الكبيره ٢ بقلم / لولو_محمد

الحلقه ٣٥

(((((((( الكبيره ٢))))))))
#لولو_محمد
الحلقه ٣٥
نجاه / شيلته و طفيت البوتجاز انت رايح فين و هتعمل ايه من حقى اعرف لو عاوزنى افضل واثقه فيك
جوزيف / زى ما بديكى لازم اديهم عشان يثقوا فيا انى لسه معاهم
نجاه / و هتديهم ايه بقي
جوزيف / هو جابر فين
نجاه / زمانه جاى ... يونس ما تغيرش الموضوع
جوزيف / بتثقى فيه ؟
نجاه / اكيد دا ابن عمى
جوزيف يبتسم
نجاه / انت بتحاول تقول ايه يعني انتى ما تعرفيش جابر فين و واثقه فيه ثقى فيا زيه لا يا يونس اسفه انت مش زيه
جوزيف / بالظبط ... عن اذنك
نجاه / استنى
جوزيف / ايه تانى
نجاه / فى حاجه بتحصل صح
جوزيف / اكيد طبعا ... يا بنتى دايما فى حاجه بتحصل
نجاه / طب غششنى ... ما تقولهاش صريحه ... لمح
جوزيف يضحك
نجاه / ما بهزرش
جوزيف / شاهين
.........................
نجاه / ماله
جوزيف / قولتى لمح ... انا لازم امشي
نجاه / طب هيجراله حاجه... عمتى ما عندهاش غيره مش هتستحمل
جوزيف يتنهد بتعب
جوزيف / انتى هتفضلى هبله لامتى ... انا ماشي و ما تناديش عليا و لا توقفيني مش هعبرك .. سلام
جوزيف يمشي نجاه تطلع تجرى على فوق
....................
فى الشركه عند على
مروان/ اقسم بالله هى اللى طلبت و رفضت تاخد الفلوس و قالت كلام كتير زى مش عاوزه منكوا حاجه انا عاوزه اعتمد على نفسي و بصرف عليها من الفلوس دى من غير ما تعرف و بعدين ما حضرتك يعني بحسبه بسيطه تقدر تشوف انا بصرف ايه و بعمل ايه مش هسرقكوا يعنى ما انا لو محتاج ما حضرتك هتديني ما انا ابنك زيها بالظبط... و لا ايه
على / و انا ما اعرفش حاجه عن الكلام ده ليه
مروان / يا بابا حضرتك مش فاضي و هى عنيده و انا بسايسها دا حتى المرتب اللى بتاخده من رامى انا اللى بدفعه هى دى بتعرف تشتغل حاجه دى جميله و تمثيليه
على / و مش كان اولى انها تيجي تمثل هنا بدل ما بتحترف عند اللى يسوى و اللى ما يسواش
مروان / يا بابا مهره نفسيا مش متظبطه و بصراحه مدام كارمن عامله معاها الواجب و زياده ... شحناها جامد من حضرتك اقصد و حضرتك بصراحه مساعدها
على/ تقصد ايه يا ولد
مروان / يعنى سبت اللى اسمه اكرم ده ياخد مكانك و يقوم بدور الاب و هى ما تعرفش اى حاجه عن الفلوس اللى بيسحبوها منك على حسها هى مش فاهمه اى حاجه ... دى عيله ساذجه جدا و كلمه توديها و كلمه تجيبها و حضرتك طول الوقت مشغول
على / يعني طلعت انا الغلطان فى الاخر مش كدا كلكوا زى بعض تلفوا تلفوا و تجيبوا عليا الغلط فى الاخر
مروان / هو مش اولى ان حضرتك تتصل بمهره و لو مره واحده فى اليوم تطمن عليها ... الشيك اللى حضرتك اديتهونى مش اولى لو حضرتك خدتها فى حضنك و اديتهولها ... خليتها تبات معانا فى الفيلا بدل الشحطته دى كلها
على / انت عارف انى اتكلمت مع امك و هى رافضه نهائى دخول مهره البيت انت عاوزنى اهد البيت و اشرد اللى فيه عشان ترتاح يعني
مروان / انا اسف بس انا الموضوع كله ما يخصنيش انا ادبست فيه زى مهره بالظبط بالعكس انا وقت الجد اللى بتحاسب اهو عشان انا اخوها الكبير الراجل مش كدا
على / انت عاوز ايه يعنى
مروان/ حضرتك اللى عاوز مش انا
على / انا مش عاوز حاجه امشي روح شوف وراك ايه
مروان / طب و مهره
على / اه مهره ... تمام تمام هبقي اكلمها اشوف انا الحكايه دى معاها
مروان / تمام حضرتك هتعوز منى حاجه تانى
على / شكرا
على يروح يقعد على المكتب و يبص فى اللاب و مروان واقف شويه
مروان / عن اذن حضرتك
مروان يمشي و على يكمل شغل
........................
فى سرايا الجوارحه
طفل فى اعدادى بيخبط على باب اوضه منصور منصور يفتح و هو بيدعك فى عينه
الولد / لا مؤاخذه يا خالى بس انا جاتلى رساله كدا و لما فتحتها لقيت فيديو بيتهيالي تشوفه
منصور / و انت ما اتعلمتش ما تفتحش اى لينكات ليكون فيروس و لا زفت طين على المسا ... وريني يا سيدي طلعلك ايه
الولد / ما انا عملتله سكان و طلع تمام المشكله مش فى الفيروس المشكله فى اللى شوفته لما فتحت اللينك
منصور / شوفت ايه وريني انجز
الولد / مش هقدر اقولك شوف بنفسك ... انا و الله ما ليش دعوه و لا اعرف مين اللى بعتلى حاجه زى دى انا اصلا اتخضيت و اول ما شوفته جريت عليك انا اصلا ما ليش دعوه
منصور / هو فى ايه يا هباب الطين انت ما توريني ضيقت خلقى هو فى ايه
الولد يدى الموبايل لمنصور منصور يشوف فيديو شاهين
صوت شاهين / ادلعى ادلعى يا ابن المحظوظه يا منصور يا مين يلايمني عليكي يمين بالله ما اخلي فيكي حته نافعه يخربيت جمال امك
صوت شاهين يصرخ منصور يبص للولد و عنيه بتطق شرار الولد يرفع ايديه لفوق و يتكلم بفزع
الولد / اقسم بالله ما ليا دعوه انا جيت قولتلك على طول انا ما ليش دعوه بحاجه
منصور يجرى على اوضه شاهين زى الطور الهايج
......................
على السطح عند نجاه
نجاه واقفه بتبص على الجنينه كارم يدخل
كارم / انتى كويسه يا نجاه انا نمت و صحيت و فرشتك ما اتلمستش
نجاه / مش جايلى نوم
كارم / انتى مستنياه يرجع ؟
نجاه/ لا عادى هو اصلا قال هيتاخر
كارم / امممم ... مش عارف اقولها ازاى ؟ بس ... هو فارق معاكى ؟
نجاه تبص لكارم
كارم / جابر مش واثق فيه و لا فارس و انا معاكى على اى وضع بس ... انتى ليه واثقه فيه اوى كدا و مدياله الحجم ده كله
نجاه / خايفه
كارم / منه !!
نجاه تهز راسها لا و تبص قدامها
نجاه / خايفه يكون ربنا بعتهولى اكون سبب فى هدايته و صلاح حاله و انا اللى ارده خايفه اشيل وزره
كارم / هو مش صغير بالعكس... هو عارف بيعمل ايه كويس ... اكتر مننا كلنا
نجاه / إنَّ الْعَبْدَ لَيَتَكَلَّمُ بِالكَلِمةِ مِنْ رِضْوَانِ اللَّهِ تَعَالى مَا يُلقِي لهَا بَالًا يَرْفَعُهُ اللَّه بهَا دَرَجاتٍ، وَإنَّ الْعبْدَ لَيَتَكلَّمُ بالْكَلِمَةِ مِنْ سَخَطِ اللَّهِ تَعالى لا يُلْقي لهَا بَالًا يهِوي بهَا في جَهَنَّم
كارم / صدق رسول الله صلى الله عليه وسلم ... بس برده لا يُلدَغُ المؤمنُ من جُحْرٍ واحد مرتين ... و احنا استوينا
نجاه / يعني انت تنصحنى بايه
كارم / مش عارف انا شخصيا مش هقدر انكر انا بستفيد منه ... بس مش هنكر انى خايف منه ... عليكي ... ما نسيتش كلامه ... و لا اللى عمله
نجاه / و لا انا نسيت بس انا حاسه انى بتعامل مع انسان تانى يونس غير جوزيف
كارم / شخص واحد عقليه واحده تربيه واحده ... الفرق اللى بينهم لا يذكر تقريبا انتى الوحيده اللى شيفاه و لو على الصلاه امايا كانت ما بتفوتش فرض لا هى و لا اختها و فى الاخر طلعت مقلب ... دا بقي هيبقي خازوق
نجاه تبتسم و تبص قدامها
كارم / انا عمرى ما فهمت ابوكى
نجاه تبصله باستغراب
كارم/ البنات طول عمرها مكانها البيت معززه مكرمه تلبس و تدلع و تربى العيال ... ايه اللى جد فجاه ... جيتي انتى بقي شقلبتى حالك و حالنا و سحلانا وراكى ... طب و اخرتها ... ما تتجوزى و تقعدى تربى العيال زى باقى الحريم يعني على الاقل هنطمن عليكي بدل الهم ده
نجاه تضحك
كارم / انا عارف انك موهوبه و انك توزنى عشرين راجل فى قدراتك و حماسك و اصرارك و انك اقسم بالله ما حصلتى و لا هتحصلى بس ... انا خايف عليكي ... معروفه يعني ... الحريم عاطفيين شويه قلبهم بيحركهم مشاعرهم سيقاهم هرموناتهم سحلاهم
نجاه تضحك بصوت عالى
كارم / غلطت يعني ؟! مش دى الحقيقه
نجاه / حقيقه
كارم / ارحمينا بقي يا نجاه
نجاه / انت لحقت يا ابنى دا احنا لسه واصلين
كارم / انا خايف عليكي منه و الله خايف
نجاه / ما تخافش ... قل لن يصيبنا الا ما كتبه الله لنا ... جه اهو تعال تعال
نجاه تنزل كارم يبص يشوف جوزيف بينزل من فوق موتوسيكل عمران و يدخل الفيلا ينزل بيجرى
....................
فى سرايا الجوارحه
شاهين نايم فى الارض و مغطى وشه و منصور قاعد فوقيه و نازل ضرب و الحريم بتصرخ و الرجاله بتحوش
منصور / انا اللى مش هخليك نافع يا عديم المروءه يا واطى
شاهين / ما عملتش حاجه ما عملتش حاجه
مغاورى / اوعى يا منصور اوعى بس انت مش فاهم حاجه بس
الرجاله تتملك من منصور و تحوشه شاهين يجرى
دياب / فهمنا في ايه
منصور / مش فاهم صح ؟ انا مش فاهم !! انما انت اللى فاهم يا خالى عمال تغطى عليه و تحابيله و مره ورا مره لما نسي نفسه
مغاورى / انت مش عارف حاجه قولت انت مش فاهم حاجه
منصور / كفايا انت فاهم و لعلمك ما خلصتش ابنك اللى انتوا اتكاتلتوا عليا و هربتوه انا مش هسيبه الا اما اجيبهولك فى كفنه انت فاهم و لا لا
سماح / كفن اما
مغاورى / سماح !!
سماح / انت مش شايف قله ادبه
مغاورى / الفيلم خلص كل واحد يرجع اوضته
دياب / بالبساطه دى !! مش نفهم ايه اللى حصل
وفاء الصغيره واقفه بتعيط فى جنب مغاورى يروح يحضنها و يوشوشها
مغاورى / اهدى يا بنتى كل حاجه تمام دا سوء تفاهم و باذن الله نحله على طول خشي ارتاحى انتى خشي عشان ابنك خشي
وفاء تهز راسها لا
دياب / ايه اللى حصل يا منصور ليه كل ده
الولد / انا جالى فيديو لخالى شاهين و هو
مغاورى / محمود !!!
محمود يسكت
مغاورى / انا ما بحابيش لابنى بس ابنى غلط و تاب و اتعاقب
منصور / دا عندك انت ده
مغاورى / الزم ادبك يا منصور و كفايا فضايح ... تعالوا نتكلم فى المكتب
مغاورى يبص لفتوح
مغاورى / تعال يا فتوح عاوزك ... انا و منصور و دياب و فتوح و بس ... الباقي يرجع اوضته فاهمين
سماح / ازاى يعني
مغاورى / انا قولت ... محمود تدخل اوضتك و تمسح الفيديو و تنسي اى حاجه حصلت فاهم و لا لا
محمود يهز راسه
مغاورى / مش هكرر كلامى كل واحد يدخل اوضته ... حالااااا
الكل يتحرك رجل ورا و رجل قدام و يفضل منصور و دياب و فتوح و ماجده وراهم و ياسمينا و وفاء كل واحده بتبص من ورا بابها
مغاورى / خلونا نتكلم فى المكتب
منصور / ما عادش فى كلام كل المواقف اللى حصلت على مدار السنين اللى فاتت كانت دايما ليك مبرر كان دايما تسكتنى .. الواحد ممكن يطاطى لاى حاجه الا دى
مغاورى / حقك عندى
منصور / كتر خيرك انا مش مستنى حد يجيبلى حقى انا بعرف اخده كويس
ماجده / ليه كل ده يا منصور فهمنى
مغاورى / مش هنا ... فى المكتب ... عمكوا فتوح هيفهمكوا كل حاجه بس لو سمحتوا من فضلكوا مش هنا
دياب يبص و راه يشوف البيبان كلها مواربه يروح لوفاء يوشوشها
دياب / خليكي جنب ياسمينا
وفاء تهز راسها و تعدل طرحتها و تعدى و هو يغطيها لحد ما تدخل اوضه ياسمينا و تقفل الباب يرجع لمنصور
منصور / انا مش هسمع لحد المرادى كانت الناهيه مش هسمع لحد
ماجده / عشان خاطرى المرادى يا منصور اسمع واعمل اللى يريحك اهدى يا ابنى و اكبر لخالك اكبرلى يا ضنايا
منصور يبص لامه
دياب/ تعال يا منصور تحت ... تعال
دياب ياخد منصور فى حضنه و ينزلوا
ماجده / فى ايه يا مغاورى
مغاورى / حقك عليا ... فرطت منى....بس هلمها ان شاء الله هلمها تانى
مغاورى يبص فى الارض و ينزل و فتوح وراه
.............................
فى شقه عبد الهادى
نسمه تصحى تروح الحمام و هى لسه ما فاقتش تلاقي حماتها قاعده صاحيه فى الصاله تتخض
الست / اجيبلكيش طاسه الخضه
نسمه / صباح الخير ... عن اذنك الحمام
الست / استنى هنا ... انا كنت بفكر انزل مصر كام يوم ازور السيده نفيسه و ستنا عيشه
نسمه / و ماله تروحى و تيجي بالسلامه
الست / و لحد ما ارجع هتعملى ايه
نسمه / اللى انتى عوزانى اعمله هعمله عن اذنك
الست / انا بكلمك
نسمه / الدنيا مش هتطير يا اما ادخل الحمام و اجيلك نعمل فنجانين قهوه و نقعد و نتكلم و نعمل كل اللى انتى عوزاه
الست / استنى اما ادخل انا الاول السكر مبهدلنى
نسمه / و ماله ... اتفضلى البيت بيتك
الست تروح ناحيه الحمام و هى بتتمرقع فى مشيتها نسمه تتنهد
نسمه / توب عليا يا رب من الست دى
........................
فى هول فيلا نجاه
نجاه / مسقعه ايه اللى انت جاى السعادى تسال عليها دا ايه الاستفزاز ده يا اخى انا بكلمك فى ايه و انت بتكلمنى فى ايه
كارم / يا ستى استهدى بالله بيقولك جعان حطى للراجل ياكل لقمه و نقعد نتكلم بالراحه مش كدا
جوزيف / قولها
نجاه / و الله !!! ايه خلاص اتفقتوا عليا ... اطلع انا منها يعني ... يعني اقف و اتعب فى عمل الاكل و افضل سهرانه مستنيه البيه لحد ما يرجع عشان فى الاخر ياكل و ينام
جوزيف يبص لكارم مستغرب و يرجع يبص لنجاه
نجاه / البيت ده مش لوكانده و انا من حقى اعرف انت كنت فين و مع مين و بتعمل ايه
جوزيف / ما انا قايلك انى خارج و انى هتاخر و هروح فين و بعمل ايه و قولتلك كمان اكتر من اللى المفروض تعرفيه عاوزه ايه تانى
نجاه / عاوزه ارتاح ... انت جننتنى و مشيت ماله شاهين ايه اللى جراله
جوزيف / اسالى ابوكى هيقولك
نجاه / يعني حصل خلاص
جوزيف / ايوه حصل و اطمنى كلكوا بخير مفيش حد اتعور و لا حاجه ... هو شاهين يعني ... بس هيخف ما دام لسه عايش اى حاجه حصلتله بسيطه
كارم / لا لحظه انا كدا اللى مش فاهم ماله شاهين
جوزيف / بقولك ايه مش طلباك انت كمان انا مهاودها عشان هرموناتها بس انا لما بجوع ببقي غبى
نجاه / ايه هرموناتها دى !!!
جوزيف/ انا اسف ... حقك عليا ... مش ممكن الجنان ده ... مستحيل كدا
كارم / طب الاول طمنى ماله شاهين
جوزيف / اقولكوا مش عاوز اكل ... انا داخل انام... دا انتوا عيله نكد
جوزيف يروح اوضته و يرزع الباب
كارم / هو ماله شاهين يا نجاه
نجاه / و انا اش عرفنى ما انا زيي زيك امال انا كنت متعصبه ليه ... و بعدين انت قولتلهم عنى ايه بالظبط ماسكينلى كلهم هرمونات هرمونات انت ما تعرفش تقفل بقك ده ابدا ما تعرفش تستر انت تروح تنام فى اوضتك بلا حراسه بلا زفت
كارم / و انا عملت ايه
نجاه / يووووه بقي انا طالعه انام دى عيشه ايه دى بس يا ربى
نجاه تطلع اوضتها
كارم / الله يعينك يا بابا كنت بتتعامل مع المناخوليا دى ازاى لا حول و لا قوه الا بالله
...........................
فى مكتب الجوارحه
منصور / و انا المفروض اصدق الكلام ده
مغاورى / مش مصدقنى اتاكد بنفسك انت فاكر ان الفيديو ده ما اتبعتش لحد تانى غير محمود انت فاكرنا نايمين ما تقول حاجه يا فتوح
دياب / و احنا ما نعرفش حاجه عن الموضوع ده ليه
مغاورى / عشان يحصل اللى حصل النهرده ده عشان اضمن رد فعل اخوك على حاجه زى دى و انه يروح يتخانق مع شاهين و يفضح الدنيا و نبين ليهم انهم عملوا اللى هم عاوزينه و شاهين بقي مغضوب عليه فيقع على حجرهم و من هناك يبدا ينفذ خطته
منصور / و الله !!! هو شاهين دلوقت بقي
مغاورى/ هم اللى اختاروه و فبركوله الفيديو و حاولوا يبتزوه ... راجع كاميرات الاستراحه اللى شاهين دخلها و هو راجع من مصر ... سفره لجوزيف مصر من الاساس ... كل ده كان بعلمى و ترتيبي... ياسمينا بنتى ... تخصنى زى ما تخصك و اقسم بالله ما اقبل ابدا ان حد يبصلها بصه كدا
فتوح / لو كنتوا عرفتوا الخطه منصور ما كانش هيتغابى على شاهين و الكلام هيتنطور
منصور / انا مش مصدق حرف واحد الصراحه افرض كنت قتلته كنت هتبقي مبسوط
مغاورى / كلنا كنا مستنينك ... شاهين نفسه مستنيك ... اهدى و فكر هم عاوزين يوقعوا بينا عشان ناكل فى بعض ... فرق تسد مش جديده عليهم ... انا بس اللى حازز فى نفسي ان دايما اللى بيختاروه عشان يفرق بيكون من الجوارحه ... كاننا على شعره و بنتلكك لبعض
منصور يبص لدياب
دياب / انا عاوز اشوف الفيديو و افحصه
فتوح / اتفضل
فتوح يدى لدياب موبايله
فتوح / انا مسحته من على معظم الاجهزه اللى وصلها ما عدا جهاز محمود ... و دا طبعا عشان كلنا عارفين انه عيل لتات و ما بيتبلش فى بقه فوله و مع انى قولتله يمسح الفيديو زمانه دلوقت عمل جروب واتس مع البلد كلها و شيره و بكدا شاهين مش هيقدر يعتب البلد تانى و دى فرصتهم ياخدوه على حجرهم لحد ما تاخد وقتك .. اللى اكيد هيطول ... و تفحص الفيديو و تتاكد و يرجع شاهين مرفوع الراس وسطينا ... بس شايل منكوا و مننا كلنا اننا اديناله ضهرنا و بكدا بقالنا عين وسطهم
دياب / شاهين مش قد التمثيليه دى و مش هنكدب على بعض شاهين اخيب من كدا بكتير
مغاورى / عارف و اقسم بالله انا ما رسمت الخطه دى و لا كنت عمرى هفكر فيها و لا ارمى ابنى الوحيد فى النار بايدي ... كلنا عارفين ان الحوار كبير ... مبهوء عليه و انه مع اقل غلطه هيموت بس هم اللى اختاروه استغلوا كل خلافاتنا اللى فاتت و كل المواقف اللى حصلت و كان الصيده الاسهل و هو اقسم بالله بالرغم من ان قد ايه عرضهم مغرى جرى عليا و قالى كل حاجه قالى انا مش خاين انا خايب بس مش خاين ... شاهين فاشل و ما حدش بيطيئه بس مش خاين يا منصور
منصور يبص فى الارض
مغاورى / سيب البيت و ارزع الباب و ما تحسسش حد انك هديت
منصور / انا ما هديتش
مغاورى / كويس ... خلي الناس يشوفوك كدا ... كل ما كان عدد اللى عارفين الحقيقه اقل كل ما اتسبكت اكتر ... حتى امك و مراتك ... دياب
دياب / انا مش موافق على اللى بيحصل
مغاورى / الكبار قرروا تقول ايه ؟؟
دياب / امين
دياب يبص الناحيه التانيه
مغاورى / صعبه على الكل ... بس مش احنا اللى بداناها
فتوح / انا و اخويا على ابن عمى و انا و ابن عمى على الغريب
منصور يسيب المكتب و يرزع الباب وراه
مغاورى / حصل اخوك ما تخليهوش يضيع تعبنا على الفاضي هديه و عقله و ساعده
دياب يروح ورا منصور يلاقيه طالع السلم يطلع وراه منصور يوصل لاوضته الحريم ملمومين حواليها يشوفوه يبصوا فى الارض و يمشوا منصور يدخل يلاقي ياسمينا قاعده على السرير بتعيط فى حضن ماجده و وفاء بتطبطب عليها اول ما يشوفوا منصور يبصوله
منصور / انا هاخد غيار و امشي خليكوا زى ما انتوا
ياسمينا / هتروح فين
منصور يفتح الدولاب و يشد شماعه ياسمينا تقومله
ياسمينا / هتروح فين يا منصور
منصور / هروح فين يعني ... هروح الشركه اكيد مش هروح اللعب يعني
ماجده / منصور اهدى ياسمينا ما لهاش دخل باى حاجه ... هو الكلام اللى بيتقال صح
منصور يتنهد و ياخد الهدوم و يدخل الحمام و يرزع الباب
وفاء / انا هروح لدياب لو كدا اللبس و اروح معاهم الشركه
ماجده / هديهم خليكي العاقله اللى فيهم
وفاء تهز راسها و تروح تطبطب على ياسمينا و تمشي ماجده تقف و تتنهد و تروح لياسمينا
ماجده / ليكي دلال عليه هديه ما تخليهوش يتصرف او ياخد قرار و هو فى الحاله دى
ياسمينا تعيط ماجده تطبطب عليها و تخرج و تقفل الباب
.........................
فى اوضه جوزيف
الباب يخبط جوزيف يروح يفتح يلاقى كارم واقف شايل صينيه
كارم / انا مش عارف انا كدا سخنت الحاجه صح و لا بوظتها بس دا اللى طلع منى بقي ... اتفضل
جوزيف ياخد منه الصينيه و يدخلها كارم يدخل وراه
كارم / انت تعبان صح
جوزيف / عاوز تعرف ايه
كارم / جابر قال انك فلت من المراقبه حتى موتوسيكل عمران اللى انت خرجت بيه سبته و ركبت حاجه تانيه
جوزيف / فين السؤال
كارم / ليه عملت كدا
جوزيف / هى المراقبه دى ليه مش عشان حمايتي انا يا سيدي مستغنى عنها و بعدين اعزرنى هم دول بتسميهم مراقبه ؟؟ ليا انا !!! احترمونى شويه يا جماعه انا كدا ازعل
كارم / طب عملت ايه فى الوقت دا كله
جوزيف / هو جابر كان فين طول اليوم ؟ سالت ؟ لا ... عارف ليه ؟ عشان انا بشوف شغلى كويس ... باختصار انا عارف جابر كان فين و عمل ايه انتوا بقي مستنيني اقولكوا عرفتوا الفرق بيني و بينكوا عرفتوا انتوا ليه متاخرين ... انتوا كتير بس ... مش لاقى كلمه توصفكوا ما تكونش شتيمه .. مش عاوز اضايقك و انت زوق معايا من يوم ما جيت اعذرنى ... بس انت كمان ذكى ... ذكى جدا كمان اعتقد انت فهمت
كارم / كنت فاكرك بقيت فى صفنا
جوزيف / انا فعلا فى صفكوا ... صدقنى ... بس الحرب دى غير متكافاه فرصتكوا فيها شبه معدومه ... حتى و انا معاكوا على فكره ... انا مهما كنت جامد و ما حصلتش ... انا فرد واحد و هم دول ... بص يا كارم ... انا لازم اثبتهم و اخليهم مطمنين ليا و متاكدين انى معاهم لسه و دا مش سهل ابدا ... كل اللى بطلبه منكوا تثقوا فيا
كارم / ما انت برده مش بتشترى ثقتنا دى و لا بتحاول تثبتلنا انك معانا بتطلب نثق فيك و تصرفاتك فى المقابل مريبه
جوزيف / طلبت منى ايه و اتاخرت عنك
كارم/ انا مش عاوز اتعلم كام حركه على كام نطه احنا فى عصر الميكروروبتس فى عصر القنابل و الصواريخ ما حدش هيجيلى و يقولى تعلالى راجل لراجل
جوزيف / و هو ده بالظبط اللى كنت مستني اسمعه ... تمام تحب تبدا منين ... و لا اقولك سبلى نفسك و انا هعلمك حاجات عمرك ما كنت تتخيل انها موجوده اصلا
كارم / اتفقنا
......................
فى اوضه منصور
منصور يطلع من الحمام لابس يروح يجيب الجزمه و يلبس الشراب
ياسمينا / منصور
منصور / بعدين يا ياسمينا انا بجد فى اسوء حالاتى دلوقت مش عاوز اقول او اعمل اى حاجه اندم عليها العمر كله
ياسمينا / طب ممكن على الاقل توعدنى انك فعلا ما تعملش اى حاجه نندم عليها كلنا العمر كله ... انا محتاجاك انا و عيالك
منصور يبصلها و يلبس الجزمه و يمشي ينزل يلاقي دياب واقف فى الجنينه مع مغاورى
دياب / الكبير عاوزنا عنده
منصور / انا مش هسمع لحد
دياب / طب انت ناوى على ايه
منصور / هجيب الفيديو ده و افحصه بنفسي و اتاكد انه متفبرك فعلا
دياب / تمام هيحصل بس الكبير طالبك ما تصغروش و روحله و يا سيدي ما حدش طلب منك انك تسمع كلامه انت اصلا مش عارف هيقولك ايه و لا هيطلب منك ايه فروح اسمع و ربنا يقدم اللى فيه الخير
منصور / هو شاهين فين
مغاورى / راح الجبل
منصور / هجيبه على فكره
مغاورى / انا ما خبتوش يا منصور انت بتكلمنى كدا ليه ان ما كنتش الكبير فانا خالك على الاقل عيب كدا اقسم بالله لولا انى مقدر اللى انت فيه انا ما كنت عديتلك قله ادبك معايا دى
دياب / حقك عليا انا يا خالى اللى هو فيه مش شويه الضربه من الغريب توجع من القريب تقتل يا خال
منصور / و كل المواقف القديمه من اول ليله نجاه و كل مره عديناله و بررناله و جبنا الغلط علينا
مغاورى / المرادى حاجه تانيه اقسم بالله حاجه تانيه اهدى بقي
منصور / تمام يا خالى ... سوق يا دياب انا مش شايف قدامى
دياب / عن اذنك يا خالى
دياب يركب هو و منصور و العربيه تمشي و مغاورى متابعها
............................
فى اوضه جابر
جابر قاعد بيقرا قران يصدق و يقوم يطلع بره يروح اوضه عمران يخبط بشويش
عمران/ ادخل
جابر يفتح الباب بالراحه و يدخل
جابر / انت صاحي ؟!!!
عمران / بذاكر حاجه كدا قولت انجزها و مخى لسه مفتح يمكن تثبت
جابر / محتاج مساعده فى حاجه اعملك حاجه تشربها او تاكلها طيب
عمران / تسلم سبقتك
جابر / تمام مش هعطلك ما تنساش نفسك عشان ما تتاخرش على الوضوء
عمران / ما تقلقش تمام
جابر يهز راسه و يروح ناحيه اوضه نجاه يلاقي باب الاوضه اللى جنبها بيتفتح و فارس خارج منها بيدعك فى عنيه و يزحف فى الارض
جابر / الله انت ما نمتش مع نجاه
فارس / طلعت جنونتها علينا امبارح و طردتنى انا و كارم و قفلت على نفسها بالمفتاح
جابر / ايه الكلام ده ليه و امتى
فارس / انا ما اعرفش حاجه انا كنت رايح فى سابع نومه فجاه لقيتها بتقومنى و تتخلق و تزعق قولت لسه هرد و اتخانق و افوق خدت بعضى و روحت اوضتى صحيت لقيت كارم كمان نايم جنبى
جابر / طب صحيته و لا لسه نايم الفجر كدا هيروح عليه
فارس / ما رضيش يصحى سبته انا مالى
جابر / هتنقطنى اوعى اما اروح اصحيه اوعى
جابر يسيب فارس فارس ينزل تحت يروح المطبخ يلاقي جوزيف بيحضر فطار
فارس / هناخد على كدا
جوزيف / صباح الخير نمت كويس
فارس / و لا شوفته
جوزيف يبصله بابتسامه استغراب
فارس / دا مروستان مش بيت ... تشرب قهوه اعملك معايا
جوزيف / شكرا مش عاوز ... قهوه على الريق تتعب بطنك كل لقمه الاول
فارس / حاضر يا ماما
فارس يلقم القهوه فى الكنكه و يعلق عليها جوزيف ياخد طبق عليه اكل و يطلع بره يقعد على السفره جابر ينزل من فوق
جابر / صباح الخير اتاخرت جامد انت امبارح ما لحقتكش
جوزيف / سيبك منى طمنى عليك خلصت البيعه و لا زرجن ... على فكره انت لو كنت جيت صريح معايا كنت ظبطتلك السعر عن كدا دا رؤؤف دا حبيبي
جابر يبتسم بسخريه
جوزيف / بس ما تقلقش حاجته نضيفه و انا وصيته عليك برده هيديك حتتين من عندى فى وسط الشغل هتحتاجوهم
جابر / كتر خيرك مش عارفين نودى جمايلك فين
جوزيف / كلو باوانه
جوزيف ياكل بهدوء و جابر كاتم جواه يروح المطبخ جوزيف يضحك
...........................
فى شقه مهره
مروان / و مسكنى مسح بيا الارض انك اشتغلتى عند رامى قولتله يكلمك بس اتحداكى ان كان اداكى ميسد حتى
مهره / على فكره انا موافقه
مروان / على ايه
مهره / لو بابا عنده استعداد انى اشتغل فى شركته يا ريت
مروان يروح يمسك مهره من كوعها تتخض
مروان / قولى الصدق رامى ضايقك فى حاجه عمل اى حاجه تقل منك او منى
مهره / ابدا ابدا و الله بالعكس انا بس اكيد هرتاح اكتر مع بابا... و لا ايه
مروان / كنت ارتحت يا اختى و اشتغلت معاه ... انتى عارفه الشغل مع بابا عباره عن ايه عن ان اعفن موظف عنده يقدر يحط عليكي و يهينك و يروح يتبلى عليكي انك معطله مصالح الشغل او بتلعبى فى الدفاتر او يلبسك اى مصيبه و مش عارف هتصدقيها ازاى ... ابوكى هيصدقه و يمسح باللى باقي من كرامتك الارض قدامهم و تبقي هفيه و ملطشه الشركه قدام اللى يسوى و اللى ميسواش و احلفى بقي على المايه تجمد ان الحيوان التانى كداب ... يا بنتى احنا لو لقينا على الرصيف فى الشارع هيحن علينا اكتر من كدا انتى عارفه ليه ايلين هى اللى على الحجر
مهره / ليه
مروان / عشان بتقول حاضر و نعم طول الوقت كلى ده كلمى دى صاحبى دى دى اتخطبت و فسخت بامر من بابا و لعلمك هى مش فارق معاها قالها اسهمه عاليه فى البرصه جوزى و حبيبي و ضهرى و سندى الاسهم وقعت غور ياض بلا قرف بنت ابوها اوى
مهره / و مامتك عاجبها الوضع
مروان / لا ما هى مامى نفس المدرسه ما يفرقش معاها غير ان حسابها فى البنك يبقي مليان و صحباتها ينبهروا كل مره يشوفوها فيها بالجيوليرى الجديده و الاوتفيت الجنان البراند اللى هى جيباه مخصوص من باغى ... سورى يعني ... هى لو امى عدله كان بص لامك ... انا ما اقصدش اى تقليل من طنط كارمن انا بقصد
مهره / هو يعنى اختار ماما فى الاخر ما هو رمانى و اختاركوا
.............................