((((((( الكبيره ٢)))))))
#لولو_محمد
الحلقه ١٠٣
عباده / انت تقصد أن
مختار/ كانى عيل صغير مش قادر يتحكم فى نفسه ببذل مجهود كانى بتعلم غض البصر من اول و جديد
امين / على فكره انا متفق معاك جدا دلوقت
مختار يبص له و يبص لعباده
عباده / واضح ان فى حاجه
مختار/ ايه بقي ؟
عباده / لازم نتكلم مع الناس
امين / ماشي بس هنقول ليهم ايه ما قولنا دى منطقه حمره
مختار / يونس اكيد عارف حاجه انا هتكلم معاه و متأكد انه هيدلنى
عباده / يلعن ... بص انا قولت لك الواد ده
مختار يبص لعباده عباده يسكت و يهز راسه
عباده / تمام اتكلم معاه يمكن يحط ايده على الحوار او يدلنا عليه مع انى اشك انك هتطلع منه بحاجه اساسا
امين / هو اصلا ما اعتقدش ان الموضوع ممكن يوصل لكدا اساسا مش سهله للدرجادى مش فيلم النوم فى العسل هو طب دا عكس الفيلم و خير و الناس فرحانه و مبسوطه هو حد يقول للفرح لا
مختار / السناجل يا امين اللى ما لوش اللى تعفه... و دا بيفسر العشره اللى ما قدروش يسيطروا على نفسهم
عباده/ و الدكتور اللى مستعجل باى شكل ... و فارس ابنى ... طب و كارم كارم ساكت ليه
امين / و جابر و نص السرايا
مختار / انا رايح ليونس
.......................
فى اوضه نجاه
هند / يعني اروح من غيرك ؟
نجاه / انا كلمتها فيديو كول على موبايل عمران و اعتذرت لها
هند / انتى بتتكلمى جد يا نجاه
نجاه / اعمل ايه يعني و الله غصب عنى
هند / اذا كنت انا رايحه و ابوكى و عمك عارفين
نجاه / ماشي روحوا انتوا انا مش هينفع
هند / ليه ؟! افهم
نجاه / كدا انا احسن مكان اكون فيه البيت هنا
هند / انتى خايفه من حاجه ؟
نجاه تتنهد
نجاه / مش خوف... تعب بقي فقدان شغف زهق قرف سموه زى ما تسموه بس انا جبت أخرى
هند / من ايه بس
نجاه / من كل حاجه و من كل الناس و من نفسي انا تعبت انا ما بعجبش حد و دايما انا الغلطانه و انا سبب المشاكل و الحروب اللى بتحصل فى الدنيا كلها انا دايما المشكله فيا انا مش عارفه انا عاوزه ايه و لا ايه الصح من الغلط و لا حتى الحلال من الحرام
هند / ما توصلش للدرجادى
نجاه / وصلت ... وصلت و تعبت و نفسي اتقطع من كتر النفخ فى قربه مخرومه مفيش فيها فايده و لا رجا
هند تحضن نجاه نجاه تعيط
هند / للدرجادى ... ايه اللى حصل لكل ده يعني ... مالك بس ... لا حول و لا قوه الا بالله ... طب قومى اللبسي قومى اللبسي هتروحى و تيجي معايا انا و مش هتفارقيني و مش هيحصل اى حاجه قومى
نجاه بتعيط هند تطبطب عليها
هند / وحدى الله يا بت و انطرى الشيطان ده قومى بقي
نجاه تبص لهند
هند / مهره محتاجالنا جنبها و انتى اكيد مش هتسبيها لوحدها هنروح و نرجع على طول
نجاه تبص فى الارض
هند / انا هنزل استناكى تحت حصليني
نجاه تهز راسها هند تطبطب عليها و تقوم تمشي و تقفل الباب وراها تقوم تفتح الدولاب و تطلع شنطه صغيره و تحط فيها هدوم تبص على تليفونها و تتنهد و تتصل بمختار
نجاه / السلام عليكم ازى حضرتك يا عمى عامل ايه
مختار / و عليكم السلام ازيك عامله ايه ها هتروحى مع عمتك
نجاه / ايوه بس عاوزه اطلب من حضرتك حاجه
مختار/ اؤمرى يا قلبي خير
نجاه / عوزاك تقول ليونس ما يسافرش ورايا مهما حصل
صمت
نجاه / قوله بس ان دى رغبتى انا
مختار / انا معاه دلوقت ... هفتح الاسبيكر و بلغيه بنفسك
صمت
. ..................
فى شقه جوزيف
مختار ماسك التليفون و جوزيف قاعد جنبه يبصوا لبعض
جوزيف / الو
صمت
جوزيف / فى ايه ؟
مختار / نجاه ... نجاه انتى لسه على الخط
نجاه / انا مسافره مصر لمهره مع عمتى و جابر ... ارتاح لحد ما نرجع
جوزيف يبتسم
نجاه / ما ترهقش نفسك مهما حصل و خليك فى البلد افضل
جوزيف يبص لمختار
مختار/ تمام يا نجاه الرساله وصلت تروحى و ترجعى بالسلامه ... فى حفظ الله يا حبيبتى سلام
نجاه / سلام
مختار يقفل
جوزيف / ايه رايك فى نبره صوتها ؟
مختار / نبره صوتها بسبب حوار تانى انت ما تعرفش عنه حاجه خلينا فى موضوعنا
جوزيف / يعني مش رد فعل عباده على المكالمه اللى فاتت
مختار / يونس ... لو مش ناوى تساعدني قول من اولها
جوزيف / اقول لك ايه اقسم بالله ما كنت مرتب لاى حاجه من دى و لا كنت واخد بالى لحد لما اتكلمنا و انت لفت انتباهى انى متغير و فعلا فهمت ان فى حاجه غلط و بدات اركز و لقيت ان فعلا فى حاجه فى الجو و غالبا فرمونات
مختار يفكر شويه
مختار / صح ... دا يفسر كل حاجه ... رش الناموس ... صح ؟
جوزيف يهز راسه ايوه
مختار / ما قولتليش ليه من اول ما اخدت بالك
جوزيف / عشان برده مش متأكد هقول ايه من غير دليل و حتى لو معايا دليل من كتر ما بتصدقونى اوى يا اخى بقي
مختار / ازاى ما اخدناش بالنا من حاجه زى دى ... ازاى اتلهينا فى نفسنا و نسينا باقي الشباب بالشكل ده ازاى كنا بالانانيه دى
جوزيف / كنت هتعمل ايه يعني
مختار / ما اعرفش اشوف حل زى الإعلانات و زى و زى وزى اى حاجه يعني
جوزيف / طب اهدى بس عشان تعرف تفكر
مختار / انا بجد مخنوق اوى
مختار يبص لجوزيف
مختار / هتعمل ايه ؟
جوزيف/ فى ايه ؟
مختار / هتحترم رغبتها مش كدا ؟
جوزيف / لما تكون رغبتها
مختار / يونس
جوزيف يضحك
مختار / يونس
جوزيف / انا اساسا تعبان و ماشي بمسكنات ... بس مش معنى انى هنا أن عيني مش هتبقي هناك
مختار / اعمل اللى تعمله من بعيد ما تزودش الطين بله الدنيا والعه خلقه
جوزيف يبتسم
مختار / ممكن يكون ده السبب اصلا
جوزيف / هو ايه ؟
مختار / الزفت الفرمونات .. السبب فى مشاعرك و عصبيه الناس و عباده و ... فى فى دماغى مليون سيناريو مليون شاب و عيل و مراهق كل واحد فيهم ... انت عامل ايه ؟
جوزيف يضحك بصوت مختار يتقفل اكتر ما هو مقفول
جوزيف / قوم روح يا مختار شوف وراك ايه ؟
مختار يبص له
جوزيف / ما تقلقش انا فاهم خوفها ... مش هعمل مشاكل ... بس خليك فاكر
مختار / ما بنساش حاجه ما تقلقش
مختار يقوم و يمشي و جوزيف مضايق
جوزيف / و الله يا عباده ما حايشنى عنك غير انها هتزعل عليك
جوزيف ينفخ و يقوم يدخل جوه
………………………
فى شقه نسمه
عويس قاعد مع شاب بيضحكوا ثوانى و يقوم يوصله للباب نسمه تسمع صوت قفل الباب تطلع من اوضتها عويس يبص لها
نسمه / خير يابا كان فى حاجه و لا ايه ؟
عويس / خير يا قلب ابوكى مش عاوزك تقلقي كله خير بإذن الله
نسمه تهز راسها و تروح المطبخ ترزع فى الحلل عويس يدخل
عويس / اهل البلد بيتكلموا
نسمه ترمى الحله فى الحوض و تبص لابوها
عويس / ابن الكلب الواطى قالهالى فى وشي
نسمه / خير يابا بتحاول تقول ايه
عويس / العده قربت تخلص
نسمه / مش هيحصل
عويس / مش بمزاجك
نسمه / لا و الله بمزاجى و بكيفى و المرادى لو خدت روحى ما هعمل الا اللى هيريحنى انا
عويس / صوتك على و قلبك جمد
نسمه / انا غلطت زمان و اتعاقبت و رضيت بس انا المرادى ما غلطتش عشان اتعاقب تانى ما غلطتش عشان تجبرنى اعيش مع راجل ما بحبوش تانى
عويس يبتسم بسخريه و يزعق
عويس / تعال يا بدر تعال يا فايز تعالوا اسمعوا امكوا اللى ما حبتش ابوكوا امكوا اللى ما صدقت ان ابوكوا مات
نسمه تشد سكينه من المطبقيه
نسمه / اطلع بره بيتي
عويس / بتقولى ايه يا بنت الكلب ارمى البتاعه دى لتعورى نفسك
نسمه / بقولك اطلع بره بيتي ... انا ممكن استحمل منك اى أذى لكن لحد عيالي يبقي عليا و على اعدائى انا كنت ارتضيت من زمان انى ما ليش اللى يحميني منك و قبلت ... انما انا هحمى عيالى من سمك لو كلفنى حياتى فاهم و لا لا
عويس / اضربى ابوكى بالسكينه يا نسمه ... تعالى اقتلى ابوكى على الاقل هبقي ميت مطمن انك مش هتحطى راسي فى الارض و تتجوزى ابن الحرام اللى اسمه صابر
نسمه تحدف السكينه فى الحوض و تصرخ فيه بانهيار
نسمه / بقولك اطلع بره بيتي اطلع بره حرام عليك اطلع بره مش عاوزه اشوفك مش عاوزه اعرفك حسبي الله و نعم الوكيل فيك حسبي الله عليك اطلع بره اطلع بره
عويس واقف ما بيتحركش العيال يطلعوا من الاوضه و يقفوا يتفرجوا
عويس / انا أديت للراجل كلمه و انتى عارفه ابوكى
نسمه / لو على موتى
عويس / لو على موتك عادى اللى تخرج عن طوع ابوها ... موتها اهون
عويس يسيب المكان و يمشي و نسمه تقعد فى الارض تعيط
……………………………….
فى المستشفي عند مهره
صوفيا / انا و الله مش فاهمه يعني اقول لها تمشي
كارمن/ البنت دى مش كويسه ابعدوا عنها
صوفيا / يا ماما حرام عليكي
بياتريس / صوفيا مش وقته ماما تعبانه ما تتعبيهاش زياده
صوفيا / انا و الله مقدره بس انا مش فاهمه طب ما انا قولت لحضرتك انى هروح اجيبها ما قولتيش حاجه ايه اللى حصل بينكوا دى كانت طالعه تصالح حضرتك
بياتريس / صوفيا
صوفيا/ تمام ... نتكلم بعدين لما ماما تتحسن
كارمن / مش عاوزه اشوفها
بياتريس / تمام انا هتصرف ما تقلقيش حضرتك
صوفيا / باتى
بياتريس/ ششش
بياتريس تطلع بره تلاقي مهره قاعده اول ما تشوفها تقف
بياتريس / هى احسن ما تقلقيش
مهره تهز راسها
بياتريس / صوفيا حاولت تتكلم معاها ... انا ما اعرفش انتى قولتى ليها ايه
صوفيا تطلع
بياتريس / و ما يفرقش معايا اعرف المهم بالنسبالى انى ما اشوفش امى فى الحاله دى تانى
مهره تهز راسها
بياتريس / انا شايفه ان من الأفضل ترجعى بيتك تانى
صوفيا/ انتى ازاى كدا بجد
بياتريس / مصاريفك هتوصلك فى حسابك كل اول شهر مش هتحتاجى تشتغلي باقي عمرك و لا هيبقي ناقصك حاجه
صوفيا/ انتى مين عشان تتكلمى بالشكل ده اصلا مهما كان الخلاف بينهم هى بنتها زينا بالظبط و مهما اختلفوا بكره يتصالحوا عادى جدا و ساعتها هتبقي انتى الوحشه
بياتريس / على الاقل ساعتها مامى هتكون عايشه انما بالوضع ده ما اضمنش
صوفيا / تعرفى تسكتى ... تعالى معايا يا مهره لحد ما يهدوا... مش عارفه ايه الجنان ده
صوفيا تاخد مهره فى جنب
صوفيا / روحى ارتاحى شويه و ابعدى عن التوتر ده و ما تزعليش هى و الله مش كدا خالص
مهره تهز راسها
صوفيا / مهره عشان خاطرى ما تفكريش فى اللى حصل دا و الله شيطان مش اكتر
مهره تكتم جواها و تمشي و صوفيا مضايقه و متابعها مهره تطلع بره المستشفي تلاقي عمران بيركن العربيه و ينزل يجيب أكياس فيها اكل
عمران / جبت غدا
مهره تعديه و تمشي عمران يدى الاكل لراجل و يشاور له يدخله الراجل ياخده و عمران يروح ورا مهره
عمران / مهره ... مهره ... رايحه فين
مهره ما بتتكلمش
عمران / ماما و نجاه جايين فى الطريق على فكره ... انتى شكلك تعبان اوى تحبى اروحك
مهره تهز راسها لا
عمران/ طب رايحه فين طيب
مهره تهز راسها لا و تمشي عمران يستغرب يروح وراها
عمران / هو فى حاجه حصلت جوه ... مامتك جرا ليها حاجه ... طب بصي
عمران يفتح ليها موبايله
عمران / اكتبى .. خدى اكتبى فهميني
مهره تاخد الموبايل و تكتب
مهره / تعرف توديني المقابر عند أمى
عمران / اه عارف الطريق
مهره تهز راسها اه و ترجع ليه الموبايل
عمران/ خليه معاكى يمكن تحبى تقولى حاجه ... اتفضلى تعالى
عمران يفتح لها الباب اللى قدام تركب يقفل الباب و يروح يركب صوفيا تخرج من المستشفي تشوفهم يبان عليها الضيق تدخل و هى بتفرك
............................
فى جنينه الموالح
مختار / قالك ما كانش مخطط لها و بعدين التانيه ليها دماغ برده و دماغها فى اللى هى بتفهم فيه و اكيد يعني مش هيعمل حاجه تأثر عليه زينا
عباده / بس هو مش زينا
مختار / ليه شايفه داخل مع واحده خارج مع التانيه ما هو زيه زي اى شاب عازب فى البلد عمل ايه يعني و لا شوفت منه ايه بالعكس انا شايف انه فعلا بيحاول اكتر من اى حد
عباده / ماشي
مختار / المهم هتعمل ايه هتروح للمحافظ ؟
عباده / تؤ
مختار / امال هتعمل ايه ما هو العربيات دى مش هينفع معاها نظام الشاشات
عباده / هو امين فين
مختار / فى مكتبه خير ليه ؟
عباده / هشوف معانا فلوس قد ايه
مختار/ وصلت ... بس مش ده الحل برده هتعمل ايه طيب مع الاندرايدج
عباده / مش عارف ... مش عارف و بعدين الواحد ما بيتجوزش كدا ما احناش بهايم بندخل اى طور على اى بقره عشان نملا الزريبه عجول
مختار / عشان كدا قولت لك ان ده مش حل ... بس مبدئيا هى بدايه كويسه و خلينا نوعى الناس و برده هنضيقها على بتوع الرش دول
عباده / ناوى على ايه
مختار / شويه شقاوه قديمه
عباده/ و ماله
الاتنين يبصوا لبعض و يضحكوا
......................
قدام المقابر
مهره خارجه بتعيط و بتمسح فى دموعها عمران يفتح ليها العربيه تركب و تنهار من العياط يكون هو ركب
عمران / وحدى الله ... وحدى الله كدا ما ينفعش ... على فكره هى حاسه بيكي وحدى الله
مهره تمسح دموعها
عمران / تحبى ارجعك المستشفي و لا اروحك الفيلا تغيرى و ترتاحى و لا ناويه على ايه
مهره تسند راسها على الازاز و بعدين تمد ايدها تاخد موبايل عمران و تكتب
مهره / عاوزه اروح شقتى لو مش هتقل عليك
عمران / مش هتقلى طبعا بس ... الشقه مقفوله و اكيد مبهدله و بعدين هتروحى هناك تعملى ايه دلوقت دا حتى ماما و نجاه على وصول يعني
مهره تكتب عمران يسكت
مهره / انت مطبق من امبارح و لازم تروح ترتاح انا بقول انزل و ما اعطلكش اكتر من كدا
مهره تحط التليفون و تيجي تنزل عمران يمنعها
عمران/ عيب كدا على فكره... هو فى ايه ... على فكره ده مش حل و مش كل ما هيحصل ليكي مشكله تعيدي نفس الغلطه من الاول
مهره تبص له
عمران/ ايه اللى حصل اتخانقتى مع اخواتك المرادى ؟! ايه يعني هى اول مره و لا هتكون اخر مره على فكره
مهره تبص له باستغراب
عمران / انا بصراحه ما كنتش موافق انك ترجعى معاهم من الاول بس دول فى الاول اهلك و دا كان قرارك فتمام بس كلنا كنا عارفين ان اللى فيه طبع ما بيغيروش و على فكره المشكله مش فيكي هم كدا مع بعض هم كلهم كدا على بعضهم مش طبيعين ابوكى على اخوكى على امك على اخواتك انا الصراحه لو اقدر انزل ابوس رجل الست الطاهره اللى جوه دى كنت نزلت دى نجدتك انتى مش متخيله انتى محظوظه قد ايه ... دا انتى ... اقولك ايه بس اقولك ايه دا انتى جبل ... يمين بالله مش عارف اقول لك ايه
عمران يبص لمهره متابعاه يتنهد
عمران / ما حدش بيختار عيلته تمام و مفيش عيله كامله و على قد ما هتاخدى حاجات اكيد هتدفعى قدامها حاجات تانيه ... يا ستى ابسط مثال فى الدنيا العبد لله اللى قدامك ده اهو انا مثلا المفروض لو شاب زيي فى اى عيله تانيه هيبقي بياكل و يشرب و يذاكر و ينام و يوم ما يحب يغير جو ينزل مع صحابه يقعد فى حته يروح الجيم النادى اى مكان ... انا بقي حياتى عامله ازاى تلات ... لا اربع حاجات تمرين عباده مذاكره حوادث
مهره تبتسم
عمران / و يا ريتني مثلا بدخل خناقه و لا برد على حد و لا حتى من العيال الشبيحه اللى مقطعين بطايقهم دول دا انا مكان ما تحطيني ترجعى تلاقيني هتلاقوا اهدى من كدا ايه
مهره تبص الناحيه التانيه و تضحك
عمران/ عادى اه عندى اهل كويسين مع بعض بس الاهل دول ليهم شيله و شيله تقيله مش اى شيله ... و انا شيلتها ... انتى اهلك فيهم مشاكل و بياكلو فى بعض بس ربنا بيحبك انتى و بيبعدك عنهم و بيبعت لك البديل ... طب اقسم بالله ابويا و أمى بيحبوكى اكتر منى دا انا دماغى اتفتحت امى كلمتنى فى التليفون تطمن عليا انا امى سمعت بس انك بتعيطى و زعلانه حطت العبايه عليها و جيالك هوا قوليلى بقي يا ستى حد يلاقى ناس بتحبه كدا و يسيبهم و يروح يكتئب لوحده
مهره باصه فى الارض يتنهد
عمران / بقولك ايه ما تيجي معايا مشوار فى السريع كدا
مهره تبص له
عمران / هو بعيد شويه بس يستاهل و الله … ها ايه رايك نروح ؟
مهره تبص له
عمران / انا بقول نروح .. بسم الله
عمران يسوق و مهره بصاله و متابعاه
……………………
فى مضيفه الزنايته
صابر / بقي هى الحكايه كدا ... و ماله سهله سبوها عليا انا هظبطها بمعرفتى
مختار / لو حصل اى حوار
صابر / مفيش اكتر من الرجاله ما تقلقش يا باشمهندس الموضوع ده عندى ... بس فى موضوع تانى اهم كنت عاوزكوا فيه
شاكر/ انا هتكلم معاهم
صابر / انت حبيبي يا شاكر بس انت ما حضرتش الحوار من أوله
عباده و مختار يبصوا لبعض
صابر / انا لحد دلوقت مكبركوا و على راسي و شلت و حطيت فى قلبي و سكت و قولت طول ما هى بخير و راضيه و مبسوطه انا راضي
مختار/ و ايه اللى جد يا صابر
صابر / هو الكبير مش عارف ايه اللى بيجد و لا ايه ؟
عباده/ مفيش حاجه هتحصل يا صابر
صابر / ما انا مش هستناها تحصل و دا لمصلحه البلد باللى فيها عشان و ربنا لازعل الكل منى على اللى هعمله
مختار/ هو فى جديد و لا ايه يا عباده
عباده/ راجل مجنون جعجع بكلام اهبل و اتلمت
شاكر / لا ما الحوار ما خلصش هناك يا كبير دا لسه فى جديد
عباده يبص لشاكر
صابر / الحج عويس بيستضيف ابن اخوه الغالى فيراس فى بيت عبد الهادى الله يرحمه
عباده / و هو ده أكد لك حاجه يعني ما يمكن راح له لاى سبب
صابر / انا مش اهبل و الناس بتتكلم ... عويس بيرتب كل حاجه و فجاه هتلاقى الفرح منصوب يمين بالله
مختار / ما تحلفش مش هيحصل حاجه غير برغبه ام بدر
صابر / بنفس رغبتها اللى فاتت مش كدا نفس نظره الخوف و الحزن اللى كانت فى عنيها الوارمه يوم ما كنتوا بتسالوها و لا نفس هزلانها و ضعفها يوم فرحها و لا انتوا ما بتاخدوش بالكوا و لا كنتوا واخدين بالكوا و عملتوا مش واخدين
شاكر/ صابر
صابر / عدى خلاص و الحمد لله عبد الهادى طلع راجل ابن حلال و يستاهل كل خير و منه لله اللى غدر بيه و فتح علينا الفواتيح دى كلها ... و يمين بالله انا ما طمعان فيها لنفسي و لا مستعد أكرر الغلطه دى تانى ... انا عارف تمامى... بس انا مش هرحم اى حد يقصر فى حقها و لا يتسبب ليها و لا لاولادها فى اى ضرر
عباده / و احنا قبل منك على فكره
صابر / حلو ... عاوز اشوف بقي
شاكر / ما خلاص بقي يا صابر خلاص عيب كدا
صابر / معاك حق ... حقك عليا يا كبيرنا ان كنت نسيت نفسي انت برده فوق راسنا و احترامك واجب
مختار / تمام يا صابر روح شوف هتعمل ايه و انا هشوف الموضوع ده بنفسي
عباده / انا اللى هروح لعريس دلوقت واشوف الموضوع
صابر / تمام
صابر و شاكر يقوموا و لسه هيمشوا مختار ينادي على شاكر
مختار / شاكر
شاكر و صابر يبصوا لبعض
صابر / هستنى بره شويه لو هتطول اديني رنه امشي
مختار/ لا مش هيطول باذن الله دا هم كلمتين مش اكتر
صابر / لا خد راحتك عادى انا بس عشان اللحق اظبط المصلحه
مختار يبتسم صابر يمشي مختار يبص لعباده
عباده / هقوم اروح لعويس انا
مختار / بالراحه
عباده / على الهادى و الله هروح اتخانق معاه يعني على الهادى كله
عباده يمشي
مختار / ما قلقتش انا غير بعد كلمه على الهادى بتاعه عمك دى
شاكر يبتسم
مختار / عامل ايه ؟
شاكر / الحمد لله فى نعمه
مختار / بتاكل كويس و مرتاح يعني ؟
شاكر / الحمد لله ... ايه مش باين عليا و لا ايه ؟
مختار / اللهم بارك … ناقصك اى حاجه مش عاوز اى حاجه
شاكر / عاوز سلامتك مش اكتر الحمد لله كل حاجه زى الفل
مختار / عرفت ان فارس بيدور على عروسه ؟!
شاكر / و ماله ربنا يتم له على خير و يوفقه عقبال الباقيين كلهم عاوزين نفرح شويه
مختار / طب و انت ؟ مش هتطمنى عليك بقي
شاكر / اطمنك ؟! لا اطمن انا تمام الحمد لله و على فكره الجبل مش زى ما كان بيتقال عنه خالص بالعكس ... جو حلو و رجاله جدعان و وقت ظريف
مختار / بس اكيد مش هتعيش كدا العمر كله و لا هناك
شاكر / و الله انا ما بفكرش فى بكره انا بركز فى النهرده و بس الحمد لله عارف انظم وقتى بين تدريب هنا و تدريب الجبل و دروس الدين و الشغل و آخر الليل بحط راسي ما بحسش بالدنيا و تانى يوم بعيده من الاول
مختار / انت لسه زعلان منى ؟
شاكر / ما زعلتش من حضرتك من الأساس … انا فعلا مرتاح فى الجبل و مبسوط هناك ... و بعدين حتى لو جيت هنا هاجى على النوم برده ما مفيش وقت دلوقت لاى حاجه تانيه
مختار / على الاقل يوم فى الاسبوع حتى
شاكر / حضرتك معاك حق هبقي اخد بالى من الموضوع ده و اوعد حضرتك انى هاجى ابات هنا يومين على الاقل
مختار / شاكرين لكرم أخلاقك
شاكر يبتسم
مختار / لو احتجت اى حاجه
شاكر / اكيد هجى لحضرتك يعني هو انا ليا غيرك
مختار / لا واضح ان بقي ليك
مختار يشاور براسه على بره المضيفه شاكر يضحك
شاكر / حضرتك الأصل برده
مختار / طب ما تسيبوش مستنى كتير و حاول تهديه واضح انه بيحبك و بيسمع لك
شاكر يتنهد
شاكر/ جوزوهاله ... اللى بيحصل ده ما يرضيش ربنا ... اعملوا اى حاجه و ساعدوه يتجوزها حتى لو ما بيقولش حتى لو هى ما بتقولش ... عنيهم بتقول كل حاجه ... اى كان اللى حصل زمان انتهى و اتقفل عليه نبدأ صفحه جديده على نضافه بس صح المرادى بقي ... ما نكررش الغلط تانى
مختار / احنا
شاكر / مش هنتكلم فى اللى فات اتفقنا ... نحاول مش هنخسر حاجه ... و يا بخت من وفق راسين فى الحلال برده يا سيد الناس
مختار / يعني اقوله ايه ... البنت فى العده لسه
شاكر / ما حدش محترم العده دى الا صابر البلد كلها بتتكلم يابا ما تسدوش ودانكوا و انتوا تسمعوا ... انا اسف ... انا
مختار / تمام .. روح له عشان ما يزهقش
شاكر / انا اسف تانى
مختار يطبطب على كتف شاكر و يطلع بره شاكر يتنهد و يروح يفتح باب العربيه يبص على مختار متابعه مختار يبتسم و يشاورله شاكر يبتسم و يركب و صابر يسوق
………………….
فى مدرسه للصم و البكم
عمران / دا المكان اللى قولتلك عليه بقي و مش هتصدقى المستوى اللى وصلت له فى الفتره البسيطه دى ... استنى
عمران يتكلم بالاشاره و مهره مبتسم و مش فاهمه حاجه
عمران / كنت بقولك ما تسمحيش لحاجه تزعلك الدنيا مش مستاهله
مهره تبص فى الارض و ترجع تبص له ست تدخل
الست / السلام عليكم... ازيك يا باشمهندس عامل ايه النهرده ... هى دى بقي القمر اللى حكيت لى عنها
مهره تبتسم
عمران/ مهره حضرتك ... هى طبعا مش مقتنعه و لا هى و لا الجماعه زى ما قولت لحضرتك لان كلنا مؤمنين انها اكيد باذن الله هتتكلم تانى بس ... اهو
الست / و ماله احنا عاوزين انها تخف و ترجع تتكلم تانى و تصدعنا لو تحب مش هنقول لا و ساعتها هتقدر باللى اتعلمته و تجربتها انها تساعد ناس تانيه و تعلمهم او تترجم لهم او حتى تساعدهم لأنها هتبقي اكتر واحده فهماهم و حاسه بيهم و لا ايه يا مهره
مهره تهز راسها اه
الست / طبعا احنا عندنا هنا نظام كورسات و مواعيد و كل الكلام ده بس الباشمهندس له نظام مختلف فبقعد انا و هو أعلمه و دلوقت هقعد معاكى اعلمك انتى كمان بس طبعا بما انى هبدا معاكى من الصفر فانا شايفه ان الباشمهندس يروح يشوف اللى وراه و يعدى ياخدك من هنا لما نخلص ايه رايك ؟
عمران يبص على مهره بصاله
عمران / تمام ... بصى خلى موبايلي معاكى و اول ما تخلصى او فى اى وقت رنى على النمره المتسجله باسم حسنى ٢ هتلاقي عربيه قدام الباب توصلك دا لو خلصتي قبل ما ارجع يعني
مهره تهز راسها و تاخد الموبايل عمران يمشي الست تقوم تقعد قدام مهره و تبدا تعلمها و مهره تقلدها
الست / نسمى الله و ما نضيعش وقت و نبدأ بأيام الاسبوع دى يعني سبت ... حد ... اتنين ... تلات ... اربع ... مع التكرار هتحفظيهم ما تقلقيش ... خميس ... جمعه
…………………….
فى ارض الجزار
عباده / يعني الكلام اللى بيتقال ده مش حقيقي يا عويس
عويس/ احنا عارفين شرع ربنا كويس يا كبير و من فضلك انا عارف بمشي بيتي ازاى
عباده / حقك بس لازم تفهم انى شايل عنك كتير
عويس / انت بتهددنى و لا ايه؟
عباده/ استغفر الله و انا بتاع كدا برده احنا مش بتوع كلام يا عويس انا لو ليا كيف فى حاجه بعملها على طول انا بس بنصحك من اب لاب ما تجبرش بنتك على حاجه ... بنتك مش صغيره و عارفه مصلحتها كويس
عويس / بقولك ايه يا كبير بدل ما تيجي و تكلمني فى حاجات انا شبعت كلام فيها ما تروح تحط لسان كل واحد بيتكلم عن بنتى فى بقه و خليني اعرف انام مرتاح ليله واحده من ساعه ما اللى منه لله قتل جوزها ... انا كنت مرتاح يا كبير و اتفتح عليا هم ما يتلم ... انا ما ليش مصلحه فى كل القرف ده
عباده/ و لا انا ليا اقسم بالله ... بس انت اللى دخلتنى فى الليله دى من الاول لما جيت لى زمان فلو فاكر انى بدخل بس وقت ما يبقي على هواك تبقي غلطان انا كدا كدا واقف فيها ... يعني ولا مأذون هيكتب على بنتك فى البلد دى الا بعلمى و موافقتى بعد ما اسمعها منها زى المره اللى فاتت بالظبط لا حاجه اقل و لا حاجه ازيد
عويس / تسلم يا كبير
عباده / حبيبي يا عويس
عباده يمشي و عويس يفكر ثوانى و يهز راسه موافق
……………………..
فى المستشفي
بياتريس/ مالك قاعده كدا ليه؟
صوفيا / مفيش
بياتريس/ لا فى هو انا مش عرفاكى ... دا زمان ابليس واخد جنب و خايف من اللى عقلك بيوزك تعمليه دلوقت
صوفيا / ما تفوقيش عليا تمام
بياتريس / يا مامى ... براحتك
صوفيا تبص الناحيه التانيه عمران يدخل صوفيا تفرح جدا و تقوم تقابله بحماس
صوفيا / انت رجعت
عمران / الاكل وصل ؟ ناقصكوا اى حاجه
صوفيا / لا احنا تمام اوى ... بصراحه فكرت انك مش هترجع ... اصلى شوفتك ماشي مع مهره
عمران / اه وصلتها و جيت اشوف لو ناقصكوا اى حاجه
صوفيا / ما عادش ناقصنا خلاص
عمران / طب الحمد لله ... بصي انا تليفونى مش معايا بس انا جبت رقم تاني لو احتاجتى حاجه كلميني عليه تمام
صوفيا تتحمس و تطلع موبايلها و عمران يكتب ليها الرقم
عمران / انا هروح عشان والدتى هتيجي من السفر يعني ارتب البيت اشوف لو ناقص حاجه اجيبها و كدا
صوفيا/ تحب اساعدك
عمران/ لا مفيش داعى هو كدا كدا البيت فيه ناس بس يعني زى ما بتقولوا كدا بشيك على الدنيا بتاكد انها سالكه يعني و مفيش اى مشاكل
صوفيا / هو انا هقابل مامتك صح
………………………..
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
