الكبيره ٢ بقلم / لولو_محمد

الحلقه ١١٥

(((((((( الكبيره ٢)))))))
#لولو_محمد
الحلقه ١١٥
مهره تكتب / انت بتبتذنى !!
حاتم / اخص عليكي و انا وش كدا برده ... لو كنت عاوز ابتذك كان أسهل بالنسبالى حاجات تانيه كتير ... اولهم اللى انتى محموقه عليه ده ... لسه فاضل له ماده سهل اوى ما يحضرهاش و اعتقد ان دى حاجه هتقربنى اوى من باباكى انا اسمع انه ما بيطيقوش لا هو و لا اهله
مهره تلم نفسها و تهدى
حاتم / كنت متأكد انك عاقله
مهره تبص له الوايتر يحط الليمون
حاتم / روقى دمك
مهره تبص الناحيه التانيه
حاتم / انا مش بحب أكرر كلامى مرتين على فكره
مهره تبص له و بتعانى انها تدارى غضبها حاتم يبتسم
حاتم / تحبى اطلب لك حاجه تانيه يمكن ما بتحبيش الليمون
مهره تاخد الكبايه و تشرب
حاتم / لما تروحى قيسي الدريس و اتصورى و ابعتيلى صورتك بيه ... و يا ريت تلبسي معاه الكوليه اللى كنت جايبهولك
مهره تبص الناحيه التانيه
حاتم / انا بنام بدرى يعني اخرك الساعه اتناشر اتفقنا
مهره تبص له يبتسم تشرب و هى ساكته
........................
فى فيلا على
على / انا مش عاوز ادخل فى الحوارات دى على فكره
عمران / يعني اللى يحب يتقدم لبنتك يروح لمين طيب
على / امها عندكوا
مختار/ كنت متوقع منك رد تانى
على يبص له
مختار / مثلا اللى جوزهالك المره اللى فاتت يجوزهالك المرادى ... انت عرفت الحقيقه
على / ما عرفتش و مش فارق معايا اعرف
مختار / طب ممكن تشرح لى انت خايف من ايه
على / انا مش خايف من حاجه انا ما عدش عندى اللى اخاف عليه خلاص ... كل حاجه ادمرت ... كل حاجه
مختار / لسه بناتك ربنا يبارك لك فيهم فوق لهم بقي و خد بالك منهم
على / انهى بنات ... اللى خطوبتها اتفسخت و انفضحت و هى ما عملتش اى حاجه و لا التانيه ... اللى كلكوا عارفين المصيبه بتاعتها
مختار/ اللى برده ما عملتش اى حاجه
على / و لا انا عملت
مختار/ ما دى المصيبه يا ريتك عملت يمكن ما كانش حاجه من دى حصلت ... اعمل بقي المرادى انتوا ايه مشكلتكوا انتوا الاتنين لا انت و لا اكرم عاوزين تعملوا اى حاجه صح فالحين بس تعكوا و تيجوا فى الصح تقولوا تعبنا مش لاعبين
على / انت عاوز منى ايه بالظبط هى مش طليقته على الورق ما يردها على الورق و ياخدها بعيد عن هنا و ما يرجعهاش تانى
عمران / دا كلامك
على / و بسرعه
مختار / انت عارف حاجه صح ؟!
على / انا ما ليش دعوه بالمشاكل دى قولت
مختار / دى بنتك يا بنى ادم
على / و بنتها هى كمان على فكره ... على الاقل مهره عندها انتوا جنبها انما ايلين ما عندهاش
عمران / ايه اللى دخل ايلين فى القصه انا مش فاهم
على / قولت مش عاوز ادخل فى اى حوار من فضلكوا ... اعملوا اللى انتوا شايفينه صح... اهم حاجه بسرعه و بعيد عنى
عمران / يلا يا بابا مفيش فايده
مختار يهز راسه و يقوم
......................
فى اوضه جابر
جابر بيتكلم فى التليفون مع نجاه
جابر / كل شويه ينط لنا و يرخم و يعطل الشغل بس انجزنا الحمد لله واضح جدا ان الإنفاق دى طلعت أعمق مما تخيلنا تقريبا كدا سحبت تلات اضعاف كميه الخرسانه اللى كنت عامل حسابى عليها
نجاه / و عملت ايه
جابر / المصنع كان شغال بكامل طاقته و الحمد لله ما خذلونيش
نجاه / الحمد لله ... بس دا مش هيمنع الافتتاح بتاع السيرك
جابر / لا ما احنا مرتبين حركه حلوه لحوار الافتتاح ده
نجاه / عملتوا ايه ؟! هو انا ليه ما حدش بقي بيقولى حاجه
جابر / اكيد ما سالتيش
نجاه / يا سلام ... بقولك ايه ... ما دام خلصت الشغل اللى وراك ما توديني مصر بقي
جابر/ اهو ده شكله كدا طلع حوار... منصور اتصل بيا النهرده كان بيخبط راسه فى الحيط
نجاه / لا حول و لا قوه الا بالله ليه بس
جابر/ بيقولى مش هنعيده تانى هو عمران ده غبى و لا ايه البت هتضيع منه ... بيقولى يروح يلحق يردها قبل العده ما تخلص و بكدا هيمنع الحيوان ده يقرب منها نهائى
نجاه / و دا ينفع
جابر / اه ينفع
نجاه / بس هم ما دخلوش يعني ما لهاش عده
جابر / اثبتي انهم ما دخلوش بقي
نجاه / هو ينفع
جابر / كل حاجه تنفع يا نجاه كل حاجه فى الدنيا دى تنفع
نجاه / طب حد كلم عمران فى الموضوع ده
جابر / مش عارف ما فوقتش ما انا على يدك مسحول
نجاه/ الله يعينك طب اكلمه انا
جابر / اهدى يا ست البنات اكيد منصور كلمه و بعدين سمعت كدا انه اعترف لها بحبه
نجاه / احلف
جابر / ما اعرفش سمعت ... بس ما دام الخبر جاى من منصور يبقي حقيقي
نجاه / هو مش هيبطل يتسنط علينا بقي و لا ايه
جابر / لا يا حبيبتي دا مخترق تليفون مهره عشان امانها و بيحاول يدخل تليفون امها و اخواتها و اللى اسمه حاتم ده بس غالبا كدا هيباصيها للجهبز بتاعنا
نجاه / يونس !!
جابر / هو فى غيره
نجاه / هيعملها
جابر / تمام
نجاه / ما تعرفش اتحسن و لا لسه تعبان
جابر/ قدر يسافر مصر يعني مش راقد ... دا على اساس انه كان قاعد اصلا ما انتى عرفاه فرقع لوز
نجاه / ربنا يديه الصحه
جابر / احنا و هو أن شاء الله
نجاه / امين ... انا جعانه تاكل حاجه
جابر / تسلمى عندى اكل باقي من الغدى
نجاه / ما تنساش تحطه فى التلاجه ليبوظ
جابر / ما تقلقش يا وحش و غسلت الطبقين كمان
نجاه / دا انت عسل اقسم بالله
جابر / عاوزين ننول الرضا
نجاه / اقفل انا غلطانه انى بكلمك اصلا اقفل
جابر يضحك نجاه تقفل السكه
جابر / يا مجنونه
..........................
فى اوضه كارمن
مهره بتورى كارمن الموبايل
كارمن / ازاى يقولك حاجه زى دى 
مهره تكتب  / يعني حقيقي ؟
كارمن / ايوه من ساعه ما اكرم اختفى و احنا بنسحب فلوس على المكشوف و لما عمران ادخل أمير نخور فى الملفات على اى مصيبه عشان يثبت قدام مجلس الاداره اننا بنختلس فلوس فكان لازم نرجع كل الفلوس اللى صرفناها انا و البنات
مهره تكتب / بس دى فلوسكوا
كارمن / انتى صغيره و ما تعرفيش القانون كويس ... انا كمان كنت فاكره كدا لحد ما لقيت نفسي فى المصيبه دى و طبعا ما كنتش بشتغل و مفيش فلوس
مهره تكتب / و الدهب و المجوهرات و الرصيد اللى فى البنك
كارمن / البنك حساب مشترك اى سحب لازم امضتى و امضه اكرم
مهره تكتب / و الدهب و المجوهرات ... اكرم كان بيجيب لحضرتك هدايا طول الوقت
كارمن / تمام هروح ابيعهم و ادفع لحاتم فلوسه تمام
مهره تكتب / شكرا
كارمن / بس دا هياخد وقت برده ... انا هخسر فيهم جامد اوى ... حاولى تسايريه شويه بس لحد ما اقدر أدبر له الفلوس
مهره تكتب / دا مش طبيعي دا مجنون
كارمن / صدقيني هو مش كدا خالص انا هتكلم معاه و أصلح سوء التفاهم ده هو بيعمل لى خاطر
مهره تكتب / باماره ايه ... باماره الشيكات
كارمن / اتكلمى عدل
مهره تتنهد
كارمن / انا بس بقول ادي له فرصه
مهره تشاور بأيديها مجنون
كارمن / مش حقيقي صدقيني
مهره تكتب / حضرتك مش هاين عليكي تبيعي دهب و هاين عليكي تبيعيني انا
كارمن / اطلعى بره
مهره تحاول تلم الموقف كارمن تروح تفتح الدولاب و تديها الشكمجيه
كارمن / روحى ارميهم فى وشه بس و بعدين المشكله ما اتحلتش يا مهره هنفضل نبيعهم واحده ورا التانيه و فى الاخر هنرجع نداين برده
مهره تكتب / هشتغل
كارمن / حقيقي !! بجد مش عارفه اشكرك ازاى... هتشتغلى ايه ؟! و هتقبضي كام ... انتى عارفه البيت ده مفتوح بكام فى الشهر ؟! بناكل بكام بنلبس بكام ؟! انتى فى ايدك فرصه انك تحافظي لينا كلنا على المستوى اللى احنا متعودين عليه و بعدين انا ما قولتش دلوقت انا بقول نماطل شويه نطول فى الموضوع يمكن الظروف تتغير و يمكن تعرفيه على حقيقته و تحبيه زى ما بنحبه
مهره تمسك دماغها
كارمن / الدهب معاكى بيعيه و خدى دهب اخواتك كمان و بيعي لبسنا لو حكمت بس مهما أخرنا الموضوع الشحاته هى مصيرنا طول ما اكرم مش موجود مفيش امل
مهره تكتب / اكرم هيرجع
كارمن / هتقنعى عمران يفرج عنه
مهره تكتب / هم مش حابسينه هو اللى رافض يرجع
كارمن تمنع دموعها تنزل و تتظاهر بالقوه
كارمن / رافض يرجع لمراته و بناته انتى شايفه دا كلام ناس عاقله
مهره تتنهد و كارمن بتعانى انها تسيطر على نفسها
كارمن / تمام ... كلميه يا مهره لو قدرتى تقنعيه يتكرم و يتعطف و يرجع لنا اكون شاكره جدا لكرم أخلاقك
مهره تحاول تمسك ايد امها تسحب ايدها
كارمن / بس لحد ما يرجع لو سمحتى سايسي حاتم شويه
مهره تبص لأمها برجاء
كارمن / لو سمحتى سبيني لوحدى شويه
مهره ترجع الصندوق لكارمن ما تمدش ايدها
كارمن / حطيه فى اى مكان و اطلعى بره لو سمحتى
مهره تهز راسها و تسيب الصندوق و تطلع بره كارمن تعيط الباب يتفتح و صوفيا تدخل
صوفيا / ها عرفتى تبلفيها... مالك يا مامى فى ايه ... بتعيطى ليه كدا
كارمن تمسح دموعها
صوفيا / ايه صعبت عليكي و لا ايه رجعتى فى كلامك
كارمن / عاوزه حد بتاع كاميرات مراقبه بس يكون ثقه
صوفيا / انا ما اعرفش حد
كارمن / انا اعرف حد ... اطلبيلى حاتم على التليفون
صوفيا / دلوقت ؟
كارمن/ اطلعى بره انا هطلبه بنفسي اطلعى انتى بره و حاولى تصالحى مهره على الموقف بتاع النهرده و اقنعيها ان كان قصدك رومانسيه و حب و كدا
صوفيا/ سهله بس افهم حضرتك مالك
كارمن / جواز حاتم من مهره قليل اوى عليها هى عاوزه حاجه احلى من كدا بكتير
صوفيا / ماما انتى كويسه
كارمن تهز راسها لا صوفيا تخاف
.....................
فى اوضه احلام
احلام بتتكلم فى التليفون بصوت واطى و جنبها مازن نايم
احلام / لسه مدخلاه الحمام من شويه عمره ما هيعملها
قاسم / و انتى بقي بتفضلى طول الليل رايحه جايه بيه على الحمام
احلام / احسن بكتير من أفضل اقلب المرتبه و اغير الملايه و احمى و بعدين مش طول الليل يعني لحد ما انام هو اكيد بينام قبلى بكتير
قاسم / بغير منك على فكره
احلام/ ليه ؟
قاسم / مش عارف انا ابوه المفروض يبقي متعلق بيا جدا
احلام/ ما هو متعلق بيك و بيحكي عنك طول الوقت
قاسم / ليكي... اصله ما كانش بيحكي معايا غير عليكي
احلام / هو ولد حساس بس ذكى
قاسم / على فكره انا اتفقت معاهم هنعمل فرح تانى فى اسكندريه عندنا و خليتهم يجهزوا لنا اليخت عشان نقضي فيه يومين شهر العسل
احلام / و دا امان ؟
قاسم / عيب تسالى سؤال زى ده على فكره
احلام / مش قصدى بس انت عارف ظروفى
قاسم / ما هو ظروفك هى ظروفى انتى ساعتها مراتى يعني اللى يرشك بالمايه ارشه بالدم ما فيهاش هزار دى
احلام / طب احنا هنروح يومين و نرجع و لا
قاسم / هو انتى ما عندكيش استعداد تتعرفى حتى على اهلى يا احلام
احلام / بالعكس يشرفني
قاسم/ صحيح امين كتر خيره لقى لينا شقتين فوق بعض و واحد من المهندسين اللى فى شركه جابر شافها و قال ينفع يتعمل سلم داخلى و ينفتحوا على بعض كنت عاوز اخدك و نشوفها
احلام / مش مهتمه اوى بالموضوع بصراحه ظبطها على زوقك و انا واثقه فيك
قاسم/ دا هيبقي بيتك العمر كله يا احلام على فكره
احلام / ما انا هفرشه انما مش هروح اشوف طوب و حيطان يعني يا قاسم و لا ايه
قاسم / يمكن يكون ليكي راى فى الحكايه تنقلى حيطه توسعى مكان الدنيا نفسها ما تعجبكيش اهو
احلام/ تمام ... نروح نشوفها
قاسم/ انتى مش متحمسه للجوازه دى صح
احلام / لا متحمسه ... بس يمكن خايفه شويه ... مش عارفه بقي التوقيت و لا الظروف و لا دا ايه ..  بس انا مرتاحه ... انت فاهم حاجه
قاسم / بحاول
احلام / انت مش خايف ؟
قاسم / من ايه
احلام / مش عارفه
قاسم / سبيها على الله... على فكره انا مش زوج وحش
احلام / لا دى انا متاكده منها
قاسم / مش بقول راجل وحش بقول زوج وحش
احلام / و ايه الفرق
قاسم/ لا الفرق كبير ... انا ممكن اكون راجل كويس فى كل حاجه بس مش بعرف اتعامل مع مراتى بما يرضي الله مش حنين مش بقدر نكدى شكاى اى حاجه و ممكن اكون مع الناس شديد و عصبى و فيا العبر بس مع مراتى حمل وديع
احلام / الكويس كويس مع كله و الوحش وحش فى كله ... لحظه انت دا معناه انك وحش بره و حلو جوه
قاسم / لا انا حلو فى كل الأوقات
احلام تضحك مازن يتقلب تكتمها
احلام / بقولك ايه كفايا كدا عشان مازن شكله هيصحى على الصوت و انا لسه ما نمتش
قاسم/ لو صحى كلميني اجى اخده 
احلام / سيبها لله ... تصبح على خير
قاسم / و انتى من اهله
احلام تقفل و تاخد مازن فى حضنها و تنام
....................
فى اوضه مهره
مهره نايمه فى الضلمه حد يفتح الشباك و يدخل بالراحه يروح يقفل الباب بالمفتاح و يفضل يقلب فى الاوضه لحد ما يشوف الاسدال يروح ياخده و يديه لمهره و هو بيصحيها فى الضلمه اول ما تشوفه تتفزع
عمران / انا انا اللبسي ده عاوز اقيد النور محتاج اتكلم معاكى ضرورى
مهره تبص على الباب مقفول تلبس الاسدال و تشغل النور
عمران / انتى كويسه ؟
مهره ترد بالاشاره / انت مجنون ازاى تيجي هنا افرض حد قفشك هتعمل ايه مش كفايا اللى حصل فى الامتحان اللى فات انت عندك امتحان بكره الصبح
عمران / و هو اللى حاول يمنعنى الامتحان اللى فات هيسيبنى بكره ما يولع هو و الامتحان المهم انتى ... انتى كويسه حاتم جالك المول و صوفيا سابتك و كان باين عليكي انك مضايقه
مهره تشاور / اكرم لازم يرجع
عمران / مش راضي
مهره تشاور / ماما مديونه بفلوس كتير جدا لحاتم و لازم اكرم يمضي عشان تقدر تسد الفلوس دى و الا هتبيع دهبها
عمران/ ايه العبط ده ... اكرم عامل توكيل عام لمامتك و عامل توكيل ليحيي اللى جبناهولهم بالاداره يعني المفروض الدنيا ماشيه
مهره تشاور/ ما اعرفش تفاصيل بس دا الواقع دلوقت ان ماما ماضيه لحاتم على شيكات بمبلغ كبير جدا ما تقدرش تسده
عمران / كام يعني
مهره تشاور / اكرم لازم يرجع
عمران / هديكى الفلوس كام هى
مهره تشاور / ما اعرفش و مش هقدر ادبسك فى حوار جديد كفايا لحد كدا
عمران / انا هسالك سؤال واحد ... انتى بتحبيني و لا لا .. اقول لك مش عاوز اعرف حتى لو لا هفضل جنبك مهما حصل تمام يعنى مش فارق معايا اعرف ... المهم بالنسبالى ان الحيوان ده يخرج من حياتك نهائى
مهره تشاور / هو انا مش فهماه ساعات يبقي كويس و ساعات يبقي غريب جدا انا مش بفهمه
عمران / انا مش هينفع أطول هنا ..  بس خلى دى معاكى
عمران يديها اسوره جوزيف
عمران/ اديهاله هديه و خليه يلبسها
مهره تشاور / ايه دى
عمران / اسوره عاديه
مهره تشاور / و هو الرجاله بيلبسوا اساور
عمران / جربى و افتكرى السلسله اوعى مهما حصل تقلعيها و انا هشوف موضوع الشيكات ده و اتاكد منه تمام
مهره تهز راسها
عمران / ما تنسيش السلسله
مهره تحط ايدها مكان السلسله و تهز راسها عمران يبتسم و يمشي مهره تجرى تبص عليه و تشوفه و هو بينط السور تبص الناحيه التانيه تشوف واحد من الأمن شافه و بيتكلم فى اللاسلكي تقفل الشباك بسرعه و تجرى تطفى النور و السيكيورتى باصص على اوضتها تحط ايدها على قلبها نفسها عالى جدا تبص للاسوره اللى فى ايدها و تفكر
.........................
فى الاوضه اللى  تحت السلم فى بيت مختار
مختار / انا زهقت منكوا انتوا ايه ما لكوش كبير خالص كدا
عمران يبص الناحيه التانيه
مختار/ تمام ما دام كدا بقي نرجع على قديمه و هتاخدولى البلوك كله اسبرينت لحد الفجر
جوزيف / عنده امتحان الصبح
مختار / دا على اساس ان البوليس مش هيجي يخبط دلوقت ياخده
جوزيف / مفيش و لا دليل واحد ضده انا وقفت كل الكاميرات فى المنطقه كلها طول الفتره دى
مختار / من غير ما ترجع لى
جوزيف / اسيبه لوحده يعني
مختار / حوالين البلوك اسبرنت
جوزيف / حاضر ... على فكره ده مش عقاب المفروض تفكر فى عقاب أشد من كدا شويه ..  يلا يا ابنى
جوزيف يروح يجرى
مختار / ادعى ربنا ان جنانك ده ما يعملهاش مشاكل هى فى غنى عنها
عمران / مش دى الحاجه الوحيده اللى عملتها
مختار يمسك دماغه مش مصدق
........................
فى اوضه مهره
كارمن / انا لو جبت البوليس يحقق و طلع مش حرامى و كنتى عارفه هو مين مش هتبقي مجرد فضيحه
مهره ما فيش اى رد فعل
كارمن / على العموم انا مش هسكت
كارمن تطلع بره تليفون مهره يرن حاتم مهره تنفخ و تعدل الاسدال و تفتح فيديو كول
حاتم / انتى كويسه حرامى دخل اوضتك صحيح
مهره تبص الناحيه التانيه
حاتم / ما بعتيش صورتك بالفستان
مهره تكتب/ ضيق محتاجه نمره اكبر
حاتم / محتاجه تخسي له الفستان مفيهوش غلطه
مهره تكتب / ممكن اعرف ماما عليها ليك كام بالظبط عشان ابقي مجبره استحمل كل ده
حاتم/ هتستلفيهم من الاكس ؟
مهره تكتب / ما لكش دعوه بيه
حاتم / غريبه مع انى مؤمن جدا ان هو الحرامى اللى كان فى اوضتك
مهره ترتبك حاتم يبتسم
حاتم / عنده الصبح امتحان فى نفس الوقت اللى مامتك هتعمل فيه بلاغ ضده و هتخليهم يقبضوا عليه و لحد بقي ما ربنا يفرجها يكون وقت الامتحان خلص دا لو عرف يخرج منها اصلا ... انا سمعت ان فى عقد الماظ غالى اوى اتاخد من اوضتك ... فكراه
مهره تكتب / انت بتعمل كدا ليه ما لكش دعوه بيه هو ما عملكش حاجه
حاتم / هو أهم عندك و لا مامتك
مهره تكتب / انت بتفكر ازاى
حاتم / انا شايف ان أعصابك تعبانه ايه رايك نسافر كام يوم نغير جو
مهره تكتب / انت مش طبيعي
حاتم / لمى حاجتك هنتحرك ٧ الصبح لو ما كنتيش جاهزه هنطلع على القسم ... اتفقنا
مهره تبص الناحيه التانيه و تهز راسها موافقه
حاتم / اعملى حسابك ان قدامك اسبوعين بالكتير و الفستان يقفل عليكي عشان انا حجزت القاعه بتاعه الخطوبه خلاص
مهره تبص له
حاتم / مش هتصدقى الشبكه بتاعتك جميله قد ايه عاملهالك مخصوص حاجه تليق بيكي و بغلاوتك عندى
مهره تكتب / محتاجه انام
حاتم / تصبحى على خير
مهره تقفل صوفيا تدخل
صوفيا / صحيح الكلام ده
مهره تكتب / كلام ايه ؟
صوفيا / عمران كان معاكى هنا فى الاوضه
مهره تهز راسها لا
صوفيا / مامى مصره تروح تعمل فيه بلاغ سرقه
مهره تكتب / مفيش وقت يا دوب نجهز الشنط عشان هنسافر الصبح
صوفيا / ايه !! فين ؟!
مهره تكتب / ما اعرفش اسألوا حاتم
صوفيا تبتسم
صوفيا / ايوه بقي هندلع
مهره تكتب / انتى بتقولى ايه دا انسان مش طبيعي  .. انا بكرهه
صوفيا / امال هتسافرى معاه ليه
مهره تبص الناحيه التانيه
صوفيا/ بقولك ايه ما حدش جابرك رجعيله الطقم بتاعه و انهى الموضوع
مهره تكتب / مش بالبساطه دى
صوفيا / لو محرجه منه ارجعهوله انا ... قوليلى حطاه فين
مهره تشاور على الدولاب صوفيا تروح تفتح الدولاب
صوفيا / مفيش حاجه
مهره تتنهد و تقوم تدور مش موجود تقلب الدولاب و تنزل كل اللى فيه
صوفيا / فى ايه يا بنتى اهدى
مهره تجرى تفتح فى الادراج و تقلب الاوضه فوق تحت و تبدا تجمع الكلام و عنيها تتملى دموع
صوفيا / يكون الحرامى سرقه ؟
مهره تبص لصوفيا و تهز راسها لا
صوفيا / انا هقول لماما
مهره تمسك صوفيا و تهز راسها لا برجاء
صوفيا / خلينا نلحق نتصرف لو حاتم سال عليه هنقول ايه
مهره تعيط و هى بتهز راسها لا
صوفيا / طب اهدى اهدى هندور عليه تانى اهدى
صوفيا تعمل بتدور تلاقي الاسوره
صوفيا / ايه دى
مهره تشوفها و تحاول تجرى تاخدها و هى بتمسح دموعها
مهره تكتب / دى هديه لحاتم ... بس ما اعتقدش هتعجبه
صوفيا / اكيد بشكلها ده لا ... بس لو دلعناها شويه ممكن نعمل منها حاجه
مهره تبص لها باستفهام
صوفيا / حصليني على اوضتى
مهره تهز راسها
صوفيا/ بصي احنا اخوات اه بس انتى اللى هتروقى الاوضه دى زى ما كانت اتفقنا
مهره ما تقدرش و تضحك صوفيا تطبطب عليها و تاخدها بره
....................
فى البلكونه عند مختار
مختار متابعهم و هم بيجروا تحت البيت هند تدخل فى ايدها مجين شاى
هند / ما توقعتش أبدا انه يكبر لك بالشكل ده
مختار / و من امتى عمران بيكسر كلامى
هند / ما كنتش بتكلم عن عمران و انت عارف
مختار/ اه  ... على فكره بيحبنى ... و بيحب عمران
هند / بعد المصيبه اللى عملوها
مختار/ و بيحب اى حد بيعامله كويس ... نفسه يبقي كويس... نفسه يبقي واحد مننا حتى لو فى العقاب
هند / تفسير غريب لرد فعل أغرب
مختار / بصي مبسوط ازاى و هو بيجرى دا مش عقاب دا مكافئه ... تعرفى انه ما ردش على العقاب غير ان عمران عنده امتحان
هند / ساعات بحسه و ساعات بخاف منه
تليفون مختار يرن منصور
مختار / البشاير هلت ... السلام عليكم
منصور / فى مصيبه حصلت و لازم نلحق نتصرف و نلمها
مختار يتنهد
.............................
فى فيلا مهره
حاتم يدخل بالعربيه مهره تطلع له و فى ايدها بوكس هدايا مبتسمه
حاتم / صباح الخير
مهره تبتسم و تناوله البوكس
حاتم / دى ليا انا
حاتم يشوف الكارت يقرأه
حاتم / مش عارفه زوقك بس عملتها بأيدي يا رب تعجبك
حاتم يرفع حاجبه باعجاب و يفتح العلبه يشوف الاسوره مرشوشه اسود و مكتوب عليها اسمه يستغربها مهره تطلع الموبايل و تكتب
مهره / لو مش عجباك انا فاهمه ... عادى انا لسه مش عرفاك و لا عارفه زوقك بس على الاقل حاولت و لا ايه
حاتم / على فكره عجبتنى هى فعلا مختلفه خالص عن زوقى بس ... كفايا انك فكرتى فيا
حاتم يحاول يحضنها مهره ترجع لورا بسرعه
حاتم / خلاص خلاص ما حصلش حاجه يعني تمام كانت لحظه كدا بس تمام
مهره تبتسم و تشاور له على الاسوره
حاتم / لبسيهانى
مهره تبتسم و تاخد الاسوره و تلبسهاله و تقفلها
حاتم / بصراحه فى ايدى شكلها حلو ... و كل ما هبص لها هفتكرك اكيد  ... فطرتى
مهره تهز راسها اه
حاتم / اكلتي ايه
مهره تشاور بايدها اى حاجه
حاتم/ انتى وعدتني ان الفستان هيظبط عليكي اوعى تنسي
مهره تبص الناحيه التانيه
حاتم/ بصي عشان الهديه الحلوه دى هنعتبر النهرده فرى و من بكره باذن الله نبدأ الدايت قولتى ايه
مهره تهز راسها و هى مبتسمه حاتم يبتسم
حاتم/ امال ايه فين الجماعه عاوزين نمشي
مهره تشاور على جوه
........................
على السلم
عمران نازل جوزيف يفتح الباب و يوقفه
جوزيف/ لبستهاله
عمران/ عاوز نسخه من اى حاجه تسجلها عندى على الموبايل
جوزيف/ كان جايب ليها شبكه و اختفت و غالبا كدا هيلبسوهالك فخد بالك من نفسك بقي
عمران / انا ما سرقتش حاجه
جوزيف / انت عبيط و لا ايه انت ما كنتش هناك اصلا
عمران يضحك و هو بيهز راسه
جوزيف / عيني هتبقي عليك روح و ركز فى امتحانك و ما تفكرش فى اى حاجه تانى
عمران / خليها عليها هى
جوزيف / ابوك عمل ايه صحيح لما عرف اللى انت عملته
عمران / ينهار ابيض الامتحان يا دوب امشي لما اروح احكي لك
جوزيف / اتفقنا يلا خد بالك من نفسك
عمران يمشي
جوزيف / اجى اوصلك ؟!
جوزيف يجى يروح ناحيه الاوضه يسمع صوت على السلم
هند / يونس استنى
جوزيف يبص يلاقي هند نازله شايله صينيه يجرى يشيل منها
هند / عملت لك فطار
جوزيف/ سبقتك بس تسلمى ... ايه كل ده مين هياكل كل ده
هند / الف هنا دا حاجه بسيطه كدا لو اعرف انك صاحى كنت نزلتهولك من بدرى بس انا كنت فكراك نايم عشان مطبق و كدا
جوزيف / غفلت كدا
هند / طب ادخل ارتاح
جوزيف / شكرا على الفطار على فكره
هند / الف هنا لو عوزت حاجه ناديلى
جوزيف يبتسم و يهز راسه هند تطلع
جوزيف / طب اكل تانى و لا اعمل فيكي ايه انا دلوقت ... ندوق يعني مش هيحصل حاجه  .. ندوق
...................