الكبيره ٢ بقلم / لولو_محمد

الحلقه ٨٧

((((((((( الكبيره ٢)))))))))
#لولو_محمد
الحلقه ٨٧
جابر / تمام تمام انا انسان حقير و ما اساويش تلاته نكله بس ممكن لو سمحتى ترجعى البيت و بعدين نبقي نشوف هترسي على ايه
نجاه / مش راجعه
جابر / هتروحى فين يعني
نجاه / فى ستين داهيه انت مالك
جابر / نجاه ... ما تخلينيش اتغابى عليكي ... استهدى بالله كدا و اعقلي الوقت متاخر و الشوارع فاضيه
نجاه / انا هعرف اخد بالى من نفسي كويس مش واقفه عليك
جابر / دا ايه الجنان ده هتباتى فى الشارع يعني
نجاه/ ما لكش دعوه
جابر / معاكى فلوس طيب و لا انتى مش واخده بالك انك نسيتي شنطتك فوق
نجاه تقف و تبص له
نجاه / انت عارف انت بس لو بعدت عنى و اختفيت دلوقت ... كل مشاكلى هتتحل اه و ربنا
جابر / انتى بتسوقى فيها على فكره و انا بحاول استوعبك بس احنا فى الشارع
نجاه تعدى الشارع بسرعه جابر يجى يعدى ميكروباص يعدى جابر يقف الميكروباص مفيم يعدي نجاه اختفت جابر يبص يمين و شمال و يفضل يلف حوالين نفسه بزعر
جابر / نجاااه !! نجااااه !!!!
....................
رسايل كتير توصل موبايله يفتحها يلاقي لوكايشن بيتحرك يجرى ورا الميكروباص عربيه تفرمل جنبه و الباب يتفتح
جوزيف / اركب يا غبى اركب
جابر يركب جوزيف يطير ورا الميكروباص
جوزيف / كل السنين دى عايش معاها و برده مش عارف ازاى تخليها تهدى ازاى تسيطر عليها هو انت طبيعي بجد
جابر / بسرعه شويه بسرعه 
جابر يتصل بالتليفون
جابر / انا وراها انا و يونس ... مش وقته حصل ازاى حصل و خلاص اتحركوا ... تمام تمام
جوزيف/ الغباء عندكوا جيناتى مش اجتهاد شخصي يعني
جابر / مش ناقصك أنت كمان ... حود حود
جوزيف / شايفه ... اهدى
جابر / اللهم انى لا أسألك رد القضاء و لكنى اسالك اللطف فيه اللهم انى استودعتك اياها فاحفظها بحفظك اللذى لا يضام
جوزيف / هو انت بتقول ايه
جابر / ركز فى طريقك ركز
عربيتين يطلعوا من شوارع جانبيه يضربوا على عربيه جابر نار جوزيف يحود و يبعد عن خط السير
جابر / انت رايح فين رايح فين
جوزيف / مش هنقدر نلحقها و احنا ميتين هحصلهم ما تقلقش
جابر يفتح الخريطه
جابر / انا خايف انهم يكونوا قلعوها السلسله و اننا بنجرى ورا وهم  ... ايه مش لاقى ولا طريق يرجعنا ليهم ما تخلص
جوزيف / ما تقلقش هنلحقها
تليفون جابر يرن
جابر / معاك ... انتوا لسه بتتحركوا !!!
جابر يقفل الخط و يرمى الموبايل جنبه و يفضل يرزع على التابلوه جوزيف كاتم الضحك جواه
جابر / بسرعه شويه بسرعه
جوزيف يحود يعدى من جنب الميكروباص راكن و يكمل سواقه
جابر/ وقف وقف
جوزيف / الإشاره معاك وقفت؟
جابر يمسك الموبايل تانى يلاقى الاشاره لسه بتتحرك يبص لجوزيف
جابر / انت عرفت منين
جوزيف ما بيتكلمش و سايق و فجاه يحود جابر يلاقيه ماشي صح جابر يبص لجوزيف
جوزيف / انا حاطت اير بود صغيره جوه ودنى الشمال و امايا معايا على الخط بتوجهنى و هتبعت دعم
جابر يبص فى الموبايل
جوزيف / نجاه تهمها و تهمنى زى ما تهمك بالظبط اللى خطف نجاه غالبا نفس الناس بتوع الجبل هم بيسحبونى لمكان و انا رايح لهم فلو مش عاوز تيجي ممكن انزلك فى اى حته
جابر / انت عبيط و لا بتستعبط انزل و اسيب نجاه ازاى يعني ما هى معاهم
جوزيف / عدو عدوى صديقي يعني
جابر يبص الناحيه التانيه جوزيف يبتسم و يفرمل العربيه
جابر / وقفت ليه انت عبيط ؟!
جوزيف / الباقي فيه كاميرات مراقبه هنتحرق هناخدها مشي ... معاك سلاح؟
جابر يحط ايده يطلع مسدس فيه خزنه مليانه يفتحها و يركبها تانى
جوزيف / كويس خليه معاك و ما تهدرش الطلقات على الفاضي عشان العدد هناك كتير جدا
جابر / و انت ؟!
جوزيف / هتصرف اهم حاجه تاخد بالك من نفسك تمام ؟ ... نمشي ازاى ؟ ... تمام ... تعال معايا
جوزيف يمشي جابر يبص فى الموبايل الإشاره وقفت فى مبنى من دورين حواليه مساحه كبيره فاضيه  له سور قريب منهم يبص على جو يلاقيه مشي بعيد يجرى وراه
...........................
فى الطريق
مختار سايق و عباده جنبه بيتابع بالموبايل و ورا ناصر و راجل كمان
عباده / الإشاره وقفت فى مخزن كبير 
مختار/ المنطقه كلها سكنيه ازاى يعني هيحصل اشتباك فى منطقه زى دى
عباده / ازاى كانوا قريبين مننا اوى كدا
ناصر / عشان احنا مش بنبص غير تحت رجلينا
مختار / اتصل بدياب شوف لو يقدر يساعدنا باى معلومات نعرف احنا داخلين على ايه حتى
عباده / تمام
عباده يتصل بدياب
ناصر/ هو الخواجه فين صحيح
مختار يبص على ناصر فى المرايه
ناصر / ما شوفتوش من ساعه ما رجعت اخد المحفظه مش ممكن يكون ما حسش بالدوشه دى كلها يعني و لا معقول يكون هو اللى خاطفها
مختار / انت لو ما سكتش هحدفك من العربيه انت سامعنى مش ناقص قرفك
عباده / يونس مع جابر و اهدى شويه يا ناصر مش وقته
ناصر / و انا كنت عملت حاجه و لا قولت حاجه اصلا
مختار / قال يعني كل ده مش بسببك يعني
ناصر / لا مش بسببي مش انا اللى سبت البيت و جريت فى الشوارع فى انصاص الليالي و انا عارف ان فى مليون زفت بيطاردونى و حطين عينهم عليا
عباده/ خلاص خلصنا انت ايه ما بتفصلش
ناصر يبص الناحيه التانيه و الغضب عاميه
عباده / ركز فى طريقك انت كمان خلينا نخلص
..........................
جوه المبنى
مخزن كبير سقفه عالى مبنى على كمر ستيل و مليان ارفف و بضاعه و كراتين جوزيف و جابر بيدخلوا يتسحبوا و اى راجل يقابلهم يضربوه و يفقدوه وعيه فى صمت و يفترقوا و كل واحد يتحرك فى ناحيه و بيحاول يوقع اكبر عدد من غير صوت جابر يسمع صوت نجاه
نجاه / ااه حاسب ايه شغل البهايم ده
جابر يبص يشوف رجاله بتزق نجاه و هم ملبسينها كيس قماش على عنيها ورابطين ايديها ورا ضهرها واحد يزقها تقع فى الارض راجل حاطت باتش على عينه اليمين يدخل يساعدها تقوم بيتكلم اسبانى
خوان / escuse me señorita, No todos los hombres son buenos tratando con mujeres hermosas
( حقك عليا يا انسه مش كل الرجاله بتعرف تتعامل مع الجميلات)
خوان يقلع نجاه الكيس القماش
نجاه / iam not very good in spanish but every one would understand what if you didn't let go of me now you will be dead
) انا مش شاطره فى الاسبانى بس اى حد هيفهم انك لو ما سبتنيش دلوقت هتموت )
خوان / Just look around you… Do you see a man afraid of death..” we were born to die, but not alone anyone would dare to rescue you would blow the hell of us
)  بصي حواليكي شايفه راجل خايف من الموت احنا بنتولد عشان نموت... بس مش لوحدى اى حد هيفكر ينقذك هيفجرنا كلنا)
خوان يشاور لها على راجل شايل حزام ناسف خوان ياخد منه الحزام و يلبسه لنجاه جابر يبص يبلع ريقه و يتلفت فى كل مكان و يبص لفوق يلاقي جوزيف ماشي على كمر ستيل فى السقف عينه تيجي فى عين جابر جوزيف يشاورله بصابعه يسكت جابر يهز راسه جوزيف يشبك توكه حزامه فى الكمره و ينزل و جابر متابعه يرجع يتابع نجاه الراجل خلص تركيب الحزام جابر يبعت رساله على الموبايل و يتابع بعجز
نجاه / you can’t kill me I am sure my life is so important for some people
)انت ما تقدرش تقتلنى انا متاكده ان حياتي مهمه لبعض الناس )
خوان / so you are telling me that he is protecting you by a high order .. don’t be offended but when I saw your pictures I wondered what exactly he saw in you … I don’t mean you are ugly or anything but if you saw the type of women he used to know .. damn they would let your soul on fire
)  عاوزه تقولي لى انه بيحميكى بأوامر عليا ... ما تزعليش بس لما شوفت صورتك قولت هو شاف فيكي ايه انا ما اقصدش انك وحشه او حاجه بس لو كنتى شوفتى البنات اللى كان يعرفهم ... يا لهوي هتتحرقى )
خوان يضحك و نجاه بصاله و ملامحها جد
خوان / طب ما تزعليش اوى كدا قمر يا ستى ... قوليلى بقي ليه حياتك مهمه اوى كدا ... اهو نتسلى لحد ما يوصل بالسلامه
نجاه تبص الناحيه التانيه و ترجع تبص له
نجاه / فكنى ...احسن لك تفكنى
خوان / و الا ؟!
نجاه تقعد على ركبها فى الارض
نجاه / خلينا قاعدين انا شخصيا موراييش حاجه انت اللى بتضيع وقتك على الفاضي ... و اقولك حاجه انا اساسا ما بخفش من الموت هيحصل ايه يعني هى موته و لا اكتر
خوان / تمام ما دام مش همك بقي ... an eye for an eye
(العين بالعين )
خوان يطلع مطوه و يحركها على وش نجاه ما بتتهزش خوان يبتسم
.......................
بره المخزن
عباده و الرجاله يحطوا الاير بود
صوت دياب / انا دخلت على الكاميرات و ثبت الصوره قدامنا اقل من دقيقه لحد ما يكتشفوا الجليتش
عباده / كل الرجاله فى مكانهم ؟ مش عاوز اى مجازفات جوه المنطقه اللى احنا فيها ناس ... بسم الله
صوت مختار / ما حدش يتحرك ... جابر بيقول ما حدش يتحرك
عباده يطلع موبايله و عنيه توسع
عباده / اه يا نجاه اه يا نجاه ... حد معاه مفكات تفكيك المتفجرات
صوت مختار / انا معايا فى العربيه هرجع اجيبها
عباده/ تمام هبعت لجابر اقوله ... ما حدش يتحرك بقول تانى ما حدش يتحرك الا اما جابر يدينا الإشاره كله يثبت فى مكانه ... اه يا نجاه اه يا نجاه هتموتيني ناقص عمر يا نجاه
.....................
فى المخزن
خوان / دا انتى مستبيعه بجد بقي
نجاه / مش هو اللى هيجي او على الاقل مش لوحده ... كان المفروض تبذل شويه مجهود و تعرف انت خاطف مين الاول
خوان / كويس كل ما كان المتفرجين اكتر كل ما كان العرض ممتع اكتر ... اى كان السبب اللى خلاه يجيب ليكي البدله دا معناه ان حياتك تهمه و موتك هيوجعه و انا بصراحه هموت و اوجعه ... حتى لو هموت بعدها
نجاه / هو بغض النظر ان اللى بتقوله ده معناه انك غبى بتتحرك من غير ما تفكر و دا معناه انك هتخسر و غالبا هتموت من غير ما تحقق اى حاجه بس عندى فضول اعرف عمل فيك ايه لكل ده
خوان يشاور بطرف المطوه على الباتش اللى على عينه نجاه تهز راسها و تتلفت حواليها
نجاه / بس !!! هتموت عشان خسرت عين واحده !!!  طب هيحصل ايه لو اهلى جم و هو ما جاش
خوان / هيجي ... و مش بعيد يكون معانا دلوقت
نجاه تبص حواليها
نجاه / طب هو مش انت لبستنى حزام ناسف و رجالتك فى كل مكان اهو ... طب ما تفك ايدي عشان كتفى وجعنى
خوان / بصراحه مش واثق فيكي
نجاه / دا انت ممل... هو انت كمان المجلس خطفك و انت صغير و رباك فى المعسكر ؟
راجل يفاجئ جابر جابر يضربه بالنار كرد فعل الكل ينتبه على صوت ضرب النار جوزيف الناحيه التانيه يجز على سنانه و هو بيخنق واحد يوقعه فى الارض
خوان / Todos estén preparados, Me lo trajeron vivo
( الكل يستعد هاتوهولى عايش )
نجاه / الرعب دا كله من راجل واحد
خوان يشد نجاه من شعرها و يغرز طرف المطوه فى رقبتها
خوان / مش عاوز اسمع صوتك ... Ríndete o la mataré.
( استسلم و الا هقتلها )
جابر يطلع رافع ايديه واحده فيهم فيها المسدس لفوق خوان يستغرب و نجاه تتحول ثقتها لخوف جابر يرمى المسدس فى الارض
جابر / اهدى عشان كدا كدا المكان كله متحاصر و لو هى ما طلعتش من هنا سليمه ما حدش من هنا هيطلع فخليك عاقل و سيبها تمشي و خلينا رجاله فى بعض
خوان / و انت مين بقي
جابر / شيل ايدك من عليها الاول عشان نعرف نتكلم
خوان / و ليه نتكلم لما ممكن اقتلك و اخلص
جابر / جرب
نجاه / هو ايه اللى جرب
نجاه تجز على سنانها جامد فجاه خوان يصرخ و يتألم و يترمى فى الارض و نجاه تجرى على جابر ياخدها فى حضنه و يغطيها فجاه جوزيف ينزل من السقف بحزامه و فى ايده رشاش يفتح النار على كل الرجاله اللى وقفه خوان يرمى المطوه و يطلع المفجر و يدوس لمبه فى حزام نجاه تنور احمر
خوان/ ايه ايه ؟! هتجازف ؟ ما انا مش هموت لوحدى .. ايه ؟! ارمى سلاحك بدل ما افجرها مليون حته
جوزيف يبص على نجاه و يرمى السلاح خوان يحاول يقف و هو ماسك بين رجليه مش قادر يقف ينفخ
خوان / ايوه اعقل كدا اعقل يا حبيبي اعقل ... هتدفعى تمنها الحركه دى ... هظبطك بس اصبري عليا 
جوزيف / تصبر ايه دى كومتك تحت رجليها و ايديها مربطين امال لو فكيتها هتعمل فيك ايه انت هتفضل فاشل لحد امتى انا بجد مش مصدق ان المجلس لسه سايبك عايش لحد دلوقت  ... برافو عليكي مبسوط جدا منك ... تمام ايه الخطه دلوقت انت كدا كدا ميت فيا تفجر و تقتلنا كلنا يا تنقل على الخطوه اللى بعدها و تساوم على حياتك الحاجه الوحيده اللى فى ايدك هى حياتها فتمام سبها و هنسيبك تمشى
خوان / خلقك بقي ضيق اوى انت فاكر انى جاي لحد هنا و معايا دول بس ... activar
( فعل )
صندوقين يتفتحوا و يطلع منهم اتنين سايبورج خوان يحدف المفجر فى ايد واحد من السايبورج يدشدشه
خوان / Te deseo una feliz muerte... Adiós.
( اتمنالك موت سعيد... سلام)
خوان يغمز ليهم و يمشي و السايبورج يهجم عليهم جوزيف و جابر يوقعوا الصناديق
جوزيف / فيكوا حد بيعرف يفك قنابل
جابر / خالى معاه شنطه الادوات بره منعتهم يدخلوا ليفجرها
جوزيف / تمام خدهاله و انا هشغلهم بعيد
جوزيف يجرى ناحيه السايبورج و يتزحلق من تحت رجلين واحد منهم و يجرى الناحيه التانيه يجروا وراه و يفتحوا عليه النار
نجاه / يونس !!!
جابر / لازم نطلع من هنا
نجاه / مش هينفع نسيبه
جابر / لو ما فكيتش الزفت ده هنموت كلنا
نجاه / تمام نجى انت نفسك و انا هساعده
جابر / انا الغلطان انى بعاملك كدا اصلا
جابر يشيل نجاه على كتفه و هى بترفص و يطلع يجرى بيها
نجاه/ نزلنى ... بقولك نزلنى ... هاذيك بقولك نزلنى ما تبقاش غبى ... يا جابر... نزلنى بقولك
......................
الناحيه التانيه من المبنى
باب جانبى يتفتح و يطلع منه خوان يركب عربيه و يطير ناصر فى عربيه تانيه حاطت الايربود فى ودنه يطلع وراه
ناصر / فى حد بيهرب هطلع وراه
صوت مختار / لوحده ؟
ناصر/ ايوه ركب عربيه و مشي ... انا طلعت وراه
صوت مختار /  خليك بعيد ما تشتبكش لوحدك
ناصر / خلى دياب يتابع اللوكيشن و يبعت دعم احتياطي
صوت مختار / تمام هقول له
ناصر / اقطع عليه و اجيبه حى ؟
صوت مختار / لا قولتلك ما تشتبكش لوحدك اسمع الكلام
ناصر / المسافه بيني و بينه مش كبيره هقدر عليه ليه تديله فرصه يهرب او يستنجد بحد
صوت مختار / قولت لا ... انتهى
ناصر / انت ليه مش بتثق فيا قولتلك هقدر اجيبه
صوت مختار / انت شايف ان ده وقته
ناصر/ انا هجيبه
صوت مختار / ناصر
ناصر يشيل الايربود من ودنه و يزود السرعه
........................
قدام المبنى
جابر يطلع شايل نجاه رجاله يشوفوهم و لسه هيضربوا عليهم نار قناصين من بعيد يصطادوهم و جابر يعدى بنجاه عباده يفتح البوابه مختار يدخل بعربيه نجاه تحاول ترجع المبنى
جابر / انا هرجع اساعد يونس... اربطوها لو حكمت
نجاه تبص لجابر برعب جابر يرجع بيجرى تحاول تجرى وراه عباده يمسكها
عباده/ اتهدى بقي و لا مش هترتاحى الا اما تموتينا كلنا
مختار يطلع شنطه مفكات و عباده يلف له نجاه فى شاشه ديجيتال صغيره متوصله بإسلاك ملونه
عباده/ اثبتى و مش عاوز حركه
مختار / البتاع ده بدائى جدا
عباده / مستحيل اكيد دى خدعه
مختار/ اهو مفيهوش اى تعقيد
عباده / اهدى طيب و ركز و سمى قبل ما تعمل اى حاجه
مختار يبص على نجاه تهز راسها اه مختار يبلع ريقه و يمسك القصافه و يقربها من سلك عباده يحضن بنته فجاه صوت انفجار من جوه المبنى الكل يتفزع مختار يقطع سلك بالغلط الشاشه الديجيتال تنور و يظهر تايمر على الحزام عد تنازلي سريع الكل يبص لبعضه
......................
فى شقه عمران
عمران واقف فى البلكونه بيراقب الطريق يحس بحركه وراه يبص يلاقي مهره بتفتح باب الشقه يجرى يمنعها تمشي
عمران / على فين السعادى انتى كمان
مهره باصه فى الارض و مش بتتكلم يحاول يهدى
عمران / رايحه فين ... طب انتى معاكى مفتاح شقتك طيب ؟ ... طب لنفرض اننا روحنا و كسرنا الباب و غيرنا الكالون و دخلتى ... هتعيشي لوحدك ؟ .. طب افرضي حد ضايقك هتعملى ايه ؟ .. طب مش هتستنى تطمنى على نجاه حتى ... مش فارقه معاكى للدرجادى
مهره تبص له و عنيها كلها دموع
عمران / انا عارف اللى انكسر ما بينصلحش بس مش لازم نرميه فى الزباله يعني ممكن نطلع منه باى حاجه ... انتى فاكره انك الوحيده اللى مريتي بالظروف دى ؟ اه صعبه .. صعبه جدا كمان بس انتى قدها يا مهره
مهره تسيبه و تروح تقعد على الكنبه
عمران / الدنيا ما انتهتش ... هو انتى عملتى حاجه غلط او حرام ؟ لا ما عملتيش تطاطى ليه تبصي فى الارض ليه ما ترفعى راسك و تكملى رسالتك فى الدنيا دى و استنى عوضك من ربنا ... ايوه حطك فى ابتلاء صعب جدا ... بس اكيد انتى قده ... مهره انا فاكر لما كنتى بتقفى فى ندوات النادى تتكلمى كدا و تجلجلى لما شوفتك قولت ..  قولت حاجات كتير جدا كلها حلوه... لما عرفت ظروفك و قد ايه انك ... انا مش شاطر فى الكلام بس انتى انسانه جميله جدا و قويه و شجاعه ... ما ينفعش نستسلم و نسيب الدنيا تلطش فينا كدا ... الحزن ممكن يقتل يا مهره ... كلنا هنموت بس انتى عوزانا نفتكرك ازاى ؟ البنت المسكينه اللى ماتت مقهوره على حالها و نمصمص شفايفنا و لا الاسترونج اندبندنت ومن اللى اشتغلت على نفسها و بقت قدوه لكل البنات ... انتى عاوزه الناس تفتكرك ازاى ؟ انتى اتربيتى على انهى واحده فيهم واحده بتقعد جنب الحيط تعيط و لا واحده قويه مش فارق معاها راى الناس فيها و شخصيتها بتفرض نفسها على كل اللى حواليها انتى انهى واحده فيهم... ردى
مهره تبص له
عمران / خدى وقتك فى انك تتخطى المرحله دى بس مش و انتى قاعده على الكنبه ... مش قصدى حرفيا القعاد على الكنبه انا اقصد اتحركى ... مش قصدى تتمشي فى الشقه مثلا انا قصدى
مهره تسيبه و تقوم تدخل الحمام
عمران / كنت ماشي كويس بس ما ينفعش من غير ما تيجي فى الاخر و تعجن و الله برافو عليك
عمران يطلع تليفونه
عمران / حد يعبرنا و يطمنا و لا يتف علينا حتى مش ممكن
عمران يطلع البلكونه تانى
....................
قدام المبنى
مختار بيفك لنجاه الحزام من على وسطها بالراحه و يحطه فى صندوق و يديه لراجل ياخده فى العربيه بعيد عباده يترمى فى الارض اعصابه سايبه نجاه تسيبهم و تحاول تجرى على المبنى مختار يجرى يمسكها و عباده يحاول يقف يقع تانى
نجاه / سيبنى سيبنى... جابر ... سيبنى
نجاه تشوف عباده على ركبه تجرى عليه مش قادر تسمع صوت
مختار / جابر
نجاه تبص تلاقي مختار بيجرى على جابر شايل جوزيف غرقان فى دمه على ضهره يجرى يسند معاه عربيه تدخل بسرعه
السواق / الحكومه فى الطريق اركبوا بسرعه اركبوا
نجاه تسند ابوها يبص لها تبص له بحزن و اسف تركبه قدام و تركب جنبه و يتحشروا جوه العربيه العربيه تمشي المبنى ينفجر و كلهم جوه العربيه بيبصوا لبعض
....................
على الطريق
خوان طاير بالعربيه و ناصر بيحاول يعديه عشان يقطع عليه الطريق عربيه تطلع من الجنب تخبط عربيه خوان تقلبها ناصر يفرمل و ينزل من العربيه و يجرى على عربيه خوان يلاقي امايا نازله من العربيه التانيه ناصر يتخشب امايا تبتسم ناصر يبلع ريقه خوان يكح امايا تصعقه بالاليكتريك ناصر يفوق و يطلع مسدسه
ناصر / كفايا لحد كدا سلمى نفسك
امايا ترفع ايديها لفوق و تقرب منه بالراحه و بدلع و فى ايدها الالكتريك
ناصر/ ما تجبرينيش اقتلك اثبتى مكانك
امايا / اضرب ... اقتلني يا ناصر ... مستني ايه اضرب 
ناصر يرجع خطوه لورا
ناصر / ما تدينيش سبب
امايا / اديتك بدل السبب ميه تحب افكرك بيهم اقتلني يا ناصر اضربني فى قلبي زى ما كسرت لك قلبك اضرب مستني ايه
ناصر يرجع خطوه لورا و امايا عنيها كلها ثقه و بتتحرك ناحيته
امايا / انت لسه بتحبنى و لا ايه
ناصر / انا عمرى ما قتلت حرمه عمرى ما اذيت حرمه ما تجبرينيش ائذيكي امشي و هعتبر نفسي ما شوفتكيش
امايا لسه بتتحرك بالراحه و ناصر بيرجع لورا يضرب طلقه تحت رجليها ما اتهزتش و بتتحرك ناحيته
امايا / فوق شويه يا ناصر الارض ما عملتش ليك حاجه انا اللى عملت اضرب فوق ... بص فى عنيا و اضرب
ناصر باصص ليها و ساكت و بيرجع لورا و هى بتتحرك ناحيته ببطئ
امايا / انا هاخده و الطريقه الوحيده اللى هتقدر تمنعنى بيها هى انك تقتلنى فاختصر الوقت قبل ما حد يجي و اضطر اقتله ... يا تقتلنى يا تركب عربيتك و تمشي
امايا تقرب اكتر ناصر ينزل سلاحه و يبص الناحيه التانيه و يرجع يبص لها
ناصر / اشبعى بيه ... بس تعملى حسابك لو شوفت وش امك تانى ... مش هسمى عليكي
امايا تبتسم ناصر يروح يركب العربيه يبص لها مبتسمه و حاطه ايدها فى وسطها يسوق و يمشي و هى تروح تشد خوان تركبه فى عربيتها
امايا / كنت خليته يساعدنى بدل ما التهمه دى
امايا تحشره فى العربيه و تقفل الباب
امايا / حلوف بشري
امايا تركب قدام و تسوق
....................
فى اوضه عباده
مختار بيرمي حقنه فى الزباله و نجاه واقفه على الباب
مختار / هنزل اشوف جابر و يونس هتعوز منى اى حاجه ؟
عباده / ناصر فين ؟
مختار / بعت رساله قال فيها انه هرب منه فرجع على بنها
عباده / طمنك انه وصل يعني ؟
مختار/ تليفونه اتقفل بعد الرساله بس الجماعه هناك طمنونى انه وصل ... كدا كدا بس اطمن على الجماعه اللى تحت و اروح له ... ارتاح انت بس شويه و لو عزت حاجه رنلى
عباده يهز راسه مختار يطلع بره يبص لنجاه واقفه زى العيل اللى عامل عمله مختار يبتسم و يمشي و يقفل الباب عباده يفرد نفسه فى السرير نجاه تروح تقعد جنبه
عباده/ انا كويس يا نجاه اعصابى سابت بس من خضتى عليكي بس خدت حقنه الفيتامين و هبقي زى الفل باذن الله
نجاه تنام فى حضن عباده و تعيط
عباده / لا حول و لا قوه الا بالله فى ايه يا بت مالك ايه اول مره تتخطفى
نجاه تبص له باستغراب تلاقيه مبتسم
عباده/ الحمد لله عدت على خير و انتى اكيد يعني اتعلمتى من الدرس ... باذن الله يعني
نجاه / انا مش هسامح نفسي ابدا
عباده / على ايه ... على انك غضبتى و سبتى البيت و ما عملتيش اعتبار لحد و كنتى هتودى روحك فى داهيه ؟! و لا على انك حاشره الخواجه وسطينا فجاب بلاه الازرق معاه ؟! مش هتسامحى نفسك على ايه
نجاه / انا كنت مخنوقه
عباده/ انتى مدلعه ... بس مفيش مشكله ادلعى حقك تدلعى ما لو ما كانتش بنتى تدلع و انا عايش امتى هتدلع
نجاه / انت بتقول ايه بس يابا
عباده / بقول الحقيقه يا نجاه انتى مدلعه امك كان عندها حق و انا غلطت غلطت فى حقك و بوظتك
نجاه / بوظتنى !!
عباده / عمك لو كان قطع السلك الصح كان زمانا كلنا فى خبر كان سبحان الله لينا عمر ... شوفتى ابن ال... هههه مبدل اللوان السلوك عشان اللى يحاول يفكك ... بس سبحان الله ... سبحان الله ... لينا عمر ... بس لحد امتى بقي ... لحد امتى ربنا هيديم علينا ستره و نخرج كل مره سلام ؟! ما اكيد هيجي يوم و هيقع مننا حد ... ذنبه هيبقي فى رقبه مين يا ترى
نجاه تبص فى الارض و تعيط
عباده/ انا ما بقولكيش الكلام ده عشان تعيطي ... هو انتى لما كنتى بتغلطى و انتى صغيره كنت بضربك ؟ انا بكلمك عشان اعلمك عشان تفوقى لنفسك ... اقولك حاجه ... هى موته و لا اكتر يا نجاه ؟! هو الواحد مننا بيموت كام مره ؟! شوفى انتى بقي انا موت كام مره من رعبى عليكي
نجاه / انا ما اقصدتش ان كل ده يحصل
عباده / عارف ... و الادهى انى عارف انه مش ذنبك برده ... ما انتى اللى فى سنك عايشينها بالطول و بالعرض و كل واحد عايش حياته انتى اللى كل ما تخرجى راسك بس تتنشي ... انا عارف انه مش ذنب و عارف انى مش هقدر احبسك فى البيت و عارف انك مش هتقدرى على الحبسه و عارف ان مش ده الحل اصلا عارف اقسم بالله عارف كل ده بس اعمل ايه تعبت ... انا ... انا عايز انام انا هريح شويه و لما اصحى ربنا يفرجها انا مش قادر افكر و لا اتكلم فى اى حاجه دلوقت
تليفون عباده يرن
عباده / يادى الحزن المغلى
نجاه تناول عباده الموبايل
عباده / السلام عليكم ... ماس كهربى !!! ماس كهربى ازاى ... هو ايه اللى مخزن كيماويات ... لا تمام تمام ... لا يا سيدي تمام مفيش حاجه ... لا ما انا فاهم ... تمام تسلم ما اتحرمش منك ... فى حفظ الله
عباده يقفل
نجاه / خير
عباده / خير اكيد خير ... طفى النور ده يا نجاه و روحى ارتاحى شويه
نجاه تبص لعباده يغطى عنيه بكوعه تقوم تطفى النور و تطلع تقفل الباب عمران قاعد يقوم يقف
عمران / خير ... ايه الاخبار
نجاه / هينام... هو انت قاعد هنا من بدرى
عمران / مهره كانت عاوزه تمشي لما الكل مشي و انا لحقتها و منعتها بس مش مرتاح خايف تكون عملت فى نفسها حاجه خبطت ما ردتش طبعا و اتكسفت ادخل فقاعد
نجاه / تمام هدخل اطمن عليها
عمران يبتسم نجاه تدخل تلاقي مهره قاعده على سجاده الصلاه و ماسكه المصحف نجاه تبص لعمران
نجاه/ كويسه بتصلى
عمران يبتسم
نجاه / هو يونس عامل ايه صحيح
عمران / عايش
نجاه تطلع و تقفل الباب
نجاه / يعني ايه عايش
عمران / يعني عايش اى كانت الاصابه غير كدا بسيطه اعتقد
نجاه / كتر الف خيرك
نجاه تفتح باب الاوضه
عمران / مش هتسالى عن جابر ؟!
نجاه تبص له
نجاه / كان ماله جابر كان كويس فى حاجه
عمران / لا ما فيش ... عايش هو كمان
عمران يروح ناحيه اوضته
نجاه / عمران ... ما تتكلم عدل لو فى حاجه ما تقول
عمران / مش انا قولتلك ما دام الواحد عايش اى كانت الاصابه بسيطه
نجاه / انا الغلطانه مش انت ... انا اللى طمنتك بدل قاعدتك دى فأنت بتردها و تقلقني
عمران / دا انا ؟!
نجاه تروح تفتح باب الشقه عمران يقفله
عمران / على فين تانى .. ما خلصناش و لا ايه
نجاه / هطمن بنفسي على اللى عايش و لا دى كمان كتير عليا
عباده يفتح باب الاوضه
نجاه / هو مش جابر كان كويس و ركب معانا العربيه كويس يابا مش انت شوفته كويس
عباده / انا عاوز انام مش عاوز اسمع نفس عشان ما اطلعش جنونتى و غباوتى عليكوا انتوا الجوز كل واحد فيكوا يدخل زفت اوضته و يقفل بابه عليه فاهمين
عمران يهز راسه و يدخل اوضته
نجاه / هو جابر فيه حاجه ؟
عباده / كويس الحمد لله ادخلى نامى و ارتاحى
نجاه تدخل الاوضه و ترزع الباب و تفضل تفرك مهره تقفل المصحف و تلم السجاده و تروح تقعد على السرير
نجاه/ هم بيعاملونى كدا ليه
مهره تمد ايدها و تناولها الموبايل
نجاه / انتى شايفه ده الحل يعني ؟! ما يمكن نايم
مهره تهز راسها ما أعرفش
نجاه / و انتى كمان ليه كدا ... ما تتكلمى بقي ... ليه كدا ... هو انا ناقصه وجع قلب
مهره تبتسم بحرج و تشاور على زورها
نجاه / يعني حاولتى ؟! طب دا نفسي و لا عضوى يعني هو ده طبيعي الواحد يزعل شويه يفقد النطق خالص ... مجرد زعل يعني يبقي الواحد سليم و بيتكلم و بيصرخ و بيزعق فجاه يتخرس ؟! طب حاولى ... حاولى قدامى افتحى بقك و حاولى تخرجى اى صوت ... حاولى ... عشان خاطرى
مهره تفتح بقها و تحرك شفايفها بمجهود نجاه تحضنها
نجاه / ما تضغطيش على نفسك هنروح لأكبر دكاتره و نشوف الموضوع و هنتابع و هتروح مفيش حاجه مستاهله مفيش اى حاجه تستاهل صدقيني مفيش حاجه تستاهل تضيعي نفسك عشانها ... هترجعى أقوى من الاول هتخفى و تبقي زى الفل ... وعد ... اوعدك هتبقي زى الفل زى زمان بس انتى ساعديني و ساعدى نفسك ... اتمسكى بنفسك و بحياتك... كل حاجه تانيه تهون... كل حاجه تهون صدقيني
مهره تمسح دموع نجاه  و تاخد منها الموبايل و تطلع اسم جابر و تديه لنجاه
نجاه / ما يمكن نايم ... يمكن تعبان و مجهد يمكن واخد مسكن و نايم
مهره تفتح و تكتب له رساله ( طمنى عليك.. أنا صاحيه ) و تدى الموبايل لنجاه من غير ما تبعتها نجاه تبص لها مهره تهز راسها اه نجاه تدوس إرسال و يبصوا لبعض
.......................
فى شقه ناصر
ناصر نايم فى السرير بيعيط يسمع صوت باب الشقه بيتفتح يمسح دموعه و يسحب مسدسه و يطلع يلاقي مختار ناصر ينزل سلاحه 
مختار / يااااه !! و عليكم السلام يا سيدي قال يعني حد غيرى ممكن يكون معاه المفتاح... ما علينا... مالك عامل كدة ليه
ناصر / كنت نايم و صحيت على صوت الباب
مختار  / هو صوت الكالون عالى اوى كدا ؟! انت كويس ؟
ناصر / الحمد لله تمام ... ايه الاخبار ؟ الجماعه كويسين ؟!
مختار/ الحمد لله ... احنا محتاجين نتكلم ... وقت ما تبقي جاهز انا قاعد مستني
ناصر / ما اعتقدش ان فى حاجه تخصنى ممكن نتكلم فيها ... فلو حضرتك عاوز تتكلم فى اى حاجه انا تمام سامعك
مختار / متأكد؟! اصلك ما بتسمعنيش خالص و طول الوقت بتتهمنى انى سايبك و بهتم بناس تانيه فانا جيت لك اهو
ناصر / مفيش حاجه يا بابا ... أنا داخل انام ... البيت بيتك طبعا
مختار/ الراجل هرب منك ازاى مش هتحكيلى
ناصر يبص لمختار
ناصر/ ايه معقول المنطقه كلها ما كانش فيها و لا كاميره تصور لحضرتك اللى حصل
مختار ساكت
ناصر / كان فى ... و حضرتك عرفت هرب ازاى ... بس لا ... هروح اخنق ناصر اكتر ما هو مخنوق اياكش يولع فى نفسه و كلكوا ترتاحوا
مختار / ما تظلمش بنات الناس معاك يا ناصر
........................