(((((( الكبيره ٢)))))
#لولو_محمد
الحلقه ١٠٥
قاسم يشاور لواحد يشيل الطبق و يبص لمازن باصص له و زعلان
قاسم / حتى لو روحنا ما احنا هنروح يوم او اتنين بالكتير و هنرجع هنا تانى مش هنعيش هناك العمر كله يعني
مازن يبص الناحيه التانيه
قاسم / طب ممكن اسالك سؤال
مازن يبص لابوه
قاسم / انت فى حد فى البيت عندنا بيعاملك وحش
مازن / سالتونى كلكوا السؤال ده و قولت لا
قاسم / امال تفرق ايه احلام عنهم بس
مازن / بتحبنى
قاسم/ اولا كلنا هنا بنحبك ثانيا ايه الثقه اللى فيك دى انها بتحبك
مازن / يووووه هو انا كل شويه هحكى من الاول
قاسم / اتكلم بأدب
مازن يبص فى الارض
قاسم / اصلا كل اللى انت قولته عادى ممكن يحصل من اى حد
مازن / احلام بس
قاسم / يادى احلام
مازن / انت ما بتحبهاش ليه
.......................
قاسم / ولد !!
مازن يعيط قاسم ينفخ و يرجع يبص لمازن
قاسم/ تعال هنا
مازن ينزل من كرسيه قاسم ياخده فى حضنه
مازن / حضرتك وعدتني
قاسم / و انا ما قولتش مش هنروح
مازن / عاوز اروح هناك
قاسم / حاضر
مازن / بتقول كدا و خلاص
قاسم / و الله هوديك
مازن / حلفت قبل كدا
قاسم / و الله هوديك اهدى بقي
قاسم يمسح دموع مازن مازن يحط وشه فى حضن قاسم قاسم يتنهد
.......................
فى شقه عمران
هند / طب انا هقوم اغير اهو عشان نلحق وقتنا
هند تدخل الاوضه نجاه تقوم تدخل وراها
نجاه / هى البت دى ايه
هند / وطى صوتك
نجاه / يعني ناس جايين من سفر اقل واجب يرتاحوا شويه
هند / نجاه !!
نجاه / مش قبلاها
هند / انتى احسن من كدا
نجاه/ طب خديها منى كلمه بقي يا عمتى البت دى بترسم على ابنك
هند / انتى طيبه اوى ... اطلعى بره خليني اللبس
نجاه / طلعت
نجاه تطلع بره
نجاه / منوره
صوفيا / ميرسي
نجاه / هعمل شاى حد يشرب
عمران / تسلمى انا لسه ما خلصتش اللى فى ايدي
جابر / ما تيجي يا عمران ندخل جوه شويه و نسيب الحريم تاخد راحتها
صوفيا / انا تمام و الله ما فيش مشكله
جابر يبتسم و يدخل الاوضه عمران يقوم وراه صوفيا تبص لنجاه نجاه تبتسم بسخافه و تقعد
نجاه / منوره
صوفيا / ميرسي
.....................
فى اوضه عمران
جابر يقفل الباب و يرمى نفسه على السرير
عمران / هو انا ليه حاسس ان فى حاجه بتحصل
جابر يرفع راسه و يبص لعمران و يرجع ينام تانى عمران يروح يقعد جنبه جابر يتعوج و يسند على كوعه
جابر / حاسس!! دا انا متوقع ان هنسمع صريخ و نطلع نلاقى نافوره دم ضاربه فى المكان بره
عمران/ يا سلام
جابر / نجاه بتقول ان صوفيا كدا خير اللهم اجعله خير بترسم عليك
عمران يضحك باستهزاء
عمران / و انت برده بتاخد على كلام نجاه
جابر / امال هاخد بكلامك انت
عمران / الله هى بقت كدا ... صحيح مين يشهد للعروسه
جابر / هو انا شخصيا ما شوفتش حاجه بس ... الحريم بيفهموا بعض
عمران / و الله لو الموضوع كدا يبقي و لا بيفهموا فى اى حاجه
جابر يتعدل و يقعد
جابر / طب بيني و بينك كدا بعيد عن كل الهبل ده انت ايه رايك
عمران / فى ايه ؟
جابر/ مهره و لا صوفيا ؟
عمران / فى ايه برده ؟
جابر / كزوجة مثلا ... لو انت بتفكر ترتبط تختار مين فيهم ... كعمران يعني
عمران / مهره
جابر / ما فكرتش مرتين
عمران / انا عارف مهره من سنين لكن صوفيا دى ما اعرفهاش خالص و كل اللى سمعته عنها أنها بت مدلعه ما بتفكرش غير فى نفسها و بس و علاطول عامله حوارات
جابر / دا انت متابع بقي
عمران / يا ابنى ما الزفت ابوها كان معايا معظم الوقت فى التمرين و البطولات كنت بسمعه بيتكلم فى التليفون او ساعات كتير كان بيحكى احنا بقالنا سنييييييين مع بعض يعني طبيعي اسمع
جابر / هو انا ينفع ارخم عليك و أسألك عن حاجه كدا
عمران / ما اتقدمتش لمهره ليه لحد دلوقت صح ؟
جابر عنيه توسع
عمران / انت مفقوس اوى على فكره ... انت شايفني اهبل قدامك مش فاهم يعنى ... انت للدرجادى مستصغرنى
جابر / حاش لله دا انت العبقري بتاعنا
عمران/ عشان ظروفها ... الاول عشان كنت بدرس ... و ما زلت بس هانت كلها سيكا و الحجه دى تروح لحالها ... و بعدين اللى حصل ... و بعدين مش عاوز يبان انها شفقه عشان هى مش هتقبل حاجه زى دى فأعتقد الأنسب انى اساعدها الاول تقف على رجليها و تبقي مش محتاجه لحد فلما اتقدم تبقي قادره ترفض
جابر/ ايه !! انت عاوزها ترفض
عمران / انها توافق و هى قادره ترفض احسن مليون مره انها تقبل لان ما فيش بديل او لاى سبب تانى
جابر يبص لعمران باعجاب
جابر / طب سؤال رخامه بجد بقي ... انت كنت ضامن منين انها هتستناك ما يمكن كانت ارتبطت من زمان ... ما تاخذنيش مهره حلوه و الف من يتمناها
عمران / المهم هى عاوزه مين
جابر / لا !!!
عمران / انت شايف ايه ؟
جابر / لا لا بجد
عمران / اعتقد بتبان يعني
جابر يفكر ثوانى
عمران / يمكن غرور او ثقه زايده ما اعرفش بس كنت حاسس انها ميلالى يعني كنت حاسس ان مشاعرنا متبادله و دماغنا واحده و شخصيتنا واحده ما اعرفش يمكن ده منى انا مش عارف .. بس كل اللى اعرفه ان النصيب غلاب و ادينا اهو مستنين نشوف هياخدنا لفين
جابر / ربنا يقدم اللى فيه الخير ... طب اخر سؤال بقي
عمران/ يا حول الله يا رب اؤمر
جابر / هتعمل ايه مع صوفيا
عمران / مالها يا عم فى ايه ؟
جابر / لو كلام نجاه طلع صح و طلعت معجبه بيك
عمران / هى تعرفنى اصلا دا احنا يا دوب
جابر / لو طلع صح هتعمل ايه ؟ دى اختها يا عمران واخد بالك
عمران / لا مش واخد بالى تقصد ايه
جابر / يعني ... مش عارف ايه الدنيا بس اكيد مش هتبقي سالكه يعني ... ممكن .. لا اكيد هتبقي فى حزازيات كدا مش عارف وصلالك و لا لا بس دول اخوات يعني ... فاهم قصدى
عمران/ بص هو انا حاسس ان الموضوع كله هبل و ما فيش اى حاجه خالص فا ما تقلقش
جابر / مش قلقان
عمران/ و ما تتكلمش مع نجاه فى حاجه لو سمحت ... احنا اخوات و كل حاجه بس ... مش عاوز الكلام يكتر فى الموضوع ده خصوصا دلوقت
جابر يقفل بقه بالسوسته عمران يضحك الباب يخبط
جابر / ادخل
نجاه تفتح الباب و هى بوزها شبرين
نجاه / عمتى بتقول جاهزه لو هتروحوا المستشفي
عمران / يا ساتر
نجاه تشاور على بطنها طالع نازل و تحرك شفايفها " فقعه " الاتنين يضحكوا نجاه تشاور لهم يسكتوا
……………………..
فى مضيفه الجوارحه
شاهين / خلصت على كدا يعني؟
مختار/ ايه يا شاهين زن الحريم اللى انت فيه ده مش كدا يا اخى
مغاورى/ بس هو بيتكلم صح الناس دى فعلا هنعتبرهم ماتوا و نقول لاهلهم كدا من غير حتى ما نحاول
مختار / ما قولتش كدا
عباده / انت ما قولتش حاجه خالص و ماشي ورا سي يونس ده و عمالين تماطلوا فى الهايفه و انا جبت أخرى
مغاورى / اهدى يا عباده
عباده / انا كدا هادى
مختار / قولتلك لو قررتوا تنزلوا انا قبل منك بس فى واحد بيقولك اللى هينزل يا هيموت يا مش هيطلع سليم لو انا طنشت كلامه و حصل ذنب الرجاله اللى هتنزل عميانى دى فى رقبه مين
عباده / و ذنب الناس اللى تحت و انا هنا بضيع وقت فى رقبه مين
دياب / فى رقبه اللى نزلهم
عباده يبص لدياب
دياب / عيال كبار هم نزلوا لسبب هم راحوا هناك بكيفهم اه ما كانوش يعرفوا اللى مستنيهم بس راحوا بكيفهم و يا ريته عشان حاجه عدله دول رايحين يعملوا ذنب ... نبعت شباب زى الورد تموت عميانى عشان خاطر ناس ما تستاهلش يا كبير؟!
شاهين / و انت نصبوك بواب الجنه امتى يا ابن عمى
دياب / انا لا بواب الجنه و لا انا قولت كدا انا بقول انى مش مسؤل عنهم ... عربيتين خرسانه تسد الليله دى و نخلص
عباده / و باقي الرجاله رايها ايه
الرجاله تهمهم
عباده / جرا ايه يا رجاله الكلام لبره مش لجوه عاوز اسمع رايكوا
مختار / طب اللى موافق ننزل يرفع ايده
شاهين و عباده و مغاورى و اتنين رجاله يرفعوا ايدهم
مختار / اللى عاوز يسد الانفاق يرفع ايده
مختار و دياب و امين و اتنين رجاله يرفعوا ايديهم و منصور ما يرفعش فى الحالتين
عباده / رايك يا منصور هيفرقها
منصور / ما ليش راى
شاهين / ما تقول انك مكسوف تقول رايك ليقولوا ماشي ورا اخوك
منصور / انا رايي معروف و قولته قبل كدا ... نرميها فى عب الحكومه و نرفع ايدنا
مغاورى / لا ... هتفتح علينا فواتيح و الاخبار و الجرايد و فيلم احنا مش قدها... لا لا لا الحكومه لا ما ينفعش
عباده / خلاصه الكلام يعني هنقفل القاعده زى كل مره من غير ما نوصل لحاجه؟
شاهين / ما تشوف جابر يا كبير لو كان موجود كان رأيه فرق
مختار / ما نجاه كمان مش موجوده
شاهين / نجاه فى الاول و الاخر حرمه
دياب / بس بتعلم على شنبات
شاهين / على راسي و ست الدنيا بس دى قاعده رجاله
منصور / و احنا برده مش كل الرجاله فلو هندور على واحد من الغايبين يفصل بينا يبقي ندور على كلهم
عباده / انا فى فكره فى دماغى بس مش عارف من حقى اعمل حاجه زى دى و لا مش من حقى الصراحه
الكل ينتبه لعباده
.......................
فى المستشفي
هند قاعده مع كارمن بتوريها فيديو اعتراف اكرم
اكرم / اقسم بالله قعدت اعيط تحت رجليها ما قدرتش اشوفها بالحاله دى ... انا حبيتها حبيتها اكتر من الدنيا بحالها... منظرها كان صعب و قلبي كان بيتقطع عليها لما شوفتها انهرت من العياط تحت رجليها بقيت اترجاها تسامحني لكن اقسم بالله ما اغتصبتها اقسم بالله مروان سابلى المفتاح تحت الدواسه و عرض عليا اروح انبسط و ما قدرتش رفضت انا مش عاوزها غصب مش عاوز ائذيها
صوت جوزيف / صدقته ؟!! خلى فى قلبك رحمه الراجل بيعيط يبقي اكيد صادق ... بس انت دفعت لمروان عشان يعمل فيها كدا و دفعت عشان تدخل المصحه و هناك اغتصبت يبقي انت شريك فى الجريمه
اكرم / لو كنت اعرف ما كنتش ساعدته انا اتفقت معاه انه يساعدني ارجعها يضغط عليها فمتلاقيش حضن غيرى تجرى عليه انا بس كنت
صوت مختار / بتسد أبواب الدنيا فى وشها عشان تجبرها تعمل حاجه حرام
اكرم / انا كنت عاوز اتجوزها
صوت كرسي بيقع
صوت مختار بيزعق / تتجوز بنتك يا عديم الشرف و النخوه
اكرم / هتجوزها مدنى هنسافر بره و نتجوز مدنى
كارمن تدى لهند الموبايل
كارمن / انتى بتوريني الهبل ده ليه ؟
هند / انتى شايفه الكلام ده هبل ؟
كارمن / الفيديو ده لو حقيقي ... دا لو حقيقي ... يعني انتوا اللى خطفتوا اكرم مش هو اللى سابنى عشان عيله صغيره زى ما اجبرتوه يكلمنى و يقولى
هند / البنت دى تبقي بنتك دا معترف قدامك
كارمن/ اجبرتوه زى ما اجبرتوه يكلمنا و يقول انه باعنا
هند تبتسم باستهزاء و صدمه
كارمن/ جوزى يرجع و الا اقسم بالله
هند/ دا كل اللى فارق معاكى
كارمن / انتى عوزانى اصدقك و اكدب واحد عاشرته سنين و عارفاه زى أسمى انتى عاوزه ايه من الاخر بقالكوا سنين بتتمسحوا فينا و مش فهماكوا و ناطين لينا فى كل مكان بمصايبكم و يا ريتكوا بتشبعوا عاوزه ايه انطقى
هند / عوزاكى تصدقى بنتك اللى ما لهاش غيرك
كارمن / صدقتها حاجه تانى ؟
هند تبص فى الارض
كارمن / لو ده هيخلي اكرم يرجع هصدقها
هند تبص لكارمن
كارمن / يرجع لبناته
هند / بسيطه ... يرجع ... بس انتى ناويه تكملى معاه بعد اللى عرفتيه ؟
كارمن / ما يخصكيش و لعلمك انا مش هسكت برده... و هدفعكوا تمن اللى عملتوه و زياده و هتشوفى
هند تبتسم و تقوم تاخد موبايلها و تفتح الباب الكل يقوم يقف
هند / يلا يا عمران
صوفيا / خير يا طنط كنتوا بتتكلموا فى ايه انا قلقت جدا
هند / ما تقلقيش يا حبيبتي بإذن الله خير
صوفيا / بجد !!
هند / يلا يا عمران عشان تعبانه من السفر ... عن اذنكوا ... يلا يا مهره
صوفيا / هى مهره هتروح معاكوا ليه
هند / لحد ما والدتك تقوم بالسلامه و تهدى ... يلا يا بنتى
صوفيا / ايوه بس دا ما ينفعش ... مهره ليها بيتها و أهلها و حتى لو فى مشكله بينها و بين ماما اى كان السبب انها تروح مع حضرتك هيكبر الموضوع
بياتريس/ بالعكس انا شايفه انه حل مناسب للكل
صوفيا / قصدك ايه
بياتريس / ما اقصدش حاجه انا داخله لمامى
بياتريس تدخل لكارمن
بياتريس / عاوزين ياخدوا مهره و بنتك وقفالهم فيها مش عارفه هى اتهبلت و لا ايه ؟
كارمن / اتصلى بعمك خليه يجي حالا
بياتريس/ هو انا طيقاه دا كمان الراجل ده انا على شعره منه
كارمن / بقولك كلميه يا باتى ... انا عرفت ابوكى فين و هو الوحيد اللى يقدر يساعدنا نرجعه
بياتريس تبص لكارمن و تبص على الباب
كارمن / كلمى عمك انا مش قادره
بياتريس تهز راسها و تطلع موبايلها
......................
فى شقه نجاه
نجاه بتتكلم فى التليفون
نجاه/ بقول لحضرتك مش طايقه البت هطيق امها خلينى هنا احسن
مختار / سابوكى لوحدك يعني
نجاه / لا جابر تحت
مختار / بس انتى لوحدك فى الشقه اقصد
نجاه / جرا ايه يا عمى دا انا بطولى حمله
مختار / حصل
نجاه تضحك
مختار / هو انتوا ما بتحبوش تختلطوا بالجماعه اللى فى البيت ؟
نجاه / خالص ليه حضرتك بتقول كدا ؟
مختار / يعني فاصلين كدا
نجاه / ليهم حياتهم و اشغالهم نيجي نلخبطهالهم ليه
مختار / وجه نظر
نجاه / سمعت انكوا قعدتوا النهرده عشان تقرروا حوار هتعملوا ايه فى الإنفاق
مختار/ جابر قال لك ؟
نجاه / لا مش جابر ... ياسمينا
مختار/ منصور يعني
نجاه / لو هعمل حوار قولى من دلوقت
مختار/ لا يا قلبي و لا حوار و لا حاجه اطمنى احنا أكبر من كدا
نجاه / و بعدين هو ما غلطش دى مراته و بيفضفض معاها و هى ما قالتش لحد غريب دى انا و اللى المفروض ليا صوت ... دا لو كان لسه ليا صوت يعني
مختار / ليكي بس صوتك اتشال مع صوت جابر
نجاه / ما يمكن كنا نتفق
مختار / فى دى عمركوا ما كنتوا هتتفقوا
نجاه / ليه و هو حضرتك فاكر انى كنت هختار ايه ؟
مختار / نسدها طبعا
نجاه / و يبقي قدامى سكه أطول بيها امايا و اضيعها من ايدي
مختار / فرصتك جيالك لحد عندك و فى النور ايه بقي اللى ينزلك فى الضلمه مش فاهم
نجاه / فرصه ايه دى
مختار / السرك
نجاه / سرك ايه ؟ السرك اللى فى البلد !! ازاى يعني هو مش شاهين خد وفاء وراحوا مره
مختار / ما هى مش هتحرق له نفسها يعني
نجاه / طب و انتوا عرفتوا منين ... يونس مستحيل يكون اللى قايل
مختار / عرفتى منين
نجاه / عشان روحوا فيها عمره ما هيبيعها ... ساعات بخاف يضطر يختار ... تفتكر هيختارنا
مختار يتنهد
نجاه / مش قادره اتعاطف معاها
مختار/ مع انك تعاطفتى مع يونس
نجاه / حاليا لانه لما اتقدم له الطريق الصح اتمسك بيه انما هى
مختار/ هو اكبر و انضج و له دماغ بيفكر بيه ... هى و لا حاجه من دول..مكان ما بيحطوها بتادى
الباب يتفتح و يدخلوا كلهم
نجاه / الجماعه وصلوا اهو ... اه مهره معاهم
هند / دا ابوكى ؟
نجاه / لا عمى مختار
هند / كويس هاتيه
هند تاخد التليفون و تدخل الاوضه
نجاه / عملتوا ايه
عمران / امى قعدت معاها لوحدهم و خرجت خدتنا و مشيت و من ساعتها ما نطقتش بحرف ... شكلهم قفشوا على بعض
نجاه / يبقي كويس انك جيتي معاهم
مهره تبص الناحيه التانيه
عمران / صوفيا كانت متمسكه بيها على فكره ماما اللى صممت
نجاه/ معلش انا مش جايه هنا عشان اقعد بوزى فى بوزك انا جيالها هى
عمران / محبه الناس نعمه و الله
مهره تضحك عمران يبتسم
......................
فى عماره فى البلد
فيراس يطلع السلم و يضرب جرس شقه و يبص يمين و شمال كيرا تفتح
كيرا / كنت عارفه انك هتيجي
فيراس / ما كنتش جاى على فكره
كيرا / كلهم بيقولوا كدا و فى الاخر بيجوا
فيراس / يعني عاوزه ايه من الاخر انا مش مرتاحلك
كيرا / لو شوفت الفلوس اللى هتطلع لك من ورايا هتعرف انك اخترت صح
فيراس / ما انا شوفت اللى مشيوا وراكوا هو مش محمود و ابوه كانوا من رجالتكوا برده ؟
كيرا / ايه الكلام ده احنا ما بنتعاملش مع فشله زى دول
كيرا تجيب شنطه من تحت ترابيزه و ترميها تحت رجلين فيراس فيراس يوطى يفتحها يلاقيها مليانه دولارات فيراس يبص له
كيرا / دا عربون ربط كلام لو نجحت هيطلع لك قدهم خمسين مره
فيراس / هو الكلام حلو و الفلوس تزغلل بس العقل مش راكب مع المنطق ... انت هيطلع لك ايه من كل ده
كيرا / الارض و الفلوس حلال عليك انما البنت بتاعتى
فيراس / بس انا ما اقدرش اتصرف فى الارض مجلس حسبي و الكبير و فيلم و فاتوحه
كيرا / بيتهيالك ... انا عاوز ابقي صريح معاك
فيراس / يا ريت تريحى و تستريحى
كيرا / انا ممكن اديك كنوز الدنيا و لا ان الكبير يرتاح ليله و دا مش هيحصل لو صابر اتجوز نسمه لانه ساعتها هيفوق انا بقي عوزاه طول الوقت قلبه واكله عليها
فيراس / و انتى متأكد ان صابر هيموت عليها كدا فعلا
كيرا / فى حاجات الأفضل تكبر دماغك عنها عشان لما بتدخل فى تفاصيلها بتتعب جامد... انت اللى ليك تاخد مصلحتك و انا اخد مصلحتى
فيراس / طب ما تاخذنيش ... انت ليه ما بعتيلهاش حد من طرفكوا و الفلوس دى لو كنتى عرضتيها على عمى متأكد انكوا ماكنتوش هتختلفوا
كيرا / عمك طماع اه بس غبى ... عمك لو كان القرش سيده كان ماين لصابر من الاول و حكم و ساد البلد كلها بس نقول ايه غبى مش هيطاوعنا عشان كدا جينالك توفق الدنيا على بعضها
فيراس / مش فاهم يعني انتى عاوزه منها ايه بالظبط
كيرا / هتفهم كل حاجه بعدين المهم دلوقت تاخد الفلوس و تتوكل على الله
فيراس / لاااا انا افهم الاول انا داخل على ايه
كيرا / بقولك ايه انت شكلك زى عمك رغى كتير فعل مفيش و انا شايفه ان معاك حق انى لو أديت نص الفلوس دى لاى حد تانى هيعمل نفس اللى كنت انت هتعمله و اكتر و مش هيصدعنى كدا
فيراس / عمى ما كانش هيوافق على حد غيرى
كيرا / المهم تخليها هى توافق
فيراس / و لو خدت الفلوس و خلعت او ما نفذتش الاتفاق
كيرا / براحتك طبعا ... بس ساعتها هتخسر قد الفلوس اللى فى الشنطه دى خمسين مره و لا انت بتنسي
فيراس / اه صح
كيرا / كان نفسي اضايفك بس انا الحقيقه ورايا كام مشوار كدا فى السريع
فيراس / اه ... تمام
فيراس ياخد الشنطه
كيرا / كنت متأكده اننا هنتفق
…………………..
فى المستشفي
كارمن قاعده مع اخو كارم
كارمن / بقولك الفيديو معاها و رابطينه و بيعيط
الراجل / ممكن يكون معمول بالايه اي و فى جميع الأحوال حوار البوليس ده ما ينفعش خالص
كارمن / طب هتعمل ايه و انا معاك
الراجل / الاول خلينا نسأل عنهم و نعرف أخرنا معاهم ايه ... اللى انتى قولتيه انه جاله تليفون و نزل خايف يجرى و كمان واضح من اسلوبهم انهم ناس تقال و عارفين بيعملوا ايه
كارمن / يعني هتسيب اخوك معاهم كدا
الراجل / انا ما قولتش كدا انا كل اللى قولته ان مش عاوزين نفتح على نفسنا اى حوار احنا مش عارفين أوله من اخره و افتكرى مركزك كويس و افتكرى البنات ... ولازم نحط فى الاعتبار ان الموضوع ده ممكن يكون بجد مش تاليف
كارمن / انهى موضوع
الراجل / لو كلامهم طلع صح و كارم فعلا حاول مع مهره
كارمن / دا اخوك يا بنى ادم
الراجل / و دى بنتك على فكره
كارمن / هو انا ليه حاسه انك مش عاوز اخوك يرجع
الراجل / و انا هعوز كدا ليه يعني انا كل اللى عاوزه اننا نتصدف بهدوء و عقل
كارمن / يعني مش عشان تفضل حاطت ايدك على الشركه مثلا
الراجل / بيتهيألي انى لو عاوز اعمل كدا كنت طفشت باتى من الشركه بدل ما بحاول اعلمها الشغل عشان تقدر تمسكه و تديره ... فى جميع الأحوال انتى لازم تهدى عشان انتى فعلا مش عارفه تفكرى و لا تشوفى الدنيا مظبوط... انا كدا كدا هطلع من هنا هسال على الناس دول و احاول اتواصل معاهم ... اهم حاجه ما تعمليش اى حاجه من غير ما ترجعيلى
كارمن / ما اوعدكش
الرجل / براحتك فى جميع الأحوال اى حاجه غلط هتعمليها مش هتضر حد غيرك انتى و بناتك و اكرم فبراحتك انتى بقي
الراجل يقوم يطلع بره يقابل صوفيا
صوفيا / خير يا عمو كانت عاوزه حضرتك فى ايه ؟
الراجل / اعتقد ان حوار ابوكى ده اثر على امك خالص ... انا بدأت اقلق عليها و بفكر نعرضها على دكتور نفسي
صوفيا / دى ماما !!
الراجل / انا لازم امشي عن اذنك
الراجل يمشي و صوفيا متابعاه بياتريس تدخل
بياتريس/ كتبوا لماما خروج هو عموا امير لسه عند ماما جوه
صوفيا / مشي
بياتريس / تمام هدخل ألم الحاجه خلينا نروح انا هموت من التعب
صوفيا تهز راسها و تطلع الموبايل و تتصل بحد
………………….
فى اوضه عمران
جابر ممدد على السرير بيقلب فى الموبايل و عمران بيتكلم فى التليفون
عمران / لا و الله ما نسيتش بس اديكي شايفه الوقت كان مضغوط ازاى على العموم بكره... للدرجادى ... لا ما فيش مشكله حاضر
جابر يتعدل فى قعدته و يتابع عمران
عمران / عارف المكان ده ... تمام مسافه السكه و هكون هناك ... تمام ... فى حفظ الله
عمران يقفل و يطلع طقم من الدولاب
جابر / خير
عمران / مش عارف بس صوفيا اخت مهره كانت عاوزه منى خدمه من كام يوم بس اتلهينا و ما عرفناش نتكلم
جابر / خير برده
عمران / ما اعرفش هروح اشوف اهو
جابر / تحب اجى معاك
عمران يبص لجابر باستغراب و ياخد الهدوم و يروح الحمام يلاقي نجاه و مهره و هند قاعدين بيتفرجوا على فيلم و ياذاذو لب
هند / انت خارج و لا ايه
عمران / مش هتاخر باذن الله
هند / خد بالك من نفسك
عمران يبتسم و يروح الحمام و يقفل عليه الباب نجاه تروح تخبط على باب اوضه جابر يفتح الباب
نجاه / هو انت مش هتروح معاه ؟
جابر / لا هنام
نجاه توطى صوتها و تقرب
نجاه / طب انت عارف هو رايح فين ؟
جابر يوطى صوته و يقرب
جابر / هو فى حاجه
هند/ هو فى حاجه يا ولاد؟
جابر / لا مفيش يا عمتى بتسألني لو عاوز اشرب شاى
هند / شاى !! و ماله نشرب شاى ... علقى على شاى لينا احنا كمان يا نوجه
نجاه / من عنيا يا عمتى
نجاه تبص لجابر مبتسم و تروح المطبخ
......................
فى كافيه
عمران / هو انا اكيد ما افهمش اى حاجه فى البيزنيس بس اعتقد فى ناس كتير عندنا فى العيله ممكن يساعدوكى زى ما تحبى استشارات معارف ممكن كمان يبعتوا ناس متخصصه تشتغل معاكى لحد ما تقفوا على رجليكوا
صوفيا / المشكله ان اونكل أمير مش هيقبل بالكلام ده و احنا مش هنقدر عليه بابا الوحيد اللى كان بيقدر يحطه فى حجمه انما احنا لا و مامى مش مهتمه خالص و انا خايفه على باتى جدا
عمران/ طب انا اقدر اعمل ايه
صوفيا / مش عارفه انا مش قصدى احطك فى اى مشاكل انا بس مش عارفه اعمل ايه انا كل ده جديد عليا
عمران / اصل دى أمور عائليه ما حدش يقدر يدخل فيها
صوفيا / يعني مش هتقدر تساعدني
عمران / هعمل اللى هقدر عليه و هقول لبابا و عمى امين برده محامى كويس جدا هيرجع الأوراق بتاعتكوا و يشوف هيقدروا يعملوا ايه اكيد مش هنسيبكوا لوحدكوا يعني
صوفيا / كنت عارفه انى كنت صح لما قررت اكلمك ... بجد انت مش عارف انت ريحتنى ازاى بجد انا مش عارفه اشكرك ازاى
عمران / مفيش داعى خالص لاى شكر انا ما عملتش اى حاجه
صوفيا / ازاى بس دا كفايا وقفتك جنبنا فى المستشفي و انك سمعت لى دلوقت و فكرت معايا فى حل واحد غيرك كان قال انا مالى بكل ده و كفايا كل اللى جرالك من ورانا
عمران / عيب الكلام ده على فكره ... تمام ... أنا هكلمهم و اشوف هيقدروا يعملوا ايه و اخليهم يكلموكى ... تحبى اوصلك و لا معاكى العربيه
صوفيا / لا بصراحه جيت فى كريم ... بس ممكن اطلب كريم عادى مش عاوزه اعطلك
عمران / لا و لا عطله و لا حاجه ما يصحش ... تمام اتفضلى
عمران يسيب فلوس و يقوم يروح يركب صوفيا تفتح الباب اللى جنبه تلاقيه مقفول عمران يفتح لها الباب اللى ورا
عمران / اركبى تعالى
صوفيا تستغرب و تركب و تقفل الباب
عمران / عندنا الحريم بيبقوا على راحتهم اكتر ورا
صوفيا / بس انا بحب اركب قدام اكتر على فكره
عمران / مره تانيه عشان بتشتت لما بيبقي حد راكب جنبى معلش واخد على الموتوسيكلات اكتر و كدا معلش كدا احسن
عمران يسوق و صوفيا تفتكر لما كان مركب مهره جنبه قدام المستشفي ملامحها تقلب و تبص الناحيه التانيه
........................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
