الكبيره ٢ بقلم / لولو_محمد

الحلقة ٧٢

((((((( الكبيره ٢)))))))
#لولو_محمد
الحلقه ٧٢
فى المستشفي عند جوزيف
جوزيف يبص فى اوضه السويتش
دياب / بتدور على حاجه ادور معاك
جوزيف/ بتاكد ان كل حاجه فى مكانها
دياب / كل حاجه فى مكانها مش شايف اى حاجه مش طبيعيه هنا و بعدين فى كاميره على باب السويتش متوصله بالسيستم عندنا يعني اى حد بيدخل هنا بيتبعت لينا صورته و الداتا بتاعته
جوزيف / و الميكروروبت وضعها ايه معاكوا الكاميرات بتاعتكوا بتبعت بيها نوتيفيكايشن و لا بيتم تجاهلها على اساس انها حشره و كدا
دياب يبص حواليه
جوزيف / مفيش حاجه هنا كلم منصور شوف كدا لسه فى لاج فى الكاميرات و لا اتصلحت ... غالبا اتصلحت
دياب يطلع الموبايل و يتصل و جوزيف بيتحرك فى المكان و بيدور
دياب / ايوه يا منصور اخبار الكاميرات ايه ؟ ... اتعدلت ... تمام سلام
جوزيف / استنى اسأله امتى اخر مره السويتش اتفتح و مين اللى دخل
دياب / منصور ... بقولك ... شوف فى الكاميره اللى قدام السويتش مين آخر حد فتح باب السويتش و امتى ... تمام مستنيك ... النهرده ؟! امتى ؟؟... انت متأكد ؟! ازاى يعني الكلام ده ... راجع الشريط كويس ... طب تمام اقفل دلوقت هكلمك بعدين
............................
جوزيف / خير
دياب / ما فيش حد دخل السويتش و مفيش حد لمس الباب اصلا
جوزيف / ابعتلى الفيديو اراجعه بنفسي بعدين ... خلينا نطلع نطمن على نجاه
دياب / يونس بقولك
جوزيف يبص لدياب
دياب / روح ارتاح هنحتاجك  بكره فايق
جوزيف يبتسم و يحط ايده على كتف دياب
جوزيف / انا مقدر انك بتجيبهالى بالادب بس لا
جوزيف يجي يمشي دياب يمسك ايده
دياب / ما هياش من باقي اهلك ما تخسرش الكل احسن لك
جوزيف / و لا انت من باقي اهلى
دياب / يكرم اصلك بس انت فاهم قصدى
جوزيف / لا الحقيقه مش فاهم فهمنى ... اقولك خليني انا اختصر عليك انت الوقت و افهمك انا ..  الوضع دلوقت ان فى فريقين كاملين كل واحد معاه اسلحه و معدات غير التانى و الاتنين مش عندك واحد منهم عاوز يقتل نجاه و التانى عاوز يخطفها يبقي احنا لو هنكون فى مكان هنكون فين
دياب / عند المداخل عشان نمنعهم يوصلوا ليها اصلا ... كل خطوه بيقربوا فيها منها بتزود خطورتهم و بتقلل فرصنا
جوزيف / هتاخد بالك امتى انهم دخلوا خلاص
دياب يتنهد
جوزيف / انا لو عاوز اعمل حاجه هعملها ... لا تصحيح انا لو كنت عاوز حاجه كنت عملتها تمام ؟! فهمت ؟!
دياب/ انا فهمت بس غيرى مش هيفهم ... و دى مش اى بنت و لا اى سمعه دى بنت الكبير يعني هيبه البلد بحالها ... تقصد بقي ما تقصدش نجاه مش زى باقي الحريم اللى فى الدنيا
جوزيف / متفقين فى النقطه دى
دياب / تمام امشي
جوزيف / تؤ هطلع اقف على باب اوضتها
جوزيف يسيب دياب و يطلع و دياب ماسك نفسه على الاخر
..........................
عند اوضه نجاه
عباده يدخل
عباده / ايه يا ابنى انت عليك ذنب ما تخليهم يجيبوا لك كرسي و لا اى حاجه تقعد انت مطبق من امبارح
جابر / انا تمام ما تقلقش عليا
عباده / مغاورى و فارس جوه صح
جابر / ايوه و شاهين راح يجيب حاجات من الكافتيريا فوق و زمانه نازل
عباده / احنا كدا هنقع كلنا لازم ناس تروح تنام انا هدخل افضل جنبها و انت خد الرجاله و روحوا
جابر يبتسم و يهز راسه لا
عباده / هخلى فارس و مغاورى معايا
جابر / عمى رجله وجعاه هيبقي حمل مش عون
عباده / وطى صوتك ليطلع يعبطك فى الفلكه انت بتتكلم عن مغاورى الجارحى دا لو لا قدر الله برجل واحده يجرى بلد قصاده
جابر / ربنا يديله الصحه و طوله العمر بس انا مش هتعتع من هنا
عباده / ما دى حدودك اصلا مش هتقدر تدخل بعد كدا تزنيبه على الفاضي يا ابنى
جابر / مش منقول
عباده / ياض انت بتكلم الكبير هنا قول حاضر يا كبير و اسمع الكلام
جابر / اعبطنى فى الفلكه بس مش متعتع
عباده يبتسم
عباده / و ربنا ما قادر لك وسع
عباده يدخل الاوضه يلاقي مغاورى واقف ساند على السرير و فارس بيعدل نجاه
فارس / تعال يابا فاقت اهى فاقت لسه فايقه حالا
عباده / الف مليون بركه حمد الله على السلامه يا ست العرايس ... اضرب يا ابنى الجرس خلى الدكتوره تيجي تبص عليها و تطمنا
نجاه / انا عاوزه الحمام ضرورى
عباده/ و ماله يا قلب ابوكى خليني اساعدك تعالى
نجاه تقوم و عباده يسندها
مغاورى / بالراحه لتدوخى و لا تقعى ما تدوسيش على روحك ... اسندها كويس يا عباده ... اجى اساعدك ... نادى الدكتوره يا ابنى واقف متنح ليه كدا
فارس / اه حاضر حاضر حالا
فارس يضرب الجرس
.....................
فى المستشفي عند مختار
مختار يدخل المسجد يلاقى شاكر ساجد يروح يقعد جنبه شاكر يقوم و يسلم
شاكر / طمنى
مختار/ مفيش جديد
شاكر يتنهد بحزن
مختار / باذن الله خير ما تفقدش الأمل بالسرعه دى
شاكر/ لو كان دخل لوحده ما كانش الباب قفل عليه
مختار / ما كانش هيعرف يفتح الصندوق و الباب كدا كدا كان هيتقفل مع أول واحد يوصل و يدخل ليه
شاكر / ما كانش هيبقي انا ... ما كانش هيتصاب بمسدس من ايدي
مختار / انت عملت اللى عليك و دلوقت لازم تفوق و تلم نفسك عشان تأمن رجوعه البلد هنا مش امان عليه و لا عليك ... انا كان ممكن اموت من شويه
شاكر يقوم يقعد على ركبه
شاكر / بتقول أيه يابا ايه اللى حصل
مختار / اللى حصل انهم حريم ما عرفوش يدخلولك المسجد فجولى انا بس ما تقلقش على ابوك يعني
مختار يضحك بسخريه و بعدين يتنهد
شاكر / و فايز بخير
مختار / الحمد لله بخير ... بس امه هتموت عليه و لازم يرجع لها لازم نتحرك اللى حصل معاك انت و صابر كان أقل حاجه حصلت نجاه كانت هتموت هى كمان و عمران اتصاب فى كتفه
شاكر / لا حول و لا قوه الا بالله ايه كل ده
مختار / لو لسه محتاج وقت عشان تفوق من اللى حصل هديك بس
شاكر / لا يابا انا تمام انا جاى معاك
شاكر يقوم و يمد ايده لمختار يقومه مختار يقوم و يطبطب على كف شاكر
مختار / ربنا ما يحرمنى منك و لا يوريني فيك حاجه وحشه
.......................
على باب اوضه نجاه
جوزيف قاعد على كرسي و جابر واقف و الاتنين سرحانين جابر يبص على جوزيف
جابر / هو انت مش المفروض تحاول تعرف مين اللى عمل الهجوم ده
جوزيف / تؤ منصور و دياب شغالين على الموضوع
جابر / و انت دورك ايه معلش
جوزيف/ احرق دمك و دى حاجه انا ما شاء الله عليا فيها مش مقصر
جابر يبتسم بسخريه جوزيف يبص له
جوزيف / تحب تقعد تريح رجلك شويه
جابر / لما بيكون الحصان داخل سبق و فيه حاجه بتوجعه مثلا بيشدوا اللجام جامد فى بقه فالحصان ما بيركزش فى الوجع البسيط اللى فيه و بيركز فى انه يخلص السباق بسرعه عشان يخلص من وجع اللجام فى بقه
جوزيف / هو بغض النظر ان فين حقوق الحيوان من اللى بيحصل ده ... انا حاسس انك بتحاول تقول حاجه بشكل عميق بس غرقت منك
جابر ما يقدرش يمسك نفسه و يضحك
جوزيف / كان ممكن اكون صديق مفيش منى بس انت اللى مصمم
جابر / على ايه ؟!
جوزيف / انت عارف
جابر / كان ممكن تلاقى اخ فى ضهرك يفديك بعمره بس الحقيقه انت اللى مصمم ... مصمم تستفزني
جوزيف/ مش هتحبك
جابر ياخد نفس عميق و يبص لجوزيف بابتسامه مستفزه
جابر / و عمرها ما هتكون ليك
جوزيف / بتتكلم بثقه مش ماشيه خالص مع ردود فعلك لما بتشوفها معايا
جابر / رد فعلى رد فعل طبيعي و كان هيكون نفس رد الفعل مع اى واحده من حريمنا
جوزيف / و انا مصدقك اصل للاسف مش هقدر اختبر صدق كلامك و اجرب
جابر / تشرب حاجه ؟
جوزيف / مش عارف ... ممكن مايه
جابر / تمام هاتلى معاك بقي
جوزيف يضحك و يقوم
جوزيف/ عنيا
جوزيف يمشي جابر يتنفس و يشد كرسي جوزيف و يقعد
............................
فى اوضه نجاه
نجاه / حاسه ان جسمي واجعنى بشكل مش طبيعي و اعصابى سايبه و مفيش ولا عضمه راكبه على التانيه
مغاورى / حقك دا انتى كنتى مركبه موتوسيكلات فى رجليكي ... اراهنك انك اتسلختى
الكل يضحك
نجاه / كارم عامل ايه ؟
عباده / زى القرد ما تقلقيش عليه اخوكى عصب مش هيقع بالسهوله دى
نجاه / اللهم بارك ربنا يحميه و ينجيه .. طب مفيش اخبار عن صابر
عباده يبص لمغاورى نجاه تتخض
نجاه / مات !!!!
عباده / لا لا لا بعد الشر بخير بإذن الله بخير بس ... هو حالته مش مستقره شويه
نجاه / لا حول و لا قوه الا بالله
عباده / خد رجاله يا فارس و اطلعوا على عمك مختار آمنوا الرجوع و قول ليونس يروح معاك
فارس / يونس ايه دا كمان
مغاورى / ما تجادلش ابوك ياض انت و قول امين
فارس / امرك يابا
فارس يطلع بره
نجاه / هى الطياره باظت خالص يا خالى ؟!
مغاورى / فداكى يا روح قلب خالك انا اصلا كنت ناوى اغيرها بحاجه احدث قدمت و خالك ما يركبش الا عالموضه
نجاه تبتسم
مغاورى / صحيح يونس لقي البدله فى الزباله و وداها الأمانات فى المستشفي البدله دى مهمه
عباده / متاكد ؟
مغاورى / يعني بعد كل اللى حصل ده و عندك شك انها اختراع يا كوتش
عباده / مش يمكن كانت وسيله تتبع و كانوا جايين مخصوص قاصدينها و بيجروا وراها يمين و شمال و مش عارفه تزوغ منهم فى عتمه الليل فى قلب الصحرا بسبب الجى بى اس اللى فيها
مغاورى / تفتكر ؟
عباده / ايه اللى وداه يدور فى الزباله لو ما كانش عارف انها هناك ... جى بى اس
مغاورى / انت بتشك فيه ؟
عباده / لما القصه تبقي سلامه نجاه بنتى ما بثقش فى جنس مخلوق
نجاه / لو كان موجود
عباده / ما كانش ... ما كانش موجود و من غير اى سبب ساب المكان اللى عمك حطه فيه و دى حاجه ما بنسامحش فيها
نجاه / دا لما يكون من رجالتك يابا انما يونس ليه دماغ لوحده
عباده / واحد جاى يحكى و يتحاكى انك فى خطر و ان امانك معاه يسيبك فى الجبل فى عز الليل و يمشي دا تسميه عادى
نجاه / شد مع كارم فانسحب قبل ما الدنيا
عباده / دا ده حوار تانى لوحده هنتحاسب عليه بعدين
نجاه / هو ما يقصدش كل ده ما تجوش عليه و تظلموه
مغاورى / استنى مختار يرجع و نعمل قعده و نتحاسب يا عباده
عباده / و مين بقي اللى هيقعد القاعده دى
مغاورى / كل اللى حضروا اليوم من أوله لاخره كل واحد يشهد بكلمه حق يتحاسب عليها قصاد ربنا و نسمع من الكل و نقرر انما اننا نحكم على القصه من روايه شخص واحد دا ظلم
نجاه / صح يا خالى
عباده / انتى مش هتقعدى معانا مش ناقص وجع دماغ
نجاه / تمام يابا حاضر
عباده/ شكرا
مغاورى / اهدى يا عباده
عباده / ما انا هادى اهو ... و لسه لما مختار يجي كمان ... مش فاهم الاتنين دول مسحورين و لا ايه حكايتهم مع الواد ده
عباده يبص لنجاه بصاله
عباده / هروح اطمن على اخوكى
عباده يسيب المكان و يمشي
مغاورى / ما تضايقيش نفسك هو ما يقصدش دياب كمان عندنا كدا زيك بالعكس دا دياب ناوى يكسب الجدع ده باى تمن و الحوار ده خلاف بينه و بين شاهين جامد اوى
نجاه / جديد الكلام ده
مغاورى/ اصله كلام لا بيودى و لا بيجيب فما لوش لازمه نعيد و نزيد فيه بس كل واحد بيقول اللى جواه و احنا بناكل او و احنا بنشرب الشاى ... دا ان لقينا لهم وقت اساسا
نجاه / ربنا يروق بالك يا خالى
مغاورى / قلب خالك من جوه
......................
فى اوضه كارم
جوزيف يدخل يلاقى كارم و عمران قاعدين
جوزيف / السلام عليكم عاملين ايه
كارم / بخير تعال اقعد
عمران / سمعنا انهم هاجموكم على الطريق
جوزيف / دى كانت حاجه بسيطه كدا ما تجيش حاجه جنب مغامرتكوا فى الصحاري و الجبال
عمران / كان ايه ده يا يونس
جوزيف يتنهد
جوزيف / فى حاجات اخطر من دى بكتير و بيتهيألي انك مش جاهل و لا مغيب انك تعرف ايه اللى بيحصل فى العالم
كارم / طب دول بدل و لا سايبورج و لا ايه بالظبط
جوزيف / لسه مش عارف بالظبط المفروض ان الجماعه عندكوا نظفوا الدنيا و خدوهم على المخازن بتاعتكوا يفحصوهم
عمران / قلبي مش مرتاح فى حاجه غلط
جوزيف / حاجه واحده بس !!!
عمران/ انا مش فى مود لهزار و رمى كلام انا رايح اطمن على نجاه
عمران يسيب المكان و يمشي جوزيف يقعد مكانه
كارم / ما تزعلش منه حصانه اللى بيحبه مات امبارح
جوزيف / كان هيليق اوى على امايا
كارم / مش وقت تهريج بالله عليك يا يونس
جوزيف / اصل هى برده قلبها حنين اوى كدا بس على الكلاب
كارم / هعيط من حنيه قلبها و الله
جوزيف يبص الناحيه التانيه و يرجع يبص له
جوزيف / اللى هجم على الجبل مش امايا دى حد تانى
كارم / و اللى رقد صابر بين الحيا و الموت امايا و اللى بعت الدرونز لجماعه ناصر امايا و اللى هجموا عليكوا على الطريق
جوزيف / مش امايا دى بقي انا متاكد منها امايا ما تجازفش بحياتي
كارم / و لا حتى من باب قرصه الودن بعد اللى انت عملته معاها
جوزيف / انت ما تعرفهاش قدى
كارم/ انا ما اعرفهاش خالص انا كنت اعرف بت بريئه كدا اسمها اميره و دى الله يرحمها صلينا عليها و دفناها ... مين البت دى صحيح
جوزيف / مش عاوز اتكلم فى الموضوع ده
كارم / بيقولوا ان الناس الكتير فى صلاه الجنازه بيشفعوا للميت تخيل دى كانت بلد كامله بتصلى عليها ... عملت ايه فى حياتها عشان تكون دى اخرتها ... و التانيه دى عملت ايه فى حياتها عشان تتحرم من خاتمه زى دى لحياتنا... هتعيش و تموت شبح ما حدش يعرفها و اللى يعرفها يا بيدعى يا بيحسبن عليها مفيش اسوء من كدا نهايه ... اللهم احفظنا
صمت و تبادل نظرات
كارم / بيقولوا البدله اللى انت جبتها انقذت حياتنا كلنا و اولنا نجاه ... و بيقولوا برده ان مش صدفه انك تجيب البدله فى نفس اليوم اللى يحصل فيه الهجوم
جوزيف / حتى انت يا كارم
كارم / انا بقولك اللى بيتقال
جوزيف يسرح ثوانى
كارم / هى الناس دى ما دام عندها التكنولوجيا دى كلها ما بتنهيش الموضوع ليه و تخلص بتماطل ليه ما يحقنونا كلنا بالبتاع اياه ده و يخلونا نخلص على بعض و لا ينزلوا علينا بجيش من الاوبتيموس برايم دول ... الناس دى ساكته ليه و لا مستنيه ايه 
جوزيف/ مفيش حد كان عارف انى طالب البدله لنجاه و لا حد كان عارف ان ... هم ما كانوش جايين لنجاه كانوا جايين للبدله
كارم / هم مين
جوزيف / انا المقصود مش نجاه و لا انتوا ... المرادى انا المقصود
كارم / انت بتكلم نفسك
جوزيف يبص لكارم جوزيف يمسك ايد كارم و يبص فى عنيه
جوزيف / لما هجموا كانوا عارفين اننا راكبين عربيه مصفحه اول ما نزلنا من العربيه العمليه انتهت ما كانوش عاوزين يقتلونا كانوا بيعطلونا كانوا بيعطلونى اوصل لنجاه ..  اوصل للى لابس البدله
كارم / ايوه هم مين بقي
جوزيف / ما انا اكيد مش هدفع الفلوس دى كلها فى اى حد ... بس برده مين
كارم / انا مخبوط فى دماغى مش ناقص دربكه
جوزيف / لو كانوا جايين ليكوا ما كانوش هيلاقوا فرصه زى دى انا و جابر و دياب فى عربيه واحده على السريع من غير حراسه الموضوع كان انتهى منصور ما كانش هيستحمل الصدمه لا هو و لا وفاء و بكدا الشركه تقع او على الاقل ترتبك و تفتح ثغرات للكل يدخل و يعمل ما بداله... نجاه من غير حمايه
كارم / و احنا روحنا فين يا عم
جوزيف / مين بعد جابر مرشح يبقي الكبير مين بينافسه
كارم/ ناصر اعتقد ممكن يكون احسن واحد عنده استعداد يشيلها ما حدش فينا بيسعى يبقي الكبير ... ما حدش عمره نافس جابر غير نجاه
جوزيف / بالظبط نجاه كانت هتبقي الكبيره و ساعتها
كارم / دا عمره ما كان هيحصل البلد كانت هتقوم عليها
جوزيف / بالظبط حرب اهليه و الحبايب هيدعموا نجاه بالرجاله و السلاح و يحكموا من وراها و خلصت الحرب ... دى كانت فرصه العمر بالنسبالهم و مش هتتكرر تانى ازاى يضيعوها
كارم / انا توهت منك تانى
جوزيف / عشان كان لازم نرجع ننقذ نجاه من غير نجاه خطتهم باظت
كارم / امال مين اللى كان بيحاول يقتلها من شويه
جوزيف / قولتلك مش هم و مش نجاه المقصوده انا
كارم / يونس يونس روح اتكلم فى الهبل ده مع ابويا و لا مع اى حد انا مش فايق لك ..  ما لو عاوزين يقتلوك ما كانوا قتلوك على الطريق
جوزيف / حياتى مهمه للمجلس انا لسه ما خلصتش مهمتى
كارم / هو انت لسه
جوزيف / ركز يا كارم ابوس ايدك ..  اه لسه ..  بالنسبالهم لسه طبعا و بالنسبالكوا انتوا كمان احنا متفقين من الاول
كارم / يعني ايه
جوزيف / انت فعلا مش مركز انا لازم اتكلم مع ابوك
جوزيف يجي يمشي كارم يقوم يمسكه
كارم/ يونس ... انت بجد لسه معاهم
جوزيف / انا اليوم اللى هيتاكدوا فيه انى ما عدتش معاهم هو اليوم اللى هموت فيه يا كارم مش هتقدروا تحمونى
كارم / ايوه بس كدا
جوزيف / فكر بعقلك مش بقلبك يا كارم الصوره ما لهاش وش واحد
جوزيف يمشي و كارم باين عليه انه مضايق
.......................
فى الشركه
منصور نايم على كنبه المكتب دياب يدخل منصور يتفزع
منصور / مين ؟! مين ؟!
دياب / حقك عليا حقك عليا اهدى ... قوم روح نام شويه ارتاح فى سريرك
منصور / لا لا انا ارتحت خلاص هقوم اكمل
دياب/ روح يا منصور ارتاح شويه انت مطبق من امبارح و يونس بيقول ان الفيلم لسه ليه جزء تانى
منصور / و انت مش هترتاح
دياب / هشوف كام حاجه كدا و هريح مكانك
منصور / مفيش اخبار عن صابر ؟!
دياب يبص لمنصور بحزن
منصور / عاوز اقول لنسمه
دياب / انت اتجننت و لا ايه لا طبعا
منصور / من حقهم يا دياب
دياب/ بانهى صفه لا هى مراته و لا حتى
منصور / هتروح لابنها... هتروح لابنها يا دياب و ما حدش هنا هيعرف اى حاجه
دياب يبص لمنصور
منصور/ دى اخر فرصه يا دياب ما حدش عارف الساعه الجايه هيجرا فيها ايه و ضاع من عمرهم سنين بعاد عن بعض ... يمكن لما تعرف هو عمل ايه عشانها ... تسامحه ... او تعرف الحقيقه انه بريئ ... هتعرف انه لسه بيحبها و شاريها
دياب / احنا ما لناش دعوه بالموضوع ده لو الكبار
منصور / سمعنا كلام الكبار مره و النتيجه اهى
دياب / يعني هنتمرد عليهم و لا ايه
منصور / لا بس احنا لينا عقل و قلب يا دياب و لو احنا مكانه فى لحظه زى دى اكيد صوتها لوحده ممكن يفرق هيخلينا نتمسك بالدنيا يا جدع
دياب / انت عبيط يا ابنى ما فيش حاجه بتغير القدر ايه هتطول فى عمره يعني
منصور / لا هيموت فى الساعه اللى مكتوباله بس انا بتكلم فى نقطه تانيه خالص انت فاهمها كويس ... هم محتاجين بعض يا دياب
دياب / و بعدين يا منصور راحت له و بعدين
منصور / ما اعرفش بس لو انا مكانه
دياب / الف مليون بعد الشر عنك
منصور/ انت عاوز اذن الكبار ... انا هكلم الكبير و اخد منه الاذن ارتحت كدا
دياب يبص لمنصور و يهز راسه منصور يطلع الموبايل و يتصل
...........................
فى اوضه نجاه
نجاه قدامها طبق اكل بتاكل بنهم عباده بيتكلم فى التليفون جنب الشباك
عباده/ تمام ... سلام
عباده يحط الموبايل فى جيبه
عباده / بالراحه لتزورى
نجاه / انا عمرى ما جوعت بالشكل ده
مغاورى / الف هنا مطرح ما يسري يمرى
نجاه / حد يحب ياكل معايا
عباده يبتسم و يبوس راسها الباب يخبط نجاه تعدل الطرحه على دماغها عباده يروح يفتح الباب جوزيف
جوزيف / ممكن ادخل ؟!
عباده / خير ؟!
جوزيف / جاى اطمن على نجاه
عباده / بخير تسلم  .. الرجاله هيرجعوا لمختار لو تحب تروح معاهم
جوزيف / انا شايف ان وجودى هنا احسن
عباده يطلع بره و يقفل الباب وراه
عباده / لمين بالظبط
جوزيف / للكل
عباده يبتسم بسخريه
جوزيف / انا عاوز افحص الآلات اللى اخدتوها من الصحره و استجوب الرجاله اللى اتمسكوا
عباده / و ماله خلى شاهين يوديك
جوزيف /  شاهين !!
عباده / الرجاله يا بتريح يا مشغوله و انا زى ما انت شايف واقف بطولى انا و عمك مغاورى نحرس نجاه ما حدش فاضي غيره دلوقت
جوزيف / و هو انا اعترضت دا حتى شاهين حبيبي ... عن اذنك
عباده يبتسم جوزيف يمشي و عباده يدخل
عباده / انتى كويسه اروحك ؟
نجاه / انا كنت فاكره ان الدكتور عاوزنى افضل هنا تحت الملاحظه
مغاورى / فى حاجه و لا ايه ؟
عباده يهز راسه لا و يروح يقف جنب الشباك
مغاورى / عباده !!
عباده/ قوم اقعد على الكرسي يا ابو شاهين خليني افرد طولى و اغفل ساعه
مغاورى / تمام
نجاه / تعال مكانى
عباده يشاور لها و يروح يسند مغاورى للكرسي و يفرد ضهره و يغطى وشه بايده نجاه تبص للطبق قدامها تزق ترابيزه الأكل و تفرد ضهرها و هى مضايقه
.........................
فى سرايا الزنايته
منصور / ما اعتقدش انك تجيبي معاكى بدر فكره كويسه
نسمه / هو انا لازم اختار بين عيالي !!
منصور / تمام هاتيه
نسمه / هو مش الباشمهندس مختار قال انه هيجي مع فايز
منصور يبص الناحيه التانيه
نسمه / ابوس ايدك قولى الحقيقه كامله ... أنا مش حمل صدمات تانى انا تعبت ... ابنى فيه حاجه
منصور / فايز زى الفل اقسم بالله ... فايز اتحط فى صندوق و كان هيغرق و الطريقه الوحيده انه يخرج من الصندوق ده كان ان يا شاكر يا صابر يموت
نسمه تتصدم و تتخشب
منصور / و الاتنين بصراحه ما كانش عندهم مانع يموتوا عشان ابنك و كل واحد فيهم كان بيتسابق انه يموت نفسه عشان فايز و التانى منهم يعيش و خرجت طلقه بالغلط فى صابر
نسمه تغمض عنيها و تبص فى الارض
منصور / هو لسه ما ماتش
نسمه تبص له
منصور / بس مش عايش  ... ما حدش عارف كلنا بندعى ان ربنا ينجيه و يفوق بس ... الدكاتره هناك قالوا ان الحاله هتتحدد فى خلال التمانيه و أربعين ساعه من وقت خروجه من العمليات ... ما حدش هيعرف انك رايحه لصابر انتى رايحه لابنك
نسمه تهز راسها 
منصور / مش صابر اللى قتل عبد الهادى و لا كان له اى علاقه بخطف اى واحد من ولادك و لا عمره فكر ياذيكي
نسمه تبص الناحيه التانيه و ما تقدرش تكتم دموعها
منصور / انا عارف انك لسه فى عده المرحوم و عارف ان كل ده ما ينفعش بس ... يمكن ما يبقاش فى فرصه تانيه ... يمكن لما يسمع صوتك الروح ترد فيه و يتمسك بالدنيا يمكن لما تعرفى الحقيقه و أنه كان هيموت عشان خاطر ابنك تتاكدى انه مظلوم
نسمه / هجيب بدر و اجى معاك
نسمه تمسح وشها و تروح ناحيه المضيفه هند تروح لمنصور
هند / فى ايه يا منصور
منصور / مفيش حاجه يا عمتى مش هنعرف نجيب فايز و هى مستعجله
هند / ما تكدبش عليا فى ايه
منصور / اقسم بالله زى ما بقولك يا عمتى هتروح لابنها
هند / بس مختار قال انه جاى
منصور/ عمى مختار و شاكر زى الفل دا كل اللى اعرفه
هند / امال مش هيرجعوا ليه
منصور / دواعى امنيه
عند / و ست دواعى دى هتخليكوا تركبوا نسمه و ابنها الطريق رايح بدل ما يجوا هم فى الراجع
منصور / انا مطبق من امبارح و مش قادر لا أسأل و لا اجاوب اعمل كذا يا منصور حاضر
هند / معاك حق ... و حقك عليا انا مش بقررك انا بطمن بس
منصور / اطمنى يا عمتى كلنا بخير الحمد لله
هند تهز راسها نسمه تطلع من المضيفه شايله بدر نايم على كتفها منصور يفتح ليها العربيه تركب يقفل الباب
هند / خد بالك منهم
منصور / فى عنيا
منصور يركب و يسوق
.......................
فى المستشفي عند نجاه
ممرضه تدخل معاها كرسي بعجل
الممرضه / السلام عليكم ... عاوزين الست نجاه فى اوضه الاشعه تحت
عباده / خير
الممرضه / و الله ما اعرف يا كبير طالع لى على السيستم ان دورها جه فى اوضه الاشعه فانا هنزلها
عباده / بس ما حدش قال لينا ان نجاه هتعمل اشعه و لا اى حاجه
الممرضه تطلع تابلت و تورى لعباده
نجاه / انا اقدر امشي على فكره مش محتاجه لكرسي
مغاورى / ارتاحى احسن بدل ما تدوخى و لا تقعى فى الاسانسير اقعدى لحد ما تعملى الاشعه و نطمن عليكي
عباده / انا هكلم الدكتوره اتأكد ما قالتش ان ليها اى علاج أو حتى اشعه
مغاورى / ما تنزل معاها و ما تعطلش البنيه هى جيالك من المريخ ما انت عارفها و ورتك البتاع انزل معاها و ما تعطلش الناس اكيد فى ناس غير نجاه مستنيه دورها
عباده يبص للممرضه
الممرضه / و الله يا كبير ما اعرف اى حاجه انا شغلى كله معتمد على التاب ده بيجيب لى اشعار لو اى مريض ليه علاج بروح اديله له اشعه بروح اوصله له متابعه من اى نوع بروح اعملها اكتر من كدا ما اعرفش بس اللى بيقدر يدخل الحاجات دى الدكتور بتاع الحاله بس يعني دكتور أنور مثلا ما يقدرش يعدل فى ملف او مواعيد علاج حاله لدكتور ممتاز و كدا يعني
عباده/ عارف يا بنتى ... قومى يا نجاه تعالى
نجاه تقوم تروح تقعد على الكرسي و هى متاففه
نجاه / رجعت للكرسي بعجل تانى
الممرضه / ربنا ما يكتبه عليكي تانى دا بس إجراء احترازى
نجاه تهز راسها الممرضه تزق الكرسي و عباده يروح معاهم
.........................