الكبيره ٢ بقلم / لولو_محمد

الحلقه ٧٦

((((((( الكبيره ٢ )))))))
#لولو_محمد
الحلقه ٧٦
نجاه / مهره زعلانه
عمران يبص لها و يبص الناحيه التانيه
نجاه / ليها حق... عرفت كمان ان اهل العروسه الجديده كمان زعلانين لنفس السبب و ان العروسه هى اللى ضغطت عليها يكملوا الحكايه
عمران / و بعدين
نجاه / هو ايه اللى و بعدين ما اعرفش ما تسأل اخوك
عمران / و اسأل ليه ... و بعدين انتى نفسك من امتى ليكى فى اللت ده كله
نجاه / العيب على اللى يديك وش
نجاه تيجي تمشي عمران يلحقها
عمران / يا ستى حقك عليا ما اقصدش بس انا فعلا مش فى المود خالص ..  كنتى بتقولى ان مهره زعلانه ... كلمتنى و بتلومنى اننا خبينا عليها ... و بتقول هتمشي
نجاه / بكره هترجع مصر
عمران يهز راسه
نجاه / هو انت بجد مش مهتم
عمران / هو انتى صدقتى انها مراتى بجد ؟! هى حره تعمل اللى هى عوزاه
نجاه / بس هى ممكن تتاذى
عمران/ هى مش صغيره و دى حياتها تمشيها زى ما هى عاوزه و فى جميع الأحوال احنا كلنا هنكون حواليها يعني لو احتاجت حاجه اكيد مش هنتاخر
نجاه / بانهى صفه
....................
عمران / من غير صفه ... مش لازم يبقي فى صفه لو حد غريب فى الشارع قابلك و طلب مساعده هتديله ضهرك يعني
نجاه / مش عوزاها تمشي
عمران / اقدر اعمل ايه انا فى الموضوع ده
نجاه تبص له بغضب
عمران / انا كمان مش عاوزها تمشي تمام بس ما باليد حيله انا ما ليش كلمه عليها عشان للمره المليون انا ... مش جوزها
نجاه / طب بالراحه مالك
عمران / ما ليش زى ما انتى شايفه الحياه جميله و السما صافيه و الكل بيغنى و يرقص تقوليش فى فرح بجد
نجاه تسند على سور المركب و تضحك
نجاه / ما احنا فى فرح فعلا احنا بس اللى شايلين الهم بزياده
عمران / بت انتى حد ساقيكي حاجه ؟!!
نجاه / فى عصير رمان ايه ... حكايه
عمران يضحك و يلف يبص على المايه
نجاه / انا هروح ابص على باقي الناس و اتأكد أن ما حدش ناقصه حاجه
عمران يهز راسه و ياكل من الطبق يلمح حركه فى المايه يحط الطبق و يركز مفيش اى حاجه فى المايه يفضل يبص يمين و شمال فى المايه و يستغرب و يروح ناحيه مختار واقف بيسقف وسط الناس و يوشوشه
مختار / ايوه شوفت ايه يعني ؟!
عمران / مش عارف
مختار / تمام هشوف
مختار يروح يبص خديجه تاخد بالها
خديجه/ هو فى حاجه وقعت من مختار و عمران و لا ايه
عباده/ ليه
خديجه تشاور له يلاقيهم عمالين يتحركوا على طرف المركب و بيبصوا فى المايه كانهم فعلا بيدوروا على حاجه
عباده / هروح اشوف فى ايه
عباده يروح يبص
عباده / فى حاجه و لا ايه
مختار / مفيش اى حاجه ما تاخدش فى بالك
عمران / لا فى انا متاكد ان كان فى حد عايم تحت المركب انا شوفته
عباده يبص فجاه المركب تتهز جامد كان فى انفجار فى القاع و الكل يصرخ عباده يتقلب مختار و عمران يحاولوا يمسكوه مع الهزه يقعوا هم التلاته فى المايه و الكل بيصرخ و يجروا على طرف المركب يبصوا ما يلاقوهمش الرجاله تقلع اللايف جاكت و تنط وراهم
………………………………
فى المستشفي عند صابر
نسمه قاعده مع عويس فى الكافتيريا و منصور قاعد على ترابيزه تانيه و متابعهم
عويس / كان المفروض تقوليلى
نسمه / ليه
عويس / عشان انا ابوكى
نسمه/ عبد الهادى الله يرحمه ما كانش فيه عيب بس فكرنى كدا يابا انا اتجوزته ازاى ... مش كانت نفس الحبسه و التربيطه و نفس الجوع برده
عويس / اديكي قولتيها عبد الهادى ما كانش فيه عيب و عشتى معاه معززه مكرمه اكله شاربه نايمه مكسيه مدلعه ما فيش مخلوق كان يقدر يدوس لك على طرف و اتحداكى ان حصل بينكوا مره فى يوم مشكله و لا حتى جه عليكي
نسمه / و ان كان حصل كنت هشتكيلك يعني
عويس يتخض
نسمه / انا اتجوزت عبده عشان اهرب من بيتك مهما عمل ما كنتش هرجع
عويس/ انتى بنت قليله الأدب ناكره للجميل
نسمه/ و دلوقت كمان لما عبده مات مش قادره اتحامى فيك لأنك هتبيعنى تانى
عويس يضرب نسمه بالقلم منصور يقوم يقف نسمه تبص له يقعد و الكل بيبص عليها نسمه تبص لابوها
نسمه / انا اسفه بس هو مش حضرتك برده عاوز تجوزنى فى عدتى لفيراس
عويس / عشان حماتك الدون الله يرحمها مطرح ما راحت كانت حاطه ايدها على ارضك و ارض عيالك و مسلماها لاخو جوزها الواطى يسرقها و ما كانش قدامى حل تانى ... انتى مطمع و الناس ما بترحمش
نسمه / و انت مش هتقدر تحمينى من الناس و فيراس اللى هيقدر مش كدا
عويس / انتى عمرك ما هتفهمى
نسمه / اصل انا غبيه ما بفهمش
عويس / لا ما بتحسيش مش عارفه يعنى ايه اب
نسمه / بس عارفه يعني ايه ام و عارفه ازاى احمى ولادى و أرضهم
عويس / بأنك تصغرى ابوكى قصاد الخلق
نسمه / ما حضرتك ما كبرتنيش
عويس/ يادى الردود المستفزه العبيطة بتاعتك  ... ماشي بلاها فراس ارجعى البلد معايا بالعيال عيشي فى بيت ابوكى
نسمه / فى بيتي
عويس / لوحدك من غير راجل !! انتى عاوزه الناس تاكل وشي
نسمه / عبده الله يرحمه كان بيسافر و يرجع كنت ببات لوحدى بالعيال و حماتى الله يرحمها كانت بتشأر عليا
عويس / وقتها جوزك كان عايش دلوقت
نسمه / ما فيش حاجه اتغيرت
عويس / و لا حتى اللى راقد فى العنايه جوه
نسمه / راقد جوه عشان كان بينجد ابنى و تصدق ما تصدقش لسه ناجدنى انا شخصيا
عويس / نجدك شخصيا !!!
نسمه تبتسم و تبص فى الارض
عويس / الجدع ده ابن موته
نسمه / انا مش هتجوزه ... هو واحد زيه ايه اللى هيخليه يتجوز واحده بعيلين اصلا
عويس / انه بيحبك مثلا امال ليه ما اتجوزش لحد دلوقت
نسمه / بيحبنى ؟!! بيحب واحده وقفت قدام الكل و طلعته كداب ... بيحب واحده باعته و اتجوزت غيره واحده ضيعت مستقبله... صابر كان هيبقي معيد فى كليه الطب يابا صابر مستقبله ضاع بسببي ..  بسببي انا
عويس / و هو ابن الجبل كان هيسيب عز الجبل و يروح يدرس للعيال فى الجامعه برده
نسمه / ما علينا منه ربنا يقومه بالسلامه مش هو موضوعنا
عويس / هو موضوعنا
نسمه / انت بتكرهنى كدا ليه انا تعبانه و الهم راكبنى ما تزودش همى بهم مش همى انا ما ليش دعوه بصابر
عويس / بكرهك ؟!
نسمه / ابوس ايدك يابا مش قادره اجادل دلوقت خالص فى اى حاجه
عويس / تمام عيشي فى بيتك بس امك و اخواتك هيبدلوا فى البيات معاكى
نسمه / ينوروا بيتهم و مطرحهم و لو عاوزين كلكوا تيجوا تعيشوا معايا اهلا و سهلا تنوروا بس للعلم بس ... دا بيتي انا و عيالى و اى حد هينورنى هيجي ضيف يتكرم و ياخد وجبه تالت و متلت
عويس / قصدك ايه بالكلام ده
نسمه / كلامى واضح يابا
عويس / لا مش فاهم
نسمه / يعني اهلا و سهلا بيكوا بس انا هعيش و اربى عيالي زى ما كنت عايشه مع عبد الهادى  الله يرحمه أصحى وقت ما احب اطبخ اللى احبه و اللبس اللى احبه و اعمل اللى احبه و اربى عيالى زى ما احب اخرجهم وقت ما احب و المكان اللى يحبوه و اشترى اللى احبه و اكل اللى احبه ... اعيش و اتنفس
عويس / و ماله حقك و انا يعني هكره انك تعيشي و تتنعمى فى عز جوزك وسط عيالك ... ابدا ... بس يكون فى علمك اعملى ما بدالك و حبى ما بدالك بس يمين بالله اتحاسب عليه قدام ربنا لو فكرتى بس فكرتى فى يوم يكون فى بينك و بين ابن الجبل كلام حتى بس مجرد كلام لدفن عيالك فى حضنك تحت الارض عايشين و ما ابكيش عليكوا دمعه
نسمه / تعملها يابا … اتفقنا ... اتفقنا
عويس / قومى روحى معايا
نسمه / هرجع مع الجثمان لما ياذنوا بالخروج
عويس / الجثمان هيرجع مع الرجاله انتى و عيالك هترجعوا معايا دلوقت ما عندناش حريم تبات بره بيتها فاهمه و لا ايه
نسمه تهز راسها عويس و نسمه يقوموا و يجوا يمشوا منصور يقف قدام عويس
منصور / خير يا حج على فين كدا
عويس / هاخد ام بدر و العيال و اروحهم و ارجع اقف مع الرجاله
منصور / ما انصحكش الصراحه عيال بنتك عليهم  العين و زى ما شوفت اتخطفوا مرتين و ابوهم اتقتل و ما نعرفش لحد دلوقت مين اللى عمل كدا
عويس / الكلام ده يخيل عليكوا بس اللى عمل كل ده نايم جوه و عامل فيها منصاب عشان يبعد عنه العين و الكلام اللى كتر الفتره اللى فاتت
منصور / اتقى الله يا حج دا الظلم ظلومات
عويس/ و انا ما حدش ظلمنى قده
منصور / يا حج ... طب اصبر اما الدنيا تهدى و هنوصلك لحد باب بيتك
عويس / و انا مش هعرف احمى بنتى و لا ايه
منصور يبص لنسمه باصه فى الارض
منصور / تمام يا حج تمام ثوانى اكلم جابر يجيب لحضرتك العيال من المسجد
عويس يمشى و نسمه وراه و منصور بيتكلم فى التليفون
…………………….
فى المركب
الكل مترصص على سور المركب بيحاولوا يشوفوا اى حاجه مفيش و اللى بيقب بيتشد تانى لتحت و فى فى القاع معركه بين بنات لابسين بدل غطس و على ضهورهم تانكات اوكسجين و الرجاله بيحاولوا يساعدوا بعض يطلعوا ياخدوا نفس و البنات بتشدهم تانى و يحاولوا يغرقوهم رجاله اكتر ينطوا من باقي المراكب و عدد الرجاله يبقي اكتر كتير من البنات جزء من البنات يهرب بعيد و الجزء التانى يتسمك من الرجاله عباده يشاور ليهم سيبوهم و اطلعوا باقي البنات تهرب و الرجاله تطلع كلها و يساعدوا بعض يطلعوا على المراكب الصغيره مش قادرين ياخدوا نفسهم و الناس على المركب الكبير مش فاهمين حاجه و عمالين يتكلموا
.....................
فى شقه عبد العزيز 
نور تدخل و وراها اهلها
ام نور / نور
نور تبص لها
ام نور / خبطنا فى صخره فى نص النيل زى التايتانيك خربت المركب و الرجاله رموا روحهم فى نص النيل و هم ما بيعرفوش يعوموا كويس ؟!!
نور / مش فاهمه
ام نور / لا فاهمه بس بتستهبلى
عبد العزيز / الرجاله اعتذرت و اليوم عدى على خير و روحنا كملنا السهره فى بيتهم و ضايفونا و كرمونا احسن كرم
نور / شكرا
ام نور / بتشكريه على ايه
نور / يا ماما لو كان فى حاجه حصلت غير اللى قالوه كانوا رقصوا كدا و هيصوا بالشكل ده
ام نور/ دى حياتهم و واخدين عليها يا بنتى ... دا انا سمعت ان اخو جوزك اللى كان رابط دراعه ده و طلع رقص بالحصان بأيد واحده لسه امبارح واخد طلقه فى كتفه و النهرده كان هيغرق و بعدها بساعتين كان بيرقص و لا الفرقع لوز هو فى كدا
نور / كلمه السر مورفين ... مسكن قوى و بعدين هم صعايده ... رجاله بجد
اخو نور / انا بصراحه شايفهم ناس زى الفل والفايبس كانت حلوه جدا و كلنا استمتعنا
ام نور /  ادخل أنت اوضتك لم حاجتك
اخت نور / ليه مش لسه بكره هنروح الاسطبل
ام نور / ادخلوا اوضتكوا قولت
الولد و البنت يدخلوا الاوضه
نور / ادخل انا كمان و لا عاوزه تقنعيني اسيب ناصر
ام نور / انا خايفه عليكي
نور / انا عوزاه انا بحبه مش عاوزينه مش هقدر اقول ليكوا لا لانكوا اهلى بس مش هكون لغيره القرار قراركوا بس انا رأيي قولته ما تحاولوش تغيروه لانه مش هيتغير
ام نور / يا بنتى انا خايفه عليكي
نور/ اللى حضرتك شيفاه صح اعمليه ... عن اذنكوا ادخل اغير هدومي
نور تدخل الاوضه
ام نور / عاجبك الكلام ده
عبد العزيز / ردت عليكي و قالت اعملى اللى شيفاه صح
ام نور / و ايه هو الصح
عبد العزيز / مش عارف
ام نور / امال مين يعرف ... دا انت ابوها
عبد العزيز / و دا ما يدينيش الحق انى اتعسها لمجرد انى خايف
ام نور / مجرد !!! انت كنت هتموت امبارح
عبد العزيز / هى عوزاه و هو مش وحش و مش هنلاقي ربعه حتى و دى حقيقه الجماعه شاريين البنت و طالعين بيها السما
ام نور / و هم هيلاقوا زيها اصلا
عبد العزيز يضحك باستهزاء
ام نور / عبده !!!
عبد العزيز / هى قالت يا هو يا ما فيش تمام هو
ام نور / دى عيله و مش عارفه مصلحتها
عبد العزيز / بنتك دكتوره مش عيله و بعدين لو عيله هتستنى منها تفتح بيت ازاى يا ست الكل ... نور كبيره كفايا انها تاخد قرارات حياتها و اى كانت انا هدعمها فيها
ام نور / انا هتنقط
عبد العزيز / احنا هنشيل هم حاجه ما حصلتش ... الناس كانوا بيرقصوا و فرحانين و وصلونا لحد هنا و روحوا ناموا من تعبهم فى الرقص و التنطيط و احنا قاعدين نهرى و ننكت انهم كانوا ممكن يموتوا... الناس دى اخرها تعوم فى الترعه عوم كلابى مش ابطال اولمبيين فى السباحه
ام نور / انت صدقتهم يعني
عبد العزيز / يعني الست كانت هتخسر جوزها و عيالها مقتولين و هتقوم ترقص عادى
ام نور / عشان تنحه
عبد العزيز / لا عشان سلام قدامها و ما فيهمش حاجه هتضيع يومها فى هبل اللى كان ممكن يحصل و ما حصلش الحمد لله ليه
ام نور / مفيش فايده يعني
عبد العزيز / اى كان قرار نور انا معاها
ام نور / هتسامح نفسك لو جرالها حاجه
عبد العزيز يسكت و يبص لمراته
عبد العزيز/ قل لن يصيبنا إلا ما كتب الله لنا
ام نور / غسلوا دماغك زى ما غسلوا دماغها
عبد العزيز / يا وليه دا كلام ربنا
ام نور / و نعم بالله بس انا مش قادره
عبد العزيز / صلى استخاره تانى و اللى ربنا عاوزه هيكون
ام نور / خش نام يا عبده خش
عبد العزيز / تصبحى على خير
.....................
فى اوضه عباده
عباده قاعد على كرسي الباب يخبط
عباده / ادخل
نجاه تفتح الباب و تدخل
نجاه / حضرتك عامل ايه دلوقت ؟! احسن بإذن الله ؟!!
عباده / كويس الحمد لله
نجاه / هو ايه اللى حصل ما حدش بيقول حاجه غير اللى اتقال قدام الجماعه بس الجماعه مشيو و برده ما حدش راضي يقول حاجه
عباده / هيفرق معاكى فى ايه
نجاه / يفرق انه مش طبيعي حضرتك كنت لابس لايف جاكت دا غير انك سباح ممتاز و عمى مختار كمان و بعدين صخره ايه اللى فى وسط النيل دى دا المراكب رايحه جايه ليل نهار زى الفل هو انا هبله ؟!
عباده/ و ما دام ما انتش هبله مش فاهمه يعني ايه اللى حصل ؟!
نجاه / فاهمه انه كان هجوم بس عاوزه تفاصيل
عباده / وقعت لقيت كوم بنات لابسين غطس و تنكات بيشدونى لتحت و طبعا اول حاجه عملوها قطعوا الايف جاكت بسكينه بس ما قتلونيش مع انهم كانوا كتير بس كانوا عاوزينا نموت غرقانين
نجاه / و ما قدرتوش تمسكوا منهم و لا واحده
عباده / ماسكين من المستشفي بس دول ما كانش ينفع هنطلع بيهم ازاى كان لازم نسيبهم و لو كنا قتلناهم كانت جثثهم طافت و اتفضحنا برده هنعمل ايه
نجاه / بس اللى حصل امبارح و النهرده ما يتسكتش عليه لازم نرد
عباده / معاكى حق بس ازاى
نجاه / ما اعرفش
عباده / هتطلعى معلومه من حرمه ازاى واحده مش فارق معاها اى حاجه و عارفه ان لا أخلاقك و لا دينك هيسمح لك تعملى معاها حاجه
نجاه / لا طبعا الكلام ده لما تبقي فى حالها انما واحده بتهدد حياتى ما لهاش عندى ديه
عباده / تمام بكره تروحى تطلعى انتى منهم المعلومه عشان الرجاله اللى عندنا مش هيسلكوا معاهم
نجاه / تمام
عباده/ انتى بقي طمنيني عليكي ... كويسه؟!
نجاه / الحمد لله تمام ... خير؟!
عباده/ وسط كل اللى بيحصل اكيد هقلق عليكي انتى... هو انا عندى اغلى منك
نجاه / انا عاوزه اقولك حاجه
عباده / يونس ؟!!
نجاه / مش هو اللى ورا كل اللى بيحصل ... يونس كان بيحاول يحذك من حاجه
عباده / و اديني ما سمعتش و حصل اللى حصل وعدى بفضل الله على خير خلصنا
نجاه / يابا اسمعنى
عباده / خلصنا يا نجاه... ما لوش مكان بينا
نجاه / ماشي بس
عباده / نجاه انتى فى حاجه معينه عاوزه تقوليها ؟!
نجاه/ ما هو كان بيحاول يقولى و انا ما سمعتوش قولت ما ينفعش من وراك و خليته يناديك كان بيحاول يحذرنى
عباده / لا انا اقصد حاجه تانيه ... حاجه تخصك انتى
نجاه / مش فاهمه
عباده/ تمام روحى ارتاحى احنا تعبنا اوى اليومين دول
نجاه / لا بجد مش فاهمه
خديجه تدخل فى ايدها كبايه ينسون
خديجه / جبت لك شويه ينسون بقي غلاوه ايدي ... ازيك يا نوجه
عباده / تسلم ايدك هاتى ... الله!!! و الله مهما الواحد جرب ما هيلاقي يانسون اطعم من اللى بتعمليه ... تدوقى يا نجاه
نجاه / الف هنا يابا ... عن اذنكوا
نجاه تقوم و تطلع بره و تقفل الباب و هى مش طايقه نفسها تروح اوضتها تلاقي مهره قاعده اول ما تشوفها تقف
مهره / كنتى فين مستنياكى من الصبح بيتهيألي انى كدا عملت اللى عليا و نفذت اتفاقى و اقدر ارجع مصر بكره
نجاه / اعملى اللى يريحك انا اصلا جايبه جاز و لا فيا نفس ادادى و لا احايل
مهره / تمام
نجاه / انتى متاكده ان ده اللى انتى عاوزه تعمليه فعلا
مهره / انتى يعني فكرانى هبله و هصدق اللى حصل على المركب انتوا بتكدبوا على الناس عيني عينك و فاكرين انكوا ملايكه انتوا ما تفرقوش اى حاجه عن اهلى
نجاه / بجد !!
مهره / البنت الغلبانه اللى ابن عمك بيكدب على أهلها دى
نجاه / نور و أهلها عارفين كل حاجه ما تشغليش بالك بيهم بس انا ما كنتش متخيله ان بعد كل اللى عملناه معاكى هتشوفينا وحشين اوى كدا
مهره / انا الدنيا دى علمتنى درس مهم اوى ... الشياطين ما بيبقاش طالع ليهم قرون ... عادى بيبقوا لذاذ و لطاف و أهل واجب و كرم و بيعملوا عشان خاطرك اللى ما حدش بيعمله لحد ما يبان غرضهم الحقيقي
نجاه / يعني اتساوينا باكرم كمان الحمد لله
مهره / و انتوا ما اذيتونيش يعني يا نجاه اه عالجتونى من الإدمان بس ربطونى بيكوا و سوئتوا سمعتى و خليتوا اهلى يتخلوا عنى
نجاه / دى احنا !!! انتى بتتكلمى جد انتى ازاى بتقولى الكلام ده احنا عملنا كدا عشان ما كانش فى قدامنا حل تانى عشان نخرجك من المخروبه اللى انتى اهلك اللى احسن مننا و وقعنا بينك و بينهم رموكى فيها... احنا وحشين امشي روحى لأهلك و وريني و هم بيفتحولك احضانهم و يطبطبوا عليكى بس المرادى لما يرموكى فى الشارع مش هنكون موجودين الوحيد اللى هيبقي موجود هو اكرم الكلب و مش عشان سواد عنيكي
مهره تبص لنجاه بقهره و تسيب الاوضه نجاه تحاول تمنعها ما تلحقهاش
نجاه / استنى مهره استنى استنى ما قصدتش
مهره تطلع من السرايا نجاه تلحقها و توقفها
نجاه/ انا اسفه انا ما قصدتش بس اقسم بالله عليا ضغط مش قادره استحمله مهره اهدى و فكرى احنا فعلا وحشين ؟!! تمام استنى للصبح عربيه توصلك شقتك
مهره / هستنى اول قطر فى المحطه
نجاه / هتباتى فى المحطه يا مهره ؟!! دا كلام يا بنتى ؟! طب تمام هنشوف مواعيد القطر و احجزلك تروحى على معاد القطر على طول تركبى و تمشي
مهره / انا مش هبات هنا
نجاه / انتى ليه عنيده و غبيه كدا
مهره / انا كدا فككوا منى
جابر يطلع من الجنينه الورانيه مع مختار
نجاه / ماشي هنفكنا بس اصبري للصبح
مختار / هو فى ايه ؟!
مهره / هو انا محبوسه هنا ؟!
مختار / ابدا تقدرى تمشي ... وصلها يا جابر مكان ما تحب
مهره / انا مش عاوزه منكوا حاجه
مختار / تمام ... معاكى فلوس تروحى
مهره تسكت مختار يطلع فلوس و يديها ما ترضاش تاخدها
نجاه / طب بالله عليكي دا كلام عاقلين
مختار/ طب ممكن اعرف احنا زعلناكى فى ايه اوى كدا
مهره / انتوا كدبتوا عليا
مختار / فى ايه ؟!
مهره / انتوا مش فلاحين انتوا ...
مختار / احنا ايه ؟
مهره / ما اعرفش انتوا ايه ... بس انتوا مش ناس عاديه ... بس انا ما اعرفش انتوا ايه
مختار / اى كنا دا ما كانش قرارنا دا وضع و اتولدنا لقيناه كدا و كل اللى عملناه اننا ما استلسمناش للوحش اللى فيه بالعكس بنحاول على قد ما نقدر نخدم و نساعد كل الناس و الكل يشهد لنا
نجاه / هى قصدها على اننا مستهدفين و الحاجات دى
مهره / و بتقتلوا الناس عادى
مختار / لما خنقتى الراجل فى الاسانسير بالشنطه عشان تنقذى عمران كان ممكن يموت فى ايدك على فكره
مهره / انا كنت ...
مختار / و احنا كنا ... احنا مش سفاحين ماشيين ندبح فى الخلق احنا بندافع عن نفسنا مش اكتر انتى ما تعرفيش انا عشت ايه انا راجل بيعيش كل يوم مش عارف ان كان اليوم هيخلص على خير و لا هيضطر يدفن واحد من حبايبه ... ما علينا مننا احنا وحشين و فينا العبر ... انتى ناويه على ايه انتى هنا مش محبوسه و احنا ملزمين نرجعك بيتك زى ما جبناكى احنا دورنا ناحيتك خلص اصلا
مهره / انتوا اذيتونى على فكره
مختار/ احنا اسفين اقسم بالله ما كنا نقصد سامحينا
مهره تبص لنجاه و جابر و ترجع تبص لمختار
مختار/ اللى انتى عوزاه هعمله عاوزه ترجعى حالا هوصلك بنفسي يا ستي بلاها جابر انا بنفسي هوصلك لبيتك قولى عاوزه ايه و احنا هننفذ
مهره تتنهد و تروح تقف بعيد لوحدها و تمنع نفسها تعيط مختار يتنهد و يروح لها
مختار / انتى فى حد ضايقك هنا باى حاجه؟
مهره تهز راسها لا و هى بتعيط
مختار / طب انتى بجد شيفانا وحشين ؟
مهره تبص له و بعدين ترجع تبص فى الارض
مهره / ما عدتش عارفه الحلو من الوحش ... يمكن انا اللى فعلا وحشه
مختار / انتى زينا
مهره تبصله
مختار / اضطريتى تعيشي وضع ما اخترتيهوش و مع كدا ما استسلمتيش للوحش اللى فيه و حاربتى الفرق اننا ما شاء الله كتير و بنسند بعض و انتى بطولك
مهره / انا ... انا خايفه
مختار / و انا ... كلنا خايفين الخوف دا شئ طبيعي جدا .... ولنبلونكم بشيء من الخوف والجوع ونقص من الأموال والأنفس والثمرات وبشر الصابرين  الذين إذا أصابتهم مصيبة قالوا إنا لله وإنا إليه راجعون   أولئك عليهم صلوات من ربهم ورحمة وأولئك هم المهتدون ... فهمه الايات صح ؟
مهره تهز راسها
مختار/ نصبر و نرضي عشان ربنا يكافئنا باذن الله بكل خير
مهره / ما انا مش قادره
مختار / لا يكلف الله نفسا إلا وسعها ... معنى انك بتمرى بالمحنه دى انك قدها و الا ربنا ما كانش حطك فيها ربنا رحمن رحيم انتى عارفه ايه الفرق بينهم
مهره / الرحيم خاصه بالمؤمنين بس لكن الرحمن لكل خلق ربنا
مختار / الله اكبر ما انتى حلوه اهو امال مالك بقي ... اقولك حاجه ... انا عاوزك تطلعى اوضتك دلوقت و تتوضي و تصلى ركعتين و بعدين تدخلى سريرك و تسبحى لحد ما تروحى فى النوم و بعدين لما تصحى دورى عليا و تعالى نكمل كلام فى الموضوع ده و هحكيلك بقي الحكايه دى بدات ازاى و كل اللى عشته فيها
مهره / نجاه حكتلى
مختار/ لا لا لا نجاه ايه دا انا هحكيلك الذوبد انتى فكرانى اتولدت راجل عجوز كدا دا انا ليا مغامرات تتعمل سلسله افلام و لا الافنجرز فى زمنهم
مهره تضحك
مختار / اطلعى اوضتك اعملى اللى قولتلك عليه و بكره باذنك يا رب نقعد و نتكلم و اى كان اللى انتى عوزاه انا هعمله
مهره تهز راسها و تبص لنجاه
مهره / هتيجي معايا
نجاه / هحصلك
مهره تهز راسها و تمشي
نجاه / شاطتنى و شاطت عمران و كل ده بسبب احلام طبعا
جابر / و احلام مالها
نجاه / ما كانتش قادره تساعى نفسها من الفرحه ان جالكوا اذن ان اللى يشوف يونس يقتله
مختار / ايه الكلام ده
جابر / الكبير ادى الاذن فعلا يا خالى
مختار / ازاى يعني اوعى كدا اما اشوفه ايه الجنان ده
مختار يمشي و يفضل جابر و نجاه
جابر / عامله ايه ؟! كانوا يومين صعبين اوى
نجاه / تكه و هقعد جنب الحيطه اعيط
جابر/ للدرجادى !!
نجاه / جابر هسال سؤال واحد تجاوبني بصراحه
جابر يهز راسه
نجاه / هو انا وحشه؟
جابر يضحك و يحاول يكتمها
نجاه / انا بتكلم جد
جابر / اصلك بتسأليني انا !! نجاه انتى اللهم بارك قمر
نجاه / يووووه يا ابنى لا ... انا اقصد ... انسانه وحشه امممم مش كويسه ... وحشه يعني
جابر / لا يا نجاه انتى مش وحشه انتى بت جدعه و طيبه و قلبك على الكل و يعتمد عليكي و ما لكيش زى
نجاه / انت بتقول كدا بس
جابر / هو حد قالك غير كدا؟!
نجاه / ما حدش بيقول حاجه ... بس المعامله بتبين
جابر / طب ممكن توضحي اكتر
نجاه / انا بتكلم للصالح العام انا مش فارق معايا حاجه بس الناس كلها واخده موقف من غير ما تفكر الغضب عا..
جابر / يونس
نجاه تسكت و تبص له
جابر / انتى بتتكلمى عن يونس دفاعك عنه طول الوقت بشكل غير مبرر و تكتيفنا ليه و ان ما حدش فينا طايقه و مع كدا مجبرين نستحمله
نجاه / بس هو بيحاول يساعد
جابر / يساعد نفسه ... يونس ما بيساعدش حد فينا
نجاه / اللى عاوز يتعلم
جابر / انتى واثقه فيه بجد ؟!
نجاه / حساه بيحاول
جابر / كل الحاجات اللى حصلت حواليكي دى ما لفتتش انتباهك لاى حاجه ... يعني ... مش قادره تربطى الأحداث اللى حصلت دى كلها بقد ايه كان فى ايده يساعد بجد و سابنا على عمانا
نجاه / بس هو قال ده من الاول قال انه مش هيقدر يفضح المخطط بس هو فى كل المواقف دى وقت ما بتطلب منه حاجه بيعملها و بيحاول و الله
جابر / نجاه ... ممكن اسالك سؤال اممم اقولها ازاى بس ... الواد ده من اول مكالمه بينكوا و هو بيقولك هدفه صريح ... هو عاوزك
نجاه / ياه يا جابر انت واقف هناك كل حاجه اتغيرت من وقتها و بعدين هو كان بيستفزنا مش اكتر
جابر / بس كل حاجه بيعملها و كلامه معانا كلنا بيقول انه عاوزك
نجاه / اولا هو ما اتعداش حدوده معايا نهائى فى الموضوع ده بالعكس بيحافظ دايما على المسافه اللى بينا بيحاول يتعلم دينه و فعلا بشهاده الكل بيحاول و بعدين الحوار دا كله فى ايدي انا
جابر / ازاى يعنى مش فاهم
نجاه / يعني ... انا ... مش عارفه اشرح يعني  ... عادى مفيش حاجه ..  يعني ... مش بفكر فيه بالطريقه دى و لا ... باى طريقه تانيه ... الموضوع كله انى عاوزه المصلحه العامه ليه و لينا ... و عوزاه يعني ... ما
جابر/ بقولك ايه
نجاه تبص له
جابر / انتى عارفه انتى محتاجه ايه
نجاه تتنهد و تبص له و تهز راسها لا
جابر/ انتى محتاجه تنسي الدنيا دى شويه و تروقى نفسك ... اللى اعرفه انك لو خدتى مفتاح الشقه ده و روحتى كدا قعدتي فى الساونا شويه
نجاه / نعم !!
جابر/ هديكى بالبلحه ... لوحدك دا انا بديكي مفتاحى يعني انا شخصيا مش هعرف ادخل ايه جرالك ايه و ربنا اتغابى عليكى
نجاه تضحك
جابر / و مفيش داعى تروحى السرايا تاخدى غيار و لا تفتحي على نفسك فواتيح هتلاقي هناك كل اللى تحتاجيه و انتى بنفسك فرشاه بايدك و عارفه انه مقاسك
نجاه / بس مش بتاعى
جابر / انا مسامح استخدمى اللى انتى عوزاه ... اقسم بالله بتجيب نتيجه معايا اكيد هتشتغل معاكى ... فضى عقلك و هتلاقي على الحوض فى الحمام الكبير فوق علبه مرهم كدا مرسوم عليها حلزون البتاع ده منصور اللى قايلى عليه ... بس بصراحه طلع نينجا ..  اه يا دنيا جه عليا اليوم اللى اتعلم فيه الاسكين كير من دكر و اعلمه لحرمه
نجاه تضحك بصوت عالى جابر يبص على الغفر متابعيهم و مبتسمين يزغر لها تلم نفسها نجاه تاخد منه المفتاح
نجاه / تمام ... اجرب ... شكرا
جابر / بيتك يعنى فى اى وقت
نجاه تبصله بطرف عينها و تروح ناحيه البيت احلام متابعاها من شباك اوضتها تجز على سنانها ماشي
…………………..