الكبيره ٢ بقلم / لولو_محمد

الحلقه ٢٢

((((((( الكبيره ٢)))))))
#لولو_محمد
الحلقه ٢٢
راجل ٤ / احنا اتهرينا اقسم بالله و مش عارفين الحكايه دى هتخلص على ايه انا الوليه كل يوم تزن ابيع القيراطين اللى حيلتى و اروح اشترى بدالهم اى حاجه فى اى حته تانيه بتقولى البلد دى ما عادتش زى زمان
راجل ١ / قولت كدا لابويا شتمنى قالى لما كنت قدك كانت الدنيا كلها بتصرخ من البى كاى الا البلد دى ربنا حماها و انها احسن من غيرها
راجل ٣ / زمنا غير زمنه دلوقت الحكايه وسعت اوى و ما تاخذنيش يا سي شاهين ... حتى الكبارات مش عارفين يلموها
شاهين / مؤاخذتك معاك بس انا عاوزك بقي تتخيل لو ما كانوش الكبار دول موجودين كانت حالكوا هتبقي ازاى
راجل ١ / زى البلاد اللى حوالينا بنموت موته ربنا
شاهين/ يبقي تروح بنفسك تجرب بنفسك عشان ترجع تحلف ان البلد دى احسن من غيرها... عن اذنكوا
شاهين يمشي
راجل ٢ / ما كانلوش لزوم ابدا نفتح السيره دى و هو واقف زمانه زعل
راجل ٤ / الحقيقه ما تزعلش و ان زعل هنعمل ايه يعني ما هى دى الحقيقه هنجامل و نكدب عشان نعجب يعني و لا ايه هى دى الحقيقه ..  انا ماشي سلام
.......................
فى بيت جابر
احلام و نجاه بينضفوا
احلام / و انا بقي كل اسبوع هدبس فى تنضيف البيت دا كله لوحدى ... بصي انا قررت اتجوز اى حد من بره البلد خلاص
نجاه / ما انا بساعدك اهو
احلام / بيتك يا اختى انا مالى
نجاه / احلام
احلام / انا مالى مش هو اللى مانع اى حد يخشه غير انا و انتى و امى و امك ... طب هو فرشه ليه ما كان سابه فاضي ما هو فى الاخر بينام فى السرايا و البيت مقفول فرشه ليه بقي و صرف عليه الفلوس دى كلها ليه
نجاه / من حكم فى ماله ما ظلم و يا ستي لو مش عاوزه تروقى روحى ارتاحى و انا هخلصه لوحدى
احلام / طب بقولك ايه
نجاه / قولى
احلام/ انا هروح اجيب غيار فى الخباثه و املا الجاكوزى و اخدلى غطس يفك عضمى اجيبلك غيار معايا؟
نجاه / لا تسلمى انا لو مشيت وراكى مش هنخلص فى سنتنا
احلام / نخلص ايه ما هى خلصانه دا يا دوب تلميع من التراب و مسح الارض هو فى حد بيدخل و لا بيوسخ خلينا ننبسط شويه
نجاه / خدى راحتك انتى و انا هخلص ترويق يلا كفايا تضيع وقت بقي
احلام / بكيفك انتى الخسرانة
احلام تمشي و تطلع بره و تسيب الباب مفتوح تعدى على السرايا تلاقى جابر خارج من المكتب
جابر / خلصتوا بالسرعه دى
احلام / خلصنا ايه احنا اتنين بس
جابر / طب بالراحه
احلام / بقولك ايه
جابر / اؤمرى
احلام / هو الحاجات اللى فى اوضه الجاكوزى دى اللى ما حدش بيلمسها دى استعمال شخصي و لا ما تغلاش على اختك
جابر / مفيش حاجه تغلا على اختى خدى اللى يعجبك
احلام / اخد ايه دى لو دخلت حمام الشعب مش هشمها
جابر / يا ستي خلصيها و هجيبلك غيرها
احلام / ما انا هخلصها فعلا ... و هطلع اجيبلى غيار اهو اياك تهوب هناك بقي
جابر / ما كنتش ههوب اصلا ايه المعامله دى
احلام / انا بقولك بس ... عن اذنك
احلام تطلع و جابر يطلع بره يلاقي دياب بيركن عربيته و بينزل هو و منصور منها
جابر / يا مرحب ... فى جديد و لا ايه
دياب / و الله لسه مش عارفين و ما دام بتسال يبقي لسه ما وصلوش
جابر / مين
دياب/ همام و يونس
جابر يبص الناحيه التانيه يشوف احلام راجعه بتجرى ناحيه البيت بتقفل الباب وراها
..................
فى سرايا الجوارحه
شاهين يدخل اوضته وفاء تدخل وراه جرى و طرحتها مش معدوله شاهين يستغرب
وفاء / احضرلك حاجه ؟ اساعدك تغير
شاهين يبصلها من فوق لتحت وفاء تفك طرحتها و تسيب شعرها مفرود شاهين عينه عليها
وفاء / حلو ؟
شاهين/ انتى حاطه برفان
وفاء / لسه حطاه حالا ما حدش لحق يشمه ما تقلقش
شاهين يقرب منها و يشم و هو مغمض
شاهين / دا بتاع ياسمينا صح
وفاء / عرفت منين
شاهين / الواد عبده ابن منصور ... نفس الريحه الحريمي دى علاطول فى هدومه
وفاء / حلوه طيب ؟
شاهين / تهبل ... احم انتى على طول حلوه ... بس النهرده حلاوتك زايده حته 
وفاء تبتسم
وفاء / ما دام عجبتك كدا اخليها تعلمنى 
شاهين يهز راسه لا و هو بيمسك دقن وفاء
شاهين / لا خليها تزوقك بايديها و تحطلك من ريحتها
شاهين يمسك ايد وفاء و يبوسها
شاهين/ ما توسخيش الايدين الحلوه دى و لا تتعبيها
وفاء / ما هى مش هتفضالى كل يوم
شاهين يهز راسه و يروح يقعد على كرسي و يقلع الجزمه وفاء تروح تساعده و تفكله الرباط يعدى ايده من على شعرها
........................
فى جنينه الزنايته
دياب / و هم هيخيل عليهم الكلام ده
جوزيف / هنشوف
دياب / هبل هم بقي عشان اى حد يقولهم اى حاجه يصدقوه
جوزيف / اكيد لا بس هم مش اغبيه عشان يضيعوا فرصه زى دى من ايديهم بس اكيد فى نفس الوقت هيراقبونا من قريب و هيبعتوا جواسيس انا نفسي ما اعرفش عنهم حاجه
جابر / دا معناه ان فى اغراب هيدخلوا البلد
جوزيف / مش شرط اغراب ممكن ناس من جوه البلد ... البلد دى مش يوتوبيا و زى ما فيها ناس غلابه و طيبين فيها ناس تبيع عيالها عشان القرش
منصور / يعني من الاخر هنعرف الجواسيس دول منين
جوزيف / مش هنعرفهم لاننا فى كل مره هنكشفهم هيتعلموا من اخطائهم و يبعتوا ناس اصعب و اخطر كل حركه انت بتعملها بتتسجل و تتحلل و فى ناس متخصصه فى كل حاجه بتراجعها مليون مره و تتوقع الحركه الجايه بتاعتك
جابر / يعني المطلوب اننا ناخدك فى عبنا اكتر و نبان اننا حبايب اكتر و كدا مش كدا
جوزيف / ايه ده !! انت فاجئتنى انا قولت دياب مثلا اللى هيفهم المطلوب مش انت خالص
جابر / ما تبوظش خطتك الجهنميه دى و تستفزنى ما حدش عارف الجواسيس بتوعهم فين
همام / مش يمكن ما يستخدموش جواسيس خالص و يستخدموا النحل الصغير بتاعهم ده
دياب / انت ما دورتش على حل ليه خالص
جوزيف / همام انت بهرتنى انت لتانى مره تتفوق على كل توقعاتى ... انا ما فكرتش فى الموضوع ده خالص ... شوفت بقي قعادك معايا فتره طويله خلى تركيزك يعلا ازاى
همام / يا جدع خف انا مش طايقك خلقه
الكل ما يقدرش يمسك نفسه و يضحكوا
همام / حقكوا ما انتوا ما شوفتوش اللى انا شوفته
منصور / واحنا ايه اللى رمانا على المجى السعادى الا اننا عاوزين نعرف اللى انت شوفته
جوزيف / ايوه ... قولهم بقي انت ايه اللى شوفته لحد ما اروح ادور على نجاه اسلم عليها زمانى وحشتها
جابر يشد جوزيف من هدومه بغل
جوزيف / كاميرات فى كل حته قمر صناعى يعدى يلقطنا نروح كلنا فى داهيه اهدى و اتمرن شويه على الثبات الانفعالى ... انا عارف ايدك اللى بتوجعك و هفضل ادوس بعزم ما فيا لحد ما اخليك بايدك تقطع ايدك دى و ما الاقيش ليك مسكه ... ساعتها هتشكرنى
جابر يزق جوزيف
جوزيف / عاقل ... اصل انت عارف كويس انى اقدر ارد عليك و ننزل فى بعض ضرب لحد ما اختك تيجي تساعدك
جابر يكتم جواه و يجز على سنانه و جوزيف مبتسم باستفزاز
جابر / اقولكوا حاجه انا مش عاوز اعرف شوفت ايه فى مصر يا همام و لا عاوز اتفق معاكوا على اى حاجه عشان انا مش ناوى الزم نفسي ناحيتكوا باى حاجه ... اللى تتفقوا عليه خدوا اذن الكبير فيه و لما يبقى يوافق نفذوه بعيد عنى عشان انا طهقت
جابر يمشي و يروح بيته يدخل و يقفل الباب
همام / خف على الجدع وقت الجد و لا واحد فينا هيقف معاك احنا يا خواجه لينا قانون واحد
جوزيف / انا و اخويا على ابن عمى و انا و ابن عمى على الغريب عارف قوانينكوا و عارف ان انا الغريب ... بس انا ما اخدتكش مصر بس عشان تشوف الدنيا الشمال الضايعه دى بس لا ... انا اخدتك عشان تشوف انا اقدر اعمل ايه
همام / اه تنضرب عشان تلم فلوس روهونات انا لو كنت مكانك الجدع الاقرع ده ما كانش خد فى ايدى خمس ثوانى و من غير الحزام بتاعك
جوزيف/ طب ما تيجي نشوف
دياب / هنشوف كل حاجه بعدين خلينا دلوقت فى المفيد هنعمل ايه
منصور / الكلام الجاى لازم يكون فى وجود الكبير انا هروح اناديه و نقعد فى المضيفه كدا نتكلم على رواقه عشان الوقفه دى مش تمام
همام / قدامنا يا عمهم
جوزيف / اتفضلوا
……………….
فى مكتب الزنايته
مختار / يعني هتطلعله تتكلم معاه و لا هتسيب الدنيا عايمه كدا
عباده / انت عارف انه هيلف يلف و يرجع لنفس السيره و انا مش هقدر انفذله طلبه
مختار / ما حدش يقدر يقولك تلت التلاته كام
عباده / و ما حدش فى الرجاله قادر يستحمله
مختار / مع انها محتوياه على الاخر
عباده / مختار
مختار / اقسم بالله ما اقصد حاجه انا اقصد انها عارفه تسحب منه اللى هى عوزاه بمنتهى الهدوء
عباده / و هو ايه اللى هى عوزاه
مختار/ اهو كام حركه على كام نطه تفهم بيفكروا ازاى تفهم الدنيا حواليها بتمشي ازاى اهو
عباده / و هو اهبل بيقدم دا كله من غير مقابل
مختار / و ايه المقابل
عباده / ما اعرفش بس ما فيش حاجه ببلاش و الواد ده مش سهل و مش بعيد يكون بيسحب هو كمان اللى هو عاوزه من غير ما حد فينا يحس
مختار / ممكن
عباده / مش قادر ابلعه ... عارف انه اتظلم و متعاطف معاه ... بس مش قادر اسامحه على اللى عمله ... مش ذنبه عارفه بيصلح اللى عمله عارف بس مش قادر انسي وجعى ... خايف ... دى نجاه يا مختار
مختار / و انا كمان زيك بالظبط
عباده / طب ايه هنطلعله و لا ايه
مختار / لا حول و لا قوه الا بالله
عباده / قوم بينا نطلعله ما اكيد هنطلعله هناجلها لحد امتى قوم قوم
مختار / قوم
مختار و عباده يقوموا يطلعوا بره يقابلوا ناصر فى السكه
ناصر / بابا ... لو سمحت
مختار يبص لعباده عباده يكمل مشي مختار يروح لناصر
ناصر / انا كلمت ماما فى موضوع و قالتلى انها كلمت حضرتك فيه بس لحد دلوقت ما حدش ادانى رد
مختار / مش وقته
ناصر / ليه
مختار/ هنتكلم بعدين مش وقته دلوقت يا ناصر عن اذنك
ناصر / بابا
مختار / قولت مش وقته
ناصر يبص الناحيه التانيه و هو مضايق مختار يسيبه و يمشي
...........................
فى بيت جابر
جابر قاعد مدى للسلم ضهره و وشه للباب نجاه تنزل من فوق شايله طبق فيه غسيل تشوفه قاعد باصص فى الموبايل
نجاه / انت هنا من امتى
جابر / مش من كتير ايه انتوا لحقتوا تخلصوا
نجاه / نخلص ايه دا يادوب تلميعه خفيفه المكان فله
جابر / اه ... انتى ما كنتش مع احلام ؟
نجاه / ااااه... لا قولتلها تاخد راحتها و انا هكمل ترويق
جابر / و ايه ده ؟
نجاه / الملايات هوديهم يتغسلوا هناك
جابر / طب ما فى غسالتين هنا
نجاه / يا خويا هشغلهم و اهلكهم على كام ملايه
جابر يبتسم نجاه تفتكر حاجه و تحط ايدها فى وسطها
نجاه / انت كنت فاكرنى مع احلام ؟ و قاعد هنا
جابر / يا اختى اتوكسي فى رجاله بره قلت اخليني هنا جنب الباب
نجاه / رجاله مين ؟
جابر / كلهم همام و دياب و منصور و سي زفت
نجاه / هم رجعوا
جابر / اتنيلوا
نجاه / لا حول و لا قوه الا بالله ... اعملك قهوه
جابر / يا ريت
نجاه / ثوانى ... خلى دول جنبك ... و لا هاتهم اغسلهم هنا و خلاص بس على الله ما انساهمش فى الغساله يكمكموا للاسبوع الجاى ... ابقي فكرنى بيهم ... استعجلت انت و الله فى فرش البيت ده على راى اختك ... طب ما تقعد فيه يا ابنى بدل ما هو مهجور كدا
جابر / القهوه
نجاه / اه صح القهوه ثوانى
نجاه تروح المطبخ و جابر مبتسم ثوانى و يقوم وراها يقف على الباب
نجاه / عملوا ايه فى مصر ما تعرفش
جابر / صبيلى القهوه و روحى اساليه
نجاه / لا مش هروحله هطلع انام
جابر / يا شيخه
نجاه / مالك يا جابر ... لو فى زورك كلمه قولها بدل ما انت زوران بيها كدا
جابر / اقصد انك فضوليه ما بتقعديش يعني ... مستغربك بس
نجاه / اديك قولتها فضوليه و مش قادره اقاوم فضولى و مسحوله فى سكه مش عارفه اخرتها ايه وقت الجد ما حدش هيرحمنى
جابر / ما حدش يستجرى يقربلك
نجاه / يونس فتح عيني على دنيا تانيه خالص يا جابر دنيا مرعبه و وحشه ... دنيا احنا مش قدها
جابر/ دنيا احنا راعبينهم و صارفين و مكلفين عشان يخلصوا مننا
نجاه / هم مش عاوزين يخلصوا مننا كانوا خلصوا هم عاوزينا نبقي منهم
جابر / كان غيرهم اشطر
نجاه / احنا مش كتير زى ما انت متخيل احنا نتعد على الصوابع سيبك من اللمه دى كلها دول حشو
جابر / تقصدى ايه
نجاه / كنت بفكر كدا ... ان مش كل الناس بتعرف تفكر و مش كل الناس بتعرف تنفذ و مش كل الناس ينفع تبقي قاده يعني انت لو بصيت لعيلتنا مثلا القرار فى ايد اتنين و التنفيذ فى ايد خمسه سته انما الباقي حشو بينفذوا الكلام و بس سكتم بكتم تسالهم رايهم فى اى حاجه اللى تشوفه يا كبير احنا معاك يا كبير حاضر يا كبير عاوزين نعمل كذا نعمل يا كبير بس قولنا ازاى ... كومبارس اقصد
جابر / للاسف معاكى حق بس دا ما يعيبهمش
نجاه / ما قولتش كدا ابدا بالعكس هم لما بتقولهم اعملوا واحد اتنين تلاته بتاخد احلى شغل بس ... اقولك ايه
نجاه تصبله القهوه
نجاه / اتفضل
جابر / من يد ما نعدمها
نجاه / المجلس دول عندهم جيوش بتفكر و جيوش بتخطط و جيوش بتنفذ
جابر / و الخمسه بتوعنا حاطين على الجيوش بتوعهم بفضل الله
نجاه / مش هنضحك على بعض يونس كان حاطت علينا لما بان لينا صاحب
جابر / و اهو يا ستي اتنيل و بقي معانا عملنا ايه
نجاه / و هو حد اداله فرصه
جابر / و ايه الفرصه من وجهه نظر جناب معالى الجهبز
نجاه/ اللس يا خويا اللس
جابر يبتسم و يشرب
نجاه / انت بس لو تهدى شويه
جابر / فى حاجات ما بتتنسيش
نجاه / كان مضحوك عليه و فاق لنفسه و تاب ساعده
جابر / المكسور ما بيسندش حد
نجاه / ما عاش و لا كان اللى يكسرك يا ابن عمى
جابر يبتسم بحزن و يبص للقهوه
نجاه / و لا حتى تسندنى
جابر يبصلها
نجاه / طب هو انا كمان اتكسرت يا جابر ؟؟ اتكسرت فى عنيكوا ؟
جابر / انتى على الراس يا نجاه
نجاه تبتسم و تروح تغسل الكنكه جابر يروح يقف جنبها و يحط الفنجان نجاه ترمى الكنكه فى الحوض
نجاه / انا هروح ابص على احلام ... ما تخليش حد يطلع فوق بفكر انط معاها
جابر يبتسم نجاه تسيبه و تمشي جابر يغسل الكنكه و الفنجان و هو بيتنهد
.........................
فى المضيفه
دياب / مش محتاجين نعمله من الصفر البركه فى عمى فتوح كان عامل واحد زمان و ما قفلوش لقيته لسه شغال انا اكتفته بس و دا هيدى مصداقيه كبيره لاى حد هيفكر يخترقه
جوزيف / بس اكيد مش متوصل عليه كل الكاميرات
دياب / القديمه بس
جوزيف / ما ينفعش لازم يتوصل عليه جزء كبير من الكاميرات احنا ممكن نعمل نقط عاميه فى كل شارع نتحرك منها لكن مش شوارع كامله عاميه انتوا مش عيال و لا هواه ان حاجه زى دى تفوتكوا اكيد هيشكوا
دياب / هشتغل عليها
جوزيف يبص لعباده
جوزيف / محتاجين سلاح
عباده / الانواع و الكميات و انا هتابع الموضوع بنفسي
جوزيف / تمام نرجع لموضوعنا الاصلى
عباده / لا
جوزيف / بناقص اوعى تفتكر ان فارق معايا رصاصه فى دماغك و هرجع ابنهم المدلل تانى
عباده / اضربها و امشي
جوزيف / دا ردك
مختار / اللى بتطلبه صعب
جوزيف / و انا طلبت ايه
دياب / احنا غيركم اى حد هيشوفكوا سوا هتبقي حكايه سمعه البنات مش لعبه
جوزيف / منصور و ياسمينا انت مش كنت لازقلها فى كل حته ... بصفتك البوديجارد بتاعها
منصور / دى غير دى
جوزيف / عشان بره البلد تمام نطلع بره البلد
عباده / لا جوه و لا بره و ابعد خالص عن بنتى
جوزيف / اشبع بيها
جوزيف يجي يمشى مختار يمسك ايده
جوزيف / انا مش هاذيها لو كنت عاوز اعمل فيها حاجه ما كانت قدامى
مختار / مش لازم انت اللى تاذيها زى ما قالوا البنات سمعه
جوزيف / كدا كدا لازم نخرج من البلد وجودنا هنا خطر على البلد باللى فيها
همام / و براها خطر عليكوا
جوزيف / انا كفيل بحمايتها
همام / احنا مش هنضحك على نفسنا احنا لسه عارفينك من يومين يعنى مش سهل نثق فيك برده
جوزيف / كنت هترمى نفسك فى الحلبه عشان تساعدنى ليه جيت معايا بطولك ليه مش يمكن فخ ليك
همام / انا راجل الحريم حاجه تانيه
جوزيف / و المطلوب
عباده / شوف فكره تانيه
جوزيف / مفيش المهمه كلها قايمه على نجاه و مش هيملا عينهم اى حد غيرها
عباده / قولت لا يعني لا
كارم / هبقي معاهم محرم
الكل يبص لكارم
كارم / هبقي معاها فى كل لحظه و الباقيين حوالينا مداريين زى ما كانت ايام الكليه و ياسمينا فى التليفزيون او اى بنت بره البلد
عباده / يعني هتبعت اختك بره البلد بعد كل اللى عشناه
فارس / خاب
كارم / انا مش هرمى اختى بس احنا مش هنحطها فى صندوق و نقفل عليها الدبانه دخلت لحد اوضتها يبقي هى اللى تطلعلهم
فارس / معاه ؟!
كارم / معانا ... معانا احنا
عباده / و ان جرا لها حاجه
جوزيف / مش هيحصلها حاجه
عباده / انا بكلم ابنى ... لو اختك جرا لها حاجه ..  هتعمل ايه
كارم يسكت
مختار/ كارم ما ينفعش يكون لوحده لازم حد كمان معاه
همام / انا هروح
جوزيف / احسن من جابر بكتير يا ريت انت اللى تيجي فعلا و دياب كمان ما عنديش مشكله فيه
دياب / و السيستم اللى انت طالبه
جوزيف/ خلاص اخد منصور
مختار/ كارم و همام
عباده / همام ده قاطع يعني ؟ ايه ما لوش بيت و زوجه و عيال
فارس / خلاص !!! حضرتك وافقت على طلوعها اصلا خلاص
عباده / انت و اخوك اللى هتطلعوا مع اختك يا ترجعوا انتوا التلاته يا ما ترجعوش خالص
صمت و تبادل نظرات عباده يبص لجوزيف
عباده / بجمله الهبل اللى بيحصل ... انا ماشي قبل ما اغير رايي
عباده يطلع بره جوزيف يروح وراه
جوزيف / عباده
عباده يقف و يبصله
جوزيف / مش هتندم
عباده / صدقنى ندمان من دلوقت
عباده يمشي و هو بينفخ و يضرب كف على كف مختار يدخل
مختار / يونس
جوزيف يبص لمختار
مختار / تعال معايا انا عاوزك
جوزيف / خير
مختار / خير ما تقلقش تعال
مختار يروح ناحيه السرايا جوزيف يستغرب و يمشي وراه مختار يدخل جوزيف يبص وراه مفيش حد
مختار / يا ابنى انجز
جوزيف / جاى
جوزيف يدخل ورا مختار
....................
فى الحمام عند احلام
احلام بتشم برفانات على الحوض و نجاه بتنشف شعرها
احلام / عمرك شوفتى اخ احقر من كدا بقي كل العز ده راكنه هنا ما يهونش عليه يفتكر اخته ببخه
نجاه / ههههههههههههه يا شيخه اتقى الله دا ما بيستخسرش فيكي حاجه
احلام / و احنا نيجي جنبك حاجه
نجاه / احلام !!
احلام / هو كل ده معمول لمين ؟ مش ليكي ؟
نجاه / معمول لنفسه
احلام / صح ... حتى جابر بيحب اوى يحط من البرفانات الحريمي دى
نجاه / طب ما تافوريش عشان هنعدى على رجاله
احلام / انا بتكلم جد انتى هتفضلى تماطلى لحد امتى طب اخويا مش عاجبك فى ايه
نجاه / اخوكى يعجب الباشا فى ايه يا احلام
احلام / فى انه صعبان عليا عمره اللى بيعدى و هو مستنى تحنى عليه يعمل ايه اكتر من كدا بس دا لو طلبتى عنيه يديكى عمره ما يستخسروش فيكي يبقي ده جزاته
نجاه / انا عملت ايه لكل ده يا احلام ... و بعدين احنا فى ايه و لا فى ايه ... الدنيا والعه حوالينا و انا اروح اتجوز
احلام / و فيها ايه
نجاه / لما احس انى جاهزه للجواز مش هلاقى احسن من جابر بس الاول اكون جاهزه للجواز
احلام / انتى كدابه
نجاه / انا !!
احلام / انتى جابر مش هو اللى فى خيالك ... اصل انا مش فاهمه يعني ايه حكايه جاهزه للجواز دى بتحكميها ازاى يعني مش فاهمه
نجاه / مش عارفه
احلام / انا بقي عارفه انتى ضامنه جابر فى جيبك ... فركناه جالك الاحسن كان بها ما جاش اهو جابر موجود
نجاه / اخص عليكي يا احلام دى انا ؟!!
احلام / ما تزعليش منى انا بحبك و زعلانه عليكي و زعلانه على اخويا كمان
نجاه / تمام
احلام/ انا اسفه ... ما تزعليش
نجاه / تمام
احلام / نجاه
نجاه / خلاص يا احلام مش مشكله عادى خدت على الكلام ده اصلا ... ان ما كانش انتى تبقي امى يبقي اى حد ... بس انا مش كدا خالص و الله و لا اقبل لجابر الكلام ده اصلا و لا استحمل عليه النسمه حتى و انتى المفروض ادرى بده
احلام تمسك ايد نجاه
نجاه / تفتكرى سعاده جابر معايا يا احلام
احلام / من غير زعل ؟
نجاه / لا ... قوليها قولى انك بتفهمى و ان جابر عمره ما هيكون سعيد مع واحده زيي قولى انى شعنونه و بنت موته و ان جابر يستاهل واحده احسن
احلام / الصراحه اه ... بس نقول ايه القلب و ما يريد بقي
نجاه /  طب و الله انتى جزمه ... دا بدل ما تجامليني باى كلمه بتامنى على كلامى وش كدا
احلام تضحك
نجاه / دا انتى عليكي صراحه تقهر ناوليني الطرحه خليني امشي
احلام / مش هتقلبي معايا اى حاجه
نجاه / ما ليش فى الحاجات دى اصلا حلال عليكي كلها
احلام / فقريه
نجاه / ايوه حصل
الاتنين يضحكوا احلام تاخد ازازه و بعدين تاخد واحده كمان
احلام / و دى كمان ... التنضيف مش ببلاش
نجاه تضحك و تمشي احلام تطفى النور و تحصلها
......................
فى المكتب فى السرايا
جوزيف / مش حوار مش واثق فيكوا بس انا سبتها و هربت و ما حاولتش اتواصل معاها خالص من وقتها
مختار/ بس لو حبيت تتواصل معاها هتقدر
جوزيف / و مش هعمل ده ... تمام خليني اقولك حاجه ... هى هتيجي البلد ... امتى بالظبط ما اعرفش ... بس هل انت جاهز لنزولها ده ؟
مختار / عشان كدا عاوزها تنزل علينا عاوز اديها نفس الفرصه اللى اديتهالك ... اميره كانت غاليه اوى عندى كانت بنتى زى نجاه بالظبط... و لو كنت بتراقبنا اكيد عرفت قد ايه اتقهرنا عليها
جوزيف / هتسامحوها يعني
مختار / هنديها فرصه
جوزيف / ابنك يعرف حاجه عن الكلام ده
مختار/ ابنى بيحبها
جوزيف / لسه ؟! متاكد انه لسه بيحبها؟
مختار/  انا هحميها
جوزيف / تمام كدا كدا هتنزل ... امتى ما اعرفش ... و للاسف محاولتى للتواصل معاها دلوقت مش فى مصلحتنا ... انتوا مش جاهزين لنزولها
مختار يستغرب
جوزيف / امايا مش عيله هبله زى ما ضحكت عليكوا امايا سلاح زيي بس الفرق ان امايا صغيره و عاطفيه ... و بتكره الرجاله ... دا مش معناه انى بحبهم ما تفهمنيش غلط ههههههه بس ما عنديش مشكله معاهم عادى ما انا منهم
مختار / تشرب حاجه ؟
جوزيف / قهوه لو ينفع
مختار / حاضر ... ثوانى
جوزيف / عندكوا حاجه تتاكل قبل القهوه
مختار يضحك و يهز راسه و يمشي و يقفل الباب وراه جوزيف يقعد يلف بعنيه فى كل مكان يلمح اللبومات صور فى المكتبه ورا مكتب عباده يبص عليهم و يقوم يسحب واحد فيهم و يفتحه فى صور كتير للعيله سوا و هم بيضحكوا يقلب الصفحه يشوف صوره جابر و هو صغير يضحك يقلب فى الصور و يدور لحد ما يلاقى صوره لنجاه على فرس اسود بيجرى و هى سايبه ايديها و بتضحك يبتسم يحط الالبوم و يطلع واحد تانى يقلب فى الصور لحد ما يلاقى صور لنجاه قاعده على كتاف ابوها و هى صغيره و شعرها ضفيرتين و ابوها شايل اخواتها كل واحد على ايد و بيضحك مختار يفتح الباب فجاه
مختار / هيسخنوا الاكل دقيقه و ... انت بتعمل ايه
.............................