اتكلمنا بينا و بين بعض و قررنا اننا هنرجع الجبل بطريقتنا بس انا جاى لجنابك عشان تبقي فى الصوره مش بعد ما يتفض المولد نلاقى صابر جاى ينط و جنابك فى ضهره
عباده / لو جاى تبلغنى بقرارك فأنت كبير كفايا انك تتحمل نتايجه انما لو جاى تشور عليا و تاخد رايي فبقول لك الدنيا مش هتتحل بكدا هتخسر رجاله كتير و هم مش هيخسروا حاجه
الراجل / يا كبير دول شويه حريم على كلاب
عباده / و تكنولوجيا ما عندناش ربعها و ما خفى كان أعظم
الراجل / يعني ايه اتعشت على كدا ؟!
عباده / فى عندنا مواضيع اهم من الجبل دلوقت و كدا كدا الجبل هيرجع
الراجل / و لما يرجع يا كبير ايه النظام
عباده / كبيركوا بتختاروه بينكوا و بين بعض و اللى بتتفقوا عليه و بتقبلوا حكمه انا بامن عليه انما غير كدا انا ما جبتش واحد من ولادى و مريسته عليكوا
الراجل / تمام يا كبير كلامك أوامر
....................
فى شقه فاروق
صابر بيتكلم فى التليفون
صابر / لما توصل طمنى و خليها تحت عينك
ناصر يدخل
ناصر / دا دياب ؟! مفيش اى حاجه نمشي وراها ؟
صابر يهز راسه لا
صابر / لو فى اى جديد كلمنى ... تمام فى حفظ الله
ناصر / و بعدين هنفضل قاعدين حطين ايدينا على خدنا كدا
صابر / صوره البت اتوزعت على كل الرجاله و باذن الله هنوصل لها فى اسرع وقت
ناصر / بفكر ارجع البلد
صابر / ما تفكرش يا ناصر مش وقت تفكير دلوقت خالص
ناصر / انت اللى بتقولى انا الكلام ده
صابر / اه انا اللى بقول لك عشان ما تعرضش حياتك و حياه اخوك للخطر خلينا نتحرك بهدوء و
ناصر / هديت انت لما اطمنت على اللى منك اطمنت و بقيت عاقل و بتحسبها انما من كام ساعه بس قلبت الدنيا عليها واطيها مش كدا
صابر / لو كنت مكانى كنت عملت ايه ؟
ناصر / ما انا مكانك اهو
صابر / لا مش مكانى انت مش مكانى دلوقت انت مفيش حد بيقدم لك اختيار ما حدش قالك اعمل كذا و ارجع اخوك انا لو انطلب منى اموت نفسي و اخوك يرجع هسحب سلاحى و هفرغه فى نفوخى من غير تفكير حتى لو مش ضامن انهم يوفوا كلامهم انما انا مفيش قدامى دلوقت غير اننا نستنى لحد ما نلاقى اى دليل نمشي وراه لحد ما نلاقى شاكر و نرجعه بالسلامه و بعد كدا هندكها على نفوخها و نفوخ اللى جابها
ناصر يبص له و ساكت
صابر / باذن الله هنرجع بيه سليم اخوك مش سهل على فكره ما تخافش
ناصر / ربنا يجيب العواقب سليمه
....................
فى منطقه بالقرب من الجبل
رجاله قاعده منهم الراجل اللى كان قاعد مع عباده
راجل ١ / ايوه بس دا كلام عايم ما نفهموش احنا
الراجل / دا كلام الكبير قال هنفوق من اللى احنا فيه و بعدين نشوف موضوع الجبل و كدا كدا انا عرفت ان جماعه ولاد الغازى اللى كانوا فى الجبل كلهم تعيشوا انتوا ما اتبقاش منهم دكر واحد
راجل ٢ / ما تاخذناش يا مرزوق بس لو الحرمه بتاعه السرك تقدر تعمل كل ده بشويه الكلاب بتوعها ما عملتهاش من زمان ليه ؟
مرزوق / تقصد ايه ؟
راجل ٢ / قصدى ان كل ده اتفاق بين الكبير و صابر و الوليه بتاعه السيرك بس عشان شكلهم قدام الخلق عملوا علينا التمثيليه دى
راجل ٣ / يعني ولاد الغازى اغبيه اوى كدا عشان يضحوا بحياتهم بالبساطه دى عشان تمثيليه
راجل ٢ / ضحكوا عليهم زى ما ضحكوا على الناس و اشتروا أراضيهم و الحكايات اللى سمعنا عنها
راجل ٣ / بس الحكايه دى ما تطلعي من الزنايته و ان طلعت الجوارحه ما يسكتوش
راجل ١ / انا برده شايف انها مش تمثيليه و لا حاجه ... البلد وقعت و ما عادش ليها كبير و بقالهم ياما بيحاولوا يلموا المواضيع دى و الدنيا فرطت منهم
مرزوق / انا كمان حاسس كدا
راجل ٤ / يا راجل اتقى الله
مرزوق / البت بتاعه السرك طلعت و لا نزلت عيله قد كدا كفين على وشها يرقدوها ... طب و الله اخرها كف واحد و تطب ساكته دى بسكويته
راجل ٢ / بسكويته من بره انما من جوه دنيا تانيه دى من ساعه ما خطت البلد و الدنيا والعه و ما حدش عارف يقف فى وشها و سمعت برده ان الخواجه ابو عيون زرقه فى ضهرها
راجل ٥ / فى ناس بتقول انها اخته الصغيره
راجل ٣ / أصدق نفس الكلاحه
راجل ٦ / طب ما لو زمانها هو اللى جاى ما نشوف مصالحنا يا رجاله
مرزوق/ تف من بقك بقي بعد ما كنا أسياد الجبل هنشتغل تحت ايد حته بت شمال و لا ايه ناقص تلبسونا طرح بالمره
راجل ٣ / طرح ايه دول ما بيلبسوش حاجه خالص
الرجاله تضحك
مرزوق / احنا بنتكلم جد كلنا عارفين ان الجبل مليان خير و دهب و احنا سهرنا ليالي ننقب و نحرس فيه ما ينفعش بعد كل ده نرجع بيوتنا ايد ورا و ايد قدام و برده مش هينفع نفضل حاطين ايدينا على خدنا لحد ما حد يتكرم و يحل لنا الموضوع و برده ما حدش يقولى نتفق مع بنت الكلب دى
راجل ١ / يعني انت شايف ايه
مرزوق / مشكله صابر انه كان بيشوف لوحده و احنا كنا بنقول حاضر و نعم و امين عشان كدا لما وقع وقعنا كلنا معاه
راجل ٢ / صابر كان ذكى و متعلم و ما ينضحكش عليه انما احنا
مرزوق / صابر من غيرنا فى ضهره مجرد حته عيل ما فلحش فى كليه الطب ما كانش حاجه يعني أقل حد فينا لو كان اتعلم مكانه كان بقي احسن منه مليون مره
راجل ٣ / مالك يا مرزوق سخننان على صابر كدا ليه امال لو ما كنتش دراعه اليمين
مرزوق / كان غالى قوى على قلبي لحد ما غدر بينا الغدره السوده دى ... باعنا و خلع ابن الحرام
راجل ٤ / ملخص الكلام انا شايف اننا نلم بعضينا و نرتب سلاحنا و نستني كلام الكبير
راجل ١ / انا شايف اننا نلم بعضينا و نرتب سلاحنا فعلا بس نطلع عليها احنا طلعه واحده تنضف الجبل من كل اللى فيه
راجل ٥ / ما هو ما فيهوش غير شويه حريم و كلاب بس اللى شوفناهم بيعملوه فى ولاد الغازى يخلينا نفكر فيها تانى
راجل ٢ / خفت و لا ايه ؟
راجل ٥ / مش مسأله خوف بس الموضوع مش بالبساطه دى
مرزوق / احنا نجهز كام عربيه مصفحه و نطلع فى فتحه السقف بكام ار بى جاى على كام مدفع و نخلص الليله من جوه العربيات
راجل ٦ / و هى العربيات هتطلع قد ايه من الجبل و بعدين الدرونز هنعمل فيها ايه احنا محتاجين سي دياب معانا فى الطلعه دى
راجل ١/ معاك حق الموضوع مش قليل
راجل ٣ / نشوف مدفع من اللى بيوقعهم دول و بكدا مفيش اى درون هيعرف يهوب من المكان و نبقي استفردنا بيهم و حبسناهم فى الجبل و اللى ينزل منهم نستلقاه احنا و نشوف هيقدروا يقعدوا فى الجبل من غير اكل و لا شرب قد ايه يوم و لا اتنين و الكلاب اللى مستقوين بيها دول هيدوروا عليهم و ياكلوهم هم
راجل ١ / يا أبن العفاريت طب و الله جامده
مرزوق / جامده بس برده محتاجه حاجات مش موجوده غير عند سي دياب يعني لفينا لفينا و رجعنا لنقطه الصفر
راجل ٢ / انا بقول تاخد بعضك و تطلع على الشركه تتكلم معاهم و تشوف هيطلع منهم ايه ما يمكن تعجبهم الفكره و يطلعوا معانا و تبقي طلعه واحده
مرزوق / انتوا ايه رايكوا فى الكلام ده ؟
الكل موافق
مرزوق / على بركه الله
.........................
فى سرايا الزنايته
مهره رايحه ناحيه المطبخ و عمران قاعد على السلم
عمران/ بس بس
مهره تبص تشوفه تبتسم و تروح تقعد جنبه و تشاور
مهره / قاعد هنا ليه ؟
عمران / حاسس ان فى حد باصص لى فى حياتى... مش كان زمانا متجوزين دلوقت ؟
مهره تشاور / اكلت ؟
عمران / ما تغيريش الموضوع بقولك مش كان زمانا متجوزين دلوقت؟
مهره تشاور على رجله
عمران/ ودى مالها باى حاجه اصلا عائق فى الجواز يعني
مهره تشاور / انا كدا كدا العطله مش من عندى فستانى جاهز انت اللى عملت تعديلات فى الاوضه و عاوز البانيو
عمران/ كنت حمار
مهره تضحك
عمران / انا ابويا قالى انت غبى سيبك انتى من شويه الهندسه دول انا اساسا مفيش اغبى من كدا جيت على المفيد و عطلت
مهره تضحك
عمران / ربونا ان الراجل ما يرجعش فى كلامه بس انا هموت و ارجع فى كلامى اوى 
مهره تشاور / و ايه اللى مانعك
عمران / مش هيبقي عيب يعني ؟
مهره تشاور / قولت لك فستانى جاهز بس هتعمل ايه مع عمك
عمران / عمى مين ؟ مغاورى ؟! ااااه دا انا سقطته خالص ... طب اعمل ايه ؟
مهره تهز راسها ما اعرفش
عمران / اصلا البلد كلها والعه و اللى حصل فى الجبل و هنا ... بتخيل نفسي داخل عليهم فى وسط كل الهرى ده و اقول لهم عاوز اتجوز ... دا طلعت تنح جامد على كدا
مهره تشاور / هو انا ينفع اقول انى عندى نفس التناحه؟
عمران / احلفى
مهره تشاور / بجحه اوى صح ؟
عمران / يعني ايه الكلمه دى ؟
مهره تكتب على السلمه بصابعها و عمران متابعها
عمران / بجحه ؟! دا هو ده المطلوب إثباته... هيحصل ايه يعني لو قولتى بحبك دا انا طلعت روحى كتير عليا يعني لما احس انك عوزانى زى ما عاوزك يعني ايه كخه ما استاهلش يعني ؟
مهره تشاور / انت سيد الرجاله كلها
عمران / و انتى روحى من جوه يا مهره ... اقسم بالله بحبك
مهره تشاور / انا كنت رايحه اعلق على شاى اعمل لك ؟
عمران / احلفى ؟!! اعملى مش هيبقي قله مزاج من كله
مهره تبتسم و تقوم و عمران حاطت ايده على خده
.........................
فى الشركه
دياب قاعد مع الرجاله
دياب / هى فكره مش وحشه بس احنا برده مش هنقدر ناخد اى خطوه دلوقت
مرزوق / الله ليه بقي
دياب / عشان هى خاطفه شاكر و اى خطوه مش محسوبه ممكن تعرض حياته للخطر
راجل ٢ / ما احنا بعد ما نتحفظ على البنات بتوعها نساومها على سى شاكر
دياب / المشكله انك ما تضمنش رد الفعل و لا تضمنوا قيمه البنات دول عندها ما يمكن تقول ولعوا فيهم ؟
مرزوق / يعني احنا هنفضل قاعدين حاطين ايدينا على خدنا زى الحريم كدا
دياب / مؤقتا احنا كدا كدا مش ساكتين و بعدين انتوا مش صغيرين و لا احنا غاصبينكوا على حاجه بس الصوره واضحه قدامكوا و خدوا القرار اللى يناسبكوا
راجل ١ / انت بتقول ايه يا سي دياب سي شاكر ده واحد مننا و مش اى واحد يعني اكيد مش هنجازف بيه بس احنا بس بنقول اننا ماينفعش نسكت على الوضع ده احنا لازم نتحرك و ناخد موقف و نجبرها هى مش هى اللى تجبرنا
دياب/ احنا كدا كدا مش ساكتين بس المسأله هتاخد وقت مش اكتر
الباب يخبط و وفاء تدخل
وفاء / انا اسفه بس لقينا البنت
دياب / عن اذنكوا
دياب يقوم يجرى مع وفاء يروحوا على المكتب منصور شغال على جهاز
دياب / لقيتوها فين ؟
منصور/ بتفصل كاميرات فيلا حاتم ... واضح انها رايحه لابوه مفيش غيره جوه
دياب يقعد على جهازه
دياب / بس الحراسه عاليه جدا
وفاء / ما هم قدروا ياخدوا حاتم من وسطهم عادى ... الفكره انها رايحه بطولها
دياب يشوف الفيديو و البنت بتنط تطير من فوق السور يفتح بقه و يرفع التليفون
دياب / ايوه يا خالى معلش بسرعه اتأكد أن بدله نجاه فى عربيتك... ضرورى حالا ابوس ايدك و كلمنى سلام
دياب يقفل الخط و يتصل
دياب / بعد السلام بسرعه كدا قولى هو البدله اللى جبتها لنجاه سهل اى حد يجيبها
جوزيف / امشي وراها بس ما تحتكوش بيها مش هتقدروا عليها و هتهرب منكوا و تختفى و ان قدرتو مش هتوصلكوا لاى حاجه دول مش بيتكلموا بسهوله
دياب / ما اعتقدش ان اللى بتقوله قابل للتطبيق
جوزيف / هى كدا كدا عاوزه تعرف مين اللى ورا اللى حصل فهى داخله تاخد معلومات و المعلومات دى هتفرق معانا احنا كمان فانا لو منك استنى اما تخلص
دياب / تخلص ايه ؟ انت مش لسه قايل انها كدا كدا مش هتتكلم و مش هنقدر نوصل منها لحاجه ؟
جوزيف / انت مش هتوصل بس امايا هتوصل و هتنضف الموضوع و انت هتستفيد على الجاهز
دياب / انا مش مقتنع بس هبلغهم برأيك
دياب يقفل
منصور / انت مدى للواد ده أكبر من حجمه على فكره
دياب يشتغل فى صمت
وفاء/ الرجاله وصلوا و مستنين الأذن بالدخول
دياب / لا
وفاء / كل الكاميرات حوالين الفيلا واقفه دى فرصه كويسه
دياب / ما حدش عارف هيدخلوا يلاقوا ايه جوه ما يمكن تقتله و فجاه الكاميرات تشتغل و يلبسوها لما تخرج نبقي نتعامل معاها فى الشارع
وفاء / انا كدا كدا مسيطره على الكاميرات يعني لو اشتغلت هفصلها
دياب / مش هندخل بيوت الناس يا وفاء
منصور / مفيش غيره جوه هو و اللى شغالين
دياب / اسمعوا الكلام
منصور / خليك كدا ماشي وراه اما هتلبسنا فى الحيط
دياب / امتى سمعت كلامى و لبستك فى الحيط يا منصور
منصور / عمرك بس دا لما كان كلامك من راسك مش كل شويه ايوه يا يونس اللحقنى اعمل ايه
دياب / دا انا
وفاء / مش وقته يا جماعه الرجاله فى الشارع و احنا عنيهم ما ينفعش كدا
منصور و دياب يبصوا لبعض و كل واحد يشتغل فى صمت
منصور / الدرونز فى أماكنها هحرك واحد جوه استطلاع
دياب / خليك حزر ما تخليهاش تاخد بالها منه
وفاء/ هى اوريدى عارفه اننا موجودين فى درونز مش تبعنا هناك ... تلاته ...لا اربعه فى واحد كمان هناك اهو
دياب / هنستناها لما تطلع
وفاء / تمام بعت لهم
..................
فى فيلا حاتم
ابو حاتم نايم فى السرير مش بيتحرك
اريج / مش عوزاك تقلق خالص الحقنه دى اه بتخليك مش قادر تتحرك بس اوعدك انك هتحس بكل حاجه عادى جدا
الراجل / انتى مين ؟
اريج / لا لا لا انا اللى بسأل هنا ... انت اتفقت مع ولاد سليم الغازى على انهم ياخدوا البلد و اديتهم فلوس و سلاح و عربيات تقدر تقولى جبت الحاجات دى منين  ... مين اللى ضحك عليك و دبسك فى الحوار ده
الراجل / انا مش عارف انتى بتتكلمى عن ايه
اريج / بتكلم عن ابنك ... تحب تشوفه تانى؟ انا لحد دلوقت بتكلم معاك بلساني عشان لو ايدى اشتغلت هتزعل منى جامد
الراجل / ابنى ؟! ... انتى ... انتى تعرفى فين ابنى؟!
اريج / اه ابنك معايا بس للاسف مش هقدر اكدب عليك و اقولك انك هتشوفه تانى... دا لمصلحتك انت صدقنى ... ابنك عمل حاجه وحشه اوى و زعل ناس ما ينفعش يحتك بيهم خالص و انت لو ما تعاونتش معايا هتزعلهم انت كمان
الراجل / انا عندى فلوس كتير جدا خدى كل اللى انتى عوزاه خديهم كلهم بس رجعى لى ابنى ... ارجوكى ... انا هسفره امريكا زى ما قولت انا هعيد ربايته من اول و جديد
اريج تفتح بوكس صغير جدا فيه ابر صغيره و رفيعه تاخد واحده و تروح تمسك ايد الراجل و تحط ابره تحت ضافره الراجل يصرخ
اريج/ انا مش مبسوطه باللى بيحصل بس أنت لو ما ادتنيش اللى انا عوزاه هضطر ازود ... انت عاوزنى ازود ؟
الراجل / لا لا لا ارجوكى لا انا هقول انا هتكلم
اريج تشيل الابره
الراجل / انا كنت مسافر اتفاوض مع الزنايته على ابنى و اعتزر راجل اتصل بيا و قالى مش هتقدر عليهم لوحدك تعال و قالى اكلم اولاد غازى و جاب لى ناس اجيب منهم سلاح و عربيات مصفحه بس انا اللى دفعت الفلوس كلها و انا اللى اتفقت معاهم كمان هو بس دلنى عليهم
اريج / تعرف توصفه
الراجل / طويل و ابيض و مفيش علامات مميزه شعره اسود و عنيه سوده و ملوش دقن و مفيش اى حاجه مميزه يعنى جسمه رفيع و رياضي و عروق ايديه بارزه انا مش لاقى اى حاجه اقولها ... انا ما اعرفش بس لو شوفته هعرفه
اريج / يعني واحد ما تعرفش عنه اى حاجه قالك ارمى نفسك فى النار هترمى
الراجل / كنت بحاول اخد الجبل عشان اساوم بيه قصاد ابنى بس الناس ما بيردوش يقولوا ايه اللى حصل
اريج/ ماتوا كلهم
الراجل يعيط و اريج بتطلع موبايل و تلعب فيه
الراجل / انا كل اللى كنت عاوزه حاتم ابنى انا عاوز ابنى خدوا كل حاجه كل الفلوس و الشركات خدوا كل حاجه ... اقتلوني حتى بس سبوه
اريج / هوريك صور و انت تقولى لو الراجل اللى ضحك عليك واحد منهم
الراجل / طب هو كويس ؟
اريج تعرض الصور
اريج / ركز عشان لو ما قدرتش تطلعه من دول انا مش هيبقي عندى اى سبب تانى اسيبك عايش عشانه
الراجل / مش فيهم
اريج / انا لسه ما خلصتش لما تشوفه قول
الراجل / مش فيهم ... هو ده هو ده
اريج توقف على صوره بابلو
اريج/ انت متأكد
الراجل / ايوه ... هو ده
اريج/ شكرا لتعاونك معايا و ارجوك سامحنى لو كنت وجعتك شويه تأثير الحقنه هيروح و هتقدر تمارس حياتك عادى ... انا لو منك اتجوز و اخلف غيره افضل ... سلام
اريج تفتح الباب و تنزل السلم الرجاله فاقده الوعى على الارض تمشي وسطهم لحد البوابه تفتحها و تخرج تمشي جنب السور لحد ما توصل لموتوسيكل تركب و تطير
…………………………..
فى البلد
امايا بتمشي فى الشارع تقف عند مطعم مشاوي
امايا / الريحه حلوه اوى تسلم ايدك... اوزن لى كل اللى عندك و شوف يعملوا كام
الراجل / شطبنا ما بنبعش
امايا/ متاكد من كلامك ؟ انا شايفه عندك لحمه كتير ... ما تخافش هحاسب مش هاخدهم ببلاش ... فلوس اهى
امايا توريله رزمه فلوس
الراجل/ اسمعى يا بنت الناس الواحد مننا يموت من الجوع و لا يدخلش على بيته قرش حرام
امايا / و ماله ... نشوف الموضوع ده لما تموت من الجوع
امايا تبتسم و تمشي
الراجل / ربنا يخلصنا من اشكالكوا
....................
فى جراج
اريج تركن الموتوسيكل و تفضل قاعده عليه تلعب فى الموبايل و بعدين تقوم و تتمشي فجاه صابر و ناصر و رجاله كتير يحاصروها و رافعين سلاحهم
صابر / و لا خطوه
اريج / اخص عليك دا بدل ما تشكرني انى رجعتهالك
ناصر / اخويا فين يا بت
اريج / شاكر ؟! بخير ما تقلقش ... هنفضل واقفين نبص لبعض كدا كتير
صابر / ما تجبريناش نزعلك
اريج / انت أذكى من كدا أنت عارف انا لابسه ايه الطلقه الوحيده اللى ممكن تأثر فيا هتكون فى دماغى و ساعتها انتوا اللى هتزعلوا مش انا
صابر / هنخسر شويه وقت مش اكتر
اريج / و هو الوقت ده حاجه بسيطه
ناصر / انتى بتماطلى ليه مفيش اى مجال للخروج احنا محاصرين المكان كله
اريج/ متاكد؟ ... متاكد ان انتوا اللى محاصرينى مش العكس ؟
الرجاله يبصوا لبعض اريج تضحك و تبص لناصر
اريج / فرق كبير اوى بينكم نسخه فى الشكل بس الطبع مختلف خالص هو ثابت عنك انت مهزوز
ناصر / اخرك هاتيه
اريج / جاهز يعني ؟ ... كلكوا جاهزين ؟ ...  ثرى ... تو  ... ون
فجاه النور يطفى و صوت خبط و تكسير و فجاه النور يجي صابر مش موجود
ناصر / صابر ...صابر ... صابر
راجل ١ / شكلها هربت ما لهاش اى اثر
الرجاله تبص لبعض
.....................
فى البلد
الراجل بيشوى كفته فجاه يحصل ماس كهربى و النار تمسك فى المحل و الناس تتلم تحاول تطفيها مش عارفين و الستات بتصرخ الرجاله يشدوا الراجل بره و يفضلوا يحاولوا يطفوا النار ما بتنطفيش و بتزيد
.......................
فى اوضه شاكر
شاكر نايم فى سرير نهى تدخل
نهى / جايبالك خبر حلو
شاكر / خير بابا قدر يوصل اخيرا
شاكر يضحك
نهى / لا بس بعت لك صاحبك
نهى تفتح الباب اكتر و يدخل اتنين رجاله ساحبين سرير نايم عليه صابر يساخروا سرير شاكر و يحطوا السرير التانى جنبه و صابر فاقد الوعى
شاكر / صابر ... صابر
نهى / ما تقلقش شويه و هيفوق و اهو تسلوا بعض عشان شكلكوا مطولين هنا
اريج تدخل
اريج / عامل ايه النهرده
شاكر / اخرتها ايه ؟ قوليلى هتكسبى ايه من كل ده
اريج/ بدأت تتوتر و لا ايه لا لا ازعل اوى
شاكر / هو كويس؟!
اريج / هو اللى مش عاوز يهدى انا رجعت له نسمه عاوز أيه تانى ما يروح يتجوزها و يسيب البلد و يمشي و لا يكون فاكر انه لو قدر يرجعك هيقدر يرفع راسه وسط الناس تانى
شاكر / و هو ايه اللى يطاطى راسه اصلا
اريج / هو انت ما عرفتش اللى عمله و لا ايه مش باع الجبل و ضرب نار على دياب ... سيبك انت اهو شرف جنبك ... انا كان ممكن احطه فى اوضه تانيه بس انا قولت تسلوا بعض عشان مش كل شويه تقرفونا
شاكر / شايف ان المعامله اتغيرت جامد ايه فقدتى الأمل تجنديني و لا ايه طب كنتى حاولى تساومى مثلا على حياته يمكن كانت تجيب معايا
اريج/ كانت هتجيب ؟
شاكر / لا
شاكر يضحك
اريج / انت مش واخد بالك انه ما عادش له لازمه عندى خلاص
شاكر/ يعني مستغنيه عن مخازن الدهب اللى ما حدش يعرف مكانها غيره ؟!
اريج / الجبل معانا هندور براحتنا
شاكر/ بس المخازن مش فى الجبل المخازن فى ال ...
شاكر يضحك
شاكر/ ما اعرفش عشان ما حدش يعرف غيره اصلا
اريج/ شكرا يا شاكر انت قدمت لنا خدمه كبيره اوى دلوقت ... كل اللى محتاجين نعمله اننا نرجع نسمه و نساومه عليها و هو مشكورا مش هيستخسر فينا المعلومه خالص
اريج تمشي و هى بتضحك و شاكر مش بيضحك
نهى / محتاج منى اى حاجه
شاكر / اطلعى بره
نهى / طلعت
نهى و الرجاله يطلعوا بره
شاكر / صابر ... صابر ... صابر فوق ... صابر
...........................
فى مضيفه الزنايته
نسمه قاعده مع اخوها
اخوها / و انتى بقي فاكره ان ابوكى ليه علاقه باللى حصل ده ؟ليه لقيكى فى الشارع ؟
نسمه / انا لا فاكره و لا انا بفكر اصلا انا لحد دلوقت مش فاهمه اى حاجه من اللى بتحصل انا واحده اتقالى امك بتموت جريت معاها و قولت انا اولى بامى و دخلت العمليات و صحيت لقيت نفسي فى مكان تانى مع ناس بيقولولي ان امى مش عيانه و انهم كانوا بيضغطوا عليا عشان اتجوز
اخوها/ و انتى طبعا صدقتيهم
نسمه / انا ما صدقتش حد و اقولك حاجه انا مش فارق معايا حاجه غير ان امى تروح بالسلامه
اخوها / و لما تروح انتى عارفه ايه اللى مستنيها ؟ انتى عارفه ابوكى فين اصلا كل ده ليه اساسا فهميني
نسمه / انا نفسي افهم لو تقدر انت تفهمني يبقي كتر خيرك ليه كل ده انا بيجرالى كل ده ليه قولى انا عملت ايه انا كل اللى عوزاه فى الدنيا دى انى اعيش و اربى عيالى فى حالى
اخوها / و صابر  ؟!
نسمه / ماله صابر عمل ليكوا ايه الجدع ده كان هيموت عشان يرجع ابنى الجدع ده ما شوفناش منه اى حاجه وحشه و مع كدا كارهينه
اخوها / ما تصيعيش انتى عارفه كويس قصدى ايه
نسمه / و اخرتها ايه يعني ؟! انا مش هتجوز فيراس خصوصا بقي بعد اللى حصل ... انا اصلا مش عارفه هتعامل مع أمى ازاى بس بصبر نفسي و اقول على الاقل طلعت سليمه و ما فيهاش حاجه و قدر و لطف ... امك رمتني فى النار و مبكيتش عليا
اخوها/ امك زيها زيك زى ابوكى كلنا انضحك علينا
نسمه / و كالعاده بدل ما تشوفوا مين اللى بيلعب بينا الكوره تجروا على اضعف واحده فى الليله دى و تشيلوهالها مش كدا
اخوها/ ما حدش شيلك حاجه بس برده ما ينفعش نسيب ابوكى و امك يتاذوا
نسمه / قالولى مستنين أمى توصل اول ما توصل هنقعد و نشوف مين الغلطان
اخوها/ و ان طلع ابوكى هتعملى ايه هتسبيهم ياذوه هتقفى تتفرجي على ابوكى و هو بيتهان من اللى يسوى و اللى ما يسواش لمى الليله يا نسمه و هاتى عيالك و روحى معايا و قولى للكبير بينا و هنحلها دول مهما كانوا ابوكى و امك
......................