الكبيره ٢ بقلم / لولو_محمد

الحلقه ١٨

((((((( الكبيره ٢ ))))))
#لولو_محمد
الحلقه ١٨
جوزيف / جامد ننقل على ليفل اعلى لو جاهز
كارم / هات اخرك
نجاه بتابع و هى مبتسمه
فارس / ما بحبوش يا نجاه
نجاه / و انت من امتى انطلب منك تحب المدرس و لا الاستاذ بتاعك
فارس / و انا من امتى اتجابلى مدرب و لا مدرس ابن حرام
نجاه / وطى صوتك لو سمحت
فارس ينفخ و يشوح بايده
جوزيف / ما تيجي يا فارس تجرب
فارس يقوم و ينفض هدومه نجاه تقوم تقف
جوزيف / بالدور يا ماما بالدور مش حفله هى اقعدى ... اقعد يا كارم انت ممتاز على فكره بتتعلم بسرعه و ذكى
كارم يروح يقعد و نجاه لسه واقفه جوزيف يبص لفارس و يبتسم و فارس مش مبتسم
جوزيف / البدايه عندك
.............................
فارس يهجم بجسمه كله جوزيف يقلبه فى الارض جامد كارم يتنطر يقف نجاه تمنعه يدخل جوزيف يمد ايده لفارس يزق ايده و يقوم يعدل نفسه جوزيف يبص لنجاه و يبتسم و يروح ناحيتهم
جوزيف / كفايا كدا النهرده عشان ما نمتش كويس و خلقى ضيق
نجاه تهز راسها جوزيف يروح يجيب شنطته و يمشي خطوتين نجاه تجرى تلم حاجتها من الارض جوزيف يرجع لكارم
جوزيف / بتعرف تسوق
كارم / ايوه
جوزيف يحدفله المفتاح
نجاه / انت مش جاى معانا
جوزيف يمشي تجرى وراه ما بيقفش
نجاه / يونس يونس استنى يونس
جوزيف / روحى مع اخواتك
نجاه / اسفه بس انت وعدت ابويا ترجعنى
جوزيف / ما حصلش
نجاه / استنى مش هجرى وراك انت رايح فين
جوزيف يقف
جوزيف/ روحى مع اخواتك بدل ما تروحى من غير واحد فيهم
نجاه تحاول تلم الموقف
نجاه/ فين ثباتك الانفعالى يا فندى انت ايه ما اتعرضتش لاى نوع من انواع الاستفزاز قبل كدا ؟ امال يعني عاملنا فيها مدرب و مخضرم و سبع مقاتلين فى بعض
جوزيف / انا بعرف اخد حقى كويس و ارد على الاستفزاز باللى اتقل منه بس المرادى للاسف انتى ... و حطى تحت انتى مليون خط مكتفانى
نجاه / تقدر ترد بمليون اسلوب زى اللى عملته هناك عادى
جوزيف / كنتى هتفرحى لما تشوفى ردى الحقيقي
نجاه / طب حقك عليا اهدى انت فعلا ما نمتش كويس و لا انا بص خلينا نروح نرتاح شويه و بعدين
جوزيف / مفيش و بعدين انا محتاج اقعد مع دياب شويه
نجاه / مش وقته
جوزيف / لا وقته انا عارف ان امه تعبانه بس البلد كلها معتمده عليه يا يسوق يا يسلمنى الدركسيون انما كدا احنا عالمنحدر دايركت
نجاه / طب خلينا نروح المستشفي الاول نطمن علي عمتى و لو سمحت خليك هادى ممكن ؟
جوزيف / ماشي
نجاه تبتسم و ترجع لاخواتها
فارس / انتى بتسبينا و تجرى وراه لينا بيت و ربنا لعيد ربايتك
نجاه/ خليك فاكر الجمله دى كويس عشان هدفعك تمنها غالى
كارم / اهدى يا فارس عيب كدا دى اختك الكبيره برضه
فارس / كبيره على روحها ايه ما لهاش راجل يشكمها فاكره انها وخدانا معاها نهويلها
نجاه / يمين بالله لو حد غيرك كان بجح فى وشي كدا لكنت خليته يوطى على جزمتى يبوسها عشان اسامحه
صابر يجي على فرس جوزيف يشوفه من بعيد
كارم / حقك عليا انا يا نجاه معلش ... نتكلم فى بيتنا عيب كدا يا اخى
فارس / و انت راخر رايح تاخده بالحضن ابن اختك هو و لا انت ايه حكايتك بالظبط
نجاه / مش هاخدك معايا فى حته تانى و ليا كلام تانى مع ابوك لما نروح
صابر يدخل التلاته يسكتوا
صابر / التمرين بدا بدرى و خلص بدرى شكله
نجاه / ازيك يا صابر
صابر / انتوا ليه مختارين الحته دى ... مكشوفه و بعيد و اى درون ممكن يدخل ياذيكوا
جوزيف / رملتها ناعمه
صابر / سمعت عنك حكاوى كتير من يوم ما نزلت البلد
جوزيف / اللى يسمع غير اللى يجرب
صابر / كله باوانه ... ابويا الله يرحمه كان بيحب ابوك يا ريتك تبقي ربعه
جوزيف يبص الناحيه التانيه
نجاه / الحجه ام دياب اتصابت
صابر / سمعت... و كلمت منصور فى التليفون
نجاه / مش طابعك فى العادى بتركن خلافاتك على جنب وقت الاصول
صابر / هم فاهمين مش هينفع انزل ليه ما تشغليش بالك
نجاه تهز راسها
نجاه / نستاذنك لازم نمشي
صابر / عاوزين نبقي نسخن الخيل دى بدل ما هى راكنه كدا
نجاه / نطمن على الجماعه و نرتبها
صابر يهز راسه نجاه تمشي و جوزيف وراها و اخواتها وراهم
فارس / سلام يا صابر
كارم/ سلام يا صابر خلينا نشوفك
صابر / فى حفظ الله ... باذن الله
......................
فى اوضه عبد الهادى
عبد الهادى نايم و رعد جنبه بيكلمه
رعد / انا ما كنتش عاوز اتكلم بس ... انت اللى مدلعها برده يا عبده اشى صيغه و لبس و كل طلباتها مجابه دى ما داقتش ربع العز اللى معيشها فيه فى بيت اهلها و ياريته تمر فيها
عبد الهادى / انا مش قادر اصدق
رعد / يا عم امك زمانها جايه فى الطريق اسالها و انا مش وريتك انى كلمتها ما جاتش ليه لحد دلوقت قولى دى لهفه واحده على جوزها برده
عبد الهادى / يمكن قالت تعملى لقمه و هى جايه
رعد / ادينا قاعدين مستنين بس خليك فاكر انى قولتلك حكايه انها تبات فى الشقه لوحدها دى ... مش مريحانى يا اخويا ... ما كانت باتت جنب عيالها عند امك و لا روحت على ابوها... دا واحده غيرها ما كانتش فرقت فرشتك ... فضلت تحت رجليك لحد ما تقوم بس نقول ايه يلا ادى اخره الدلع
الباب يخبط و يتفتح و تدخل نسمه
نسمه/ الف حمد الله على السلامه يا عبد الهادى ما صدقتش تحت لما قالولى انك فوقت و نقلوك اوضه ... مش كنت كلمتنى يا رعد ... دا اتفاقنا برده
رعد / لا يا شيخه ..  بقولك ايه يا عبده مراتك جت اهى ... انا هروح اريح شويه عن اذنك
رعد يمشي و نسمه مستغربه
عبد الهادى / تعالى يا نسمه جنبى
نسمه تروح تقعد جنبه
نسمه/ اكلت ؟  هكلم امى تبعتلك لقمه
عبد الهادى / ما تتعبيش نفسك امى جايه كمان شويه و جايبه اكل ... تعالى اقعدى جنبى
نسمه تروح تقعد جنبه على السرير
نسمه / الف حمد الله على سلامتك
عبد الهادى يدخل ايده فى حجابها
نسمه / الله !! فى ايه
عبد الهادى / شعرك مبلول ليه
نسمه / ما انت عارف انى لازم استحمى كل يوم الصبح ... هو فى ايه
عبد الهادى / ما فيش ... ما فيش
نسمه تستغرب تقوم تروح تقعد على الكرسي و هى مش مرتاحه و كل شويه تبصله باصصلها
نسمه / فى ايه يا عبد الهادى مالك ..  انت زعلان انى مشيت اقسم بالله فضلت جنبك لحد ما صعبت على رعد وصلنى بنفسه لباب البيت
عبد الهادى / خلاص يا نسمه مش وقته انا مش قادرلك
نسمه تقوم تقعد جنبه
نسمه / سلامتك يا خويا اناديلك دكتور
عبد الهادى / كتر خيرك اقعدى انتى بس ارتاحى
نسمه / حاضر
نسمه تروح تقعد على الكرسي و تتنهد
........................
فى اوضه ماجده
ياسمينا / طب و الله اما اشوفه لتشوفوا انا هعمل فيه ايه
سماح / و انتى تقدرى تعمليله حاجه
ياسمينا/ ما تسخانينيش يا عمتى انا بغلى خلقه
دياب / مش هو اللى عمل فى امى كدا اصلا ما كناش سبناه يعني
ياسمينا / بص يا دياب لو قنبله فرقعت فى نجازاكى هو السبب برده
منصور / اشمعن نجازاكى يعني
ياسمينا / اهو اللى جت فى بالى بقي ... دى اليابان صح
ماجده تضحك و هى مش قادره
ماجده / و الله ما قدرالك يا ياسو ربنا يهديكي
الباب يخبط و تدخل نجاه
نجاه / السلام عليكم متجمعين عند النبى
نجاه تروح تسلم على الكل و تحضن ماجده
نجاه / يونس بره بيستاذن يدخل يطمن على حضرتك
ياسمينا/ يونس مين ...ااااه هو شرف
سماح/ قومى بقي يا اختى ورينا شطارتك
ماجده / خليه يتفضل
نجاه تروح تفتح الباب جوزيف واقف فى جنب تشاورله يدخل
جوزيف / سلامتك
ياسمينا تنفخ و تبص الناحيه التانيه
ماجده / الله يسلمك اتفضل
منصور / تشرب ايه
جوزيف / و لا اى حاجه انا مش هطول انا جيت اطمن على حضرتك و ماشي
جوزيف يبص لدياب دياب يقوم
دياب / انست و نورت ...خدوا راحتكوا انا هاخد يونس و نطلع الكافتريا شويه هتعوزوا حاجه
منصور / هاجى معاك
نجاه / هاجى معاكوا ... عن اذنك يا ميجوا
الاربعه يمشوا
سماح/ صحيح الادب فضلوه عن العلم
ياسمينا / ايوه مؤدبه ايه هقوم اورط الرجاله معاه و فى المستشفي كمان
ماجده تضحك و هى بتتوجع
ماجده / يا جدعان ارحمونى
التلاته يضحكوا
…………...................
فى استقبال المستشفي
فارس / لو مكانى يا جابر كنت عملت اقل من كدا
كارم / اختك الكبيره و ليها احترامها
فارس / لما تحترم نفسها الاول
جابر /  فارس ... ما ترفعش حسك و انت بتتكلم عن اختك بالشكل ده
فارس / ابوس رجلك انت ما شوفتش
كارم / انا شوفت ما عملتش حاجه بتتمرن عادى و الجدع كان لازم حدوده و مسافته
فارس / ما كانش بيلمسها يعني و هم بيتمرنوا و لا عشان علمك حركتين خلاص هترفعله الاريال
كارم / احترم نفسك بدل ما
جابر / انت زودتها يا فارس انا بقول تروح ترتاح و نتكلم لما نروح كلنا
فارس / حتى انت بتقول كدا
جابر / انا قبل الكل اى كلمه فى حق نجاه توجعنى زى ما المفروض توجعك فما تطلعش منك
فارس / انا اختى بميت راجل بس الجدع ده مش سالك
كارم / و احنا ما سبناهمش لوحدهم
فارس / و هم فين دلوقت تقدر تقولى
همام يدخل
همام / السلام عليكم مالكوا شكلكوا من بعيد بيقول فى حاجه خير
جابر / اخوات و شادين مع بعض شويه ما تشغلش بالك ... روح يا فارس و انا هروحها بنفسي و لينا كلام مع الكبير لما نروح
فارس / اما نشوف اخرتها ... عن اذنك يا همام
فارس يمشي
همام / خير فى ايه
جابر / بسيطه سيبك انت ها عملت ايه
.......................
فى الكافتريا
جوزيف / طول ما انا و نجاه فى البلد اللى حصل هيتكرر و مهما زودت رجاله و كاميرات و بدعت مش هتمنعه انت اخرك تقلل عدد الخساير ... و دى برده مش مضمونه
نجاه / نروح اسكندريه عند همام؟
جوزيف / كل اللى هيفرق ان الضحايا يبقوا من عندهم مش من عندكم النتيجه واحده
منصور / ما دا ينطبق على اى مكان فى العالم
جوزيف / الا اذا قدرنا نكسب وقت لحد ما نرتب نفسنا هنفضل هنا و كل حاجه بس هنبقي فى امان ... مؤقتا
نجاه / ازاى
جوزيف / هى المهمه كانت ايه من الاول ... اتجوزك
دياب / احلم على قدك
جوزيف / مش هموت عليها يعنى مش هتجوزها فعلا مش هتجوزها خالص ... بصوا احنا كل اللى محتاجينه اننا نوهمهم ان الخطه شغاله نرميلهم كل فتره معلومه او اى حاجه نطمنهم بيهم هنبقي بنلعب فى اتجاهين الاتجاه الاول اننا نريح رجالتنا و نعيد تنظيم صفوفنا و نامن البيوت
منصور / و التانى
جوزيف / اللى بيطمن بيغلط بيخرج من مخباه و ساعتها نتتبعهم و يمكن
نجاه / تفتكر هنقدر نوصل للى بتقول عليه القائد الاعظم ده
جوزيف / انتى عبيطه يا نجاه ... احنا اقصي طموحنا نكسب وقت نعيشه انما الحرب دى مش هنكسبها
الكل يبص على بعضه
جوزيف / انا عارف انكوا ما بتثقوش فيا ... طبيعي جدا ... و الصراحه انا كمان مش واثق فيكوا انتوا لحد دلوقت ما بيعاملنيش كويس غير نجاه الباقي يا بيجامل يا مش قادر يجامل حتى ... بس دا اللى عندى ... المرادى امك ... المره الجايه ما اضمنش مين هيتصاب و لا اقدر اضمن ليكوا مين اللى هيتبعت غيرى انا اه كنت التوب فى مجموعتى بس ما حدش يعرف فى زيي كام واحد
منصور / حاسك بتخوفنا و خلاص مش عارف ليه
دياب / و انت عاوز تنيمهم ازاى بقي ان شاء الله
جوزيف / لازم نضحى بحد ... او حاجه
دياب / يا ابنى انا مطبق من امبارح جنب امى و سايب مراتى نايمه فى الشركه خليك دوغرى و انجز
جوزيف / مش عارف الدنيا هترسي على ايه بس قبل اى حاجه لازم تبقوا فاهمين الدنيا عشان ما تفتكرونيش خاين
نجاه / اعتقد الكلام فى الموضوع ده لازم يكون مع الكبار
جوزيف / الاهم من الكبار دياب و منصور ... السيستم
دياب / فهمت ... ما حدش من الكبار هيوافق .. دا تعب سنين
جوزيف / لو عندك حل احسن اتفضل قوله
دياب / عندى
جوزيف يبان انه مهتم يسمع و الكل يتعدل فى قاعدته
.......................
قدام اوضه عبد الهادى
رعد واقف نسمه تطلع بره
رعد / خير فى حاجه و لا ايه
نسمه / هو انت ليه قولتلى ان عبد الهادى ما فاقش
رعد / دا انا !! طب تمام ما دام عاوزه تجبيها فيا بكيفك
نسمه / لا ما احنا مش هنعيده تانى انا قولت ربنا هداك... بس العيب مش عليك انا اللى ما بتعلمش طول السنين دى بس برده مش فاهمه ايه فاكر ان موقف زى ده هيخرب بيتى ازاى يعني
رعد / حيلك حيلك انا كلمتك اصلا و بعدين فوقى احنا فى المستشفي
نسمه / معاك حق ... احنا فى المستشفى بس الحمد لله عدت على خير و بكره و لا بعده ربنا يرده لبيته و ساعتها هيحط كل واحد فى مكانه
رعد يبتسم باستهزاء امه تدخل
الست / مالك واقفه برا كدا ليه
نسمه / اطمنتى على الست ام دياب ؟
الست / اه اطمنت
نسمه / كويس خليكي جنب عبده بقي لحد ما اروح اسلم انا كمان و ارجع
الست / ما لوش داعى سلمتاك عليها خليكي جنب جوزك ... كفايا امبارح
نسمه / عن اذنك ياما احب اسلم بنفسي
نسمه تسيبها و تمشي
الست / شايف بنت الكلب بتكلمنى ازاى طب و الله لخلى عبد الهادى
رعد / اهدى ياما الجدع عيان اهدى عليها مش كدا مش هنا
الست / انا مش فاهمه انت بتحابيلها على ايه
رعد / امال اخرب على اخويا ياما اهدى الجدع عيان و مش حمل توتر و لا عصبيه
الست / و الله انت ما فى منك
رعد يبتسم الست تفتح الباب و تدخل
.........................
فى الجنينه قدام المستشفي 
همام / انا عارف انهم اجارتيه و انهم بيشتغلوا للى يدفع اكتر بس احنا مش هنقدر نكفى ... هيجي وقت و نقع كلنا
جابر / يعنى احنا الجدع ده كان بيقدر يوصل لناس مننا و يخليهم يساعدوه نقوم احنا نقوله لا دا احنا كمان هنجيب اجراتيه بالفلوس و ندسهم وسطينا
همام / لا وسطينا ايه احنا هنعملهم منظر شو يعني زى الفايبر اللى بيبقي جوه المخده ده ينفش بس و يعمل منظر و برده هيبقي عينا عليهم 
جابر / يا حلاوه يعني هيبقي عينا عليهم و عينا على الغرب كمان طب و ليه بقي
همام / عشان احنا مكشوفين جامد يا ابن عمى و عددنا مهما زاد محدود و دمنا غالى علينا و اقل ضربه بتوجعنا فلازم نلاقى حل مهما كان التمن لازم نلاقى حل
جابر / و دا مش حل يا ابن عمى دا السم فى العسل
همام / مش لو قدرنا ننفذها زى ما راسمها فى دماغى
جابر / و انا هخليني معاك للاخر ... قريني اللى فى دماغك
همام / بص يا سيدي احنا هنجيب يجي خمسين ميت واحد من العيال البدى بيلدينج و نوزعهم كالاتى ...
...............
فى الكافتريا
جوزيف / انا موافق و هساعدك تنفذ بس انت مش بتتعامل مع هواه و لا انت اذكى واحد فى الملعب الناس دى هتحتاج اكتر من كدا
نجاه / زى ايه
جوزيف / انا عارف انكوا ما بتثقوش فيا و ان ماضينا مع بعض مش قد كدا بس المرحله الجايه لازم تثقوا فيا
منصور / ايوه يعني عاوز ايه ... بص يا ابنى من الاخر كدا احنا استوينا انت خليتنا كلنا نشك فى صوابع ايدينا دا اللى مننا طلع ابن كلب الغريب هيصدق انت عاوز تنقطنى
جوزيف يتنهد
نجاه / انا هثق فيك
دياب و منصور يبصوا لبعض و يبصولها
جوزيف / ليه ؟
نجاه / عشان انا حاسه ان ده الصح
منصور / بقت بالاحساس هى ... ما انتى كنتى بتاخدى ميرو مراميرو فى حضنك يا اختى ما حستيش مره انها خازوق
نجاه / بس ما اخدتش اختها و لا مره فى حضنى
دياب / كدا كتير
نجاه / ما اخدتش بلال فى حضنى اميره كانت طفله هشك فيها ازاى
جوزيف / امايا ما كانتش بتكدب و لا بتمثل عشان كدا انتى وثقتى فيها امايا حبتك بجد ... على فكره الخطه الاصليه ما كانتش تجنيد نجاه ... الخطه كانت تتحبس فى الاوضه لحد ما تولد ناخد بتاعتنا و نرميلكوا بتاعتكوا ... لكن امايا لما عاشرتها و حبتها غيرت كل ده هى اصلا من اللى شايفين المراه ملاك برئ و الرجاله شياطين
دياب / ما احنا ممكن نقتل نجاه عادى و نتاويها تحت التراب و نردم وراها جبتوا الثقه دى منين اننا كلنا هنسلمكوا دقونا مقابل بيبي ما شوفناهوش اصلا
جوزيف / لا ما هو ساعتها نجاه هى اللى هتدفنكوا كلكوا عشان بنتها
نجاه / ما يمكن اخلف ولد
منصور / فرقت التفصيله دى يعني انتى عاوزه تشليني صح
جوزيف / ما اعرفش بس احنا ما جربناهاش مع ولاد مع البنات دايما بتنجح
دياب / ما هو الولاد ما بتحملش هتنجح ازاى... اوعى انت منهم
جوزيف / لا دا واضح ان الشلل وراثه فى العيله ... ان يكون عندك بنت او ولد اكيد الولاد ما بتحملش بس هى ممكن تولد ولد ما تشغل مخك ... احنا كدا ميتين رسمى
نجاه تضحك و تكتمها
منصور / مجربها قبل كدا قولت
جوزيف / مش انا ... بس هيلجا ... هيلين ... اول ما اتعرفت عليها كانت سلاح فتاك ... ما يغركوش الرقه و البراءه ... دى تقدر تقتلك فى اقل من خمس ثوانى و من غير سلاح كمان ... ما علينا هيلجا كانت كلبه خاضعه قدام راجل حلوف كدا ما علينا منه لمجرد انه اخد بنتها منها ... مع العلم ان هيلجا ما شافتش بنتها و لا تعرف اسمها حتى
نجاه / ايه الجبروت ده
جوزيف / و لحد اخر لحظه هيلجا ما كانتش واثقه ميه فى الميه ان بنتها عايشه اساسا و مع كدا مكمله
نجاه / و بنتها فعلا عايشه
جوزيف / حاليا معايا انا الوحيد اللى اعرف مكانها... و عشان كدا هيلجا ولائها بقى ليا
نجاه / طب ما ترجعهالها ليه مكمل فى الطريق ده ليه تحرم ام من بنتها و بنت من امها ليه تعيشهم اللى انت عشته
جوزيف / عشان البنت ما تعيش اللى انا او امها عشناه و لا حتى اللى انتى بتعيشيه دلوقت البنت بتعيش عيشه سويه ما تعرفش كم السواد اللى فى الدنيا حواليها مش مضطره تعيش مصير اسود لمجرد انها من عيله الزيني او الجارحى ... او السبع ... ما الهم و القرف طلعوا بيتورثوا برده زى ما احنا عايشين كدا
صمت ثوانى 
دياب  / و انت متاكد ان هيلجا ولائها لسه ليك فعلا
جوزيف / ما هى دى الخطه اولا انى اختبر ولائها و ثانيا انى اثبت للمجلس انى لسه معاهم
منصور / و دا هتعمله ازاى بقي كدا بالصلاه على النبى
جوزيف يبتسم و الكل ينتبه
...................
فى اوضه نجاه
احلام تدخل و فى ايدها ملايه تلاقي البلكونه مفتوحه تروح تقفلها و تبدا تنضف الاوضه
احلام / انا مش فاهمه الدماغ دى و الله حقيقي ... طبعا ما انتى لو بتنضفى مطرح ترابك كان زمانك مهتمه شويه ... يلا حسبه لله كفايا عليكي اللى انتى فيه
احلام تروح للسرير و تشيل الغطا تلاقى الملايه مكتوب عليها موت باللون الاحمر تصرخ و تجرى بره
...........................
فى الكافتريا
دياب / دا انت لو وقفت على راسك الكبير مش هيوافق ... اقولك حاجه ما حدش فينا هيوافق
نجاه / بس احنا لازم نحاول
دياب / هديكي على بوزك
نجاه/ طب جرب
دياب / صبرنى يا رب ... اسمع يا ابنى احنا ممكن نعديلك اى حاجه لكن لحد هنا
جابر يدخل و وراه همام و كارم
جابر / لازم نمشي
منصور / فى ايه خير مالك شكلك مش مظبوط حاجه حصلت و لا ايه
جابر / هنعرف لما نروح ... كلنا ... حتى انت
جوزيف / مش عندكوا غدى راشق طبعا
جابر يمشي نجاه تقوم تجرى وراه
دياب / فى حاجه كبيره حصلت
الكل يجرى و جوزيف وراهم هادى
نجاه / فى ايه يا جابر ايه اللى حصل فى حد جراله حاجه
جابر / انتى كنتى سايبه بلكونتك مفتوحه
نجاه تفكر الاسانسير يوصل الكل يركب
نجاه / مش فاكره ... ليه ... استنى اعتقد اه نسيتها مفتوحه مش فاكره انى قفلتها بس ليه برده ... جابر انت ما بتردش عليا ليه ... جابر
جابر / هنفهم لما نروح اهدى بقي
نجاه / مالك فى ايه
جابر / انتى حتى مش حاسه انك عملتى اى حاجه ... برافو
نجاه / دا انت هتعمل زعلان بقي على فكره بقي لو حد فينا المفروض يزعل من التانى يبقي انا مش انت
جابر يبص الكل متابع الحوار دياب و منصور يبصوا الناحيه التانيه جوزيف متابعه و مبتسم
جابر / نتكلم فى البيت
نجاه / زى ما تحب 
نجاه تبص قدامها جابر يبصلها و يرجع يبص قدامه الاسانسير يتفتح و الكل يطلع
.........................
فى سرايا الزنايته
مختار قاعد عند البوابه بيشوف تسجيلات الكاميرات عباده يدخل
عباده / لقيت حاجه
مختار/ مفيش اى حد غريب دخل او خرج و لا حتى كان فى اى عمال فى البيت عند جابر النهرده
عباده / امال اللى حصل ده حصل ازاى ايه حد من عندنا اتجرا و عمل عمل لبنتى يعني
مختار / عمل ايه انت كمان اهدى
عباده / اهدى !! ماشي هديت وريني اخرتها
مختار / مفيش اى مشكله فى التسجيلات
مختار يتصل بحد
مختار/ ايوه يا باشمهندسه طمنيني راجعتوا التسجيلات
وفاء / مفيش اى حد دخل او خرج و مفيش اى لعب حصل فى اى تسجيل و مفيش اى مشكله حصلت فى اى كاميره
مختار / طب اللى حصل ده حصل ازاى انتى عارفه ده معناه ايه
وفاء / ما اعرفش و الله بس احنا كلنا سبنا كل اللى فى ايدينا و كل واحد قعد راجع التسجيلات لوحده دا غير انى خليت الذكاء الاصطناعى يراجع للتسجيلات برده مفيش اى مشكله ظهرت من اى نوع
مختار / تمام ... كتر خيرك يا بنتى تعبناكى
وفاء / الجهاز عندى بيراجع باقي الكاميرات فى البلد هنشوف لو فى اى حد غريب دخل او خرج من البلد
مختار / تمام هستناكى تبلغيني لو لقيتي اى جديد... فى حفظ الله
مختار يقفل و يبص لعباده واقف و باين عليه الضيق
مختار / مش هيحلها غيره
عباده / طبعا ما هو ما حدش غريب دخل هنا غيره
مختار / من لحظه دخوله السرايا من لحظه خروجه من باب اوضته و عينا عليه لحد اللحظه دى ما اختفاش لوحده اكتر من دقيقه للحمام
عباده / انا مش ناصر الله يرحمه و هو مش رشيد
مختار / بنتى زى ما هى بنتك و ما استحملش عليها الهوى اكتر منك و لو ابنى يا عباده ابنى من صلبى فكر يمس منها شعره لكون دافنه فى مطرحه وقتى
عباده يبص الناحيه التانيه يتنهد و يمشي 
......................
فى عربيه دياب
دياب سايق و منصور جنبه و ورا جوزيف
جوزيف / و هى حركه عيال زى دى محتاجه تخطيط دا اى عيل صغير يعملها ... اللى بيهدد ما بينفذش
منصور / كنت بتهدد و بتنفذ
جوزيف / ما حصلش هى كانت بتتحدانى و انا كنت بقبل التحدى ما روحتش قولتلها انى هخطفها قبل ما اخطفها ليه ... اللى بيهدد بيخسر اهم عنصر فى اللعبه ... المفاجاه
دياب / يعني انت شايف انه ممكن يكون ميكروروبوت
جوزيف / انتوا اللى بتقولوا مش انا ... ما يمكن واحده بتكرهها او غيرانه منها
منصور و دياب يبصوا لبعض
دياب / طب لو هو ميكروروبوت فعلا الحل معاه ايه  ... اللى حصل لمنصور ممكن يحصل لاى حد ... الدرون دخل جوه السرايا الحشرات دى ممكن تدخل من الشبابيك و البلاعات هنواجهها ازاى
جوزيف / مش عارف ... ما فكرتش فيها ... ادونى فرصه اسال و افكر
منصور / كنت فهيم اوى لما استخدمتها ضدنا
جوزيف / اشترى برمج نفذ فين الصعوبه دلوقت لازم ادرس اكتر ازاى اوقفها و اقاومها الموضوع اصعب بكتير لما بتبقي انت التارجت
دياب / معاك حق ... فى دى بالذات معاك كل الحق
جوزيف / عشان كدا لازم تعملوا اللى قولت عليه و كل ما تم بشكل اسرع كل ما كان اسهل
منصور / هيعملوا ايه يعني ؟! اخرهم ايه ؟! هيموتونا ؟! يموتونا ... من قتل دون ماله فهو شهيد، ومن قتل دون أهله فهو شهيد، ومن قتل دون دينه فهو شهيد، ومن قتل دون دمه فهو شهيد ... مفيش احسن من كدا موته نموت رجاله ... و اقولك حاجه كمان حتى لو لا قدر الله جت فى الحريم و العيال ... ما حدش بيموت ناقص عمر لكل اجل كتاب ... يا ابن آدم لو اجتمع الانس والجن علي ان يضروك بشيء لن يضروك الا بشيء قد كتبه الله عليك ولو اجتمع الانس والجن على ان ينفعوك بشيء لن ينفعوك الا بشيء قد كتبه الله لك رفعت الاقلام وجفت الصحف ... اخرهم يعملوه
صمت
جوزيف / يا ترى دا هيبقي رايك لو لقيت مراتك بتصرخ من وجع البى كاى و انت ما عكش علاج
.............................