((((((( الكبيره ٢))))))
#لولو_محمد ٢
الحلقه ٢٤
كارمن / طب على الاقل اديني سبب مقنع
مهره / انا هرتاح هنا اكتر
كارمن / براحتك ... ناقصك حاجه ؟
مهره / شكرا
كارمن / اشوفلك داده تانيه تقعد معاكى تخدمك
مهره / لا ما لوش لزوم انا كبيره و بعرف اخدم نفسي
كارمن/ مهره انتى فى حد فىؤ حياتك
مهره تتصدم و تدارى وجعها من السؤال
مهره / حضرتك تقصدى ايه
كارمن / عاوزه تعيشي لوحدك ليه
مهره / ما انا طول عمرى لوحدى ... لو كنت عاوزه اغلط مين كان هيمنعنى و لا انا لازم اغلط هنا فى الشقه يعني
كارمن / انا ما اقصدش كدا بس يعني
اكرم يدخل مهره تضايق
..................
اكرم / انا ما حبيتش اجى من بدرى قولت اسيبكوا شويه لوحدكوا ... ازيك يا مهره
مهره / الحمد لله ازى حضرتك
اكرم / انتى زعلانه منى من اللى عملته امبارح
مهره تتصدم من بجاحته تبص لامها
اكرم/ انا اسف مش هعمل كدا تانى
كارمن / ما تافورش يا اكرم حصل ايه يعني لكل ده ... جرا ايه يا ست مهره انتى هتعملى علينا كبيره و لا ايه
اكرم / لا يا كارمن حقها ... انا مش هعمل كدا تانى يا مهره ... بس ارجوكى ارجعى بيتك
مهره / هنا بيتي
كارمن / عيب بقي يا مهره اكبرى لحد و يا ستي كبرتى و عاوزه خصوصيه عنينا مش هندخل الاوضه تانى الا اما نخبط يا ستي عندك مفتاح فى الاوضه خلاص بقي ما تكبريش المواضيع
مهره / ماما عشان خاطرى
كارمن / انا مش هسيبك تعيشي لوحدك... يا بنتى انا ما فيش دماغ اصلا هتقلقيني عليكي ليه ما تقعدى معايا
مهره / خلاص شوفولى داده تقعد معايا ... انا موافقه
كارمن / للدرجادى ... يعني هنا عندك مع واحده غريبه احسن من بيتك عندنا وسطينا ... طب احنا زعلناكى فى ايه اوى كدا ما انا لازم افهم
اكرم / مهره لو سمحتى عشان خاطر اخواتك ... لازم ترجعى ... و مش هيحصل غير اللى انتى عوزاه
مهره تهز راسها موافقه و هى بتمنع دموعها تنزل ما تقدرش تمسحها و تدخل اوضتها اكرم يجي يحصلها كارمن تمنعه
كارمن / سيبها تلم حاجتها ... هو انت لما دخلت الاوضه كانت لابسه ايه
اكرم / ما اخدتش بالى كانت مستغطيه اصلا و بعدين يا ستى غلطه و مش هتتكرر
كارمن / انا بقول يمكن يعنى اتحرجت منك انت عارف البنات بيحبوا ياخدوا راحتهم و كدا
اكرم / مش هكررها يا كارمن عرفت غلطتى خلاص
كارمن / انا عارفه انك بتحبها كانها بنتك بالظبط
اكرم / هى بنتى يا كارمن ... بنتى... هسبقك على العربيه هاتيها و تعالى
اكرم يمشي كارمن تفتح باب اوضه مهره تلاقى مهره بتعيط فى التليفون
مهره / عشان خاطرى عشان خاطرى
كارمن / بتكلمى مين يا مهره وريني الموبايل ده وريني
كارمن تشد التليفون من ايد مهره
كارمن / الو ... مين معايا
على / انا على يا كارمن فى ايه مالها مهره
كارمن تبص لمهره منهاره من العياط
كارمن / ما لهاش بتدلع
على / يعني ايه بتدلع البنت منهاره و خدنى عندك و كلام غريب جدا فى ايه
كارمن تفتح الاسبيكر و ترمى الموبايل على السرير قدام مهره و تقعد قدامها
كارمن / عندك انك تتذلى لابوكى عشان يقبل ياخدك عنده اهون من انك تعيشي فى بيت الراجل اللى كان مستعد يرمى الدنيا ورا ضهره عشانك
مهره / انا عاوزه اعيش لوحدى
كارمن / ليه من حقى افهم ليه ... على تحب تاخد مهره تعيش عندك ... على رد ينفع مهره تيجي تعيش عندك ... ساكت ليه يا على ما ترد ... سامعه مش عايزك مش عايزك
مهره / بابا
كارمن / ما بيردش ... ما ترد يا على بيه تحب تاخد مهره
على / اللى يريحها
مهره / و انا عاوزه اجى اعيش معاك ان شالله اشتغل بلقمتى بس خليني جنبك
كارمن / دى اخرتها !! ده جزاتى !! بتبيعينى عشانه !!
مهره / عشان خاطرى يا بابا عشان خاطرى
كارمن تقف و تزعق
كارمن / اولعى .. انا فتحتلك بيتي سنين و فى الاخر عملتى ايه ؟! روحيله ... اشتغلى خدامه فى بيته ليه و لمراته و عياله ... لو فاكره انه هيساوى بينكوا زى ما اكرم عمل معاكى تبقي غلطانه ... انتى بالنسباله و لا تسوى و ابوكى ده عمره ما اعتبر نفسه ابوكى اصلا تلاقيه اصلا ... عمرك ما فرقتى معاه ... عمره ما سال عليكى حتى الملاليم اللى كانت بتوصلك كانت بتوصل اوتوماتيك من الحسابات هو نفسه ما يعرفش هى كام اصلا و لا تكفيكى و لا لا و الداده بتاعتك لما كانت الفلوس ما بتكفيهاش كانت بتتصل بيا انا لانها لما بتتصل بيه ما كانش بيبعت و ساعات ما كانش بيرد اصلا ... لو كنتى اعتمدتى على ابوكى ده كان زمانك متى من الجوع .. ساكت ليه ما ترد بتبعت لبنتك كام رد ... تعرف بتصرف كام تعرف الطقم اللى لبساه بكام مشتركه فى نادى ايه بتلعب رياضه ايه بتكلفنى كام فى الشهر ما ترد يا على رد عيد ميلادها امتى تقدر تقولى اسامى صحابها بتحب ايه او بتكره ايه
مهره / تعرفى انتى
كارمن تتفاجئ و مهره تنهار من العياط
مهره / تعرفى اسامى صحابى ؟ بحب ايه ؟ بكره ايه ؟ تعرفى الطقم اللى لبساه بكام تعرفى عنى حاجه انتى تعرفى عنى حاجه
كارمن / انتى بنت قليله الادب
مهره تقف و تصرخ
مهره / ايوه ... حصل انا قليله الادب عديمه الربايه لا انتى عمرك ربيتيني و لا هو يعرف عنى حاجه و مع كدا لا عاوزين تسيبونى فى حالى و لا عاوزين ترحمونى ... انا مش عاوزه منكوا حاجه مش عاوزه فلوسكوا مش عوزاكوا حتى تسالوا عنى اخرجوا من حياتى اكفونى شركوا ارحمونى من اذاكوا ابعدوا عنى بقي اخرجوا من حياتى انسونى انسونى منكم لله ربنا ينتقملى منكم حسبي الله و نعم الوكيل فيكوا حسبي الله و نعم الوكيل فيكوا
مهره ترمى نفسها على اقرب كرسي و تعيط كارمن تبصلها بغضب و تمشي ثوانى و مهره تسمع صوت الباب بيترزع
مهره / يارب خدنى بقي انا تعبت انا مش قادره استحمل الدنيا دى
صوت على من التليفون / مهره
مهره تجرى تقفل التليفون و ترمى نفسها على السرير بتعيط
.........................
فى فيلا مصر اللى جوزيف فجرها
العربيات تدخل تركن و الكل ينزل جوزيف يقعد على كبوت العربيه و يبص على الفيلا و الرجاله ينزلوا الشنط
نجاه / هو انا نفس اوضتى و لا الديزاين من جوه اتغير
جابر / ما غيرناش حاجه كل حاجه زى ما هى من جوه و اه اوضتك فى مكانها اسبقي و انا هطلعلك الشنطه
نجاه تبتسم و تدخل جوه و فارس و كارم ينزلوا باقي الشنط و يشيلوها و يدخلوا
عمران / انا هخرج شويه حد عاوز حاجه
جوزيف / ممكن اجى معاك
عمران / مفيش مشكله تعال
جابر / ابقي خد بالك من نفسك
عمران يركب عربيه جوزيف ينزل و يروح يركب جنبه عمران يسوق و يمشي جابر ياخد شنطتين و يدخل يلاقي فارس واقف لوحده جابر يحط الشنط فى الارض و يبصله باستغراب
جابر / فى حاجه و لا ايه
فارس / هو المدعوق ده هيبات معانا فى نفس البيت
جابر / اه و الافضل تتعامل معاه بهدوء عشان هو هيعمل كل اللى يقدر عليه عشان يستفزك
فارس / طب ما فيش اوضه فى الجنينه يبات فيها و لا نشوفله شقه لوحده بعيد عن هنا
جابر / ان جالك الغصب وسع اما اطلع لنجاه شنطتها
فارس / استنى يا جابر انا وزعت كارم و خليته يطلع الشنط فوق عشان محتاج اتكلم معاك بعيد عنه الواد ده خايب و الخواجه ركبه خلاص
جابر / اسمع يا فارس انا عارف انت حاسس بايه و اقسم بالله كلنا من الكبير للصغير زيك و اكتر بس كلنا عاصرين على نفسنا لمونه .. اقولك ايه بس تعرف خالى مختار عمل ايه ... حط همام و جوزيف فى شقه واحده و قفل عليهم الباب الجدع كان بيقضي الليل بطوله بيصلى و يدعى ربنا انه يثبته و ما يتهورش و يقتل الحيوان اللى كان السبب فى موت ابوه
فارس / ما ده اللى قاهرنى احط ايدي فى ايد اللى قتل ابويا
جابر / المصلحه تحكم
نجاه تنزل من فوق
نجاه / ما هياش مصلحه
فارس / ما لكيش دعوه انتى انتى اساسا ما عدتيش مظبوطه
نجاه / حتى لو يونس امر الرجاله انها تهجم ما اعتقدش انه امر بقتل عمى الشافعى بالتحديد و الا ليه ابويا كمان ما ماتش
فارس / يا شيخه بطلى بقي
نجاه / ماشي انت معاك حق ... بس همام نفسه فاهم ان تاره مش عند يونس نفسه تاره مع اللى خطفه و جنده و شغله
جابر / يعني المصلحه تحكم نحط ايدنا فى ايده لحد ما نوصل للى مشغله
نجاه / مش بس المصلحه لو اخوك اتخطف و فجاه رجع هترحب بيه و لا هتحاسبه على اللى عمله و هو مخطوف
فارس / هو مش اخونا يا اختى و لا حتى قريبنا و لا حتى من البلد عندنا و حتى لو ابن عم رشيد ... فهو عيل ابن حرام و ابوه نفسه ما اعترفش بيه غير قبل ما يموت بكام يوم يعنى بصراحه كدا المفروض ما كانش يورث فلوس ابوه الحرام اصلا ما هو ابن السفاح لا يرث
نجاه / و انت بقي عينوك قاضي بتحكم و تشرع من امتى
فارس / احكام ربنا واضحه و الشرع ما فيهوش جدال و لا اراء الحلال بين و الحرام بين
نجاه / و انت يا جابر ايه رايك
جابر / رايي انه مش سالك و مش سهل و ما ينفعش نثق فيه و ان الواحد ما بيتغيرش بين يوم و ليله
نجاه/ مظبوط ... ما حدش بيتغير بين يوم و ليله ... يبقي نصبر و ندى فرصه ... و ادعوا الى سبيل ربك بالحكمه ... و الموعظه الحسنه
فارس / و لكم فى القصاص حياه يا اولى الالباب
نجاه / الاسلام يهدم ما كان قبله
جابر / مشروط بالاحسان
نجاه / مش بتقولوا جه صلى معاكوا فى المسجد اهو بيحاول اهو احتوه و شجعوه
فارس يشد نجاه من ايدها بعصبيه و جابر يبعده عنها بعنف
فارس / انتى بتدافعى عنه كدا ليه
جابر / انت اتجننت اوعى عنها
فارس / عاجبك كلامها يعنى
جابر / و الله لو عملت ايه ايدك عنها
فارس / اختى و انا حر فيها
كارم ينزل من فوق جرى
كارم / بتزعقوا كدا ليه انتوا لحقتوا
فارس / اسمع يا جابر .. ما تدلعش بزياده وقت الجد احنا اللى هنشيل الطين كلنا
جابر / اتكلم عنها عدل بقولك
نجاه / خلاص يا جابر خلاص
كارم / هى مين دى اللى هتشيلك الطين يا مجنون انت
نجاه / خلاص قولت خلاص
فارس / ايه اتحمقتولها كلكوا ايه ما حدش شايف عمايلها يعني ملاك هى يعني
نجاه / قولت خلاص الله
فارس / انتى مالك انتى احنا رجاله فى بعض انتى اش حشرك الله ...اولعوا بيها كلكوا
فارس يطلع فوق و التلاته واقفين يبصوا لبعض
...........................
فى النادى
عمران بيتكلم مع صحابه و يضحكوا جوزيف قاعد فى جنب زهقان عمران ياخد التليفون و يروح فى جنب و يتصل بمهره و جوزيف عينه معاه
مهره / السلام عليكم ... ازيك
عمران / انا رجعت مصر
مهره / كويس
عمران / مال صوتك
مهره / تعبانه شويه
عمران / هتيجي النادى بكره؟ ... الشباب بيقولوا ما جيتيش تدريب النهرده
مهره / مش عارفه هقدر اجى تانى و لا لا
عمران / كشفتى طيب
مهره / عمران معلش انا مش فى مود لاى كلام هو انت متصل عاوز حاجه معينه و لا بتبلغنى بس انك وصلت بالسلامه
عمران / انا اسف
مهره / تمام مضطره اقفل سلام
مهره ما تستناش و تقفل السكه عمران يتصل بحد
عمران / السلام عليكم هو فى حاجه حصلت النهرده ... رجعت بيتها القديم !!! تمام تمام لو فى جديد بلغنى ... لا مفيش داعى تقول لبابا اى حاجه انا هبقي أبلغه سلام.. سلام
عمران يقفل التليفون و يتنهد و يبص يلاقى جوزيف متابعه و مبتسم يروحله
عمران / انا مروح هتيجى و لا هتفضل شويه
جوزيف / ما كنت كلمتها فى البيت بدل ما ضربت المشوار على الفاضي
عمران / نعم
جوزيف / انا بعرف اقرا الشفايف انت كنت بتكلم بنت ما جاتش التمرين تبقي مهره
عمران / بص يا يونس
جوزيف / اكسبنى تكسب صدقنى انا اقدر اسهلك حاجات كتير ما تتخيلهاش
عمران / زى ايه بقي ان شاء الله
جوزيف / موبايلها مثلا اقدر افتحهولك صوت ... و صوره
عمران / و انت شايف ان ده تصرف عدل و لا قله ادب
جوزيف / الغايه تبرر الوسيله و اللى هعمله ما يفرقش حاجه عن اللى كان الراجل اللى كلمته بعدها بيعمله
عمران / يلا نروح احسن يلا
جوزيف / براحتك
عمران / و اه ... انا لو هعامل كويس دا عمره ما هيكون عشان مستنى منك حاجه انا بعاملك باخلاقى انا ... الجرح شد عليا لو سمحت سوق انت
جوزيف / تمام ... معايا مسكن لو تحب
عمران / كتر خيرك هاخد فى البيت مع العلاج بتاعى
جوزيف / تمام... اتفضل
جوزيف و عمران يمشوا
..........................
فى اوضه فارس
فارس واقف فى الشباك الباب يخبط
فارس / مين
الباب يتفتح و نجاه تدخل شايله طبق ساندوتشات
نجاه / ممكن ادخل
فارس يبص الناحيه التانيه نجاه تتنهد و تدخل و تقفل الباب فارس يبصلها و يتعدل
نجاه / عملت عشا جبتلك منابك و منابى اكله معاك
فارس / انا مش هعتزرلك
نجاه / ما طلبتش منك
فارس / كويس عشان انا اصلا ما غلطتش انتى اللى غلطتى انتى اللى كلك على بعضك بقيتي غلط اصلا
نجاه / كنت هتبقي اسعد لو ما كنتش رجعت
فارس يسكت
فارس / اكيد لا ... انتى بتقولى ايه اصلا ايه علاقه ده بكلامى اصلا
نجاه / طب اهدى و تعال ناكل لقمه
فارس / مش عاوز منك حاجه روحى كلى مع كارم
نجاه / اكلته و جيت اكل معاك
فارس / ليه بقي هاه ليه فاكره انى هطنش و اسكتلك يعني هركب الاريال بساندوتشين
نجاه / انت عمال تجرح فيا و تهيني و لا كانى اختك الكبيره
فارس / اتوكسي
نجاه / ما انا لو عملت حاجه لكل ده اقول ماشي انما انا اقسم بالله ما فاهمه انت متحامل عليا كدا ليه
فارس / عشان مش عاوزك تحتكى بالجدع ده و لا تتكلمى معاه اصلا
نجاه / للدرجادى مش واثق فيا
فارس / مش واثق فيه هو ... مش بالعه ...مش قادر ابلعه ... لما بشوفه جنبك بتعفرت بيركبنى مليون عفريت
نجاه / و لما كنت بتشوف كابتن عبد الستار جنبى كنت بتتعفرت برده
فارس/ دا قد ابوكى
نجاه / يعني انت غيران عليا
فارس يبصلها بغيظ و هى بتقطم من الساندوتش باستفزاز
نجاه / طب لو جنب جابر عادى ؟
فارس / جابر صريح و كلم ابوكى اكتر من مره و احنا كلنا موافقين
نجاه / طب ما دا اولى انك تتعفرت برده لما تشوفنا لوحدنا
فارس / جابر ابن حلال لكن التانى ابن حرام
نجاه / يا ابنى مفيش بينا حاجه اقسم بالله و بعدين يا سيدي انا هبقي جنبك طول الوقت اهدى
فارس / انا الوضع ده مش عاجبنى
نجاه / و لا عاجبنى
فارس / يبقي نرجع البلد
نجاه / ما كنا هناك ايه اللى جرا يا ابنى افهم احنا بنحاول نعمل حاجه
فارس/ و انا بقولك اهو الجدع ده مش هيوصلنا لاى حاجه هيفضل يشتغلنا و يشتغلك لحد ما تلاقى الفاس وقعت فى الراس
نجاه / و احنا هبل للدرجادى على قد ما هياخد على قد ما يدى بس بالطريقه
فارس / و الطريقه دى ما تمشيش غير باختى يعني
نجاه/ لا ماشيه مع كارم الله ينور و مع همام و مع كل واحد بيعامله كويس ... اوعى تفتكر انى مضايقه من غيرتك عليا ... دا انت راجلى بعد ابوك ربنا يديه الصحه و طوله العمر ... بس انا عوزاك بس تثق فيا و فى اخلاقى
فارس / مش واثق فيه هو قولت
نجاه/ تمام و انا من هنا و رايح هاخد بالى كويس و مش هعمل حاجه من غير ما ارجعلك
فارس / من امتى ... و ليه بقي الكلام ده
نجاه / عشان تهدى عشان عصبيتك دى هتركبك الغلط و هتضيع حقك و هتعميك ... اقسم بالله يا فارس انا بحبك و ما استحملش عليك الهوى دا انت اخويا الصغير ياض
فارس / ما تقوليش صغير
نجاه تضحك و تحطله الساندوتش على بقه ياخد واحد و يقف ياكل فيه نجاه تطبطب على كتفه و تديله الطبق بابتسامه حب و تسيبه و تمشي
........................
فى كافيه فخم
كارمن تدخل هى و اكرم يلاقوا على قاعد و كل شويه يبص فى الساعه يشوفهم يقوم يقف
على / معقول المواعيد دى
اكرم / احنا جايين فى معادنا مالك اهدى
على / اهدى ازاى بعد المكالمه دى
كارمن / بجد قلقان عليها اوى كدا طب ما تكلمها اتعب نفسك و روحلها لكن لا انت كل اللى هتعمله هتيجي تصوتلى انا اللحقى يا كارمن انجديني يا كارمن
على / انا ما طلبتش منك حاجه و مش هطلب
كارمن / دا على اساس ان احنا اللى طلبنا نقابلك هنا هو فى ايه ما تجيب من الاخر
على / مهره كانت سعيده جدا عندكوا ايه اللى حصل
كارمن / ما اعرفش و مش راضيه تقول و انت اصلا مش فارق معاك تعرف فما تستهبلش
على / لا طبعا فارق جدا انى اعرف و الا ما كنتش لغيت مواعيدي و جيت
اكرم / انت جيت عشان تعرف و تطمن انها مش هتجيلك
على / اكرم بيه من فضلك
اكرم / بقى انت اب انت انت ربنا اداك جوهره اجمل و اذكى بنت فى الدنيا و انت بدل ما تحتويها و تاخدها فى حضنك بتسقيها القسوه كاسات لما فقدت ثقتها فى الدنيا كلها دمرتها بانانيتك
على / انا !!
اكرم / انت عاوز ايه يا دكتور
على / عاوز اعرف مهره مالها
اكرم / ايه ما عاكش عنوانها هنقول ما بتردش على التليفون ما فتحتلكش الباب كمان ... اتحداك انك عمرك ما روحت تزورها و لا ناوى تروح
على / انا ليا ظروفى و انتوا عارفينها
اكرم / انت عاوز مننا ايه دلوقت
تليفون اكرم يرن
اكرم / ثوانى عن اذنكوا
اكرم يقوم يرد فى جنب بصوت واطى
اكرم / معاك
راجل / احنا فى المنطقه اول ما تطفى النور هنطلع لها
اكرم / لو لمستوا منها شعره
الراجل/ ما تقلقش يا باشا فاهمين انها تخصك هنخوفها بس
اكرم / تمام هستني النتيجه
الراجل / بالنسبه للفلوس جنابك
اكرم يقفل السكه و يرجع الترابيزه
كارمن / ما نعرفش اقسم بالله ما نعرف هى فجاه اتغيرت فى كل حاجه هى اصلا كانت راجعه من تركيا مش مظبوطه
على / يمكن كان المفروض تروح لدكتور نفسي يشوفها بعد اللى شافته هناك
كارمن / و انا المفروض اعرف منين يعني هو انا هفكر فى كل حاجه
على / كنتى شاطره بس فى التنطيط على القنوات انتى و هى
كارمن / انا ما اسمحلكش
اكرم / مش وقت هبل فرجتوا علينا الناس بما فيه الكفايه احنا لازم نهدى و نتكلم جد لمصلحه البنت لو كانت تهمكوا ... البنت فعلا محتاجه تشوف دكتور نفسي بس قبل ما ناخد الخطوه دى اتمنى انها تقرب من ابوها شويه يمكن يسرع حالتها
على / انا ليا ظروفى انا ما ينفعش اخد مهره عندى البيت
كارمن / ما انا اخدتها حصل ايه يعني
على / اكرم غير نادين مش هيتفقوا
اكرم / تبقي عملت اللى عليك و بعدين مهره حاولت كتير تقرب منكوا و من ايلين و مروان و لعلمك انت لو حاولت بس تقرب من مهره هتندم على كل لحظه ضيعتها بعيد عنها ... خدها و علمها شغلك هتبدع فيه هتبقي ايدك اليمين بس انت اديها الفرصه
على / انتوا ليه مش قادرين تفهموا موقفى انا
اكرم يقوم يقف
اكرم / يلا يا كارمن مفيش فايده فى الكلام معاه
على / تمام تمام هكلمها
اكرم / براحتك ... يلا يا كارمن
كارمن تقوم تمشي مع اكرم
كارمن / مش عارفه كنت متوقعه ايه يعني بس بصراحه معاه حق
اكرم / افندم
كارمن / مهره ما لهاش عزيز هياخدها و يخرب حياته عشانها و فى الاخر هياخد ايه و لا حاجه هتقلب عليه زى ما قلبت علينا تفتكر على هيقدملها ربع اللى انت قدمته تفتكر على هيحبها قد ما انت حبيتها ... على ما بيحبش غير نفسه ... نفسه و بس ... و هى طلعاله
اكرم / مهره عمرها ما كانت زي على و لا زيك مهره ليها ظروفها الخاصه اللى بتعانى منها بسبب الظروف اللى اتربت فيها ... مش مكان نتكلم فيه خلينا نروح احسن
كارمن / تمام يلا
.....................
فى اوضه نجاه
نجاه قاعده فى السرير بتقلب فى التاب تلاقى فارس داخل شايل مرتبه تستغرب فارس يحدف المرتبه فى الارض
فارس / انا هنام هنا
كارم يدخل وراه و يقفل الباب نجاه تبصله باستغراب
نجاه / و انت كمان
كارم / انا و الله قولتله عيب و كدا بس هو له وجه نظر
نجاه / على العموم خدوا راحتكوا انا مش فايقه لاى خناق دلوقت بالعكس انا هنام و الصباح رباح ناخد اليوم من اوله
فارس / دا لمصلحتك و امانك على فكره
نجاه / و انا فتحت بقي اللى تشوفوه صح اعملوه عن اذنكوا
نجاه تقوم تروح الحمام
نجاه / اه ... من اولها انا حمامى لسه دعكاه بنفسي مش مراحيض عموميه هى اللى هيستخدمه يحافظ عليه بدل ما اقسم بالله لخليكوا تدوروا على اللى يحميكوا انتوا الاتنين منى انا بقول اهو انا بقرف
نجاه تدخل و تقفل الباب
فارس / يا شيخه روحى بقي
كارم / هنام هنا يعني اخر كلام
فارس / يا عم سريرك عندك روح اتمرمغ فيه انما انا مش هسيب اختى تنام لوحدها طول ما الجدع ده قريب
كارم يتنهد و يروح يقعد على السرير و يمسك التاب و يقلب فى اللى نجاه كانت بتشوفه
كارم / بتدور على الميكروروبوت
فارس / و هى بتفهم فى الحاجات دى
فارس يروح يقعد جنب كارم و يبصوا فى التابلت نجاه تطلع من الحمام
نجاه / دا احتلال بقي ... اوعى منك ليه اوعوا شكلها هتبقي ايام طويله ما يعلم بيها الا ربنا
نجاه تشد منهم التاب و تزقهم من على السرير و تدخل تقعد تحت الغطا و الاتنين واقفين بيتابعوها تبصلهم و تستغرب
نجاه / فى ايه مالكوا لا مش هنبتديها كدا ما تضيقوش خلقى شوفوا حته اقعدوا فيها و اشغلوا روحكوا بعيد عنى مش هينفع كدا
فارس / لقيتي حاجه
نجاه / حاجه ايه
فارس / عن الميكرو روبوت اللى كنتى بتدورى عليه
نجاه / و لو لقيت ... مش فاهمه اى حاجه و حاجه نكد
نجاه تتنهد و تقلب التاب كارم يقعد جنبها
نجاه / حشره زى اى حشره مش هتحس بيها غير لما تلدعك زى ما اتحط فيها البى كاى يتحط فيها سم عادى
فارس / طب ما يعملوها مستنين ايه
نجاه / بالظبط احنا ما لناش ديه هم مستنين ايه
كارم / زى ما يونس قال هم ليهم هدف اكبر
نجاه / و الهدف ده لو قتلونا كلنا مش هيقدروا يعملوه؟! فى حاجه غريبه
فارس / يمكن هم مش جامدين زى ما بيقولوا و كل الحركات دى حركات يونس اصلا
نجاه / ما اتعلموش منه يعني و يقدروا يعملوها بنفسهم
فارس / تلاقيهم مستنين اشاره منه انه فشل
كارم / صحيح مش هو قالهم ان الخطه لسه شغاله و انه بيحاول يجندك يمكن مدينه فرصه
نجاه / اكيد مش بالبساطه دى ... حتى لو ... لازم نلاقى طريقه نمنع بيها السلاح ده و نقدر نقف ليه
كارم / زى ايه
نجاه / ما اعرفش ما وصلتش لحاجه قولت
كارم / طب ارتاحى و الصباح رباح
نجاه / كنت ناويه اعمل كدا اطفوا النور خلونا نرتاح
نجاه تحط التاب على الكومدينو و تعدل الغطا فوقيها و تنام كارم و فارس لسه واقفين
كارم / انا مش هنام بدرى كدا انا هروح اشوف عمران بيعمل ايه و لا جابر و لما يكبس عليا النوم ابقي اجى انام خليك انت هنا لو تحب
فارس / هخليني ... اطفى النور فى ايدك
نجاه/ يا ريت و الله يبقي حقيقي كتر خيرك
كارم يطفى النور و يطلع بره و فارس يروح يمدد على المرتبه و يفكر
..........................
فى شقه مهره
مهره قاعده على سريرها بتعيط تقوم تمسح دموعها و تفتح التلاجه تلاقيها فاضيه تقفلها و تشرب مايه و تروح تفتح شنطتها و تشوف الفلوس اللى معاها و الكريدت كارد بتاعها و تضايق و تكسرها و تحدفها على اخر دراعها و تروح تطفى النور و تشد الغطا عليها و تنام و هى بتعيط
………………..
على سطح الفيلا
عمران قاعد على السور و سرحان فى السما جوزيف يدخل
جوزيف / ممكن اجى اقعد معاك و لا يضايقك
عمران / لما بندخل مكان بنقول السلام عليكم
جوزيف / السلام عليكم
عمران / و عليكم السلام اتفضل
جوزيف يروح يسند على السور جنب عمران
جوزيف / مالك فى ايه قاعد لوحدك ليه مش المفروض ترتاح
عمران / فاكر مهره؟
جوزيف / اه البنت اللى كانت معاكوا فى تركيا اللى بتركب خيل مالها
عمران / فى اى خطر عليها ؟
جوزيف / لا ما لهاش علاقه بحاجه يعني مش هتفرق معانا فى حاجه ... هى تفرق ؟
عمران / مش عاوزين بس ناس غلابه يتاخدوا فى الرجلين لمجرد انهم كانوا بيتعاملوا معانا
جوزيف / و انت مش غلبان و كنت هتروح فى الرجلين لمجرد انك زيني
عمران / لمجرد انى زيني !!
عمران يبتسم بسخريه و جوزيف متابع باهتمام
عمران / الزيني مش مجرد اسم ما انا اقدر اشيله من اسمى و اسم عيالي عادى الزيني شرف ما يشيلوش الا الرجاله
جوزيف / الشرف كلمه مفتوحه اى حد بيلزقها فى اى حاجه عاوز يعمل ليها قيمه
عمران / معلش فى حاجات ما بتتفهمش ... لازم تتحس
جوزيف / انا مش عدوك
عمران / عارف ... بس مش متاكد
جوزيف / و اقدر اكدلك ازاى ؟
عمران / هتفرق فى ايه
جوزيف / تفرق ... لان زى ما هحمى ضهرك لازم اتاكد انك هتحمى ضهرى
عمران / اطمن احنا ما بنضربش فى الضهر
جوزيف / عيب خطير لازم تغيروه بس انا مش مستني الضربه منكوا انا مستنيها من ناس اقوى منكوا بكتير و بيضربوا فى الضهر عادى
عمران / تمام
جوزيف / اعمل ايه عشان اخليك تثق فيا
عمران / ما تعملش هتيجي لوحدها لو تستحقها
جوزيف / معاك حق ... انت مختلف عن اخواتك
عمران / و انت مختلف عن ابوك
جوزيف / ما شوفتوش ... و لا انت شوفته
عمران / نجاه كانت بتحب تسمع حكياته فكان معظم قعداتنا نحكى عن المواقف المضحكه اللى بينه و بين ابويا
جوزيف / كلها مضحكه ؟
عمران / كان شخص خطر بس دمه خفيف بايع كل حاجه... بس كان مؤمن ... كان عارف ان فى حساب و ربنا و عارف انه بيغلط ... و ابويا برده ما كانش بيسكتله كان بيحاول معاه فى كل فرصه
جوزيف / زى ما بتحاولوا معايا كدا ؟
عمران / بالظبط و لعلمك ما كانش مقبول عندنا و عمى الله يرحمه كان الكبير وقتها كان بيضايق من علاقته بابويا و مسميه النجس
جوزيف / و انا مسميني ايه ؟؟
......................
أنت تقرأ
الكبيره ٢ بقلم / لولو_محمد
Hài hướcالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
