الكبيره ٢ بقلم / لولو_محمد

الحلقه ٩٣

((((((( الكبيره ٢))))))))
#لولو_محمد
الحلقه ٩٣
نجاه تروح ناحيه مهره
نجاه / عمران عاوز يتكلم معاكى فيديو كول ايه رايك
مهره تهز راسها نجاه تفتح الفيديو كول
عمران/ ازيك
مهره تبتسم
عمران يوريها كرنيه
عمران / كنت مروح تعبان فدخلت من تخريمه كدا قال يعني بختصر السكه و توهت لقيت نفسي قدام المركز ده قولت ييمكن ربنا بعتني هنا لسبب و دخلت و شوفت ناس كتير من كل الأعمار بيتعلموا لغه الإشاره و سجلت
نجاه تشد التليفون
نجاه / لغه اشاره ايه يا ابنى ارحمنى بكره تتكلم و تبقي زى الفل انت يائس كدا ليه
عمران / و لا يائس و لا حاجه احنا هنخسر حاجه ادينا بنتعلم حاجه مفيده و بكره لما ربنا يشفيها بالسلامه و تتكلم نبقي نشوف هنعمل ايه
نجاه / بس انت يا ذكى مش ناسي حاجه ؟
عمران / ايه ؟
........................
نجاه / مهره ما بتعرفش لغه الإشاره هتكلم مين انت بقي ؟! خيالك فى المرايه
مهره تضحك
عمران / هو انا اتقنتها يعني ما تتعلم و كلنا نتعلم انتوا ما فيش حاجه بتعجبكوا ابدا و بعدين انتى اش اخششك اصلا ادينى مهره
نجاه تتنهد و تديها الموبايل
عمران / ايه رايك فى اللى قولته
مهره تهز راسها موافقه عمران يبتسم
عمران / انتى عامله ايه دلوقت
مهره تبتسم
عمران / خدى بالك من نفسك تمام
مهره تهز راسها
عمران / اسيبكوا فى حفظ الله سلام
نجاه تاخد الموبايل
نجاه / اقسم بالله الواد ده مجنون و مش طبيعي ... يا بنتى هتخفى و تتكلمى و صوتك هيجلجل من تانى لغه الإشاره دى اخر حاجه
مهره تحضن نجاه نجاه تبتسم و تطبطب عليها
........................
فى بيت جابر
الباب يخبط جابر يروح يفتح يلاقي مختار
مختار / غطست ما قبتش جيت اطمن عليك خير فينك ؟
جابر/ اتلخمت شويه فى الشغل خير فى حاجه ؟ ... اتفضل الاول اتفضل
مختار يدخل
مختار / يزيد فضلك عامل ايه
جابر / الحمد لله كنت بشوف حوار الإنفاق اللى شاهين نازل زن عليه ده ما اعتقدش ان الخريطه المرسومه مظبوطه
مختار / ليه ؟
جابر / عشان اتعمل حفر اكتر من مره فى مناطق منهم عشان مواسير المايه و الصرف و التليفونات و الكهربا و النت معقول ولا مره لمحوا الإنفاق دى
مختار / ما فكرتش فى العمق
جابر / اكيد فكرت بس عمق الإنفاق اللى لقيناها مش ماشي مع الكلام ده
مختار / انت بتحاول توصل لايه
جابر / انا لسه ما وصلتش لحاجه عشان اتكلم فيها انا بس بفكر مع حضرتك بصوت واطى
مختار / يونس بيقول نقفل المداخل و المخارج اللى لقيناها و نريح بالنا
جابر / ما هو برده بيقول اننا لقينا اللى ما عادلوش اهميه و ان فى غيرها ما لقيناهوش و هو ده بالظبط اللى انا بتكلم فيه الخريطه دى سطحيه اوى و فى لعبكه تحت اكبر من كدا بكتير ... كل ده اتعمل امتى و ازاى من غير ما نحس
مختار / خمس سنين مش شويه
جابر/ خمس سنين ما فيهمش غلطه واحده تخلينا نشك ان فى حاجه بتحصل للدرجادى نايمين على ودانا
مختار / او ملبوخين فى مليون مصيبه تانيه
جابر يهز راسه
مختار / بتغير على الحرق بتاعك
جابر / اه الحمد لله ما تقلقش عليا
مختار / امال اقلق على مين ... اخبارك انت و نجاه ايه ؟
جابر / مش فاهم السؤال
مختار/ يعنى لسه برده مش لاقى منها قبول ؟
جابر يتعدل فى قاعدته
جابر / هى كلمتك فى حاجه ؟
مختار / و هى لو هتكلم هتكلمنى انا يعنى
جابر / امال هتكلمنى انا ؟!
مختار / و ناوى تفضل كدا لحد امتى
جابر / هو فى حاجه ؟
مختار / يعني بدردش معاك ... و لا امشي
جابر / تمشي ايه بس ايه الكلام ده يا خالى دا بيت حضرتك و انا اللى امشي انا بس متفاجئ بالسؤال اصل المفروض انكوا عارفين كل حاجه
مختار / عارفين ... بس مش فاهمين ... و لا اى حاجه فى اى حاجه ... ابيض
جابر يضحك
مختار / هو انت ناوى تستناها لحد امتى ؟
جابر / حضرتك ايه رايك ؟ يعني لو كنت مكانى كنت هتعمل ايه ؟
مختار / انا مش مكانك و مش هكون ما اقدرش اديك رايي
جابر / هستناها لحد ما تتجوز غيرى طول ما هى ما اتجوزتش يبقي فى احتمال ربنا يهديها و تعقل و توافق
مختار/ و ساعتها هتعمل ايه لما تتجوز يعني قصدى لو هى اتجوزت انت هتعمل ايه
جابر / هركز فى مستقبلى عادى
مختار / عادى ازاى يعني
جابر / عادى ... لو لا قدر الله يعني ربنا كتب عليا الموضوع ده هتفهم عادى ازاى
مختار و جابر بيبصوا لبعض
جابر / انا كدا كدا هحترم قرارها و الحاجات دى فى الاول و الاخر قسمه و نصيب اللى مكتوب لى هاخده... غصب عن عين الطخين ... و الرفيع
مختار يضحك جابر يبتسم مختار يهز راسه موافق
جابر / حضرتك عاوز تقول لى حاجه ؟
مختار/ عاوزك طيب و بخير ... عاوزك مبسوط
جابر / اطمن يا خالى انا طيب و بخير و مبسوط الحمد لله
مختار / الحمد لله ... الحمد لله
........................
فى الشركه
شاهين قاعد مع منصور
شاهين / احنا هنلبس كل كلب طوق فيه جى بى اس و نربط الكلب بحبل طويل و ننزل كل واحد منهم من فتحه شكل و بكدا نقدر نحدد بشكل فعلى و عملى اتجاه الإنفاق
منصور / فكره حلوه بس الكلاب هتنزل السلم الراسي ازاى
شاهين / هنزلهم احنا و هم يسرحوا
منصور / تمام سهله و احسن من الأفكار التانيه مع ان الرأى الغالب فى الموضوع ده نصب الفتحات دى خرسانه و كل ما يبان غيرها نصبها و ندفنهم فى بطن الارض على حالهم
شاهين / مين اللى اقترح الفكره دى
منصور / جابر و دياب و غالبا هيكلموا الكبير فيها النهرده
شاهين / بس احنا لو نزلنا نقدر نلاقى معلومات اكتر ممكن نوقع منهم حد و نقرره
منصور / نقرر مين ما وقع فى ايدنا الحريم و قررتهم بنفسك و قالولك على الإنفاق و اللى فى الاخر يونس قال انها فخ
شاهين / بس انا عايز انزل يا منصور ... انا حاسس اننا هنلاقى حاجه مهمه اوى الخواجه مش عاوزنا نوصل لها الناس دى كانت عايشه عيشه كامله تحت الارض بيطلعوا يضربوا و يغطسوا تانى الإنفاق دى هتنفعنا لو قدرنا نسيطر عليها هنتحرك براحتنا احنا كمان بعيد عن عنين الحكومه و اللى ما يتسموش
منصور / ازاى و هم اللى بنينها و عارفين كل مداخلها و مخارجها
شاهين / ما بقولك بعد ما نسيطر عليها
منصور يتنهد
منصور / لما نقعد قول رايك و اللى الكبار هيقتنعوا بيه هو اللى هيتم
شاهين / بس دياب و جابر اتنين و انا بطولى و انت اكيد هتقف مع اخوك
منصور / و يونس معاهم كمان ... يعنى حتى لو انا معاك هم تلاته ... دا غير راى الكبير و عمى مختار ما يمكن يختاروهم ساعتها رايي و رايك مش هيفرقوا ... بس مش يمكن دا لمصلحتك يا شاهين ... مش يمكن الإنفاق دى فيها أذى لينا و ربنا عاوز يحوشه عننا ... خلينا نسدها و نرتاح
شاهين / احنا ما نعرفش كل المداخل و المخارج يا منصور
منصور / و دا سبب تانى يخلينا ما نجازفش ... انت عاوز رايي
شاهين / يا ريت
منصور / نبلغ احمد باشا بحوار الإنفاق ده
شاهين / انت بتقول ايه يا منصور
منصور / نرميها فى عب الحكومه و هم يتصرفوا و يحققوا و يمققوا و يشوفوا مين اللى عمل كدا
شاهين / بتهرج دى الدنيا هتتقلب علينا و الصحافه هتشم خبر و هتبقي سيرتنا على كل لسان
منصور / ما احنا سيرتنا على كل لسان و لا انت ما شوفتش الاخبار النهرده
شاهين / اخبار ايه
منصور / السرك فتح باب الحجز للعروض بتاعتهم اول الشهر و عليك خير كل سنه و انت طيب
شاهين / يا ربى يا ولى الصابرين دا انا امى هتنفخنى
منصور / خير فى ايه ؟
شاهين / عاوزه تروح يا عم الحج و مامنانى احجز لها فى اول عرض هى و ابويا
منصور يضحك
منصور / ما تشيلش هم يا سيدي انا هخلص ليك الموضوع ده بنفسي
شاهين / و انت مش جاى
منصور / ياسمينا راقده فى البيت هسيبها و هروح سيرك برضه بتهرج اكيد
شاهين / و ربنا انت اللى بتهرج سايبها و قاعد هنا يا برودك يا جدع
منصور / دلوقت دياب يجي و انا اروح اريح شويه قبل بالليل ما حصلش حاجه يعني
شاهين/ هو ما جاش ليه صحيح ... ما شوفتوش من ساعه صلاه الفجر
منصور / ما هو كان مطبق صلى الفجر و روح نام ما احنا مقسمينها شيفتات
شاهين / يعني كان فى الشركه هنا امبارح ؟
منصور/ بيبقي فى الشركه كل يوم هو احنا لينا مطرح تانى
دياب يدخل
دياب / السلام عليكم ... اهلا اتارى الشركه منوره ازيك
شاهين / الحمد لله فينك مستخبى فين كدا
دياب / خير كنت عاوزنى فى حاجه و لا ايه
شاهين / لا ما اتحرمش كنت بطمن عليك بس
دياب / انا الحمد لله فى نعمه
شاهين / ربنا يديمها عليك ... أنا مروح تيجي معايا يا منصور
منصور / لا اسبقنى انت انا لسه هقفل شويه حاجات كدا و هحصلك
شاهين / تحب استناك
منصور / و تربط نفسك و تعذبها ليه يا عم توكل على الله انت و انا هتلاقيني فى ضهرك على طول بإذن الله
شاهين / طب تمام عن اذنكوا انا بقي
منصور / فى حفظ الله فى حفظ الله
شاهين يمشي و منصور يقفل الباب
دياب / خير كان عاوز ايه
منصور / اهو بيرغي
دياب / خد بالك منه انا مش مرتاح له فى حاجه مش مظبوطه
منصور / و ايه الجديد ما دا العادى من ابن خالك ... صحيح فى حد اتصل بخالك و قاله على اللى عملتوه امبارح بس هو ما علقش و لا كلم الكبير و لا اى حاجه
دياب / هيتكلم وش لوش بالليل فى القاعده
منصور / بس اكيد خالك برده عارف اننا عرفنا انه عرف
دياب / و عشان كدا مش هتكلم فى اى حاجه و لا كاننا عرفنا او عملنا حاجه هم كبار فى بعض يصطفوا و خالك مش صغير مش هيعمل حوار من حاجه هبله زى دى
منصور / تمام ... انا ماشي هتعوز حاجه ؟
دياب/ سلامتك ... فى حفظ الله
......................
فى المستشفي
مختار واقف مع نجاه
نجاه / هو طبيعي تطول و لا انا بيتهيألي
مختار/ وراكى حاجه؟
نجاه/ لا مفيش بسأل بس
مختار يهز راسه
نجاه / كلمت جابر ؟
مختار/ ايوه
نجاه / خير ماله قافل على نفسه ما تعرفش ليه ؟! ليكون فى حاجه مضيقاه
مختار / مشغول شويه
نجاه / بايه ؟
مختار / بشغله
نجاه / شغله!! تمام
مختار / خير فى ايه مالك مستغربه ليه هو انتى حد قالك ان جابر عواطلى و لا حاجه ؟
نجاه/ اكيد لا طبعا بس مستغربه من امتى ... اقصد يعني ايه اللى جد شغله اوى كدا ... أنا اصلا كنت بسأل عشان اطمن عليه يعني ليكون تعبان و لا حاجه
مختار/ لا هو كويس بس لو عاوزه تطمنى عليه اعتقد ان نمرته عندك
نجاه / تمام
مختار / هو انا ممكن اسالك سؤال
نجاه/ اكيد اتفضل
مختار / انتى فى اى احتمال انك تدى لجابر وش ؟
نجاه / نتجوز يعني
مختار يهز راسه
نجاه / انا مش بفكر فى الجواز دلوقت خالص لا من جابر و لا من غيره
مختار / لحد امتى ؟
نجاه / لحد ما احس انى مستعده ... انا حياتى ليها أهداف تانيه خالص و الموضوع ده اتكلمنا فيه كتير اوى
مختار / انك تبقي الكبيره ؟!
نجاه / انا عارفه انكوا مش هتنولوهانى بس انا اكتر واحده فيهم تعبت
مختار / هو بغض النظر عن اى حاجه فى الدنيا انتى عاوزه تقولى انك هتقعدى من غير جواز لحد ما عباده بعد عمر طويل يموت
نجاه / بعد الشر عنه
مختار / ما اللى بتقوليه ده نفسه شر يا نجاه... ايه مش هيفرح بيكي و لا يشيل عيالك و لا يلاعبهم ... معقول هدفك الوحيد فى الحياه بيبدأ بعد ما ابوكى يموت
نجاه / بعد الشر عنه ما تقولش كدا
مختار / انتى اللى بتقولى يا نجاه مش انا انتى اللى موقفه حياتك و حياه الكل حواليكي عشان حاجه يا عالم هنعيش و نشوفها و لا لا حبيبتي انتى ما عدتيش صغيره انتى مستوعبه
نجاه / عنست يعني و لا ايه
مختار / بمقايس ناس كتير اه يا قلب عمك احنا صعايده بناتنا ما بيقعدوش الفتره دى كلها من غير جواز
نجاه / طب ما احلام اكبر منى و ما اتجوزتش بتعملوا لها كل الكلام ده
مختار / احلام ليها ظروفها
نجاه / ان خطيبها مات ؟ وقفت الحياه هناك يعني ؟
مختار / ايوه هى دى شويه البنت كانت رتبت حياتها كلها و فجاه كل حاجه راحت ما نقدرش نجبرها او نضغط عليها دلوقت دا غير ان فى سبب تانى قوى اننا نصبر
نجاه / ان مفيش عريس بيزن صح ؟!
مختار / نسيتي بلال صح ؟! احلام مش هتتجوز غير حد مننا
نجاه تستوعب و تبص حواليها و هى بتفكر
مختار / يا زيني يا جارحى مفيش تالت انتى فاكره ان مش بيجى ليها عرسان بيجي و بنرفض من بره بره و بنتحجج بخطيبها و نفسيتها من غير حتى ما نرجع لها عشان مرعوبين ... الموضوع على فكره ما بقاش واقف عليكي و لا عليها ... كل حريمنا و حريم الجوارحه فى نفس الكفه ... مش هنديهم لحد ... بقينا برانويا الحمد لله ... حاجه نكد
نجاه / ربنا فوق الكل
مختار يهز راسه
مختار / و نعم بالله
نجاه / طب ما انا ممكن اتجوز جابر و ابننا يتخطف عادى
مختار / ربنا فوق الكل فاكره ؟!
نجاه / ايوه ما انا برد على حضرتك الخوف ده مش مبرر مش هنوقف حياتنا عشان خايفين
مختار / خايفين ايه عيب تقولى الكلام ده احنا أكبر من كدا بكتير ... احنا مرعوبيين
نجاه و مختار يضحكوا
مختار / احنا ممكن نستحمل اى حاجه فى الدنيا  .. نتغربل بالرصاص و نتزل و نتعجز و نتشوه و نموت عادى جدا بس ما فيش شعره واحده منكوا تتلمس ... احنا ما بنخافش على اى حاجه فى الدنيا قد ما بنخاف عليكوا ... انتوا فخرنا السبب الأول اننا قادرين نفرد ضهرنا و نرفع روسنا لو وقعتوا وقعنا و مش هتقوم لينا قومه تانى
نجاه / باذن الله مش هيحصل لينا اى حاجه وحشه ما تقلقش
مختار / نرجع لجابر ... بيقولى انه هيفضل صابر عليكي لحد ما تتجوزى اعمل ايه انا دلوقت ادور لك على عريس تانى يمكن ربنا يفك النحس ده
نجاه / و لا تانى و لا تالت انا الموضوع مش فى دماغى
مختار / يعني معقوله عشتى الفتره دى كلها مفيش حد حتى لفت انتباهك من بعيد كدا ... بصي انا عارف انك ممكن تنكسفى منى
نجاه / و لا هتكسف و لا حاجه صدقنى... اقسم لك بالله انا المسأله بالنسبالى مش كدا خالص
مختار / طب و يونس
نجاه / ماله يونس ايه علاقته بالموضوع اصلا
مختار / مفيش
نجاه تتنهد
نجاه / دا كلام بابا صح ... كلمنى على فكره
مختار/ يونس ؟!!
نجاه / لا ابويا ... من وقت للتانى يا بيرمى من تحت لتحت يا بيدخل دوغرى و يهبدها فى وشي مش فاهمه مين اللى حط الكلام ده فى دماغه بس
مختار / كلام ايه ؟
نجاه / ان ممكن يكون فى حاجه بيني و بين يونس
مختار / مستحيل يعني؟!
نجاه / مستحيل طبعا
مختار / ليه ؟!
نجاه / اولا عشان مستحيل ابويا هيوافق و اكيد انا مش هحطه فى موقف زى ده
مختار / بس !! عشان كدا بس .. يعنى لو ابوكى وافق انتى موافقه؟!
نجاه / لا ما اقصدش ما انا رافضه المبدا بس بتكلم من ناحيه تانيه يعني و بعدين انا مش فاهمه خيالكوا ده جايبينه منين على فكره يونس نفس دماغى
مختار / مش فاهم
نجاه / يونس مش بيفكر فى الجواز خالص
مختار / و انتى اش عرفك
نجاه / معقول واحد مر بكل اللى عاشه ممكن يفكر يتجوز و يخلف و يعيد التجربه تانى مستعد ان ابنه يعيش كل القرف اللى احنا عايشينه ده مستعد يكون ليه ايد بتوجعه يتربط منها المجلس مش هيسيبه و لا هيسيب مراته و لا هيسيب عياله و يونس ذكى و فاهم ده كويس
مختار / بس القلب له أحكام
نجاه / يونس ما بيمشيش ورا قلبه يونس زيي بالظبط بيحكم عقله
مختار يبتسم باستهزاء و بعدين يفكر
مختار / انتى بتحاولى تقولى ان يونس عمره ما هيفكر يتجوز بكيفه يعني مثلا لو أتقدم لك مثلا هيكون غالبا مجبر عشان الحوار القديم اللى كان قايل عليه لما كان جوزيف
نجاه / يا نهار ابيض يا عمى ازاى لفلفت الكلام و وصلتنا للنقطة دى بس
مختار / ما انا لازم افكر فى كل الاحتمالات على فكره ده نفس راى ابوكى
نجاه / يونس اتغير ابويا عمره ما هيقدر ينسي اللى فات و يصدق اى حاجه غير انه لسه جوزيف
مختار / لا ابوكى شايف ان يونس بيحاول يقرب منك عشان يتجوزك و يخلف منك و يكمل المخطط القديم
نجاه / عمره ما هيعمل كدا
مختار / انتى لسه قايله دلوقت انه
نجاه / انه مش هيتجوز لانه ... احنا بنضيع وقت و جاز على فكره ... يعني عمالين نحط احتمالات و نجادل فى حاجه ما تخصناش اصلا يعني اعتقد ان كل الإجابات دى مش عندى و لا عند حضرتك و لا حتى عند يونس ... ما حدش عارف النصيب مخبى لينا ايه و لا نيه كل واحد ايه
مختار / طب خلينا نفرض حاجه بعيد عن كل الكلام ده
نجاه / اتفضل
مختار / لنفرض انه فعلا اتغير و فعلا حبك و قرر انه يواجه الدنيا كلها عشانك زى ما رمى نفسه للسايبورج عشان يدي جابر وقت يهربك انتى بقي رايك ايه ؟
نجاه / ابويا مش هيوافق
مختار/ ابوكى وافق انتى رايك ايه قدامك جابر و قدامك يونس هتختارى مين
نجاه / هختار مين ازاى يعني هى فساتين هبدل فيهم
مختار / يا بنتى مجرد سؤال متقدم لك اتنين مرتاحه لمين اكتر
نجاه / هو ايه اللى وصل الكلام لهنا اصلا
مختار/ وصله اللى وصله و صدقيني الكلام ده مش هيطلع برانا احنا الاتنين ... مرتاحه لمين اكتر
نجاه / مش عارفه ... هصلى استخاره مثلا مش عارفه
مختار / ما قولتيش انك رافضه الجواز من المبدا و عاوزه تبقي الكبيره و الكلام العبيط اللى قولتيه على جابر
نجاه / لا على فكره بقي السؤال ما كانش على يونس لوحده ... كان مقارنه بين جابر و يونس فى العموم
مختار / تمام
نجاه / انا بتكلم بجد على فكره
مختار / دا مجرد حوار تخيلى يا نجاه اهدى مجرد كلام عبيط
نجاه / ايوه كلام عبيط ... مجرد خيال على فكره
مختار / تمام اهدى
نجاه / انا هاديه انا بس زهقت من القاعده ... انا هقوم اتمشي شويه
مختار / تمام بس ما تبعديش
نجاه تهز راسها و تقوم و مختار متابعها
......................
فى اوضه مهره
مهره فاتحه فيديو كول
عمران / اكيد مش من اول مره مع الوقت هتتحسنى انا متاكد انتى بس حاولى تغيرى جو ... امبارح حصل موقف غريب مش عارف المفروض احكيهولك و لا لا
مهره تنتبه
عمران / ايلين جت لى و واضح ان فى سوء تفاهم و خطيبها فاكر انى اتجوزتها هى ... المهم روحت النهرده و اتكلمت معاه شاب مش وحش كويس يعني ... واضح ان ماعندوش فكره نهائى بوجودك ... انا حكيت ليه كل حاجه ... مش كل حاجه كل حاجه بس ... يعني ... اللى ينفع يتحكى
مهره تكتب فى نوته و تجيب الكاميره على الكلام
مهره / اخبار الدراسه ايه
عمران / كويس الحمد لله الاسبوع الجاى هنبدأ الشفوى و تسليم المشاريع و انا مظبوط كل حاجه مع صحابى
مهره تكتب / طب و هتعمل ايه فى المشروع بتاع التخرج
عمران / عادى شغالين و مرتبين الدنيا باذن الله خير ... انتى بتسألى عشان باباكى يعني ؟؟ ما تقلقيش ايه اسوء حاجه ممكن يعملها ... احنا مرتبين كل حاجه و هو من مصلحته انه يخلص منى و يخليني اتخرج و ان كان على التقدير فدى لا هتاكل و لا تشرب مش فارقه بالنسبالى مش باخد الشهاده عشان اقدم على بعثه انا بتعلم للعلم مش اكتر
مهره تبص له بحزن
عمران/ انا كنت فاكر انى هتعلم فى الكليه حاجات كتير اوى ... بس للاسف نظام التعليم عندنا ضيق اوى و متصمم على مستوى معين من الدكاتره و الطلاب ... أنا بتعلم اسرع بالممارسة العملى و السيلف استدى للاسف ما كنتش لاقيني فى الكليه من البدايه بس قولت شهاده و خلاص
مهره تكتب / انا عارفه انك عبقرى بس حرام تعبك يضيع
عمران / ما هو مش هيضيع كلها حاجات بسيطه و اتخرج و اشوف هعمل ايه فى الجيش و بعدين هشوف اى مصنع من البلد اتمرن فيه او ابدء البيزنيس بتاعى
مهره / بيزنس ايه ؟
عمران/ ما قررتش اوى بس عاوز الفتره الجايه اركز انى الاقى حاجه تساعدك تتكلمى لسه ما فيش حاجه محدده فى دماغى بس ان شاء الله لما تمشي شويه فى العلاج هتفرق معايا جدا انا فعلا بدات اعمل سيرش و نزلت كذا كتاب و باذن الله اقرائهم و احدد هبدا منين بالظبط
مهره تكتب / تبدا من امتحاناتك عشان تخلص انا مش هطير
عمران يبتسم مهره تكتب
مهره / هتنجح باذن الله انا واثقه زى ما بدعت فى محنه نجاه و قدرت تساعدها هتقدر تساعدني
عمران / انتى اللى هتساعدى نفسك و هتبقي احسن من الاول كمان
مهره تبتسم 
عمران/ شوفتى الاكاديميه بتاعتك ؟
مهره تهز راسها لا
عمران / ليه دا انا قولتلهم يدوكى تلاته من الخيول بتاعتى تستخدميهم ... تستخدميهم بس انما انا ما افرطش فيهم ابدا انا بقولك اهو دا انا مضيع شقي عمرى كله عليهم
مهره تضحك و تكتب
مهره / هو انت خلصت مذاكرتك ؟
عمران / طولت فى الرغى صح ... و الله ورايا بس مخنوق من القاعده هنا
مهره تكتب/ اخرج
عمران/ ما ليش مزاج
مهره تكتب / خد لابك و روح اقعد ذاكر فى كافيه و اشرب قهوه و غير المود روح مع صحابك فى اى مكان أو روح الجيم او روح النادى او روح نام و ارتاح و قوم الصبح بدرى شوف هتعمل ايه
عمران / تمام ... انا كمان هسيبك ترتاحى ... سعيد انى اطمنت عليكي
مهره تبتسم و تقفل و تحط الموبايل جنبها و تتنهد بحزن
.............................
فى اوضه مختار
هند / انت بتثق فيا ؟!
مختار / و الا ما كنتش حكيت لك يعني
هند / طلع نفسك من الموضوع ده حالا
مختار / بتهزرى صح
هند/ هتخسرهم كلهم يا مختار
مختار يبص لها
هند / عباده و يونس و نجاه و جابر هتخسرهم كلهم طلع نفسك من الموضوع و سيب النصيب هو اللى يقول كلمته
مختار / بقولك البت ميلاله
هند / و مايله لجابر و ضحت بروحها من غير تفكير عشانه
مختار / ما كانش فى يونس وقتها او يمكن زى اخوها
هند / مختار ... عباده مش هيوافق
مختار / ماشي ... دلوقت ... بس يمكن بكره
هند / انت عملت الصح لما سكت يونس و هو باذن الله هيسمع كلامك و يصبر و يبعد عنها و جابر عرف دلوقت و انه ما يتكلمش دى فى حد ذاتها
مختار / رعبانى ... سكوت جابر بيرعبنى انا عارفه هدوئه ده راعبنى
هند / جابر عاقل و مش انانى و بيحبها جابر انسب ليها من يونس على فكره
مختار / و هى رأيها مش مهم ؟
هند / رأيها ايه هى دى ليها راى دى ما لهاش دماغ اصلا دى عبيطه
مختار يضحك
هند / انا ما بهزرش ... نجاه محتاجه تفوق لنفسها و تركز واحده غيرها كانت من اول ألم فاقت مش دى واخده علقه موت و لسه مكمله برده بنفس التفكير.. اضرب كمان يمكن اتوب
مختار / الجيل ده ما يعلم بيه الا ربنا
هند / لا يا حبيبي مش مشكله جيل ما فى بنات كتير زى الفل يتمنوا ربع اللى هى فيه هو بس النصيب
مختار / ما يمكن نصيبها مع يونس
هند / مفيش فايده يعني ... على فكره جابر عمره ما هيسامحك ... ما تنساش انه اصلا شايل منك ... يا مختار شهادتك فى يونس بقت مجروحه من كتر ما بتختار صفه
مختار / بحابيله يعني ؟
هند / اه دلوقت اه بتحابيله و على حساب الكل
مختار / طب و نجاه ؟!
هند / تمام نجاه موافقه و يونس كويس ... عباده رافض هتعمل ايه ؟ هتكسر ابوها ... اكيد لا كلمه عباده هى اللى هتمشي و هو عمره ما هينسي ... دا انا مش قادره انسي انت ازاى بتفكر كدا بجد ... العلاقه بينكوا لو انكسرت عمرها ما هتتصلح ... جابر هو اللى باقي لك
مختار / انا ما بختارش بين جابر و يونس .. نجاه اللى بتختار
هند / مفيش فايده يعني
مختار / انا فاهمك انتى اللى مش فهمانى بقولك
هند / ما ينفعش تحط النار بين كبريت و جاز و تقعد تستنى هتمسك فى مين الاول
مختار / قصدك ايه
هند / يعني حتى لو دلوقت مشدوده ليونس فغالبا ده مش حب ... ممكن انبهار بجو جديد هى مش متعوده عليه هى حفظت جابر ده بيخرج عن المألوف... بيبهرها بيلعلط فى عنيها بحركاته و استعراضاته بس اول ما بيبعد بتنساه
مختار / مين قالك
هند / ما حدش قالى انا بتكلم عموما ..  لو مشينا بالمبدا ده مش بعيد لو لقت حد اجمد من يونس تتشد له برده ... اقولك حاجه ... ممكن يكون مشاعرها ناحيه يونس نفس مشاعرك كدا ..  وارد جدا
مختار/ و اللى هى ايه بقي
هند / تعاطف ... يعني شاف كتير و اتمرمط و قدر فى وسط الصعاب يثبت نفسه و اخيرا لقى نفسه و قرر يختار الصح و الكل بيحاربه فصعبان عليها و واقفه جنبه بدل ما يرجع للى كان فيه
مختار يتنهد
هند / طلع نفسك من الموضوع و سيبه ياخد وقته مش يمكن تظهر حاجات جديده
مختار يهز راسه
هند / انا بتكلم جد
مختار / قولت حاضر
هند / قولت اه ... بس ابقي قابلني لو عملت غير اللى فى دماغك
مختار يبص لها
هند / هو انا مش عرفاك
مختار يرفع حاجبه و هو مبتسم 
هند / و الله ما هتعمل الا اللى فى دماغك و لا هتسمع لحد
مختار / لا حول و لا قوه الا بالله
مختار يضرب كف على كف و هو بيضحك
......................
فى شوارع البلد
عربيات رش الناموس بتلف الشوارع قدام المسجد واقف الشيخ مع راجل و اتنين شباب بيتكلموا العربيه تعدى
الشيخ / شايف يا وله لما تدى العيش لخبازه بيديك حاجه عظمه ازاى
شاب ١ / و الله عندك حق يا عم الشيخ البلد بقت ريحتها حلوه امال هم كانوا بيرشوا لنا ايه السنين اللى فاتت
الراجل / مرض بعيد عنك دخان يكتم على نفسك و يهيج صدرك بيموتونا مع الناموس حسبي الله و نعم الوكيل فيهم... كلها شغل رشاوى و محسوبيات و قرف
شاب ١ / اه و الله هو احنا بقينا عالم تالت من شويه
بنات تعدى و شاب ٢ عينه عليهم مش قادر يشيلها
الشيخ / يا اخى ربنا يهديك بقالى ساعتين فى الدرس بتكلم عن غض البصر و انت كلتهم بعنيك
شاب ٢ يبص فى الارض من كسفته
شاب ١ / ما هم برده يا عم الشيخ مش مظبوطين كدا و
الراجل/ ما تلم نفسك انت راخر ايه اللى جرالك انت كنت شوفت منهم ايه ... لينا كلام تانى لما نروح البيت حقك عليا يا مولانا حقك عليا انا حقك عليا عن اذنك عن اذنك
الراجل يزق الشابين يمشوا و الشيخ واقف يضرب كف على كف
.......................