الكبيره ٢ بقلم / لولو_محمد

الحلقه ٣٤

((((((((( الكبيره ٢)))))))
#لولو_محمد
الحلقه ٣٤
ناصر / ايوه ... بس علاقتنا كانت سطحيه جدا فى حاجات كتير الدكتوره نور ما تعرفهاش عنى و اعتقد يعني انها ممكن تفرق معاها فى رايها ده و لا حضرتك رايك ايه ؟
عبد العزيز /  و الله انا
ناصر / احنا ممكن نخليها ودى يعني حضرتك عارف ان والدى بيجي المشوار من اخر الصعيد و كدا
عبد العزيز / اسمحلى اقولك ان ده من اسباب تحفظ والدتها انها هتبعد عنها
ناصر / صدقنى دا غالبا هيكون اخر همنا بس اسمحلى اكمل ... انا كل اللى طالبه من حضرتك انك تاذنلى بالزياره اجى و اتعرف عليكوا و تتعرفوا عليا و اتكلم مع الدكتوره شويه و اكيد الكلام هيجيب بعضه و هرد على كل التحفظات دى ... اعتقد ان قاعده زى دى هتوفر وقت كتير جدا علينا
عبد العزيز / و الله يا ناصر يا ابنى انا
ناصر / انا عارف ان البيوت ليها حرمه و دخولها مش بالساهل ... لو حضرتك تحب المقابله دى تكون بره فى اى مكان انا ما عنديش مانع حضرتك شاور الجماعه عندكوا و بلغنى انا رقمى مع حضرتك
عبد العزيز / تمام هشوف و اكلمك
ناصر / بس ارجوك المرادى تكلمنى بجد حتى لو بالرفض صدقنى الانتظار وحش جدا
عبد العزيز يضحك ناصر يقوم يعدل هدومه
ناصر / انا اسف جدا انى عطلت حضرتك و باذن الله مقابلاتنا بعد كدا هتكون فى مكان اللطف
عبد العزيز يقوم يسلم على ناصر
عبد العزيز/ ربنا يقدم اللى فيه الخير
.......................
فى سرايا الزنايته
رحمه بتعمل حواوشي شاكر يدخل المطبخ و هو بيدعك فى عينه و ماسك ازازه ميه فاضيه فى ايده يشوفها يتفاجئ و يطلع و يخبط بالراحه على الباب
رحمه / صباح الخير حماتك بتحبك
شاكر / هتفطريه حواوشي على الريق كدا !!!
رحمه / قالى امبارح نفسه ريحاله قولت اعملهاله مفاجاه
شاكر يبتسم و يناولها ازازه المايه
شاكر / استاذنك تمليلى دى
رحمه / حالا
رحمه تحط الازازه على الفلتر و تفتح المايه و تروح تقلب الرغيف
شاكر / يعني ادعى عليكي دلوقت و لا اعمل ايه الريحه تهبل
رحمه / يبقي رزقك استنى
رحمه تجيب رغيف ملفوف فى ورق فويل و تديهوله
رحمه / لسه حالا شيلاه من على النار رزقك يا رب يعجبك
شاكر / لا تسلمى مستحيل افطر كدا اتعب باقي اليوم
رحمه / تتعب ايه دا عشرين فى الميه دهن بس
شاكر / ما انا ورايا يوم طويل و صعب هتقل و الله
رحمه / رغيف واحد بس ... المايه ثوانى
رحمه تروح تشد الازازه و تقفلها و تناولها لشاكر
رحمه / اتفضل ... و الله هيعجبك دوق انت بس و قولى رايك
شاكر يبتسم و يهز راسه و يلف يلاقى مختار واقف الابتسامه تروح يروح يدخل
مختار / صباح الدلع يا ام انس ... انت ايه اللى فى ايدك ده يا شاكر
مختار ياخد الساندوتش من ايده يرجعه الطبق
مختار / دا اكل اخوك الصغير لما تجوع خلى امك تعملك
شاكر عينه فى عين ابوه
رحمه / الاكل كتير يابا و انا بعمل علاطول بزياده اتفضل انت كمان واحد
مختار / تسلمى يا ست البنات انجزى نفسك و كفايا عليكي كدا و اللحقى اطلعى اكلى جوزك قبل ما ينزل الصلاه
محمد يدخل
محمد / صحيت يا عم باشمهندسين مصر كلهم ... الله على الروايح اللى تفتح النفس للحياه
مختار/ الف هنا ... تعال يا شاكر احنا زاحمين المطبخ على الفاضي
رحمه/ بالله عليك يابا تاخد لقمه دا انا عملاه نضيف و طازه
محمد يشد رغيف و يقطم
محمد / و سخن موحوح تسلم ايدك
مختار / الف هنا على بدنك
مختار يزق شاكر و يمشوا و شاكر مضايق
.......................
فى مطبخ فيلا نجاه
جابر يدخل و هو مبتسم و كله حماس
جابر / يا صباح الروا
جابر يشوف جوزيف هو اللى بيحضر الفطار الابتسامه تروح من وشه جوزيف يحط اومليت فى الطاسه
جوزيف / صباح الخير نمتوا كويس
جابر / صاحى بدرى يعنى خير
جوزيف/ انا اصلا عندى مشكله فى النوم ... ما اقدرش اقول عليها مشكله ... المهم جعت قولت اقوم احضر لقمتين كدا لحد ما تصحوا ... على فكره انا شيف ممتاز
جوزيف يغرف الاومليت فى طبق
جوزيف / حماتك بتحبك دوق
جابر يبص للطبق
جوزيف / اخص عليك انت لسه بتشك فيا
جوزيف يمد شوكه و ياخد قطعه و ياكل و يستطعم
جوزيف / فنان
جوزيف يروح يقلى بيض تانى فارس يدخل
فارس / صباح الخير ... متجمعين عند النبى
جابر / امال نجاه فين اتاخرت فى النزول دا انا قولت نزلت من بدرى كالعاده
فارس / بطنها وجعاها اوى و بايته فى الحمام بقالها ساعه
جوزيف / ليه مالها
فارس / تعرف انت لو تركز فى اللى يخصك انا احبك اوى
جوزيف / تعرف انت لو تعرف حجمك هتعيش اطول
جابر / خلاص يا يونس
جوزيف يطفى البوتجاز و يروح يدخل اوضته و يرزع الباب
جابر / هطلع اطمن على نجاه
فارس / يا عم هتنزل ما تقلقش هى كويسه حالا هتلاقيها نطالنا ما تقلقش هى لو فيها حاجه هسكت يعنى  ... ايه الفطار الحلو ده مين اللى عامله
جابر يتنهد و يبص لفوق و يروح يكمل مكان جوزيف و فارس واقف يلقط من الاطباق
.....................
فى اوضه شاكر
مختار / عينك اللى بتبص بيها على مرات اخوك دى هخلعهالك يا شاكر انت فاهم و لا لا
شاكر / الكلام جاب بعضه ما حصلش حاجه لكل ده هو انا كنت اعرف انى هلاقيها فى المطبخ و انا نازل اشرب كانت صدفه
مختار / انا مش عيل صغير هتضحك عليا
شاكر / مش كل مره هتشوفنى بكلم رحمه هتنصبلى المشانق  يا ابويا انت اخترت محمد و فضلته عليه
مختار / هو اللى سبق بالطلب قدام الناس مش على اخر الزمن
شاكر / العيل اللى لا دخل جامعه و لا بان لمستقبله ملامح
مختار / اتكلم قدام الناس و سبق و ادينا للراجل كلمه لو كنت انت اللى سبقت كنت جوزتهالك و قولتله هو نفس الكلام
شاكر / ماشي جوزتهاله ... قولتلى اسكت سكت اكتم فى قلبك كتمت ما تقعدش بقي كل شويه تقيد فيا النار و تفكرنى باتهاماتك دى ما ناصر و عمران بيكلموها قولت لحد فيهم الكلام ده انا نفسي بكلم بنات عمامى و بنات خالاتى و نضحك و نتسامر عمرك قولتلى حاجه و لا عشان جتلك فى يوم و طلبت رحمه فى الحلال هتفضل العمر كله تندمنى و تشك فيا ... انا عمرى ما هبص على مرات اخويا عمرى ما هخونه ... اقسم بالله قصه و اتقفلت و عمرى ما فتحتها و لا حتى بيني و بين نفسي من سنين ما تقعدش انت بقي يابا فى كل فرصه ترش على الجرح جاز
مختار / يعني لسه موجود ما لمش
شاكر / موجود و لا لا دى حاجه تخصنى لوحدى بيوجعنى لوحدى
مختار / ما تسيبش باب للشيطان و ترجع
شاكر / اسيب البيت يعني ؟! هسيب البيت هسيب البلد كلها لو تحب بس انا عمرى عمرى ما هخون اخويا لو يرضيك ابات فى الجبل وسط المطاريد و الديابه موافق بس ما تبصليش كدا ما توجعنيش باتهام اقسم بالله برئ منه قولى انا غلطت فى ايه اقسم بالله ملتلى الازازه و كنت ماشي اقسم بالله لو اخر حرمه فى الدنيا تحرم عليا يابا اقولك ايه تانى ارحمنى بقي ارحمنى و حس بيا انا بقالى سنين صابر و ساكت و دى اخرتها
شاكر يروح يقعد بعيد و يمسح دمعه نزلت من وشه
مختار / شاكر
شاكر / انا عمرى ما هاكل فى لحم اخويا يابا ... عمرى
مختار يروح يحضنه الباب يخبط شاكر يمسح وشه
شاكر / صاحي  ... نازل اهو ... الصلاه يابا ... عن اذنك
شاكر يقوم و يمشي و مختار يتنهد
.........................
فى اوضه نجاه
نجاه خارجه من الحمام تلاقي كارم قاعد مستنيها
نجاه / انت لسه هنا ما نزلتش
كارم / قولت اطمن عليكي الاول عامله ايه احسن
نجاه / بخير تمام يعنى دا مغص بسيط مش حوار يعني راح خلاص راح شوف انت حالك ما تشغلش بالك بيا انا تمام
كارم / مش محتاجه منى حاجه مش ناقصك حاجه
نجاه / هو فى ايه يا كارم ... الله !! ... تسلم ربنا ما يحرمنى منك انا تمام
نجاه تفتح الدولاب و تاخد طقم
نجاه / اسبقنى و انا هغير و احصلك
كارم / تمام ... لو ناقصك حاجه قوليلى ماشي
نجاه / مش ناقصنى ... انزل بقي
كارم / حاضر
كارم يفتح الباب و يطلع بره ينزل السلم يشوف جابر و فارس بيرصوا الاكل
كارم / الله اكبر ايه الحلاوه دى على الصبح
فارس / دا اللى ما يتسمي
كارم / امال هو فين
فارس / فى اوضته
كارم / ما تاكلوش استنوه عيب
جابر / روح ناديه ورانا صلاه مش فاضيين ... هى نجاه عامله ايه
كارم / كويسه الحمد لله بتلبس و نازله
جابر يهز راسه كارم يروح يخبط على جوزيف جوزيف يفتح الباب
كارم / الصلاه هتاذن يادوب تلحق تفطر عشان ما نتاخرش على المسجد ... مش انت هتصلى معانا برده و لا ايه
جوزيف / اختك عامله ايه
كارم / هو ايه حكايتكوا كلكوا هو فارس قالكوا ايه بالظبط ... تعال افطر تعال دا انا ربنا يعيني تعال
جوزيف يبتسم و يروح مع كارم اول ما يعدى من ورا فارس يضربه بالراحه على دماغه
فارس / لو طالبه معاك غباوه قولى
كرام / كل كل استغل بقك ده فى حاجه مفيده احسن ... امال فين عمران
عمران ينزل
عمران / موجود و جاهز ايه الاخبار صباح الخير
جابر / ايه البرنامج النهرده
عمران/ بالنسبالى زى كل يوم ما فيش تغير شوفوا انتوا بقي
فارس / بصراحه انا المفروض ارجع احنا طولنا اوى على الفاضي... مش شايف فايده يعني و لا ايه يا خواجه
جوزيف / التقصير من عندكوا
جابر / و انت الفايده الوحيده منك ما تطلعش غير عن طريق الماخور اللى كنت عاوز تاخد نجاه فيه
جوزيف / تلعب فيه تنافس فيه تقيس قدراتها الحقيقيه فيه
جابر / كلام فاضي ... كل كل
جوزيف / هاكل
جابر / و بعدين دى خناقه يا قاتل يا مقتول تقيس ايه بقي ما تضربها بالنار اسهل و ما تقولش مش واثق في قدراتها عشان لو هى مين انا عمرى ما هعرضها للخطر و اقف اتفرج دا انا احلقها و اركب حلق
جابر يمسك دقنه و ودانه
جوزيف / نجاه فيها عيب خطير ... بتلعب جوه الصندوق ... القواعد و الاصول و الاخلاق ... الحاجات دى جميله ... بس مع اللى شبهك و الناس اللى عاوزين راسكوا ما لهمش اى علاقه بالكلام الجميل ده ... دول ابعد ما يكون عن الحاجات دى ... و العينه بينه
جوزيف يشاور على نفسه
فارس / ما هى علمت عليك يا وحش الوحوش و لا نسيت
جوزيف / حصل لما اديتها الدافع و هو ده المطلوب اثباته
جابر / الحكى فى المحكى نقصان عقل السيره دى انفضت
نجاه تنزل الكل يسكت تقعد
نجاه/ الله اكبر امال ساحلينى ليه معاكوا كل يوم
جوزيف / عنينا انتى بس تؤمرى
نجاه / تسلم ايدك
جابر / ايه الخطه النهرده ناويين على ايه
جوزيف / تمام ... ما تلعبش تتفرج
جابر يخبط بكفه على الترابيزه بقوه
جابر / قولت لا ... اصرارك مريب انت فى ايه وراك ياض انت
جوزيف / للاسف حاليا ما عادش ورايا حد بس لو عاوز ... هيبقي ورايا جيوش
جابر / و مستني ايه
جوزيف / الخطه شغاله زى ما رسمتها بالملل ما بيغيروش فيها حرف و دا اكبر امتحان ليا لان الافخاخ اللى فيها لو قدرتوا تفلتوا منها ابقي خنت
كارم / مفيش اى احتمال لذكائنا خالص كدا
جوزيف / احتمال كبير بس مش بالساهل ... اصلى حريف
جابر / و نجاه جزء من اللعبه دى
جوزيف / تؤ ...نجاه كانت معايا هناك الباقي بقي انكوا تاكلوا بعض و دا كان سهل اوى
نجاه / بيتهيالك
جوزيف يبتسم و يكمل اكل
جابر / انقل التحدى بره
جوزيف / ما ينفعش
جابر / بشوقك يا عم الجامد ... قدرت تفكر و تخطط لكل ده و جيت على دى و عطلت... مش بالعها
جوزيف يناوله كبايه ميه
جوزيف / بلعها بشويه مايه
نجاه / انتوا بتتكلموا فى ايه ابويا قال لا يعني قطمت ناهيه
جوزيف / و انتى يعني بتسمعى كلام ابوكى فى كل حاجه
نجاه / اه
جوزيف يبصلها و يبتسم
جوزيف / ماشي
نجاه / ماشي ... حصل ... ما فيش حد ما بيغلطش ..  بس انا بتعلم من اخطائى
جوزيف / و ايه اللى حصل يعنى كلتك ما انتى رجعتى سليمه زى الفل ما فيكيش خربوش
نجاه/ ابويا زعل ... و انا عندى راسي تطير و لا ان ابويا يزعل منى
صوت اذان
جابر / الفجر يلا
الزنايته يقوموا و يفضل جوزيف و نجاه بيبصوا لبعض جوزيف يقوم يحصلهم و نجاه تتنهد
.....................
على باب المسجد فى البلد
مغاورى / انا ما اعرفش هيقدر يخلص امتى بس احنا لازم نتحرك
عباده / تمام بكره او بعده بالكتير
مغاورى / الليله يا عباده ما تضيعش وقت الناس دول ما ينضمنوش
عباده / انا خايف عليك على فكره
مغاورى / ما تشغلش بالك بيا نفذ انت بس و ربنا هيفرجها ... هو مختار فين
عباده / ما اعرفش ما كانش مظبوط و جه صلا و مشي من غير لا سلام و لا كلام لما ابقي اشوفه ابقي اكلمه اشوف ماله ... بس الحوار شكله يخص شاكر لانه راخر ما كانش مظبوط خالص
مغاورى / شاكر ايه دا النسمه اللى فى عياله اكتر واحد مريحه ربنا يباركله فيه
عباده يبتسم بسخريه
عباده / هو فى حاجه اسمها ابنه مريحه ابوس رجلك ارحمنى دا احنا طافحينه سوا
مغاورى يبتسم
مغاورى / احمدوا ربنا ... هروح اشوف اللى ورايا ... على معادنا
عباده يهز راسه مغاورى يمشي
..........................
فى فيلا نجاه
نجاه نايمه فى السرير بتلعب فى الموبايل الباب يخبط
نجاه / مين
كارم يفتح الباب و يدخل شايل مج
كارم/ عملتلك حاجه دافيه ... ينسون ... و من غير سكر زى ما بتحبيه
نجاه تبتسم و تتعدل كارم يدخل يناولها المج
نجاه / هو فى ايه ؟؟ انا بدات اتوغوش ... تسلم ايدك
كارم / اتوكسي
نجاه / حاضر.. عرفت منين بقي انى بحب اليانسون من غير سكر اعترف مين غششك 
كارم / انا اخوكى على فكره انا عارف عنك كل حاجه
نجاه / لا يا راجل
كارم / امتحنيني
نجاه / امممم سؤال صعب ... طب قول انت كدا عارف ايه
كارم / عارف انك ما بتحبيش الكوسه بس ما بتقوليش عشان ما تهنيش النعمه فبتاكليها على عينك
نجاه / يا مجرم عرفت منين
كارم / احنا مش صغيرين يا بنتى
نجاه / طب تعرف ايه تانى
كارم / عارف انى بحبك اوى
نجاه / انا بتثبتنى صح ... ولا اوعى يكون ليك مصلحه فى الاخر
كارم / هو انا هقعد كل شويه اقولك اتوكسي
نجاه / لا خلاص خلاص ... تسلم ايدك عامله حلو ... انا بصراحه اتفاجات كنت فكراك ما بتعرفش تعمل لنفسك كبايه شاى
كارم / ما هو بصراحه انا فعلا ما بعرفش اعمله ... يونس اللى عمله بس انا اللى قولتله يعمله كدا
نجاه / يا نهار ابيض ... و سايبنا قاعدين هنا اوعى اوعى
كارم / يا بنتى مفيش تحت غيره هو و اخوكى بيتمرنوا فى الجيم تحت عمران و جابر مشيو
نجاه / يا ابنى ليموتوا بعض انت مش عارف اخوك قوم قوم ننزل نقف معاهم  ... استنى جابر كمان مشي !! راح فين
كارم / ما اعرفش قال وراه مشوار و خد عربيته و مشي و عمران خد الموتوسيكل بتاعه و احنا رجعنا على هنا و ما تقلقيش انا كدا كدا نازل لاخوكى بس قولت اطمن عليكي الاول
نجاه / انا زى الفل و دلوقت كمان بقيت احسن تسلملى  ... اسبقني و انا هحصلك
كارم / تمام
كارم يقوم يروح يبوس راس نجاه و هى مستغربه و يمشي يقفل الباب وراه و هى بتبصله باستغراب
نجاه / خير اللهم اجعله خير هو فى ايه
نجاه تستغرب و تقوم
......................
فى اوضه شاكر
هند / طب افهم فى ايه
شاكر / مفيش حاجه عادى يعني هطلع الجبل اقعد يومين وسط الرجاله عادى
هند / رجاله ايه هو مش صابر مقبوض عليه
شاكر / يا امى اهدى ما هو الجبل دلوقت من غير حد
هند / و هو الجبل اشتكالك يعني
شاكر / قوليلى ياما حضرتك لما بتبصيلى بتشوفى ايه ؟
هند / مش فاهمه
شاكر / يعني شايفه عيل صغير ما يعرفش يحمى نفسه و لا راجل كبير
هند / انت اليوم اللى بتكبره يا حبيب قلب امك انا بكبره معاك و لو فاكر ان قلقى عليك هيقل حتى لو عندك خمسين سنه دا لو كنت لسه عايشه ساعتها
شاكر / ربنا يديكي الصحه و طوله العمر
هند / هيكون قل تبقي غلطان انت ابنى ... حته منى انت و لا اخواتك نفس القلق عمران فى حته و ناصر فى حته و انت دلوقت كمان طب و انا !!
شاكر / انا بخير و فى اى وقت هجيلك برنه تليفون و بعدين انا اكيد مش طالع اللعب يعني ابوس ايدك ياما انا لسه ورايا هم ما يتلم
هند / تمام يا حبيبي ... اللى تشوفه اعمله ... اعملك حاجه تاخدها معاك ؟
شاكر / لو مش هتعبك لقمه حلوه للرجاله
هند تهز راسها و تمشي شاكر يقعد على السرير مضايق و كاتم جواه
.....................
فى النادى
عمران و مهره كل واحد على فرس بيلفوا ورا بعض
مهره / فكنت بفكر اكلم نجاه و اخليها تيجي معايا بس مش عارفه هيبقي فى مكان ليكوا كلكوا و لا لا فكنت خايفه يبقي فيها احراج مش عارفه فقولت اسالك بينا و بين بعض يعني اشوف رايك 
عمران / اهم حاجه انك تبقي فى فريق نجاه لو عاوزه تطلعى كسبانه
مهره / هى اللى المفروض تبعد عنى لو عاوزه تكسب انا عمرى ما جربت يعني ضياع الضياع
عمران / دى سهله خالص و ما اعتقدش كمان ان وزن البندقيه اللعبه دى هيكون تقيل عليكي امال لو شلتى سلاح حقيقي هتقولى ايه
مهره / هو انتوا حياتكوا علاطول كدا زى تركيا و الاحداث اللى فاتت دى
عمران / اكيد لا بس المؤمن منصاب و اولاد الحرام ما خلوش لولاد الحلال حاجه
مهره / معاك حق بس اشمعن انتوا
عمران / ما حدش يعرف و لا حتى اهلى احنا جينا الدنيا لقيناها خربانه فيانعيشها و نبقي رجاله يا على الدنيا السلامه
مهره / دا كلام كبير على فكره
عمران / شيفانى صغير صح ؟
مهره/ سنك صغير
عمران / طب ما انتى اصغر و مع كدا بتتكلمى و لا اجدعها خطيب انا سمعتك ... بطلتى ليه صحيح
مهره تبص فى الارض
عمران/ كلنا فى حياتنا اوقات صعبه المهم انك تبقي مؤمنه انها هتعدى و انك قدها و انك مش لوحدك
مهره / سهل تقول كدا و ليك عيله زى دى
عمران / ما هى عيلتى هى برده السبب فى كل اللى كنتى بتقوليه من شويه ... انا حياتى فى خطر لمجرد انى زينى
مهره / و دا هيبقي مصير عيالك برده ؟
عمران يسكت
مهره / باباك و انت بتتولد كان عارف ان دى هتبقي حياتك
عمران / ايوه اكيد
مهره / مش فاهمه... ازاى يجيبك دنيا هو عارف انك مهدد فيها بالموت
عمران / عشان دى مهمته انه يعمر الارض و يربى و يعلم و يمرن و يكبر عشان اكمل من بعده ربنا يديله الصحه و طوله العمر و انا كمان هعمل كدا
مهره / ايوه بس الاطفال محتاجين بيئه امنه مستقره يتربوا فيها
عمران / الاطفال محتاجين يتربوا الاول و بعد كدا كل حاجه تانيه هتبقي تمام
مهره / ما دا اللى بقوله
عمران/ لا انا اقصد ان كل اللى احنا فيه ده لان فى جيل كامل ... قولى اجيال ... سقطت تربى ... فطلع زى ما انتى شايفه حواليكي ... ناس بتاكل بعض عشان فلوس و سلطه ... مش مهم بقي حلال حرام صح غلط هيضر مين هيدوس على مين المهم يوصل ... حتى لو هيوصل لجهنم و بئس المصير ما يهموش
مهره / هو ايه اللى وصل الحوار للنقطه دى
عمران / تعرفى يا مهره زمان كان اللى بنقول عليه دلوقت عيل بيقود جيوش الحريم كانت بتطلع رجاله عندها نخوه تشيل مسؤليه فتحنا الغرب و نشرنا دينا و علينا رايته و دا ما عجبش الجماعه اياهم فزرعوا فينا الدلع و المسخره و نفسيه العيل و المداديه و يا عيني يا ابنى الواد بقي يقع امه تجرى عليه تشيله لحد ما نسي انه يقدر يقوم لوحده و سنه ورا سنه بقي اتكالي فى كل حياته
مهره / الانسان بيحتاج ايد تطبطب عليه
عمران / لا تعطنى سمكه و لكن علمنى كيف اصطاد ... شجعيه و سانديه بس ما تشيليش عنه المسؤليه علميه يشيل همه و يواجه مشاكله و يحلها اديله فرصته يستكشف قدراته و يثق في نفسه
مهره / اللى ايده فى المايه مش زى اللى ايده فى النار
عمران / و عشان انا اتربيت فى النار بقولك الكلام ده احنا فى زمن انتشرت فيه الفتن و علي فيه صوت الرويبضه و ما عادش لا قدوه و لا ثوابت مين ليه مصلحه فى كل ده ايه السبب فى كل ده
مهره / نظريه المؤامره
عمران / قال رسول الله صلى الله عليه و سلم لا تقوم الساعه الا على شرار الناس ... يعني كل جيل لازم يكون اشر و اسوء من اللى قبله لحد ما نوصل لليفل الوحش القيامه تقوم بقي
مهره / انت الكلام معاك خطر
عمران يبتسم و يبصلها و يكمل
مهره / انا كمان طول عمرى بقول كدا بس للاسف ما حدش بيسمع فبطلت اتكلم
عمران / انا هسمع
مهره / و انا هسبق
مهره ترفص الفرسه بكعبها الفرسه تتحرك اسرع و تجرى و عمران وراها بيضحك
........................
فى الشركه عند على
السكرتيره تفتح الباب اكرم يدخل على يقوم يستقبله
على / اهلا اهلا اكرم بيه نورت مش تقول يا راجل انك بره معقول ... انا ليا كلام تانى مع الحيوانه اللى بره سامحنى جديده و ما تعرفكش
اكرم / ما حصلش حاجه لكل ده انا جايلك فى موضوع مهم و خطير جدا
على / خير قلقتنى اتفضل اقعد
على و اكرم يقعدوا
على / تشرب ايه
اكرم / و لا حاجه ... انا جايلك بخصوص مهره
على يستغرب
على / مالها مهره ... اللى اعرفه ان مروان نقل حاجته و عاش معاها فى الشقه و واخد باله منها جدا انا بنفسي مسلمه مصروف زياده ليها عشان ما يخليهاش محتاجه لحاجه
اكرم / امال بتشتغل عند رامى سيف الحق ليه
على / رامى مين !! رامى صاحب مروان ... بتشتغل ايه عند رامى دى ؟!!
اكرم / سكرتيره ... اقل مساعده للسكرتيره ... بنت على الدسوقى بتشتغل سكرتيره فى شركه تحت السلم يا باشمهندس
على يبان عليه الضيق
اكرم / انا للاسف علاقتى بكارمن او مهره وحشه جدا بسبب الطلاق بس مش لدرجه انها تروح تشتغل عند عيل زى رامى ايه ما موتناش يعني و افتقرت للدرجادى الناس تقول علينا ايه ... طب ما لو محتاجه شغل ما شركتك واسعه يا اخى شغلها اى حاجه ... ابعتهالى ... يا سيدي شغلها خيال مأته و انا هبعتلك مرتبها بس ما تفضحناش كدا
على / انت بتقول ايه يا اكرم انت فاكرنى بخلان على بنتى انا ما قصرتش فى حاجه انا فعلا ما اعرفش حاجه عن الموضوع ده اقسملك بالله كاتب شيك لمروان يكفيها عشر سنين قدام
اكرم / مروان اه .. عن اذنك يا على
اكرم يمشي و على بيفرك يقوم يجيب الموبايل و يتصل بمروان و هو متعصب
على / ايوه يا حيوان ... خمس دقايق و تكون واقف قدامى حالا انت فاهم و لا لا ... هتعرف لما تيجب اما نشوف اخرتها مع مصايبك اللى ما بتخلصش
........................
فى المطبخ عند نجاه
نجاه بتتكلم فى التليفون و هى بتقلى بتنجان
نجاه / ما طبيعي اقلق خرجت من الصبح ما رجعتش لدلوقت و ما اعرفش انت فين و لا هترجع امتى لازم اقلق طبعا ... طب ما تتاخرش هعملك المسقعه زى ما بتحبها ... فى حفظ الله ... سلام
نجاه تقفل و تشيل البتنجان من الزيت تسمع صوت باب اوضه جوزيف بيفتح و هو بيطلع منها يبصوا على بعض يبتسم
جوزيف / عامله ايه دلوقت
نجاه / ما تافوروش دا مغص وراح لحاله
جوزيف / معايا مسكن
نجاه / ما باخدش مسكنات
جوزيف / طب انا خارج هتعوزى حاجه من بره؟
نجاه / رايح فين انت كمان
جوزيف / ما انا لو قولتلك مش هترضي تيجي معايا برده
نجاه / بلاش
جوزيف / بلاش
جوزيف يمشي نجاه تقفل البوتجاز و تروح وراه
نجاه / يونس ..  يونس
جوزيف يقف و يبصلها
نجاه / انت رايح هناك تعمل ايه
جوزيف / البتنجان هيتحرق
نجاه / شيلته و طفيت البوتجاز انت رايح فين و هتعمل ايه من حقى اعرف لو عاوزنى افضل واثقه فيك
جوزيف / زى ما بديكى لازم اديهم عشان يثقوا فيا انى لسه معاهم
نجاه / و هتديهم ايه بقي
جوزيف / هو جابر فين
نجاه / زمانه جاى ... يونس ما تغيرش الموضوع
جوزيف / بتثقى فيه ؟
نجاه / اكيد دا ابن عمى
جوزيف يبتسم
نجاه / انت بتحاول تقول ايه يعني انتى ما تعرفيش جابر فين و واثقه فيه ثقى فيا زيه لا يا يونس اسفه انت مش زيه
جوزيف / بالظبط ... عن اذنك
نجاه / استنى
جوزيف / ايه تانى
نجاه / فى حاجه بتحصل صح
جوزيف / اكيد طبعا ... يا بنتى دايما فى حاجه بتحصل
نجاه / طب غششنى ... ما تقولهاش صريحه ... لمح
جوزيف يضحك
نجاه / ما بهزرش
جوزيف / شاهين
.........................