الكبيره ٢ بقلم / لولو_محمد

الحلقه ١٢٧

(((((( الكبيره ٢))))))
#لولو_محمد
الحلقه ١٢٧
جابر / ليه ليه ما طلبتش من عمران يفتح عنيه ليه ما اتصلتش بدياب ليه امايا ... عشان تخدم مصلحتك صح ؟
جوزيف / عشان بثق فيها اكتر منكوا
جابر / ممتاز ... حلو اوى ... بحب الصراحه و بحترمها ... بتعمل ايه وسطينا بقي ليه مش معاها
جوزيف / عشان نجاه معاكوا
جابر يمسك دماغه
جابر / احنا فى مستشفي احنا هنا فى مستشفي
جوزيف / امايا و نجاه بينهم عهد
جابر / و امايا دى ملاك مثلا نبى ايه امايا دى ايه امايا دى عيله سايكو ما تعرفش ربنا
جوزيف / بينكوا ناس نفس ربايتك و بيصلوا و عارفين ربنا بس خاينين امايا مش خاينه لو كانت سايكو كانت سابت عمران و كل اللى هناك يموتوا هى بتنقى اللى يلزمها و بس
جابر / ايه الجو ده و هى بقي نصبت نفسها ربنا تحاسب الناس و تقول مين الحلو و الوحش
جوزيف / و انت لما تقول عليها وحشه بقيت ربنا و لا كل واحد بيحكم بمقايسه
جابر / انا كل ده مش داخل دماغى و مش هسكت و لا هعديها هفنطها ثانيه ثانيه و لحظه لحظه و هجيب قرار الموضوع ده و انا متاكد ان رجلك هتيجي فيه
جوزيف / اعمل اللى تقدر عليه و ما تخليش فى جهدك جهد بس خليك فاكر طول ما أنت بالعقليه دى هتفضل متأخر و هتفضل نجاه فى خطر المرادى الغلط كان مشترك بينا و انا اعترفت و اتعلمت المره الجايه هيبقي الغلط كله عليك و الغلطه الجايه مش هتلحق تتعلم منها لان نجاه مش هتكون موجوده بعدها
جابر يبص لجوزيف من فوق لتحت و يمشي جوزيف ياخد نفس و يهدى
………………………….
جوزيف / انا هادى انا هادى لا هتنرفز و لا هفتح دماغه و لا فارق معايا اصلا 
مختار يعدى
مختار / انت كويس ؟!
جوزيف / انا تمام انت تمام؟
مختار / تمام ... خير فى حاجه حصلت و لا ايه
جوزيف / كبر مخك بقولك انا عاوز استلف منك فلوس ... مش مبلغ كبير بس مش عاوز ادفعه من معايا ينفع ؟
مختار / عيونى محتاج كام
جوزيف / مش عارف هننزل و نشوف زى ما قولت هو اكيد مبلغ مش كبير يعني
مختار / تمام هروح عمران و نروح مكان ما تحب
جوزيف / نعم !! ازاى يعني ؟!
مختار / من ساعه ما فاق و هو مش مظبوط و كل اللى على لسانه اروح اروح سألت الدكتور قالى مفيش مشكله يروح يكمل علاج فى البيت و الحمد لله يعني البيت فيه بدل الدكتور اتنين يعني مش هنرميه فى الشارع يعني
جوزيف / الموقف ما كانش سهل عليه ... مقدر اكيد لو كنت مكانه كنت هكتئب برده
مختار / لا مش لدرجه اكتئاب هو اصلا عمران ما بيحبش المستشفيات اصلا
جوزيف / دا عمران !! ابنك !! ... تمام روح شوف وراك ايه و ارجع لى ... استنى هى نجاه كمان هتروح ؟
مختار / لا هتفضل النهرده هنا ... هى الحمد لله كويسه مفيش غير كدمات بس هتفضل هنا النهرده لحد ما يطمنوا عليها
جوزيف / تمام مستنيك
مختار / هو انت كنت عاوز تشترى ايه اصلا لو كدا اعدى اجيبهولك و انا جاى ... و لا أقول لك ... خد
مختار يطلع كريدت كارد من المحفظه و يديه لجوزيف
مختار / روح اشترى اللى انت عاوزه و ابقي رجعهولى لما ارجع لك
جوزيف / الفلوس دى حلال صح ؟
مختار / افندم ؟! ايه السؤال ده ؟!
جوزيف / بطمن بس
مختار يبتسم
مختار / حلال ما تقلقش ربنا يبعد عننا الحرام ... معلش من باب الفضول و الله لو مش عاوز ما تجاوبش و مش هزعل هو انت....
جوزيف / هجيب هديه لنجاه بمناسبه سلامتها 
مختار يرفع حاجبه و مش عارف يرد
جوزيف / و هجيب لعمران برده
مختار / واحد اتنين تلاته اربعه ... ربنا يعدى اليوم ده على خير
جوزيف / ايه !! انا عملت ايه ؟!
مختار يمشي و هو بيضرب كف على كف و جوزيف مستغرب
.......................
بره اوضه فيراس
عويس / ما اكلكيش يعني
نسمه / انا هروح عشان سايبه العيال مع أمى و اخاف يتعبوها
عويس / تعالى اوصلك
نسمه تهز راسها و تمشي جنب ابوها لحد باب المستشفي يشوف صابر بيركن عربيته يشوفهم ما ينزلش منها عويس يوقف تاكس و يركبوا و صابر لسه قاعد فى عربيته و ماسك الدريكسيون الشباك يخبط صابر يتخض يلاقيه شاكر يفتح الازاز
شاكر / يعني متأخر و كمان قاعد لى فى التكييف اتغيرت علينا يا عم
صابر يبتسم
صابر/ اركب
شاكر / مش هتنزل مش كنت جاى تطمن على الناس خلينا ننجز يا عم ورانا تمرين
صابر / مش قادر اعمل اى حاجه النهرده
شاكر / يا عم ما تخافش مش هقطعك اوى يعني هبقي رحيم بيك انزل يلا
صابر يبتسم شاكر يلاحظ
شاكر / مالك؟! فى ايه ؟!
صابر يهز راسه لا بالراحه اوى و هو مبتسم
شاكر / تمام وقت ما تحب تحكى انزل عشان دى ما ينفعش فيها تأجيل دول اهلك اللى جولك لحد عندك و مش انا اللى هفكرك بالاصول انزل لهم
صابر ياخد نفس و ينزل يروح مع شاكر
…………………….
فى اوضه نجاه
نجاه / الحمد لله انك بخير اى حاجه تانيه ما تضايقكيش
مهره تبص فى الارض
نجاه / مالك
مهره تهز راسها مفيش نجاه تبص حواليها
نجاه / ماما ... انا جعانه ينفع تشوفي كدا لو ليا اكل او حاجه... تسالي الدكتور يعني بعد اذنك
خديجه تبتسم و تقوم
خديجه / حاضر
خديجه تقوم تطلع بره و تقفل الباب
نجاه / مالك فى ايه ؟
مهره تكتب / مفيش بجد
نجاه / هو انا هتوه عنك ايه اللى حصل عمران جرا له حاجه و مخبيين عليا؟!
مهره تكتب / لا ... هو كويس ... فاق الحمد لله و هينقلوه على البيت
نجاه / ازاى يعني هو مش واخد طلقه فى رجله
مهره تكتب / هو عاوز كدا
نجاه تستغرب
نجاه / بس معنى انه مروح ان حالته كويسه و تسمح دا خبر حلو ... امال انا ما روحتش ليه ؟ ... هم مخبيين عليا حاجه ؟
مهره تكتب/ لا انتى كويسه عمران اللى مستعجل على المرواح انتى هتروحى بكره الصبح
نجاه / ماشي بس برده ما فهمتش انتى مضايقه ليه ؟
مهره تكتب / ما اعرفش عمران لما فاق قفلنى ما فهمتش انا عملت ايه ضايقه
نجاه / و لا حاجه طبعا هتكونى عملتى ايه اصلا ... هتلاقيه ما كانش لسه فاق اوى هم الرجاله كدا لو مش نايمين كويس و فايقين بيبقوا نكديين اوى اساليني انا
مهره تبتسم
نجاه / اديله وقت الدوا و المسكنات تروح من جسمه و هتلاقيه رجع طبيعي تانى
مهره تكتب / المهم يكون بخير مش اكتر
نجاه تحضنها الباب يخبط و خديجه تدخل راسها
خديجه/ ولاد خالتك عاوزين يدخلوا يطمنوا عليكي ادخلهم و لا لسه عاوزين تستفردوا ببعض شويه
مهره تتعدل هى و نجاه و يعدلوا حجابهم
نجاه / دخليهم طبعا اهلا و سهلا
دياب و منصور يدخلوا
منصور / ازيك ... ياسمينا كانت عاوزه تيجي بس انتى عارفه وضعها
نجاه / ربنا يقومها بالسلامه
دياب / حمد الله على سلامه الوحش الصغير بتاعنا
نجاه / الس الس ما انت اكتر واحد فرحان فيا
دياب / انا !! اقسم بالله ابدا
منصور / لا بس انتى سديتى جامد اوى قدامه ابهرتيني
نجاه / عاوزه الفيديو محتاجه اراجع اخطائى
منصور / هى غلطه واحده و انا معلم لك عليها ما تقلقيش الموضوع بسيط
خديجه / غلطه الشاطر بالف
الباب يخبط و عباده يدخل و يسلم
عباده / اهلا بالباشمهندسين بتوعنا اتارى الدنيا منوره
منصور / نورك يا كبير ... عمران روح صحيح
عباده/ اه قام من البنج مش طايق المستشفي و لا عاوز يكلم اى حد الدكتور قال يكمل فى البيت و عبد الله هيتابعه بنفسه غيار على الجرح و كدا و مختار عنده خبره ما شاء الله
دياب / بصراحه ليه حق يضايق الواد ده بقي و لا اللى ماسك ديل قطه مش ممكن دا المفروض نفضي اوضه فى المستشفي و نكتب عليها عمران من كتر ما بينصاب
خديجه / فال الله و لا فالك تف من بقك
عباده / ياما شوفنا يعني لما كنا قده ... و الحمد لله جت بسيطه... المهم مفيش جديد ؟ ما تعرفوش مين اللى وراهم
نجاه / اكيد اللى ما تتسمى بتكسب بونط
عباده / يونس أكد لجابر ان مش هى و دا من قبل اى حاجه تحصل اصلا
دياب / هو مش هى فعلا بس كلابها تقريبا ما خلوش لينا حاجه نقدر نمشي وراها كل اللى عندنا الفيديو و فعلا على قد ما قدرنا اخدنا صورهم و شغالين عليهم و باذن الله نوصل لاى طرف خيط يوصلنا لاى حاجه
منصور / هو انا بس لاحظت حاجه و شغال عليها ... الرجاله دول كان معاهم سلاح ... ضربوا نار على كل الحراس و بالنسبه لعمران كانت الطلقه فى رجله بس كان ممكن يضرب و يخلص
نجاه / عاوزينا عايشين احنا التلاته زى ما حطوا مهره فى العربيه كانوا هيحطونا احنا كمان
دياب / صندوق العربيه مش هياخدكوا
نجاه / ما اعرفش تبقي هى مش بتحب تموت مننا نفس مبدأ فيرا اتفرج على حبايبك و هم بيموتوا لحد ما تتجنن و تقتل انت نفسك بس دا بعدها دا انا لما هقوم من هنا هنتفها
مهره تطبطب على كتف نجاه اللى انفعلت نجاه تبص لها و تهدى
عباده / فى جميع الأحوال مش هنقدر نعمل اى حاجه دلوقت للاسف الكرنفال بتاعها مكتفنا كل اللى هنقدر نعمله اننا نصبر و نشتغل من تحت لتحت انا تليفونى ما بيبطلش رنات كل مره مسؤل شكل
نجاه/ مرعوبه طبعا
خديجه / هتعدى زى ما غيرها عدى هتعدى
الباب يخبط مهره تفتح مختار يشوفها يبتسم مهره تفتح الباب
مختار / اخبار القمر ايه ... عاوزك يا عباده ثانيه
عباده / عن اذنكوا
مختار / اهلا بالرجاله ثوانى و جاي لكم
مختار ياخد عباده بره جوزيف واقف فى جنب شايل شنطتين محلات
مختار / يونس بيستاذنك يدخل يطمن على نجاه و يديها هديه بمناسبه سلامتها
عباده/ مش فايق لهزارك
جوزيف / انا جيت لك بادبى
عباده / بجد !!
جوزيف / كلكوا جوه دياب و منصور كمان جوه فرقت ايه لو دخلت دقيقه سلمت و اديتها الهديه و مشيت يعنى هاكلها فى الدقيقه دى ... انت بتعاملنى كدا ليه
عباده / اعتقد انت عارف
جوزيف / لا مش عارف و لا لاقيلك مبرر ... انا اديتك فرصه و نفذت كل اللى انطلب منى عاوزنى اعمل لك ايه اكتر من كدا عشان تثق فيا ... انا عمرى ما هاذيها
عباده / انا مش عاوز منك حاجه
مختار / ما تعملش حوار يا عباده زياره مريض دا حتى جايب هديه تانيه لعمران هنطلع من هنا على هناك
عباده / انا ما رفعتش الإريال يا مختار اهدى عنى
جوزيف / انت موجود و مختار و دياب و منصور فى نفس الاوضه انهى اريال بقي
عباده يبص لجوزيف
عباده / جبت لها هديه ؟! شكرا بس الافضل تروح لعمران رجاله زى بعض و عادى تهادوا بعض انما انت تهادى نجاه بتاع ايه
جوزيف / ما تقولها فى وشى و تلغى كل كلامهم اللى مثبتيني بيه هنا ... قولى انى عمرى ما هكون واحد منكوا قول لى انى بضيع وقتى و بجاذف بحياتي عشان ناس عمرها ما هتقبلنى
عباده / طول ما انت بعيد عن بنتى انت هتكون ابنى عاوز اكتر من كدا
جوزيف / انا مش عيل صغير هتضحك عليه بكلمتين ... اللى ينطبق على غيرى لازم ينطبق عليا زى ما بتعاقب زيهم زى ما المفروض اتكافئ زيهم
عباده / ايه علاقه كل ده بنجاه اصلا
جوزيف / كان زمانى خرجت على فكره
دياب يطلع بره
دياب / صوتكوا يا جماعه ... هو فى حاجه و لا ايه
جوزيف/ جبت هديه لنجاه و عاوز ادخل اديهالها و اطمن عليها مش اكتر و الهديه مختار شافها و قال مفيهاش حاجه اهى
جوزيف يفتح الشنطه فيها مكوه شعر دياب يستغرب
دياب / مكوه شعر !!
جوزيف / حاجه بناتى اجيب ايه يعني ... انت كنت جوه ليه ما اقدرش انا ادخل دقيقه ليه انا منبوذ وسطكوا
مختار / مش لدرجه منبوذ يعني ما تافورش
جوزيف / انا عاوز اعرف من حقى تصارحونى... لآخر مره بسألك لو ما ليش مكان بينكوا قولى ما تخدعنيش
دياب / الموضوع مش كدا اهدى
جوزيف / افرق ايه عنك انت راجل و انا راجل افرق ايه عنك انت كنت جوه انا لا ليه ؟
عباده / دا ابن خالتها
جوزيف / ايه الامتياز فى كدا يعني زيه زيي عند ربنا احنا الاتنين مش محارم
مختار / مش بتتقاس كدا
جوزيف/ انا ما اعرفش عرفكم انا ليا بشرع ربنا و انا مش بطلب حاجه حرام ... انا حتى اخدت تمنها من مختار سلف عشان تبقي فلوسها حلال اعمل اكتر من كدا ايه عشان تقبلوني
عباده / ممكن تهدى
جوزيف / لا مش ممكن عشان انا جبت أخرى من معاملتك ليا انا ما عملتش اى حاجه وحشه من ساعه ما جيت وسطيكوا هنا و بعمل اللى عليا و زياده مستنى منى ايه عشان تصدقني... قولى و انا اعمله ... مستنى تشوفني ميت ساعتها تترحم عليا زى ابويا و تبنى لى مسجد
دياب / اهدى يا يونس لو سمحت الموضوع مش مستاهل كل ده
جوزيف / مش انت اللى بيعاملوك على انك جربه هنا
عباده/ انا ما عملتش كدا
مختار / ممكن ننهى الموضوع ده كله فى ثانيه على فكره
عباده / مختار
مختار/ دقيقه فى وجودنا كلنا مش هتخسرك حاجه
عباده يبص لجوزيف
جوزيف / اظبطها على الاستوب واتش لو تحب
عباده يبص لدياب دياب يهز راسه اه عباده يبعد من الباب و هو بيجز على سنانه جوزيف يبتسم و يمد ايده يفتح الباب عباده يمسك ايده جوزيف يبص له و الابتسامه راحت من وشه
عباده / انا مش بكدب طول ما انت بعيد عن بنتى انا هعتبرك ابنى و اكتر
جوزيف / نكمل كلامنا وقت تانى ... لما نقعد و أشاور لك على الأخطاء اللى بنتك عملتها فى الاسطبل و رقدتها فى السرير ... مش انت معاك نسخه من الفيديو
دياب يهز راسه جوزيف يفتح الباب و يدخل
جوزيف / حمد الله على سلامتك
نجاه / الله يسلمك فى ايه بره مالكوا
جوزيف / عادى ما تاخديش فى بالك ... اتفضلى
جوزيف يديها كيسه مكوه الشعر تطلعها و تبص لها باستغراب شديد و تبص لجوزيف
نجاه / دى مكوه شعر !!
جوزيف / لو مش عجباكى انا أديت الريسيت لمختار تبدليها انا مش بفهم فى الحاجات دى بس الراجل أكد لى انها انضف حاجه و احسن حاجه نزلت
نجاه / لا هى حلوه تسلم على زوقك و تعبك بس ... مش انت اقصد ... مش عارفه اقولك ايه شكرا طبعا ... انا بس استغربتها منك
جوزيف / بصراحه معاكى حق ... عشان كدا كنت جايب لك هديه تانيه
جوزيف يطلع من جيبه سويس نايف و يديها لنجاه نجاه تشوفها تضحك بصوت و الكل منتبه عباده يبص لمختار و خديجه عنيها رايحه جايه
نجاه / دى انت اكتر فعلا
جوزيف / قومى بالسلامه ..  عن اذنك
جوزيف يطلع بره فى صمت تام و نجاه مبتسمه و هى بتلعب بالسويس نايف و المكوه على رجلها تبص تلاقى الكل متابعها
نجاه / ايه ؟!!
خديجه / ما فيش
نجاه تاخد الهديتين و تحطهم فى الكومدينو جنبها تبص لهم لسه عينهم عليها
نجاه/ ايه بقي ؟!!
............................
فى اوضه امايا
بنت / Они работают на гангстера из США по имени Бернард Кима.
( تبع رجل عصابات أمريكي اسمه برنارد كيما)
امايا / У меня нет на это времени. Пошлите к Флоре и скажите ей, что дело срочное и касается меня, я хочу знать, какое отношение этот человек имеет к Неджату.
( مش فاضيه للهبل ده ابعتى لفلورا و قوليلها أن الحوار ده تبعى و خليها تنجز عاوزه اعرف مال الراجل ده بنجاه )
البنت / затем
( و بعدين )
امايا / Что нам делать с плохими парнями?
( و احنا بنعمل ايه مع الوحشين؟)
البنت تضحك و تهز راسها و تمشي
.........................
فى اوضه عمران
جوزيف يدخل فى سرير عمران
جوزيف / لا شكلنا مطولين استأخر بقي خدنى جنبك ما انا مش هسيبك يا حبيبي لزقه و بغرا
عمران / هو انا المفروض استحملك لحد امتى
جوزيف / تلات ايام ... انا ضيف
عمران / انت مستفز جدا على فكره
جوزيف / اتقالتلى كتير... عادى
عمران / طب انقل على السرير التانى سبنى ارتاح انا تعبان
جوزيف / التعبان مكانه المستشفي مش هنا
عمران / يونس بجد مخنوق ... لو سمحت
جوزيف / من ايه بقي ؟! .. ايه اللى مضايقك اوى كدا ... يا ابنى انا حافظك صم انت هادى اه بس مش للدرجادى احكيلى ايه اللى حصل
عمران / يا اخى انت مالك
جوزيف / اصلك مش اول مره تتصاب و لا اول مره تتصاب قدامها ايه الجديد ايه اللى حصل المرادى زياده خلاك زعلان اوى كدا
عمران / مين اللى عمل كدا
جوزيف / هعرف
عمران / الناس دى كانت بتحاول تخطف مهره على فكره الناس دى تخصنى
جوزيف/ تمام
عمران / انا مش قادر اصدق قد ايه كنت ضعيف ... دول اتنين ... اتنين بس امال لو كانوا عشره
جوزيف / عنصر المفاجاه ... الطلقه فى رجلك ... البانيك اتأك اللى جالك انت و نجاه اول ما شوفتوا مهره بتتشال وتتحط فى العربيه انت عملت اللى عليك و زياده دا غير انهم كانوا جامدين مش هنقدر ننكر ده
عمران / انا عرضت حياتهم للخطر يا يونس
جوزيف / مش لوحدك ...انا و جابر و كل اللى كانوا موجودين ... نصيبك من الخطأ قليل جدا
عمران / هم ما يخصوكش فى حاجه عشان كدا انت قادر تحسبها بالهدوء ده
جوزيف / تفتكر ؟! ... يا اخى اذا كنت انت نفسك تخصنى و مش قادر اسيبك زعلان ما بالك بيهم بقي
عمران / و انت مالك و مالهم اصلا
جوزيف / و انا مالى بيك
عمران / دا سؤال كويس جدا
جوزيف يبتسم و يبص الناحيه التانيه
عمران / روح نام فى السرير التاني ... كدا كدا شاكر ما بيجيش كتير و بيبقي فاضي طول الوقت
جوزيف يروح السرير التانى
عمران / هو انت علاطول بارد كدا ؟!
جوزيف / اتعلمنا مشاعرنا و انفاعالاتنا نخليها لنفسنا
عمران / ما بيجيش عليك وقت بتتمنى فيه انك تصرخ كدا باللى جواك
جوزيف / لا مش عاوز اموت دلوقت انا شكرا
جوزيف يضحك
عمران / دا اكيد مسبب لك ضغط جامد اوى
جوزيف / نظريا المفروض عمليا ... بعد فتره بتوصل لمرحله انك ما عادش فارق معاك اى حاجه ... او على الاقل بيبقي فارق معاك حاجات معينه هى اللى بتدى لحياتك سبب
عمران / عندى فضول أعرف عشت او شوفت ايه وصلك للمرحله دى
جوزيف / و انت فاكر ان عندى وقت احكى كل اللى عشته و شوفته انت عارف انا عندى كام سنه ؟ عارف اليوم الواحد فيهم كان بيحصل فيه أحداث قد ايه؟! بس اقولك كلمه مهمه اوى اتقالت لى ... كل اللى عشته هو اللى خلانى انا ... القدرات و المهارات دى كلها ما اتولدتش بيها الحاجات دى كانت نتيجه اللى عشته … و الحاجات الوحشه الصعبه اللى بتمر بيها هى اللى هتخليك عمران الزيني ... مش العيل الصغير بتاع دلوقت ... تؤ تؤ الراجل الهيبه اللى اسمه بيهز اللى بيسمعوه
عمران / دا لو عشت لليوم ده
جوزيف يتعدل فى قعدته و يقرب من عمران
جوزيف/ هتعيش ... طول ما انت صاحي للدنيا دى هتعيش ...تفوق لنفسك و تسيبك من حركات العيال الصغيره و النسوان دى ... استرجل و انشف كدا افتكر الناس اللى بتحبهم ... الوقت اللى هتقعد تعيط فيه على جنب ده مش اولى فيه انك تتمرن اكتر عشان تقدر تحمى اللى بتحبهم
عمران / انا ما بعيطش
جوزيف / خلاص يا عم ما تزقش ... تعبير مجازى ... مش قادر اشوفك زعلان كدا ... و بعدين دا انا سمعت ان الجو ما استحملش عليك الهوا و جالك جرى
عمران / انت عارف انت لو تركز فى اللى يخصك اقسم بالله احبك انما انت حشرى
جوزيف / يا عم هو فى أجمل من الحب ... ما تتلحلح كدا طالع غشيم لمين … و لا صحيح هتدردح لمين اصلا انت عمرك شوفت بنات و لا اتعاملت مع بنات  … انت عارف لو سبت لى نفسك
عمران / هاخد البلد كلها اسبرنت...يا عم هو انا ناقص بلاوى
الباب يتفتح و مختار يدخل شايل صينيه اكل
مختار / سامع بلاوى ... خير
جوزيف/ ايوه بقي الواحد جعان جدا
مختار / الف هنا
عمران / الباشا عاوز يدردحنى
مختار / لا تعليق
جوزيف / حتى انت ؟! على العموم هو الخسران اساسا... جامده تتبيله الفراخ دى
مختار / الف هنا ... انا راجع المستشفي ... اتمنى ما يبقاش فى اى مشاكل لحد ما ارجع
جوزيف / ما تقلقش عليه ... دا معايا
مختار يبتسم و يقفل الباب و يمشي
عمران/ انت كدا طمنته صح ؟
جوزيف / على فكره مش هستناك اللى ياكل على درسه ينفع نفسه
عمران يبتسم
عمران / الف هنا
……………………….
فى الجبل
شاكر / بقي هو ده اللى مضايقك بالشكل ده يا اخى دا انا قولت مصيبه حصلت
صابر يبص لشاكر
شاكر / اولا دا ابن عمها يعني طبيعي جدا تزوره فى المستشفي... دا اولا ... ثانيا هى موقفها منه واضح دى لسه مفرجه عليه الشارع لما راح لها
صابر / تمام
شاكر / طب بغض النظر عن اللى حصل اى كان سببه ... ايه اللى هيحصل ... انت نأوى على ايه
صابر / كنت راضي و ساكت ... كانت كل حاجه ماشيه كويس ... انا كنت حاطت جزمه فى بقي و مصبر روحى و ساكت
شاكر / يا ابنى انت بتقول ايه ... و لا بتفكر فى ايه اصلا
صابر / مفيش سيناريو واحد فى دماغى مش هياذيها ... مش هيزعلها ... مفيش خطوه واحده اقدر اخدها غير لما هتدفع هى تمنها... لسه فاكر الضحكه اللى كانت فى عنيها زمان ... عمرى ما شوفتها من يومها و كانت بتضحك ... مش هقدر اتعسها اكتر من كدا مش هقدر اكون السبب فى وجعها اكتر من كدا
شاكر / اللى حصل زمان انتوا الاتنين كان ليكوا دور فيه
صابر / لا يا شاكر ما حصلش انا اللى غلطت... أنا اللى نسيت نفسي لو كنت دخلت البيت من بابه و روحت قولت لابوها انى معجب بنسمه و عاوز اتجوزها بدل ما اكلمها و اعلقها بيا و اتعلق بيها ما كانش كل ده حصل
شاكر / مفيش هروب من النصيب يا صابر دا قدر
صابر / ماشي بس على الاقل كانت ... نسمه ...  نسمه دلوقت عندها عيال ... الموضوع ما بقاش انا و هى بس ... بقي فى طفلين ملايكه فى المعادله ما ينفعش اجازف انى
شاكر / مش هيلاقوا احن و لا اجدع منك اب ليهم ... هتربيهم و هتطلعهم رجاله انا واثق فيك
صابر / مش هتبقي سهله
شاكر / و احنا ايه فى حياتنا سهل ... احنا اتخلقنا جامدين اوى كدا عشان تبقي فى الاخر حياتنا سهله ... ايه يا عم الملل ده
صابر / اتخلقنا جامدين ؟!
شاكر ينشف عضلات دراعه صابر يضربه على كتفه و يضحكوا
شاكر / سبها لله اول ما العده تخلص هنروح نخطبهالك و يمين بالله ما ههدى الا لما ربنا يجمع بينكم
صابر / انت طيب اوى يا شاكر ... طيب بسذاجه
شاكر/ بكره نشوف خليك انت بس ورايا و هتشوف … انا هروح اطمن على عمران بيقولوا نفسيته مش احسن حاجه بعد اللى حصل
صابر / سلم لى عليه
شاكر / طب ما تيجي
صابر / بكره و لا يوم تانى فى رواقه
شاكر / قشطه ... ما تعملش حاجه غبيه لحد ما ارجع لك ... خد بالك من الجبل ... و من المج بتاعى انا سايبه مغسول جوه
صابر يمسك زلطه صغيره و يحدفها تحت رجل شاكر
صابر/ امشي يلا امشي ... قال مج قال دا انت
شاكر يضحك
شاكر/ ما انتوا هتسيبوا فيه التفل يعفن و انا بقرف .. بقرف
صابر / الطوبه الجايه فى دماغك  .. امشي
شاكر / ماشي ... سلام
صابر / سلام
شاكر يمشي صابر ينادى على واحد من رجاله قاعدين فى جنب حوالين نار
صابر / على !!! اعملى حاجه دافيه فى المج الازرق بتاع شاكر من جوه
راجل منهم يقوم و يدخل جوه و صابر بيضحك
…………………….
فى سرايا الزنايته
نجاه تدخل وسط اهلها
نجاه / يعني انتوا مش اوفر
خديجه / الحق علينا اننا بنطمن عليكي
نجاه / دا انا ما نزلتش نقطه دم واحده
فارس / ما سمعتيش عن الارتجاج ... النزيف الداخلى
خديجه / تف من بقك فال الله و لا فالك
فارس / ما انا لو تفيت هتزعلوا على الارض الممسوحه دى
عباده/ مش وقت استظراف امك دلوقت
خديجه / بتقول حاجه يا ابو نوجه
عباده / قلب ابو نوجه
نجاه / لا و ربنا انا ما قادره انا طالعه اغير و اخد دش و انام يلا تصبحوا على خير اشوفكوا الصبح
عباده/ ما تنسيش دواكى
نجاه / انا كويسه ... اقسم بالله كويسه... يلا يا مهره مش هنخلص هنا ... ما كانتش عمليه عملتها زمان دى
نجاه تطلع و مهره تطلع وراها
فارس / انا هروح استلم الشيفت من الرجاله لو احتاجتوا حاجه رنولى
عباده / خد بالك من نفسك و عدى على اخوك الاول شوف لو محتاج حاجه
فارس / عيونى
فارس يمشي
خديجه/ شكلك مش ناوى تطلع ترتاح انت كمان ... خير
عباده / لاهطلع بس هروح اتكلم مع جابر شويه عن اللى حصل
خديجه / مش وقته يا عباده ... اصبر شويه الواد مش مستحمل
عباده / ما هو للاسف مش واد دا راجل و كبير و المفروض انه هيبقي الكبير
خديجه / عمل حاجه غلط و حاجه صح و الحمد لله قدر و لطف و بعدين لعله خير تخيل لو كان ده حصل فى الملاهي وسط العيال و الحريم كانت هتبقي كارثه الحمد لله ربك رحيم
عباده / و نعم بالله
خديجه/ اطلع ارتاح شويه و بعدين اقعدوا كلكوا و اتكلموا فى ازاى ده ما يتكررش  ... صدقنى كدا هيكون افضل للكل
عباده / معاكى حق ... انا مش عارف من غيرك كنت عملت ايه ؟
خديجه / بصراحه ما اعرفش ربنا يخلينى ليك بقي
عباده / امين يا ست الستات امين
عباده ياخد خديجه تحت باطه و يطلعوا فوق
.....................
فى اوضه عمران
شاكر يدخل يقيد النور يلاقي عمران و جوزيف كل واحد نايم فى سرير يبتسم و يطفى النور و قفل الباب بالراحه و يرجع يلاقي هند خارجه من اوضتها
هند / انت جيت امتى
شاكر / دلوقت عديت اكلت الكلاب و جيت بس واضح انى اتاخرت اوى
هند / المسكن جامد عليه نام
شاكر / و يونس ؟
هند / مش عارفه ابوك دخل من شويه لقاه نايم ادى الدوا لاخوك و سابهم يكملوا نوم ... لو عاوز ارتب لك
شاكر / لا لا لا ... مفيش مشكله انا هتعامل انا كنت اصلا جاى اطمن على عمران بس اتصلت بالتليفون قالوا نايم قولت اتلكع شويه يكون صحى بس واضح ان ما ليش نصيب بقي ... هو عامل ايه صحيح
هند / ابوك بيقول صعبان عليه نفسه بس يونس اتكلم معاه كتير و خلاه ياكل و ضحكه و فكه على الآخر
شاكر / كويس ... لما يصحى قوليله انى سألت عنه ليفتكر انه مش فارق معايا و لا حاجه
هند / يعني هترجع الجبل تانى ؟
شاكر / ياما البلد زى ما حضرتك شايفه مش وقت ننام فيه فى سرايرنا ياما
هند تهز راسها و هى بتطبطب على دراعه
هند / خد بالك من نفسك
شاكر يبتسم
شاكر / ادعيلي
شاكر يمشي هند تفتح الباب على عمران بالراحه تلاقيهم نايمين تقفل الباب و تدخل اوضتها و تقفل الباب جوزيف يفتح الباب و يبص يمين و شمال
جوزيف / لا ما انا اكيد ما كنتش بحلم يعني
جوزيف يبص على عمران و يقفل الباب و يمشي
....................
فى المطبخ
نجاه بتطلع طبق محشي من الميكرويف
نجاه / و بتاكلونى انا شوربه و تستغربوا هفتانه ليه دا انتوا عيله ظالمه
نجاه تاخد الطبق و تطلع ناحيه اوضتها و هى بتلقط من الطبق جوزيف ينزل يشوفها مش واخده بالها منه خالص يفضل واقف متابعها و مبتسم لحد ما تقرب منه و هى لسه بتاكل
جوزيف / و لما نطلع على الميزان بنعيط
نجاه ترفع عينها تشوفه تتفزع و تيجى ترجع لورا رجلها تفلت و الطبق يقع جوزيف ياخد خطوه بسرعه و يمسكها و يشدها عليه قبل ما تتقلب على ضهرها و هى لسه مفزوعه
........................