((((((( الكبيره ٢ ))))))
#لولو_محمد
الحلقه ٣٣
جوزيف واقف فى الجنينه يجيله تليفون يرد
امايا / هنت عليك
جوزيف ساكت
امايا / خدتها و سبتنى و هربت
جوزيف / كان غصب عنى
امايا / فى ناس بتقول انك لسه معانا و ناس بتقول انك اتقلبت و كل واحد بيفكر بطريقته بس انا مش هقدر احكم غير لما اسمعها منك
جوزيف / انا معاكى
امايا / انا هاجى قريب الخطط اتغيرت
جوزيف / فى وضعى ده لازم تستنى شويه مش هقدر احميكي
امايا / انا ما باخدش رايك انا ببلغك ... سلام يا جو
الخط يفصل جوزيف يتنهد و يلف يشوف نجاه واقفه فى الشباك متبعاه يبصلها بحزن نجاه تقفل الشباك و تدخل جوزيف يتمشي و هو بيبص على السما يشوف نجاه خارجه من الفيلا و يتابعها ريحاله يروح لها
نجاه / فى حاجه صح
جوزيف / امايا جايه
..........................
نجاه / ازاى يعني
جوزيف / صدقيني امايا مش زى ما انتى فاكره ... امايا طفله
نجاه / احنا قدمنالها كل حاجه و هى اختارت
جوزيف / ما اختارتش انا و ابيك و بابلو و المجلس كلنا كنا فى طرف و انتوا لوحدكوا فى طرف و ناصر كان ليه دور كبير انه يثبت ان احنا صح
نجاه / ناصر حبها بجد دا اكتر واحد اتعذب فى موتها
جوزيف / انتى مش عارفه حاجه
نجاه / عرفنى
جوزيف / الكلام عمره ما هيوصف الحقيقه اللى يسمع غير اللى يشوف غير اللى يعيش
نجاه / صدقنى انا كنت بحب اميره زى اختى و اكتر و كنت هموت عليها و حاليا فى نار قايده جوايا منها لو كلامك هيخليني اغير نقطه فى بحر نارى دى انا هسمعك و هصدقك
جابر يدخل و هو بينادى
جابر / نجاه !!!
نجاه تبص لجابر يوصل ليها
جابر / كلامى كان واضح
نجاه / احكى يا يونس ... احكى هنسمعك ... من فضلك يا جابر ... انا محتاجه اسمع ... احكى يا يونس ... اتكلم
..........................
فى الجبل
اسعاف بتشيل جثه عبد الهادى و عباده واقف مع ظابط
الظابط / احنا جينا اول ما البلاغ جالنا و لقينا الجثه زى ما حضرتك شوفت كدا فى الارض و طلقه فى نص راسه و ماسك فى ايده سلاحه ... و التحقيقات المبدئيه بتقول ان كان فى رجاله عاملين سهرايه و بعدين قاموا على بعض و ضربوا نار فى الهوا و لما رجاله الجبل نزلوا يشوفوا فى ايه لقوهم بيهددوا بعض و الحمد لله قدروا يسكتوهم و هم راجعين شافوا الجثه فى الارض و احنا اخدنا الكل على القسم نحقق معاهم
عباده / صابر ما عملهاش
الظابط / ما هو ما قتلش اخوه برده و لا ايه يا كبير .. الكلام اللى فى القسم حاجه و اللى بينا حاجه تانيه
عباده / بالظبط و صابر ما انكرش بحوار رعد بس زى ما سيادتك قولت اللى بينا حاجه و اللى على ورق الحكومه حاجه تانيه
الظابط / شوف يا كبير انا بخدم معاكوا من امتى بس انا عمرى ما فهمت اللى بيحصل ... ايه فى الدنيا يخلى واحد يلف حبل المشنقه على رقبته بدال واحد تانى
عباده يبتسم
الظابط / فى حاجات الجهل فيها نعمه
عباده يضحك
الظابط / حضرتك عارف ان الحكايه دى مش هتتلم بسهوله صح
عباده/ انا كل اللى اقدر اقوله ... مفتاح الليله دى كلها عند محمود الجزار ... انا ممكن ادخل و اساعدك بس انا شايف انها تيجي منك احسن
الظابط / ابن عم المجنى عليه !!!
عباده / هو اللى ورا طلوع عبده هنا و هو اللى اجر الرجاله اللى اتخانقوا عشان المطاريد ينزلوا من الجبل و كان مع المجنى عليه هنا كمان
الظابط / و ما دام حضرتك عارف انه هيعمل كدا ممنعتوش او بلغت ليه
عباده / احنا عرفنا انه خطط بس لما سالنا قالوا ان عبد الهادى رفض و انهم شدوا فى الغيط و الاتنين مشيو زعلانين من بعض ... ما اعرفش ايه اللى غير رايه بالسرعه دى
الظابط / ايوه بس برده مفيش دليل
عباده / ما تقلقش يا باشا ... رجالتنا شغالين و اول ما يوصلوا لاى حاجه هتكون على مكتب جنابك اول واحد
الظابط / تمام يا كبير ... تمام جدا
..................
فى جنينه نجاه
جابر / و لا اتهزت منى شعره ... تمام شافت كتير من واحد عامل نفسه شيخ و قال الله و قال الرسول و كل الناس استغلتها ... لحظه انت نفسك استغلتها المجلس استغلها الا احنا ... احنا فتحنالها بيتنا و قلوبنا و
جوزيف / انت فتحت قلبك ناصر فتح حاجات تانيه
جابر / غلط بس هى مش ملاك ناصر كان خاطبها و هيتجوزها و لحد النهرده موجوع عليها
جوزيف / انت ما تعرفش حاجه عن اللى حصل بينهم ... ابقي خليه يحكيلك و لا يحكيلك ليه ما خالك يحكيلك
جابر / انا عارف كل حاجه
جوزيف / انت ما تعرفش اى حاجه ... انت ما تعرفش اى حاجه
نجاه / و المطلوب
جوزيف / انا رسمت خطه محكمه و اقدر ابوظها ... بس لو بوظتها هتكشف و هيعرفوا انى معاكوا و اتقلبت عليهم و ساعتها كلنا كدا ... هنموت
نجاه / يعني هتسيبهم يكملوا اللى انت بداته
جوزيف / و ينجحوا كمان
جابر / و احنا هنسكت اصلا
جوزيف / بالعكس انت هتعمل كل اللى هتقدر عليه عشان تمنعهم ... بس الرغى ده كله عشان اقولك ان امايا راجعه و لما هترجع البلد هتنقلب فوقيها تحتيها و وقتها انا هقف معاها مش معاكوا
جابر / ما اتفاجئناش على فكره
جوزيف / نجاه ... ثقى فيا دا كل اللى بطلبه منك
جابر / كلمنى انا يا حيلتها ما تخلينيش اتغابى عليك على المسا
جوزيف / على الصبح ... احنا تقريبا الفجر
جابر / دا انت مستفز ابن ... ادخلى جوه بدل ما اولع فى الفيلا باللى فيها
جوزيف يضحك نجاه تبص لجابر بحرج و تمشي جابر يبص لجوزيف
جابر / انا عاوزك تعرف حاجه
جوزيف / اؤمر
جابر / انا عمرى ما هثق فيك
جوزيف / كويس دا معناه انك هتفضل صاحى
جابر يسيبه و يدخل جوزيف ينفخ
……………….
فى شقه عبد الهادى
الست بتصرخ فى وش نسمه و نسمه منهاره من العياط و فى ناس بتحوش
الست / قتله زى ما قتل اخوه قتل ولادى و كل ده ليه عشانك عشانك يا زباله يا خاينه يا عديمه الربايه يا قليله الحيا
نسمه تبصلها بغضب
نسمه / اخرسي ... اخرسي بقولك انا اشرف منك اشرف منكوا كلكوا مش انا اللى يتخاض فى سمعتى مش انا ... مش انا اللى رميت ولادى فى النار واحد بدلعك فيه و التانى بزنك ... حسبي الله و نعم الوكيل فيكي
الست / بتردى بتردى يا بنت عويس
نسمه / ايوه برد و هرد ما دام اللى كان بيرد عنى مات هرد امال اسيبك تاكليني كلهم ساكتين كلهم سامعين كلامك و ساكتين يبقي لازم ارد ... ساكتين ليه ساكتين ليه شوفتوا منى ايه بعد العشره دى كلها انا اللى يتقالى كدا ... حسبي الله و نعم الوكيل فيكوا كلكوا حسبي الله و نعم الوكيل فى كل من خاض و كل من سكت
الست / اطلعى بره بيتي اطلعى بره
نسمه / دا بيتي و بيت عيالى البيت ده بيتي انا ... مش من حقك تطرديني دا ابنك ما اندفنش يا قادره جتته ما بردتش و انتى بتفترى علينا دا واحده غيرك كانت اتهدت
الست / دا بعدك دا بعدك يا بنت عويس انا هفضل واقفه على رجلى هفضل على قلبك لما اطلع روحك
نسمه / مش بعيده عليكي ما انتى طلعتى روح اللى منك هتبكى عليا
نسمه تدخل اوضه و ترزع الباب
الست / شايفين شاهدين عرفتوا انا صابره علي ايه شوفتوا بجاحتها
راجل ١ / بس انتى غلطتى يا ام عبد الهادى غلطتى و اتسرعتى
الست / انت بتقولى انا الكلام ده يا فهيم
فهيم / الميت ليه حرمته برده و انتى هنتيها جامد قصادنا انا ما اتكلمتش قدامها عشان ما امرعهاش عليكي بس احنا فى ايه و لا فى ايه يا ام عبد الهادى
الست / دى اخرتها يا فهيم بتنصرها عليا
فهيم / ما عاش و لا كان بس ... احنا عندنا ولايا و الكلام اللى اتقال تقيل ... لو كان المرحوم لسه عايش ما كانش سكت عنه ابدا
الست / كتر خيرك يا ابن الاصول
فهيم / اكرام الميت دفنه يا ام عبد الهادى ... ندفن الجدع و بعدين نتكلم
الست / لا يا سيد الناس ... انا اولى بابنى ما نجيلكش فى حاجه وحشه كتر خيرك يا ابن الاصول
راجل ٢ / يا ام عبد الهادى مش وقت الزعل و الكلام ده
الست / مش وقت الزعل ... ادفن عيالى الاتنين ورا بعض كدا و ما بردش نارى فى ولا واحد منهم و عاوزنى ما ازعلش امال ازعل امتى
راجل ٣ / ما يقصدش ... بقولكوا ايه يا رجاله احنا لمتنا دى ما لهاش عازه احنا نروح نشوف هنعمل ايه و الحوار هيخلص على ايه و امتى عشان نعرف نتصرف ... ارتاحى يا ام عبد الهادى و باذن الله اول ما النهار يشقشق هنفوت عليكي و كدا كدا الحريم هيفضلوا معاكى هنا ... بينا يا رجاله
الرجاله يمشوا و الكل يقعد و الست عينها على باب اوضه نسمه ست تانيه توطى عليها
ست ٢ / اهدى و ما تخليهاش تركبك الغلط دى مش سهله
ام عبده / انتى هتقوليلى يا ام محمود ... اقسم بالله قولتله بلاها الكلام ده ما جاش من فراغ و اكيد كان فى بينهم حاجه فى مصر يقولى بحبها ياما و نفسي فيها ياما اهى جابت اجله هو و اخوه بس على مين و ربنا لخليها تحصلهم
ام محمود / اوعى ... اسمعى البت دى قلبها قوى و حسها على لانها اطمنت و ارتاحت
ام عبده / يمين بالله ما
ام محمود/ شرع الله و ما حدش يقف قصاده
ام عبده / يبقي عيال ابنى انا اولى بيهم و تبقي توريني هتشمهم ازاى
ام محمود / عيال ابنك ايه اللى هتكسريها بيهم دا هى اللى هتكسر عيله الجزار تمه دى بحكم الشرع و القانون ليها يجي و لا ترتبع الارض ليها هى و ولادها و انتى الربع
ام عبده / ارض مين يا ام محمود ارض مين دى كمان اللى بتتكلمى فيها ... يطلع بس النهار و عزه جلال الله و لا هتطول قصقوصه حتى من البيت
ام محمود / و انتى هتقدرى تعملى ايه بس يا ام عبده اهدى كدا عشان تعرفى تفكرى ابوها و اهلها مش هيسكتوا و القانون فى صفها باضتلهم بيضه من دهب و أنتى كمان علاقتك بيهم ما كانتش ولا بد فمش هيتعاملوا معاكى بالحسنى
ام عبده / دا انا اروح فيهم فى داهيه هو موت و خراب ديار ... يمين بالله ما اصبر للصبح حتى و لو فيها موتى اوعى
ام عبده تيجي تقوم الستات يحوشوها
ام محمود / ما تصغريناش بقي يا ام عبده الناس تاكل وشنا ... بقولك ايه تعالى معايا جوه ارتاحى و انا هقولك تعملى ايه
ام عبده تبص للستات متابعينهم و بيمصمصوا شفايفهم تقوم مع ام محمود و يدخلوا الاوضه و يقفلوا عليهم
ست ٣ / شايفه الوليه الدون مش صابره حتى الجدع يرتاح فى تربته و جايه و حاسبه الورث و فيها دماغ تخطط و ترتب
ست ٤ / هى حقه نسمه هتاخد تلتربع الارض
ست ٣ / رعد ما خلفش و اخوه اكيد ورثه قبل ما يموت و هى مخلفه ولاد يورثوا ابوهم
ست ٤ / باضتلك فى القفص يا عويس صبرت و نولت بصحيح
ست ٣ تبص لست ٤ و تتنهد و تقوم تخبط على اوضه نسمه و تفتح الباب بالراحه و تدخل تلاقى نسمه قاعده فى جنب بتقرا قران و هى بتعيط و فى ولدين نايمين فى سرير نسمه تبص للست الست تبتسم و تدخل و تقفل الباب و تاخد نسمه فى حضنها نسمه تنهار من العياط
..........................
فى القسم
محمود / يا باشا احنا كنا طالعين سهرايه عادى و دى حاجه بنعملها كتير و علاطول بنقعد فى الحته دى
الظابط / كلمه من هنا كلمه من هنا رفعتوا السلاح على بعض طلقه خرجت بالغلط جت فى دماغ عبد الهادى
محمود / لا يا باشا ما حصلش عبد الهادى قام و سابنا قبل الخناقة بكتير
الظابط / عشان ياخد بتاره من صابر ؟
محمود / ما اعرفش بس عبده مش غبى عشان يطلع لصابر بطوله
الظابط / بس التحريات بتقول ان عبد الهادى ما كانش عاوز ياخد تاره و انت اللى كنت بتزن عليه
محمود / لا ما حصلش عبد الهادى كان بيتخانق معانا انه هو اللى هياخد تار اخوه بايده
الظابط / هى عزومه دى جريمه
محمود / و لكم فى القصاص حياه يا اولى الالباب و هتقولى الحكومه و القانون على يدك يا باشا ما جابوش حقنا و صابر خرج منها و روح بات فى بيته
الظابط / و هيخرج من دى كمان ... عشان سلاح الجريمه اللى لقيناه و اللى انا متاكد ان هيطلع هو اللى انضرب منه النار مش بتاع صابر دا غير الشهود اللى كانوا معاه انه ما نزلش من الجبل اصلا و اللى نزلوا سلكوا الخناقه ما عدوش على مكان الجريمه غير و هم راجعين
محمود / ما اعرفش بقي دى شغلتكوا انتوا التحريات دى انا ما افهمش فيها
الظابط / انت مش زعلان على اللى حصل
محمود / يا باشا احنا صعايده ما بنعيطش ... و حتى العزا ما بناخدوش الا اما حق الميت بيرجع
الظابط / بس عبد الهادى
محمود/ عبد الهادى ليه ظروفه و مش عاوزين نتكلم فيها ... دى اعراض ناس
الظابط / تقصد عشان صابر كان متقدم لمراته
محمود / يا باشا ام بدر تبقي مرات اخويا و الكلمه فى حقها تخصنى ... ما تاخذنيش ما اقدرش اتكلم
الظابط / بعيد عن ام بدر يا سيدي ايه اللى فتح الموضوع ده دلوقت
محمود يبص للظابط و يسكت
الظابط / اللى اعرفه ان ما فيش اى نوع من انواع التواصل بين ام بدر و صابر ... نهائى
محمود / يا باشا انا ... انا ما اقدرش اتكلم رجعنى الحجز من فضلك
الظابط / هو انا جايبك المكتب هنا افسحك ... دا تحقيق ما تنطق لو عندك معلومه قولها و الا اقسم بالله ما هطلعك منها انت فاهم و لا لا
محمود / السجن للرجاله انا مش هقدر اتكلم فى الحكايه دى لو عاوز تسالني فى اى حاجه تاني هقول لسعادتك كل اللى انت عاوزه انما دى بالخصوص اعفيني ما اقدرش دا انا انعدم و لا اتكلمش فى الحكايه دى ... دى اعراض يا ناس
الظابط يضرب جرس العسكري يدخل يدى التحيه
الظابط / ارميه فى الحجز و هاتلى صابر
محمود يقوم يعدل هدومه و يروح مع العسكرى و هو مبتسم
…………………
فى مضيفه الزنايته
مختار قاعد واضح عليه الارهاق جنب عباده مضايق و قاعد قصادهم مغاورى و شاهين باصص فى الارض
عباده / انت ايه مبررك المرادى قولى
مغاورى / ما لوش مبرر هو معترف و جاهز لاى عقاب
مختار / انهى عقاب ... دى حاجه ما بنتسامحش فيها يا مغاورى
مغاورى / و الله مش هقدر افتح بقي بس بص لنص الكبايه المليان بدل ما يكمل فى الغلط عشان خايف يتفضح و يتعاقب جه و اعترف و اختار الصح نقطه تحسبله ... و لا ايه
عباده / و تفتكر منصور هيقبل بالكلام ده و لا هنفتح بقي المواقف العبيطه اللى كانت بتحصل و نسكته ... بص فى وشي و رد عليا انت عينك من ياسمينا
شاهين / ابدا و الله دى كانت لحظه شيطان مش اكتر
عباده/ احنا هنشوف الفيديو يا شاهين ... و فى احتمال كبير البلد كلها تشوفه هتواجه منصور ازاى ... هنلمها ازاى
مختار / ما حدش هيشوف حاجه
عباده / و تضمنها منين بقي ست امايا دى
مختار / طول ما بيعمل اللى هى عوزاه مش هتفضحه
مغاورى / انت بتقول ايه يا مختار
مختار / احنا محتاجين عين وسطيهم فعلا... يونس مش هيحرق خطته بس شاهين هيحذرنا
شاهين يبص لمختار
مختار / كل حرب و ليها رشيد... هتعرف تبقي رشيد يا شاهين ؟
شاهين / بس هى اكيد هتطلب منى حاجات فى المقابل
مختار / هتنفذ اللى هى عوزاه و احنا هنساعدك ... و كل ده من غير ما اى حد برانا يعرف ... المهمه صعبه و خلينا متفقين انك مش قدها بس دا طريقك الوحيد للنجاه لو غلطت معاها هى هتقتلك و لو غلطت معانا ... احنا هنقتلك
الكل يبص لمغاورى
مغاورى / شاهين مش صغير و احنا معاه
شاهين / طب لو فضحتنى برده ... هعمل ايه
عباده / هنحتاج فتوح ... الحوار ده كله لازم يبقي بعيد خالص عن منصور و دياب
مغاورى / هكلمه
عباده/ خليه يكشف على الفلاشه و يشوف اللى فيها
مختار / بعيد عن السيستم خالص
عباده / فتوح مش صغير و لا اهبل اكيد مش هيغلط غلطه زى دى يعني
مختار / التنبيه ما يضرش برده عشان ما نرجعش نقول يا ريتنا كنا قولنا
مغاورى / تمام
عباده / بس فى حاجه مهمه اوى ناقصه
عباده يبص لمختار و يبتسم
عباده / هنلعبها من اول و جديد
مختار و مغاورى يبصوا لبعض و يبصوا لشاهين مش فاهم حاجه
.........................
فى شركه رامى
مهره تحط ملفات قدام رامي يراجعها
رامى / اخبار الكليه ايه ؟
مهره / تمام الحمد لله
رامى / على فكره انا استمتعت جدا يوم السفارى معاكوا
مهره / طب الحمد لله
رامى / انا و مروان بنروح مع شلتنا نلعب بينتبول تسمعى عنها
مهره / اكيد بس بصراحه عمرى ما جربت
رامى / طب احنا رايحين الويك ايند ده ما تيجي معانا و بالمره تقنعى مروان عشان بيحاول يخلع عشان ما نعلمش عليه زى كل مره على فكره اخوكى فى النشان ضايع
مهره تبتسم
رامى / انا هكلمه و انتى كلميه
مهره / ربنا يسهل
رامى / ربنا يسهل ربنا يسهل اللى هى باذن الله يعني و لا ربنا يسهل ربنا يسهل اللى هى انزل من على ودانى
مهره تضحك
مهره / لا ربنا يسهل اللى هى ان شاء الله .. عن اذن حضرتك
مهره تطلع بره و رامى متابعها اول ما تقفل الباب يطلع الموبايل
رامى / ايه يا عم فينك كلمت الراجل ؟؟ ... يعني ايه ما بيردش اختفى فجاه يعني و لا ايه ... يا عم قولتلك روحله واجهه بالكلام اللى هى قالته الحاجات دى ما بتتحكيش فى التليفون لازم تشوف وشه عشان تعرف بيكدب و لا لا ... تمام تمام على العموم انا كلمت مهره عن الباينتبول و قولتلها تقنعك بس انا مش واثق ان هى نفسها مقتنعه اصلا ... نجاه!!! و انا هجيب رقم نجاه منين و بعدين يا ابنى نجاه ما بتجيش لوحدها دى معاها باكدج كدا على بعضه ما حدش فيهم مريح خالص ... دا انت زنان ابن كلب ... ماشي هشوفلها صرفه ... سلام سلام
....................
فى الجيم فى فيلا نجاه
نجاه بتتمرن مع فارس و هى بتهاجم و مش مدياله فرصه و بتصرخ فى الضرب و كارم بيحكم بينهم
كارم / خلاص
نجاه تروح فى جنب تشرب فارس يروح وراها
فارس / و لما اتغابى عليكي مش هتزعلى يعني
نجاه / ما دام قال ابدا اعمل اللى تقدر عليه ما منعتكش
فارس / صح
نجاه / اه صح انا ما قولتلكش بالراحه عليا انا مش هعيط لما تغلبنى و لا هتعصب عليك هتمرن اكتر و اجى اعيد الماطش تانى
فارس / ماشي لما نعيده نبقي نشوف بس ما فيناش من زعل
كارم / ما خلاص يا عم ما تافورش
جوزيف يدخل
جوزيف / السلام عليكم
الكل ينتبه
جوزيف / هو عمران فين
جابر / فى الكليه بس ناسي موبايله فوق
جوزيف يهز راسه
نجاه / خير مختفى من الصبح و راجع تسال على عمران
جوزيف يطلع ورقه من جيبه و يروح يديهالها
جوزيف / مروان على الدسوقى مدمن سابق و مضارب فاشل فى البورصه فتح اربع مشاريع كلهم خسروا الحقيقه ما شوفهوش فلح فى اى حاجه الا الكافيه دا لمجرد انه لسه فاتح انما على الورق بيخسر و مش بيجيب مصاريفه بسبب سوء الاداره دا غير انه مغنى فاشل او على الاقل على قده
جابر / عادى شباب كتير بتخبط فى بدايه حياتها
جوزيف / ما دا الجزء الكويس من التقرير
نجاه تتكلم و عينها فى الورق
نجاه / بلاغات بنصب و شيكات و كمبيالات كلها انتهت بالتصالح و اتلمت بسرعه
كارم / يمكن شركائه فى المشاريع الى دخلها او البورصه لما اختلفوا شيلوه الليله بتحصل كتير
جوزيف / على العكس رامى فهمى سيف الحق اللى اشترى كل المشاريع اللى مروان فشل فيها برخص التراب و حقق فيها ارباح كبيره جدا و نقلته نقله تانيه
فارس / فرق بين مدير فاشل و مدير كويس
نجاه / انت بتحاول تقول ايه
جوزيف / الاتنين وحشين او على الاقل ... لو مهره دى فعلا مهمه بالنسبالكوا زى ما بتقولوا اول حاجه لازم تحصل انكوا تبعدوا الاتنين دول عنها
جابر / دايما فى نص مستخبى من الحقيقه
جوزيف / ايوه و دا دايما بيكون الجزء المظلم ... فى اكل ؟
نجاه / ثوانى هسخن و اغرف ... عن اذنكوا
نجاه تمشي
جابر / اتكلمت عن اكرم بيه و لما روحنا اتكلمنا معاه و سمعنا تبريره اه غلطان طبعا بس ... هو نيته كانت كويسه
جوزيف / انا ما بؤمنش بالنوايا بصدق فى النتايج هو عمل ايه ... انا مثلا كل الحاجات اللى انتوا شايفينها وحشه عملتها فى حياتى نيتي فيها كانت خير
فارس/ خير !!
جوزيف / ايوه انا قتلت ناس كتير جدا رحمه عشان ما يعيشوش عيشتى
فارس / و ما قتلتش نفسك ليه ما دام مش عجباك عيشتك
جوزيف / عشان اسود عيشه ناس تانيه
جابر / برده كل الكلام ده ما يخصش مهره هم صحاب فى بعض مهره ما لهاش دعوه ... لو عندك حاجه تانيه قولها
جوزيف / ما عنديش خصوصا انها ما تخصنيش ... تخصكوا انتوا ... دوروا انتوا بقي
جوزيف يروح المطبخ نجاه بتغرف يدخل يشد الطبق و يدخل اوضته و يرزع الباب و نجاه مستغربه تتنهد و تسكت و تطلع بره
نجاه / اعتبروا اللى قاله احتمال وارد و امشوا وراه مش هتخسروا حاجه
جابر / اعتقد اننا مش فاضيين اوى كدا عشان نتسوح فى مشاكل ما لهاش اى اساس من الصحه اكتر من انها مجرد اوهام و خلاص عن اذنكوا
جابر يمشي
فارس / مش فاضيين ايه !! دا احنا صيع
التلاته يبصوا لبعض و يضحكوا
.......................
فى مكتب الجوارحه
مغاورى / انت عارف الموقف حساس قد ايه بس مفيش قدامى حد اقدر اعتمد عليه او اثق فيه غيرك
فتوح باصص فى الارض و ساكت
مغاورى / تقدر تعمل حاجه و لا
فتوح / انت كدا بتعينه انه يفلت بعملته
مغاورى/ اللى ستره ربه انا ما افضحوش و عقابه عندى شديد كدا كدا مش هيفلت منه بس العيله دى ما تتفككش و الشيطان يدخل بينا و يوصلوا للى هم عاوزينه ... شاهين غلط و يستاهل قطم رقبته و انا اقسم بالله ما بحابيله عشان ابنى بس هو تاب و عرف غلطه و جاهز لعقابه و اختار يقف فى صفنا حتى لو هنقتله و لا انوش يخونا ما تشفعلوش دى عندك يا ابن عمى
فتوح / تشفعله و هتشفعله قصاد
مغاورى / لا مستحيل لا انا لو مكانه عمرى ما اسامح و لا هقدر نعيش فى بيت واحد و البيت ده هيتفك و العقد يتفرط منصور ما ينفعش يعرف الحقيقه ما ينفعش يعرف غير اللى احنا هنقوله و على فكره دا مش رايي لوحدى دا راى مختار و عباده كمان ... اكيد هم مش هيحابوا لابنى عن بنتهم و لا ايه
فتوح / انا عارف انك مش بتحابى لابنك بس انت كمان لازم تبقي فاهم ان منصور و دياب مش صغيرين و سهل يعرفوا الحقيقه و ساعتها بجد بقي العقد هيتفرط من اجمد عقده فيه يعني حرفيا حرفيا مش هتقومله قومه تانى انما لما يعرفوا الحقيقه مننا اهو ... فى امل نلمها
مغاورى/ نعدى المرحله دى و انا بنفسي هقولهم الحقيقه و هعاقب شاهين قدام الكل بس دلوقت ما ينفعش ... ما ينفعش خالص
فتوح / ماشي ... بس عشان نبقي على نور انا مش موافق بس ما دام انتوا اتفقتوا انا هقول امين
مغاورى / ماشي ... وقت الجد قول ان انا اللى اجبرتك تعمل كدا انا هشيل الليله كلها بس عدينا بس الفتره دى ابوس ايدك
فتوح / ماشي اديني شويه وقت اشوف هقدر اعمل ايه
مغاورى/ مفيش وقت احنا بنسابقهم الثانيه بتفرق ... دول جاهزين من سنين مش عاوزين مفاجات الله يرضي عليك
فتوح / الحكايه محتاجه وقت انت مش بتلاعب عيال ولاد اختك جبابره و لو الحاجه مش محبوكه صح هيفقسوها فى ثوانى و وفاء كمان الله اكبر عليها مش اقل منهم
مغاورى / مهما كانوا تلامذتك و انت الاستاذ و انا واثق فيك توكل انت بس على الله و باذن الله انا واثق انك هتظبطها
فتوح / اقولك ايه بس ... تمام ... هعمل اللى اقدر عليه
مغاورى / ربنا يكرم اصلك و يريح بالك زى ما ريحت بالى
فتوح يتنهد و يمشي و شاهين يدخل
شاهين / ايه الاخبار يابا
مغاورى يبصله و يسيب المكان و يمشي شاهين يبص فى الارض
........................
فى الكافيه
مروان / بصي هو بيبقي يوم ممتع جدا بصراحه بس انا مضغوط جدا اديكي شايفه... بس روحى انتى لو عاوزه هتنبسطي جدا و هتغيرى جو و تطلعى كل طاقتك السلبيه دى
مهره / لا انا تمام مفيش طاقه سلبيه و لا حاجه
مروان / يا بنتى روحى ما تربطيش نفسك بيا ... بصي لو مكسوفه من رامى انا اضمنهولك
مهره / لا مش حوار و الله بس انا فعلا كمان مضغوطه و كمان اول مره اروح و هبقي لوحدى و كدا خليها مره تانيه
مروان / طب ما تشوفى نجاه تروح معاكى
مهره / مش عارفه ... انت شايف كدا
مروان / هى علاطول بتتحرك وسط الجروب ده سمعت برده انهم كلهم كانوا معاكوا فى تركيا
مهره / لا خالص دا هو جابر و عمران بس و كان فى واحد كمان اللى هو صابر ده بس
مروان / انا بصراحه بستغربهم ما برتاحلهمش حاسس ان وراهم حاجه
مهره / ما شوفتش منهم غير كل خير
مروان / و هو انتى كنتى شوفتى شر ابدا من اكرم بيه
مهره ملامحها تقفل و تقلب حزن
مروان / على فكره بطل يحاول يكلمنى شكله فهم غلطته و اللتفت لحياته
مهره / ما يخصنيش فى حاجه
مروان/ ما علينا ... خلينا فى نجاه ... انا سالت بابا فى وسط الكلام عن عمران و كدا بما انه تلميذه قالى انهم ولاد ناس جامدين اوى فى الصعيد بس لما عملت سيرش عنهم لقيت اخبار و منشتات كتير و مشاكل كتير مرتبطه باسمهم ... و مش هنكر انى لقيت برده اخبار حلوه و مبادرات و تكريمات من المحافظين و الوزراء على مدار السنين اللى فاتت ... انا مش عارف افكر ازاى او اخد قرار انا كمان ما شوفتش منهم حاجه بس انتى اختى الصغيره و من حقى اخاف عليكى
مهره تبتسم
مروان / انا عاوز اتعامل معاهم اكتر و اقرب منهم اكتر عاوز اشوفهم من قريب عشان اقدر احكم هم فعلا كويسين و لا مقلب
مهره / طب ما دا سهل لانهم بيجوا يحضروا التمرين مع عمران عادى تقدر تقعد و تتعرف عليهم و تتكلموا
مروان / ممكن ... و مش فكره وحشه لو عزمتيهم على الباينتبول زى ما عزموكى على السفارى و الخيل
مهره / لو مش هتيجي مش هروح
مروان / هاجى اكيد بقولك اقرب منهم و احكم عليهم
مهره / ما انت قولت مش فاضي
مروان/ مش فاضي فعلا بس دى اولويات اكيد مش هخليهم يقربوا منك و انا مش مطمن ... سامحيني يعنى انتى مطمع الكل عارف كويس ان بابا زى ما انتى عارفه و اكرم بيه زى ما انتى عارفه بقي فى بينكوا مشاكل بسبب طلاقه من مامتك ... و خلينا نمشيها طلاقه من مامتك
مهره تبص فى الارض و تفرك فى ايديها
مروان / لازم يشوفولك راجل و يعرفوا انك مش سهله و لا لوحدك ... الدنيا كلها لازم تعرف ان ليكي ضهر عشان لو حد دماغه سحلته كدا و لا كدا يلاقيله حد و لا ايه
مهره تهز راسها مروان يمسك ايدها تبصله
مروان / مش عاوزك تشيلى هم اى حاجه و انا جنبك ... انا عارف انى اتاخرت بس اقسملك انه ما كانش بكيفي ... بس دلوقت خلاص كل حاجه اتغيرت
مهره تبتسم
..........................
فى الشركه عند عبد العزيز
ناصر / انا عارف و الله ان حضرتك طلبت وقت تفكر و تسال علينا بس انا ما كنتش اعرف ان حضرتك هتتاخر اوى كدا فى الرد و السؤال
عبد العزيز/ و انا يا ابنى ما كنتش اعرف انك مستعجل اوى كدا
ناصر / ما هو خير البر عاجله برده
عبد العزيز / بصراحه يا ناصر انتوا ناس ما تتعيبوش و انا فاتحت نور بنتى فى الموضوع فعلا و طلبت وقت تصلى استخاره
ناصر / حقها طبعا بس هستاذنك يعني اننا نمشيها حسب الاصول
عبد العزيز / مش فاهم قصدك
ناصر/ انا طبعا ما اقصدش حاجه بس ... الاولى انها تقابلنى انا و اهلى الاول و نتكلم و نتقدم و بعدين تصلى الاستخاره او يمكن وقتها ما تحتاجهاش خالص
عبد العزيز / الكلام ده يا ابنى لو كانت نور بنتى ما تعرفكش ... دا انتوا زمايل دفعه واحده و سيكشن واحد
ناصر / ايوه ... بس علاقتنا كانت سطحيه جدا فى حاجات كتير الدكتوره نور ما تعرفهاش عنى و اعتقد يعني انها ممكن تفرق معاها فى رايها ده و لا حضرتك رايك ايه ؟
عبد العزيز / و الله انا
ناصر / احنا ممكن نخليها ودى يعني حضرتك عارف ان والدى بيجي المشوار من اخر الصعيد و كدا
عبد العزيز / اسمحلى اقولك ان ده من اسباب تحفظ والدتها انها هتبعد عنها
ناصر / صدقنى دا غالبا هيكون اخر همنا بس اسمحلى اكمل ... انا كل اللى طالبه من حضرتك انك تاذنلى بالزياره اجى و اتعرف عليكوا و تتعرفوا عليا و اتكلم مع الدكتوره شويه و اكيد الكلام هيجيب بعضه و هرد على كل التحفظات دى ... اعتقد ان قاعده زى دى هتوفر وقت كتير جدا علينا
عبد العزيز / و الله يا ناصر يا ابنى انا
ناصر / انا عارف ان البيوت ليها حرمه و دخولها مش بالساهل ... لو حضرتك تحب المقابله دى تكون بره فى اى مكان انا ما عنديش مانع حضرتك شاور الجماعه عندكوا و بلغنى انا رقمى مع حضرتك
عبد العزيز / تمام هشوف و اكلمك
ناصر / بس ارجوك المرادى تكلمنى بجد حتى لو بالرفض صدقنى الانتظار وحش جدا
عبد العزيز يضحك ناصر يقوم يعدل هدومه
ناصر / انا اسف جدا انى عطلت حضرتك و باذن الله مقابلاتنا بعد كدا هتكون فى مكان اللطف
عبد العزيز يقوم يسلم على ناصر
عبد العزيز/ ربنا يقدم اللى فيه الخير
.......................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
