الكبيره ٢ بقلم / لولو_محمد

الحلقه ٦٥

((((((( الكبيره ٢)))))))
#لولو_محمد
الحلقه ٦٥
احلام / انا مش موفقه على اللى بيحصل كل حاجه غلط كل حاجه ملخبطه كل حاجه غلط
عباده / و ايه الصح يا احلام
احلام / ما اعرفش
امين / لا حول و لا قوه الا بالله
عباده/ طب انتى مضايقه من انى وافقت ان يونس
احلام / جوزيف و هيفضل طول عمره جوزيف جوزيف و بس
صمت
عباده/ يعني مفيش امل من التوبه
امين / هو بكيفها دى حاجه ربنا وحده اللى يعلمها
عباده / ثوانى بس يا امين... قوليلى يا احلام... مفيش حد بيتوب ابدا
احلام / ديل الكلب عمره ما يتعدل ابدا
عباده / بس ربنا قادر يهدى اى حد قادر ينكسك انتى شخصيا و يخليكي تتفتنى باى حاجه
احلام / انا عمرى ما اذيت حد و هو اذانى
احلام تعيط
عباده / و اذانى و ازى اخواتك و اهلك كلهم
احلام / امال ليه سامحتوه ليه سايبينه رايح جاى عادى و لا كانه قاتل و مجرم و حقير
عباده / عشان بيقول تاب
احلام / بيكدب
عباده / اتصل بيهم خليهم يجيبوه
احلام / لو جه هنا هقتله
عباده يديها المسدس احلام ترتبك و تحاول تلم نفسها و تاخد منه المسدس
عباده / اقتليه
…………………………
احلام / هقتله على فكره
عباده / حسابك عند ربنا بقي ما حدش فينا هيمنعك و لا هيحاسبك بالعكس هنكتفهولك كمان و ننضف مكانك بس انتى اللى هتقتليه بايدك
احلام / بتعجزنى يعنى … ماشي هاته و انا هقتله ... هقتله و اخد حقى و حق كل الناس اللى ظلمهم و اذاهم هنضف الدنيا من شره
امين / انتى مستوعبه الموقف اصلا و لا الجلاله و خداكى دى روح انتى فكراها سهله
عباده / خليها تجرب .. اتصل بمختار خليهم يرجعوا
امين يطلع الموبايل و يتصل احلام تروح تقعد فى جنب و تحط المسدس على الترابيزه قدامها و تفضل بصاله و بتعيط و عباده متابعها و هى كل شويه تمسح دموعها
…………………….
فى الجنينه الورانيه
نجاه / صدقنى ما بقدرش ازعل منها دى اختى ... بس الفتره اللى فاتت كانت متغيره اوى و بتهاجمنى طول الوقت .. المشكله ان انا اصلا فيا اللى مكفيني انا مش ملاحقه ... طب هى مشكلتها مع يونس و لا معايا انا شخصيا و لا معانا احنا الاتنين ... ما انا رفضت و قافله عليه بابى اهو اعمل ايه اكتر من كدا
جابر / و لا حاجه
نجاه / طب انت زعلان منى انت كمان ؟!
جابر / من امتى قدرت
نجاه / و الله يا جابر و لا انا بقدر ازعل منك أو حتى اقدر على زعلك منى بس انا فعلا مش لاقيه نفسي و تعبانه جدا و تايهه انا ... انا كان عندى احلام و خيالات كتير اوى ... كلها هوا كلها مش هتحصل ... ما حدش بيفهمنى ... انا اكتر واحده حاسه بأحلام دلوقت ... لانى اكتر واحده نفسي اصرخ من غير سبب ... اعيط و انهار و اخبط برجلى فى الارض و بعدين اقوم عادى و لا كان حاجه حصلت
جابر / و ايه اللى مانعك ما تعملى ده لو ده هيريحك
نجاه تبتسم باستهزاء و تبص الناحيه التانيه جابر يروح يقعد على المرجيحة و يتمرجح نجاه تبصله و تبتسم
جابر / من اول ما المراجيح دى ركبت و انا كان نفسي اركب اوى و اتمرجح زى العيال كلها بس انا كنت مستعيبها فضلت امرجح العيال و اركب دى و انزل ده و ارضي دى و اراضي ده و عمرى ما ركبت و فجاه كبرت و بقى عيب اركب ... مش عيب بس ... مش حلوه يعني دى بتاعه العيال و انا ما عدتش عيل ... بس انا عمرى ما حسيت انى كبرت بصراحه و لسه نفسي اتمرجح ... و ما ينفعش اقولك اعملى اللى يريحك و انا مش قادر اعمل اللى نفسي فيه و يريحني
نجاه / طب هات لفه
جابر يبتسم و يقوم نجاه تقعد يمرجحها
نجاه / انا بعرف امرجح نفسي ما تتعبش انت نفسك
جابر / و الله كلهم بيقولولي كدا بس تقولى ايه غاوى تعب
نجاه تبصله بطرف عينها
جابر / ايوه هو اللى فى بالك هو بلقح ايوه هو
نجاه تبتسم و تبص قدامها
جابر/ احلام مش عاجبها الوضع و بصراحه مش هكدب انا كمان مش عاجبنى ... انا بحبك
نجاه تحط رجليها على الارض و تقوم تقف و تبص لجابر و تتنهد
نجاه / و انا مش عاوزه اتجوز ... خالص ... مش حوار بقي اتجوزك انت ... لا انت مليون بنت تتمناك انا نفسي لو مش نجاه اتمناك بس انا كنجاه مش شايفه نفسي خالص كزوجه يا جابر مش قادره اقبل الفكره ... مرعوبه منها
جابر يروح يقف قدام نجاه و نبره الصوت و العصبيه تعلى بينهم
جابر / ليه ؟! ايه اللى راعبك
نجاه / كل حاجه ... بص حواليك ..  دى مش بيئه اجيب فيها عيال
جابر / و لو احنا ما جبناش عيال و ربيناهم و طلعناهم يكملوا من بعدنا مين هيكمل السيس الخنافس اللى مالين الدنيا
نجاه / و هى السلاله واقفه على العيل اللى هجيبه اوى ايه لو ما خلفتش البشريه هتنقرض
جابر / لا يا ستي بس دا دورك
نجاه / ليه بقي ان شاء الله
جابر / ما انا ما بعرفش اخلف يا نجاه ربنا خلقنا كدا انا اخرج لأكل العيش و انتى تفضلى فى البيت تربى العيال و يحصل التوازن
نجاه / انا مش بقدر اقعد فى البيت يا جابر بتخنق انا لما بقعد فى البيت كام ساعه على بعض بزهق انا روحى فى الجبل فى الخيل فى الصحرا فى الحريه انا روحى متمرده حره ما ينفعش تتربط بجواز
جابر / انتى روحك تايهه مغسول دماغها ما تعرفش حاجه
نجاه / ماشي ما اختلفناش و لحد ما الاقى نفسي انا مش هفضل فى الهم ده ..  و لعلمك انا فاهمه كل الحوارات دى كويس ... يا سيدي اتجوز انت و خلف و كمل المسيره موقف حياتك عليا ليه
جابر / عشان بحبك يا متخلفه هيكون ليه يعني و بعدين هو ايه اللى موقف و كمل انت هو انا طور هتجيبولى اى بقره و تقفلوا علينا ما تبطلى عبط بقي انتى دماغك دى وقعتى عليها و لا ايه
نجاه / انت عمرك ما هتفهمنى
جابر / و الله و لا انتى فاهمه نفسك
نجاه / طب اديك قولتها انا واحده فيا العبر انت باقي عليا ليه ما تشوف واحده احسن
جابر / ما هو مش بايدى
نجاه / أمال بأيد مين يعني
جابر / بقلبي ... قلبي اللى مش شايف غيرك من سنين طويله
نجاه / عمرك فكرت انك متمسك بيا اوى كدا لانى متمرده و انى بمجرد ما هبقي فى بيتك هتزهق منى و تمل و كل الكلام الجميل ده هيختفى
جابر / بصي حواليكي كدا و اديني مثال واحد شوفتيه عمل كدا
نجاه / ما فيهمش زيي اصلا
جابر / و لا زيي على فكره ... انتى لو لفيتي عمرك كله مش هتلاقي زيي
نجاه / مش هدور اصلا العيب مش فيك فيا احلفلك بايه عشان تصدق المشكله فيا انا
جابر يزعق / عالجيها
نجاه تعيط / مش عارفه مش عارفه اسكت بقي مش عارفه بس الله
جابر / طب خلاص اهدى
نجاه / انا خايفه و تايهه و ضايعه و كل حاجه كل حاجه انا عارفه ... بس مش عارفه يا جابر مش عارفه ازاى اعالج كل ده انا مش لاقيه نفسي مش فهماها مش قادره اريحها و لا أهديها انا تعبت و ما حدش فاهمنى و كلكوا بتضغطوا عليا انا تعبت و الله تعبت و مش عارفه اعمل ايه و لا ارضيكوا و اجى على نفسي و لا ارضي نفسي و ازعلكوا كلكوا منى و انتوا زعلكوا غالى و انت زعلك غالى و بابا و ماما و كلكوا
جابر يطلع علبه مناديل من جيبه يديها لنجاه تنف و تمسح دموعها
نجاه / انت شوفتنى و انا صاحيه من النوم ... شوفت نكشه شعرى و لا عماصى و ريحه بقي انت تضمن منين اصلا انك ما يجيلكش صرع لما تصحى على كف منى و انا بتقلب و لا منظرى و انا لسه صاحيه من النوم يعني تضمن منين
جابر / انا متربي معاكى شوفتك فى اسوء حالاتك و راضي ... الله يرحم ريحه عرقك عميانا فى الجيم سنين كنت اتكلمت
نجاه/ انا ما اسمحلكش انا نضيفه جدا و بستخدم اغلى و احسن البراندات و بهتم بنظافتى الشخصيه جدا جدا
جابر / يا شيخه روحى كدا و لا قبل ما تتحجبى ان كنتى ناسيه افكرك عادى صورك جوه فى الالبوم الأزرق
نجاه / قطعتها كلها
جابر / عندى نسخه
نجاه / كداب
جابر / و الله العظيم و مخبيها فى مكان الجن الأزرق ما يعرفش يوصله
نجاه / و ايه يعني عادى اصلا ما يهمنيش
جابر / و لا لما كنتى نونه بالبامبرز
نجاه/ يااااه انت هترجع اوى كدا على فكره انت كمان سيديهاتك كلها عندى على فكره بس انا مش هنزل للمستوى ده
جابر / لا عشان خاطرى انزلى ... هاتى اسوء ما عندك ... شخرمينى
جابر يروح يقعد على المرجيحة و يتابع نجاه و يبتسم تبصله و تبتسم
نجاه / مش فاكرالك اى حاجه وحشه ... اديني فرصه بس و انا اراجع نفسي كدا و ارجعلك
جابر / على حطه ايدك هتلاقيني و انا فى ديك الساعه
خديجه تدخل
خديجه / انتى هنا يا نجاه ... ايه يا جابر الكلام ده ؟! ده اللى اتفقنا عليه برده و لا هو كلام الليل مدهون بذبده و كانت حركه و عدت
جابر / فى ايه يا عمتى بس مالك
خديجه/ فى ان رجعت ريما لعادتها القديمه و الشيخه نجاه نسيت حوار الخلوه اللى قلبت كيان السرايا كلها بيه
الابتسامه تروح من وش جابر
خديجه / اتفضلى يا اختى قدامى اتفضلى ما انا مش هخلص من حواراتك
نجاه تبص لجابر و تمشي و خديجه ماشيه جنبها نجاه تلف تبص على جابر متابعها و الحزن مالى ملامحهم هم الاتنين نجاه تبص قدامها و تكمل مشي
.............................
فى اوضه مهره
مهره ماسكه تليفون و بتقلبه فى ايدها و تتصل
مهره/ الو السلام عليكم ... انا مهره يا بابا ازى حضرتك ... بابا بابا الو الو ... بابا ... الو
مهره تتصل تانى يتكنسل عليها تتصل تانى يتكنسل تانى تتصل تالت يتكنسل
مهره / طب حتى اسمعنى مره
مهره تتصل برقم تانى
مهره / ايوه يا ماما انا مهره انا ... ماما ... ليه طيب ليه امال مين يسمعنى مين ما تتقوا الله بقي حرام عليكوا انتوا ايه ربنا ينتقم منكوا حسبي الله و نعم الوكيل فيكوا
مهره تعيط و بعدين تمسح دموعها و تتصل
مروان / الو
مهره / ايوه يا مروان انا مهره
مروان / اه ... اهلا دا بقي رقمك الجديد؟
مهره/ قالولى كلام كتير مش عاوزه اصدقه قالولى انك انت اللى حطيتلى المخدرات فى السر و خلتنى ادمن
مروان/ مين دول بقي اللى قالوا معلش البلطجي اللى استغفلتينا كلنا و طلعتى زباله و مدوراها معاه يا رخيصه يا عديمه الربايه ... امال يعني كنتى عملالي فيها ام الشرف و مطلعه الراجل المحترم زباله ... يا شيخه اتقى الله دا الراجل كان هيتقهر عليكي اكتر من ابوكى و امك و طلعتى مشتغلاه فى الاخر
مهره / انت بتقول ايه يا مروان انا اختك انا ما اعملش كدا ابدا
مروان / و لا تكونى فاكره النطع اللى اتجوزتيه من ورا اهلك هيصونك تبقي هبله اللى بيتاخد رخيص بيداس عليه بالجزمه يا جزمه و ساعتها مش هيكون ليكي ضهر يدافع عنك و لا يقفله بس تعرفى تستاهلى انتى تستاهلى كل اللى يجرالك عشان اللى زيك ما ينفعش تتعامل غير كدا اصلا
مهره / اقسم بالله انت مش فاهم حاجه ما كانش فى طريقه تانيه غير دى عشان اخرج من المصحه
مروان / مصحه ايه انتى هتستهبلى دا انا شايف القسيمه بعيني .. اسمعى انا اتلطيت فى مشاكل و قرف بسببك انا فى غنا عنها انتى لا اختى و لا ليا دعوه بيكي تطلقى من الكلب ده و ترجعى تبوسي ايد امك و ابوكى و تشوفى هتصلحى القرف اللى وحلتينا فيه ازاى انتى فاهمه و لا لا
مهره / طلقنى هديت خليته يطلقني بس لا بابا و لا ماما بيردوا
مروان/ انتى عارفه مين اللى هيرد بس حتى ده ما اعتقدش انه ممكن يرد عليكي بعد اللى حصل ده كله
مهره / انت بتقول ايه يا مروان اكرم دا زباله قولتلك انت ليه مش مصدقنى 
مروان / كنت مصدقك لحد ما شوفت قسيمتك يا فاجره
مهره / انت بتقول كدا لمين ؟!! ليا انا !! الو الو مروان الو ... ربنا ياخدكوا كلكوا حسبي الله و نعم الوكيل فيكوا ربنا ياخدني و يريحني منكوا حسبي الله و نعم الوكيل حسبي الله و نعم الوكيل
مهره تنهار من العياط
………………….
فى جنينه الزنايته
كارم / انا مش فاهم حاجه احنا رجعنا ليه
مختار / و الله ما عارف اما نشوف ابوك عاوزنا فى ايه
عباده يطلع من السرايا مختار يتعدل
مختار / ايه يا عباده هديتها
عباده / عاوزه تقتلك
جوزيف يضحك و يكتمها
عباده/ هى مش هتقدر تعمل حاجه هديها مسدس فاضي و نشوف هتقدر تضرب و لا لا
مختار / دا اللى ربنا قدرك عليه
عباده/ خليها تعرف انها مش سهله
مختار / تقوم تكسرها قدامه انها مش قادره تعملها ... الدنيا ما بتمشيش كدا يا عباده
جوزيف / سيبها تجرب
مختار/ انت ما تعرفهاش ماشي اهدى
جوزيف / انا عارفها اكتر منك سيبها تجرب
مختار / لا و اركن انت على جنب دى أمور عائليه
جوزيف ينط يقعد على الكبوت فوق العجل
مختار / و بعدين انت مستهون بيها ازاى كدا دا انت اتسببت فى موت خطيبها
جوزيف / مستهون ايه يا جدع دا هى الوحيده فيكوا اللى اتحركت و حرقت دراعى يوم جابر انا مش مستهون انا عاوز الطاقه دى تخرج عشان ما حدش بره يستغلها
عباده / حد زي مين يعنى
جوزيف / انتوا مفيش فيكوا امل
كارم / و بعدين اللى بره هيوصل لاحلام ازاى
جوزيف / زى ما وصل لغيرها و زى ما كان ممكن اوى يبقي جوزها لولا ما اعرفش ايه اللى حصل
كارم / بلال ؟!
جوزيف/ مثلا ... بس بابلو اتحرق بالنسبالكوا خلاص اللى هيجي حد ما تعرفوهوش ... او حد تعرفوه و اتجند ... و مش بعيد تكون واحده ... كل الاحتمالات مفتوحه انا بتكلم فى الكونسبت نفسه ... و بنفس المبدا مش حوار احلام بس ممكن اى حد تانى ... ممكن كارم ده نفسه
كارم / انا !!
جوزيف / يقابل واحده تخطف عقله و يتجوزها و يخلف و هوب ابنه مش موجود دور عليه بقي او يتهدد بمراته اللى هى منهم اصلا الحوار مش مقفول على اسلوب معين الناس دى نفسها طويل جدا انا قعدت خمس سنين ... خمس سنين برتب لخطف نجاه
مختار / و رجعت فى كام يوم
جوزيف / و احلام جوازتها باظت و جوازه ناصر باظت
عباده / بس امايا كانت ما بتخلفش
جوزيف / يا عباده ابوس ايدك انت اذكى من كدا ما تشلنيش ركز شويه
مختار / تقصد اننا كلنا حبيناها
جوزيف / كلكوا كنتوا بتدوروا عليها زى المجانين و لو كنت طلبت اى حاجه مقابل انها ترجع كنتوا عملتوا ... دا انت لحد دلوقت مجنون و نفسك ترجع
مختار يتنهد
جوزيف/ ناديها
عباده يبص لكارم كارم يروح السرايا
مختار / انا رأيي تدخل المضيفه تلبس واقى تحت هدومك اضمن
جوزيف / هو حد بيموت ناقص عمر يا راجل اهدى كدا مالك بقيت خفيف دا انا عديت من حاجات اخطر من احلام دى بكتير اهدى انت بس و هتشوف
مختار/ حد قالك قبل كدا انك جبله
جوزيف / لا بس قالولى انى مستفز
عباده / لا انا كدا الضغط هيعلا عليا انتوا الاتنين اهمدوا مش ممكن كدا
امين و جابر يطلعوا و احلام تطلع من وراهم تبص لجوزيف فى عنيه و الرجاله تتلم حواليهم و الحريم يطلعوا من التراس
جابر / احلام ... انا مش موافق على الهبل ده ... عشان خاطرى اهدى و فكرى تانى
احلام / ما لكش دعوه بيا
جابر يهز راسه و يقف جوزيف يروح يقف قصاد احلام على بعد و الناس حواليهم كتير
احلام / انت قتلت بدر
جوزيف / ما حصلش هو اللى جه لقضاه انا لو كنت عاوز اقتله كنت قتلته حتى فى فرشته بس بيس اشيلها عادى لو ده هيريحك
احلام ترفع المسدس جوزيف ثابت و باصص فى عنيها
امين / راجعى نفسك يا احلام مفيهاش رجوع ... لو ليكي حق عنده عند ربنا مش هيروح و يا بخت من بات مظلوم و لا باتش ظالم
نجاه تطلع بتجرى من السرايا تعدى من وسط الزحمه تشد منها المسدس و يتخانقوا
نجاه / انتى اتهبلتى انتى بتعملى ايه
احلام / بعمل اللى ما حدش من الرجاله دى كلها اتجرأ و عمله
جوزيف / سبيها
نجاه / اسكت انت ...  انتى فاكره ان موته هيريحك
احلام / هيريحنا كلنا و انتى بالذات ما تتكلميش معايا طول ما انتى بتقفى مع الغريب على بنت عمك
نجاه / انتى اختى يا متخلفه و انا واقفه معاكى انتى خايفه عليكي انتى القتل مش سهل انا جربته اقسم بالله ما سهل مع انى كنت بدافع عن نفسي ما بالك و انتى بتقتلى واحد اعزل واقف لوحده و انتى وسط اهلك
جوزيف / بمزاجى على فكره
نجاه / هتغابى عليك
جوزيف يبتسم بسعاده
نجاه / اسمعيني يا احلام اهدى و اقعدى نتكلم بهدوء
احلام / مش طايقه اشوفه و لا اسمع اسمه حتى ... انتى مش طبيعيه ازاى بتدافعى عنه ازاى
نجاه / و الله ما بدافع عنه دلوقت انا بدافع عنك انتى انتى اللى تهميني و عشان كدا خايفه تعملى حاجه تتحاسبى عليها قدام ربنا تتحولى من مظلومه لظالمه
احلام تبص لجوزيف و هى بتقاوم الدموع تنزل من عنيها جوزيف يتحرك ناحيتها مختار يمنعه جوزيف يهزله راسه و يروح ياخد المسدس من ايد نجاه
نجاه / مش وقتك لو سمحت
جوزيف / ثوانى
جوزيف يبص لاحلام و يشاور لها على المسدس
جوزيف / المسدس صمام الأمان بتاعه ده كان مقفول بتفتحيه كدا و بعدين بتشدى الاجزاء دى كدا عشان الرصاصه تدخل الماسوره و بعدين تنشنى و تضربى و عشان هم خايفين عليكي مدينك مسدس فاضي بتحسي ده من وزنه فخلينا نبدل الخزنه دى بواحده مليانه
جوزيف يفك الخزنه و يطلع واحده من جيبه مليانه يحطها و يشد الاجزاء و يضرب طلقتين فى الهوا و يديها المسدس
جوزيف / المسدس كدا جاهز كل اللى عليكي تشدي الزناد و انا مش لابس قميص واقى و لو عاوزه تضمنى ممكن تنشنى فوق شويه تضربيها فى راسي انا اساسا مستبيع و عارفه ايه الطريف فى الموضوع ... ان لو نجاه و مختار صح انا ما عملتش اى حاجه حرام من يوم ما دخلت الاسلام بالعكس انا بصلى كل الفروض و بدات احفظ قران و اقرا فى التفسير يعني المفروض ان كل دى حسنات ... هى قليله بس مقارنه بميزان السيئات فانا بيس هدخل الجنه
احلام /  انت فاكر انك هتشمها انت تضحك على اى حد انا لا
جوزيف/ و انتى بقي اللى معاكى ختم تأشيره الجنه بتقولى مين يدخل و مين لا
احلام/ ربنا ممكن يسامح فى حقه لكن عمره ما يسامح فى حق العباد الا اما هم يسامحوا و انا مش مسامحه سامع مش مسامحه
جوزيف / يعني هتاخدى حقك دلوقت و لا تستنى لما نتقابل الناحيه التانيه و لا ناويه على ايه عشان انا مواعد الراجل المحترم ده بصينيه بسبوسه
عباده يخبط كف على كف
نجاه / انت بتقول ايه
جوزيف / اركنى على جنب لو سمحتى ... ها يا ست الكل ناويه تعملى ايه هتقتلى المسدس جاهز و انا جاهز ... اقولك انا مسامحك اقتلى يلا الفيلم طول و بوخ و الناس دى كلها متعطله عن اشغالها شوفى هتعملى ايه
امين يدخل ياخد المسدس و يقفله و ياخد اخته فى حضنه و يدخلوا السرايا
جوزيف / يعني الوضع ايه هتهدى شويه و نكررها و لا خلاص كدا عشان انا الطلب عليا عالى اوى و فى مليون من يتمنى موتى خد بالك
جابر / خف استظراف هى مش نقصاك و لا انت ما بتحسش و لا ايه
جوزيف / وحشتني اوى يا جابر ... انت زعلان منى فى حاجه
جابر / ربنا ما يجيب زعل تحب تدخل المضيفه تاخد واجب الضيف بما انك ضيف يعني و كدا و لا هتروح مع خالى مكان ما كنتوا رايحين
جوزيف / كنا رايحين نعمل بسبوسه ... بالقشطه ... مختار نسينا نجيب قشطه
مختار / حسبي الله و نعم الوكيل
جوزيف / ليه يا عم هنجيبها عادى مش حوار مكبر الموضوع ليه كدا
نجاه تدخل السرايا و هى بتحاول تدارى ضحكتها
جابر / شايف ان عيشتك ارتاحت و بقيت بتهتم بحاجات جديده كدا عليك
جوزيف / ملل بعيد عنك العيشه بعيد عنكوا ملل و بعدين يعني انا كنت لوحدى و عازب و وحداني طبيعي احاول اتعلم بس شوفتنى لما بحط دماغى فى حاجه بعملها ازاى و من اول مره مش بفضل اعيد و ازيد و اجرب و أحاول و افشل و كدا
جابر / برافو عليك ما دام لقيت نفسك فى حاجه استمر بس امانه عليك يا شيخ لما تعمل الحمام الكداب ابقي دوقنى اصلى بحبه
جوزيف / لا ما بحبش الكدابين
جوزيف يبتسم بسخافه و يروح ناحيه مختار جابر يدخل السرايا
.......................
فى شقه محمود
ام عبده / احلف بالسرعه دى
محمود / اقسم بالله زى ما بقولك كدا ياما الاسهم فى العالى و المكسب اللهم بارك
ام محمود / يبقي تسمع كلامى و تسحب الفلوس قبل ما الاسهم دى تنزل
ام عبده / حقه يا محمود
محمود / ما انا هسحبهم فعلا بس يومين تلاته كدا الاسهم لسه بتعلا و شكلها تمنها هيوصل للضعف
ام عبده / و الله يا ابنى انت طيب و ابن حلال و انا علاطول بدعيلك
ام محمود / واصله يا اختى واصله هو فى حاجه نفعاه الا بركه دعاكى دى ... عقبال ما تفرحيه بالبشاره
محمود / و انا ايه اللى هيفرحنى و لا هتفرق معايا فى ايه اصلا ياما انا اساسا الحوار ده مش على هوايا و انتوا عارفين
ام محمود/ عشان ولاد اخوك الله يرحمه
محمود / ايوه بس الحوار مش سالك دا صابر كل يومين ينطلى زى العمل الردى شكله كدا حد رساه على الدور
ام عبده/ قصدك ايه يا محمود
محمود / انا ما بقصدش حاجه مش وقته
ام عبده / لا و الله لا انت قايل
محمود / الموبايل يا حجه اسحبي منها الموبايل... ما حدش عارف بتكلم و لا بتقوله ايه
ام عبده / لا يا محمود ما تقولش
محمود / انا ما بقولش بس اسألي اى حد عن العربيه اللى راكنه على ناصيه شارعكوا... دا انا سمعت ان الكبير كلمه و رفض يمشي رجالته
ام عبده / دا انا هقطم رقبتها
محمود / بالهداوه ... العيب مش عليها ... احنا دورنا بس نحاجى على اللى مننا
ام عبده / يعني عاوزنى اعرف انها على علاقه بالحيوان اللى قتل عيالى و اسكت
ام محمود / قطع لسان اللى يقول على مرات ابنى كدا دى نسمه ست الكل
محمود / بصي ياما انا هقولك تعملى ايه و مش عاوزك تجودى حرف
.........................
فى اوضه احلام
احلام بتعيط و هند و خديجه و امها و امين حواليها
احلام / انا ما حدش حاسس بيا و لا فاهمنى
خديجه / انا مش فاهمه ايه الجمله اللى كلكوا طالعين لينا فيها فى المقدر دى ان كنتى انتى و لا نجاه
هند / انتى عملتى الصح
احلام / انا ما عملتش حاجه انا ما حدش إدانى فرصه اعمل حاجه
امين / ايه الكلام ده بقي ... على العموم الراجل لسه تحت
ام امين / اهدى انت و روح شوف وراك ايه ما تعطلش نفسك
امين / انا ما عنديش اهم من لولو حبيبتي ... ها يا قلب اخوكى امشي و لا استنى
احلام / امشي يا امين ما تعطلش نفسك انا كويسه
نجاه تدخل راسها
نجاه / اجى و لا اغور
احلام / تعالى يا بلوه
نجاه تروح تنط فى السرير جنب احلام و تحشر نفسها و يوسعولها و هى بتضحك
امين / تمام ... لو عوزتي حاجه رنيلى
احلام تهر راسها امين يمشي
نجاه / و انتوا كلكوا اتفضلوا يلا شوفوا وراكوا ايه ما تعطلوش نفسكوا انا قاعده معاها اهو
هند / نمشي يا لولو و لا نضربلك البت دى ... انتى عرفانى كونغ فو باندا فى نفسي جدا
نجاه / باندا ايه بجسمك اللى مش لايق مع سنك خالص ده
هند تضرب نجاه على كتفها و الكل بيضحك
هند / سنى يا عديمه الربايه يا جزمه دا انا هنفخك انتى و امك
خديجه/ و انا مالى
خديجه تضرب نجاه على الكتف التانى
خديجه / جيبالى الكلام جيبالى الكلام
نجاه / انا اقصد انك قمر و مزه و الله
هند / بعد ايه ... ها يا لولو امشي و لا اضربلك البت دى تانى ... حاسه انك زعلانه منها و عوزانى اضربها
نجاه / اهون عليكي يا لولو
احلام / اه تهونى عادى
هند تضرب نجاه تانى
هند / قولتلك قولتلك هى دى المشكله قولتلك
نجاه / طب اضربيني بس الاول قولولى انا عملت ايه حد يقولى بس انا غلطت فى ايه
احلام / بتدافعى عنه
هند / لا بقي يا احلام لا بقي فى دى لا بقي و الف لا بقي نجاه كانت بتدافع عنك انتى انتى ما تعرفيش ألوضوع صعب قد ايه
احلام / انا بكرهه
نجاه / و هو حد قالك حبيه ... بس ما تخليش مشاعرك تسيطر عليكي انتى اكبر من كدا
احلام / مش قادره اسامحه يا ناس مش قادره اقتنع بتوبته دى و لا قادره انسي وجعى بسببه
نجاه / سبيه لربنا يجيب لك حقك منه و صدقيني يا بنتى و الله ربنا عمره ما بينسي ابدا
ام احلام / و نعم بالله اسمعى كلامها يا احلام هى بتتكلم صح
نجاه / و ربنا انتى اللى فيهم
هند تضرب نجاه تانى
نجاه / بعد عمتى هند طبعا ... حرام بقي دراعى اتخدل مش كدا
هند تبوس راس نجاه
هند/ هروح اشوف الاكل قومى يا اختى منك ليها مش صيع احنا ورانا هم ما يتلم قومى ياما قومى
خديجه / انتى بتعامليني وحش اوى على فكره
هند / دا انتى قلبي يا خوخه قومى بقي انتى لزقتى
الكل يقوم و تفضل نجاه و احلام
نجاه / انا بحبك على فكره
احلام / و انا كمان بحبك بس زعلانه منك
نجاه / طب حقك عليا بس ممكن لو سمحتى تقوليلى انا نيلت ايه
احلام / كل حاجه فيكي غلط
نجاه / اروح اموت نفسي و لا ايه يعني ما اكيد فى حاجه اقدر اصلحها
احلام / ابعدى عن الخواجه خالص
نجاه / و انا مالى بيه
احلام / ما تستهبليش
نجاه / لا حول و لا قوه الا بالله اخص عليكي يا احلام بقي انتى اللى بتتكلمى
احلام / تيجي منى احسن من الغريب الغريب مش هيقول فى وشك
نجاه / طب انا عملت ايه غلط طيب
احلام تبص الناحيه التانيه
نجاه/ مش عارفه تردى صح انا ما عملتش حاجه غلط اصلا بس انتى مضايقه عشان جابر
احلام / اخويا على فكره
نجاه / و اخويا انا كمان
احلام / لا مش اخوكى
نجاه / و انا مش هتجوز عشان ارضيكى و لا ارضي اى حد انا مش عاوزه اتجوز
احلام / و انتى تطولى تتجوزى جابر اصلا
نجاه / يا ستي ما اطولش انا قليله و هو كتير عليا انا مش رافضه جابر انا رافضه الجواز كله انا حره فى حياتى و بعدين انتى غريبه جدا انتى بجد بتحاولى تضغطي عليا اتجوز اخوكى ... يا تتجوزى يا ازعل منك انتى ازاى بتفكرى كدا
احلام / عارفه انتى لو بعيد انا هقول حره انما انتى سحلاه وراكى فى كل حته مسيباه شغله و حياته و بتسرقي شبابه و عمره
نجاه/ انا ما طلبتش منه حاجه
احلام / صيعي عليا يا بت ... جابر انا مش عاوزه اتجوزك ... جابر تعال معايا مصر ... جابر انت زى اخويا ... جابر انت غالى اوى عندى و ما بقدرش على زعلك ... جابر انت مش محرم ليا و ما ينفعش نبقي لوحدنا ... جابر ممكن تخرجنى
نجاه / ايوه انا بعمل كل ده فين المشكله بقي انا ما قولتلوش انى بحبه انا قولتله انت زى اخويا ابن عمى و ضهرى و سندى و ما استحملش عليه الهوا... النسمه ما استحملهاش عليه و اقسم بالله بخاف عليه اكتر من روحى و لو ناموسه قرصته اتوجع بداله
احلام / ما ده حب يا غبيه
نجاه / ما انا عندى نفس الاحساس ناحيه كل الناس ابقي بحب كل الناس ايه ماشيه افرق حب ... طب يا ستي انا عندى طاقه عاطفيه مفرطه هتجوز كل دول ازاى اتعب اوى كدا
احلام / انتى قليله الادب
نجاه / ايوه انا قليله الأدب عاجبك و لا لا
احلام / مش طيقاكى
نجاه / بس بتحبيني
احلام / بتنيل اصلا العيب مش عليكي العيب على الطور اللى مسلمك سلبته
نجاه / سيد الرجاله كلها ... بكره لما نصيبه الحقيقي يجي هيتجوز ست ست ست ستى ... و هنلبس فساتين و هنرقص للصبح
احلام / اتنيلى انتى بتعرفي ترقصي
نجاه / هعجن ما لكيش دعوه ... بعرف اتشقلب هتشقلبله
احلام تضحك
نجاه / بقولك ايه ... ما تعلميني
احلام تبصلها
نجاه / هروح اجيب مهره قافله على نفسها من الصبح جهزى الطلعه على ما ارجع
احلام تتنهد نجاه تفتح الباب تلاقى جابر رايح ناحيه الاوضه تبتسمله و تمشي يناديها
جابر / نجاه
نجاه / ايوه يا جابر
جابر / كانوا بيدوروا عليكي مهره كلمت اهلها من موبايلك و ابوها و امها قفلوا السكه فى وشها و مروان غسلها
نجاه / هروح لها
جابر يهز راسه نجاه تمشي جابر يدخل الاوضه
جابر/ حبيبي اللى مزعلني راق و لا لسه قافش ... انا خلتنى الكبير و جيت لك
احلام / حقك عليا
احلام تقوم تروح تحضنه يطبطب عليها و يبوس راسها و يديها المفتاح تفرح بيه اوى يبوس راسها تانى
..............................
فى شارع عبد الهادى
ام عبده ماشيه تشوف عربيه رجاله صابر و عربيه رجاله الكبير الاتنين واقفين متابعين البيت تروح تخبط على شباك عربيه رجاله صابر راجل يفتح الباب و ينزل
الراجل / اؤمرى يا ست الكل اى خدمه
ام عبده/ ربنا ما يحوجنا ... فهمنى انت واقف كدا ليه
الراجل / احنا فى ملك الحكومه يا حجه لا انا واقف فى ارضك و لا تحت بيتك خير مالك
ام عبده / و هيجي منين الخير و انتوا لابدين لينا كدا ايه ما عادش فى فى البيت غير الولايه و العيال ناويين تخلصوا على مين تانى يا رجاله صابر القط
الراجل / لا حول و لا قوه الا بالله ... احنا جينا جنبك و لا كلمناكى يا حجه لزمته ايه الكلام ده ما يصحش كدا
ام عبده / اقسم بالله لو ما لميتوا بعضيكوا و غورتوا من هنا لاصوت و ألم عليكوا الخلق
الراجل / صوتى يا حجه و لمى الخلق و اطلبى الحكومه يا حجه لو حكمت لا انا و لا الرجاله دى هنتعتع من هنا و ان حصل و الحكومه جت و لا حتى الكبير بذاته جه مشانا مسافه الطريق و هيجي غيرنا و بعدين هنروح بعيد ليه ما رجاله الكبير قاعدين فى العربيه هناك اهم روحى استنجدى بيهم خليهم يجوا يمشونا
ام عبده/ دا انت مش فارق معاك حد و لا ليك كبير بقي
الراجل/ ليا و كبيرى هو اللى موقفنى هنا لو عندك مشكله معاه حلوها بعيد عنى
ام عبده / كدا ... طب اشرب بقي
ام عبده تروح تدخل البيت الراجل يتنهد و يركب تانى و يبص على العربيه التانيه فيهم واحد بيتكلم فى الفون
..........................