الكبيره ٢ بقلم / لولو_محمد

الحلقه ٣

(((((((( الكبيره ٢ )))))))
#لولو_محمد
الحلقه ٣
الراجل  / حقك عليا يا سي مختار حقك عليا يا سي عباده ... انتى اتجنيتي و لا ايه ايه اللى بتهببيه ده
الست / ايوه اتجننت انت تخاف منهم ماشي انما انا ما عادش عندى اللى اخسره يغوروا بفلوسهم و ارضهم يغوروا من البلد مش عاوزين من وشهم حاجه بيرمولنا قرشين و ياخدوا روح عيالنا اوعى يا راجل سبنى اوعى
الراجل / اهدى بقي فضحتينا الله يخرب بيتك
الست / حسبي الله و نعم الوكيل فيك يا عباده تتقهر قهرتى و تدوق مرارى حسبي الله و نعم الوكيل فيكوا كلكوا اوعى يا راجل سبنى بقي سبنى ما انت معاهم انت اللى مشجعهم بمطاطيتك ليهم
الراجل / بطلى قله ادب بدل ما اطلع اللى فيا فيكي
الست / ما تتشطرش عليا اتشطر على اللى قتلوا عيالك دا انت لو لقيهم فى الشارع هتتوجع عليهم عن كدا
مختار يبص لعباده واقف ساكت و باصص فى الارض و الناس ملمومه بتتفرج و هو واقف فى النص الست يغم عليها من كتر الصريخ و الراجل يشيلها مختار يجرى يساعده يدخل بيها المستشفي عباده يروح يتسند على شجره و يقعد على الارض و التعب و السواد مالى ملامحه 
…………………….
فى اوضه فيها شاشات
جوزيف قاعد قدامه واحده بتعرض نجاه قاعده فى ركن فوق المرتبه و ضامه رجليها فى حضنها و حاضنه المصحف و سانده راسها على الحيط و التانيه بتعرض كاميرات مراقبه تانيه و واحده بتعرض مؤشرات حيويه و جوزيف قاعد بيتابع باهتمام امايا تدخل
امايا/ هم ما رجعوش ليه لحد دلوقت
جوزيف / فيليب وقع و بيحاولوا يخلصوا منه قبل ما حد يوصله بس للاسف الحراسه عليه شديده اوى
امايا / قولتلك انه فاشل و اوفررايتد ما صدقتنيش كنت بعت ماريا احسن منه مليون مره
جوزيف / حصل قولتلها تسيب همام دلوقت و تروح تساعد بابلو بس مفيش جديد
امايا / و هيلجا اعتقد انها كانت هتساعد اكتر
جوزيف / هيلجا و بابلو حركتهم محسوبه لان وشهم محروق للزنايته و الجوارحه ماريا هى احسن حد يقدر ينفذ
امايا / تمام قوم ارتاح شويه عشان تقدر تكمل تركيز انا هتابعها شكلها نايمه
جوزيف / نايمه زياده عن اللزوم
امايا / تقصد ايه
جوزيف يشاور على الشاشه
جوزيف / دى مش مؤشرات واحده مخطوفه و مفيش اى منفذ للهرب دى مش مؤشرات واحده نومها مضطرب دى واحده رايحه فى النوم و بتحلم حلم جميل كمان انهى بنادم طبيعي يكون فى وضع زى ده و فى الهدوء و السلام النفسي ده انهى درجه تدريب ممكن توصل انسان لكدا ... انهى درجه تدريب تتحكم فى العقل الباطن كدا ... و لا انهى تناحه دى ... انا مش فاهم حاجه من البت دى
امايا تضحك جوزيف يبتسم و يبص عليها تانى
جوزيف / دى لو نايمه فى حضن امها مش هتطمن كدا ... الغريب انها مش تعبانه مثلا مش ... مرهقه دى نايمه معظم اليوم متخدره
امايا / يمكن المخدر لسه ماثر عليها
جوزيف / نهائى دا ضعيف جدا و تاثيره راح من زمان ... حتى الاكل بتنقى بتنقى تاكل ايه و ما تاكلش ايه كانها عارفه و متاكده ان فى اكل تانى جاى انتى مش قولتى انها بتاكل اللحمه عادى
امايا / اه
جوزيف / امال ليه سايبه الطبق زى ما هو كلت العيش حاف و طبق السلطه و شربت الميه و شكرا دى اكله واحده ما اكلتش حاجه خالص من اول النهار دى اكله واحده ما تعرفش ان كان فى اكل تانى هيتحطلها و لا لا
امايا / يمكن عشان كدا اكلت نص الاكل بس و سابت الباقى لبعدين
جوزيف / ازاى يعني كان اولى سابت العيش لانه ممكن يستنى لكن اللحمه هتبوظ و بعدين بصي على نومها دى كانها واكله خروف انا مش فاهم حاجه
امايا / هى دى لحم خنزير ؟
جوزيف / لا بقرى عادى… تكون فكراها كدا عشان كدا ما اكلتهاش ... برده نفس الكلام ايه رفاهيه الاختيار فى وضع زى ده دى طب ايه رايك انى هحطلها فعلا لحمه خنزير و هقولها انها لحمه خنزير و مش هحطلها غيرها و اشوف هتاكلها و لا هتموت من الجوع بقي اما نشوف اخرتها مع بنت المجنونه دى
امايا / طب اعمل اى صوت فى المايك شوف هتصحى و لا لا
جوزيف يتنهد و يدوس على زرار المايك و يحمحم نجاه تصحى و تقعد جوزيف يتكلم فى المايك 
جوزيف / على فكره الاكل ده حلال اكيد مش هديكي اسدال و سجاده و مصحف و فى الاخر هديكى لحم خنزير يعني نجاه تحط طرف صابعها على الاكل
نجاه / برد ... سخنهولى
جوزيف يضحك و يبص لامايا بتضحك
جوزيف / هزعلها
امايا تعمله مساج فى كتافه يدوس على زرار المايك
جوزيف / اسفين لو الخدمه عندنا مش واصله لمستوى جنابك
نجاه / لو تقيله عليك رجعنى لامى
جوزيف / هيحصل ما تقلقيش بس مش دلوقت
نجاه / امتى عشان زهقت
جوزيف / انتى عارفه امتى
نجاه / انت كل اللى بتعمله انك بتديهم وقت اكتر يوصلولى على فكره اعتقد انك المفروض تسرع الرتم عن كدا ابذل شويه مجهود ما تتوقعش الحاجه تجيلك لحد عندك يعنى
جوزيف / انا صبرت خمس سنين و جيتيلى لحد عندى اهو ما فيش مشكله اصبر كمان شويه كدا كدا هتيجي
نجاه / انا مجيتش انت اللى خطفتنى
جوزيف / اوعى انتى عوزانى اخطفك تانى  ... ما كنتش اعرف انك من النوع ده 
نجاه / بس يا ترى المرادى هتقدر تخطفنى لوحدك و لا هتستعين بمساعده شلتك تانى
جوزيف / المفروض تفكرى فى الكلام قبل ما تقوليه انتى اللى هتعيطي فى الاخر
نجاه / اللى ما عندوش حاجه يخسرها ما بيبكيش على حاجه
جوزيف / متاكده انك ما عندكيش حاجه تخسريها فكرى تانى
نجاه تهز راسها لا
جوزيف / انا بصراحه مش هنكر انك عماله تفاجئيني كل مفاجاه اكبر من اللى قبلها بس مش للدرجادى يعني ... يعني فى الاول قولت لما تصحى تلاقى الصور هتنهارى و تصوتى و تعيطي انما ابدا قولت لما تلاقى نفسك بالفستان الاحمر هتحتاسي و تحاولى تغطى نفسك باى شكل و برده ابدا قولت لما هتشوفى راجل قدامك و انتى قمر كدا هتجرى تدارى جسمك من عنيا و برده ابدا ... ايه التناحه دى يا بت 
نجاه تضحك
جوزيف / و دلوقت بتتامرى على الاكل و كنتى نايمه كانك فى سريرك انتى ياما فى حاله صدمه مش مستوعبه اللى بيحصل ياما ما عندكيش دم الصراحه
نجاه تبص للكاميره
نجاه / ما كانش المفروض توريني الصور دى كانت كل حاجه اختلفت ما كانش المفروض تقولى ان اهلى شافونى بالمنظر ده و تتوقع ان هيفضلى حاجه اعيش عشانها …  خلصت خلاص
جوزيف / عشان كدا قاعده هاديه ؟ عشان لو لقوكى هيقتلوكى ؟
نجاه / ما اعرفش هيعملوا معايا ايه ... بس الاكيد انهم هيقتلوك انت
جوزيف / مفيش احتمال ان انا اللى اقتلهم يعني
نجاه / ما انت قتلتهم فعلا بالصور دى فان ما كنتش متاكد ان اهلى زنايته و جوارحه كلهم بلا استثناء تحت الارض فلازم تتاكد انك مش فى امان
جوزيف / لما يبقوا يخرجوا من المستشفيات اللى هم فيها بقي نبقي نشوف الموضوع ده
نجاه تقوم تشيل المرتبه و تروح الحمام
جوزيف / بيقولوا اللى بيعيط فى الحمام بيركبه عفريت ما تقوليش ما قولتش
امايا تطفى المايك
امايا/ قولتلك ما صدقتنيش
جوزيف / مع الوقت كل حاجه هتركب فى مكانها زى ما خططنا اهدى و روحى ارتاحى
امايا / انا كويسه روح انت نام شويه و لو فى جديد هبلغك
جوزيف / تمام هريح جنبك هنا مهما حصل ما تفتحيلهاش الباب
امايا تبتسم و تهز راسها جوزيف يقوم يروح يمدد على كنبه و يغطى وشه بايده امايا تتنهد و تقعد تتابع نجاه خرجت من الحمام و وقفت تصلى و امايا متابعاها
..............................
فى المستشفي
مهره / انا ركبت تاكس فعلا و كنت هاجى وراكوا بس الراجل المتخلف مش راضي يفهم لا عربى و لا انجليزى طفشت منه و جريت على الفندق تانى
جابر / ما كانش المفروض تجازفى اصلا و تعملى حاجه زى دى كان ممكن تتوهى و لا يجرالك حاجه ... على فكره انا رايي انك فعلا لازم تنزلى مصر مع باقي الفريق المصرى
مهره / و اسيبكوا
اكرم / انا رايي ان هم كمان لازم ينزلوا واضح ان فى خطر كبير على حياتكم و استهداف للبعثه المصريه انا السفير المصرى تواصل معايا هو اللى نصحنى بكدا
جابر / انتوا تقدروا تنزلوا لكن احنا ما ينفعش ننزل غير كاملين زى ما جينا عن اذنكوا اروح اطمن على صابر
جابر يمشي
اكرم / انا ما قصدتش اى حاجه تضايقه و بعدين دا دور الحكومه هو هيقدر يعمل ايه
مهره / مش سهله برده هيروح يقول لاهله و اهلها ايه 
اكرم / ما هى أمك كمان مش سهله و بعدين واضح ان هم المستهدفين مش حد تانى التليفزيون المصرى مقلوب على اللى حصل فى البلد عندهم و لا ايه يا عمران
عمران / انا ما اعرفش اى حاجه للاسف انا شخصيا لسه مش قادر استوعب اللى عيشته النهرده
اكرم / طب انتوا ليكوا اعداء اعتقد معلومه زى دى هتفرق جدا فى التحقيقات
عمران / ما اعرفش و الله احنا كويسين جدا مع كل الناس و بعدين الراجل اللى حاول يقتلنا واضح جدا انه اجنبى هيعوز ايه من شويه فلاحين يعنى
مهره / و بعدين اللى اتصابوا لحد دلوقت صابر و عمران و نجاه و انا كنت مع عمران فى الاسانسير يعني احنا الاربعه اللى اشتركنا فى المسابقه و اللى فعلا واخدين المراكز الاولى من يوم ما بدات
اكرم / و اللى حصل فى البلد فى نفس اليوم دا صدفه تقصدى
مهره / ما اعرفش بس ده اللى قاله كابتن فايد لما كاميره الاخبار العربيه كانت بتصور معاه فى الاستاد الصبح كان بيقول ان الوقت ده كان مخصص للمصريين و متحدد بشكل مسبق و متبلغين بيه مش احنا اللى مختارينه يعني الخطف كان متخططله ما جاش عشوائى سواء انا بقي او نجاه حصل و كمان ليه حضرتك مستبعد انى كنت مستهدفه انا كمان ما انا كنت مع نجاه فى الحمام و كنت مع عمران فى الاسانسير يعنى كان ممكن اكون انا
اكرم / تانى بسال و اللى حصل فى البلد كان صدفه
مهره / ما اعرفش... انت ايه رايك
عمران / ما اعرفش... بس لو انتى المستهدفه اعتقد ان بعد اللى عملتيه النهرده هيفكروا الف مره قبل ما يهاجموكى تانى حقيقي كنتى مبهره
مهره / انا مش مصدقه لحد دلوقت انى قدرت اعمل كدا اصلا مش عارفه اكيد ادرينالين يعني
عمران / مش مهم ازاى قدرتى المهم انك انقذتى حياتى
مهره / ما تافورش دى كانت رده فعل مش اكتر و الحمد لله عدت على خير
اكرم / انا مش عارف هو اليوم ده مش راضي يخلص ليه انا بجد تعبت
عمران / خد مهره و روحوا انا مش شايف اى سبب لتزنيبتكم دى
مهره / هو انا ممكن اروح اطمن على صابر
اكرم / انتى جايبه الطاقه دى منين انا اعصابى سايبه و مش قادر اقف اصلا
عمران / خلاص قوموا بصوا على صابر و روحوا و انا كويس و الله و لو عاوزين تسافروا بكره مع باقى الجماعه ارجعوا عادى دا بالعكس يا ريت
مهره / انا مش هرجع غير مع نجاه
اكرم / طب ممكن بقي نروح نشوف صابر عشان فعلا مش قادر
مهره / حاضر
اكرم / هبقي اكلمك بكره فى التليفون اطمن عليك
عمران / عشت
اكرم يفتح الباب مهره تشاور لعمران باى يبتسم مهره تمشي و اكرم وراها عمران ياخد راحته فى نومته و الوجع باين عليه
................................
فى اوضه جوزيف
جوزيف يقلق يبص على امايا بتابع نجاه باهتمام
جوزيف / بتعمل ايه
امايا / ايه اللى صحاك انا ما عملتش اى صوت
جوزيف / دا انا كدا طولت كمان عشان مطمن انك جنبى ... بتعمل ايه ؟
امايا / بتصلى ... مش عارفه هى بتصلى ايه بس طول الوقت بتصلى
جوزيف / خليها تتسلى
امايا / نجاه بتحب الصلاه جدا كانت اكتر حاجه بتضايقها و هى مشلوله انها مش قادره تصلى واقفه انت نمت كل الوقت ده و هى ما خدتش راحه ثانيه
جوزيف / ما هى كانت نايمه و انا صاحى
امايا / لا اقصد ... ما خدتش فاصل بتصلى ورا بعض ورا بعض و بتطول فى السجود اوى مش عارفه صلاه ايه دى اصلا مفيش صلاه كدا هو المفروض اربع ركعات بس هى بتعمل ايه بقي بتقول ايه انا مش عارفه
جوزيف يمد ايده يشد كرسي امايا ناحيته
جوزيف / زى ما بنحاول نلعب على عقلها هى هتحارب على عقلنا و هتحارب على عقلها ... نجاه مش هبله و لا سهله ... نجاه متدربه على أعلى اعلى اعلى مستويات الثبات الانفعالى ... احنا بقالنا سنين طويله بنحارب عشان نوصل بس للحظه دى ... كل اللى جاى معتمد على اللحظه دى ... لو قدرت اجند نجاه الحرب خلصت احنا كسبناها مساله وقت مش اكتر و هننسي كل ده ورا ضهرنا و هنعيش انا و انتى و هى زى كل الناس عادى
امايا / و الناس هتسيبنا نعيش
جوزيف / الناس وقتها مش هتجرؤ ترفع عينها من على الارض
امايا / و ايه يضمن ان باقي العالم هيسيبنا يعني يعني يعني ما يمكن يعنى الزنايته كان ليهم اكيد اعداء غيرنا
جوزيف / و ما كانوش قادرين عليهم هيقدروا علينا ... قلبي احنا خلاص قربنا
امايا / ما لو نجاه مهمه اوى كدا لو نجاه تقدر تعمل كل ده ما كل الناس و كل الدول و و و كل حاجه مش عارفه بقي اكيد مش عارفه يعني هيحاولوا يعملوا حاجه مش عارفه انت فاهمنى انت حاسس انا عايزه اقول ايه
جوزيف / انا مش عاوزك تفكرى فى اى حاجه و لا تشغلى نفسك باى حاجه اهدى خالص و سيبي اى تفكير عليا انا و ثقى فيا
امايا / انا مش واثقه فى الدنيا كلها غير فيك
جوزيف يبتسم و يقوم يبوس راسها
جوزيف / هو الكلاب دول ما رجعوش ليه لحد دلوقت داهيه ليكونوا وقعوا هم كمان … سورى سورى سورى بحبك بحبك
جوزيف يضحك و امايا رفعاله حاجبها تهز راسها باستنكار و تلف تتابع نجاه
جوزيف / مجنونه ... بس بحبك
امايا / ماشي ماشي روح شوف الفشله بتوعك وصلوا لفين يلا روح
جوزيف / كريسبي اوى
جوزيف يبصلها مش مهتمه يتنهد و يمشي
…………………….
فى اوضه مهره فى الفندق
باب الاوضه يخبط تروح تحط الطرحه و تفتح تلاقي اكرم و معاه شنطه هدومه
اكرم / عامله ايه
مهره / انا تمام فى حاجه و لا ايه
اكرم / بصراحه الشيطان عمال يجيبنى و يوديني انام تانى تنزلى تانى و لا يهجموا على اوضتك و لا يجرالك حاجه مليون سيناريو فى دماغى لميت حاجتى و قولت اقعد معاكى لحد معاد الطياره بكره
مهره / بس الاوضه صغيره بسرير واحد
اكرم / يا ستى هفرد نفسي على الصوفا و بعدين انا اصلا مش عارف انام ايه هتدخليني و لا هفضل كدا
مهره تفتح الباب اكرم يبتسم و يدخل
مهره / انا كنت بلم حاجتى انا كمان مع انى مش قادره اسافر خالص حاسه انى واطيه اوى
اكرم / هتفضلى هنا لامتى و بعدين هم نفسهم قالولك ارجعى و انا ورايا شغلى و امك هريانى زن و تليفونات مهره انا مش هقدر ارجع من غيرك و مش هقدر اقعد فى التوتر ده انا بقولك ما قدرتش افرد جسمي حتى من كتر خوفى و قلقى عليكي ... انتى لو جرالك حاجه انا ممكن اموت
مهره / بعد الشر عن حضرتك فى ايه ليه الكلام الوحش ده
اكرم / طب ايه اساعدك تلمى حاجتك و نتعشي و ننام و ما تقوليليش ما باكلش بالليل احنا ما اكلناش بالنهار اصلا فانا ميت من الجوع اقولك انا هطلب اكل لحد ما تلمى حاجتك
مهره / تمام اللى تشوفه حضرتك
....................
فى اوضه عمران فى المستشفي
صابر رابط دماغه و عمران نايم فى السرير
صابر / ما هو من خيبتك بقى الحرمه تطلع اجدع منك ايه مش عارف تديله رجل تفقده اعز ما عنده
عمران يضحك
عمران / انا اتفاجئت و اتشليت انا مش عارف  ايه اللى جرالى كل حركاتى كانت متاخره و عقلى ما كانش معايا دا غير الإرهاق اكيد
جابر / الحمد لله انك بخير
صابر/ بس البت طلعت مش قليله برده يا جدع بص انا لو منك اتوكل على الله و اعقد النيه
عمران / انت بتقول ايه و ربنا انت فايق
صابر / انت و هى ميولكوا تقريبا واحده و الحمد لله علاقتكوا كل يوم احسن من الاول و جميله و محترمه و بنت ناس عاوز ايه تانى
عمران / و الله ابدا انا بس
صابر / اللى بيروح ما بيرجعش هتلاقي نفسك فى الجبل هربان من الدنيا كلها و برده مش هتهرب من خيالك
جابر / باذن الله لما نقرر ابن الكلب ده و نرجع نجاه اول حاجه هنعملها هنروح نخطبهالك
عمران / هى بقت رسمي خلاص
جابر / يا عم اتنيل طب تبقي تقبل بيك الاول و بعدين اتكلم
صابر / داهيه ليكون ده السبب فعلا ... خايف تترفض يا ابن الزيني ... و ايه يعني اترفض و اتقدم تانى و تالت اتعلم التناحه من ابن عمتك
جابر / و الله كنت شاممها
صابر / هى ايه دى ياض اللى انت شاممها
جابر / ريحه البينج اللى اديهولك و هم بيخيطولك العلامه اللى علموك بيها
صابر / موضه اصلا
جابر / موضه العيال السيس
صابر/ تعال اوريك السيس ده يقدر يعمل فيك أيه
عمران / خلاص يا جدعان مش قادرلكم
صابر / و لا احنا قادرين بس ادينا بنفك بدل ما نطق
الكل ملامحه تتغير
صابر / باذن الله تكون بخير
جابر يبص فى الارض
عمران / هى كام غرزه دى يا صابر
صابر / ما بعدش اصل الحاجات دى بتتنظر
عمران و صابر يبصوا على جابر لسه الحزن مالى وشه
عمران / حد قال لابويا انى اتصابت
جابر / انا ما قولتش و اتمنى ما يكونش حد قالهم هم فيهم اللى مكفيهم
صابر / اكيد عرفوا بس مش فاضيين يتصلوا بيك بس اكيد حد طمنهم يعنى
جابر/ انا هقوم الف لفه كدا و ارجع حد فيكوا هيحتاج حاجه ؟
صابر / انا جاى معاك انا قاعده المستشفيات دى ما بتاكلش معايا
جابر و صابر يشاوروا لعمران و يمشوا عمران يرتاح فى نومته و الالم واضح عليه
..........................
فى اوضه مهره
مهره نايمه فى السرير و اكرم قاعد على الكنبه سرحان و عينه على مهره
///////////////////////////
اكرم / يعني ما كنتش قابلتك بدرى شويه كانت كل حاجه اتغيرت ... بحس انك فهمانى اكتر من نفسي بحس انى مش عاوز الوقت يعدى و انا معاكى بخاف عليكي اكتر من نفسي ... و بخاف من نفسي و هى عماله تتعلق بيكي بالشكل ده يوم بعد يوم ... مش عارف افاتحك و لا اقفل على الموضوع و انساكى ... انساكى ازاى دا انا ما صدقت انى لقيتك انا بقالى سنين مستني و مش عارف اعمل ايه ... ضايع و عمرى بيتسرسب منى ... انتى شبابى اللى اندفن مع امك و انانيتها و برودها ... امك ؟؟
اكرم يتنهد و يقوم يقف فى الشباك
اكرم / امك هى العقبه اللى فى حياتى و لازم اكمل عشان بناتى ... بناتى اللى ما بيقدرونيش و لا فارق معاهم اصلا المهم فلوسي و بس انما يلا نسافر لا هنروح مع صحابنا طب ما انا ممكن اجى ؟ لا انت كبرت على الحاجات دى يا بابا ... مين قال كبرت ما انا صغير اهو صغير و بعمل كل اللى بتعملوه و اكتر انا بس محتاج حد يشاركنى الحاجات اللى بحبها حد يتجنن معايا حد يديني فرصه بس ... بس لا انت كبرت يا بابا ... مش سنك يا اكرم ... اعقل يا اكرم الناس تقول ايه ... ما يولعوا الناس انا مش عاوز اندفن بالحيا انا مش كبير اوى كدا ما اهى نايمه زى الملايكه اهى ... هى مش شيفانى عجوز رجله و القبر مش شيفانى عجوز زى ما هم بيحاولوا يقنعونى انى خلاص ... انا مش عاوز اتحشر مع العواجيز المملين دول لا منهم عايشين و لا محسوبين مع الاموات زومبيز كل همها الفلوس و الشغل وبس ... و انتى !
اكرم يبص على مهره و يبتسم و يروح يقعد جنبها على السرير و يلعب فى شعرها
اكرم / انتى حاجه ما حصلتش لا انتى تافهه زى اخواتك اللى فى سنك و لا ممله و كئيبه زى امك ... انتى كل حاجه بحبها ... انتى اللى انا استحقها ... انا بحبك يا مهره بحبك اوى
////////////////
مهره تفتح
مهره/ فى حاجه ؟
اكرم / مش قادر استوعب ان كان ممكن اخسرك النهرده
مهره تبتسم و تتعدل و تقعد
اكرم / انا بحبك اوى يا مهره و ربنا يقدرنى و اعوضك عن كل اللى عشتيه زمان ربنا يقدرنى و أسعدك و اخليكي احلى ملكه فى الدنيا كلها
مهره / ربنا يخلى حضرتك ليا و ما يحرمنيش منك
اكرم / مهره انا عاوز اتكلم معاكى فى حاجه تعبانى اوى بقالها فتره بس للاسف ما لقيتش اللى ارتاحله عشان افتحله قلبي لحد ما لقيتك
مهره / خير قلقت
اكرم / انتى عايشه معانا بقالك فتره و متابعه امك و اخواتك و شايفه العلاقه بينا ازاى ... انا مدفون وسطهم يا مهره انا مش سعيد
مهره/ حاول تقرب منهم كلمهم
اكرم / حاولت كتير هم بيشوفونى راجل عجوز و مكحكح زى ابهات صحابهم
مهره / ازاى يعني دا حضرتك صغير خالص
اكرم / دا فى عنيكي انتى بس
مهره / لا حقيقى حضرتك شباب جدا و حماسي و نشيط و رياضي و ما حصلتش انت بجد شخصيه استثنائيه
اكرم / يعني لو اتقدملك حد زيى تقبلى ؟
مهره / طبعا و بدون تردد بس للاسف ما اعتقدش ان نوعيتك دى فى منها تانى هى كانت نسخه واحده و خلصت
اكرم / طب لو عرفتى انى ناوى اطلق مامتك
مهره الحزن يملا ملامحها
اكرم / انا مش هظلمها انا هديها هى و البنات  كل اللى يطلبوه و هكون موجود وقت ما يحتاجونى انا مش هتاخر عنهم فى حاجه
مهره / طب ممكن بس حضرتك تهدى و تفكر فى الموضوع شويه... انا واحده عشت عمرى كله نفسي فى عيله طبيعيه اب و ام و حضرتك بتقولى دلوقت انك هتحرم اخواتى من عيلتهم و تخليهم يعيشوا اللى عيشته ... حضرتك ما تعرفش الاطفال هم الضحايا اللى بجد فى الطلاق هتبقي فاكر انك عامل اللى عليك بس هم محتاجين حاجات تانيه محتاجين امانك و حنانك هم محتاجين وجودك مش زيارات بشويه هدايا
مهره تعيط
مهره / حضرتك لازم تفكر تانى لازم تراجع نفسك لو ماما فيها عيب لو مضيقاك كلمها قولها حاول معاها ما تسيبش البيت يقع فى لحظه شيطان عشان خاطرى عشان خاطرى
اكرم / طب خلاص خلاص اهدى فى ايه مالك
مهره / انا مش عايزه ارجع لوحدتى تانى مش عوزاهم يشوفوها
اكرم / انا مش على الدسوقى
مهره / دلوقت ... فاكر ... فاكر السنه اللى فاتت لما اقنعتنى اروح عيد ميلاد ايلين اختى و نزلت معايا مخصوص نجيب لها هديه فاكر رجعت عامله ازاى فاكر تعبت ازاى سلم عليا بالايد كانى واحده غريبه و دخل رقص معاها هى قدام كل الناس عارف ليه عشان هى بنته لكن انا طلقنى مع ماما
اكرم / ما تاخدينيش بذنبه يا مهره انا عمرى ما فرق بين بناتى مهره لو سمحتى اهدى
مهره / على فكره انت بتحب ماما و اتجوزتها بكيفك ما حدش غصبك
اكرم / كل حاجه اتغيرت
مهره / بس بناتك ما طلبوش منك تخلفهم دا كان قرارك انت
اكرم / حاسس انى بحب واحده تانيه
مهره تتخرس و الدموع تقف
اكرم / للاسف مش هينفع اتجوزها طول ما امك على زمتى و خايف تضيع منى
مهره / صغيره صح ... اكيد اصغر من ماما .. اكيد احلى ... ما تعملش فيها كدا ... فيهم ... الاتنين ... انت بتقول انك مش على حقيقي معاك حق هو كمان كان راجل متجوز و سعيد حب بنت صغيره و اتجوزها و بعدين اختار مراته و اولاده و انا اترميت ... هتظلم ماما و هتظلم العروسه دى
اكرم / انتى عارفه ايه المشكله يا مهره
مهره / ايه ؟
اكرم / انك فكرتى فى الكل حتى نفسك و انا لا ... مش مهم مشاعرى مش مهم عاوز ايه مش مهم بحب مين و لا ايه هيسعدنى المهم انتى و اخواتك و امك حتى البنت اللى ما تعرفيهاش فكرتى فيها ... لكن انا لا
مهره / بالعكس لو ما كنتش بحبك ما كنتش كلمتك مش هقدر اشوفك بتدمر حياتك الجميله و اقف ساكته
اكرم / نامى يا مهره و انا هرجع اوضتى محتاج ابقي لوحدى شويه
اكرم يمشي و مهره تقعد تعيط
....................
فى اوضه جوزيف
ماريا تدخل امايا تستغرب
امايا / انتى جايه لوحدك
ماريا / جوزيف قالى انسحبى و ارجع اساعدك... هى بتعمل ايه
امايا/ بتقرا قران
ماريا / و دى فيها ايه بقي عشان يتعمل عشانها كل ده و تجهيزات و اوضه مخصوص مرعبه اوى يعني دى
امايا / تحبى تدخوليلها بنفسك
ماريا/ انا كنت قربت اخلص من همام ده و تعبى اترمى فى الارض و اجرى على فيليب و قبل ما ادخل الاوضه بثوانى انسحبى و روحى احرسي دى انا بجد مش طيقاها
امايا/ تحبى ادخلك ليها تفشي غلك شويه
ماريا / و صاحبك مش هيزعل
امايا / انا من واجبى احذرك ان نجاه مش سهله ابدا و نصيحه ما تاخديش معاكى اى اسلحه لانها ممكن تقتلك بيهم
ماريا تمشي
امايا / على فين
ماريا / هتعرف على الضيفه الجديده
امايا تبتسم و تركز فى الشاشه و ماريا تمشي امايا تكلم نفسها بسخريه
امايا / يلا تستاهلى انا اصلا كنت مقرره اقتلك لما اكتشفت انك بتتكلمى عربى و بتشتغليني ... ماريا ما تفتحيش الباب يا ماريا جو قال ممنوع يا ماريا... اسمعى الكلام يا ماريا
.........................
فى مستشفي
همام واقف مع اتنين رجاله بيتكلم بعصبيه لكن صوت واطى
همام / ازاى مات ازاى و انتوا واقفين هنا بتعملوا ايه هاه دا كان اخر امل لينا يا كلاب
راجل ١ / و الله يا كبير ما نعرف دا حصل ازاى احنا اخدناه من الاسانسير على عربيه الاسعاف ما فاقش غير ثوانى فى نص الطريق و الجماعه اتعاملوا معاه لحد ما وصل الشقه و نزلنا فيه تقرير و يا دوب دخلنا من الباب هاتك يا ترجيع دم و صريخ خفنا يموت مننا رجعنا بيه جرى على المستشفي و الدكتور طمنا و قال حاله تسمم و اتعالج و بقي كويس و الدكتور دخل يبص عليه عشان يكتبله خروج و قالنا كله تمام ما فاتش ثوانى و الجهاز زمر و لقيتهم بيقولوا انه مات  .. انا هتجنن السم ده قدر ياخده امتى و ازاى ما حدش اخد باله صحيح ساعه القدر بيعمى البصر
همام / ما هو قدر طبعا كل حاجه فى الدنيا قدر حتى الغباوه و البلا قدر برده
همام يمشي يخبط كتفه فى كتف جوزيف لابس بلطوا ابيض و كمامه
جوزيف / باردون
همام / و لا يهمك
همام يمشي و هو هيطق
...................
فى اوضه نجاه
نجاه بتصلى الباب يتفتح نجاه ما تقطعش الصلاه و تكمل سجدتها ماريا تدخل الباب يتقفل لوحده ماريا تستغرب و تبص للكاميره نجاه تسلم
نجاه / مش انتى اللى كنت مستنياه ... هتفضل مستخبى لامتى
نجاه تقوم تلم السجاده و تطبقها
ماريا / شكلك اخدتى على المكان بسرعه
نجاه / مش وحش .. انتى مين بقي و زعلتيهم فى ايه خلاهم يرموكى هنا معايا
ماريا تضحك باستهزاء
ماريا / انتى فكراهم حابسيني معاكى ؟ طب معلش سؤال انتى ما حسيتيش بالباب و هو بيفتح مش كان اولى انك تحاولى تستغلى انه مفتوح و تخرجى بدل اللى كنتى بتعمليه ده
نجاه / اللى بعمله ده هو اللى هيفتح الباب او يقفله
ماريا / لا بجد ... طب ما تكملى كدا يمكن يتفتح تانى ... كملى كملى
نجاه تبتسم فى هدوء
ماريا / عندى فضول افتح دماغك دى و اشوف شكل مخك عامل ازاى دا ان كان موجود اصلا
نجاه / اكيد هتلاقيه اكبر من اللى عندك
ماريا/ هتفضلى واقفه تتفرجى عليا كتير
نجاه / انا موراييش حاجه لو انتى مستعجله الباب وراكى اهو اتفضلى من مكان ما جيتي
ماريا / بالبساطه دى فكرانى هدخل و اخرج كدا من غير حتى ما امسي عليكي
نجاه / طب ما تمسي مستنيه ايه ... اه ثانيه ثانيه عشان ما تقوليش ما قولتش انا عارفه انك ما تقدريش تقتليني لان حياتى لسبب ما انا ما اعرفوش مهمه عند اللى ما يتسمى ... بس انتى حياتك ما تساويش فى زميتي نكله ... و عشان انتى صاحبه المكان هديكي فرصه تخرجى من هنا على رجليكي ... و عشان اطمنهم هروح اقف عند الحمام و انتى عند الباب عشان تضمنى انك تخرجى قبل ما اللحق اوصل لنص القاعه دى حتى ... ايه رايك
نجاه تبص للكاميره و تبص لماريا بتتمشي حواليها
ماريا / قالولى انك خطر و قالوا كلام كتير كبير اوى عليكي بس هو انتى هتعرفى تدافعى عن نفسك حتى فى الخيمه دى
نجاه / مالها واسعه و حلوه و بتعمل برويت حتى شوفى 
نجاه تلف بالاسدال و فجاه تنط و تضرب ماريا فى وشها برجلها و هى بتلف و تنزل واقفه فى وضع الهجوم و ماريا تقع فى الارض نجاه تجرى تضربها بالرجل فى بطنها ماريا تمسك رجلها و تقلبها على ضهرها الاتنين يقوموا بسرعه و ياخدوا وضع الاستعداد ماريا تهجم بضربات سريعه و نجاه بتدافع بس فجاه نجاه تديها بوش برجلها و تجرى تتشعلق بايديها فى رقبتها تشدها لتحت و تنط تضربها بركبها فى وشها واحده ورا التانيه و ترمى نفسها لورا و هى لسه متعلقه فى رقبه ماريا ماريا تنقلب على ضهرها نجاه تلف بسرعه و تقطم رقبه ماريا نجاه تقوم تبص للكاميره
نجاه / دا اخرك
صوت امايا / مش هنا
نجاه / انتى بتعملى كدا ليه و مين دى
امايا / واحده غبيه ما بحبهاش و راحت لحالها
نجاه / طب ما تتعظى بقي قبل ما تحصليها و تخرجيني من هنا
امايا / ما انا لو خرجتك هحصلها فعلا ان ما كانش انتى يبقي جو
نجاه / هحميكي منه
امايا / كان القرد نفع نفسه هههههههههههه
نجاه / لو ما كنتيش ساعدتيه ما كانش قدر يوصلى انا جريت وراكى انتى
امايا / على فكره انا حبيتك بجد
نجاه تصرخ في الكاميره
نجاه / امال بتعملى معايا كدا ليه حبسانى هنا ليه
امايا / عشان سلامتك و عشان حلمك حلمك اللى من غير جوزيف عمرك ما هتوصليله
نجاه / انتى فاكره انى بحلم ان ابويا يموت يا اميره ان اهلى يتازوا تفتكرى دا حلمى دا كابوس
امايا / ما بيدوروش عليكي راجعين مصر فى طياره تسعه
نجاه / كدب عمرهم ما هيقدروا يرجعوا من غيرى دا لو هيرجعوا بيا جثه فى قفه مش هيهدوا و لا يناموا الا اما يرجعونى بلدى مش احنا اللى نرمى لحمنا مش اهلى اللى يتخلوا عنى و لو صدقتوا انهم رجعوا فعلا تبقوا سزج لو صدقتوا انهم هيسيبونى و يسيبوا حقى بالبساطه دى تبقي واهمه دا ان ما رجعوش بيا هيرجعوا بتارى 
امايا / ما هم سابوا تارى عادى لقوا كل السكك مسدوده كملوا حياتهم عادى ... ما حدش مات بعدى يعني
نجاه / انا مت ... انا كنت بموت فى اليوم مليون مره من عياطى و قهرتى عليكى
امايا / و عشان كدا انتى معايا هنا مش معاهم
نجاه / انا بكرهك و لو منك اصب الباب ده خرسانه مسلحه عشان ما اقدرش اخرج من هنا ابدا لانى هاكل قلبك نى انتى فاهمه هقتلك يا اميره هقتلك
امايا / ما حدش بيموت مرتين
نجاه تروح الحمام و تفك الطرحه و تحط راسها تحت المايه تحاول تهدى مش قادره تتنفس من عصبيتها
......................